<font color='#000000'><p dir=rtl align=center>((الجزء الخامس ))
اول ما وصلوا المستشفى الامريكي دخلوا من باب الطوارىء ونزل سهيل عشان يطلب كرسي متحرك الان ميثا بعدها اتنافض وما تقدر اتحرك ..بعد اقل من خمس دقايق يابت العامله الكرسي المتحركه ويلست عليه ميثا ومريم تمت ادزها لين طاولة الاستقبال وكلم سهيل اللي يشتغلون في الاستقبال ..وخبرهم بحاله البنت وانها اول مره اتعالج عندهم الانها ساكنه في العين ..وبعد ما اقنعهم وافقوا بصعوبه وقالوا له ينتظرون في غرفه الانتظار ..لين يزقرهم الدكتوره
سهيل :مريم دزي بربيعج وسيري بها لغرفه الانتظار مالت الحريم
مريم: ان شاء الله بس يا سهيل لا تخليهم يبطون علينا
سهيل : ما يهمج برمسهم انا((وسارت مريم بربيعتها لغرفه الانتظار ))
مريم: ميثاني غناتي شوه هباتج الحين
ميثا: يوم يبتيني يا مريم ...انا وين
مريم: بسج عن الكلام الزايد يوم بتصحين بنتفاهم
ميثا: انا عطشانه ابغي ماي
مريم: فديتج انا لحظه بييب لج ماي ((بس مريم ما لقت الانها ما تعرف مرافق المستشفى ...فرمست سهيل وقالت له ))
مريم: سهيل الغالي سير خذ لي غرشه ماي البنت ضميانه
سهيل: خلاص برايج انا الحين بسير اييب غرشه ماي
مريم: هات بارده
سهيل: افااا عليج بييب لج غرشه بارده
وعقب ما اشترى سهيل غرشه ماي بارده ..وداها لمريم وبعد خمس دقايق زقرهتم الدكتوره الان سهيل قال لهم يبغي الدكتوره تعاينها ..بعد فتره طلعت مريم اتشوف أخوها شافته موخي قعدت عدله ويلست ترمسه الان ميثا حاطين لها مغذي
مريم: سهيل شوه بلاك ؟؟؟
سهيل وهو بعده موخي : ما شيء
مريم: عيل ليش موخي ؟؟
مث سهيل عيونه بطرف سفرته : لا ما شيء بس تعبان اشوي
مريم : انت كنت ادمع سهيل ليش (( كانت مريم تعرف ليش سهيل دمع ))
سهيل : شوه اخبارها مي....ميثا؟؟؟!!!!
مريم: بخير بس حطوا لها مغذي وعقب اشوي بيرخصونها
سهيل : عيل انا بسير اشوي بتمشى في الدختر ..ويوم بتخلصون دقي عليه
قام سهيل وسار يتمشى في المستشفى شاف محل للهدايا دخل ويلس يطالع شوه يبيعون اشترى كرتون صغير فيه حلاوه وعلى غطاة الكرتون دب صغير ...وخذ باقه ورد صغيره وكتب على البطاقه تستاهلين السلامه وسار لسيارته وحط القشار اللي اشتراه على السيت الوراني بعدين رد ييلس على الكراسي المجابله للحجره اللي فيها ميثا فجأه زقرته الدكتوره عشان ترمسه عن حالة ميثا الانها كانت تتحسبه أخوها أو ريلها
الدكتوره : انته اخوها او زوجها
سهيل ما عرف كيف بيرد عليها : لا انا اخوها
الدكتوره : البنت تحسنت اشوي بس تحتاج للراحه
سهيل: ان شاء الله يا دكتوره
الدكتور : تقدر تدخل تطمن عليها اذا حبيت
سهيل : ما له داعي الانا الحين بنسير ((بعد ما سارت الدكتوره طلعت مريم من الحجره ))
مريم: سهيل ميثا ما تبغي ترد وياك
سهيل : عيل كيف بترد للمركز
مريم: ما اعرف !!!
