<font color='#8D38C9'><p align=center><font color=#330033>يالله انا بكملها للي يتابعها

وبليــز قولوا لي جانكم تتابعونها عشان احط حساب

وتفضلــوا التكمله



</font>الخامس

شل سلطان امه وخواته وحرمة اخوه .. وراحوا البيت فليل عالساعه 10 بعد مانتهى وقت الزياره ... وقالوا حق منصور انه بيون باجر الصبح بيشلونه وبيرحون جدا بيتهم ... وصلوا البيت وكل و احد منهم نزل ودخل غرفته عشان يرتاحون ... اما ريسه راحت غرفة هند وقعدن يسولفن .... وساره راحت اتشوف عيالها وتتريا ريلها ......

الصبح يوم الاربعاااااااء ...

سلطان كان راقد الساعه 9 ييته ام حمدان تربع عشان توعيه من الرقاد عشان ايروح اييب اخوه من المستشفى لانه منصور كان ملان ومتضايق من قعدة المستشفى .... وكل ساعه يتصل حق امه عسب ايروحله سلطان واييبه ...
ام حمدان : سلطان قوم ياولديه .. قوم يعلني افداك روح وهات اخوك ... من المستشفى
سلطان فتح عيونه شويه ويلس يستهبل على امه .... عسب يقهرها شويه ...
سلطان : وهو عقب مافتح عيونه كنه حرامي وسكرها .. يقول حق امه .. نوره خليني ارقد جبيبتي انتي ..
ام حمدان : وصل القيج عندها 180 فولت عليه .. يعل النور اللي يفارق حياتك ياربي قووووم قووووووووم ... وشلت المعلاق اللي سلطان كان فارنه على طرف الشبريه ... وتضربه من فوق اللحاااااااف ..
سلطان : وهو ميت من الضحك على امه ومايروم انه يضحك زياده لانه حاس عمره بينفجر ..... امايه بسني والله بسني والله انيه اتمصخر بس خلاص خلاص .. يعور .. يالعيوز ...
ام حمدان: عيز حيلك ياربي وظلم عليك ليلك قووم قام صلبك من مكانه ...
سلطان : افا افا افا يالمنصوريه ماهقيتها منج هاذا كله عشان نوره خلاص خلاص بخلي مها عيل .. هههههههههه ... انتي تحبين مها اكثر اعرف انا
ام حمدان : حبتك القراده ياربي انتي وهي حبها البرص ياربي .. قوم قوووووووم هات اخوك من المستشفى ... حليله من الصبح متملل ويتصلبيه ..
سلطان : ردينا على شغلة الدرايفر ...
ام حمدان : وشوه هاذا من الطبش دريفوووو ... ررر .. ام حمدان ماكانت تعرف تنطق الكلمه عدل لانها كانت صعبه شويه عليها ......
سلطان : ميت من الضحك عليها ... امايه هاذا الدريول ...
ام حمدان : انا ولديه يركب ويا الدريول وبعدين هب حلوه قووم قووووم والله ياسلطان انه ماقمت تعرف شو بيستويبك ...
سلطان : انزين خلاص قايم والله قايم بروح بتسبح وبتكشخ وبتعطر وبدخن يمكن احصل غرشوبه البارحه ماكنت متفيق حقهن هن يطالعني وانا لابسنهن لكن اليوم لا لا ماكون سلطان الشامسي اذا مافرييت روسهن فر .......
ام حمدان : قوم وعن هالرمسه البطاليه عيب عليك ..... هذيله بنات الناس عييييييييب ...
سلطان : ليش يطالعن شو مايورمن يقاومن يعني غزال شراتي جدامهن ..
ام حمدان : نش نش عن الخقه من صبباح الله خير ... وانته الصادق .. اي غزال ..... ؟؟؟ امحق غزال جانك انته الغزال ..
سلطان : امايه امايه بليز ماماتي لا تحبطين معناوياتي من الصبح يكفي اني البارحه راقد وانا منحبط معنويا وبعد اتين تزيديني هيه عسب اتخبل ...
ام حمدان : انته اروحك خبله .. بعد تبا تتخبل زياده يله يله قوم
وتتطلع ام حمدان من غرفة سلطان وهي ميته على ولدها من الضحك .... وتقول الله يهديك ياولديه ...
سلطان : والله انه هاي امايه حفله من دون كيك ويقوم يتسبح ويتغسل ... ويلبس كندورته وغترته ... وظهر من البيت ... وركب سيارته ... وراح صوب المستشفى ...

