أحبك .. لو بغيت أنساك ما أقدر

[سويرة]

<font color='#000000'><p align=center>


<strong><font face="arial, helvetica, sans-serif" color=#996633 size=3>سويسرا... الصبح

قعد ابو عمر مع اهله عند الريسبشن تحت يتريون المرشد السياحي...
ريم: ابويه نحن جاهزين
ابو عمر: انزين اترين الريال لين مايوصل
ريم: أي ريال بعد... اخاف الا بتغير رايك شرات قبل؟
ابو عمر: افا عليج يالريم... اصبري شوي والحين بيوصل
ام عمر: ريموووو ان ماسكتي ترى والله ماخليكن تظهرن
ريم ( وهي نافخه ثمها): انزين
حمده: ابويه..... اظنه وصل

فضل: السلام عليكم
ابو عمر: وعليك السلام والرحمه
فضل: السيد عبدالله القبيسي
ابو عمر: هيه نعم..
فضل: معاك فضل محمود .. المرشد السياحي
ابو عمر: حياك الله...
فضل: بستسمح منك يا اخ عبدالله.. بس تاخرت كرمال الزحمه
ابو عمر: افا عليك.. مايحتاي تستسمح
ريم: ابويه... يالله
ابو عمر: يالله توكلنا على الله

وركبوا مع المرشد السياحي اللي اجرلهم سياره خاصه... وفي السياره بدت الظرابه.. اللي تبغي تسير المحلات تشرالها و اللي تبا تسير الحديقه واللي تبا تحوط في السناتر...

اليده: لا حول... عيزتوني تراكم
ام عمر: ماعليه يا اميه.. الحين بنوصل
خلود: يدوه انتي طالعي المناظر و بترتاحين
اليده: عيوني احولت من كثر ماطالع... نزلوني هني
عذابه: في الشارع عاد
اليده: شو فيها... ترى الناس كلها متيمعه هني
حمده: بس هالمكان مايشاهد...
اليده: برايه.. المهم اقعد و اتمنظر على راحتي

فضل: انا بفضل انكن تروحوا للحديقه
ريم: لا مانبا... البارحه سرنالها
فضل: انا بأصد الحديقه الكبيره... فيها العاب و بحيرة كتير حلوه
ابو عمر: خلاص عيل ودنا هناك
ريم: بس
ام عمر: ريموووو؟؟؟
ريم: انزين خلاص

وصلوا الحديقه اللي فعلا كانت اكثر من رائعة... و استانسوا هناك و اولهم الريم .. استانست يوم شافت المناظر الحلوه... و حمده شغلتها التصوير.. ماخلت شي ماصورته..... اما عذابه و خلود تمن يتمشن رواحهن .... و ابو عمر مع حرمته و اليده قعدوا مع المرشد السياحي اللي طول الوقت يرمس عن المكان..

و الظهر تغدوا في مطعم قريب عالحديقه... و عقبها اتمشن البنات في المحلات القريبه ... وتمن يتشرن على راحتهن... و العصر رجعوا الفندق....

فضل: بدكن تروحوا لاي مكان بالليل؟
ابو عمر: لا يابويه ... بسنا حواطه
ريم: ابويه....( وهي اطالعه بنظرات )
ابو عمر: عالعموم اذا بغينا نظهر بنخبرك
فضل : على راحتك

في الغرفه
اليده: انا ركبيه قامت تعورني و ين تبينا نحوط بعد
ريم: بس انا ابغي اظهر
عذابه: حتى انا
حمده: وانا بعد خاطري اتعشى برع
ام عمر: ماشبعتن...
ريم: مايخصني .. انا يايه استانس هب احبس عمري في الغرفه
ابو عمر: والله محد عاقل فيكن غير خلود
خلود ( وهي اطالع ابوها): الصراحه انا بعد ابغي اظهر
اليده: كملت... نشن يالله عالحجره... بنات اخر زمن
ام عمر: وين تبن تظهرن في الليل...
ريم: انزين فضل معانا
ام عمر: خوج هو وانا مادري...
حمده: ابويه...
ابو عمر: والله الشور عند يدتج جانها تبا تتعشى برع بنسير ...
عذابه: يدوه فديتج.... خلنا نتعشى اليوم في مطعم غاوي.... شو رايج
اليده: لا
ريم: يدوه... اتخيلي انج تتعشين في البحر...
اليده: جيه سمجه تحيديني
ريم: اتخيلي بس.... شوفي عمرج وانتي تاكلين و السمج حولج.. يا سلااااااااااام
اليده: اتخبلتي انتي....قلتلكم ماشي ظهره
خلود: يدوه ... نحن يايين نستانس و نطالع الناس و العالم.. اشحقه نحبس عمارنا في هالحجره.. وبعدين المفروض انتي تغيرين الجو....وهذا الشي بيفيد صحتج
اليده: ويديه انا... الحين اكل المطاعم بيفيدني