سهيل : سيري رمسيها مره ثانيه
مريم: ما بطيع وانا ما اروم اضغط عليها الانها تعبانه
سهيل : والحل ؟؟؟؟
مريم: ما اعرف
سهيل عصب الانه ما يعرف شوه بيسوي والساعه بتكمل 12 وما يقدرون يتأخرون :انتي شووووووه اتعرفين قولي لها اذا ما طاعت بدخل الحجره وبقنعها انا
مريم: خلاص ((بعد ما اقتنعت ووافقت ميثا ركبت السياره ...وفي السياره ))
مريم: الله ورد حق امنوه ؟؟؟
سهيل : وانتي كل شيء تبينه لج
مريم: وبعد كاتب تستاهلين السلامه ....خلاص عرفت حق امنوه ياليني كنت انا المريضه
سهيل : انتي لو مرضتي بعقر لج بعير
ميثا: ههههههههههههه
مريم: الله لا يحرمني من هالضحه
سهيل في خاطره : الله لا يحرمني منج ....((مره ثانيه لا تدخلن بيت الرعب ))
مريم: ان شاء الله
سهيل يبغي يسمع ميثا: سمعتني ما شيء دخله مره ثانيه
اول ما وصلوا مركز وافي كانت المسؤوله والبنات يترين مريم وميثا عشان بيروحون مكان ثاني وسهيل اتصل بمايد عشان يتخبره وين هم قالوا له انهم بيسيرون مطعم الدار عشان يتغدون وعقب بيسيرون ميركاتو والبنات اول شيء سارن ستي سنتر عشان يتغدن ويتشرن اشوي وعقب قالن للمسؤوله يبغن يروحن لميركاتو الانه يديد ويبغن يشوفنه ..وفي مركز ميركاتو سهيل ومايد يتمشون وخليفه وهزاع جدامهم
مايد: سهيل شو سوت البنت عساها بخير
سهيل : تعرف امنوه البنت اللي وديتها ويا أختي الدختر ؟؟
مايد : لا تكون البنت اللي شفناها في المعرض والحديقه !!!
سهيل : هيه نفس البنت علني افداها
مايد : الله الله سهيل تعلم يتفدى بعد
سهيل : بتفدها عندك مانع بعد
مايد : تلفونك يصيح
سهيل : برايه
مايد : يمكن اختك تباك
سهيل :الوووووه
مريم: سهيل ليش تلحقنا وين ما انسير ؟؟
سهيل : عنبوج زاااااد شوووه هالرسمه بعد ليكون مالكه دبي انتي
مريم: هههههههه لا بس انت وربعك وين ما انسير ورانا
سهيل اهاااااا بس نحن يايين قبلكم انتوا اظهروا
مريم:ا حلف بس .......سهيل تعرف محل عطور اوكيه هنيه
سهيل : هيه انا بترياج ويوم اتشوفيني دقي عليه عقب بوديج للمحل
مريم : اوكيه(( ووصلهن سهيل المحل ودخلن وبعد اشويه هو دخل عشان يأخذ عطور ))
الموظفه : اي خدمه؟؟
ميثا: مشكوره بس ابغي اسكادا نسائي
مريم : انا ابغي هوقو اليديد
الموظفه : لحظه
سهيل : لو سمحتي عطيني اسكادا رجالي
مريم: سهيل انت هنيه
سهيل : لا هناك
مريم: شووووه اتسوي هنيه بعد
سهيل : تعرفين ليش ياي دبي ؟؟؟
مريم: ليش ؟؟
سهيل : مراقب خصوصي ........ الله يهديج ياي اخذ لي عطور
