<font color='#000F22'><p align=center>وهــذااااااااااااا الجزء الذي يليه <img src="http://oasis.bindubai.com/emoticons/tounge.gif" border=0>

.....

<font color=#ff0000>الجزء التاسع والثلاثون</font>


<font color=orange>قلت بخفي المحبه قلت بلجم جوابي *** واثره الحب جارح من يروض حصانه
من يظن المحبه جوها جـــــو هادي *** اشهد انه يماري في زمـــانه زمانــــه </font>


تمت ميثه ماسكه التلفون فتره تستوعب المسجات اللي وصلن .. وكانت اتقول في خاطرها .. معقوله هالمسجات لخليفه .. لا ماظني .. لا كيف ماظني واسمه موجود .. يمكن حد من ربعه يبا ايسوي في حركه هو دوم ايخبرنيه عن ربعه انه ايسون فيه هاي الحركات .. اسأله .. لا ليش اسأله واكبر السالفه .. هو بيقولليه اشعنه اطالعين تلفونيه .. لا فديته انا واثقه فيه بس ابا اعرف منوه اللي مطرش هالمسجات .. اوهو لا حول انا اشعنه معوره راسيه .. هو دوم ايخبرينيه عن سوالف ربعه يوم ايسون فيه هالحركات .. واكيد بيخبرنيه عن هالحركه .. بترياه لين ماهو ايخبرنيه وان ماخبرنيه .. انا بفتح له الموضوع .. انا ماريد اخرب بيتي بيديه عسب هالحركات السخيفه اللي مالها معنى .. تمت ميثه اتهويس بهاي الاشياء لين مارقدت .. ومسحت المسجات اللي في التلفون .. عسب مايعرف خليفه انه حد فتحهن ..



الجمعه ..
الصبح الساعه 11 ..
في الصاله ..

ميثه كانت قاعده هي مع ريسه في الصاله وعزه وفاضل وعفراء وزايد قاعدين برع في الحوي .. دشت الخدامه وكانت شاله الريوق ويايبتنه داخل ..
ميثه : سوسن وين ماما عزه ؟؟
سوسن : ماما في برا مع بابا كبير بابا جايد ماما ابراء ..
ميثه : هييييه .. وانتي من وين يايبه الريوق ..
سوسن : انا يجيب من برا ماما ايقول ودي داكل يمكن في هد قومي ..
ميثه :انزين خلاص روحي ..
ريسه :سوسن سويلي عصير برتقال ميثاني تبين ..؟؟
ميثه :لا ياختيه مابا بشرب حليب..
ريسه :خلاص روحي . ميثاني شو بلاج اليوم ..؟؟
ميثه :ماشي اشعنه ..
ريسه :ماعرف احسبج ظايجه ..
ميثه : لا بس يمكن هالحمال تراه حالات هههههه ..
ريسه :ااااه ياربي الله يعينا وييسر هالحمال علينا ..
ميثه : اميييين .. الا ريلج وينه ؟؟
ريسه :ريلي راقد فليل يحطليه على الموفي وييلس يطالع وانا اطالع لين نص الفلم وارقد ..
ميثه :هههههههه شراتي انتي ياحيج توصلين نص الفلم انه اوله ارقد ..
ريسه :ههههههههه .. يوم الاحد بسير العين عندي اجازه طبيه الاثنين والثلاثاء ..
ميثه : اشعنه شو فيج ؟؟
ريسه :ماشي هاك اليوم .. يوم الاربعاء خليت يابر ايوديني عند الدكتوره اللي اتراجعين عندها .. وقتلها عطيني اجازه وعطتني.. ميثاني والله وحامي تعب وايد .. فقلت بسير العين فهاي الاجازه ..
ميثه : هيييييه الله يعينج .. ياربيه ..
ريسه : امييييين ..
ميثه : ومتى بتردين ؟؟
ريسه : برد بالثلاثاء ان شاء الله ..
ميثه : هيه زين اتسوين والله ارتاحي شويه ..
وخلاف دشوا عزه وفاضل وعفراء وزايد ..ونشت ريسه وميثه وسلمن على فاضل وعزه ..
فاضل : ماشاء الله بناتي قاعدات ..
ريسه : هيه يابويه كنا بنظهر الكم لكن انتوا حدرتوا ..
عزه :لا فديتكن محد يشره عليكن وخصوصا انتي ياريسه لازم شويه اتريحين ظهرج توج ..
ريسه :الله يسلمج يعلني افداج ..
زايد : الا وينهم ريايلكم ..؟؟
ميثه : ارقود ..
زايد : ياله حلاته الرقاد ..
ريسه : ههههههه لا مابخلي الرقاد يحلاله بسير اوعيه عسب يسير المسيد ... يله السموحه منكم ..
الكل : مسموحه ..
وراحت ريسه قسمها عسب اتوعي يابر.. واستاذنت ميثه وراحت صوب المطابخ اتقول حق الخدامه اتولع الفحم وخلاف راحت قسمها عسب اتوعي خليفه ...


في قسم خليفه ..
الساعه 11 ونص ..

