<font color='#000000'><p style="text-kashida: 0%"><font face="arial, helvetica" size=3><font face="arial, helvetica,verdana">اليوم اكيد الاربعاء...وفرصة مريم للراحه بتكون اكبر..على الاقل في وقت للسوالف واليلسه ويا خواتها...وغير جي ان ابوها ومرته دوم يطلعون بالويكند أي مكان..حاولت قد ما تقدر انها تخلص شغلها من وقت..غدا وغسل صحون وتنظيف الحجر والحمامات..كوي الملابس ومسح الدرايش والرفوف من الغبار وتنظيف البيت بشكل عام...حاولت مريم تخلص كل شي بوقت مبكر عسب الساعه اربع تكون جاهزه للسوالف واليلسه ويا روضه ونوره...رغم انها تدري بنوره ما بتيلس وياهن وايد..عندها ثانويه عامه ولازم تخلص دراسه والسوالف لاحقه عليها..
ابراهيم: مريم جهزتي شنطتي..يالله الباص يترياني...
مريم تحط له فوطه: انزين اذا بتتأخرون في النادي اتصل..مافيني ايلس احاتيك..
ابراهيم: انزين...بتصل..بس مب حافظ رقم بيتنا...
مريم: كم مره حفظتك..برهوم انت كبير الحين ولازم تكون حافظ رقم البيت او رقم ابوي على الاقل..لا سمح الله وصار لك شي بتدق على منو؟ لازم تحفظ..اليوم انا بكتبه لك في ورقه بحطها لك في الشنطه وباجر ما بكتب لك شي لازم تكون حافظنه..
ابراهيم يهز راسه بإيجاب: انزين..(يشهق) سمعي هرن الباص يالله بتأخر..بسرعه..
مريم تبتسم وهي تمشي معاه لين باب البيت البراني: يالله يا رونالدو زمانك..اللي يسمع وراك مباراه دوليه..
ابراهيم يبتسم: لاء ما وراي مباراه دوليه يا ذكيه...اليوم لعيبة النادي الكبار بيدربونا...وعشان جي انا مستانس بخلي عبدالرحيم يوقع لي..
تبتسم مريم ما تدري من عبد الرحيم ولا عمرها سمعت فيه..وابراهيم شكله متشقق بس ان شاء الله يستانس ما عنده غير هالنادي يقضي فيه وقت فراغه...بحكم انه صغير في البيت ومحد من عمره..وغير هالشي ان عنده عيال جيرانهم ما يقدرون يلعبون وياه..لانهم كذا مره ييونه البيت يلعبون وياه ويطردهم ابوه ومن هذاك الوقت واليهال ما يطيعون يلعبون وياه...
ردت مريم الصاله وشافتها خاليه والبيت شكله هادي ومحد فيه..ملل صدق من الخاطر..روضه ردت الساعه 3:00 من المدرسه ورقدت وللحين ما نشت..ونوره تدرس في ميلس الحريم...ابراهيم راح النادي...وابوها للحين هو ومرته راقدين من عقب الغدا...لا صلاه ولا هم يحزنون..
"عيل عبدالله وين؟؟ بسير اشوفه يمكن راقد هو الثاني.."
سارت لحجرته بطلت الباب بشوي شوي..دام الباب مفتوح اكيد عبدالله مب موجود او راقد وحده من الثنتين بس...طالعت بس مثل ما توقعت ما كان موجود..وشكل الغرفه مقبره..على قولتها بتسلي عمرها...
"يالله دام انه مب موجود فرصه ارتب حجرته..وان شاء الله ما يدخل بس وانا ارتبها..اخاف يجتلني فيها واموت قاصره عمر...مادري شو يتحراني باخذ منها...كلها على بعضها كناديره وقمصان..مادري على شو يخاف...هالولد صدق غريب...(ابتسمت) عيل لو انا عايشه عند امي بالسعوديه..شو حياة محمد بتكون..!! بيكون عبثي مرتب ولا كيف..(تهز راسها بالنفي) لا ما صدق حد مبعثر وحالته حاله شرات هالولد..بيذبحني صدق.."
وخت راسها تيمع كناديره وقمصانه..بتغسلهن بس باجر هب اليوم..بالمره تغسل وياهن ثياب برهوم مال النادي..تحسست شي في مخبا عبدالله..وطلعته جي بدون سبب بس فضول...كيس صغير فاضي..شفاف...طالعت فيه بغرابه وعقته بالزباله..
"شو سالفة هالاكياس وايد الاقي منها في زبالته وفي مخابيه..شو يبيعون داخل هالجيس؟ غريبه والله.."
روضه تفتح الباب بشوي شوي:شو تسوين هني؟
فزت مريم: خوفتيني بسم الله..تحريتج عبود والله...
روضه تبتسم وشكلها توها ناشه من الرقاد: بغسل ويهي وبصلي العصر وبييج..بخبرج شو صار بالمدرسه اليوم..
مريم تبتسم: لين ما تخلصين بسير اسوي لنا كوبين نسكافيه..
روضه: انزين..
ردت مريم ملابس عبدالله مكانهن وقررت تييهن باجر عقب ما تستأذن منه في ترتيب حجرته مافيها تضيع شي ويكسر راسها وييب اجلها..سارت المطبخ وسوت لها ولنوره وروضه نسكافيه..
وحطت بسكويت وكوب نسكافيه واحد وسارت لميلس الحريم..وشافت اختها مسنده راسها على الطاوله وراقده على الكتاب...غضمتها صدق..
مريم بحنان: نوره..نوره حبيبتي نشي..ارقدي في حجرتنا وبعدين ادرسي لازم تريحين شوي...
نوره انتبهت: لا انا مب راقده بس تعبت..
مريم: انزين استريحي..يبت لج نسكافيه وبسكويت كلي واشربي وان شاء الله تحسين بنشاط..
ابتسمت نوره من خاطرها...وطالعت الكتاب عشان مريم تفهم وتطلع..
نوره: خلاص انا بدرس سلمي على روضه..
ابتسمت مريم وظهرت عنها...ونوره للحين مبتسمه.." حتى امي ما تحاتيني هالكثر...من شو مخلوقه هالانسانه...مب حنان كل هاللي بداخلها...صدق انه جذاب اللي قال فاقد الشئ لا يعطيه...حكمه يايه بالغلط في الدنيا انا ما صدقها.."
يلست تعابل اوراقها وانشغلت بالنسكافيه وبكتاب الفيزياء...
في حجرتهن...يلسن على الارض يشربن النسكافيه ويسولفن...كانت مريم مستانسه ان اليوم اربعاء..راحه وفكه من كل شي واكثر من جي سوالف بدون رقيب ولا حسيب..