وعقبها صدن البنات صوب حمده.... يترينها تقنع اليده

حمده: يدوه
اليده: خير
حمده: اهمز ريولج
اليده: زين بتسوين
حمده قعدت تهمز ريول يدتها... وتمت تسولف معاها ...
حمده: اتخيلي يدوه.... يوم مرينا على هاك المطعم شو شفنا؟
اليده: شو ... انا ماشفت شي
حمده: يالله كيف شكله حلو.. و لا بعد غالي يعني هب أي ناس يدخلونه
اليده: هيه
حمده: اكيد اكلهم حلو بعد
اليده: دامه غالي اكيد
حمده: واظن انه راعيه عربي...
اليده: زين والله
حمده: يعني اكيد يسوون اكلات عربيه
اليده:وانا شو عرفني
حمده: لو كانوا يسوون مجبوس
اليده: مجبوس عاد .. شو عرفهم
حمده: عادي يسوونه... خاطرج بمجبوس
اليده: هيه والله...
حمده: عيل خلنا نسير
اليده: بس ماظن يسوونه
حمده: لا لا .. اكيد يسوونه.... شو رايج نسير .. بنستانس ...
اليده: والله مادري
حمده: عيل بتحكرين عمرج هني... خلنا نظهر و تشوفين الناس و تذوقين الاكل اللي تبينه
اليده: هيه والله... صدقج.. اقول روحي خبري ابوج عيل يقول حق هذا اللي يسمونه فاضل
حمده: هب فاضل.. اسمه فضل
اليده: كله واحد... روحي رمسي ابوج
حمده: ان شاء الله ( وجان تحب راس يدتها)

عذابه: اخيرا...
حمده: شفتي عاد
خلود: انا مادري شقايل رمتي تقدرنينها
حمده: بعد ربج
ريم: انزين بسير اخبر ابويه
عذابه: هاي موتها و حياتها الطلعه و الهوامه
حمده: ما تنلام... يالله.. تاخرت
خلود: تاخرتي على شو؟
حمده: اكيد محمد اتصلبي... بسير اتصله
خلود: ماعندج سالفه... خليه يتوله عليج
حمده: ومن قالج انه هب متوله عليه
عذابه: شقايل بتوله عليج و انتي ترمسينه 24 ساعه
حمده: مادري...


ريم: ابويه
ام عمر: تعالي... ابوج يرمس فيصل
ريم: انزين خبريه انه يدوه وافقت تتعشى برع
ام عمر: اسميكم انتو... هب هينات
ريم: هيه عيل.... اذا في خاطرنا شي لازم نسويه
ام عمر: الله يعين ريلج عليج
ريم: وشو يخصه ريلي
ام عمر: اذا خذج ترى امه داعيه عليه
ريم: بسم الله عليه.. تشوفيني ينيه

ابو عمر: المهم انك وديت الاوراق
فيصل: كمن مره سالتني هالسؤال... والله اني وديتهن
ابو عمر: انزين شو فيها لو سالتك
فيصل: اضيع وقتك ووقتي
ابو عمر: وانت شو اللي شاغلنك ها؟
فيصل: غزال... ااااااااااااااااااااااه يا بوعمر لو تشوف هالغزال ... جان تمنيت ترد عشرين سنه ورا
ابو عمر: هههههههههههههههههههه... ماتيوز عن سوالفك هاي
فيصل: شو نسوي.. ماشي شغله
ابو عمر: لا بويه بتنشغل قريب
فيصل: بشو
ابو عمر: بحرمتك و عيالك
فيصل: بسم الله الرحمن الرحيم.. أي حرمه و أي عيال
ابو عمر: لا تم تستهبل جيه.. عنبوك هب ياهل.. لين بتم بهالحاله
فيصل: يا بو عمر ... انت الحين ليش تفتح هالموضوع.. استانس بسفرك و ماعليك مني..
ابو عمر: انزين... وعمر وينه؟
فيصل: اظنه في بوظبي
ابو عمر: شو يسوي هناك؟
فيصل: مادريبه... ابويه... خليفه يبغي يرمسك

