<font color='#728FCE'>
<font face=arial,verdana size=3>الجزء الواحد والخمسين
الساعه 12 في الليل رجع خليفه للبيت..وكان هادي..الكل نايم...قال فخاطره احسن.. لانه مافيه يرمس حد هالحزة.. كان توه بيركب الدري بيروح فوق الا انه سمع صوت...وقف والتفت وشاف امه طالعه من غرفتها واطالعه...
ام سلطان: ييت ابويه..؟!..
خليفه: هي.. وبسير ارقد..تصبحين على خير..
ورد صد عنها بيركب الدري...
ام سلطان: خليفه.... تعال ابويه الصاله اباك شوي...
تافف خليفه فخاطره...
خليفه: امايه انا تعبان وابا ارقد...
ام سلطان: تعال قلت لك...
خليفه: ما تتاجل يعني هالرمسه.؟!!
لبسته امه وماجاوبت..ومشت للصاله وفتحت الليتات ...تبعها خليفها وعلى ويهه علامات الضيق...يلس عدالها..
خليفه: خير امايه؟؟ شو بغيتي؟!....
ام سلطان: ابويه...انته زعلان عليه.؟؟
صد خليفه صوب ثاني...
خليفه: ليش ازعل منج.؟؟؟
ام سلطان: عشان سالفة حصه...
خليفه: امايه دخيلج خليني ارقد..ولا ترجعين لهالموضوع مافيني على عوار الراس...
ام سلطان: كيف يعني ماتبا ترمس فيه؟
خليفه: لا....
ام سلطان: خليفه...انته زعلان لاني اعترضت على حصه في البدايه..!!
خليفه: مب زعلان امايه....بس منصدم منج..عمري ماتوقعت فيوم ولا للحظة انج انتي اللي بتوقفين في طريجي..يعني...انتي مربتنها حصه ويا بنتج...!!!!!
ام سلطان: ادري..خلاص يابويه خذها لا تحط بخاطرك.... صدق انه حصه ماتتعوض...
خليفه: عقب شوو امايه....تراج مب راضيه...
ام سلطان: لا راضيه..
خليفه: لا مب راضيه... لو فرحانه لي جان بين عليج من البدايه مابتعترضين هالكثر عسب شي حصه مالها ذنب فيه...وانتي تعرفين زين انها ملجه بس مب عرس عشان تخافين من شي....!!
ام سلطان: ادري يابويه..خلاص مايصيرخاطرك الا طيب... وانا قلت الرمسه الا جي بدون تفكير.. فديتك لا تزعل ولا تحط بخاطرك انا ماصدقت انك تبا تعرس عشان افرح فيك...خلاص من عقب عرس عنود ان شاء الله برمسهم لك...
سكت خليفه مب عارف يفرح والا شو يسوي بالضبط..قعد يطالع امه بنص عين..مب متاكد من كلامها اذا تعنيه او لا..
خليفه: اماااايه....قولي الصدق.. صدق راضيه والا الا جي تقولين الرمسه عشان ترضيني..؟!!.
ام سلطان: والله اني راضيه وحصه مثل بنتي وغاليه علي... انته بس لا تحط فخاطرك...
ابتسم خليفه ..ارتاح جزئيا من هالكلام ولو انه الرمسه بعدها حازه فخاطره..نش وحب راس امه..
خليفه: تسلمين امايه...ومافي داعي انتي ترمسينهم..انا وابويه بنرمس عمي سيده .. انا مب غريب... وماله داعي هالرسميات....
ام سلطان: ياحافظ عليك ولد محمد استغنيت عن خدماتي اشوفك..!!
ظحك خليفه غصبن عنه...هذي امه ردت مثل قبل....الحمد لله على كل حال...
خليفه: لا فديتج انتي الخير والبركه ومحد يروم يستغنى عنج... بس فعلا ماله داعي...
خلص خليفه رمسته مع امه وكل حد سار حجرته يرقد....