<font color=pink>فرحتي ورضاي دايم ترتجيك .. بس نظره منك قلبي تحتويك
آخذك دنيا بعيده وأفـــــــتديك .. بالعمر أعطيك كل اللــي تبيه</font>

حدرت ميثه على خليفه وشافته توه مسكر التلفون وكان شكله متضايق ...
ميثه : صباح الخير حبيبي ..منوه اترمس ؟؟
خليفه وهو يحاول انه يبتسم : صباح النور غناتي .. اربيعي متصلبيه ..
ميثه : اها حبيبي اشعنه جذه شكلك زعلان ومويم ..؟؟
خليفه وهو ايقول في خاطره فديتج والله ياميثه محد ايحسبي في هالدنيا الا انتي ويعرف وقت زعليه ووقت ارضايه يعلني افدا قلبج ولو حتى احاول انيه ادس عنج شي مابقدر ..: ...................
ميثه : وايه بسم الله عليك شو فيك غناتي ؟؟
خليفه :ههههههههه اممممممم ليش مابستييينيه اليوم ؟؟
ميثه : حبيبي يعلني افداك انا .. عسب جذه زعلان ..
خليفه : همممممم هيه ..
ميثه : قوم اول شي اتسبح واتلبس حق الصلاه وخلاف لك اللي تباه ..
خليفه : والله حبيبي ؟؟
ميثه :هيه اعنبوه والله ..
خليفه : فديييييييت قلبج وروحج انا ..
ميثه وهي رايحه صوب الكبت اتظهرله اثيابه : افدااااااااااك غناتي ..


في بيت ام حمده ..
الساعه 11:45 الصبح ..

وديمه كانت في بيتكم حمده ...
وديمه : حمدوه شو فيج من الصبح زعلانه ومويمه اشعنه خليتيني في الميلس ورحتي ..؟؟ وين رحتي شو هاالاتصال المهم اللي ياج و خلاج اتخلينا واتروحين ؟؟
حمده : عادي انا برمس جدامج لكن عسب اختي ندى كانت اهنيه ومابغيتها تسمع ..
وديمه : انزين منوه الي كان متصل ..
حمده : اسمعي البارحه اتصلت في خليفه كم مره ومارد عليه ... وطرشتله فليل 3 مسجات ..
وديمه : لحظه لحظه لا تكملين من وين يبتي رقمه ؟؟؟؟؟؟؟
حمده : الله يسلمج اتحيدين سالم اللي رقمنا اخر مره في بوظبي مول ..
وديمه : هيييييه ..
حمده : هاذا هو الله يسلمج اللي ياني هاك اليوم على الخط وهو اللي عطاني رقم خليفه ..
وديمه : وكيف عطاج الرقم..وهو يعرفه ومن وين يابه ؟؟
حمده : هو يشتغل في المرور من عطيته رقم السياره ونوعها ظهرلي اياها باسم منوه وظهرلي رقمه من الملف ماله ..
وديمه : وووواااااي ثرج هب هينه ياحمدوه ..
حمده : يوم اقولج بس عسب اتصدقين انا شسوي .. يوم ابا شي بس صبري بعدج ماجفتي شي ..
وديمه : انزين وهاذا سلوم مالج شو قلتيله ماقالج ليش .؟؟.
حمده : امبلا ..
وديمه : وشو قلتيله ..
حمده : قتله اتحيد اربيعتيه اللي كانت ويايه في بوظبي مول يوم اتنقلنا.. قالي هيه ..قتله اربيعتيه من قبل شافت واحد في المارينا والمره الثانيه جافته في بوظبي مول بس هو مايعطيها ويهه وهي اربعه وعشرين ساعه تتطريه واتصيحه ليل نهار وكاسره خاطريه وطلبتني اني اساعدها ومارمت اردها قالي افا عليج امره فالج وفالها طيب بس عطيني رقم سيارته ونوعها . وعطيته وثاني يوم يابليه اياه فهمتي ..
وديمه : الله يخسج ثرج داهيه .
حمده :ههههه طبعا .. انزين سعمي شو سويت عقب ..
وديمه : شووووو ؟؟
حمده : اول شي المغرب اتصلت فيه يمكن اربع مرات مارد وخلاف طرشتله هالمسجات عالساعه وحده ونص ولارد عليه .. خلاف الصبح يوم نشيت طرشتله مسجين ومارد عليه اتصلت وبعد مارد الظاهر كان راقد ويوم كنت قاعده وياكم اهنيه اتصل ورحت فوق ..
وديمه : انزين وشو قالج ؟؟
حمده : الله يسلمج قتله انا اللي في المارينا ويلست اصيحله شويه قتله انته ليش جيه اتعذبني انا اطريك ليل انهار انا اهويسبك اربعه وعشرين ساعه واصيحك اباك انا احبك ليش ماتفهم انا احبك هب من اليوم ولا من البارحه انا احبك من اول يوم شفتك فيه وانته كل ماتشوفني اتقفطني وماتحس فيني ... صدقني مثل ماتسويبي بتحب حد وبيسويبك نفس ماسويت فيني .. حسيته اتروع شكله ايحب حد ..
وديمه : ههههههه طبعا ايحب حرمته منوه بيحب يعني ؟؟..
حمده :جب لا تتطرينها هاي السباله ..
وديمه :انزين وشو قالج ..؟؟
حمده : يعني شو بيقولي اقولج ترا اللي عنده سباله ايحبها ايموت فيها .. قالي اسمعي انا ريال معرس وبستوي ابو عن جريب .. ابتعدي عنيه وجوفي طريجج انا حياتي هب وياج انا حياتي ويا حرمتيه وان رديتي اتصلتي مره ثانيه بتشوفين شي ماشفتيييييه .. وسكر في ويهيه ..
وديمه : ياله مقواااااااه .. حمدوه خلاص اقلعيه شو تبيبه ؟؟
حمده وهي اتصارخ على اربيعتها : ودوووووووم ... انتي اتخبلتي ولا شووووه انا اقلع كل حد فالهدنيا الا هوو اتعرفين شو يعني اباااااااه اباااااه من اول يوم شفته وهو في بالي وانا ماروم اني اظهره من بالي ..
وديمه : انزين يله شو بتسوين الحينه ؟؟ ماعليه كثر الدق بيفج اللحام ..
حمده : صبري شويشوي هاذا شكله مابيفيد معاه الدق لا هاذا يباله شي اقوا .. شي اخليه هو يركض ورايه هب انا ..
وديمه : حمدوووووووه شو بتسوين ؟؟
حمده : بتعرفين عقب ..
وديمه : لا والله كل شي بتقوليلي اياه عقب مالي خص الحينه اتقوليلي اقولج .. يله ..
حمده : ودوم لا تستعيلين اتريي ... تعالي تعالي خلينا انروح نتعدل عسب نتغدى في المارينا ..
وديمه : اوكيه واي نوت خلنا شويه نتفرج على المزايين ..
حمده : ههههههههههه يله ...


