<font color='#000000'>تسلمين حبوبة على المرور
والحين التكملة .....
دقات سريعه على الجرس كانت بتحرقه...ويتواصل الرنين..وتركض بسرعه ممزوجه بالبطء اللي غالباً ما يميز أي شخص في عمرها...مستعجله وهي تسوي لهم الغدا تفتح الباب..
ام محمد: طيب طيب...حرقت الجرس..
ولما قربت من الباب اكثر...
ام محمد: مين؟
اماني: افتحي يمه..من بيجيكم ذلحين يعني؟
ام محمد تفتح الباب:طيب وش فيكي معصبه..؟
اماني: السلام عليكم..
وترمي شنطتها في الممر اللي جدام الباب..
ام محمد تصك الباب: وعليكم السلام....
اماني معصبه: ساعه وانا واقفه عند الباب...
ام محمد: طيب ما طاح طولك يا شيخه...انتي زي ما انتي ما نقص منك شي..انا كنت بالمطبخ مشغوله..
اماني تروح غرفتها: ابدل واجيك ذلحين..
ابتسمت ام محمد وسارت تكمل شغلها في المطبخ..
واماني دخلت غرفتها وغيرت ثيابها وغسلت ويهها...وطلعت تفتح شعرها وتسحيه وعقبها بتربطه مره ثانيه...
" يعني لازم النكد هذا كل يوم...الله ياخذ اللي اخترع المدرسه ويفكنا منها..!!"
طلعت الصاله وراحت للمطبخ بيتهم مب كبير ابداً..يكفي الاشخاص الموجودين فيه..صح في اشياء وايده ما تكتمل الحياه وسيرها الا بها بس هم ما يملكونها رغم كل الحداثه اللي تعيش فيها الناس هالايام..
اماني: اسوي معك شي؟
ام محمد: طلعي الصحن من الدرج اللي تحت بنغرف الغدا..
اماني: ابوي ما جا للحين؟
ام محمد وهي تشتغل: لا والله ما جا...اليوم ما بيرجع الا الساعه 5:00 العصر...
اماني بضجر: اففف يعني هالاسبوع ما بيتغدا معانا ولا يوم؟
ام محمد تغرف العيش: لا ..لين الاربعاء الجاي بيداوم من الصبح لين خمس العصر..ويرجع سبع المسا لين 10 الليل...
اماني: وش اللي جابرنه على فترتين مسائيه وصباحيه...؟ محنا كذا ولا كذا محنا محصلين شي...
ام محمد: الحمدلله يا اماني قولي الحمدلله..
اماني: طيب وين محمد الاهبل...؟
ام محمد: راح يجيب فهد من المدرسه..!!
اماني: كلمتي حد اليوم؟
ام محمد: ايوه..جارتنا بس..ليه؟
اماني: لا بس سؤال..
ام محمد راحت تكمل شغلها بعيد شوي عن اماني المزعجه..
اماني: أيش الغدا...؟
ام محمد: كبسه..
اماني تتنهد: كل يوم كبسه..مدري متى بنغير..؟
ام محمد طنشتها وايد مزعجه هالبنت....!!!
دق الجرس...
اماني بسرعه: انا بروح افتح هذولا اخواني..
ام محمد تتمصخر: لا ضيوف جايينك يا شيخه...!!
فتحت اماني الباب..ورمى فهد شنطته نفسها في الممر..ومحمد سلم ودخل...راح غرفته على طول وفهد ركض الحمام..واماني رجعت المطبخ...
ام محمد: وين اخوانك؟
اماني: الحين بيجونك..راحوا يغيروا ثيابهم...
ام محمد: طيب روحي افرشي السفره بنتغدا...
اماني: طيب...
راحت اماني وكالعاده شغلت التلفزيون...وفرشت سفرة الغدا...وياهم محمد وقعد...ويلست اماني وام محمد وفهد للحين ما طلع من غرفته..
ام محمد: تأخرت يا محمد...
محمد: وش اسوي الطريق زحمه..وكلما جينا بنمر من مكان قال ولدك الشنطه كسرت ظهري..يعني افهم يا محمد وشلها مني...
ام محمد شهقت: وليه ما تشلها منه...اخوك صغير ماهو قادر لكل هالي فيها من كتب..
محمد سمى وبدا ياكل: اييه ناقص انا...!! مشغليني اوديه واجيبه كل يوم..ما باقي غير اشتغل له حمال..
اماني تضحك: وش رايك تجي عندي كل يوم المدرسه بدل هالباص اللي جنني..وتشل شنطتي وتوصلني البيت...؟
محمد يستهبل: والله ما عندي مانع!! ليش لاء..
اماني تضحك..
ام محمد: وليه اماني بتوصلها وفهد متكسل منه؟
محمد يغمز لاماني: هي فاهمتني وخلاص..
دخل فهد الصاله وقعد: اكيد يريد يوصلها لازم يوصلها...ولا نسيتي يمه اماني وين؟
ام محمد للحين ما فهمت شي: ليه اماني وين؟
فهد بصوت عالي: مدرسة بنات....!! ما تبغينه يفرح كيف؟؟ لازم ينبسط..رايح مدرسة بنات..
ام محمد تغير شكلها وفي خاطرها"الحين هالمفعوص يتكلم كذا اجل وش اللي يفكر فيه محمد"
محمد يتدارك الموضوع شكل امه صدقت: والله نمزح معك يالغاليه..هذا الولد اهبل ما يفهم شي..