ايام الاسبوع اللي بعده من بداية يوم السبت كانت متروووسه حركة... خصوصا عند عنود اللي كل يوم في الصالون.. (امور نسائية مايخصكم بها لوووول).... يوم الاحد سعيد يا يايب معاه عليا وعيالها...اللي بدورها يابت معاها فساتين البنات ...وكانن اروع مايمكن...
نورة وفاطمه كانن يداومن في الجامعه..عشان جي ماشاركن في نشاطات وايده ويا العايله بسبب الدراسه... بس يوم يتهن عليا ماتن من الوناسه ..لانها ملت عليهن البيت حركه وسوالف... خصوصا عليا هي وميره ربع من زمان فكانت ميره وعيالها دايما في البيت تسولف مع عليا..وحمده بعد نفس الشي...لانه عليا غير..من سنهن ويتفاهمن رباعه... حصه كانت تتحسن يوم عن يوم... بس من يشوفها عبدالله تمشي والا تشل شي والا حتى يالسه..هزبها وقالها تنسدح... ولا تتحرك وايد...لين قامت من نفسها يوم تشوفه ياي والا تشم ريحته حتى تنسدح بروحها مافيها عالمهازب...
عبدالله مسكين كان بروحه متوتر طوال الاسبوع... الشغل عليه وايد..يخلص شغله في المستشفى اللي قام يندمج كفاااايه فيه..وبس يرد البيت ينشغل بامور التجهيزات للعرس...يعني مافيه وقت للراحه....حمدان وخليفه ماكانوا يقصرون معاه...حتى خالد وناصر ..يعني كلهم تساعدوا عشان التجهيزات...
الثلاثاء ركبوا الخيام..خيمتين كبار جدام بيت محمد الكتبي + مساحه خارجية للرزفة وغيره ...وعنود تراقب كل شي من دريشة غرفتها وبطنها يعورها...لين الحين مب مصدقة انه عرسها بعد يومين...!!!..خلاص بتطلع من بيت اهلها وبتروح بيت عمها ...بتسكن معاهم....بيستوي هذاك بيتها...!!!...وفقني يارب...!!
الاربعاء الصبح حريم العايله كلهن تيمعن...بس استصعبن سيرتهن كلهن لصالون واحد...عشان جي قررن حمده وعليا وميره يسيرن صالون...وعنود وفطوم ونوره صالون ثاني... حصه ماراحت لانها ماتقدر..فاتفقت هي مع امها لحناايه يتهم البيت وحنتهم... وتمن في الصالون من الصبح ليييييييييين المغرب ..كله بسبب حنى العرووس اللي طول وايد لين ماخلص... وقت ماخلصن يابهن خليفه ..حمدان من التعب كان راقد وغالق تيلفونه...عشان جي اضطروا يطلبون من خليفه...الدريولية كلهم مشغولين.... خالد ياب الحريم عليا وحمده وميره ورجعهن البيت...
الاربعاء يابوا فستان عنود اللي جهز كليا من حيث ترتيب المقاسات وتظبيط بعض التعديلات عليه... يوم قايسته عنود جدام ميره اختها طلع عليها جناااااااااااااااااااان.... ملاك من صدق.... اما فساتين بنات حمد.. نفس الشي كانت فنانه لكن فستان حصه طلع وسيع شوووووووي عليها..بسبب خسارتها لبعض الوزن بسبب العمليه..لكنها قالت جذي اريح عشان اتحرك بحريه اكثر في العرس....
...:::: ( ليلة العرس ) ::::...
