أموت أنا في حبهم

الجزء الـــ 19







سعيد : السلام عليكم ورحمة الله وبركاته

جابر وعوشه : وعليكم السلام والرحمه حيالله من يانا

سعيد يتجدم يبوسها على راسها : الله يحييج ويبقيج ويتجدم من جابر "الجد" ويتوايه وياه

سيف بخطوات متردده يلحق أخوه ويدخل : السلام عليكم

عوشه منحرجه ومفتشله منه : هلا يا أبوي اشحالك شو أخبارك ؟؟؟ أشحال أهلك عساهم بخير وعافيه

سيف: بخير يعلج الخير ،، أشحالك يدي عساك بخير وعافيه

جابر: الله يسلمك ياوليدي ,,,

سعيد يتطالع عوشه بنظره ذات مغزى : خالتي أم ميثا

عوشه : آمر

سعيد : ما يآمر عليج ظالم ،،، طلبتج قولي تم

عوشه : تم يا ولدي لك عيوني لو تطلبها

سعيد: الله يخليج ويطول بعمرج طلبي يالغاليه بسيط وما بكلف عليج بشيء ،، بس بغيت استرخص لشهد وسيف أنهم ييلسون ويا بعض ويتفاهمون

جابر : يتفاهمون على الشو ؟؟؟ البنت قالت جوابها لعمها

سيف يتطالع سعيد ومب مصدق جرأته والطلب الغريب اللي قاعد يطلبه

عوشه : يا سعيد يا بويه ما نبا مشاكل البنت قالت مب مواقفه ما نقدر نغصبها

سعيد : الله يهداكم ليش مكبرين السالفه أنتوا سمعوني خلوني أكمل كلامي للآخر ،، أنا بس اللي أبيه أنا نجمع شهد وسيف بمكان واحد وكل واحد فيهم يقول اللي عنده خالتي أم ميثا أنتي أكثر وحده عارفه الظروف اللي مرت خلال الوقت اللي طلب سيف أيد شهد فيها ,, وكرد فعل طبيعي البنت من دون ما أتفكر بترفض مستحيل وحده تتطمن وأتوافق بهالسرعه ,,,

عوشه : والله ما أعرف شو أقولك

سعيد : خالتي لا تفهميني غلط يدي جابر بيكون موجود وياهم ويقدرون ياخذون راحتهم وياه وبعدين سيف ولد عمها ومستحيل يضرها بشي ،،، " يتطالع سيف اللي شكله مصدوم " صح يا سيف ؟؟!!

سيف : ها ؟؟ هي صح

جابر : أشوف راعي الشأن ساكت ولاهي بدنياه روحه ..

سيف : لا يدي مب جذه بس

جابر : لا أتبسبس لي الحين

فهاللحظه تدخل مهره يايبه صينية الفواله والجاهي ,,,

مهره : السلام عليكم أشحالك سعيد ؟؟ سيف شو أخبارك عساك بخير ؟؟؟

سعيد : وعليكم السلام والرحمه ،، بخير الله يسلمج أشحالج أنتي عساج مرتاحه

سيف : هلا وعليج السلام ،، يسرج حالي ,, ومن صوبج

مهره : بخير الله يسلمكم ويعافيكم ,,

جابر : مهره يا بنيتي نادي أختج شهد خليها أتي أتسلم على عيال عمها

مهره: ان شاء الله

عوشه : قربوا يا عيال ...

سعيد وسيف: ما أتقصرين خالتي ,,,



في غرفة شهد

مهره : شهود يلا نشي بسرعه

شهد: لا حشا علي ما سرت .. شو قالولج خبله ؟؟؟ لا مب يايه والله

مهره : شهد لا تحلفين استغفري ربج ونشي لبسي شيلتج ولحقيني بسرعه يلا

شهد : مهروه افهميني كيف تبني أروح أسلم عليه وأنا رافضتنه

مهره : شوفي عاد لا هو أول واحد ينرفض ولا آخر واحد والزواج قسمة ونصيب خليج طبيعيه سلمي وأطلعي بس بعد شو تبين ؟؟

شهد: ما أدري أحس ما بقدر أحط عيني بعينه

مهره : أنتي تخبلتي والا شو سالفتج شو تبين منه سلمي وطلعي ليش تحطين عينج بعينه ؟؟؟ أنتي مب صاحيه

شهد: لا مهره ما أٌقدر قوليلهم راقده ماتت أي شي بس ما بروح

مهره : شهود تصرفاتج غريبه ليش هالكثر أتحاتين ؟؟؟ مافيها شي يلا نشي نشفتي ريجي الله يسامحج

شهد: مهروه أففف ما أقدر ....