يوم الجمعه
في بيت مايد الفلاحي ..
الساعه 3 الظهر ..


<font color=orange>ذا نصيبي في الهوى دومي ... معــــادلاته دوم مختـــــــــله
من حبيب القلب محرومــي ... ماعرفت ارضاه او اوصلـــه </font>

فاطمه :امايه وين حمد ؟؟
ام حمد: مادري يابنتيه جنه راقد اشعنه شو تبيبه ؟؟
فاطمه : لا ماشي بس بغيت ارمسه ابا اسير بوظبي اشتري شوية غريضات وهو ايقول انه باجر ماعنده دوام اجازه .. يعني فاضي خليه ايودينا ..
ام حمد : مادري يابنتيه جوفيه في حجرته ..اشعنه ريلج وين ؟؟
فاطمه : مابا ريلي ايوديني ابا اروح وياحمد لانه يزوي بتي معايه ..
راحت فاطمه حجرة حمد وحصلته طايح على الشبريه ويالس يلعب بشعره وسرحان ..
فاطمه : باااااااو ..
حمد : ...................
فاطمه :حمد حوووووووووو..
حمد :........ شو تبين اشعندج اتزاعقين ...
فاطمه : شو ابا لقيتلك الحل جان ماتباه ابراييييييك يله انا بظهر برع... وجبلت صوب الباب اونها بتظهر نقز حمد من على الشبريه وراح صوبها ومسكها ..
حمد : تعالي تعالي .. فطيم شو تتمصخرين انتي ..
فاطمه :هههههههههه .. ابا اجوف ردة فعلك جوف ياطويل العمر اول شي اتوديني انا ويزوي ختيه بوظبي واتودينا المرينا مول نشتريلنا بدل لانه نحن من زمان انحن وانته هب طايع ..
حمد : هي والحينه عاده تبين انتي وختج تنتهزون الفرصه هاه ؟؟
فاطمه : هههههههه يعني هييك شيي ..
حمد : ادلينها امج وين روحي انقلعي عندها ولا ريلج وينه من الصبح عندي حل وعندي حل عندج طل ..
فاطمه : ههههههههه انزين اتريا ..
حمد : جب جب انقلعي ...
فاطمه : كنت يايبه الحل ويايه بس برايك انته ماتباه وتباني انقلع اوكيه باي ..
حمد : تعالي تعاااااااااالي .. مشكله اللي يحط قلبه عندكن انتن يالبنيات يله قولي ..
فاطمه : اسمع ولا تقاطع ..
حمد : انزين يله قولي خلصينا ..
فاطمه : عقب ماتودينا انا ويزوي المارينا مول اونك عاده انته بتمر اتسلم عليهم واتخلينا نحن في السياره وعقب اذا قالولك اقعد قولهم سمحولي الاهل عنديه في السياره وماروم ابطي عليهم لازم انرد العين وانا بس بغيت انيه امر واسلم عليكم .. فعقب هم اكيد مابيطيعون بيحلفون عليك انه تقعد وانك اتخلينا نحن انحدر عندهم البيت فعقب انا بشوف البنت انزين .. وطبعا بتعرف على اساميهن كلهن وبعرف منوه هي اذا كانت البنت الوحيده و عسب نطمن انه يمكن ايكون عندها خوات فااباك توصفليه شكلها عسب اعرفها .. اي وحده فيهن .. وعقب بشوفها وبخبر امايه عنها وبنروح انخطبها ..
حمد : ياويييييييييلي هاذا عقل ولا شوووووووووو ماشاء الله عليج ماشاء الله عليج .. والله انتي شي خطييييير ..
فاطمه : هههههههه عيل شو تتحراني .. احم احم ..
حمد : انزين بس ياذكذك اذا ماقولليه خله هلك يحدرون .. شسوي ..؟؟
فاطمه :هالشي مستحيل يعني اذا استوى هالشي يكون 2 بالميه .... مادام انته قربوا بك نحن مابيقربوبنا ..
حمد : خلاص على خير ان شاء الله عيل اليوم انروووووح ..
فاطمه : اعنبوك اشعنه جذه مستعيل ..؟؟
حمد : جب انتي كثر ماصبرت انا ماروم انيه اصبر صبرت وايد عاد انا ..
فاطمه : اوكيه ولا يهمك اليووم اليوم بس صبر شوي بشاور ريلي وبفرح يزوي بهالخبر اوكيك ..
حمد: اوكيك بس يله بنصلي العصر وبنروح عسب تشترون على راحتكم لين عقب اذان المغرب وعالساعه 8 انكون عندهم لانه نفس هالوقت كانوا كلهم متيعين يوم رحتلهم ..
فاطمه : اوكيييه ولا يهمك ..
حمد : فطييييم مشكوره ..
فاطمه : العفوافا عليك نحن في الخدمه ..
وراحت فاطمه عن حمد .. اتخبر ريلها واتخبر اختها اليازيه عن روحتهم لبوظبي ...