خليفة: هلا عمي
ابو عمر: هلا الغالي... شحالك وشحال هلك؟
خليفة: بخير ربي يعافيك... احنه بخير يوم انك بخير و بعافيه
ابو عمر: الله يخليك
خليفة: اشحالكم انتو؟
ابو عمر: بخير و سهاله
خليفة: و البنات؟
ابو عمر: يسرك حالهن...
خليفة: وشو السفر معاكم ان شاء الله مستانسين
ابو عمر: وناسه والله... ماشاء الله عالبنات ... ماخلن مكان ..
خليفة: خلهم يتونسون... المهم عمي ماطول عليك
ابو عمر: سلم على هلك...
خليفة: يوصل.. وداعة الله
ابو عمر : مع السلامه

ريم: ابووووووووووووووووووووووو ووووووويه
ابو عمر: خير
ريم: بنتعشى برع اليوم
ابو عمر: اذا يدتج طاعت
ريم: ومن قالك انها ماطاعت
ابو عمر: صدق ( وصد صوب ام عمر)
ريم: اكيد صدق
ابو عمر: ماشاء الله عليج... محد يروملج

في دبي

خليفة: ياحيهم والله...
فيصل: لو سافرنا اخير
خليفة: تدري الود ودي اسافر بس ماروم اهد هليه هني
فيصل: صدقك...لحظه بتصل بعمر

فيصل: الو.... هلا والله
عمر: هلا فيصل
فيصل: وين دارك
عمر: بوظبي... اشحقه؟
فيصل: عنبوك ماتخيل .... هلك حاشريني ينشدوني عنك.. وانت ماتقول بتصل برمسهم
عمر: ولا مافظيت
فيصل: اها... وانا اقول ليش تلفونك مشغول دوم... اثريك ماعندك وقت
عمر: شي في خاطرك بعد؟
فيصل: لا ماشي
عمر: عيل مع السلامه

فيصل: هذا الصراحه مايستحي
خليفة: بلاه؟
فيصل: مادري بلاه...امايه حاشرتني تبا تعرف شو حاله وشو مسوي.. وهو ولا عباله
خليفة: تدريبه عدل... دومه جيه
فيصل: الحين بتحصله مع وحده من هالخايسات معاه.. ويسوي عمره مشغول
خليفة تم ساكت يوم سمع رمسة فيصل... حس انه عمر عمره مابيتغير... وصدقها الهنوف يوم ردته

فيصل: بلاك؟
خليفة: ها.. لا لا ماشي
فيصل: ياخي غير الاغنيه حشرتنا... اسافر عنك واسافر عنك.. جيه محد سافر غيرها
خليفه ابتسم .. عرف انه فيصل يقصد عذابه

خليفة: بشغل الfm احسن
فيصل: زين بتسوي

وبالصدفه يت اغنيه المسافر لراشد الماجد.... وتم خليفة يضحك على هالصدفه... سبحان الله كل اللي بين خليفة و عذابه يتم بالصدفه... كل مايشوفها تكون الصدفه جمعتهم... يا ترى .. يمكن الصدفه بعد تبعدهم..


بوظبي...