في المستشقى ........
سلطان : يحدر غرفة منصور ........ سلم عليهم ...
منصور : ههههههههههه .... وعليكم السلام .. يله ياريال خلني اروح صدق متملل انا ..
سلطان : انزين يله سرينا ... ياصرصوري
منصور : صرصور يلدغك ان شاء الله ....
سلطان : هههههههههه الصرصور مايلدغ . كششششششش كشششش خخخخخخخ ...
منصور : ويضربه ضربه خفيفه على جتفه يله قوووم قوم خلنا نطلع .. عن الهذربان من صباح الله خير ..
ويظهرون منصور وسلطان من الغرفه وهم يتمشون في المستشفى رايحين صوب الباب عسب يركبون السيار ويرحون ..
سلطان : اشعندكم انته وامك عليه طايحين فيني ضرب هي من صباح الله خير شاله المعلاق وتظربنيه فيه وانته الحينه تضربني على جتفي ...
منصور : احسن ادبتك زين تسوي فيك .. منصوريه ياريال هاي هب هينه ...
ويكملون منصور وسلطان طريقهم وهم طالعين من المستشفى .... وشويه كانن بنات في المستشفى يتمشن ... من شافن منصور وسلطان يتمشون ويا بعض ..
مهره : ااه ياله مواز شو في هذيله محلاتهم ماشاء الله عليهم .... اف اف شوفي هاذا بو عين عسليه محلاته ... والله انه قمر .. كانت تقصد سلطان ...
موزه : لا هب حلو ابيض هاذا شويه طالعي هاذا الحنطاوي محلاته ياربيب عذاب طالعي جسمه كيف والله واله جنان
مهره : س الناس اذواق خاطريه اعرف وين بيروحون ..؟؟
موزه : والله وانا بعد خاطريه اعرف شو رايج نلحقهم بس بطريقه انهم مايعرفون ...
سلطان : بسم الله من هالشيفه هاي بلاها مبحلقه عيونها وتتطالع جذه مشاكل هب جايفه خير .. ووهاي الثانيه اللي وياها حلوه بس انا مايعبنيه هالجمال ... وككككككك عندي احلى عنهن ...
منصور : اسكت مالك خص في بنات الناس خلنا انروح .. مافينا والله ... منصور كان شايف بس مهره .. وبعده ماشاف موزه يوم صد للثانيه اللي يقصدها سلطان عيبته وقرر انه يتسلى وياها ... ويسوي شي كان محشوم عنه طول عمره ..
منصور : احم احم سلطان هاي الثانيه حلوه .. تعال ابا اشوفها ...
سلطان : منصور هههه ماحيدك راعي هالسوالف شو ياك شو انتقلت العدوه ؟؟
منصور : ياريال شو بنيلس نسوي في هالدنيا من بعد .. ماخسرنا القلب ... وتمينا بلا احساس ومشاعر ... سلطان ابا ارقمها ..
سلطان : ععاااش عاش الشامسي يله عليهن عيل ...