يوم الجمعه
الساعه 8 ونص
في ميلس فاضل القبيسي ..


كانوا قاعدين الشباب ويا زايد ونهيان وسعيد وخليفه ويابر وهزاع وراشد وعلي .. يلعبون ورقه ..
حدر عليهم حمد ..
حمد :السلاااام عليكم ..
الكل : وعليكم السلام... وسلم علىالكل
خليفه :مرحبا مرحبا بهل العين اقرب اقرب ..
حمد : المرحب باجي الشيخ شحالكم؟؟ ..
الكل : ابخير وسهاله ..
يابر: وانته اعلووووومك ربك ابخير ؟؟
حمد : والله يسرك الحال ..
سعيد :وينك ياريال ماييتنا غير مره وحده وخلاف قطعت .. جنه الا ماعيبتك قعدتنا ...
حمد :افا علييييييييك .. قعدتكم على العين والراس ..
زايد : من طيب اصلك يالفلاحي ..
راشد : الريال بني عمي عيل ؟؟
حمد : فلاحي ؟؟ من دمتك حسيت فيك ..
راشد : هيه نعم .هههههههههه ..
وتم حمد ايسولف معاهم تقريبا عشر دقايق ..وظهر ايعرف قوم راشد ويقربولهم من بعيد ..
حمد : يله اسمحولي ..بترخص عنكم ..
خليفه :افاااااااا ياي اتمر علينا مرورو الكرام واتروح اقعد اقعد ..
يابر: ياوالله ماتظهر اليوم الا وعشاك عندنا اعنبوه عشانا الحين بيحطونه اقعد ياريال شو وراك خبرنيه شو وراك .؟؟
حمد : اسمحوليه والله هليه عندي في السياره وانا كنت قريب صوبكم فقلت بمر بسلم عليكم وخلاف بسرح صوب العين ؟؟
سعيد :اشعنه باجر ماعليك دوام ؟
حمد : لا الغالي اجازه باجر .. يله السموحه ..
خليفه : افا يابوشهاب ماهقيتها منك اشعنه ماخليت هلك يقربون داخل ... والله الصراحه ماهقيتها منك ..
يابر: والله ماتظهر لا انته ولا هلك الا وعشاكم اهنه ..
حمد : اشعنه اتحلفون ؟؟
سعيد :شو هو اللي اشعنه انحلف اعنبوه من مذهب يابوشهاب توصل انته وهلك لين اهنه وماتخليهم ايحدرون واتحدر انته خمس دقايق وتظهر .. لا لا اعنبوه .. مطرودين ؟؟
حمد : يارياااااااااال ... المره اليايه ..
ومسك خليفه تلفونه واشر على حمد : مابتروح اليوم عاده .. جان اتروم تظهر خاري الميلس اظهر ..
حمد : ههههههه والله انكم انتوا .. سالفه اليوم بتسوليه اياها ..
اتصل خليفه على تلفون البيت وردت ريسه ..
خليفه :الوووو..
ريسه :الوو مرحبا خليفه ..
خليفه : مرحبتين .. اقولج امايه وينها ..؟؟
ريسه : امايه محد ظهرت راحت صوب قوم ختيه شمه يتمشون هي وعويش وعفراء ..بغيت حايه .؟؟
خليفه : هيه هل ربيعيه في السياره ..
ريسه : افا اشعنه عاده خلهم يقربون حيااااهم الله .. انتوا ماتستحون على ويوهكم مخلينهم في السياره اشعنه ماقربتوبهم .. يالفضيحه شو بيقولون العرب عنا ..
خليفه : جفت الهزاب كله يا فيييييني .. وسكر خليفه عن ريسه .. خبرت ريسه ميثه وظهرن هن الهنتين يستقبلونهم عند الباب مال الصاله بس وقفن داخل في الممر وفتحن الباب ..
حمد : خيركم سابق ..
يابر: لا خيرنا سابق ولا لاحق يله خله يهلك يقربون .. وظهروا يابر مع خليفه عسب ايدلونه مكان الصاله وقفوا يابر وخليفه عند باب الحوي وين ماكان حمد موقف سيارته خاري ..وراح حمد صوب سيارته عسب ايخلي خواته يحدرن ..
حمد : انزلن..حلفوا عليه الا اخليكم اتحدرن ..
اليازيه : هااااااااه لا لا شوه انا هب نازله ..
فاطمه : عيب عليج استحي على ويهج اكيد يتريونا داخل ...
اليازيه : هاااااااا لا لو تدريبيه امايه جان قصبتنيه انتي حرمه معرسه انا عدني بنيه لا لا مافيني روحي انتي وانا بتم اهنيه ..
حمد : يله عاده عيب عليكم الرياييل يتريون ..
فاطمه وهو اتحط غشوتها على ويهها وتوها بتنزل : يله ..
اليازيه وهي تفج الباب بضيجه : والله انكم فضيييحه ..ومن شافوا يابر وخليفه البيبان اتبطلت حدروا داخل الميلس يتريون حمد .. اشر حمد حق هله على المكان اللي اشروله يابر وخليفه عليه وراحت فاطمه ووياها اليازيه صوب باب الصاله .. وتمن واقفات ..
ميثه : مرحبا مرحبا اقربن حياكن الله ..
فاطمه : تسلمين الغاليه ..
وحدرن فاطمه واليازيه وسلمن على ريسه وميثه اللي كانن واقفات في الممر وقربن فيهم لين الصاله وين ماكانت قاعده شيخه ونوف... ونشن يسلمون على فاطمه واليازيه . ويلسن الحريم ويابن الهن الفواله واتفاولن ..
ريسه : سمحولنا والله ماندريبكم لو كنا ندريبكم جان ماخليناكم في السياره خاري ..
فاطمه : افا عليج انتوا اللي سمحولنا يايينكم جذه على غفله .. الا ماتعرفت عليكن ..؟؟
ميثه : انا ميثه حرمة خليفه ..
ريسه : وانا ريسه حرمة يابر..
شيخه : ههههههه وانا شيخه حرمة سعيد وهاي بنتيه مهره ..
فاطمه : فديييييتها ياربي وشلتها وباستها .. وانا فاطمه الفلاحي وهاي ختيه اليازيه ..
نوف : حيااااااج ..
اليازيه :الله يحيج ..
نوف : وانا نوف اخت يابر وخليفه وسعيد .. وانا اصغر وحده في البيت ..
فاطمه وهي اتقول في خاطرها والله وعرفت تختار ياحمد : يعني اخر العنقود ..
اليازيه :شراااتيه يعني ..
نوف : انتي اصغر وحده ..؟؟
اليازيه : هيه .. ونوف انتي وين تتدرسين .؟؟
نوف : انا كنت في التقنيه وخلاف حولت جامعة زايد ..
اليازيه :هيييييه ياحييج انا بعدني اخر سنه ثنويه عامه ..
شيخه : بالتوفيق ان شاء الله ...
وقعدن ايسولفن الحريم واتعرفن على بعض اكثر وخلاف يت عزه وعفراء وعاشه وقعدوا معاهم واستانسوا كلهم بالهليلسه .. وخلاف اتصل حمد بفاطمه على اساس انها تتطلع عسب مايتاخرون لانه وراهم درب طويل للعين .. خذت فاطمه رقم شيخه اللي اندمجت معاها لانها كانت في سنها ..