عوشه قربت الفواله للشباب وخلتهم يتفولون على راحتهم ويت تستعيل شهد واتشوفها ليش تأخرت

عوشه تدخل غرفة شهد : مهره يا أميه قلت لج زقري أختج بسرعه وينها ؟؟؟

مهره : والله يا أميه تعاييت وياها من متى أحن عليها عشان تطلع مب طايعه

عوشه تتطالع شهد بنص عين : خير شو عندج أشعنه ما تسمعين الرمسه ؟؟؟

شهد : أمايه ما ابي

عوشه : سمعي يا بنت ناصر هي كلمة وحده وما بعيدها نشي لبسي وسيري أتطالعي ولد عمج شو يبا وخلي هالليله أتعدي على خير ,,,

شهد : ان شاء الله الحين بيي ببدل

عوشه : بعد فيها بتبدلين ياربي هالبينه اللي بتذبحني ...

شهد: أنزين ثواني بس

عوشه : الحين بطلع وان ما لحقتيني ياويلج يا بنت ناصر



بعد ماطلعت ,, مهره أستعيلت شهد ولبست وطلعت وياها للصاله ,,,



في الصاله ,,



سعيد يرد الفنيان ويرمس سيف : شوف هاي فرصتك الأخيره اذا أنت صدق تباها قول اللي في خاطرك وبليييز أبيك أتحط أعصابك بالثلاجه عشان ما تستوي مآسي فاهم

سيف: يا ريال أنت وهقتنا الصراحه ,,

سعيد : صدق اللي قالي الكلام سهل والفعل صعب عيل وين الرمسه اللي من الصبح ماكل فادي بها

سيف : ههه والله ما كنت أدري أنك رهيب جذه والله ماسويت أعتبار لحد والي في راسك سويته

سعيد : شوف عاد أنا ما سويت شي غلط وهالشي ما بيضر حد لا هي ولا أنت بالعكس ممكن يكون في صالحكم وأكون أنا جامع راسين في الحلال ...

سيف: صدقك والله .. بس تدري " في هالوقت دخلت شهد ويا أمها وسلمت ...



جابر يوجه كلامه لسيف : أعتبروني مب موجود وخذوا راحتكم بس المهم في الأخير تطلعون بنتيجه

سعيد : بترياك في الموتر لاتتحير

سيف : ان شاء الله ,,,



جابر وألتهى بالمباراه اللي كان يتابعها ,, وترك المجال لشهد وسيف عشان يتخذون قرارهم ويتفاهمون



شهد حاسه بخوف ومب عارفه شو اللي يبغيه منها سيف ... معقوله يبي يسمعني كلمتين جارحات ويخليني اندم على أني رفضته ؟؟؟!!! بس غريبه والله وايد هادي مب من عوايده أحيده يهاجم على طول ما عنده تفاهم ,, يعجبني شكله يوم يسوي قفل أصلاً هو من بونه حليو بس القفل يحليه أكثر ،، وشكله ضعفان ,, قبل وايد أحلى جسمه ،، أففف أستغفر الله أنا شو أقول حسبي الله على ابليسه ليش ساكت سكوته يوترني أكثر,,,



سيف حاس بصراع في داخله يتأملها كأنه يشوفها للمره الأولى ،، والله أني كنت غبي يوم ما قدرت اكسب قلبج يا شهد ما أدري كيف مب قادر أتخيل أتزوج وحده غيرها ,,, أنا ما أحبها حب بس ما أبيها تكون لغيري !!! ما أعرف أنا شو ابي منها كل اللي أعرفه لازم أقنعها