ام محمد بطرف عينها: طيب طيب اتغدوا وانتوا ساكتين..وانا اقول الكبير والعاقل..طلع اكبرهم ادبرهم..
محمد يبتسم: احلى يا حكمه احلى يا درر...احلى يا شيخة كل النسوان...
اماني: قلبها الرجال مسلسل بدوي اردني..!!
فهد ياكل بعبث: وين ابوي؟
اماني: توه افتكر الولد..
ام محمد: ابوك في شغله مهو راجع قبل العصر..
فهد: خليتوا له غدا؟
ام محمد: ايوه بتوصيني انت؟
محمد يتحرش في امه: اكيد ما بيوصيك..القلب هو القلب محد يتوصى فيه..
ام محمد تبى تسوي عمرها معصبه: عيب يا محمد...وش فيك قالب هاليومين على هبل..؟
اماني ميته ضحك: من يوم يومه توك الا اكتشفتي؟
محمد ينش ويحب امه على راسها: فديييتج يا عمري وقلبي واحساسي وغناتي..
اماني: مريووومه حبيبتي وحشتني والله!!
ام محمد تتنهد: اييه والله وحشتنا كلنا..
محمد بطرف عينه: خلوها تولي ما تسأل عنا ولا تدري بأخبارنا..
ام محمد: حجة الغايب معه يا محمد لا تظلمها...
فهد ببرود: والله ماني عارف كيف تحبون حد عمركم ما شفتوه..
ام محمد: بكره تكبر وتفهم...
فهد: الا اقولك يمه...
ام محمد : قول...
اماني: الحين بيبدا شغل العبط..
فهد: كيف مريم بنتك وابويه مهو ابوها..وكيف نحن اخوانها وهي مهي عايشه معنا...؟
محمد يهز راسه: سؤال وجيه...اترك للسيده هاجر الاجابه عليه..
اماني: تفضلي سيده هاجر اجيبي على اسئلة هذا الطفل العبقري واشبعي فضوله..
ام محمد متعقده من خبال عيالها..
فهد يضحك: كننا في مقابله في التلفزيون..
محمد: نعم نعم..انها مقابلة.. امي هي الضيفه وانت المعد..
اماني: هيا تفضلي سيده هاجر لم تجيبي على السؤال؟
فهد بفرح: والله كننا في الرسوم...
ام محمد شلت الصحون: قومي يا اماني والله يجلس معكم ينفطر قلبه...
محمد يمسك ايدها: اجلسي هنا..لا مفر من الاجابه..لا تخلي الولد يطلع معقد ما يفهم وش يصير في الدنيا..
ام محمد: البركه فيك بتفهمه..وش خليتوا يا عيال هالايام ما عرفتوه..؟
محمد: جاوبي على السؤال واماني بتشل الصحون وبتنظفهم....انتي ضيفه تحت المجهر ولا مفر من الاجابه..
اماني عشان تتهرب من شغل المطبخ: يا محمد خل امي تروح في حالها..ولا عطها بريك ربع ساعه ونرجع للقاء..
ام محمد: خلني اقوم يا محمد...
فهد عيبته السالفه: منتي قايمه اجلسي هنا..ولا اذا رحتي ماني بدارس...
ام محمد تتهرب: طيب اغسل الصحون واجيكم...اماني مهي بقادره تسوي كل شي لحالها..
محمد: ايوه طريقه مرتبه تهربين فيها من الجواب..ما عليه ما عليه..
ام محمد بطرف عينها وهي تنش: طيب منت عارف وش تبغيني اقولك زياده..
فهد: يعني الكل يدري الا انا..؟
اماني حست في امها: خلاص يا فهد انا اقولك بعدين في العصر يوم تصحى من النوم..
فهد: طيب بروح انام انا والعصر اصحى وخبريني..
اماني: طيب حبيبي..
قام فهد يغسل وبيروح يرقد واماني دخلت المطبخ ويا امها ينظفون الصحون...
نش محمد وسار حجرته بيرقد هو الثاني..لا شغل ولا مشغله..رقاد وحواطه ويا الشباب في الفريج..مخلص ثانويه عامه ويالس في البيت..مب محصل أي شغله تناسبه..اصلا وين يشتغل بشهادة ثانويه عامه..وظروفه ما سمحت له يدرس في الجامعه..وما يقدر يتخيل انه ينربط فيها اربع سنين دراسه..اصلا ما صدق انه طلع من المدرسه يروح الجامعه ليش؟؟..ابوه اصر عليه يشتغل وياه في ورشته بس ما طاع لان هالورشه مب من مستواه الاجتماعي ويبغي شي ارقى منها..بس لا هو محصل ولا غيره محصل..والظاهر انه مطوّل في حياة الحواطه هذي..
عقب ما صبت سوناتا كوب الجاهي وقربته على الطاوله...تناولته الحرمه الكبيره العابث في تفاصيل ويهها الزمن..
سوناتا: مدام عايشه يجي الحين..
ام سالم: وين اروى؟
سوناتا: اروى سوي كيك الحين يجي..
ام سالم: خليفه وين؟
سوناتا بملل: كلووف راقد..(وعشان تتجنب السؤال الاخير جاوبتها على طول) وحنان راقده بعد..
ام سالم: ما سألتج عن حنان..
لفت البشكاره بتسير..وشافت عايشه نازله من فوق..وابتسمت لها...
