<font color='#728FCE'>
<font face=arial,verdana size=3>الجزء الثاني والاربعون
دخل خليفه غرفة عبدالله وماحصل حد فيها...بس عيبته الغرفه لانه بارده وتشهي للرقاد... وخليفه كان ذاك اليوم طالع من امتحان وميت من التعب...سكر الباب وراه وراح لشبريه عبدالله وانسدح...وغط في رقااده بدون مايحس.... بعد نص ساعه دخل عبدالله شال في ايده وجبتين وحده له ووحده لولد عمه..يوم دخل حجرته ظحك وهو يشوف خليفه راقد عشبريته...وقرر يخليه راقد شوي اكثر لانه يدري بانه ياي من امتحان...حط الوجبتين على الطاوله ويلس عالمكتب...مسك تيلفونه واتصل بعنوووده....
عنود: هلا والله ملالالالالالالالالالالالا ييييين....
عبدالله: فديييت هالصوت ياربي...شحالج غناتي.؟
عنود: بخيييير يعلك الخير يارب..شحالج انته الغلا؟؟؟
عبدالله: الحمد لله..نشقح...
عنود: درست لامتحان باجر؟
عبدالله: هي خلصته ..وسرت اخذ عشا يوم رديت حصلت اخوج راقد فشبريتي..هههههههه
عنود: فديييييته خلوووف...!!...تلقاه تعبان...انته ماقلت لي عليه امتحان اليوم.؟
عبدالله: هي ..الظاهر انه رد من الامتحان ورقد فحجرتي....
عنود: حليله والله سلملي عليه....افتقدتكم صراحه بسيره البرر من كم يوم..
عبدالله: سرتوا البررر عنا..؟؟؟
عنود: هييي خواتك اقنعن عمي..وعمي قال لابويه..وسرنا كلنا رباعه كالمعتاد...
عبدالله: افاااااا....جذي تغايظيني عاد..؟؟؟ ماعليج بحرمج سيرات البرر عقب مانعرس..
عنود: هههههههههههه لو تحرمني من الطلعه اممررره ...راظيه...
ظحك عبدالله وهو يتحرقص يبا يعرس بسرعه...
عبدالله: فديتج والله....ماتخافين اني اكون مب مثل ما انتي متوقعه.؟؟
عنود: لا..
عبدالله: وليش واثقه.؟
عنود: لانك الانسان اللي حبيته اولا..ثانيا ولد عمي واعرفك عدل...ثالثا..اذا ماطلعت مثل ما انا ابغي ..بغيرك وبشكلك على كيفي...هههههههههه
عبدالله: ههههههههه ماترومين عليه....جي معجون انا تغيريني على كيفج...
عنود: عاد انته لا تقعدلي احين تشككني...خلاص انا قربت اخلص تجهيزاتي...
عبدالله: يالله يا عنوود...يخطف عندكم الوقت بسرعه الا نحن لايعه جبوودنا ...بس يالله هانت..ماشي باقي...اسبوعين امتحانات..اسبوع نتايج واخلص اوراقي وكل شي...وبعدها برد الامارات...ان شاء الله..
عنود: ان شااااااااااء الله توصلوون بالسلامه يارب... شد حيلك عبادي في الامتحانات اووكي..فديت الدكتوور انا...
عبدالله: ههههههههههه عقب بتلعوزين بتم الا اسوي عليج تجارب..
عنود: هههههههه لالا ما اهون عليك...
عبدالله: احلى شي فيج الثقه اللي تثقينها فيني...ما تتصورين شكثر مريحتني...
عنود: كيف ما اثق فيك بالله...حد مايثق بنفسه؟ ترا انا وانته واحد...
عبدالله: هي والله صدقتي...واحد.. الله يكمل علينا نعمته يارب...
عنود: آآميييييين..
عبدالله: برايج غناتي بوعي هذا وبنتعشى وبعدني بقعد اراجع... سلمي عليهم كلهم وخصوصا امايه....وديري بالج على نفسج عدل ماوصيج...
عنود: وانته بعد الغاااالي...بالتوفيق بالامتحانات وسلم لي على خلوووووف..قوله يتصل شوي ويعبرنا..مسولنا طاااف..
عبدالله: ههههههه ان شاء الله... فمان الله عيوني..
عنود: مع السلامه...
سكر عبدالله عن عنود وتم لحظات غصبن عنه يذكر ويهها الطفوولي المرح وسوالفها...وظحكتها له...فديتج ياعنوود... التفت صوب خلووف ونش يوعيه...هزه شوي من كتوووفه..
عبدالله: اييييه...!!..خلوووووووف...