روضه: يا حظهن ربيعاتي يا مريوم لو تعرفين شو يسوّن...!!
مريم بإندماج: شو يسوّن..؟
روضه: يأجرن ديفي ديات ويسهرن عليها للفجر مع خواتهن وبنات عمومتهن..
مريم بفضول: شو يعني هاللي قلتيها من ساعه..هالكلمه اللي مادري شو اسمها..؟
روضه تضحك: الدي في دي..؟
مريم تهز راسها: هيه هذا شو هو؟
روضه: سيدي في الكمبيوتر ينحط وفيه فلم...
مريم: وليش العباله خلهن يشوفنه في التلفزيون والفيديو...
روضه حايسها حلجها: تطور..عصر السرعه...نحن موبايلات ما عندنا...
مريم تهز راسها باستغراب: نحن فيديو ما عندنا...تبين نفكر في الدفدفات مالج انتي وربعج...
زين هاللحظه ان روضه ما ماتت على كلمة مريم الاخيره من الضحك...ومريم تمت تطالعها مبتسمه..هالروضه عسل مهما سوت..ولها في قلب مريم مكانه خاصه...على الاقل الوحيده اللي دومها في صف مريم كانت ظالمه ولا مظلومه..
انفتح باب حجرتهن وهن يضحكن...واختفت ضحكاتهن فجأه...
ام عبدالله: روضوه انا بسير ويا ابوج...خلي بالج من التلفون...(وطالعت مريم) لا تخلين حد يدقه..واذا أي رقم اتصل غير ابوج لا تردين عليه..انزين؟
روضه مبتسمه ببلاده: انزين..
وخت مريم راسها..وام عبدالله طلعت...ونشت روضه تطالع من جامة حجرتهن اللي تطل على حوش السياره وشافت ابوها يطّلع السياره وامها وياه...وشكلهم روحوا...
ابتسمت روضه وهي تطالع مريم وتنهدت..
مريم بادلتها نفس الابتسامه وشلت اكواب النسكافيه: بتكلمين شموس صح؟
روضه تبتسم اكثر: هيه (وغمزت لها) بقولج شي بعدين..
راحت مريم المطبخ...وروضه سارت تتصل بشموس..اللي ردت على التلفون بعد ساعه على كثر ما دق...
روضه: لو ما رديتي احسن...
شمسه: فديتها والله فديتها اللي تتصل فيني وللحين ما نستني..
روضه: هيه قردني قردني..عوذ بالله منج...قاطعه وخقاقه..
شمسه: شسوي عاد يا روضوه..ما حصلت حد اتدلع عليه واتغلى الا انتي...
روضه : شحالها حبيبتي ان شاء الله بخير..
شمسه: تسلم عليج..متولهه موت..
روضه: والله المدرسه ما تسوى بدونج وحيده انا والله...يالله تعالي السنه اليايه مصختيها عاد...
شمسه: شو الفايده لو ييت..بتكونين ثانويه عامه...والسنه اللي عقبها بكون بروحي...
روضه تغير جو: شو رايج ارسب عشان اتم وياج..
شمسه تضحك: هيه انا موافقه..
روضه: عنلاتج يالدبه بدل ما تنصحيني وتقولين لي درسي ..تشجعيني على الرسوب..صدق ما منج فايده..
شمسه: انزين اقولج روضه..والله ادري بتعصبين علي بس مب بايدي...
روضه: بسم الله شياج؟
شمسه: الحين لازم ابند...اليوم سعيد بيرد من المستشفى...ولازم ارتب حجرته وابخر البيت...واساعد امايه في المطبخ...
روضه تضايجت: اوكي خلاص..بس ما قلتي لي متى سار المستشفى..؟
شمسه: سالفه طويله بعدين اقولج بس حجزوه هناك وقالوا ما يطلع الا كل ويك اند..
روضه: ليش ان شاء الله..سكن جامعه هو؟ ولا شو السالفه؟
شمسه تضحك: ابد ما تبطلين حركات الطنازه..يا غبيه هو يتعالج نفسياً الحين ولازم يتم تحت الملاحظه اربع وعشرين ساعه..بس يعطونه اجازه مثل ما قلتي شرات قوم الجامعه...والدوامات مال الامارات البعيده عن بعضها مثل الشباب اللي من بوظبي يشتغلون في الفجيره والعكس فهمتي؟
روضه: هيه..زين روحي وحبي لي امج...وسلمي على خطيبي؟
شمسه: للحين ما بطلتي ..للحين عينج على ابوي...ما يباج وعنده شيخة الحريم كلهن...
روضه: هو بس وده بإشاره مني...يتمنى اصلاً...
<table cellspacing=0 cellpadding=0 width="98%" align=center border=0>
<tbody>
<tr>
<td>
<p style="text-kashida: 0%"><font face="arial, helvetica" size=3><font face="arial, helvetica,verdana">شمسه: والله انج..تحفه صدق..يالله روحي وان شاء الله يوم تفضين دقي لي يوم الجمعه ان رمتي او أي يوم...تعرفين ماقدر اتصل بيتكم ما فيني حد يهزبج ماعرف متى مواعيدج...
روضه تبتسم: اوكي يوم يظهرون بدق لج..اي وقت...امووااح حبيبتي..
شمسه مبتسمه: يالله باي عمري..سلمي على نواري والله يوفقها...وحبي برهوم..وسلام خاص للريم شيخة كل الحريم..
روضه: احم احم..
شمسه: وسلام لاغلى صديقه...
روضه: بس..؟؟
شمسه: يالله باي امايا تزقرني...بعدين بتغزل فيج..يا حبج للمديح يا بنت سالم..
روضه تضحك: يالله باي ...
بندت روضه وهي للحين تحس بالملل..مافي شي في حياتها فيه اثاره...وبلحظه غبيه تمنت لو عبدالله اخوها مريض بدال سعيد..عشان تستوي كل شوي اثاره في بيتهم..يا يتخبل عليهم الولد يا يظهرون المستشفى وجي...بس ردت تضحك وتحمد الله على نعمة العافيه...
مريم اللي يالسه تقلب التلفزيون: خلصتي تلفون؟
روضه تطالعها بملل: هيه...مريم ما مليتي من يلسة البيت؟
مريم ما لفت عليها: تعودت خلاص...كثرة الدق تفج اللحام...من كثر ما انا متعوده تفجج اللحام وصار عندي حصانه ضد الملل...بس مب دايمه..ترى تييني حالات..
ابتسمت روضه...وسارت حجرتها..انسدحت على شبريتها وسحبت كتابها بتقرا فيه شوي يمكن تقدر تكسر حاجز الملل...مرسومه خريطه على الكتاب من برا..يت عينها على طول في شي في وسط الخريطه وبخبالها المعهود نشت رايحه الصاله...