يوم السبت
الساعه 6 ونص العصر ..
في بيت فاضل القبيسي

ميثه وريسه وعاشه وعيالها وعفراء ونوف كانوا قاعدين على الزوليه اللي فارشينها في الحوي ..ايسولفن وخلاف يا يابر وقعد معاهم ..وعزه هالوقت كانت في العزبه هي وفاضل ..
نوف وهي ترمس ريسه وميثه : تتدرون اليوم اربيعاتيه يرمسن عن فلم عوكل في السينما ايقولكم ايفطس من الضحك .. ولا لقطه منه ماتضحك.. وكله اللي شافه مدحه والله خاطريه اروح لو مره في حياتي السينما
ريسه : انا قبل لااعرس كنت شراتج اتمنى اتمنى.. شويه وبحب ريل اخوانيه بس امايه اااه يامايه كانت دوم في المرصاد .. بس عقب العرس سرت ويا شيبتيه مرتييين ..
يابر: جني سمعت شيبه ؟؟
ريسه :ههههههه جوف جوف الرمسه اللي عنه بيسمعها ...
ميثه :انزين يعني لهالدرجه الفلم حلو جنيه انا جفت حاطين اعلانات عنه في التلفزيون هب هو اللي يمثل فيه اللمبي ..
نوف : هييييه هوووو . خلونا انروح دخيلكم ...
ريسه : هههههه وين انروح ؟؟
نوف وهي اتصاصر ريسه : رمسيه هو من رمسه وحده منج يقتنع .. خليه يودينا ..حرام ريوس دخيلج ..
ريسه :ههههههه انزين ..
وراحت ريسه وقعدت حذال يابر ..
ريسه : يبوري ..
يابر: هاه ها لبيه اعيونه قلبه ..
صدت ريسه على نوف اللي كانت لاصقه في ميثه اتخبرها وغمزتلها ..
ريسه :انته جفت فلم عوكل ..؟؟
يابر: لا والله بس سمعت عنه ..
ريسه : انزين حبيبي انا في خاطريه اجوفه شو رايك ..
يابر: مادري ..
ويت نوف ويلست اتقردنه ..
نوف : حبيبي اخويه اخويه اللي يخليك ..
يابر: حوه اشعندها هاي نقزت .. انتي شو يخصج ..؟؟
ريسه : تراها بتي معانا ..
يابر: هيييه عسب جذه لاصقه فيها من الصبح قولي ابا اسير وياكم خلاص مدامج بتين ويانا مابنوديج ..
نوف واونها مبرطمه وريسه تمسح على راسها : حليلها هاي النونو مالتكم اللي في البيت ..
يابر: اي نونو قولي بغله ..
ريسه : هههههههههه حرام عليك ..
نوف وهي اتصاصر ريسه : جوفي ترا انا بس ساكته عنه عشان ايودينيه ولا والله اقوم اجلب هالزوليه على راسه ..
ريسه :ههههههههههههههه ...
يابر: شو قالتلج ..؟؟
ريسه : ماشي اتقولليه جوفي اخويه يحبنيه الحينه بيودييييينيه ..
يابر: خلاص اوكيه ..
ميثه :حووووووه انا بعد اريد اروح اجوف الفلم .. واتصلت في خليفه اللي كان قاعد في الميلس مع اخوانه ويا قعد معاهم ..
يابر: ها سحبتييه؟؟ ...
ميثه : اهاااااااا طبعا ..مرحبا مرحبا بابوهزيم ..
نوف : شو نويتي اتسمونه هزيم اذا ولد ..
ميثه : شو نسوي ابويه فاضل يباه على اسم يدج ..
نوف : اسميه الولد بيتعقد ..
خليفه : ياره الله الاسم بلاه اشعنه يتعقد ..؟؟
نوف : لا سلامتك ..
خليفه :هييه اتحرا ياام الهيلان ..
نوف : تراهم من الصبح طايحين فيني وانا ...
جان ادقها ميثه بكوعها ..
يابر: وانتي شوووووو ..
ميثه : وهيه ماشي .. خليفه ..