خليفه: ........................هممممممممم... 3;!
عبدالله: قم يالله ...قوووم بتعشى...
خليفه: ....مابا خلني ارقد...
عبدالله: الا بتقوووم الحين ....بتخرب رقاادك ويا هالويه بتنشلي نص الليل...!!
نش خليفه يفرك ويهه ويمرر صبوعه بين شعره يرتبه شوي... وعبدالله مجابلنه..
عبدالله: شو سويت بامتحانك؟؟؟
حرك ايده خليفه وسوا بايده حركه على اساس يقوله الامتحان اووكي... ونش عنه ودخل الحمام وغسل ويهه...ويوم رد طلع..
خليفه: سمعتك ترمس...!!!!
عبدالله: كنت اكلم عنووود....تسلم عليك...
خليفه: الله يسلمك وياها من الشر...شحالهم.؟؟؟
عبدالله: بخير والله..العرب مقضين اجازه ويسيرون البررر وحالتهم حاله...
يلس خليفه عدال عبدالله وفتح وجبته وخذ البيبسي وقعد يشرب وهو معقد حياته ويطالع عبدالله....
خليفه: منو اللي سار البر.؟؟
عبدالله: اهلي واهلك....
هز راسه خليفه وقعد يتعشى وهو ساكت..لاحظ عبدالله بان خليفه لابس الساعه اللي يابتها البنت له هدية...ابتسم...واستغرب في نفس الوقت... ماقال خليفه انه بيردها؟؟؟؟؟!!..
عبدالله: خلووف..!!
رفع خليفه عينه لعبدالله ....
عبدالله: هذي مب الساعه اللي عطتك اياها البنت هدية؟!
خليفه: هي...
عبدالله: ماقلت انته بتردها عليها..؟؟؟
خليفه: تراني شليتها على اساس بردها..احتشرت عليه وقالت انا اباها لك هدية تذكرني بها بحسن نيه ومادري اشوو..ولانه مافي فقلبها شي صووبي لانها خلاص انخطبت...وبتعرس بعد ما تتخرج...ولاااا..بترد الامارات ويانا الظاهر...!!
عبدالله: اهاااااااااا والا جي السالفه..!!!..وانته لبستها ماشاء الله..!!!
خليفه: لا تفسر على كيفك...والله اني لابسنها لانه ساعتي وقفت اليوم الصبح..وماعندي ساعه غيرها..ولبستها لانه عليه امتحان اليوم وكل شوي اطالع في الساعه......بس باجر ماعليه امتحان بسير باخذ لها هدية وباخذلي ساعه غير انا بعد..
عبدالله: شو شو شوو..؟؟؟ شو قلت..؟؟؟ بتاخذ لها هدية؟
خليفه: هي... اللي مايرد الهدية مب ولد اصل وعرب ياعبوود...والا مب لسواد عيونها وانته تعرفني..
عبدالله: شو لك انته فهالسوااااااالف ياخلووووف....!!!..شتباب ا البنت مخطوبه وباجر بتعرس بتسير تسويلها مشاكل بعدك بهديتك...!!
خليفه: والله انا مابكتبلها رساله غراميه...باخذ لها حيالله شي يخطر على بالي تتسلى فيه فتره لين ما تنسى منو عاطنها هالهدية...
هز عبدالله راسه مب راضي عن الفكره...بس خليفه عاقل وموثووق فيه ويعرف انه مب راعي سوالف وانه بياخذ هدية لفكره هو مقتنع فيها...بانه دامه قبل هدية؟ لازم يردها... والا مايقدر يتنفس براحه...
يوم الاثنين في الامارات كان بو فيصل وحرمته يايين زياره للعين...يقصرون الدوب عليهم وبالمره يشلون بنتهم فطيم وياهم عشان تقضي اجازتها هناك في الشارجه....وصلوا الضحى...ويلسوا وسولفوا لين الغدا ويوم تغدوا دخلوا يرقدون لين العصر...فطوم كانت تجهز اغراضها وهي مظايقه بانها ماشافت حمدان ولابتشوفه قبل ماتروح...لانه عليه دوام العصر ولا بيي صوبهم.... استغربت من نفسها وهي تكود ثيابها في الشنطه ..من متى انا احاتي شوفة حمدان والا ازعل لاني ماشفته..؟؟؟؟... مب جني من فتره كنت اتمنى اذبحه واني ماشوفه نهائيا؟...ياربي شو هالحاله ...انا شو الله بلاني وحبيت...!!..حمدان الربعه والسوالف وياه حلوه لكن الحب..!!! الله اعلم لكني مب متفائله بخير...هذا ماينعرف شو يطلع منه...يالله بغيب ثلاث اسابيع عن العين....ثلاث اسابيع..؟؟ والله بديت اشتاق للعين وانا بعدني ماطلعت منها...