عايشه: هلوو سوناتا بلاج معصبه؟
سوناتا بضيج: هذا ماما كل شوي خبر انا من يروح من يجي..انا يتعب..
عايشه تضحك: زين وانتي شو خسرانه جاوبي عليها وسيري..
سوناتا: انا بعد ما يخبر هي يقول يالله روح ولي..
عايشه تضحك: زين مب مشكله تحمليها هذي حرمة كبيره...زين سوناتا وين خلووف؟
سوناتا: كلووف راقد..بعدين ينش..
عايشه: زين..خلاص اذا نش خبريه اننا يالسين في الصاله..
راحت سوناتا..وعايشه دخلت الصاله...
عايشه: هلا والله هلا بشيخة الحريم كلهن...
ام سالم: بدري..جان يلستي فوق شوي بعد..
عايشه تيلس: والله يا حبيبة قلبي انا كنت راقده تعرفين الدوام وعذابه..
ام سالم: هيه من جي ما تسألين عني ترا الدوام وكم درهم بينفعونج..
عايشه تبتسم: افا عليج يا قلبي... كله ولا انتي..والله ولا كنوز الارض كلها تغنيني عنج..
ام سالم تير كوب الشاي وتشرب: وين اخوانج؟
عايشه: خلوف راقد الحين بينش..ما سلم عليج يوم رد من دوامه...؟؟
ام سالم: لاء ظني ياني وانا راقده ما حسيت به..
عايشه: حياتي انتي..والله تولهت عليج وادري اني مقصره وايد في حقج بس والله يا امايه غصبا عني..
ام سالم: مب غريــ ـ ـ....
اروى: السلام عليكم ورحمة الله وبركاته..
ويت حطت صينية الكيك على الطاوله..
عايشه وام سالم: وعليكم السلام..
اروى: شعندج على امي..شو مسويه فيها؟
ام سالم: تخبريها عاد..
عايشه تبتسم: امايه طايحتبي تقول اني ما اتخبر ولا انشد عنها..بس والله يا اروى انتي تعرفين الدوام..
اروى: عنبوكم انتي واخوج ببيت واحد ولا تمرون تسلمون على امكم ولا تجمعكم بها غير قعدة العصر هذي..
ام سالم: عادي ما بيدورون للقطاعه من بعيد..اخوج سالم مودرني مب شايفتنه من شهرين اخر مره شفته ويا سلم علي يوم عيد الاضحى..
اروى: ماعليج منهم ما يسوونج يالغاليه..
ام سالم: والله محد فيهم الا انتي يا اروى..
عايشه برطمت: امايه والله يوم انش الصبح تكونين راقده ما يهون علي اوعيج والظهر يوم ارد من الدوام بعد تكونين مقيله في حجرتج ما يهون علي اعكر مزاجج..امايه هذي هي حياتنا بسرعه بسرعه...
ام سالم: الجواب جاهز والاعذار لا بد منها..
اروى تقرب الكيك عند امها: ذوقي امايه يجنن..
ام سالم: لا مشكوره روحه السكر عندي موصل لا تزيديني بهالحلو..الا وينها بنتج؟
اروى: راقده مادري متى بتنش...
عايشه: انا بطلع اوعيها هي وخلووف..
طلعت عايشه فوق واروى تمت ويا امها..تسولف لها ويهذربن لين ما تنزل عايشه واخوها وبنت اروى حنان..
ام سالم: الا على طاري سالم...ما اتصلتي فيه تتخبرينه عن حرمته طلعت ولا لاء؟
اروى: والله ما دقيت يا امايه ما فضيت اليوم انا والبشكاره طلعنا كل اغراض المطبخ بنرتبه وننظفه..احس صار له فتره طويله ما نظفناه..
ام سالم: بس يا بنتي عيب ما ننشد عن حرمته..لو هم مقصرين فينا بس المرض واجب علينا نزورهم فيه..انتي سرتي لها في المستشفى؟
اروى: لا امايه ما عندي وقت حنان عليها امتحانات وما فضيت بعد..تباني اراجع لها وادرسها..تعرفين خلاص مابقى شي على نهاية السنه ومابا بنتي ترسب ولا تييب درجات هب زينه..
ام سالم: ما عليج منها بنتج شاطره ومب محتايه دروسج..(وتبتسم) بتطلع على المرحوم بشطارتها ان شاء الله..
اروى بنفس ابتسامة الرضا: ان شاء الله تطلع مثل ابوها..على الاقل فيها اشوف صورته..ما حس اني فقدته ابد...
انقبض قلب ام سالم على بنتها..بس شو تسوي...لو عاشت عمرها كله وياها ما بتعوضها لحظه من اللي تعيشها الحين بتعاسه بعدما فقدت نصها الثاني ورفيق دربها ومشوار حياتها وابو بنتها الوحيده..في وقت مبكر من حياتها...غيرن الموضوع وتمن يسولفن بأشياء ثانيه لين ما ينزلون اللي فوق...
وفوق عايشه كانت يالسه على شبرية حنان...
عايشه تهزها: حنون..!! قومي بسرعه...يالله يدوه معصبه عليج..
حنان بكسل: برايها تعصب..انا بحياتي ما شفتها الا معصبه..
عايشه: مسودة الويه تسبين امي جدامي عيل شو تقولين من وراي؟
حنان تتلحف: اوهو علينا نحن ما بنخلص من هالموال...؟
عايشه تير اللحاف وتلعوزها: حنون قومي والله عيب عليج امي متضايجه وتتحرطم علينا ما نيلس وياها لا انا ولا انتي ولا خلووف..