عمر: بتمين ساكته جيه
بدور: شو تباني اقول؟
عمر: ياينج الحين من دبي لين هني.. و في الاخير يالسه وماده براطمج
بدور :.........
عمر: الحين انتي ليش زعلانه؟
بدور: ........
عمر: ردي عليه عاد
بدور:.......
عمر: انزين شو تبيني اسوي؟
بدور: قلتلك مابجبرك على شي
عمر: وانا محد يجبرني على شي
بدور: ابا اعرف انا شو بالنسبه لك.. انا شو في حياتك... لعبه يوم بتمل منها بتفرها شرات غيرها؟
عمر: انا ماعرف من وين اظهرين هالخرابيط
بدور: تسميها خرابيط... هاي حياتي يا عمر... وابا اعرف شو نهاية علاقتنا
عمر سكت... ماعرف شو يرد عليها... يمكن لانه تذكر الهنوف...
بدور: انا ضحيت باشياء وايد عشانك.. بس ماشوفك سويت شي عشاني
عمر: شو تبيني اسوي؟
بدور: عمر.. رمسنا بهالموضوع اكثر عن مره.. و اذا انت ماتفكر في العرس تراني انا افكر فيه..
عمر:......
بدور: ترى في واحد يا خطبني من ابويه و انا لين الحين مادريت عليهم
عمر: شو تتريين؟
بدور: هاي هي المشكله... اترياك انت.. و ابا اعرف تباني مثل ما انا اباك؟
عمر:...........
بدور: ليش ماترد عليه؟
عمر: ......
بدور: اظني عرفت ردك.
عمر:...........
بدور: انزين ممكن تنزلني الحديقه؟
عمر: بتنزلين ؟
بدور: هيه
عمر: على هواج

وجان يوقف عند باب الحديقه و نزلت عنه بدور

عمر: بدور
بدور: نعم
عمر: حطي في بالج هالشي .. حياتج هي حياتي.. و ان شاء الله اول مايوصلون هليه بخطبج.. ولا تظنين في يوم اني بعاملج شرات اللعبه مثل ماتتصورين...و بثبتلج هالشي قريب
وجان تبتسم له ... و دخلت الحديقه عند ربيعاتها...

عمر تم يفكر في اللي لازم يسويه... و قرر انه يتزوج بدور .. حتى لو اهله ماطاعوا... و الهنوف بينساها .. بس عقب ما يقهرها شرات ماقهرته و ذلته..
وجان يرن تلفونه...

عمر: حيالله حمد...
حمد: الله يحييك... اشحالك؟
عمر: بخير يوم انك بخير.. بشر .. حصلت الرقم؟
حمد: افا عليك... اكيد حصلته... **********
عمر: تسلم ...
حمد: يسلم غاليك... خلاص عيل ماطول عليك..
عمر: الله يحفظك..


عمر: الو
عبدالله: مرحبا
عمر: مرحبا بك ...عبدالله
عبدالله: سم...
عمر: وياك عمر القبيسي
عبدالله : حيالله عمر ... اشحالك وشو علومك؟
عمر: بخير ربي يعافيك...العلوم من صوبك
عبدالله: والله ما من علوم
عمر: وشو الدنيا معاك؟
عبدالله: والله ماشي شغله... الدوام و ميلس الربع..
عمر: هيه... انزين عبدالله بعدك اداوم في وزارة التربيه
عبدالله: هيه والله
عمر: انزين بغيتك في سالفه
عبدالله: سم...



تصور .. ما رضت عين الرضا بعد الجفا تبكيك..
تخاف الدمع يغسل صورتك و تغيب من عيني...
حبيبي لو رحل صوتك بعيش الحاضر بماضيك..
صدى الذكرى ولا واقع يفرق بينك و بيني..
و لو ضاع الرجا بك يا رجايه مالي إلا أرجيك..
تصور.. ما تصورها حياتي لو تخليني..
حبيبي لو تجاعيد الزمن غطت وجه مغليك..
أنا عندي يقين انك مثل ما اغليك تغليني..





سويسرا....