روضه: مريوووم...سلام خاص من شموس..تقول سلمي على الريم شيخة الحريم..
مريم تبتسم: فديتها والله...زين حد يدلعني..الله يجبر بخاطرها..بس وين شيخة الحريم قويه شوي..
روضه: وانتي عاد ما تقبلين المجاملات..يعني شو تبينها تقول مثلاً...زين سمعي..امي ما بترد الا في الليل وهاي فرصه نادره...شو رايج ندق حق خالوه هاجر؟
انصعقت مريم..هاجر...."هاجر...امي..حبيب تي.."
مريم: لا لا روضوه مافينا على المشاكل..تخيلي ما ردت وعقب تشوف رقمنا في الكاشف وترد تدق..ويتخبرها ابوي من عطاها الرقم وعقبها تعرفين المذبحه اللي ممكن تصير...
روضه: يالله شو هالتشاؤم الفضيع..اما انتي.!! مريوم يالخبله..امج وين بتطلع يعني؟
وبعدين لو ما ردت مب مهم..بندق على ريلها وقولي له انج اتصلتي تبين تسلمين عليها وقولي له يوصل لها سلامج وانج بخير ما تشكين باس وانج بتطلعين ويانا في رحله العين نخيّم...عشان تعرف ان محد في البيت وما تدق...
مريم: لا يا شيخه مشكوره مابا..شو من تخييم في بداية الصيف...مرات عليج حركات تأليف ما تمشي على حد...
روضه بطرف عينها: مريم ودري عنج هالرعب...يالله متى تصرفين نفسج..متى تعتمدين على تصرفاتج ويكون لج تدبيرج...ليش تخلين الامور مثل ماهي...الله عطاج العقل عشان تفكرين...دايماً حطي حلول واحتمالات..بس ابعدي عن الاسوأ فكري بالايجابي قبل السلبي..
مريم تتنهد وبإنكسار مبالغ فيه:روضه مافيني على المشاكل ويا ابوي...
روضه: منو بيقوله يعني...تتوقعين انا..اذا على نوره في ميلس الحريم ما بتطلع...انا بتصل وبكلمهم...(وتبتسم بفرح) عندي بطاقتين...
مريم مستغربه: من وين يبتيهن؟
روضه بشطانه: سرقتهن من بوك عبود....
مريم: غربل الله ابليسج..لا لا مب داقه لامي من فلوس حرام...روحي روحي..
روضه: يا الله شو هالمخلوقه الفضائيه...والله العظيم اني مشتريتنهم من الدكان حلال والله ذبح حلال....انتي تحفه..
مريم تضحك: شو ذبح حلال انتي..لا تسوين لنا شرات قوطي الملح حاطين عليه حلال..ماحيده كائن حي...المهم من وين يبتي ستين درهم..اعترفي...!!
روضه تبتسم: يوم نتصل وعقب ما نخلص بقولج بس والله العظيم انها حلال حلفت بالله..
مريم تبتسم وبدت تنفعل:اوكي نتصل..انا بطلع برا الصاله عشان اذا وقفت سيارة ابوي اقولج بندي..لين ما تدقين الرقم..
روضه ملت من خوف مريم: والله انتي ما عندج سالفه..اهلي طالعين الحين شو بيردهم يعني؟
مريم: ربج عاد..ما تعرفين اني اكبر منحوسه في العالم...
<table cellspacing=2 cellpadding=0 width="100%" border=0>
<tbody>
<tr>
<td align=middle width=100 height=20></td></tr>
<tr>
<td valign=top height=26>
<table cellspacing=0 cellpadding=0 width="98%" align=center border=0>
<tbody>
<tr>
<td>
<p style="text-kashida: 0%"><font face="arial, helvetica" size=3><font face="arial, helvetica,verdana">بندت مريم ويلست عند التلفون تتريا متى تمر خمس دقايق ويزقر محمد امه من بيت جارتهم...
روضه: وينه ليش بند؟
مريم: قلت لج يا روضوه امي محد..انتي تبين تييبين اجلي...
روضه: انا لله وانا اليه راجعون...انتي امج حملت فيج اكيد وهي تشوف السنافر وتأثرت بسنفور جبان...
مريم تبتسم بدون نفس: يا سخافتج...بعدين متفيجه تدقين سوالف ويا حمود..عيب روضوه تخيلي امج درت..
روضه تضحك: بتذبحج انتي بتقول انج انتي اللي خربتيني...وتبين تعرفيني على اخوج..بطلع منها مثل الشعره من العجين وكله على راسج..
مريم ضحكت: مرت خمس دقايق ادق؟
روضه: دقي يا خبله شو تتريين؟
دقت مريم..وقلبها يدق.."امي حياتي..ولهت عليها...مادري شو بقول لها..!!"
كانت مريم ترتجف شوق وهي تدق وعطاها الرقم مقطوع..
مريم شهقت: رووضوه مقطوع..
روضه تير التلفون عنها: وين مقطوع...شكلج من الزيغه داقه غلط...هاتي انا اتصل لج...
ردت روضه تدق وعلى طول ردت عليها حرمه...
مدت روضه التلفون لمريم وهي متبسمه...
مريم بإرتباك: السلام عليكم...
ام محمد مبتسمه بهدوء وقلبها يحترق شوق: وعليكم السلام ورحمة الله...مريم يا بعدي قلبي...
مريم بدون مقدمات صاحت: امـ ــايه...!!!
ام محمد بتأثر: ليه تبكي يا مريم...بسم الله عليكِ..!!
مريم تصيح من خاطرها وتفرغ كل تعبها وضيجها بالتلفون...وتعبت من تمثيل دور الانسانه السعيده...وام محمد صدق مصدومه من خاطرها...
مريم تصيح: امايه اباج...
ام محمد مصدومه: وش فيكِ يا مريم...ليكون ابوكِ زعلك؟
مريم تصيح: محد زعلني يا امايه...بس والله اني متولهه عليج..من خاطريه متولهه..وتعبانه نفسياً وابى اشوفج...
ام محمد دمعت: يا حبيبتي يا مريم...مهو بإيدي ولا ايدك...كلمي ابوكِ يمكن يرضى..مع اني اعرفه سالم راسه يابس ومهو بطايع..
مريم تشهق من الصياح: امي اذا ماقدرت اشوفج هالفتره صدقيني بموت..بموت يمه..
ام محمد بكت من خاطرها: ليه تقولي كذا...وانا من لي غيرك..يهون عليكِ تحرقي قلبي بهالكلام...