ميثا ما قدرت تمسك عمرها من الضحك ..ضحكت اشوي عقب يلست على الكرسي..سهيل التفت لورى وهو طاير من الفرح الانه للمره الثانيه يشوفها تضحك ..سحرته بضحكتها ولو انها كانت متغشيه ..بعد ما خذن عطور وميك اب وشنط وشيل طلعن من المركز وسارن العين على طول الان الساعه كملت خمس وسهيل وربعه ساروا البحر واتسبحوا عقب مسكوا درب العين في سياره سهيل ..كان سهيل حاط اغنيه
((أموت انا في حبهم ..وارخص انا عيوني لهم .. ناس اسكنوا قلبي انا..وانا سكنت بقلبهم ..هم علموا قلبي الغرام ..والشوق كله والهيام ..هم بس من كل الانام..ما اطيق لحظه بعدهم ))
مايد: سهيل ههههه شووه رايك بالكشته ؟؟
سهيل يتنهد : اسكت الله يخليك .......احلى يوم في حياتي
مايد: انت شوووه سالفتك ويا البنت ؟؟؟ لا يكون
سهيل :احبها
مايد: متأكد ؟؟؟
سهيل : هيه وابصم لك بعد
مايد: الله يهنيك
قبل آذان المغرب وصلن البنات الجامعه واللي مب ساكن في سكن الجامعه يوا أهلهن وشلوهن وسهيل ومايد ساروا المسيد عشان يلحقون على الصلاه ..وعقب ما صلوا سار سهيل بيتهم عشان مايد يأخذ سيارته يوم دخل سهيل البيت سار حجره اخته عشان يتخبرها عن ميثا
مريم: متى وصلت ؟؟
سهيل : قبل آذان المغرب
مريم: لا نحن الساعه ست ونص وصلنا العين
سهيل : مريم
مريم: هلا
سهيل : شوه سوت ربيعج
مريم: انت ليش كل ساعه تسأل عنها
سهيل : خلاص محد بيسألج وفري الجواب لعمرج ((صك الباب بالقوى وسار حجرته ..عقب لحقته مريم عشان تتسامح منه ))
مريم: سهيل افتح الباب
سهيل : مب فاتح خلاص لا بسألج ولا شيء خليني بروحي
مريم: ما يسوى عليك هالزعل
سهيل : الحين انتي شوه تبين ؟؟
مريم: ابغي السموحه
سهيل : خلاص مسموحه سيري الحين
مريم: خلاص اللي كانت تعبانه بترمسك
فتح سهيل الباب : شوه تقصدين انتي
مريم: بخليها ترمسك عشان تطمن
سهيل : ما بطيع ......وبعدين هيه مب راعيه هالحركات
مريم: كيف عرفت ؟؟؟
سهيل : الانها ربيعج وانتي ربيعاتج كلهن مؤدبات
مريم: اهاااا صح كلامك ((ودقت لميثا من موبايلها))
ميثا:الوووووووو
مريم:هلا بغناتي شوه امسيتي
ميثا:بخير الحمدلله
مريم: اهلج دروا انج تعبتي علينا في دبي
ميثا: لا ما خبرت حد
مريم: احسن عسبت ما يستهمون ...اقول ميثا
ميثا:هلا
مريم:ا نا بيأكلوني نااااااس يبون يتأكدون انج بخير
ميثا: امنوه؟؟؟؟؟!!!!!!
مريم: لحظه ((عطت الموبايل لسهيل وطلعت الان امها تزقرها ))
سهيل : السلام عليكم
ميثا: .......