قامت عنود الساعه 10 الصبح..والكل استغرب انها قدرت ترقد هالكثر... اغلب العرايس يقومن من الفجر بسبب التوتر... لكن هي حست بهدوء نفسي واقتناع بنصيبها...وسعادة ماتنوصف....عشان جي كانت مرتاحه البال... مع انها متحمسه ..لكن حماستها داخليه..ومب ظاهر عليها غير الهدوء والثقة... اول ما نشت نزلت تحت...وتمنت انها مانزلت... الكل مرتبش..محد في البيت كلهم في الحوش او برا البيت عند لخيام... ربشتهم خلتها تتوتر شوي... وماعيبها الوضع.. دخلت المطبخ الداخلي ..سوت لها سندويشات جبن وكوب عصير برتقال بارد.. ويوم كانت توها تخلص اعداد السندويش دخلت امها المطبخ...
ام سلطان: هاا فديتج قمتي..؟؟؟
خلت عنود السندويشات عالطاوله وسارت وحبت راس امها ..ساعتها يتها رغبه بالصياح...بس مسكت نفسها..عن استوي عاطفية وايد!!!... امممره مابسكت طول اليوم اذا صحت الحين....
عنود: شو اصبحتي امايه..؟!!
ام سلطان: بخير فديتج...انتي شو حالج اليوم؟
قفطت عنود.
عنود: زينه...
ام سلطان: هههه مب متروعه..؟!!...
هزت عنود راسها بالنفي... يت امها وباستها بين عيونها..
ام سلطان: بارك الله فيج يابنتي...برايج سيري حجرتج...
ابتسمت عنود وشلت سندويجاتها وعصيرها وركبت غرفتها وسكرت الباب....بطلت الدرايش كلهن...الجو اليوم حلوو... كانه يدري بعرسها ويحتفل معاها بهالجوو اللي ينعش... قعدت عنود على كرسي المكتب... وهي مجابله فستان عرسها + الطرحه اللي محطوط عالمسند الخاص فيه...وتتامله...وتتخيل...كيف بتكون بكامل زينتها....عبدالله بيعيبه شكلي او لا..؟؟؟ غصبن عنه بيعيبه...ان شاء الله مايصير شي يخربطلي كل الامور ويعفسني...خلصت ريوقها وقعدت تراقب الشنط اللي بتشلهن معاها... جهزت شنطة صغيره عشان تبات ليله العرس في الجناح اللي في الفندق.. مافي داعي يشلون كل اغراضها لانها بترجع البيت...الشنطة الصغيره حطت فيها كل اغراضها وملابسها واي شي ممكن تحتاجه...بعد ماخلصت انسدحت عالشبريه...شوي ودخلت عليها امها...وقعدت عدالها...وبدت تكلمها..مثل أي ام في عرس بنتها..توصيها على ريلها...وعلى حسن المعاشره...والطيبه والاحترام المتبادل...وتكلمها عن اشياء مختلفه وااايده .... لين ما جشعر يمب عنود من كلام امها وحست بشوية خوف من هالمسؤوليه الكبيره...عمرها ماتصورت ان الزواج جذي... كانت تعتبره انها بتعيش حياتها مع انسان تحبه وتحترمه وبس...لكن كل هالامور صعبه عليها.... لكن ان شاء الله مع الوقت تتعود...
وبعد صلاة العصر يا حمدان وشل عنود هي وشنطتها وفستانها واللي تحتاجه كله ووداها الفندق لجناحها وخلاها هناك عند امها واختها.... وبعدها يت راعية الصالون اللي اتفقت معاها عنود وهي من الشارجه واسمها موورا مكياجها روعه... وبعد سبووح مطووول ومعطر لعنود... استلمتها المزينه كليااااا...
من بعد صلاة العصر والرزفة والدق مشتل جدام البيت... خلاص الرياييل بالنسبه لهم العرس بدا الحين...يحمسوون لين بعد المغرب..وعقب صدق بيخترشون... سعيد كان مع حمدان اللي يراقب وهو يبتسم... والعصا في ايده وهو بعده لين الحين ماتحمس للرزف...الخقاق يقول فخاطره بعطيهم فرصه يظهرون مواهبهم الحين ...وعقب العشا بناكل الجوووو... عبدالله وخليفه رباعه ماتفارقوا...عبدالله رغم حماسه وفرحته كان متوتر...تعليقات الشباب ماخلته فحاله.. ولا قدر ينسى اللي متوتر بسبته... بعد العرس...شو بيصير؟؟؟؟؟؟؟!!!!!& #33;!