روضه ما قدرت تمسك نفسها ويلست تصيح من خاطرها طلعت برا الصاله وتساندت بجدارها من برا وتمت تصيح من خاطرها...ما قدرت تتحمل...تشوف اختها انهارت وهي تصيح...اول مره تشوف مريم تبكي بحرقه وهي اللي ياما خبت وياما سكتت ورضت بكل شي ينكتب لها...تشوف اختها تنهار..وهي ساكته ما تقدر تسوي شي...
مريم تمسح دموعها: امايه فديتج سامحيني والله انفعلت ما تعرفين كثر شوقي لج يالغاليه...
ام محمد تبتسم: كيفك يا مريم..ان شاء الله امورك تمام...وصحتك زينه؟
مريم تبتسم لحنان امها: بخير يا امايه..صدقيني انا جسدياً بخير...مب مضايقني غير اني ما شوفج...ابى بس اشوفج وارتاح من كل اللي فيني...
ام محمد بحزن: اصبري يا مريم..ان الله مع الصابرين..واسمعي كلام ابوكِ وحرمته...تراها بحسبة امك وهي اللي ربتك وصبرت عليكِ...ومقامها من مقامي..
مريم بقهر: تخسي والله...بعده ما انخلق يا امايه اللي يكون بمكانج...انتي محد يسواج ولا يسوى حتى التراب اللي تمشين عليه...فلا تقارنين نفسج مره ثانيه بأي حد...
ام محمد ابتسمت مستانسه: بس ام عبدالله تعبت فيكِ وربتك مفروض ما تعصينها في شي...لو ما تبينها مثلي على الاقل اسمعي كلامها..
مريم بجديه: عمري ما قلت لها لاء يا امايه والله...لا تحاتين من هالناحيه..
ام محمد: بارك الله فيكِ هذا العشم يا مريم..(تتنهد) كيف اخوانك وخواتك ان شاء الله انهم بخير..؟
مريم: كلهم بخير..(ولفت بتشوف روضه بس ما لقتها) توها روضوه كانت هني مادري وين سارت...
ونشت مريم وهي تسولف لامها وماسكه التلفون ووايجت من باب الصاله وشافت روضه واقفه عند اليدار تطالع بعيد وشكلها سرحانه..
مريم: روضوه امايه تسلم عليج..
روضه اللي كان مبين انها صاحت: الله يسلمها سلمي عليها...
ام محمد: بعد قلبي هذي البنت الصغيره؟ صح؟
مريم تبتسم: هذي شيخة كل اللي في البيت يا امايه...هذي حبيبتي والله..
ام محمد مبتسمه: الله لا يغير عليكم...يا بنتي...
مريم: شخبارها اماني وفهودي؟
ام محمد: والله اماني مطلعه لي قرون ..وش اقولك يا مريم..طفشتني ومللتني...طول الوقت تتشكى وتتذمر...
مريم: امايه اصبري عليها تعرفين الحين داخله على مرحلة مراهقه..الله يعينج عليها لين ما تخلص 18 سنه...بتم اذيه...بس اكسبيها صديقه..
ام محمد: اختك عينها على اللي في ايد غيرها..مهي مثل اخوانها قنوعه...وكل شي تتحسس منه...
مريم: امايه اعطيني اياها برمسها..
ام محمد: والله نايمه يا بنتي من يوم رجعت من المدرسه...بالغصب رضت اليوم تروح المدرسه بعد طلعت الروح...
مريم: زين حمود عندج؟
ام محمد مبتسمه: ايه خذيه بس لا تطولين لا يزعل ابوكِ عليك..
مريم: لا تحاتين فديتج...
شل محمد السماعه...
محمد: الحين انتي مريم صدق ولا اختها الغبيه..؟
مريم: الحين روضوه غبيه؟ الله يسامحك...
روضه دخلت الصاله: قولي له حرمته غبيه مب انا...انا روضه شيخة البنات كلهن..
محمد: لا يا شيخه قولي لها شيخه على نفسها بس..
مريم تضحك: عاد الحين اجتمعوا المخبل...روضه ومحمد...
محمد: مالت عليها وعلى اسمها...روضه...ليه ما سميتوها حضانه احسن..روضه كثير عليها..
مريم ماتت ضحك: والله لو تدري شو قلت بتنتف ريشك حمود...
روضه: ليش شو قال؟</font></font></p></td></tr></tbody></table>
<p style="text-kashida: 0%"><font face="arial, helvetica" size=3><font face="arial, helvetica,verdana">مريم حست السالفه مصخت: خلاص محمد عيب عليك وانتي يا روضه بسج عاد..والله لو تدري عموه عادي تذبحنا...
محمد: ذبحها جدي..!!!تذبحكم ليه..خرفان ولا دجاج...؟
مريم صخت ما بتعيب على ام عبدالله وروضه واقفه: زين محمد ما دورت لك شغل؟
محمد: اريد اجي الامارات بس امي واقفه لي شوكه في البلعوم..تخاف اني لا رحت هناك ما ارجع...
مريم: تخاف عليك من مصير اختك..بس يا ليت تيي هني والله وناسه..
روضه: لا دخيلج ما نباه..روحنا مب متحملينه تلفون..ييينا الامارات..انا بسافر بلد ثاني..
محمد: قولي لها احسن بتريح الدوله من ثقالة دمها...
قالت مريم لروضه شو قال محمد..
روضه: لا دخيلك انت...اللي يسمعك وانت تسولف ميت على خفة دمك...اثقل دم بحياتي شفته..الله يعين خالوه هاجر..
محمد يتمصخر: ايه..خالوه هاجر...!!!
مريم: يا ويلي على حشرتكم...والله انكم اذيه..صدق صدق...انتوا الاثنين لو اجتمتعوا بمكان بتدمرونه...
وانقطعت البطاقه قبل يرد محمد....
مريم تبند السماعه: خلصت البطاقه...وييه والله هالولد حشره...!!!
روضه بحماس: والله تتصلين من البطاقه الثانيه...ما بيبرد خاطريه الا لما أأدبه...
مريم: خلي البطاقه ليوم ثاني بنتصل فيها روضوه عن العبث والبطره...
روضه تشل التلفون وتدق الرقم: ما تبين ترمسين كيفج ..انا بسبه شوي وببند...
مريم: ان لله وانا اليه راجعون..روضوه مافينا على المشاكل..
روضه مطنشتنها: روحي راقبي اخاف يي ابوي وانا ارمسه...
رد محمد...
محمد: هاه خلصت البطاقه..؟
روضه مبتسمه: هيه...
محمد ميز الصوت الحين: انت مو مريم....!!! انتِ الهبله الثانيه صح؟ روضه مدري حضانه؟
روضه بتنفجر ضحك: هاهاها سخيفه تصدق...
محمد: لا برهني لي...
روضه: ايه اسمع انت..احترمني انا اكبر عنك...ترى لولاي ما رمست مريوم هالخبله...تعرف ولا ما تعرف؟ احمد ربك اني وهبتك فرصه تسمع صوتها..