ويوم يا العصر وصلوا العصر وخلصوا...ركبوا هل الشارجه سيارتهم وتوكلوا صوب بيتهم ...وفطوم مبرطمه...
في الليل ياهم حمدان ويلس في الميلس شوي...عقب دخل عند اخته وسلم عليها...ويوم خلص سلامه لها روح للبيت ...يوم دخل للصاله ماحصل غير نوره اتابع مسلسل...
حمدان: السسسسسلام عليج...
نورة: وعليكم السلام والرحمه ...اهلين..
حمدان: شحالج..؟؟
نورة: الحمد لله شحالك انته.؟؟
حمدان: بخير..وينهم عنج عيل.؟
نورة: هممم حصه تصلي...امي سارت عند حرمه مربي في المستشفى...ابويه بعده مارجع...
ترياها حمدان تكمل رمستها بس ماكملت....وعقد حياته..
حمدان: وين فطــــيــــــــم..؟؟؟!! !!
نورة: اوه..!!..هي فطيم سارت الله يسلمك...
اظايق حمدان في خاطره وعرف اجوبه اسالته من قبل مايسال...فطيم راحت الشارجه وهو ماشافها قبل ماتسير وبتم هناك لين ماتخلص اجازتها..يعني كم..؟؟؟ ثلاث اسابيع تقريبا... آآآآآآآخ يالقهر..
حمدان: سارت الشارجه ها..؟؟
نورة: هي يا خالي اليوم وحرمته وشلووووها...
وانقهر حمدان...ودام انه منقهر لازم يقهر حد وياه ..شحقه هو بروحه يعااااني ويتم ساكت..؟؟ صد صوب نوره..
حمدان: وانتي ريلج مرتغد ماادلينه وين...
فزت نوره وعدلت قعدتها ....
نورة: لو سمحت... ريلي مب مرتغد... ريلي ساير ويا ربعه يغير جووو ويتحوط...
حمدان: هههههههه يغير جو وويووووه بعد... ويا زين اللي بيشووووفه من ويوه في حواطته...
عقدت نوره حياتها منقهره...
نورة: بسم الله على سعيد من هالحركات....الا جان انته تشوفهن مزيونات فاعتقد لانهن من مستواك ....
حمدان: ههههههههههههههههههههههههه هه خيييييييييبه يالدخاااان....!!.. شحقه منقهره انزين كل الرياييل يحبون يشوفون الحلوات... خص سعيد عاد يموت عالحلوو... بس آخر شي بيرد لج لاتخافين...
نورة: حمدان لو مب الحشمه والادب جان نشيت وخليتك يالس ارووحك هني تقحطن...
نقع حمدان من الظحك على نوره...وحليلها...سارت فطيم وطاحت هي فلسانه..
حمدان: هههههههههه اسولف وياج..سعيد ريال ومايسوي هالسوالف..ويكون فعلمج ولا انا اسوي هالسوالف.. بس حبيت اغايظج شوي لاني منقهر...
نورة: ويا ويهك... وشحقه منقهر؟
حمدان: ......بس
نورة: عشان الشيخه فاطمه بنت هلال سارت اليوم الشارجه بدون ماتودعك.؟؟
اطالعها حمدان بنص عين...
حمدان: انتي ساحره من يوم يومج..قايلج...
نورة: ههههههه...فديتني...
حمدان: شحقه ماقلتيلي انها بتروح اليوم..؟؟؟
نورة: مادرينا الا اليوم الضحى يوم يونا قوم خالي ...شو تباني اتصلك عشان تي تشوفها بين اهلها؟؟؟ مابتروم تشوفها..
سكت حمدان وقعد من الحين يحسب الايام والاسابيع لين ماترد الطويله البيت... عقب ذاك اليوم الحلو اللي قضووا في البر زاد حبه وقربه منها..ويالله يالله صبر من يوم الخميس لين الاثنين بدون ماييهم البيت... ويوم يا ماحصلها..!!.. آخ يالنحاسه اللي فيني...
قطعت عليه نوره افكاره..
نورة: اقول حمدان...
حمدان: هلا..
نورة: انته قايل بتودينا السينما اذا صبنا الزقاره وماوديتنا...
حمداان: انا واعدنكن اربعتكن....وما بشل ثلاث بس...
سكتت نوره وفهمت ان حمدان يقصد فطيم...يعني مابيوديهن السينما الا يوم تي الشيخه فطيم...انزين ماعليه...