خليفه : لبيه غناتي ..
ميثه :اريد اروح السينما اشوف فلم عوكل اوكي خلوفي ..
خليفه وهو فاج اعيونه يطالعها وهي ترمس : هاه حبيبي ؟؟
ميثه : عييب هالرمسه جدام الصغاريه وكانت يالسه تتطالع يابر واتحرك حياتها له ..
يابر : هههههههه عمريه مابكبر في عينج دومي ياهل ..
ميثه : خخخخخخ لاني عرست قبلك هههههه .. عسبة جذه ..
يابر: اوكي اتس اوكي . يله الحينه شو يابوهزيم شو قلت ..؟؟
خليفه : افا عليهن انوديهن ليش مانوديهن واطالع ميثه وغمز الها ..
يابر: بس هاي الحشره الغريبه تبا اتي ..
خليفه وهو يستهبل : وينها ..؟؟؟
يابر: هاذي واشر على نوف ... ونوف شويه وبتقوم اتصفعهم هم الاثنينه ..
نوف : جب جب انا مابا اسير .. ونشت عنهم ..
ريسه : حرام عليكم ..
ميثه : نوافه حبيبي تعالي ان انتي ماسرتي انا هب سايره ..
يابر وهو يربع ورا نوف ومسكها : هههههههههههه فديت اللي يزعل انا تعالي تعالي انتي على راسي افا عليج ..
نوف : احم احم اتحريت . وهاذا الثاني واشرت على خليفه ..
خليفه : تعالي يالدلووووعه بنوديج ..
عاشه : وين بتوديها ان شاء الله ..
يابر: صباااح الخير نحن من الصبح نرمس ياام فاضل وانتي وين ..؟؟
عفراء : ماسمعناكم يالسين انسولف ..
يابر: هيه صح انتن من تشوفن بعض تنسن اللي صوبكم .. وخصوصا هاي عويش ام لسانين ..
ميثه : هههههههه ..
عاشه : ماعليه مسود الويهه ههههه .. ...
خليفه وهو ايحط ويهه حذال ويهه يابر: منوه ابيض ؟؟؟
عاشه : فديييتك امبونك الزين الا من عقبك..
يابر: حووووووه مالقيت الا ذوق هاي ..
عفراء : هههههههه ..
نوف : يله انا بسير اطالع الاوقات .. وبخبركم ابها وبحجز الكم .. ويسلت اتعدهم ..
ميثه : وموزه ونوره وعليا مابين معانا ..؟؟
عاشه :الله يسلمج عليا بيت عمتها ..
ريسه :هيه صح وموزه ونوره من الظهر وهن بيت يدهن صح عفراء ..
عفراء : هيه ..
نوف : خلاص عيل خمس كراسي بحجز ..
ريسه : في النص هاه ؟؟
نوف : اوكيه وراحت نوف تربع ..
وشلت التلفون وحجزت ... وردت الهم مره ثانيه ..
نوف : فيه الساعه خمس والساعه سبع ونص والساعه عشر ..
ميثه : احسن وقت الساعه 7 ونص .. صح
ريسه : اهي احسن ..
خليفه : خلاص ماعليه سبع ونص سبع ونص يله حجزي عالساعه سبع ونص ..
نوف : اوكيييييييه وردت تربع صوب التلفون وحجزت ...
ريسه :عيل يله انروح نلبس لانه الحينه سبع الا رربع عسب نلحق ..
ميثه : يله ..
خليفه :انا في الميلس انزين .. وراح عنهم ..
يابر: وانا بروح معاج..
ريسه : شو اتسوي اتي معايه روح الميلس ويوم بخلص انا بنزل ..
يابر: جب مش على كيفج وراح معاها ..
ريسه : لزقه لزقه ..
وراحت ميثه قسمها عسب تتلبس وشافت نوف في طريقها وقالتلها تلبس .. وعالساعه سبع وعشر كانوا جاهزين وركبوا كلهم في سيارة يابر وراحوا السينما وحضروا الفلم وردوا البيت ..