سهيل : لا تبندين دخيل والديج
ميثا: وعليكم السلام
سهيل: انا مب مثل باقي الشباب اللي يرمسون انتي اول وحده ارمسها
ميثا: اعرف مشكور على اللي سويته اليوم
سهيل : العفو ...ان شاء الله احسن الحين ؟؟
ميثا: الحمدلله احسن من قبل ...برخصتك
سهيل : مع السلامه
ميثا : مع السلامه
عقب ما بندت سييف سهيل رقمها في تلفونه بأسم حياتي ..ونزل عشان يسير المسيد يصلي العشا وعقب رد البيت يتعشى ويا اهله
سهيل : شوه عشاكم اليوم؟؟
ام سهيل: عيش ابيض وخبز رقاق وصالونه دياي
سهيل: امايه ابا روبه
ام: سهيل :ان شاء الله ...((وقالت لشيخه تييب روب من الثلاجه
ابو سهيل : ليش سرت اليوم دبي بعد؟؟
سهيل : كشته انغير جو اشوي بس ما شيء احلى من العين بس بحرهم فنان
مريم: اسواقهم حلوه كل اللي تباه موجود
شيخه : امايه الروبه اللي نييبها من بيت خالتيه ما بقى منها الا غرشه
ا م سهيل: اصب لك روبه يا ولديه
سهيل : اشوي ((وتعشى سهيل وسار حجرته عشان يتسبح ويرقد بس ما ياه نوم دق تلفون لميثا بس ما شلته عقب طرش مسج ((انا سهيل ردي عليه))ويوم اتصل مره ثانيه شلته
ميثا بعد تردد: الووووووو
سهيل : حيالله براعيه الصوت
ميثا:.......ليش اتصلت ؟؟؟
سهيل : السموحه . . بس ما اوصيج علي عمرج كلي زين عشان صحج ابغي اسمع مريم تقول انج تأكلين في الجامعه
ميثا: هههه انزين بس بمتن بعدين
سهيل : عاااادي اهم شيء صحج ...ومره ثانيه بيت الرعب ما اطيحينه اذا كني تتروعين
ميثا: امنوه قال لك اني اتروع بس الهيكل طاح جدامي
سهيل: اهااااا وانا اقول ليش صرختي
بعد لحظه صمت سهيل: ان من شفتج في المعرض وانتي داخله قلبي
ميثا: .........
سهيل : اسمحيلي بس لازم اقول لج هذي الرمسه
ميثا:.......
سهيل : واليوم تأكدت
ميثا: وبعدين ؟؟
سهيل : انا اباج على سنه الله ورسوله
((الجزء السادس1 ))
مريم: سهيل نش بسك رقاد من متى وانت منخمد
سهيل: اووووهووووووه خليني ارقد
مريم: رقاااد المغرب مب زين وانت من رديت من دبي وانت راااقد قم بيآذن العشى
سهيل: مريم شوه اليوم ؟؟
مريم: لا اله الا الله ما قلت لك رقاد المغرب مب زين الرسول صلى الله عليه وسلم ناهي عنه... اليوم الاحد الله يسلمك
سهيل : وانا ما تضاربت وياج يوم رديت من دبي
مريم: بسم الله عليك يا أخويه شيء بلاك انت لا ما تكلمت بكلمه من رديت من دبي ....بسير اوري ضو عشان ادخنك بلبان
طلعت مريم من الحجره وسارت الحظيره تحط من اليمر اللي في التنور في المدخن عشان ادخن اخوها ...اما سهيل دخل يتمسح وعقب يلس على الشبريه يتعوذ من الشيطان وحمد ربه ان اللي استوى بينه وبين ميثا مجرد حلم الانه اذا تصرف التصرف اللي سواه في الحلم بيطيح من عينها الانه بعد التصرف اللي سواه في المعرض وفي دبي حس انه كبر عينها صح هيه ما قالت له اي شيء يثبت انه كبر في عينها بس الاثبات قراه في عيونها ..دخلت مريم ولقته يالس على الشبريه وملامح ويهه فيها استغراب دخنته وعقب سارت حجرتها عشان اتصلي العشى
اول ما وصلت ميثا البيت سلمت على امها ويلست اتسوالف وياها عن الرحله بس ما خبرتها عن اللي استوى لها في دبي يوم اذان المغرب سارت حجرتها عشان تصلي وترتاح عقب نزلت تحت وفرشت الزوليه ويابت البشكاره دله الحليب ودله الزعتر ويلسن يسولفن سوالف عااااديه ويوم اذن العشى البشكار والدريول ساروا المسيد يصلون فقالت ام عبدالله لليزا تصك الدروازه بجهاز التحكم اللي موجود في الحجره الصغيره اللي على طرف الدروازه وفرشت ام عبدالله سيادتها وصلت واستغلت ميثا الفرصه وصلت الفرض ويا امها ويوم خلصن سمعن هرن سياره فقامت ميثا تفتح الدروازه الانهن يعرفن ان ابوعبدالله ايي في هذا الوقت وعقب ما دخل ابوعبدالله البيت يلس وياهن خاري
ابوعبدالله : يا حافظ على كندورج يا آمنه ...