مهره : ايه مواز تعالي تعالي شوفي صدوا علينا مافينا والله مافينا تعالي ندخل الدكان بناخذ حق اسماء عصير وماي حق غرفتها .. اسماء كانت اختهن العوده وكانت مربيه ومرقده في المستشفى ..
موزه : قولي والله اف شكلي عذبته يله ندخل عيل ...
مهره : هههههههه انطمي طالعي هاذا الخقاق بو عيون عسليه مايطالعني .. طالعي طالعي هاذا بو جسم رياضي شو يسوي ... ههههههههه ... الاه فلم هندي في المستشفى ..
صدت موزه ... ومااااتتت من الضحك عليهم .. لانه منصور كان حاظن سلطان وحاط ايده على جتفه ويمشي وياه ... ولاوي عليه جنه حبيبته ...
ودخلوا الدكان وراهن ..
موزه ومهمره كانن واقفات عند الثلاجه اللي فيها الماي والعصير ... ويوا منصور وسلطان .. وقفوا عند مال الحلويات ... والبنات يسمعن اللي منصور وسلطان يقولونه .. بس عاطينهم ظهورهن ...
منصور : ياخي انا احبك اموت فيك فديتك انا ويتم يلوي عليه ..
سلطان : ههههههههه لا تسوي جيه انا استحي ...... جفت عاد انا الحين كيف برقد الليل من دونك ... عطني رقمك عشان ... اتصلبك ولا اتم متعذب ومابات الليل .. واتم اهوجس بك طول اللليل ..
منصور : لا لا الغالي لا تهوجس بي ولا شي من عيوني يله ... سته سته ................ وكمل الرقم ماله.... لا تنسا اترياك ..
سلطان: هيهاااااء ثرك الا سويتني بنيه يله شل ايديك عني خلاص بتصلبك .... يله انروح ..
منصور : حفظته ..
سلطان : طبعا سهل ورد عاد الرقم مره ثانيه ..
وظهروا من المستشفى وراحوا منصور وسلطان صوب سيارة سلطان الرنج السوده ... ولحقنهن مهره وموزه عسب يجوفونهم وين بيرحون لانه كان في خاوطرهن يعرفن وين بيرحون ... واتغشن ومشن وراهم بس من بعيد ...
موزه : مهروه اطالعي شو عنده هاذا بو عيون عسليه طالعي ركبوا رنج ...وطالعي عليها رفم بوظبي بعد رباعي ااخ والله انهم كشيخين ... هب مقلع مثل هيله المقلع .. شكلهم جايفين خير .. وعندهم خير
مهره : انتي ماشفتيهن كيف كانت كنادريهم وغترهم كيف متعصمين فيها اف عذاب عذاب ... ولا نعلوهم انطونيو ... بعد ..
موزه : هي والله صدقتي يله يله انروح عند اسوم عن لا تحتشر علينا .. وتقول وين رحتن .. هالكثر ...؟؟
مهره : يله روحنا ..