يوم الاحد
بيت غيث الشامسي
الساعه 5 العصر ..


كانت ام حمدان قاعده هي مع شمسه وسلطان والعنود ومنصور واخو شمسه مطر .. ياينهم من دبي.
ام حمدان : حشا يابويه يامطر مابغينا انشوفك ..
سلطان : هاذا ولد ختج ماينشاف الا من عيد لعيد ..
مطر : شسوي ياخالتيه والله انه دواميه اسبوعين باسبوعين يعني اسبوعين راحه واسبوعين دوام ..وماصدق احصل هالاسبوعين الا بس عسب اخلص اشغاليه .. والله انيه اادري انيه مقصر وياكم ..
منصور : مقصر وايد هب شويه بعد .. ياريال انا متى ماشفتك من يوم عرسيه ..
مطر : ههههههههه انزين والحينه شفتك ..
ام حمدان : وايه واشعنه هالدوام جذه لوعة جبد شلك في البلا ..؟؟
مطر : شو اسوي ياخالتيه ها البترول واللي يباه ..
ام حمدان : واعليه عنك ..
شمسه :انزين ويوم بتعرس شو بتسوي بتودي حرمتك وياك ؟؟
مطر : حوه اشعندج وين اودي حرمتيه ويايه سكن كله شباب وين اوديها اقعدها عند الشباب ..
شمسه : هههههههههه .. اشدراني ؟؟..
سلطان : هههههههه يوم اقولك . الحمد لله محد ترى صاحي فهالبيت ..
العنود : ياويهك اذا نحن كلنا خبايل فاانته اخبل واحد فينا ..
سلطان : اوكيه يوم اقولكم تعالوا بنسير المستشفى بنجيك مااطيعون . من شو متروعين ..؟؟
ام حمدان : وايه بالستر اشعنه اتجيكون وعلى شوه اتجيكون ..؟؟
منصور : ههههههههه امايه ولدج ايقول كل اللي في البيت خبايل ويبا ايوديهم المستشفى يطالعهم ميانين ولا لا ..
ام حمدان: ثره هو اول واحد لازم اتودونه..
سلطان : غايه اشعندج اتعقين خيط وخيط ..
ام حمدان : طالعوا طالعوا انته مسود الويهه هاذا شو ايقول ..
مطر : هههههههه تعالوا مستشفى الامل عنا في دبي ..
سلطان : جوف مطور انا بروح معاهم وبخليهم كلهم ايجيكون على عقولهم وخلاف انا بيلس اضحك عليهم
شمسه : جفت لانه شاك في عمره ههههههههه ..
سلطان : ياويهج هاي اختك ؟؟
العنود : سؤال غبي ؟؟
سلطان : والله جان هاي اختك عيل على الدنيا السلام ..
مطر : شسوي هاذا قدر ربيه ..
شمسه : مسود الويهه انته وياه ..
وخلاف دشت ميري يايبه العصير ..
سلطان : ميرررررررري ميررررررريوووه ..
ميري : شو يريد هزا واجد فيي مشكل ..
منصور : ههههههههه ياخي بعدك يالس لو انا منك بحفر حفيره وبخش ويهيه فيها ..
سلطان : وايه تراب عاد مابغيت لا انخش من هاي ام ضروس .. ميريوووووه ..
ميري : شو في ؟؟
سلطان وهو ياشر على مطر : جوفي هاذا في مطر ايريد يسوي شادي .. مشان انتي .. بس هو يستحي ..
ميري وهي تضحك : لا انا مايريد هازا انا في زوج داخل سيرلانكا ..
مطر : وابووك اللبو يعني انا الميت الحيييينه ..
ام حمدان : هههههههه .. سيري ماما هذيله اليوم ماعرف شو مستوي بعقولهم ..
ميري : جين ماما وروحت ...
سلطان : مينونه هاي الحينه بتيلس اتفكر ..
منصور : ههههههههه .. بتيلس اتغني عيل طول الليل .. في دبي ساكن صاحبي .. فاق المها وحد الظبي .. انته مدحت اللي تريد .. وكل حد يمدح من يبي ..
وتموا كلهم يضحكون . ..
ريسه : السلااااااام عليكم ..
الكل : وعليكم السلام ..
ريسه :حياك يابر احدر . وحدر يابر..
منصور : حيالله النسيب .. اقرب اقرب ...
وسلمت ريسه على قوم امها واخوانها وحريمهم وعلى مطر وسلم يابر عليهم وقعد وقعدت حذاله ريسه .
ريسه : اشحالك مطر ربك ابخير ؟؟؟
مطر : بخير وسهاله انتي اشحالج ؟؟
ريسه : يسرك حالي .. وشحالهم قوم خالتيه ؟؟
مطر : بخير وسهاله ..
ريسه وهي رايحه صوب الباب تزقر على ميري عسب اتروح تنزل الشنطه
وخلاف ردت عند يابر ....
ريسه : يابر عطني سويجك عسب اخليها اتنزل الشنطه ..
يابر: السياره مفتوحه ..
وراحت ريسه وقالتلها اتنزل الشنطه ..
العنود :سمعتج يوم زقرتيها ...
ريسه : ههههههه هيه اشعنه ؟؟
العنود : من الصبح مخبلبها سلطان اونه مطر ايحبها ..
ريسه :هههههههههه حليلها .. بتعيش الدور عيل ..
يابر: اي وحده فيهن ..؟؟
منصور : هاي وانته بعزه وكرامه السيلانيه اللي ضروسها خاري ...
مطر : يبون ايفرونها في جبديه لا وتعرف شو قالت اونه لا انا مايريد انا في زوج مالي في السيلان ..
يابر: هههههههههه ...
ام حمدان : يابويه هاي من زمان عندنا من عشر اسنين وهم دومهم طايحين ابها .. وحليلها دومها ساكته لا تهش ولا تنش ..
شمسه : هههههههه يابر يقولك خرفت وبعدها يالسه ..
يابر: هههههههه شو اتسوي مسكينه .. وينه شيبتكم ؟؟
شمسه : راقد ..
يابر: وعيوزكم ..؟؟
العنود : هههههه خاري ماجفتوها وانتوا يايين شالتنها الخدامه ادور فيها في الحوي ..
يابر: لا ماجفنا حد ..
ريسه : يمكن مودتنها ورى البيت ..
العنود : وايه بسم الله بنتيه وراحت العنود اجوف بنتها وزقرت على الخدامه اتيبها داخل ..
ام حمدان : وينها ؟؟
العنود : اهنيه قاعده وياها على المريحانه ورا البيت ...
وحدرت الخدامه وشاله غايه الصغيره في ايديها اللي خدودها مستويات حمر من الحر ...
ريسه : وايه فدييت جكلي بف .. فديتها .. اناااااااا ..وشلتها ويلست اتبوسها . وعطتها يابر..
يابر: فدييييت اعيونج انا عمي اغوو اغوو ..
ريسه وهي تغمز حق العنود : يتعلمون عربنا على اليهال ..
العنود : ههههههه شو تبين بعد اكثر انتي ياله منج طماعه ..
وقعدوا ايسولفون واتعشا يابر عندهم في العين وخلاف رد بوظبي لانه عليه دوام باجر ...