ام عبدالله : هذا من خيرك ...انا عيبتي قطعه بو تيله قلت بأخذ لي كمن قطيعه
ميثا: امايه انا ابغي بعد قطعتين من قوم بو تيله وابغي قطعتين من القطع المشجره
ام عبدالله: ان شاء الله يا بنتي بس بو تيله حق العيايز وانتي بعدج شباب
ميثا: وامنوه قال لج انهن حق العيايز بس ..انا اباهن حق البيت والقطع المشجره خوريلي اياهن عند خياط الوفا
ام عبدالله: ما عليه باجر بسرح وباخذ لج القطع
ميثا : بسير وياج
ابو عبدالله: والجامعه يا بنتي ما بتسيرين لها
ميثا: عندنا اجازه باجر الانا سرنا دبي اليوم ..وقالوا تعالوا بالثلاثاء
ابو عبدالله: استانستي في دبي ؟؟
ميثا: هيه وااااااايد ودنا مره وحده يا بويه
ابوعبدالله: ان شاء الله اذا حصلت فرصه ......ام عبدالله انا ياي اشاورج في سالفه
ام عبدالله: سم يا الغالي
بو عبدالله: تعرفين مخلفت يدي متوفيه من سنتين وخلفت بنت وهي اختي وانا الاولى بوصايتها
ام عبدالله : الشور شورك يا سعيد
ميثا: عمتي شمسه ؟؟؟؟؟
ابو عبدالله: هيه عمج شمسه بيبها تسكن عندنا
ام عبدالله: مرحباااااا الساع بها
ميثا: الله واخيراً بلقى حد يسليني في البيت .....
ام عبدالله: وانت خبرتها انك تبها تسكن عندك
ابو عبدالله: العصر سرت بيت خالتها وخبرتها وباجر بييبها
ميثا: عيل لازم نجهز لها حجره .......امايه باجر بسير اخذ اغراض لحجرتها
ابو عبدالله: شوه بتأخذين !!!!
ميثا: امممم بأخذ لحفات وورد مجفف وشموع معطره ...والباقي يوم بتي بسير السوق وياها عشان تأخذ اللي يناسبها
ابو عبدالله: والله وكبرتي يا بنتي واستويتي راعيه بيت ((ويدخل عبدالله بسيارته البيت ))
عبدالله: السلااااام عليكم
الكل : وعليك السلام
ام عبدالله: من وين ياي ؟؟
عبدالله : ياي من عند الربع
ابو عبدالله: وانت ما تيوز من الرغذه دوم رغيد .......باجر اباك اتسير العزبه ويايه
عبدالله:حراام عليك يا بويه تدري انا مب راعي عزب خذ رشوود وياك
ام عبدالله: يا الهرم اتعصي ابوك عيل لو ربعك عازمينك بتطلق
ابو عبدالله: يا مسود الويه ما ابغي المعونه من جداك فديت راشد مب مقصر دوم عندي في العزبه ((وفجأه اييهم راشد وويلس وياهم ))
راشد: علني ما اخلا من اللي يتفداني
ام عبدالله: يااللي ما تخيل وانا شوبلاني ما اتفداني انا اللي ربيتك وتعبت عليك
راشد: انتي ام الخير يالغاليه غلاج ما ينوصف ((ويوا أحمد و حمد يتراوغون من دخل ))
أحمد : ابويه ابغي دراجه بانشي
حمد: وانا ابغي ام شراع
ام عبدالله: لا ماشيء دراجات تبون تنجلبون بهن
ابو عبدالله: ان شاء الله باجر عقب ما تردون من مدارسكم بنسير المعرض وبأخذ لكم اللي تبونه
ام عبدالله: لا تبطر العيال يا سعيد ...ما اباهم يرتغدون في الشوارع