بس حاول يتناسى السالفه وكل ماينسى يعلق عليه واحد من الشباب ويرد يتذكر.. وانتوا تعرفون كيف شبابنا غلسين شوي..
في بيت حمد الكتبي البنات كانن رواحهن مرتبشات....يتهن المزينه في البيت حق عليا وحصه ونوره وفطيم اما حريم العيال راحن صالون تعدلن هناك.... بنات حمد كلهن فجن شعورهن... عليا شعرها وايد غليظ وناعم ومقصوص مدرج لوسط الظهر يوصل وطالع وايد روعه عليها... اما نوره وحصه شعورهن طويله بس طبعا حصه اطول شعرها يوصل لين الركب..طبعا كلهن مع تسريحه خفيفه من فوق وجدام..اما الباقي مفتوح...
قراب المغرب رجع عبدالله البيت مع خالد..خالد كان يبا يصلي المغرب وبالمره اييب حرمته للعرس وعياله... اما عبدالله فمن كثر التوتر كان حاس بانه يلزمه سبووح ثاني بااااااااااااااارد....ويوم طلعوا تعاونوا على البنات والحريم وشلوهن الفندق ورجعوا مكان عرس الرياييل...
ترتيب الفندق والقاعه كان ولا اروع...والربشه شاله كل حد... حصه ونوره وفطوم عقن العبي والشيل..اما عليا ولانها حرمه متزوجه تمت بشيله خفيفه... طبعا مافي داعي اقول ان البنات لفتن نظر الجمييع... وام خالد كل شوي تمسك وحده من بناتها وتسمي عليها وتقرا تخاف عليهن من العين... ومب بسبب اشكالهن بس...لكن بسبب ترحيبهن بالحريم وحركتهن والقيام بالواجب... حصه تعبت شوي من الحركه وقررت تروح عند عنود تكلمها وترتاح عندها شوي... اول مادخلت حصه حصلت عنود معاها المصوره ومستلمتنها تصورها كل انواع الصور.. مستغله انفرادها...طبعا عنود كانت ملااااااااااااااااااك... المكياج الناعم زادت ملامحها نعومه...والتسريحه النازله على الظهر كانت فنانه... اول ماشافت حصه استرخت..
عنود: وين انتووا من الصبح..؟؟؟ مخليني برووحي...
حصه: سووووري الغاليه والله كنا نعابل تحت ويا المعازيم...الله الله..اووووش اش شو هالكشخه عنووود ياحظ اخويه فيج ماشاء الله عليج...
قفطت عنود...
عنود: يلسي عندي انتي اروحج تعبانه.... بعدين بالكلام عن الجمال...ماشاء الله اشوفج مب مقصره....شحقه فاجة شعرج؟
حصه: كلنا فاجين شعورنا....
عنود: همممممممم.. انتي مب ناوية على خير اليوم ...
حصه: لا ان شاء الله مايصير الا كل خير... ابا اصور وياج...
ارتزت حصه عدال عنود وصورت معاها كذا صوووره...
حصه: محد ياج من الحريم؟؟
عنود: امي المغرب يت ويابتلي الذهب عشان البسه... مريم كانت عندي بس من صلت المغرب نزلت ونستني بالمره...
حصه: انا احين عندج مابخليج لين ماينزلونج..
عنود: فديتج والله بس بيطوفج كل العرس جي...
حصه: جي ثره العرس يصير بلا عروس؟؟ بنزل معاج وبشوف العرس...مثل ماانتي تشوفينه...
وقفت عنود وقفة معينه للتصوير...
عنود: هذا ان شفت العرس من الزياغ....