وصلوا منصور وسلطان ودخلوا البيت وقعدوا كلهم يتغدون ...
احمد : ماتشوف شر يامنصور ... سلامات والله يالغالي ..
منصور : الشر ماييكك يابو شهاب .. ]احمد [كانوا يلقبونه بابو شهاب ...
شمسه : خطاك الشر يامنصور
منصور : تسلمين والله يابنت خالتيه خطاج اللاش ..
وقعدوا يسولفون وعقب الغدا كل واحد منهم راح ودخل غرفته عشان ايريحون ويرقدون ...


في بيت غيث الشامسي عقب الغدا كلهم كانوا قاعدين في الصاله يشربون شاي ..
ميره : حمدان دريت حليله منصور .. اليوم ظاهر من المستشفى وان شاء الله انا العصر بروح صوبهم ..
حمدان : افا ليش شو مستويبه ........
ميره: حليله في مرض الكبد الوبائي مسكين بس الحمد لله مب الخطير اللي في الوسط يعني في امل للعلاج ...
حمدان : لا حول ولا قوة الله بالله العلي العظيم والله ياميره مايستاهل كل اللي ياه الله يعينه ويهون عليه ...
ميره : اميييييين والله ياحمدان ..
حمدان : خلاص انا بروح اريح الحينه وان شاء الله المغرب بمر عليهم ..
ميره : خلاص عيل انا هب رايحه العصر بروح وياك يوم بتروح ..
حمدان : خلاص ان شاء الله ... عيل ..
روضه : والله وانا مااعرف ليش ان شاء الله ؟؟وانا اقول بلاها ريسه االيوم هب مدوامه ...
ميره : هي حليلها وهند عمتج عندهم تتدرين ..
روضه : قولي والله هند في بيبتكم يدتيه ... الاه وناسه عيل خلينا انروح عندهم ... المغرب .... ان شاء الله باذن الله ... شويه ويرن تلفون .... عبد الله ..
عبد الله : اوووووه هاذا هزاع ظهروهم اليوم ... الوووووووو حيا الله الشيخ هزاع ..
هزاع : هلا وغلا الله يحيك ويبجيك ياربي ... شحالك ..
عبد الله : بخير الغالي وانته شحالك .. ربك بخير ؟؟
هزاع : بخير ونعمه...
روضه : من سمعت اسم هزاع فز قلبها من مكانه لانه روضه وهزاع يحبون بعض من هم صغار ... وهزاع كان مرمس امه بخصوص روضه بس اول مايتخرج ويتوظف ... انه تخطبها له ...
عبد الله : وين انته هاه اليوم افراج افرجوا عنكم عيل .... وليش ماظهرتوا الاسبوع اللي طاف ؟؟
هاع : والله ياعبد الله كانت عندنا امتحانات .. وتمينا وعاد الحينه عاطينا اسبوع كامل اجازه ..
عبد الله : والله زين عيل اسبوع كامل هاه ... اسمينا بنساتنس مابنخلي مكان ..
روضه : وهي ميته من الغصه وتقول في خاطرها هي محد بيخرب هزاع في هالدنيا غير هاذا عبد الله .. يظهره ويخليه يدور ... اف منه غصه خله قاعد .. شو تبابه يحاوط ويشوف البنات اف قههههههر ...
هزاع : ههههههههههه ياله يانته عاد .... انته وحاوطتك مشكله ... هزاع الا بخبرك اليوم الاربعاء وان شاء الله بني العين صوبكم انا وقوم امايه ... انا بركب راشد ويايه وقوم امايه الدريول بيبهم تتدري انته سيارتيه صغيره ماتكفي .... والا بيبهم ويايه ...
عبد الله : مات من الوناسه لانه هو كان بيروح اليوم بيت قوم يدته وميثه بتي هناك يعني بيشوفها ...ماااااات من الوناسه ..
عبد الله : الا تتدري انه منصور حليله اليوم ظاهر من المستشفى ..
هزاع : هيه حليله اليوم يوم ييت ميثه تخبرني عنه .... والله مكسين مايستاهل اللي ياه ...
عبد الله : صدقت والله ..
هزاع : يله عيل ولد الخال تامرني بشي .. انشوفكم ان شاء الله بيتكم يدتيه اليوم المغرب ...
عبد الله : اوكيه عيل ولد العمه باذن الله ان شاء الله .... يله مع السلامه
هزاع : ربي يسلمك ... الغالي . باي
عبد الله : باي ..
روضه : منوه هاذا ؟؟ وشعرفه عن منصور ؟؟؟
عبد الله : شو الشيخه روضه تستهبيلن يعني .. اتشوفيني اقول هزاع .. كم هزاع نحن عندنا .. ومنوه هزاع اللي يعرف منصور ؟
روضه : ههههههههههه ماسمعت انزين انا عدل لاني كنت اطالع التلفزيون مانتبهت حق كل رمستك ..
عبد الله : انزين خلاص انا بروح ارقد المغرب قبل لا تروحون وعيني انزين امايه
ميره : كانت قاعده تقرا الجريده ومندمجه ... هزت راسها
عبد الله : انزيين امايه
ميره : انزييييييين عن القذا اتشوفني اهز راسي يعني فهمت لازم اتكلم يعني
عبدالله : هي عسب اتاكد
ميره : روح روح ارقد اخير ..
راح عبد الله يرقد وميره كملت قرايتها للجريده ... وروضه ربعت صوب التلفون تتصل ... بميثه تعرف متى بيون .؟؟؟