ابوعبدالله: لا تحاتين يا آمنه انا بخليهم يسوقون في العزبه بس
عبدالله: وانا بعد ابغي دراجه
ام عبدالله: صه انته ولا جلمه اللي ما يطيع ابوه ماله شيء
ميثا: حرااام عليج يا امايه .......ابويه خذ له دراجه له ولرشود
راشد: لو سمحتي قولي بو سنيده مره ثانيه
ميثا: هههه ان شاء الله يا بو سنيده
ابو عبدالله: شوف يا عبود انا بأخذ لك دراجه بس عشان اختك طلبتني
ميثا: مشكور يا ابويه ما قصرت
ابو عبدالله : وانتي ما تبيني آخذ لي دراجه
ميثا: ههههههه حرااام عليك يا ابويه شوه تأخذ لي دراجه لا ما ابغي
ابو عبدالله: لا مايستوي يا بنتي لازم اعدل بين عيالي في العطايا ...يله اطلبي اللي تبينه
ميثا: ابغي اسير لمزرعتنا اللي في ليوا
ابو عبدالله: فالج طيب يله طلبي شيء ثاني ..قولي شوه تبين ساعه والا قلب
راشد: ادللي يا بنت سعيد قولي اللي تبينه
وقتها اخنقتها العبره وسارت لحجرتها وقفلت على عمرها ويلست اتصيح من خاطرها
حست بقلبها مقبوض ما عرفت السبب اللي خلاها اتصيح وفي الحوي الكل كان مستغرب من تصرفها دخلت ام عبدالله البيت وسارت صوب حجرت بنتها تمت ادق الباب عليها بس ما فتحت حاولت كمن مره وفي آخر مره..فتحت الباب
ام عبدالله: بسم الله عليج يا بنتي ليش هالدموع ؟؟!!
ميثا: ما شيء ما فيه شيء
ام عبدالله: تتحسبيني عورى ما أشوف انا.......قولي اللي تبينه لي جانج تستحين من ابوج
ميثا: امايه احس اني مخنوقه ...
ام عبدالله: ليش يا بنتي قولي شوه اللي مضايقنج
ميثا: امايه
ام عبدالله: لبيه
ميثا: لبيتي حايه .....امايه ضقت من العين ابغي اسير العمره هذا اللي اباه
ام عبدالله: بس هذا اللي تبينه بخبرج ابوج و ان شاء الله اول ما تخلص جامعج بنسير
اذا الله راد
وانتظروا تكملة الجزء السادس
((تكمله الجزء السادس ))
ابو عبدالله وعبدالله وراشد وأحمد وحمد كلهم قاموا وساروا يطالعون ميثا... ابو عبدالله يلس عدال بنته وام عبدالله من الصوب الثاني وأحمد وحمد يالسين انبشون في القشار اللي خذتهن من دبي ..راشد يصارخ عليهم
راشد : اي انتوا ليش تلعبون بقشار ختكم
ميثا: احمدوه خل قشاري احسن لك
ام عبدالله : يا الطفوس من وين متعلمين هالتعلومه ؟؟
ابو عبدالله : ان ما صكيتوا الدعنه ما شيء دراجات
أحمد+حمد: لااااااااا خلاص توبه
ابو عبدالله : امنه ولمي قشارج يوم الاربعاء العصر بنسير المزرعه
ميثا وهي تلوي على ابوها : الله صدق يا بويه
ام عبدالله: ان شاء الله يا بو عبدالله
ابو عبدالله : هيه صدق لا خليت منج
ميثا: و اكيد عمتي شمسه بتكون ويانا
راشد و عبدالله : بنخطف عليها ؟؟؟
ام عبدالله : لا ابوكم بييبها باجر ...وهي بتسكن عندنا