الصبح الساعه 8

ريم (في الحجره): حمدوووووووووووووووووووووو ه ؟؟؟؟
حمده ( وهي اطالع التلفزيون): شو؟
ريم: وين قميصي الوردي؟
حمده: مادري
ريم: منو اللي يدري عيل.. هب انتي اللي شليتيه عني ؟
حمده: هيه انا..
ريم: انزين وينه؟
حمده: مادري
ريم: ما عليه يا بنت عبدالله ... ان شليتي مره ثانيه شي من عندي يا ويلج...
ام عمر: ريم... ريمووووو و الصمخ... بسج بغيم
ريم: انزين
عذابه: يودي ... هذا هو القميص؟
ريم: هيه .. وين حصلتيه؟
عذابه: عند حمدوه.. تفضلي و بسج حشره
ريم: مره ثانيه مابغي حد يشل ثيابي انزين... وخااااااااااااااصه بعض الناس ( وكانت تقصد حمده)
عذابه: وانتي اشحقه متلبسه... يدوه بتسير و يا امايه و ابويه المستشفى .. و ليش ترزين ويهج؟
ريم: كيفي ... ابا اطالع مستشفياتهم هني
عذابه: ماعندج سالفه
ريم: ادري ماقلتي شي يديد... انزين ابغي اتلبس
عذابه: ويعني؟
ريم: اظهري

ظهرت عنها عذابه و يلست عند حمده و خلود في الصاله

عذابه: غيري القناه... ماشي فلم حلو انطالعه؟
حمده: لا
عذابه: انزين غيري القناه
حمده: قلتلج مافي شي اطالعينه غير هذا
عذابه: اعوذ بالله .. بلاكن معصبات من صباح الله خير
خلود: عذوب ... سكتي عنها
عذابه ( وهي تصاصر خلود) : بلاها؟
خلود: حبيب القلب ماتصل من يومين
عذابه: اونه.. وليش ما اتصلتبه..
خلود: اظن اتصلت بس مارد عليها
عذابه: اها..يمكن منها
حمده: نعم.. شو قلتي.. مل مني انا... محمد يمل مني انا... تتمصخرين حضرتج
خلود: بلاج معصبه...
حمده: ما تسمعينها شو تقولين
عذابه: انزين اسولف
حمده: محد يسولف جيه
عذابه: وانتي اشحقه معصبه.. لو انج واثقه من انه يحبج جان ماعصبتي
حمده: انا واثقه من هالشي..
خلود: يعني مايحتاي تعصبين عيل
حمده: بسير ارقد احسلي...


وفي نفس الوقت ظهرت ام عمر من حجرتها

ام عمر: ماوصيكن... مب تروحن مكان
خلود: ان شاء الله
ام عمر: انزين عذوبه.. طاعي يدتج جانها اتجهزت و لا لا
عذابه: اوكيك..
ابو عمر: ها ... جاهزات
ام عمر: هيه...
ريم: يالله ..
ام عمر: وين تبين؟
ريم: وين بعد... بسير وياكم
ام عمر: نحن سايرين المستشفى
ريم: ادري
ام عمر: وليش بعد تبين تظهرين.. يلسي مع خواتج هني
ريم: شو فيها لو سرت معاكم...
ام عمر: لا تسيرين .. قري هني
ريم: بس
ابو عمر: خليها يا ام عمر...
ريم: يعني اسير 
ابو عمر: هيه....

وظهر ابو عمر و حرمته و اليده و الريم.. ومعاهم فضل ( المرشد السياحي) ..



((((ألا يا وقت وين اللي على بالي يجي و يروح
هذاك اللي ملك قلبي و تفكيري و وجداني ))))
العين....
المغرب..

عيسى: زين يوم انك رديت تلفونك
محمد: عيل اخليه مقطوع... جان ما تذبحني الحرمه
عيسى: انت السبب.. كل ساعه تتصلبها... حشا اللي يشوفك يقول عمرك ما بترد تجابلها عقب
محمد: شو نسوي بالقلب
عيسى: يا ويل حالي على قلبك.. يوم انك تحبها جيه اشعنه ترمس غيرها
محمد: ....
عيسى: بلاك سكت... ولا ماعندك شي تقوله
محمد: شو تباني اقول؟
عيسى: اللي يشوفك مايقول هذا اللي كان بيموت عشان قلبه
محمد: تدري اني احبها و بتم احبها.. وبعدين انا اثبت اني احبها يوم سرت و خطبتها.. و الحين تشوف روحك... لو ماحبها جان ماستوت حرمتيه
عيسى: عيل ليش ترمس غيرها؟
محمد: يعني اذا رمست وحده ثانيه احبها.. هذيله الا حق سوالف و مضيعة وقت
عيسى: مضيعة وقت؟
محمد: هيه
عيسى: والله ما عرفنالك
محمد: ما عليك انت.... المهم خمس دقايق و برجع
عيسى: وين؟
بس محمد مارد عليه و ظهر من الكوفي شوب عسب يرمس حمده...
محمد رد لحياته الاوليه مع تغير بسيط و هو زواجه من حمده... يمكن عقب ما سافرت حمده رد لطبيعته و حياته القبليه.. صح انه يرمس غيرها بس هو حاط في باله انه علاقته مع هالبنات ماتجاوز السوالف و على قولته مضيعة وقت...