روضه : الووووووو
هزاع : اااه فديت هالصوت في خاطره كان يقول .... الوووو
روضه : قفطت عرفت انه هزاع .. السلام عليكم ..
هزاع : وعليكم السلام والرحمه ياحي هالصوت ..
روضه : الله يحيك شحالك هزاع ربك بخير
هزاع : بخير الغاليه احم احم وانتي شحالج ..
روضه : تمت ساكته شويه وعقب ؟.. ردت عليه والله الحمد لله الا ميثه حذالك
هزاع : في خاطره اف انا ماصدقت اسمع صوتج وانتي تبين ميثه ... هيه لحظه شويه ... ميثاااااااانه ميثااااانه
ميثه : هلاااااااااا شو تبا
هزاع : تعالي تلفوووووووون .. روضه تباااااج .. روضه تباج .. اتعمد انه يقول اسمها مرتين عسب هي تسمعه يوم ينطق اسمها ..
ميثه : هههههههههه والله احم احم قلتلي روضه وانا اقول ليش لاوي على السماعه جيه ..
هزاع : انجبي انجبي ... يله لانه امايه محتشره بنروح بسرعه اتكلمي
ميثه : اوكيه فارج ليش يالس شو تبا تسمع ..
هزاع : مالج خص الصاله صالت ابويه شو تبين انتي .؟؟؟ هب صالتج ..
ميثه : فقدتك...
هزاع : فقت ويهج ..
ميثه : هلا عمري هلا حياتي هلا بروحي رواضي والله هلا فديتج علومج وتظهر لسانها حق هزاع لانه هي كانت تقدر تقول اي كلمه تباها غير عن هزاع اللي ميمع الكلام كل في قلبه ومايروم يقول اي شي ويعبر عن مشاعره ...
روضه : هههههههههه ناويه تعلينينها علينا حرب يعني انتي السيوم شو تبينه يسوي فينا ....... حليله والله حرام عليج .. شحالج يالدبه .. ليش ماخبرتيني انكم بتون العين اليوم ؟؟
ميثه : ههههههههههه لازم اتكونين حفظتي اصلا انا نحن اسبوع انتم في بوظبي والاسبوع الثاني اني عندكم العين ...؟؟
روضه : انزين ومتى ...
ميثه : يله الحين ظاهرين يالسون يحطون الاغراض في السياره ... اها تتدرين انه هند في بيكم يدتيه ..
روضه : هيه فديتها ادري يحلات السيره وهي هناك والله انها فلم .. هي ولدها ....
ميثه : ياربي فديته خلفوني تعرفين انتي المزرايع جمالهم غير اف اف عذاب ..
روضه : هههههههههه بس هب كثر جمال الرميثات وخصوصا احم احم هزاع الرميثي اللي الف وحده تتمناه ..
ميثه : وووووووع وتسوي مالت حق اخوها الحين بله عليج هاذا حلو ...
روضه : ياالغبيه فضحتيني يله يله باي وتسكر التلفون من كثر ماهي قافطه ماعليه انا براويج ياميثوه والله اتشوفين ..
ميثه : هههههههههههه حليلها استحت سكرت التلفون في ويهي ..
هزاع : قالت عني حلو ؟؟
ميثه : جب مالك خص ..
هزاع : ماعليه ويقوم يسحبها من ايدها ويدويها عند امها يفرها عليها .. يوديها هاي .. سيري عن امج ولا اتين تعلبين عند الكبار مره ثانيه .. ويفتن عليها ... يله .. يللللللللللللله ..
ميثه : هههههههههههههه هههههههههههه ماماتي ..
شمه : قومي عن الدلع روحي لبسي شيلتج وعباتج ...
ميثه : انزييييين ياقمر .. سمايه انتي ..
هزاع : يله عيل امايه بنروح قبلكم انا وراشد ويزقر على راشد ..
راشد : كان واقف عند المنظره اللي جدام باب البيت يالس يتسفر ..
هزاع : اوووه اووووووووه حق منوه هاي الكشخه كلها ...؟؟؟
راشد : بس جيه كيفي .... انته ليش محتر لاني ابيض عنك يعني
هزاع : امحق بياض يالمصري ....
راشد : ههههههههههههه احلى عن السوداني ..
شمه : يالله منكم من عيال لازم في كل مكان يتاقرون بس خلاص سكتوا ...
روضه : كانت ماسكه ايد ريم واتنزلها وياها على الدري ....
وركبوا راشد وهزاع .. سيارة هزاع البورش صالون وساروا العين .. وركبن روضه وشمه وريم .. ويا الدريول وراحن .. . وراهمم ...