محمد: احمد ربي الحمدلله بس مو عليك...الحمدلله انك منتي اختي ولا كان ذبحتك من زمان...
روضه: ودك بس انت اكون اختك...
محمد: الله لا يقول ان شاء الله..بدفنك وانت حيه..لو لي اخت طول لسانها كذا كان ذبحتها من سنين...
روضه: غبي والله...
محمد: بجي الامارات وبعلمك من الغبي...
روضه: الله يعين البلاد جان بتييها ...قسم بالله لوعة جبد بتصير...
محمد: ماني جاي اشحت منك..جاي اشتغل..تفهمين يا بقره..!!
مريم ردت الصاله : روضوه ليكون طول الوقت ترمسين حمود..عيب والله تصكين الحين والله بزعل عليج..
روضه: اسكتي الله يخليج...
محمد: لا تسكتين اختي تفهمين؟
روضه: زين انت الثاني...يالله روح روح..انا بصكر الحين خسارة بيزاتي في واحد اهبل مثلك..
محمد: طيب يا حضانه اعطيني اختي...!!
روضه قبل تبند: محمد...ترا اسولف وياك عن تزعل...هاه رمس مريامي...تعال الامارات أي وقت..على الاقل بلاقي حد اتحرش فيه...ويتحمل طولة لساني...
محمد مبتسم: بجي وليه انا بنتظر اذن منك...ضفي وجهك وفكينا عاد...
روضه مصدومه من دفاشته: شو يعني ضفي وجهك؟
محمد يضحك: وانا وش دراني وش تفسيرها بالاماراتي..اكيد فيها حرف ياء مبلوع..مثل عوايدكم..(ويضحك)
مريم تضحك: يعني قلبي ويهج روضوه..
روضه حرجت: صدق انك ما تنعطى ويه...اذلف واقلب ويهك انت يالخسف..
محمد يضحك: توك فهمتي...بدري يا شيخه...
روضه: مع السلامه..يا اهبل...!!!
مسكت مريم السماعه وهي مبتسمه...
مريم: اشوفك مستانس على السوالف حضرتك؟
محمد: ابتلينا عاد...
مريم: زين يالله سلم على امي واماني وفهود..وعمي طلال..
محمد: الله يسلمك من كل مكروه..ديري بالك على حالك...وسلمي على اختك الغبيه هذي...( يبتسم) عجبتني ودخلت مزاجي...
مريم: لا والله..هيه استح على ويهك..!!!
محمد: زين يا شريفة مكه...بروح عند صاحبي هالحين..يالله بخليكِ..
مريم مبتسمه: باي حبيبي...
بندت مريم عن محمد وهي مبتسمه..وطالعت روضه اللي هي الثانيه مبتسمه...
روضه: استانست عليه...
مريم: فديته والله..مستوي شيطان...
روضه مبتسمه: سوالف هالولد...
مريم: بس والله عيب اخليج ترمسينه الحين لو حد درا شو بنسوي...
روضه: اووه..يا مبادئ يا قيم..هو الا تلفون ما حبينا بعض وما سوينا شي غلط..
مريم احمرت: شو حبينا بعض انتي الثانيه..ما ناقص الا هذا...
روضه تبتسم: قصوره بعد احبه هالاهبل...مستواي ارقى...!!
مريم مستنكره: هيه ودج بس انتي بمحمد اخوي..تتمنين نظره منه..
روضه تضحك: لا حياتي ما بعرس الا بولد بلادي فديته...!!
مريم تطالعها مستنكره: انزين..خله يي اول بعدين تفاخري فيه..
روضه مبتسمه: عصبتي؟
مريم : لا والله اسولف وياج..ليش اعصب...بس احذرج من اللي تسوينه...!!
روضه: ادريبج طيبه..يالله تعالي بنشوف التلفزيون...
مريم تقرب منها وتلوي عليها الشي اللي خلى روضه تستغرب...
مريم: مشكوره حبيبة قلبي...ماعرف بدونج انا من اكون..
روضه ابتسمت وهي تلوي عليها اكثر: ولو حبيبتي..اذا اختج ما عاونتج..تترين العون من من؟
مريم تبتسم: زين حطي لنا أي شي نشوفه..على الاقل نكسر حاجز الملل...
روضه تيلس على الكنبه عند مريم ويلسن يطالعن التلفزيون...مستانسات على السوالف ويا قوم السعوديه اللي ونسوووهم للاخر..
..................
<table cellspacing=0 cellpadding=0 width="98%" align=center border=0>
<tbody>
<tr>
<td>
<p style="text-kashida: 0%"><font face="arial, helvetica" size=3><font face="arial, helvetica,verdana">عقب اذان المغرب على طول..ومن ردوا الناس من المسايد..نزلت بسرعه للصاله كلها شوق وفرح...اليوم بيرد...اليوم بتستانس...وتدعي في كل خطوه انه يكون لو شوي على الاقل تغير....
يلست في الصاله او بالاحرى تمت واقفه تروح يمين ويسار..من الفرحه مب قادره تمسك نفسها...
ام سعيد: يا بوج دوختينا يلسي..صدعتي براسي..رايحه يمين ويسار..
شمسه بفرح: ما تعرفين يا امايه كثر شو ولهت عليه والله ان البيت بدونه ما يسوى شي..انا ما صدقت رد من امريكا يروح المستشفى الحين...ماصبر عنه والله..
ام سعيد مستانسه: باجر تعرسين وتنسينه...
شمسه: الا سعيد..الا سعيد..هذا كل شي يا امايه والله..ما تعرفين سعيد شو يعني لي...
ام سعيد: يالله عسى لا يحرمكم من بعض يا بنتي..
وسمعت هرن السياره وشافت البشكاره تربع برا تفتح الباب..كانت بتطلع وياها بس كان في دكتور ياي ويا بوسعيد يبا يرمسه شوي في الميلس ويوصيه على سعيد وعقب خالها حمد بيرده المستشفى..طبعا بيرد الدكتور مب سعيد..لان سعيد بيتم في البيت لين الجمعه بالليل...
اول ما وصل الصاله كان بروحه لان خالها وابوها ساروا الميلس مع الطبيب..وسعيد سار الصاله بروحه...واول ما فتح باب الصاله وقفت ام سعيد مستانسه وفيها صيحه..بس بو سعيد حلف عليها يمين ما تصيح ولا تنزل دمعه عشان الريال ما يتحسس ويكره العيشه اللي عايشنها..والحين بتدور اكبر معركه واكبر حرب نفسيه بين ام سعيد وسعيد وشمسه...كيف بيسيطرن على اعمارهن ما يصيحن..بيحاولن قد ما يقدرن لو انهن يدرن ما بيرومن...