حصه: ليش ..انتي متوتره..؟؟؟
عنود: ياختي الكل يشوف انه لازم اتوتر واخاف...لين ماخوفوني صدق من شي ماعرفه...اناماكنت احس بتوتر ولا اريد اتوتر...
حصه: تعرفين..معظم العرايس يخافن...كله بسبب...هممممم...نظرات الناس..وانج خلاص بتتزوجين... وبتطلعين عن اهلج... وبعد الليله الاولى تبين الصدق تلعب دور كبير من هالخوف...
عنود: اولا... انا مب ماخذه غريب..انا ماخذه الانسان اللي اخترته...وهو بالمناسبه يعني ..ولد عمي.. نظرات الناس ماعليه منها... المهم اعجاب ريلي مب اعجاب الناس فيني....ثالثا..انا مابطلع عن هلي..لانكم انتوا بعد اهلي..ومتىمابغيت بسير بيتنا... رابعا واخيرا... الليله الاولى هذي لين الحين مافكرت بها ولا اريد افكر بها...
حصه: هههههههههههههههههه لازم تفكرين بها...
عنود: ماريد.... اللي يصير يصير بالطقاق... انا وعبادي بنتفاهم عقب ....هههههههههاي..
حصه: ههههههههههههه والله اول مره اشوف عروس مثلج...بس احسن تصدقين تمي جي.. التوتر يخرب ملامحج...خلج ريلاااااااااكس...
كملت عنود التصوير لين ماتعبت... حشى..هالمصوره ماخلت حركه مايابتها...
عند الرياييل سعيد وحمدان بدا اللعب عندهم... دخلوا بين الشباب والرياييل وبدوا يرزفون.. بتفنن... وخليفه دار دورتين وطلع ووقف مع عبدالله اللي متيبس من العصر.. يبين للكل انه عااادي ويظحك ويسولف بس خليفه يعرفه عدل... وكسر خاطره...مسكه وسحبه على جنب..
خليفه: شو بلاك يالمعرس...؟؟؟
عبدالله: .......... مافيني شي..ليش؟
خليفه: متوتر وايد....عنود ماظني متوتره جي مثلك...
تصدد عبدالله يشوف الناس وهو عافس ويهه ويفكر...
خليفه: رمسني انزين..من شو خايف..؟؟؟
عبدالله: يعني شي اول مره اجربه ماتباني اتوتر بالله..؟؟؟..
ظحك خليفه...
خليفه: ياريااااااال.. هد اعصابك.. انته مب مجبور تسوي شي ماتباه ..؟؟
عبدالله: جب ويا هالراس شو هالرمسه..؟؟
خليفه: ارمسك صدق... دامك متوتر لهالدرجه..الشي اللي موترنك مافي داعي له... خله لين ما تتعودون على وجودكم ويا بعض....فهمت..؟
عبدالله: هي فهمت .. سد السالفه خلوووف....
خليفه: هههههههههههههه ماشي فايده بعدك متوتر ..ارمسك من صوب اطلعه من صوب ثاني...
عبدالله: خلووووووووووف...!!
خليفه: انزين انزين بسكت...بس هذا عرسك ويا هالراس لازم تستانس...
عبدالله: انزين بستانس...
ظحك عليه خليفه من الخاطر...الريال واقف شعر يمبه مب قادر يهدى.. بس الصراحه ماينلام...
رجعوا لمكان الرزفه...وخليفه اجبر عبدالله انه يدخل معاه..وفعلا دخلوا يالووا رباعه... حمدان وسعيد ملووا من العصا... ودوهن ويابوا تفاقه...وقعدوا ايولوون بهن ويسووون حركات رباعه كان شكلهم جنان.....وكلهم لابسين اسود وسفر حمر... وكان اختيارهم للبس هذا صدفة مب متفق عليها..