في بيت غيث العصر قبل الاذان بربع ساعه ..
غيث : يله ياعيال روحنا . وروحوا كلهم بيتكم اليده.... ودخلوا البيت وسلموا عليهم كلهم اللي كانوا قاعدين في الصاله ... احمد وحرمته شمسه .. بطي وحرمته ساره وعياله عليا وغيث ... وهند وولدها .. وسلطان ومنصور وام حمدان ؟؟؟

وبعد خمس دقايق هل العين كانوا واصلين رباعه ... وتوهم نازلين من السياره الا الرياييل اللي كانوا في البيت توهم طالعين كانوا رايحين المسيد يصلون المغرب .... وسلموا عليهم واايهتهم شما كلهم وروحوا ..
عبد الله : شحالج ميثه .. ؟؟؟
ميثه : بخير وسهاله وانته علومك..
عبد الله : علوم الخير ..
ودشت ميثه ويا امها وريم البيت يسلمون عليهم ...ميثه ماكانت تحس بشي صوب عبد الله كانت تعتبره مثل اخوها هزاع .. ماكانت تفكر فيه مثل ماهو كان يفكر فيها .... ودخلوا الصاله وسلموا كل الحريم على بعض ... ريم ولطيفه ومريومه راحن بيت غيث يعلبن باربي على قولتهن ..
ودخلن ميثه وروضه غرفة ريسه اللي كانت مجابله الباب مال الصاله .... وقعدن على الشبريه .. وقعدن الحريم مع بعض ... في الصاله ..
ودخلوا هزاع وعبدالله .. البيت قبل الرياايل .. توه كان داخل هزاع .. هووووود
الحريم : اهدااااا
دخل هزاع وهو كان فاتح باب الصاله وروضه كانت مجابله الباب ..
روضه : ااااااااخ وطاحت من على الشبريه عالارض ........ ياويلي محلاته وهي طايحه عالارض ...
ميثه : وهي تضحك عليها .. خخخخخخخخخ .....ههههههههههههااااي بسم الله عليج بسم الله عليج سكنهم مساكنهم ... عافان الله عوذ بالله .... عاد مافينا باجر الخميس ...
روضه : قامت واتعدلت وظهرت هيه ويا ميثه برع .. سلمن وقعدن .. وهزاع ماشل عيونه عن روضه وكل ماتحس روضه ان هزاع قاعد يطالعها اتم ترتجف وويها يستوي احمر .. واتم تضرب ريل ميثه ...
ميثه : اااااااي شو فيج؟؟؟...........
روضه : مااااتت من القفطه واتحلفت صدق حق ميثه لانها من الصبح طايحه فيها اتقفطها من الصبح ... جدام هزاع ...
قعدن الحريم يسولفن .. والراييل يالسيين وياهم ... لين الساعه 11 فليل .. توهم كانوا بيظهرون قوم حمدان بيرحون البيت .... رن تلفون منصور رقم غريب رن رن رن مارد عليه ... وظهروا قوم حمدان وساروا صوب بيتهم ... منصور يقول حق سلطان هاي اكيد اللي اليوم في المستشفى .......
سلطان : ههههههههههههههههه ثرك يبت راسها يالشامسي والله انك انته هب هين ...
وتمن الحريم قاعدات في الصاله يسولفن .. وقام سلطان طلع برع . البيت لانه ربعه اتصلوا فيه وقالوله ايههم .. في جبل حفيت وراح عندهم .... وحدرت ام حمدان غرفتها عسب تريح ... وتنام لانه الوقت اتاخر ...
وحدر منصور غرفته واتصل بالرقم الغريب اللي كان ياينه ...
منصور : تم ساكت يبا يسمع الصوت
موزه : وهي ساكته ..
منصور ... مابترمسين يعني .؟؟؟؟
موزه : احم احم
منصور : مااااااااات من الضحك عليها يوم سمعها تقول احم احم
وتمت موزه ساكته هب عارفه شو تقول .. . شو بتقول انه هو عذبها وجماله لخبط كيانها ..

منصور : السلام عليكم مع انج انتي اللي متصله والمفروض انتي اللي لازم اتسلمين ...
موزه : وعليكم السلام ورحمت الله وبركاته
منصور : صباح الليل ... وفجاءه حس منصور انه خان حب حياته ان خان العنود اللي كان ... واعدنها انه طول عمره مابيخونها ولا بيعرف غيرها .... بس شو بيده انه يسوي .... لازم يحاول انه ينساها .. لازم ... مع انه واثق انه مافي قوى في الارض تنسيه عنود ...