سعيد ابتسم وهذا انجاز بحد ذاته...سار عند امه وحبها على راسها ولوى عليها...غمض عيونه وهي في حضنه تقاوم انها ما تصيح..وهو يحس انها وحشته فوق ما يتخيل...كل يوم وياه في البيت..كل يوم تشوفه ويشوفها ما درى انه لو غاب عنها مره ثانيه بيرد يوله عليها هالكثر..
ام سعيد تقاوم الدمعه: الحمدلله على السلامه فديت هالعرضه..!!
سعيد مبتسم من قلبه: الله يسلمج يا اغلى الناس...
يرت ايده تحب كفوفه ولوت عليه وهو مسك كفها وتم يحبها على راسها..وشمسه واقفه مبتسمه تصارع الصياح وللحين وهي وامها منتصرات في حرب الدموع..
ام سعيد: ايلس فديت روحك...ايلس يعلني ما خليت من هالويه...
سعيد: صبري بسلم على شموستي...!!
قربت منه شمسه مبتسمه وبدون مقدمات لوت عليه وصاحت وخسرت معركتها ويا دموعها..وهو ابتسم...
شمسه: سعيد والله تولهت عليك..
سعيد: الا هو يوم واحد..مفروض تكوني افتكيتي من صدعتي..!!
شمسه تمسح دموعها: والله يا سعيد حسيت بفراغ كبير بعدك...
سعيد يتنهد: تعبان وايد شموس...اريد ارقد..
شمسه ابتسمت: جهزت لك حجرتك تقدر تروح تتسبح وترقد الحين..تبانا نوعيك متى؟
سعيد اختفت ابتسامته: لا شمسه..الدكتور قالي غير حجرتك...لازم ارقد في حجره ثانيه..
شمسه استغربت بس ما سألته ليش وكل اللي فهمته ان الدكتور يالس يسوي حاجز بينه وبين أي شي يربطه في عالمه الماضي...
شمسه: شو رايك ترقد في حجرتي الليله لين ما نرتب الحجر باجر...
سعيد: بترقدين في حجرتي؟
شمسه: هيه اكيد..وانت ارقد في حجرتي...(وغمزت له) بس عن تفتش فيها اسرار..
ام سعيد تضحك: اسرار شو يالخبله...!!
سعيد مبتسم: مادريبها..زين امايه فديت روحج انا طالع فوق برتاح شوي..هلكوني اليوم بالمستشفى..
شمسه: بطلع وياك...(ويودت ايده وطلعت فوق وياه) لا تقول ما تباني غصبا عنك بطلع وياك..
سعيد: انا اقدر اقول لاغلى ناسي لاء..تعرفين عمرج الكل بالكل...
شمسه قلبها يدق بقو..وايد خلال اربع وعشرين ساعه سعيد مب سعيد اللي طلع..هي تدري ان حالة الهدوء اللي هو فيها مؤقته...بس مع الاستمرار في العلاج النفسي اكيد بيكون توب على الاقل عقب كم من شهر...
سعيد: خلاص شموس انا بسبح وبرقد وباجر وعيني انزين..
شمسه: ما بتتعشى ويانا؟
سعيد: لا مالي خاطر والله...(ابتسم) تعشوا عني انتوا..
شمسه مبتسمه: زين روح اسبح وارقد وعن تفتش حجرتي هالمره الثانيه احذرك...
سعيد: ييبي لحافي ومخداتي مابا ارقد على مخدتج...
شمسه: انزين روح اسبح وببدل لك كل شي...
دخل عنها سعيد...دخل حجرتها...يحس جلساته البارحه واليوم لين الظهر كانت اوكي..ويحس ان في شي بداخله بدا يكبر وينمو...يمكنها فتحة امل..يمكن من يدري..كل اللي يهم بالموضوع ان سعيد بكل سرعه استجاب وبطريقه نادره للعلاج...
<table cellspacing=0 cellpadding=0 width="98%" align=center border=0>
<tbody>
<tr>
<td>
<p style="text-kashida: 0%"><font face="arial, helvetica" size=3><font face="arial, helvetica,verdana">في صالة البيت الصغيره كان ينط من مكان لمكان ويحاول يشرد بس مب قادر لان في حصار شديد عليه من كل الجهات...والبيت كان حشره وصراخ وضحكات بريئه...
فهد: إمسكيه لا يهرب يا اماني..
اماني تضحك: خايفه يا فهد..تعال انت هنا وانا بروح مكانك..
فهد يطنز عليها: يا خوّافه..!!!
اماني: طيب تعال انت مكاني..يوم اني خوّافه...
فهد بخوف: لا ماني بجاي..اخاف يصير فيني شي..
تضحك اماني وهي تشرد وتنط بهبل على المخدات....ويطلع لهم محمد من حجرته محتشر...
محمد يصارخ: اييه انتي وياه...وش عندكم؟
اماني : فهد جاب لنا عصفور من برا...وطار من ايده وما قدرنا نمسكه..
محمد يمسك فهد من اذنه: كم مره فهمتك تخلي العصافير في حالها...انت للحين كم ارتكبت جريمه في حق العصافير...بسألك سيرتك الاجراميه حافله بقتل العصافير؟
اماني ميته ضحك...ومحمد فيه ضحكه بس ماسك عمره..
فهد: هي الغبيه تلعب في حوشنا وانا مسكتها..
اماني تضحك: امي لو تعرف بتذبحك..
محمد يطالع اماني ويهد فهد: اقول كلمنا مريم اليوم..تسلم عليكم..
فهد طنشهم وراح يدور للعصفور بين المخدات...
اماني: وليه ما قومتوني..كم مره تتصل وانا مو موجوده؟ حرام عليكم..!!!
محمد: كنت بقولك بس امي قالت خلها تنام...
وقبل ترد اماني دخل بو محمد البيت وشكله معتفس فوق تحت...وحالته حاله..
محمد عاقد حياته وطالع ابوه بصمت..
اماني ركضت عنده: ابوي انت تعبان؟
بو محمد: وين امك؟
محمد: تصلي داخل؟
بو محمد بدون مقدمات دخل الحجره وشكله قفل الباب من داخل..واماني ومحمد وقفوا يطالعون بعضهم..اصلا هذا مب موعد رجعة ابوهم من دوامه..وشكله غير..اكيد في مصيبه صارت...
محمد بخوف: ليكون بس البلديه كشفت الورشه؟
اماني شهقت: لا تقول كذا يا محمد فال الله ولا فالك..
محمد: انا بسمع وش يقول لامي..وانتي تعالي معي..طيب؟
اماني: عيب يا محمد..والله عيب...