الساعه تسع ونص نزلوا العروووس... وعلى ويهها ابتسامه هادية.. معاها امها وخالتها وعمتها ام خالد... وحصة نزلت قبل ماينزلون عنود بشوي عساس بتتلاقى معاها تحت... كانت زفتها ولا اروع...شكلها بروحه كان يكفي ويغطي على اي شي ثاني..قعدت عنود وحصه مافارقتها... عنود اذا ماشافت حصه معاها تكلمها وتسولف وياها ما تتوازن... تحس انها ناقصة شي.... استمر العرس ربشة × ربشة من الطرفين...
الساعه 11 وبعد عشا الرياييل.. صار لازم يروح عبدالله الحين وينزف لعرووسه.. بو سلطان وسلطان وحميد ساروا في سياره سلطان.... اما حمدان ركب سيارة خليفه يتريا خلييفه ايي ويسوق..وعبدالله وقف عدال سيارته وابوه راكب جدام يترياااه يركب ويسوق به هو بعد وكان خليفه واقف معاه...
عبدالله: انته بتدخل وياي.....
تلفت خليفه يدور عذر...يوم ماحصل...
خليفه: مابتعفيني...؟؟؟
هز عبدالله راسه " لا " ... وركب سيارته وظحك خليفه وركب الكوبي عند حمدان وروحوا كلهم رباعه للفندق.. يوم وصلوا حصروا ام سلطان تترياهم عند الباب ... وخبروا المعازيم بوصول المعرس واهله حصه نزلت من الكوشه وسارت عند خواتها وتلبسن الشيل والعبي... وتغشن بعد.... ودخل عبدالله معاه الجماعة المذكوورين... عنود عدالها امها وميره..وشكلها ميته من المستتحى ...وتبتسم بهدوء.. اماعبدالله اللي كل شوي يجمع صبوعه في قبضة ويفجهن من التوتر...رفع عينه وهويشوف عنوود من بعيد...هدى شوي... ملاك...وربي ملاك... خليفه كان يمشي معاهم وهو منزل عيونه ويحاول قد مايقدر انه مايتصدد... اما حمداااااااااااان..؟؟ اللي كان يمشي عدال خليفه... حدث ولا حرج... من يشوف حد يعرفه سواله باي باي وتبسم.... حتى فطيم ونوره وحصه اللي عرفهن طبعا من الغشوه الرفيعه ماسلمن منه.. مستوي حبيب الشعب... وصلوا للكوشه... قلب عنود بدت تنسمع دقاته...وقلب عبدالله صدق بيطلع من صدره... وكل شي يسحب نفس طوييل يمكن يهدى...وكان يبتسم بتوتر كل شوي... نبهته امه انه لازم يرفع طرحة عنود الحين ..صد صوبها وبايد مرتجفه...رفع طرحتها ورجعها لورى... وسرحت عيونه وهو يتامل جمالها وويهها الطفولي...حس بنغزة على جتفه.التفت حصل حمدان الغلس...
حمدان: يالله....!!
عبدالله: يالله شوووو.؟؟؟
حمدان: بووسها على راسها ويا راسك اللي متروس حصا اليوم..
عبدالله: لازم يعني جدام الناس..
ام خالد: هي ابويه لازم يالله ...
وعنود شوي وبتموت من الظحك...منزله راسها وعيونها وشكلها جاهزه للتقبيل ...والله فشله..اسميك ياعبدالله حركات...
مد عبدالله ايده ومسك ويه عنود بصبوعه من تحت اللحية....باسها بين عيونها ..وتراجع...ورفع ويهها عشان يشوف عيونها....رفعت عيونها له وهي كللللللللها حيااااااااااا ... اشتبكت عيونه معاها وهو امررررررررره خلاص ذايب... ارتاح شوي يوم شافها نظرتها الهادية... وعرف انها فرحانه به.. ابتسم لها ابتسامه حللوه صغيره وفجها.. ارتفعت الزغاريط ووالتباريك من كل طرف والفرقه بروحها مشتله بالغنا والدق...