سهيت بفكري وهلت دموع العين تتناثر سكب دمعي على حظي الردي وكثرت انحاسه
ابد ماتغضي اعياني ابات الليل انا ساهر اسامر ليعتي والحزن اسمع رنة اجراسه
وش اسوي بدنيايه مدامه حظيه عاثر وياللي راسم امالي بقربه غير احساسه
قسوا علينا في حبنا وقفوا ضد المشاعر انسقينا الحب والرقه وسقونا المر من كاسه
اعيش بهم وبغربه طويله مالها اخر غريب بداري ومابين اهلي وجلاسه
حسافه صارت ايامي كئيبه ومالها باكر نعم ضاعت لي امالي واقبل صويبه ياسه


كلمات الشاعر : حمدان الدرعي


وتم منصور يكلم موزه ... بس مكانت تعنيله شي ..... لانها كانت في عينه ... ولا شي .... يعني وجودها كان والعدم في حياته واحد ...

يوم الخميس فليل كانن ... شمه وميثه وهند وريسه يسولفن في الصاله ...
شمه : هاه شو مطر ماقالج شي غريبه يخليج هالكثر يالسه عند امايه
هند : عنبوه هاذا لزقه اللي يخليج مايفج ابدا ..
ميثه : حليله والله هاذا يزاته انه يحبج ..
ريسه : هاي اصلا ماتستاهل انه مزروعي يبحبها هاي حدها بتاني ..
هند : ريسوه عنلات صداج انا الحينه حدي بناتي ... الله يخليج انتي بس حتى دريول البتاني مايباج ...
شمه : ههههههههههه .. ليش البناتي عنده دريول ..
ريسه : الظاهر انه بتاني مطور ...
وقعدن يسولفن ودخلوا منصور وسلطان كانوا ياين من عند و احد من الشباب كان مسوي عزيمه .. ويسلوا وياخواتهم يسولفون...
منصور : هند اقولج جوفي شمه كيف ... والله ينفعون يشغلونها عنا في الجيش ؟...
شمه : هههههههههههه لا والله احلف يشغولني
منصور : هي يقبلونج بيشغلونج ... عادي هم يبون وحده جيه شراتج طول وعرض ,,, خخخخخخخ
شمه : يالخام انا الحينه طول وعرض فديتني والله احلا مربربه عيل العظم مالت وتاشر على هند
هند: ههههههههههههه انا عظم ... حبيبتي هاي الموضه ...
ريسه : اه امحق موضه
ميثه: ميته من الضحك عليهم
سلطان : منصور انا عرفت شو بيشغلون شمه ؟؟
منصور : شو .. بيشغلونها ؟؟
سلطان : هاي اللي ادافع بين الشباب يوم بيضاربون بس اتقولهم وااخ وااااااخ يله هده هده .... وبيفل الريال من يشوفها وبيشرد برع تموا يضحكون طول الليل ومر عليهم الوقت بالسوالف والضحك ...

يوم الجمعه
العصر. ركبوا هل بوظبي وراحو بوظبي..... وصلوا بوظبي ودخلوا ونزل هزاع اخوه راشد وراح صوب ربعه ...

المغرررررب ..

ميثه كانت تبا اتروح اتييب شريط شلات عيضه من السياره .. مالتهم راحت عند الدريول وشلت السويج عنه واتحجبت وراحت توها بتبطل باب السياره شافت سياره يايه اتغشت ....وانخشت ورا السياره .. وهالسياره نزلت واحد جدام باب لبن قوم .. فاضل القبيبسي ... ؟؟؟؟؟

ظنكم شو بيتوي بين منصور وموزه ؟؟؟؟؟؟؟؟؟؟
ظنكم بتتطور العلاقه من بينهم ولا بتنتهي وشو بيقولون في المكالمات اليايه ؟؟؟؟؟؟
ظنكم منوه هاذا الللي شافته ميثه ؟؟؟؟؟؟؟؟
ظنكم شافها وهي منخشه ولا لا ؟؟؟؟؟؟؟؟؟؟؟؟؟ ؟؟


</p></font>