حنان يلست بكسل: زين خالوه سيري وعي خالي خليفه وانا بنش اغسل ويهي واربط شعري..والله بنش حلفت بالله اصلاً علي امتحان علوم باجر وابى امي تفهمني من وقت عشان اتفيج الليل للتلفزيون..
ابتسمت عايشه وطلعت عنها..وسارت للاصعب..الحين خليفه يباله فرقه تدق على راسه لين ما ينش..ويباله عياله وحربيه وكل انواع الدق لين ما ينش..
دق قوي على الباب: خلوووف نش يالله بسرعه...
صمت كالعاده...بطلت الباب ودخلت وهو راقد ولا حاس بالدنيا حتى حركه ما تحرك..
عايشه: خلووف نش الله يخليك تعبت وانا اركض من حجره لحجره وانت وبنت اختك حرقتوا دمي...
بطل خليفه عيونه: شو تبين؟
عايشه ابتسمت هذا انجاز قدرت تخليه من اول مره يفتح عيونه: خلووف امي معصبه والله قوم بنيلس وياها...
خليفه: من متى امج تهدا اصلا عشان ما تكون معصبه..عويش خليني ارقد وراي سهره ويا الشباب الليله هب فايج لج..
عايشه برطمت: خليفه ارجووك..عشان خاطري..نش الحين حتى حنون اللي ما تسمع الرمسه ولا تهمها امي نشت...
خليفه بطل عيونه بكسل ومد ايده: ساعديني..!!
ابتسمت عايشه وساعدته ينش..ودخل الحمام وقامت بتطلع وسمعت تلفونه يرن..بفضول ردت بتشوف من اللي متصل وتشوف على الشاشه مكتوب "بو عبدالله" استغربت هذا اكيد اخوها سالم..
"شو يبى سالم...ليكون حرمته ماتت؟؟ اويييه..بنزل اقول لامايه تدق عليهم...ويل حالي شكل الحرمه صار فيها شي..."
وياها صوت خليفه من الحمام يزاعج: عوووويش بعدي عن تلفوني ولا تردين عليه لا اكسر راسج..
عايشه: زين من زين اللي يتصلون فيك الحين..متفيجه ارد عليهم...
طلع خليفه ونشف ويهه وتلبس وتسفر وتعطر..وشل تلفونه ونسى الموضوع..وعايشه مرت على حنان ونزلن تحت..تلاقوا على الدري ويلس خليفه يغلس على حنان ويمطها من شعرها..
حنان: اييه والله انك متفيج..
خليفه:اصصص ولا كلمه..يوم الرياييل ترمس تقطعين الصوت..
عايشه تضحك..
حنان: خلووف والله ان ما بعدت ايدك عني بتشوف..
خليفه مسكها من ورا رقبتها: خلووف؟ عيديها؟ شو قلتي؟ خلووف..
حنان تصارخ: اييه خالي الموقر الكريم العزيز الفنان اللي محد يسواك شيخ الشباب والحلوين مطيح كل البنات ومعذب كل القلوب بعد عني لو سمحت..
خليفه: احم ترجيني بعد..حبي ايدي..
حنان: امايه...امايـــــه..
خليفه: قولي ماما احسن..تذكريني بالبشاكير...
عايشه: كلوووف خل البنيه حرام عليك..
خليفه يير حنان ويلوي عليها بقوه ويعفصها: احبها شو اسوي..
حنان تبعد نفسها عنه: اففف والله انك لزقه ياخي ...
ونزلت تركض عند امها وسلمت على يدتها..وحبت امها ولوت عليها ويلست..
حنان: امي تولهت عليج والله..
اروى: شخبار المدرسه..
حنان برطمت: الحين انا اتوله عليج تتخبرين عن المدرسه؟خلاص زعلت..
ام سالم تطالع حنان بطرف عينها ما تحب دلعها ولا تحب تشوف حركات البزا هذي جدامها..بس حنان طنشت وما تهتم..
نزل خليفه ورا حنان ومعاه عايشه...
خليفه: السلام عليكم ورحمة الله وبركاته..
ام سالم تطالعه بطرف عينها: وعليكم السلام...
خليفه يستهبل: اووه امي حبيبتي هني..تصدقين اني ما شفتج بس شفت راس اروى هالمكوّر...
اروى عاقده حياتها: انا شسويت لك الحين تتحرش فيني..؟
خليفه يلوي على امه ويحبها بطفاسه على خدها: قسم بالله اشتأتلك..تؤبري ألبي..
ام سالم: قوم عني يالطفس...
عايشه كانت بتموت من الضحك هي وحنان على الطريقه اللي حب فيها خليفه امه..عفص خدها وحبها بقوه وبطريقه تلوع الجبد...ودزته امه بعيد..
خليفه يسوي نفسه حزين: امي تعرفين اني فاقد حنان لا تعامليني بجفاء..ولا تراني بنحرف..
ام سالم: وين تنحرف زود على هالانحراف اللي فيك..وين؟
خليفه بطل عيونه: حرام عليج جان انا اللي من البيت للمسيد ومن المسيد للبيت صرت منحرف..شو تقولين عن باقي الشباب؟
اروى: منحرف ونص..عيل امك ما تيلس وياها ولا تشوفها...وهي وياك بنفس البيت..عيل لا عرست وطلعت ما بنشوفك خير شر..