تجدموا الشواب يسلمون على المعاريس.. ومن عقبهم سلطان وحميد...وخليفه وحمدان... وكل شوي حد يوقف بينهم ويصور... ساعتها الفرقه دقت اغنية ..مخروووشه...واستانس عليها حمدان... مسك عصاه وقام يرزف عالكوشه وايبس..ودخل معاه خليفه وكانوا ولا اروع... عنود ميته من الظحك عليهم عاللي يسوونه..خباااااااااااااااي ل.... حتى عبدالله ظحك عليهم... عقب مافججوا روسهم وقفوا ..وسلموا عليهم للمره الثانيه وتبعوا باقي الرياييل وهم بيطلعون...وخلوه برووحه.. خليفه قبل مايطلع التفت وشاف حصه بشيله وعباه طبعا ساااري وخفاف مايغطن الا القليل القليل... كانت ماسكه سلامه بنت عليا ومطلعتنها من الحمام... وقعدت تعدل لها فستانها... عقد حياته... انتبه لشعرها...
خليفه: ..حــــــصــــــــــة...!&# 33;!!
التفتت حصه لمصدر الصوت وشافت خليفه...عظت على شفايفه على طول..زقرته ماتبشر بالخير... عدلت شيلتها وحاولت تتحجب...ومسكت ايد سلامه وسحبتها معاها..
حصه: هلا خليفه..خير..
سكت خليفه..ومال براااسه....يشوف شعرها من ورا.... ورجع اعتدل وعقد يديه جدام صدره بشكل يبين الرفض..!!!..
حصة عرفت وين المشكله...وابتسمت بعجز..وقالت بدلع غير مقصود...
حصه: شوووووووووووه..؟!!!..
خليفه: انا شو قايلج..
حصه: كلهن فاجات شعوورهن..
خليفه: انا مايخصني فيهن كلهن....اعتقد قايلج من زمان لا تفجينه...
حصه: انزين عاد فجيته احين شو اسوي...
خليفه: احين شو تسوين عقب ماخلص العرس..؟؟؟
حصه: انزين خلاص....ثاني مره مابفجه...
سكت خليفه عنها شوي...
خليفه: شو حاله بطنج؟؟؟
حصه: كان بخير بس اليوم شوي رد لي الويع بسبب الحركه...
خليفه: في داعي اقولج ارتاحي يوم ترجعين؟؟؟.
ابتسمت حصه..
حصه: لا مافي داعي....
خليفه: تمام..بخليج حمدان يتريا في السياره... تصبحين على خير..
حصه: وانته من اهله...
راح عنها خليفه وهو يبتسم.. حلـــــــــــــوه من الخاطر حلوه.... ركب مع حمدان وراح...
نرجع للمعاريس... اللي كل شوي اييبولهم عصير.. والا كيكه... ولعوزوووهم بالتصوير.. ماكمل نص ساعه الا نشوا خلاص الساعه 12 وعشر متى بينزفووون يعني..؟؟؟ وزفوهم مع الحريم الكبار والبنات.. كلهم كانوا معاهم لين وصلوا الغرفه... وخلوهم هناك مع المصوره اللي استلمتهم استلااام معتبر... ماخلت في خاطرها حركه ماقالت لهم يسووونها حتى بعض الحركات محرجه من الخاطر يعني...لين ما خلصت شغلها..لمت اغراضها وطلعت... وخلوهم بروحهم في الفندق والكل راح بيته....
------------------------------------</font></p>
<font face="ms sans serif,verdana" size=1>يالله اشوف الردود ولا تفشلوني..... أختكم شهوووودة الأمورة<img src="http://oasis.bindubai.com/emoticons/blush.gif" border=0><img src="http://oasis.bindubai.com/emoticons/inlove.gif" border=0></p></font></font>
رد مع اقتباس
مواقع النشر (المفضلة)