راشد : زين على الاقل بتونس ميثا ...الا هي من سنين امنوه آخر مره يتنا من اربع سنين
ابو عبدالله: شمسه اكبر من عبدالله بسنه
عبدالله: يعني 23 سنه
راشد : ابويه بنحمل دراجاتنا اللي بنشتريهن وبنوديهن ويانا المزرعه
ابو عبدالله : ما عليه ...بس انت جهز الونج عشان نقلص الدراجات
ميثا: ابويه اعزم قوم خالتيه يسيرون ويانا
ابوعبدالله :انا برمس بو علي وبخبره
في بيت قوم موزه عقب ما تعشوا يلسوايطالعون التلفزيون ..اتصل بوعبدالله حق بو علي وخبره عن السيره
بو علي : ميثا عازمتنكم يوم الاربعاء
على : ليش .؟؟؟
بو علي : بيروحون يوم الاربعاء مزرعتهم وميثا عزمتنا
موزه: فديتها بنت خالتيه ما تبغي تفارجني
ام علي : علني افدها هالبنت سنافيه
بو علي : شوه رايكم ؟؟َ!!
ام علي : الشور شورك
على و موزه : نحن موافقين
بو علي : خلاص انا بخبر سعيد انكم موافقين ((سارت موزه لحجرتها عشان ترمس بنت خالتها ))
ميثا: الوووووو
موزه: هلا والله بالغاليه اشحالج ؟؟
ميثا: تمام اشحالج انتي
موزه: الحمدلله بس حسيت بملل في الجامعه اليوم
ميثا: ههههههه احسن عشان تحسين بقيمتنا
موزه: ربكم استانستوا ؟؟
ميثا: الحمدلله كانت الرحله اوكيه ....اقول موزه
موزه: شووه!!
ميثا: تذكرين عمتيه شمسه
موزه: هيه بس مب واايد ......ليش ؟؟
ميثا : باجر بتينا وبتسكن عندنا
موزه: والله .....باجر يوم بتين الجامعه خبريني عنها
ميثا: موزوه انا ومريوم ما بنداوم باجر عاطينا اجازه
موزه: والله حظكم ...خلاص يوم بنسير المزرعه خبريني عنها
ميثا: لا ما بخبرج الانها بتكون ويانا وبتشوفينها
موزه: الله اسمينا بنستانس
ميثا: الا انا بطير من الفرح ....يله موزان بخليج
موزه: هههه موزان بعد يله فداعه الله
ميثا: مع السلامه
باليوم الثاني سارت ميثا السوق وخذت لحفات وشموع معطره وورود مجففه عشان تعدل الحجره لعمتها والعصر وصت ليزا اتسوا فطاير وكيك وعلى الساعه ست وصل ابوها ويايب وياه اخته شمسه
ابو عبدالله وشمسه : السلام عليكم
نشت امنه وويهت شمسه : اشحالج يا شمسه
شمسه: بخير وسهاله ..اشحالج يا ام عبدالله
ام عبدالله:بخير وبنعمه
ابو عبدالله : عيل وين الفروج ؟؟
ام عبدالله: ورىالبيت يلعبون
ابو عبدالله: زقريهم بنسير المعرض
ام عبدالله: ان شاء الله ((سارت ام عبدالله تزقر عيالها وشافت بنتها وقالت لها ان عمتها وصلت ))
ابو عبدالله: مرحبااااا الساع ببنتي
سارت وويهت ابوها وعمتها شمسه: اشحالج عموه
شمسه : بخير وسهاله ..اشحالج ميثا
ميثا: الحمدلله عا يشين بخير ونعمه((ويلسوا يتفاولن وابو عبدالله وعياله ساروا المعرض يأخذون دراجات ))
ميثا: عموه ليش ما تأكلين ؟؟؟