سعيد كان في هذي الايام في مصر..كان ساير مع شله ربع حوالي 8 او 10 ... وكلهم ميانين وعايش وياهم احلى ايااام.... من زمان خاطره يروح فرحله ويا ربعه جذي.. بس رغم وناسته كان يذكر اهل وخصوصا نوره في اغلب المواقف...من يشوف محل يبيغ اشياء غريبه خذ لهم من هالسوالف كتذكارات .. خصوصا خان الخليل كان فيه اشياء عجيبه.. بعد يومين بيروحون جدة في السعودية..وكان سعيد متحمس لها...وبعد مايخلصون من جده بيسيرون سوريا ولبنان..وعقبها بيرجعون البلاد.. في الاسكندريه كان سعيد يتحوط مع ربعه في الشوارع.. لين ماصادف مقهى انترنيت ..واصرر هو وواحد من ربعه انهم يدخلونه..اما الباقين عارضوا..اخر شي اتفقوا انهم يتلاقون فمطعم قريب بعد ساعه...دخل سعيد هو وربيعه المقهى ويلس له على كمبيوتر وعلى طول فتح الايميل...وحصل رساله وحده من نووره...مطرشتنها بعد يومين من سفر سعيد...استانس من الخاطر انها مالبسته وتريته هو لين مايطرش...بما انه هو اللي مسافر.!!..وهو المفروض يتواصل...نوره ماعندها هالسوالف...فديتها ياربي...
فتح رسالتها وكانت تقول...
" السلام عليكم......
سعيد...شحالك الغالي..؟؟
انا بخيييير وعااافيه ونشقح...
مادري وين الله عاقنك وفي اي بقعه من ارض الله الواسعه... لكن كل اللي اتمناه انك تكون مستانس... وادير بالك على نفسك....
بس والله ياويلك ان سمعت انك سولفت ويا بنات...بزواااالك ترا.... انا واثقه فيك بس اخاف ربعك يخبلوبك وياهم...وترا شباب يوم يسيرون رباعه ويسافرون يسوووون العجب عشان جي انا متخوفه...
لا تعقد حياتك...
ادري انك تحبني ..وما تشوف غيرري... ترا حتى انا احبك وماشووف غيرك اووكي؟
هممممممم بغيت اقولك ان نفسيه حصه تحسنت وايد اكثر عن قبل...قامت على الاقل تظحك وتسووولف
وسالفه الشغل عاطتنها حماس شوي...عل وعسى اللي فبالي يتحقق..صح انته توأم روحي على قولتهم بس لا تسالني عن هالشي لاني ماقدر اقولك..اخاف اقوله ومايتحقق..بس اذا صار بقولك تراه صار..بس ادعى انته...
ولا تنساني بالهدايا لوووووول...لالا صدق لاتخسر عمرك ولا شي..
بخليك الحين..متى ماشفت ايميلي رد عليه خبر...
دير بالك على نفسك وهالله هالله بالرزااااااانه..
خطيبتك..
نووووووره..."
ابتسم سعيد وعلى طول رد عليها برسااااااله طويييله يخبرها بمكانه وشوو يسوون وشكثر متوله عليها..وبانه فعلا مانساها بالهدايا ...ولو كانت بسيطه...بس قيمتها كبيره في النفس...ونازعها شوي على سالفه البنات اللي تحسب عمره خلص منها.. بس تساهل وياها شوي لانه يدري بانها تغاااااار مثل ماهو يغاار عليها.... وخبرها بعد وين بيسيرون في الايام اليايه...ووصاها ماتقطع بالرسايل وبانه متى ماشاف مقهى انترنيت بيدخل وبيشيك وبيطرشلها رساله..
بعد يومين عنود كانت فبيت عمها وبالتحديد يالسه بين عمتها ام خالد وحصه....
عنود: عموووووه دخييييلج..والله اني ماعرف اشتري بلاها..
ام خالد: يابنتي انا والله ماعندي مانع..لكن عمج مابيرخصها تروح لين دبي وياج تحوط في الاسواق...
عنود: عموووه مابترمسينه عشاني يعني..؟؟؟
ام خالد: بعد شوي بييي وبنرمسه لكن بس انتي بعد رمسيه خليه يسمعها منج...
عنود: عموه اتروع اخافه يعصب ...
ام خالد: ههههههه انتي شاوريه وشوفي رايه...
التفتت عنود لحصه وهي مب متفائله بخير...اكيد عمها مابيطيع...
ويوم يا بو خالد وكانت ساعتها نوره يالسه معاهن..شاورووه في السالفه...