محمد متذمر: ما بيخبرونا بعدين..خلنا نعرف الحين..تعالي..
يت اماني ببطء ووقفت وياه تسمع شو يقولون اهلها داخل...كانت ام محمد من صوتها مبين انها مفجوعه من اللي يقوله لها بو محمد...
ام محمد : طيب وش بنسوي هالحين؟
بو محمد بيأس: والله ما عندي شي..مدري وش اسوي...
ام محمد: طيب نتسلف؟
بو محمد: ما اللي بنتسلف منه بكره يبي فلوسه كيف بنردها يا هاجر؟
ام محمد تفكر: مافي أي حل هالحين الا إننا نحوّل...يا بو محمد اسأل اصحابك ومعارفك..يمكن حد عنده سكن مناسب..
بو محمد: والفلوس متى بنسددها؟
ام محمد: مهي بمشكله بنخفف مصاريف البيت واحنا في وجه اجازه..ان شاء الله بيتوفر المبلغ..
تبتسم له بثقه وامل وهو يتنهد بتعب وخوف من بكره..
بو محمد: الله يسمع منك..بس هه عاد ما وصيك العيال ما يعرفوا بشي...
ام محمد: لاء يا طلال لازم يعرفوا...عشان يفهموا ويقدروا الظروف...لو ما عرفوا بيفكرون بس نحرمهم من طلباتهم..خلهم يعرفون الحال...15,000 مهيب شويه...
من ورا الباب كانت اماني مبطله عيونها لاخر اتساع..ومحمد موخي راسه بأسف...الحين هال 15,000 أي سماء بتمطرها عليهم...واي ارض بتنبثق فيها لهم..قمة اليأس لما تكون كل ابواب الحلول مؤصده امامك...!!!
اماني تبعد عن الباب: محمد !!!
محمد يغمض ويتسند بالطوفه: مصيبه مصيبه..!!
اماني: انت لازم تسوي شي..لازم تدبر نفسك وتشتغل...احنا لازم نتصرف..
فهد بعدما مسك العصفور: تتصرفون على شو؟وش اللي صار؟
اماني: ولا شي...طيّر العصفور لا تزعل امي هالحين..بتتضايق لو شافته..
محمد: بيت جديد وسكن جديد وايجار جديد ومصاريف جديده...يخرب بيت الفقر وسنينه...
اماني لاول مره تشوف محمد منفعل بهالطريقه...بس صدقه...يخرب بيت الفقر وسنينه...يذل بني ادم لين ما يقول بس..
اماني: محمد هدي اعصابك الحين يطلع ابوي ويفهم انك عرفت...
محمد دخل حجرته بضيج وصك الباب...
واماني تنهدت.."نحن ما نخلص من هالمصايب..كلما قلنا هانت انفتح لنا باب لجرح جديد...."
فهد يلاعب العصفور: ليه محمد زعلان..وش اللي صار يا اماني؟
اماني بضجر: يا فهد خل هالطير يقول لا اله الا الله ويطير..قتلته في ايدك..خله يطير..حرام عليك...
فهد مصّر: مانيب مطيّره..تبينه لك.انا اعرفك واعرف الاعيبك...
اماني: اووه انا وش اباه..اطلع وطيّره برا...هذا ان طار وانت نتفت ريش اهله تنتيف..
فهد طنشها وقعد عند التلفزيون والعصفور بين ايديه ملتعن...
قبل تدخل اماني حجرتها انفتح باب حجرة اهلها وطلعت ام محمد ومعاها ابو محمد..كانوا باردين ومب مبين على ملامحهم أي مصيبه الشي اللي خلى اماني تغص في عبرتها...على كثر ما يكتمون هالاهل مصايبهم وعلى كثر ما يحاولون يظهرون القوه في ويه كل مصايب الارض اللي تتحاذف عليهم..
بو محمد مبتسم: وين محمد؟
اماني: في غرفته..اناديه؟
ام محمد: ايه..وتعال يا فهد هنا اشوف وش في ايدك؟
فهد: يمه هذي عصفوره شفتها في الحوش ومالها حد..خليها تعيش عندنا الله يخليكِ..
ام محمد: والله ما كنت اعرف ان بيتنا بيتحول ملجأ يتامى..روح طيّره برا قبل اشويه على العشا..
فهد خاف: طيّب كله ولا الشوي..انا بطيّره..
ضحكت اماني من خاطرها على غباء فهد ودقت الباب على محمد اللي كان سرحان في عالم ثاني...ويشوف نفسه لا دراسه ولا شغل ولا أي شي ممكن يرجع عليه وعلى اهله بالفايده...
اماني: محمد ابوي يبغيك في الصاله..تعال (وهمست) شكلهم بيخبرونا..
محمد نش: طيب اجي الحين...صكري الباب..</font></font></p></td></tr></tbody></table>
.
.
في الميلس كان بو سعيد يالس ويا حمد خال العيال ومعاهم الدكتور النفسي اللي يابوه من المستشفى عشان يرمسهم ويخبرهم شو يسوون...
بو سعيد: والحين ما يحتاي نسوي له شي في البيت..
الدكتور: لا والله ما يحتاج شي..اهم شي ينتضم في الجلسات النفسيه عندنا...وبعدها لو انتضم ممكن تكون النتيجه ايجابيه...
حمد: وما بيحتاج علاج جسدي؟
الدكتور: ابداً...انتوا ما شاء الله جبتوه في وقت سريع..يعني الحاله ما صار لها اكثر من اسبوعين وشي...الحمدلله ما مر عليها شهر واكثر ولا كنتوا بتضطرون تعالجونه بالمسكنات وهذي لها اثار جانبيه خطيره..
بو سعيد يبلع ريجه: هو الحين بخير..؟
الدكتور: ماقدر اقولك بخير بخير..لكن ابنكم فيه ميزه تميزه عن غيره وهالشي نادر ما يصير..وهي سرعة استجابته للعلاج...
حمد: كيف يعني يا دكتور..؟
الدكتور: لما سألته في البدايه عن مشكلته...رفض يتكلم..وهو يحس انها فضيحه غير قابله للمسامحه...احساسه كان صعب خصوصا نظرة المجتمع له...وانتوا طبعا تعرفون قبلي ان ابنكم متفوق وله سمعه يعني بمعنى اصح شبه مشهور ومكرم من كذا مؤسسه..احساسه ان كان شي وانه صار شي ثاني هو اللي مأزمنه اكثر من فقدان زوجته...
بو سعيد: لا اله الا الله...والحل يا دكتور؟
الدكتور بهدوء: لازم سعيد يغير حجرته مثلما اتفقت انا وهو...ينزل يتناول كل وجباته معاكم...ويمارس حياته بشكل طبيعي..