أستجمع قوته و: شهد

شهد أنتبهت له أخيراً نطق ورحمها من الاحراج : هلا

سيف : شهد أنا ماأبيج تاخذين فكره غلط عني ولا أتظنين أني يوم هددتج ذاك اليوم كنت أقصد الكلام اللي قلته ،، الله الشاهد أني ما كنت قاصد واللي قلته كان بلحظة غضب لا أكثر ، أنتي بنت عمي ومستحيل أضرج بشي وحتى لو فكرت مجرد التفكير فيوم أني أضايقج بشي صدقيني أبوي قبل أي حد ثاني بيكون أول من ياخذلج حقج مني وزود , أنا مب ياي اأغير رايج أو أقنعج تقبلين فيني لا الزواج قسمه ونصيب واذا الله رايد أنه نكون لبعض مافي شي يغير هالاراده بس أنا بغيت أقولج أني يوم طلبتج بغيتج من خاطري مب عشان أنفذ تهديداتي ، أبيج أتكونين زوجتي على سنة الله ورسوله وأوعدج اذا تزوجنا ما أتبع أسلوب التهديد وياج أبد أصلا مستحيل أزعلج لو بكلمه ,,, الحين اذا عندج سؤال بجاوبج عليه بكل صراحه ,,,



شهد متردده ,, أسأله ؟؟ أميي والله أتروع مافيني يزغدني ويدي حليله مابيده حيله وين يقدر عليه ,, أففف شو هالحاله ما أدري ,

سيف : أشفيج ساكته ...؟؟؟

شهد بخوف : ها ماشي لا مافيني شي

سيف بحينه : شهد ليش تتعاملين ويايه كأنج تتعاملين ويا مجرم ؟؟والا ارهابي ؟؟؟

شهد ابتسمت على التعليق العبيط " الله أكبر منك جانك مب ارهابي كل هالخوف والروع اللي فيني الا من جابلتك ياربي شو أسوي بعمري " : محشوم يا ولد عمي

سيف: ليش أحس أنه وايد أشياء فـ خاطرج ومب طايعه ترمسين ؟؟؟!!!!

شهد: أول أحلف أنك ما أتعصب

سيف : هههه لهالدرجه أتخافين مني ؟؟؟

شهد بنظره تحدي : أنا ما أخاف الا من اللي خلقني

سيف: أنزين ليش معصبه ؟؟

شهد : لأنك أنت هادي وهذي مب طبيعتك يعني أنت ماسك أعصابك بالغصب والا أنت فخاطرك أتنش وتزغدني عشان أموت وأترد أعتبارك

جابر : ول عليج يا بنت ناصر حشا كلتي الريال بقشوره عنبو حد يرمس جذه؟؟؟؟

سيف: خلها يا يدي اذا هي ماخذه عني هالفكره مستحيل نتفق فيوم والحمدلله بعدنا على البر وماصار الا كل خير ,, السموحه منك ... نش صوب الباب .. مع السلامه

شهد مصدومه من رد فعله هو في حالته الطبيعيه كان ممكن يرقعها بكف على هالرمسه معقوله أتكون ردة فعله بكل هالبرود والجمود ؟؟؟!!!! مستحيل هذا أكيد مب صاحي بلحق عليه قبل لا يطلع .. نشت ولحقته على باب الصاله

شهد: سيف

سيف ألتفت لها وهو زام عشفايفه : خير الشيخه شهد شي ناقص ما قلتيه ؟؟؟ شو تم فخاطرج وما قدرتي أتخليني أروح من دون لاأسمعه ؟؟؟

شهد : أنا آسفه ما كان قصدي بس أنت السبب

سيف: نعم نعم ؟؟؟!!! أنا السبب ؟؟ وأنا شو سويتبج عشان اكون السبب ؟؟؟

شهد: سيف أنت اللي من عرفتك كله أتفاتن عليه وتتناقر ويايه بعمري ما شفتك وما عقيت عليه رمسه اتسم البدن انت من عرفتك مفهمني أني متمرده وعنيده ويبالي كسر راس ، كلامك أسلوبك في التعامل ويايه كله يدل على كرهك لي كيف تبيني أوافق وأنا أعرف كرهك لي ؟؟؟ أي حياه زوجيه سعيده ممكن أنعيشها ونحن كارهين بعض ؟؟؟ ما أتقولي كيف تبيني أبني حياتي وأساس البنا الحقد والكراهيه؟؟ والا تبينا أنصير مثل ميثا وخليفه كارهين بعض بس متحملين بعض عشان عيالهم ؟؟؟

سيف فاتح عيونه على وسعهن : أنتي تكرهيني ؟؟؟

شهد : لا

سيف : ولا أنا أكرهج

شهد : .......