<font color=magenta>لك يتوق القلب مشتـــاقي**خذتني عن كل مزيوني
يالجمال وحسن الاخلاقي**وانسجام بدد شجـــوني</font>


يوم الاحد ..
الساعه 12 ونص ..
في قسم يابر..

هالوقت يابر كان ايكلم ريسه في التلفون ..
يابر: يله متى بتين ماروم ارقد ..؟؟
ريسه : هههههههههه اعنبوه توني اليوم يايه ..
يابر: لا اسف انا باجر بيي اشلج..
ريسه : يبوري عاده ..
يابر: اسف حبيبي ماروم بموووووووت من الولهه تعرفين شو يعني بموت ..
ريسه : انته اتعرف ان يبت طاري الموت على لسانك انا شو بسويبك ..؟؟.
يابر: ههههههه شوووووو؟؟
ريسه : بنحرك اتعرف شو يعني بنحرك ..
يابر: ههههههه ان ساء الله من اعيوني .. ياعيوني
ريسه : تستوي سخيف يوم اتييب هالطاري ..
يابر: وايه وايه .. لا والله ..
ريسه : هيه والله .. ويالله انته ارقد الحينه لانه باجر عليك دوام ..
يابر: احببببببج احبببببج اموت امووووت فييييييييييج عذبيتييييني عذبتييييييني مب بس اموت فيج .. انا اتعذب انتي شومسويه فيييني اف اف هلكت ..
ريسه : هههههههههه يالمينون برايك ارقد ..
يابر: اسف ماقدر ..
ريسه :يله عاده ..
يابر: امممممممم احببببببببج والله ..
ريسه :وانا بعد امووووووووت فيك ..
يابر : ماروم ارقد وانتي هب حذالي ...
ريسه : غمض اعيونك وبترقد ..
وتم يستهبل عليها لين الساعه وحده ونص وخلاف هزبته وخلته غصبن عنه يرقد ..


<font color=orange>يا كل عمري يا حياتي أنـا أبيـــــــــك *** يا عالمي يا حلمي الــلي طواني
ضم بحنانك دافي الــحضن وأعطيك *** قلبي وفكري وكــل كلي وحناني</font>

في سيارة خليفه
الساعه 7 المغرب ..

خليفه كان مودي ميثه ونوف السوق لانه ميثه كانت تبا تشتريلها قطعه حق ملجة اخوها هزاع .. فنزلت هي ونوف و تم خليفه اروحه في السياره ... خلاف يت سياره بي ام ووقفت حذاله ..وكانت حرمه منقبه ..
نزلت الحرمه الدريشه حق خليفه واشرت عليه .. نزل خليفه الدريشه عسب ايعرف هي شو تبا ..
الحرمه : لو سمحت اخويه هاي سيارة ريم ؟؟
خليفه : لا هب سيارة ريم غلطانه ..
الحرمه : نفس السياره ونفس الرقم انا اتحريتها سيارتها وانته ريلها ..
خليفه : لا جيكي على الرقم ..ولف الصوب الثاني يطالع ميثه اللي كانت يايه هي ونوف يتشمن صوب السياره ..
الحرمه وهي اتفر شي في سيارته : يله السموحه منك .
رد خليفه صد عليها مره ثانيه : مسموووووحه ..وسكر الجامه ..


انتهىىىىىىىىىى الجزء ...


ظنكم منوه هاي الحرمه وشو اللي فرته على خليفه ؟؟؟
ظنكم شو بيصير بين حمد ونوف ؟؟؟
ظنكم شو اللي تبا اتسويه حمده ؟؟؟


</p></font>