((((أموت بطيفه اللي لا لمحته ينتشي و يروح
أحس أني إذا شفته كأني بعالم ثاني ))))

محمد: مرحبا الساااااع
خلود: يا مرحبا بك... منو؟
محمد: محمد الرميثي
خلود: هلا والله... اشحالك محمد.. ربك الا بخير
محمد: بخير و سهاله.. خلود؟
خلود: هيه نعم خلود...
محمد: حيالله خلود
خلود: الله يحييك ... لحظه بزقرلك حمده


خلود: حمدووه... تلفون
حمده: ماتشوفوني راقده
عذابه: غريبه راقده و ترد علينا
حمده: مالج خص..
عذابه: ههههههههههههه
خلود: حمدوه هذا محمد...

وفجاه نقزت حمده من عالشبريه و ربعت عند التلفون

حمده: منو؟
خلود: بسم الله... اللهم سكنهم في مساكنهم
حمده: وياويهج... منو ؟
خلود: محمد
حمده: قولي والله؟
خلود: والله
حمده استانست يوم عرفت انه محمد اللي متصل...

عذابه: انزين ردي عليه
حمده: ها
خلود: شو ها.... ردي عليه
حمده: لا والله... واشحقه ارد عليه؟
خلود: تستعبطين... هب جنج ماطه بوزج من يومين لانج مارمستيه
حمده: كيفي
عذابه: حمدوه.. يوزي عن هالحركات و ردي عليه
حمده: ارد عليه
عذابه + خلود: هيه
حمده: اذا جيه... خلاص مابرد عليه... ولو سمحتوا.. اذا رد يتصل عقب قولوا اني راقده .. محد.. ظهرت .. اوكي... ( عقبها دخلت الحجره و حطت راسها عالمخده و رقدت)

خلود: خبله هاي
عذابه: توج تدرين
خلود: اوه.. نسيناه عالخط..

خلود: الو
محمد: فديت هالصوت... الله لا يحرمني منه
خلود ( وهي مستحيه): هلا محمد
محمد ( هو مستغرب): منو
خلود: خلود.. اسمحلي عاد.. حمدوه راقده و لين الحين مانشت
محمد: مسموحه الغاليه.. المهم خبريها اني اتصلت
خلود: ان شاء الله
محمد: و سلمي على هلج
خلود: ان شاء الله
محمد: يالله فأمان الله
خلود: الله يحفظك


دبي...
بيت عبدالله القبيسي...

فيصل: انت اقعد هني .. انا اغير ثيابي بسرعه و عقبها بنظهر رباعه
خليفة: ياخي تاخرنا... ماشي وقت
فيصل: ماعليك انت... اقعد و انت ساكت ( وجان يروح حجرته)

خليفة قعد في الصاله يتريا فيصل لين ما يخلص.. بس سمع صوت الباب و جان يشوف عمر

عمر ( وهو مستغرب): السلام عليكم
خليفة: عليك السلام و الرحمه
عمر: اشحالك خليفة؟
خليفة: بخير ربي يعافيك

العلاقه بين خليفة و عمر بعدها مثل ما هي بارده... هب جنهم عيال عم.. اللي يشوفهم مايقول انهم اهل بسبة العلاقه الجافه بينهم...