سيف: سمعيني يا شهد اذا أنتي أعتبرتي تصرفاتي وسلوكي تجاهج دليل كراهيه أو عدوان فاسمحيلي أنت ما أتعرفين تحكمين على حد أو أتحللين شخصيته ,, أنا ما أنكر أني بينت لج هالشي بس أنتي المفروض تفهمين أني من حبي لج أتصرف وياج بالهطريقه ما كنت متأكد من مشاعري تجاهجج عشان جي ما كنت أعاملج عدل ما بغيتج تتعلقين فيني وبعدها أجرح شعورج أنا اللي سويته كان عشان أحميج من نفسي أنتي يا شهد لج مكانه عزيزه على قلبي وغاليه حيل ما أوعدج أتكون حياتنا خاليه من المشاكل بس الحياه الزوجيه أذا كان أساسها صح تنبى صح اذا واجهتنا مشاكل بنتساعد وبنحلها مع بعض الحياه الزوجيه مشاركه فعليه بين الزوجين مب كلام اذا انا أكد وأشتغل برع البيت أنتي دورج ما نقد رنستهين فيه عليج تربيه العيال ومتابعة شؤون البيت ...



شهد : سيف أنت فاجأتني

سيف: بشو ؟؟؟ قلت شي غلط ؟؟؟

شهد : لا بس الي يسمعك أتقول هالكلام مستحيل يصدق أنك أنته نفسه سيف اللي توعدني وهددني بيوم أنه يذلني ويخليني أكره عيشتي ... سيف أنا آسفه سامحني اذا خذت عنك فكره غلط ,,

سيف" لا مادام قالت هالكلام أكيد بتوافق وبتعيد النظر في موضوع خطبتي لها .. بس ياترى أنا بكون مرتاح لو هي غيرت رايها ؟؟؟ دام هي من البدايه رفضتني أكيد هي ما تباني وأخاف أني أثرت عليها بكلامي الي روحي ما أدري من وين يبته او كيف رتبته !!! الحين شو الحل يعني ؟؟!!!

شهد : سيف أشفيك |؟؟؟

سيف: ها لا ماشي ... خلاص شهد اسمحيلي بترخص الحين تحيرت على سعيد

شهد: سلم على عمي وعمتي

سيف: ان شاء الله ..يبلغ .... مم

شهد: خير سيف شي في خاطرك

سيف: سلامتج شهد انسي الموضوع اللي كلمتج فيه

شهد : شو

سيف: اللي سمعتيه وانا ما ييت اليوم الا عشان

شهد اتقاطعه وبعصبيه : عشان شو ؟؟؟ تكلم أنطق ... والا أقولك أنا اللي بقول عشان شو عشان يا محترم أتخليني أغير رايي

لكن علمن يوصلك ويتعداك أنا مستحيل أغير رايي فيك أنت متسحيل تتغير والتمثيليه اللي سويتها من أشوي تستحق عليها جائزة الأوسكار ...." دخلت وسكرت باب الصاله في ويهه الشي اللي خلا سيف يحترق من داخله ووده لو يمسكها من شعرها ويمسح به الأرض بسيطه يا شهد أنا سيف اتسكرين الباب فويهي ؟؟؟!! وأتقولين أني أمثل!!!





..............





وفا: يلا بسكن ما تشبعن شو ؟؟؟

وعد : يالحسوده أنتي من يومج تصرطين بسرعه خلينا ناكل على راحتنا

هند: مممم الصراحه هالايس كريم يجنن

موزه: هي بلعي منه الحين وبعدين باغمي علينا أسناني أتعورني

هند: جب مايخصج

وعد: أصلا نحنا الغلطانين وما عندنا سالفه ناخذ هلاشكال ويانا

وفا : وأنتي الصادقه هاييل ويهم ويه يلسه على الحصير واكل خبز وجبن وأستكانه جاهي حمر

هند: ههه أونج أتنكتين ؟؟؟

وفا بشهقه : ياويلي وعد عطيني تلفونج بسرعه

وعد مرتبكه : ها شو ما عندي

وفا اتعقد حياتها : ما عندج ؟؟؟ شو هالبخل قولي ما بعطيج مواز هاتي تلفونج تراني مودره الشنطه في السياره وأنتي يا مدام وعد ترا تلفونج على الطاوله جدامج

وعد أتحاول تتدارك الموضوع : لا والله مب قصدي تلفوني مفضي بس عشان جي قلت ما عندي بالغلط ..