شمسه : ههههههه لا تقولين عموه انا بعدني صغيره قولي شمسه وبس
ميثا: ان شاء الله يا الشيخه
شمسه: انتي الشيخه فديت روحج
ام عبدالله: واعلوم هلج مناك
شمسه : كلهم بخير يردون السلام عليكم
ام عبدالله+ميثا: الله يسلمهم من الشر
خلصت اجازه ميثا ومريم وداومن يوم الثلاثاء كان دوامهن مثل كل يوم ويا يوم الاربعاء اليوم المقرر لضباط اييون للجامعه ..مريم كانت تعرف ان اخوها بيي بس ما خبرت حد و ميثا ما كانت تعرف ان اخو مريم سهيل بيكون ويا الضباط قبل لا تبدأ المحاضره بساعه
كانت ميثا فاضيه ما عندها محاضره سارت بروحها الان مريم ما طاعت تخاويها سارت لشؤون الطالبات عشان تستفسر عن الدورات الصيفيه وفي نفس الوقت كانت مشتهيه من الحلاوه اللي تشتريها ندى ..استفسرت عن الدورات وسوالفت اشوي وقامت تبا تلحق على المحاضره اللي قالوا لهن عنها
ندى : ميثا اصبري اشوي بعده الوقت
ميثا:ندى لا تلهيني أكيد مريم الحين محتشره
ندى: وهي ليش ما يت وياج ؟؟
ميثا: ما ادري بها اجبشن البنت ما تبا المحاضره تفوتها
ندى: هههههه ما عليه بخبرها عليج
ميثا: خبريها
ندى : انزين تعالي بعطيج حلاوه ...لحظه بييبها من مكتب مياده
ميثا: بسرعه الله يخليج ((بس ندى تأخرت اكثر من خمس دقايق قالت يمكن انشغلت وهي ماشيه كل ساعه تصد بويهها لورى يمكن ندى تطلع من مكتب مياده وفي نفس الوقت سهيل كان داخل وهو داخل طلع موبايله وحطه على السايلنت وهو يالس يغير الوضع لموبايله كانت ميثا واقفه جدامه بس كانت صاده بويهها لورى سهيل كان مشغول بموبايله ويمشى فصدم ميثا بالغلط يوم رفع راسه شاف ميثا جدامه وهي اول ما شافته انصدمت ..طلعت بسرعه وعقب دخلوا خليفه ومايد وهزاع وطلعت ندى من المكتب وهي ماسكه كيست الحلاوه ...شافت الضباط ويلستهم وقالت لهم بعد نص ساعه لازم يبدون المحاضره
في المرر للي فيه قاعه المحاضره كانت مريم واقفه تتريا ميثا
مريم: ليش تأخرتي ؟؟!! لازم ندخل الحين
ميثا: ما بدخل سيري انتي
مريم: ليش ان شاء الله ..ليش ما تبغين تحضرين ؟؟
ميثا: بس جذه
مريم: دخليج خلينا ندخل
ميثا: بشرط نيلس على الكراسي اللي ورى
مريم: اوكيه ((ودخلن بس المكان اللي بييلسن فيه مفول فيلسن الاستاذ بالغصب في اول سيد الانه فاضي ..يلست ميثا تتحرطم
ميثا: شوه هو بكيفه ايلسنا وين ما يبا
مريم: ليش تتحرطمين !! هذا المكتوب انا نيلس جدام
ميثا: انا بطلع
مريم: مينونه انتي تبينهم يفصلونج
ميثا: انفصل ولا ايلس جدام
مريم: انتي من رديتي من عند ندى وانتي معتفسه
ميثا: .........
مريم: دخليج اهدي الحين اسمع اصواتهم الحين بيدخلون ((وتغشن مريم وميثا ))</p></font>
رد مع اقتباس
مواقع النشر (المفضلة)