عايشه: لا اله الا الله..اشفيكم على خليفه..تراه انسان له مسؤلياته وحياته اللي ملتهي فيها عنّا..
خليفه يهز راسها ومبرطم: محد فاهمني غيرج...
حنان: اللي يسمعك يقول واجبات ودروس وامتحانات..الا هو دوام من الصبح للظهر..عقبها تكون فاضي ماعرف شو اللي شاغلنك..
خليفه بطرف عينه: قسم بالله بقوم افعصج اسكتي..
اروى: خلها تعبر عن رايها..نحن ديموقراطيين..
حنان: ايوه صح كلام امي صح..
عايشه: خليفه اصب لك شاي ولا قهوه..
خليفه: أي شي من ايدج ايتها الجاريه حلو..
عايشه بطلت عيونها على الاخر: والله ما صبيت لك نقطه..يالله بنشوف من الجاريه الحين..
ام سالم: يا حبكم لسوالف الطفاسه والهبل..
خليفه: امي فديتج نغير جو..كم بنعيش نحن...؟
ام سالم: بتعيش وبتعرس وبتييب عيال وبتسوي اللي مسونه سالم اخوك...
خليفه عصب: اوهووه يا هالسالم اللي ما بنفتك من سيرته..كل يوم والثاني وانتي تقارنيني فيه..لا تخليني اكره اخوي وانتي السبب...
ام سالم: وانا شقلت الحين..ما قلت الا الصدق..
عايشه تذكرت: هيه صح..خليفه..ترا سالم اخوي متصل على تلفونك يوم كنت في الحمام ...دقيت له؟؟
خليفه استغرب: والله؟
اروى طالعت امها اللي استغربت..
ام سالم: وابوي انا اتصل شوف اخوك شو يبى خاف الا حرمته صار عليها شي..
خليفه يدق رقم سالم ويتصل به...ويدق ورد على طول..
خليفه: يا حيا الله اخوي ولد امي وابوي..عاش من سمع هالصوت..
سالم: يا مرحبا الساعه شحالك خليفه؟
خليفه: بخير يعلك الخير شحالك انت...وشخباركم؟
سالم: والله ماشي اخبار الا عندكم الاخبار..ان شاء الله مرتاحين..شحالها الوالده؟
خليفه ابتسم: تدل دربها الوالده...بخير ما تشكي باس...متولهه عليك..
ام سالم بزعل عياييز: لا لا هب متولهه عليه لا تقص عليه ولا شي..
سالم يضحك: يا بوك لا تقص علينا العيوز بتفضحك...
خليفه: والله انتوا مشاكل..الحين نحن نكسب فيكم اجر بس انتوا ما تبونه..مب مشكله...!! شحالها ام عبدالله ان شاء الله صحتها الحين احسن؟
سالم: الحمدلله امورها مستقره...
ام سالم تدق ريل خليفه وتهمس: قوله شصار عليها؟
خليفه يأشر لها تصبر شوي...
سالم: مشغول؟
خليفه: لا والله بس حنان هالاذيه ما تخلينا نرمس ...المهم شحالكم وشحال عبدالله والبنات؟
سالم: كلهم والله بخير يتريون زيارتكم بس...
خليفه ابتسم..
سالم: شحالهن عويش واروى؟
خليفه: بخير ..اروى في البيت وعايشه من دوامها للبيت لا جديد..
سالم: انزين يا خليفه...هذي علومكم عيل...؟
خليفه: هيه والله..ماشي الا هاي..الا شي بخاطرك احسك تبى ترمس...
سالم بتردد: هيه والله..بس تروم تظهر من عندك؟
خليفه: هيه اكيد...
ونش خليفه بيتكلم برا بس ام سالم مسكته من كندورته وأشرت له ييلس مكانه..وهو هني توهق ما عرف شو يسوي..
خليفه متردد: ااه..اأ..انا طلعت ارمس سالم شعندك؟ شصاير؟
سالم: لا والله ماشي بس اباك تيي انت والبنات عندنا الليله على العشا..ام عبدالله طلعت بالسلامه...ونباكم تتسمرون ويانا الليله..
خليفه ابتسم: افا عليك بس هذا...!! وانا تحريت شي خطير..على العموم تستاهلون سلامة ام عبدالله..بس ليش تباني اطلع برا؟
سالم متردد: لااا..خلاص ماشي..
خليفه: خلاص انا والبنات والوالده ان شاء الله اليوم بنييكم...
سالم حس بخيبة امل: خلاص حياكم ان شاء الله...
بند خليفه ولف يشوف امه اللي تطالعه بنظره متفحصه..
خليفه: مفاجأه!!!!
كلهم طالعوه بلهفه...
عايشه: شوو؟
حنان: قول خالي شو؟
خليفه: كلنا معزومين اليوم بيت اخوي سالم حرمته موزه طلعت من المستشفى...
عايشه بفرح: يا سلااااام...
حنان تصارخ: هيييه واخيراً بنطلع مكان وا كشختااااه...
اروى ابتسمت تعرف امها ما بتوافق ..وام سالم ساكته وتطالعهم..
خليفه: هاه يا شيخة الحريم شو رايج؟ اكيد بتوافقين..؟
عايشه: لا والله امايه ما بتقولين لاء حرام عليج نحن نبى نطلع ما يخصني متولهه على البنات والله..