بو خالد: لالالالالالالالالالالالا.. ..
ام خالد: ليش ياحمد...؟... ماعليها جان ويا حرمه عمها وبنت عمها ...
بو خالد: لا قتلج...البنت بدون امها والا حد من اخوانها والا نا ماتطلع من البيت...يالله يالله نحن خليناها تشتغل...
برطمن حصه وعنود...
نورة: انزين امايه انتي شلي حصه وعنود وسيروووا...ترا عنود حرمه ولدج بعد...وقوم عمي عادي عندهم بيخلوونها تسير وياج...
بو خالد كان مشغول ويتابع الاخبار فما سمع نوره وهي ترمس... ام خالد فكرت في السالفه شوي..
ام خالد: وين اسير انا بنتي واخلي البيت ..!!!..
نورة: وابوي انا وحريم اخواني هني ما نسد..؟؟؟...الا يوم واحد بتسيرن وبتردن..
عنود: هي عموووه دخيلج دخيييييييييلج ....
ام خالد: انزين مايخالف...
صدت ام خالد على بو خالد بتشاوره....
ام خالد: حمد...انا بسير ويا البنات دبي...
عقد بو خالد حياته معصب..
بو خالد: انتي شو يسيرج بعد ومالج حااايه..؟؟؟
ام خالد: ترا بنت اخووك ما تعرف تشتري الا ويا حصه..من طاحن وهن رباعه مايتفارقن.. وانته مب طايع ترخص بنتك...انا وام سلطان واحد..انا بشل البنات وبوديهن دبي...
بو خالد: تراج الا رابطه راسج بلا ويع...وشكلج الا انتي ارووحج تبين تحوطين...
ظحكن البنات والعيوز وياهن..وكان بو خالد رافض الفكره..وكان بيستمر برفضه هذا لولا انه شاف عنود شكلها زعلان وحاطه فخاطرها وهي ماتهون عليه...اخر شي وافق....عشان عنود بس..
الاربعاء وبعد مارجعت حصه من الدوام تغدوا كلهم وعلى طول ركبت حصه وام خالد السياره ومودنهم الدريول.. طبعا بعد ماصدعت راس نوره بالتوصيات على البيت...كانوا بيباتون ليله لانه مايعتقدون ان عنود بتخلص كل اغراضها في يوم واحد...ركبت ام خالد وحصه السياره وساروا بيت محمد... وشلوا عنود وياهم وهذيج نفس الحاله امها توصي بنتها على الركاده والعقل...وبعد ماخلصوا روحوا دبي وكانت الساعه تقريبا 3 ونص....
يوم وصلوا الشارجه كانت ام خالد تعبانه ومافيها على السوق...طبعا ساروا بيت اخوها هلال وهناك عرضت عليها بنتها عليا انهاهي تروح معاهن السوق وام خالد ترتاح في البيت...ووافقت ام خالد لان عليا لها بارض اكثر وادل اكثر بعد عن ام خالد...
فبالتالي بعد المغرب راحن البنات مع عليا دبي ووداهن الدريول... واسميهن هناك طيحن في كل شي...ماخلن شي ماخذنه.. ورجعن المسا هلكانات...تعشوا ورقدوا وبالباجر الصبح بعد نشن وسارن السوووق ..وهلال مسكين مفرور ياعند فطيم او شيخه... رجعن الظهر وهن محملات باكياس باكثر مما كانن يتوقعن...عنود خسرت واااايد بس الاشياء اللي ماخذتنها كلها تستاهل...وتقريبا خذت كل شي ناقصنها.. ومب لازم تكثر وايد لانها اكيد بتاخذ لها سوالف وايده بعد العرس...
تغدوا فبيت هلال وفطيم تتحرقص خاطرها ترجع معاهم العين بس طبعا ماتروم تنطق...بيحتشرون عليها اهلها... على هالحال رجعوا هل العين للبيت بعد الغدا..ووصلوا العصر.. عنود نزلت معاهم البيت..ونزلوا الاكياس كلهن وحطوهن فحجرة فطيم .. وقعدن يبطلن الاكياس ويراون نووره شو خذت عنود... الصراحه كل الاغراض كانت فنانه وكاشخه...واهم شي الراحه اللي حست بها عنود لانها خلصت اغراضها اخيرا...
بعد ماتعشت عنود في بيت عمها ياها حمدان وشلها هي واكياسها اللي ترسبهن السياره...وروح بها البيت...
-------------------------</font><font face="ms sans serif,verdana" size=1></p></font></font>
رد مع اقتباس
مواقع النشر (المفضلة)