حمد: بس ما طايع لنا يا دكتور...!!!يمكنه يقنعك وهني يلعب فينا...؟
الدكتور: لا انا اعرفه يتكلم بشكل صادق واحساسي انه متقبل العلاج وان شاء الله يتعالج بأقرب سرعه ممكنه...
حمد: هالمطلوب بس؟
الدكتور: طبعاً لاء...لا تنسى اهم شي من كل هالاشياء..وهو ان سعيد ما بيتم عمره كله في المستشفى..وحالته لو انتكست هني بتزيد المأساه...سعيد لازم يشغل نفسه...وعلاجه الوحيد لكل اللي قاعد يصير له هو الشغل...دوروا له على شغله يقضي فيها وقت فراغه اللي ذابحنه...واللي هو السبب في كل اللي صار له..
بو سعيد: بس سعيد ما خبرك شو يبى يشتغل؟
الدكتور مبتسم: خلاص فهمني شو يبا...سعيد طموح زياده على اللزوم..يطمح للقياده والاداره...وما بيرضى باقل من هذول...لكني فهمته بطريقتي انه لازم يبدا من الصفر وبعدها يثبت للي حواليه انه يستحق أي منصب راقي ينحط فيه...
بو سعيد: والحين شو؟
الدكتور: قدم اوراقه لاي شركه خاصه او مؤسسه حكوميه..وبيلاقي خير..وانا انصحك انك تقدم له في شركه بتروليه لان هذا مستواه...ما شاء الله شهادات سعيد تستحق اكثر من منصب وزاري...
حمد: الله يسامح اللي كان السبب في اللي هو فيه...
الدكتور: خلاص ما تبكي على اللبن المسكوب..فكر في اللي ياي...سعيد لازم يشتغل..وبعدها يستقر ...
بو سعيد استانس للكلمه الاخيره..ولو خبر ام سعيد عادي تتخبل من الوناسه...
حمد مبتسم: خير ان شاء الله يا دكتور..خل حالته تستقر...وبنات الحلال ما شاء الله وايدات...
بوسعيد مستانس: والله ما ندري كيف نشكرك يا دكتور...ما قصرت ثوابك عند الله..
الدكتور مبتسم: هذا واجبنا وهذا شغلنا اللي انخلقنا عشانه..بعدين الله يشفي سعيد وكل المرضى يارب...
حمد: زين دكتور ما نفتح وياه سالفة بنته؟
الدكتور: هالموضوع بشوفه وياه يوم السبت في الجلسه الصباحيه ان شاء الله..من هالناحيه لا تحاتي يا حمد..بحاول كثر ماقدر اشجعه يقوم بكل الخطوات الايجابيه بعيد عن المشاكل والمحاكم..يعني بنتعامل مع الموضوع بشكل سلمي وايجابي ويرضي كل الاطراف..
بوسعيد خلاص الدنيا مب واسعتنه من الفرحه...على الاقل سعيد حاله الحين اهون من قبل لو انه بس يوم واحد وتغير طفيف بس اهون من انه يتم على حاله القبلي..
نش الدكتور ووراه حمد بيوصله المستشفى وبو سعيد سار البيت بييلس ويا ام سعيد يقول لها شو قالهم الدكتور بالضبط ومنها بييلس ويا سعيد..ما يدري انه رقد خلاص..ومحد في الصاله الا شمسه وامها...
......................</font></font></p></td></tr></tbody></table></font></font></p></td></tr></tbody></table>
روضه: زين روحي راقبي لين ما اتصل....لا تحاتين حافظه الرقم عدل...
مريم تبتسم: اوكي..
طلعت مريم الحوش بين باب الصاله والباب الخارجي عشان تسمع لو ابوها وقف السياره او حد يا منهم...وروضه في الصاله تتصل...ولا على بالها...مب خايفه ولاشي ما تدري بالعواقب اللي ممكن تجنيها لو حد يعرف...كان التلفون يرن..واخيراً حد شله...
محمد بفرح: كنت داري انك بتتصلي هالاسبوع والله قلبي حس..
روضه ابتسمت: صدق؟
عاد روضه ما تصدق أي استهبال بتمشي معاه...
محمد اللي ما ميز الصوت: ايه والله...كيفك؟
روضه تخبلت على الرمسه: زينه ما اشكي باس..انت شحالك؟
محمد مستانس: والله الحمدلله...اقولك لو تأخرتي شوي بعد...متصله بدري يا شيخه..تذكرين متى اخر مره اتصلتي فيها؟
روضه ارتبكت: والله ما تعرف ظروفي غصب عني ..علوم علوم..خلك منها الحين..انت شحالك؟
محمد مستغرب: للحين ما سألتي عن امي..غريبه..ليكون نسيتيها...؟
روضه مصدومه: اووه نسيت امي...فديتها فديتها..شحالها يعلني ما خلى منها...
هني محمد استغرب اكثر: بس شحالها؟ ما تبين تكلمينها؟
روضه ارتبكت: اقول محمد.....
ودخلت مريم تطالع روضه بغرابه: للحين ما ردوا؟
روضه: لحقي علي ابتلشت في اخوج..يختي بخبرج السالفه يودي رمسيه..
ابتسمت مريم وهي تير السماعه برجفه وتأشر لروضه توقف عند باب الصاله تراقب لها..
مريم: السلام عليكم...
محمد مستغرب: اهلين وعليكم السلام..بسم الله توك تذكرتي السلام؟
مريم مبتسمه بعدما فهمت ان روضه استهبلت عليه: حمود انا مريم..هذيج روضه ختيه تستهبل عليك..
هني ويه روضه احترق ومحمد عصب...
محمد: متخلفه...!!!
مريم: شحالك حبيبي والله ولهت عليك...
محمد: لا تغيري الموضوع...اختك هالغبيه قولي لها لا ترد علي مره ثانيه ولا تتصل بيتنا..
مريم بهدوء: محمد انا اتكلم من بطاقه...لا تضيع الوقت في خبالك انت وروضه اختي..
محمد استحى: طيب والله واحشتني موت يا مريم..يا قاطعه يا اللي ما تستاهلين نقطه وحده من حب امي لك ودعواتها..كذا تخليها فوق الشهرين بدون اتصال..ولا كيف الحال..؟
مريم بحزن: غصبا عني والله...محمد اباها دخيلك..مافيني صبر...
محمد: صكري واتصلي بعد شوي بروح اناديها لك من بيت الجيران...نتصل فيكِ ولا بتتصلي؟
مريم برعب: لا انا عقب خمس دقايق بتصل..تكفي؟
محمد: وزياده بعد..يالله اخليكِ..
مريم: باي..</font></font></p></td></tr></tbody></table></font></font></p></font>
رد مع اقتباس
مواقع النشر (المفضلة)