اروى: هاه امايه شو قلتي؟
حنان: يدووه هالمره انا طالبتنج لا تقولين لاء...بيت خالي مافيها شي..
ام سالم اخير نطقت: سيروا لرواحكم انا هب سايره..
عايشه: ليش امايه حرام؟
اروى: امايه لازم تسيرين بيقولون بعدين انج اللي مقصره وان العيب منج..
ام سالم: لا لا هب سايره اسكتن عني..انا بسير لها باجر الضحى.عزايم انا مب رايحه..
عايشه: انزين امايه ليش؟
ام سالم: خلاص جي..سيري انتي واختج وبنتها وباجر بسير انا..
خليفه: خلاص امايه على راحتج..اهم شي نسير صح؟
ام سالم بحنان وحزن: وليش يا خليفه انا بمنعك من بيت اخوك؟
خليفه: لا الغاليه بس لازم رضاج قبل كل شي..
ام سالم: راضيه عليك وربي شاهد بس ازعل منكم يوم ما تنشدون عني..
خليفه يحب راسها ويحب خدها بقوه وبطفاسه مره ثانيه: افا عليج ما عاش اللي يلبسج يا عمري..انتي يا شيخة الحريم كلهن..
ام سالم تدزه: زين قوم عني خنقتني بريحتك؟
خليفه انصدم: شوفيها ريحتي والله متسبح!!!
ام سالم : ادريبك تراك خنقتني بريحة سبوحك بهالعطر..حشا صاب الغرشه على راسك..
خليفه: احم لازم بعد..تعرفين هالغراشيب ايرهن وراي شرات العنز وهالعطر نوع من انواع الجذب..
ام سالم تضربه بعصاتها على جتفه: قوم عني يالطفس قوم...
اروى تبتسم وتلف على حنان: قومي هاتي كتبج بذاكر لج الحين..وراج سهره الليله وما بتردين وفيج حيل تدرسين شي..
نطت حنان فوق بسرعه..اذا السالفه فيها طلعه هي اول وحده بتسمع الكلام..ما يطلعونهن ابد الا المدرسه والبيت والسوق في المناسبات وملت من حكرة البيت...
"اخ لو كان ابويه عايش كنت بطلع وبدخل بالوقت اللي ابى...اسوي اللي اريد اتحكم مثل ماريد..صح قوم خوالي ما يقصرون وياي بس وايد متشددين واللي اعرفه عن اهل ابويه وايد فري وعايشين حياتهم بعيد عن هالتقاليد الباليه..."
طلعت شنطتها ويرت كتاب العلوم وردت بتنزل تحت عند امها تدرسها لين ما يي العشا ويطلعون بيت خالها سالم....
..................
الساعه تقريباً 8:10 مساءً...وصحن الفواله مرتب بطريقه مب مبهره..ومحطوط بشكل بسيط جداً وما يجذب نهائياً..والشي الوحيد اللي يلفت النظر هو الوان الحلويات المختلفه..بس البساطه اذا زادت عن حدها انجلبت لنوع من النفور من الشي...اكواب العصير مرتبات بعد وعدالهن دلال القهوه والشاي...والوحيد اللي ضايع في وسط هالغابه هي مريم اللي من الصبح معابل في المطبخ ومحد دخل عندها ابداً وكلهم مشغولين بالسوالف ويا امهم اللي قضت في المستشفى فتره طويله..
"اصلاً محد معزوم..حاشرين الدنيا عزيمه وعزيمه..ومحد بيي غير عماتي عايشه واروى وعمي خليفه..ويا ليتنا مسوين شي مثل العالم والناس..مافي شي موجود غير فواله خفيفه وشاي وقهوه أي بيت يقدر يسويها..بس الشي اللي معجزه وصار اليوم..هو اني بفتك من العشا..(تبتسم بفرح وهي ترتب فناجين القهوه) العشا مسوينه اليوم برا..احلى واكشخ..الصراحه مشتهيه اكل عيش من برا..تعبت من طباخي وخاطري اكل شي يديد..."
ينقطع التفكير ومونولج النفس الداخلي..بصوت رقيق ياي من عند باب المطبخ..
ابراهيم: مريووم..مريوووم..
مريم تنتبه: هاه برهوم...شو؟
ابراهيم يبتسم بدلال: ابى قطعه!!
مدت مريم ايدها بقطعتين: هاه حبيبي..للحين ما غيرت ثيابك..عماتك بيوون الحين..انا كويت كندورتك وسفرتك..
ابراهيم بفرح: بلبس سفره؟ اللــّه..جنه العيد صح؟
مريم استانست لفرحة اخوها: هيه حبيبي يالله روح بدل وتعالي عقب يوم تخلص عسب اصك لك عقم الكندوره..
ابراهيم ياكل الحلاوه بطريقه عبثيه: انزين..
مريم: لا لا اصبر بغسل ثمك..لين ما تلبس كندورتك بيستوي لونها اسود من الكاكاو..
ابراهيم يضحك...
مريم تحبه بقوه: حياتي انت..
ابراهيم: مريوم انتي ليش ما تغيرين ثيابج..ريحتج اكل..
استحت مريم: انزين انا بسير الحين...يالله روح غير ثيابك وتعال حجرتنا انزين؟
ابراهيم: انزين..