عمر: اشوفك يالس هني
خليفة: هيه اتريا فيصل
عمر: اها...
خليفة: اشحالك انت؟
عمر: ها.. بخير بخير
خليفة: ماشوفك تي المكتب
عمر: مشغول هالايام ( قبل ما يروح حجرته رد يرمس خليفة)

عمر: اشحالهم هلك؟
خليفة: بخير
عمر: بعدها تسوق؟
خليفة ( استغرب من هالسؤال و هو يدري انه عمر يقصد الهنوف): هيه ..
عمر: يا خي مادري اشقايل انت راضي تيب الرمسه حق عمرك و حقنا
خليفة: أي رمسه.. شو تقول انت؟
عمر: يعني ماتدري
خليفة: شو ؟
عمر: ما تم حد ما رمس عم ختك
خليفة: شو تقصد؟
عمر: هاده عيالها و دومها هايته بسيارتها ويا ربيعاتها.. والله يعلم ترابع منو
خليفة: اظنك تعرف الهنوف عدل... وهاي اختي و انا واثق منها
عمر: تم على الحاله... وخل العرب ترمس عنك و عنا ..
خليفة: السواقه هب عيب
عمر: من قالك... بذمتك يوم تشوف وحده تسوق و فاله الشعر و الشيله على جتفها .. و معليه على الاغاني ولا فوق هذا كله ضحكتها هي و ربيعاتها اعلى عن صوت المسجل ... شو بتقول
خليفة: تتحرى الهنوف شرات اللي تعرفهن
عمر ( وهو معصب): ومن قالك اني اتعرف على هالاشكال
خليفة: خلاص عيل... وانا واثق من ختيه و اعرفها عدل... و بعدين ماظن هالشي يعنيلك
عمر: ادري مالي خص.. المشكله يوم الرمسه ماتوصلك انت بس..توصلنا احنا و اتمس بسمعتنا..

جان يروح عن خليفه ....

تم خليفة يفكر في رمسة عمر.... و عصب وايد من اسلوبه الخايس

فيصل: يالله...
خليفة: ...
فيصل: بلاك؟
خليفة: لا ماشي ...
فيصل: قم عيل..
خليفة: انا برد البيت
فيصل: ليش عاد
خليفة: مالي بارظ اروح مكان
فيصل: شو تقول انت... عنبوك توني هادنك ما كملت عشر دقايق .. وارد اشوفك مغير رايك...
خليفة....
فيصل: قم لا .. شو بتسوي في البيت...

وظهر فيصل مع خليفه اللي كان طول الوقت يفكر في رمسة عمر...


بيت خليفة القبيسي

الهنوف ( ترمس ربيعتها ميثه): والله ماعرف شو السالفه
ميثه: انزين جان سالتي نوره تراها المسوؤله و اكيد بتخبرج
الهنوف: باجر بسالها
ميثه: يعني هب مني و الدرب المدير بيعصب عليج
الهنوف: انا مستغربه من هالشي...دومه يمدح شغلي بس مادري بلاه هاليومين عليه
ميثه: انتي رمسي نوره و اكيد بتخبرج السالفه
الهنوف: ان شاء الله... المهم ماطول عليج
ميثه : خلاص عيل... مع السلامه...

ام خليفه: شو السالفه؟
الهنوف: المدير في الشغل.. هاليومين دومه يتحرطم عليه
ام خليفة: ويديه انا... و اشحقه يتحرطم؟
الهنوف: مادريبه... اللي مستغربه منه ان ما يعصب الا عليه انا... مع انه كان شغلي يعبيه و دومه يمدحني
ام خليفة: ما عليج منه..
الهنوف: اخاف يستوي شي و اهد الشغل..وانا الصراحه وايد مرتاحه هناك و خاصه انه اللي اشتغل معاهن معظمهن حريم

وجان يدخل عليهم خليفة

ام خليفة: ها .. اخوج وصل... رمسيه يمكن يسويلج شي
خليفة: شو السالفه؟
ام خليفة: الهنوف متلعوزه شويه في شغلها
خليفة: عيل هدي الشغل
الهنوف ( وهي مستغربه): وليش اهد الشغل
خليفة: يوم انج هب مرتاحه ليش تشتغلين... و بعدين انا ماشوف شي ناقصنج... و ماظن الشغل له حايه..
الهنوف : ادري ما في شي ناقصني... بس الشغل احسن من اني اضيع وقتي في البيت
خليفة: والله عيالج اولى ... و اذا انتي تشوفين ان قعدة البيت و تربية عيالج مضيعة للوقت هذا شي ثاني