وراح ابراهيم ومريم شطبت على كل شي ودخلت حجرتها ويابت لها فوطه وطلعت الحمام بتتسبح...لاعت جبدها من مجابل الاكل والترتيب..بخرت البيت ورتبته عقب الغدا وكنست كل الحجر وغيرت ترتيب ميلس الرياييل...وغسلت ثياب خواتها وكوتهن..وبخرت ثياب عبدالله وابراهيم..وخلصت شغل المطبخ وعقبها يا دورها الحين تسبح وتغير ثيابها...
في الصاله شوي بخطوتين ثلاث بعيد عن الحمام..في غرفه مغلق بابها بإحكام...كان واقف يتعدل جدام المنظره...يعدل السفره ويضبطها من كل جهه..ابتسم وهو يطالع ويهه..وايد راضي عن نفسه..وعنده قناعه ذاتيه ان الحياه اللي يعيشها هي الحياه اللي انخلق عشانها...
عبدالله..وحش مصغّر عن ابوه سالم..بشكل حضاري جداً..يعني اجرام على الطريقه الحديثه...بعيد عن اساليب ابوه اللي تعود للعصر ما قبل الحجري..بكل اختصار هو مجرم بس متطور...شهادة ثاني اعدادي هي اعلى درجه وصل لها في درجات السلم التعليمي..ومن بعدها ست سنوات لهذي اللحظه يعيشها بكل ما تشتهي نفسه..ما يضيع أي فرصه انه يستانس فيها ولا يزعل نفسه...كل طرق المغازل حافظنها..وكل طرق السرقات خبير بها...
فتح درجه وابتسم.." بعدين اييك..مب وقته الحين..خلنا نروح نستقبل الضيوف...مادري ليش الناس ما تحب تتعشى في بيوتها..شو المتعه انك تطب على خلق الله وتاكل في بيتهم..اللي تشتهيه نفسك دق على الناس اللي تبى تاكل عندهم وقلهم يطرشون لك اكل لين بيتك وفكنا من الصدعه..والله هالناس حالات"
رد علبة المخدر...هيه المخدر!!! مكانها..كان يغري نفسه بها شوي..بس يتأملها والتأمل يسليه لين ما يروحون بيت يدته.."هيه يدتي!! هاي للحين عايشه ما ماتت...؟ بل عليها ماخذه عمرها وعمر غيرها..ما تعرف توسع للناس هاي مسويه زحمه في الدنيا..."
ضحك من خاطره وفتح الباب وقفل الغرفه ويوم لف وراه شاف مريم ماشيه في الصاله سايره حجرتهن..طالعها وهز راسه...
عبدالله: خاطري اعرف شو فايدتج انتي في الحياه..
مريم لبسته ودخلت حجرتها..سار وراها ووقف عند الباب...
عبدالله: اييه يالخسفه يوم اكلمج ردي علي زين؟
مريم: ان شاء الله..
عبدالله: تفوو على هالويه..اللي مثلج ما تتكبر وهي ما تسوى نعال.
مريم: انزين شكراً ممكن تخليني البس وراي شغل الله يخليك يا عبدالله..
رقع عبدالله الباب وطلع..هاي هي متنفسه الوحيد..اكره مخلوقه على وجه الارض..يضربها يصفعها يسبها مستحيل تبكي.ولا تعترض..هذي انخلقت بس عشان ينفس فيها غضبه..
كان طالع الحوش بيسير صوب الميلس ولمح نوره وروضه واقفات..هذيل خواته الصغار...نوره ثانويه عامه اصغر منه بثلاث سنوات..شطورة البيت الصامته..وروضه واه من روضه..عدوته اللدوده الثانيه بس مب كثر مريم..يكره في روضه طولة لسانها وقلة ادبها ومراددها..ويكره في مريم ضعفها وصمتها وسكوتها وكرهه لها يتعاضم يوم ما تجذبه لها أي عاطفه..كل عواطفه صوبها بارده..لولا انها تهيج لمشاعر غير معرفه بعض الاحيان..ولكنها سرعان ما تتلاشى اول ما يخطر على باله انها اخت من الاب فقط..
نوره:عبدالله عبدالله..
لف عبدالله عليها وشافها لابسه تنوره سودا وقميص ابيض...وابتسم لها وهو نادر ما يبتسم..
نوره: وين رايح؟
عبدالله: شلج انتي؟
نوره: زين عوذ بالله سألتك بس..
عبدالله: شو تبين؟
نوره:بس لو بتسير الميلس اباك تشل وياك دلال القهوه و الاكواب..
عبدالله: هاتيهن يالله..
روضه: نوروه وين مريم؟
عبدالله يوم شاف روضه لاعت جبده وسار على طول برا صوب الميلس..وهي لبسته وسارت حجرتهن...
روضه: مريوم ادخل؟
مريم: ادخلي خلصت انا...
روضه بطلت الباب ويوم شافت مريم شهقت: وا كشختاااه..!!!
ضحكت مريم: شو فيج؟
روضه مبتسمه: والله وايد حلوه...وايد مب شوي..
مريم ابتسمت: شكرا حبيبتي من ذوقج..
كانت لابسه قميص بطيخي يجنن ويعذب على بياضها..وحاطه جحال خفيف مخلنها لوحه جماليه ولا اروع...
مريم: وين عمتي؟
روضه: تتعدل في حجرتها...سمعي مريامي يقولج ابوي وديله المدخن الميلس...الحين..
مريم تحط اخر لمسه في شعرها: اوكي خلاص سايره له الحين..