الهنوف وام خليفه مستغربين من رمسة خليفة

ام خليفة: عيالها هب ناقصنهم شي... امهم موجوده و انا بعد..
خليفة: بس هاي امهم و المفروض تجابلهم
الهنوف: ومن قالك اني هامله عيالي؟
خليفة: عيل طلعاتج و يا ربيعاتج ما تاثر في عيالج
الهنوف: خليفة شي فيك...
خليفة: لا مافي شي.. بس انا اقول لو تودرين السواقه و الشغل ابركلج...( وجان يروح عنهم)


في حجرة خليفة...

ام خليفة: بترقد؟
خليفة : هيه
ام خليفة : بتخبرك .. بلاك محتشر على ختك؟
خليفة: حالتها هاي ماتعبني
ام خليفة: شو شايف عليها؟
خليفة: ماشفت شي.. بس ماظن انه الشغل له حايه...
ام خليفة: بس احيدك كنت راضي... شو اللي غيرك؟
خليفة: رمسة الناس
ام خليفة: ويديه انا... واشعنه الناس ترمس عنها... البنيه ماغلطت بشي... و بعدين الشغل لا هو بعيب و لا حرام
خليفة: ادري.. بس
ام خليفة: بس شو ؟؟؟.. خليفة شي في خاطرك؟
خليفة: .......
ام خليفة: انزين وانت من قالك ان الناس ترمس عنها
خليفة: محد قالي ..روحي سمعت و بعدين يا اميه انتي المفروض تنصحينها .. المفروض انها تجابل عيالها بداله الهوامه ويا ربيعاتها اللي ما يابن غير الفضيحه
ام خليفة: أي فضيحه بعد... انت تعرف عن منو ترمس ... هاي الهنوف يا خليفه... وانت تدريبها عدل..
خليفة: والله ماعرف شو اقولج... انا واثق من ختيه عدل... من يا اميه شو بتقولين عن الناس اللي ماتعرفها.. ما بتلومينهم لانهم مايعرفون بنتج عدل..
ام خليفة: اذا كلام الناس يهمك اكثر عن مصلحة اختك ... سو اللي تباه
خليفة: هيه نعم يهمني ...دامهم يرمسون عني و عن هليه اكيد تهمني رمستهم.. وبعدين هذا هو عمر... اقرب الناس لي تم يعايرني ... عيل مالوم غيره ..
ام خليفة: انا حاسه ان السالفه فيها عمر... و بعدين عمر هذا وشله في ختك
خليفة: ماله خص... بس الرمسه وصلته
ام خليفه: يوم انه طلقها خلاص ماله حق عليها... و بعدين محد بيعايره.. الا هي طليقته يوم بتم حرمته هذا شي ثاني...
خليفة: انزين قوليلها تودر السواقه
ام خليفة: انا مالي خص... ختك عوده و تعرف مصلحتها عدل... انا برمسها اذا شفت الغلط عليها... و شل هالرمسه الخايسه من عقلك.. وقبل ماترمس عن ختك... طالع هي بنت منو و من هلها.. و عقب بتعرف جانها بتروم تغلط بشي .. وعمر هذا قوله لا يدخل بشي... ماله شور عليها و لا علينا . عنبوه لا يباها تتهنى و لا تجابل حياته.. هذا ها ما خل بنيه ما رمسها... ماقلته عيب اللي تسويه و ياي تحاكم ختك... ((( وظهرت عنه و هي معصبه)))

خليفة قعد يفكر في رمسة امه... وعرف انه اللي تقوله صح... الهنوف ما غلطت بشي... و هو ماسمع عليها شي الا من عمر... بس ما ينلام... اخته و يخاف عليها و على سمعتها... وتم يفكر لين وصل لعذابه...
(((( اااااخ يا دنيا شقايل تحاول تفرقنا... كل شي حولنا يفرقنا يا عذابه.. بس اتمنى شي واحد.. اتمنى لو شو يصير بينا ما نفترق.. ))))





ان شاء الله يعيبنكم الجزئيـــن

و السموحة ،، سويــــرة
</font></strong>
</p></font>