طلعت مريم وروضه تراقبها..صح روضه بنت ال 16 سنه غرشوبه وطولها فارع..ولها جمالها الخاص فيها بس بعد ما يمنع انها حست بغيره خفيفه من اختها مريم..وايد بسيطه بس حلوه..ولو تهتم بنفسها اكثر اكيد بتكون ملكة جمال...
سارت مريم للميلس بتشوف ابوها وتوديله المدخن...دقت الباب وزقرها...
مريم: ابويه طلبت المدخن؟
وانتبه عبدالله ان مريم في الميلس رفع راسه يطالعها ويوم حست انه يطالعها طالعته وهو على طول حوّل نظره للتلفزيون وكان خاطره يقوم يصفعها ليش حست انه يطالعها..
بوعبدالله: رتبتي البيت من داخل؟
مريم: كل شي زاهب ما بقى شي...
بوعبدالله: زين روحي..
طلعت مريم ماسكه المدخن وهي سايره صوب المطبخ شافت عمتها واقفه تأشر لها عند باب صالة البيت..
مريم: هاه عمتي؟
ام عبدالله: تعالي يالطمه..!!
مريم قربت اكثر: هاه عمتي شو تبين؟
احترق قلب ام عبدالله على مريم حقد..وبدت نار الكراهيه تشتعل في قلبها وما عرفت كيف تعفس مزاجها وتبين لها انها ما تسوى شي ولا لها في امرها شور..
ام عبدالله بحقد: شو هاللي لابستنه؟
مريم مستغربه: شو فيه؟
ام عبدالله بحقد اكثر: ما تستحين تلبسين هاللبس وعماتج بيوون؟
مريم بطلت عيونها: ليش شو بلاه؟ مب عاري ولا فيه شي؟
ام عبدالله تأمرها: روحي غيريه..ولاّ لا تيلسين عندي ولا اشوفج..
مريم حست بغصه..بس شو بتسوي..شو بتقول...
مريم: ان شاء الله عموه..بس خلني اسير اييب الدلال من المطبخ وبسير اغيره على طول..
دخلت ام عبدالله البيت وقلبها يشتعل نيران كراهيه صوب هالبنت..ما تبى أي نوع من انواع الجذب والتعاطف تكون من نصيب مريم..وبتحاول قد ما تقدر تخلي كل انواع النفور منها ومن الناس تيي صوبها لو كلفها هالشي حياتها..
ردت مريم من المطبخ واول ما وصلت الصاله كان جرس البيت يدق..وطالعت من الجامه وشافت عماتها وعمها خليفه داخلين بالسياره صوب الصاله ونزلت من السياره اروى وعايشه وخليفه ووراهم حنان...
ابتسمت من قلبها..
"اشتقت لعمي خليفه صدق صدق اشتقت له..."
انفتح باب الصاله وكانت اول من يستقبلهم..طبعاً للحين ما غيرت ثيابها اللي قالت لها عمتها تغيرها...وظهرت لهم نوره وروضه وابراهيم..ووقفوا عند باب الصاله يسلمون عليهم..لا شوق ولا لهفه ولا حب..مشاعر بارده من كل الاطراف..ومناسبات جافه تجمعهم..وظروف حياتيه وعالم كله مصالح ومشاغل فرقهم عن بعض..
خليفه: ادخل ولا في حد داخل؟
روضه: من غيرنا في البيت..محد لا تخاف اقرب...
ويلسوا كلهم في الصاله...وبعد السلامات والاسئله المعروفه من التخبر على الحال والعلوم والصحه وكل امور الحياه...
اروى: وين موزه عيل؟
نوره: دقايق والحينه بتيي..
روضه: بعدها تحط اللمسات الاخيره امايه..نجمة السهره اليوم..
خليفه نش ويلس عدال مريم: شحالج حبيبتي..
مريم مبتسمه: بخير شحالك عمي؟
خليفه: بخير..وينج ما تنشدين عنّا.؟ امي زعلانه عليج...!!
مريم تبلع ريجها: فديتهــا يدوه..والله عمي غصب عني مشغوله...
خليفه وهو يشوف في عيونها رواية حزن وشقى: تكلمين امج؟
مريم تهز راسها ان هيه...
خليفه حس انها تكذب: صدق مريم تكلمينها؟
مريم بابتسامه مصطنعه: هيه اكلمها..
خليفه يتنهد: برايج انا سألتج وما بتخسرين شي لو قلتي الصدق..
يت حنان ويلست عدال مريم: اقولج مريم عادي اشغل التلفزيون؟
خليفه يمسكها من ايدها ويلويها: انتي يايه عشان تطالعين التلفزيون ولا تيلسين ويا الناس؟
مريم تضحك: عمي حرام عليك عورتها..خلها تستانس...
خبرتها مريم وسارت تشغله وتيلس تطالع اللي تتابع...وعايشه ونوره وروضه واروى يسولفون ومريم نشت تييب العصير والفواله...وعقب عشر دقايق حدرت ام عبدالله ويلست وياهم في الصاله..ويوم دخلت مريم الصاله شافتها ام عبدالله اللي بينت على ويهها علامات الصدمه وهي تشوفها للحين ما غيرت ثيابها...واللي ما انتبهت له ام عبدالله ان خليفه كان يراقب تقاسيم ويهها وهي تتابع مريم بنظراتها وحركاتها...اللي ما انتبهت له ام عبدالله ان خليفه كان فاهم كل شي بس ساكت...
</font>
رد مع اقتباس
مواقع النشر (المفضلة)