خليفه : سالم

سالم وقف مكانه ورد عند أبوه : .....

خليفه : مره ثانيه يوم أكلمك اتريا لين اخلص كل اللي عندي فاهم ..

سالم : آسف ما كان قصدي

خليفه : شو عندك ليش معصب وين ساير ؟؟؟؟

سالم: سلامتك بس بتمشى في الحوي اشوي

خليفه : بيي وياك

سالم : حياك

سهيل : وأنا ؟؟

خليفه : انت خلك عند خواتك اشوي وبزقركم بنطلع كلنا أوكي

سهيل : ان شاء الله



في الحديقه ,,

خليفه : شو فيك ؟؟؟

سالم : مافيني شي

خليفه: سالم أنا مب أصغر عيالك تجذب علي سألتك سؤال وأبي جوابه

سالم: شو تبيني أقول لو تكلمت بطلع قليل أدب فنظرك

خليفه : سالم عدني ربيعك هب أبوك وقول اللي فخاطرك وأوعدك أني ما أقول شي لين أتخلص

سالم: أبويه أنا حاس بضيجه فضيعه والسبب أمي ما أحس انها أم مثل باقي الأمهات يعني ماأنحس حنانها و لا بوجودها وكله اتحاول اتعلمنا الغلط ,, أتحاول تبعدنا عن عمامي ويدوه ويدي تزرع السم في أبدانا ولا فيوم سمعنا منها كلمه حلوه فحقنا ولا فحق غيرنا .. أتصدق أحب أم متعب أكثر منها يوم أروح بيتهم تهتم فيني وطول الوقت تسألني اذا محتاي شي والا ليش ضايج أحسبها قريبه مني وايد واذا ما شفتها يوم أحس بفراغ وأني مضيع شي ما أرتاح الا لو شفتها ويلست عندها وسولفت لها ... فعمري ما ندمت على يلستي وياها حتى متعب صار يغار مني يقولي سرقت أمي مني ... أبوي كيف تبيني كون مستانس وأنا أشوف غيري متهني بأمه وأنا لا ؟؟!!! صالح دوم يقولي أنت مب حاس بالنعمه اللي عندك أسألني أنا اللي ماتت أمي وأنا صغير ولا شفتها ولاأعرف حنان الأم من صرت ... أقوله أنا مثلك يا صالح الفرق الوحيد أنه أمك أجبرت تبتعد عنك لأنه شي خارج عن ارادتها أما أنا فبإرادتها .. أبوي أبي أحس أنه عندي أم أتخاف علي وأتحن أبي أحس أنه في حد يحاتيني لو تأخرت أبي حد يشيل همي أبي أطلع عن الشباب مستعيل أقولهم أمي تترياني ما بييها رقاد لين أوصل البيت أبي يا أبوي أمي تكون كل شي فحياتي ما أبي ألجأ لغيرها مهما كانت الأسباب .. أبوي أنا " هني خانته العبره وخلاص شجاعته وقوته ما أسعفته وبدى يصيح مثل الياهل الشارد الضايع الخايف من الزمن واللي حول "

خليفه تمنى تنشق الأرض وتبلعه ولا يشوف ولده بجره سنده في هالدنيا بهالضعف وهو ماله حيله كل اللي قدر عليه خذه بحضنه وخلاه يفرغ اللي فخاطره ,,,

شو أرد عليه ؟؟ ألومه ؟؟ مالي حق وليش ألومه وهو ما غلط بشي ؟؟؟ ميثا وينج يا ميثا تسمعين ولدج اللي تعبتي عليه تسع شهور فبطنج تحملتي آلام الولاده عشانه سهرتي على راحته الليل وفي الأخير ما عاد يعنيج وجوده ليش يا ميثا بعتينا برخص التراب وليش ؟؟؟ لأجل فلوس وسخ دنيا ؟؟؟

ياربي أتساعدني أعوض عيالي عن أمهم وأتسامحني اذا أخطيت بحقهم ..

وفي الوقت الغير مناسب ظهر الشخص الغير مناسب

ميثا وهي تتجدم صوب خليفه وسالم وأتشوف المنظر "سالم فحضن أبوه وخليفه يمسح دموعه" : ههههه شو هالفلم الهندي اللي عندكم ... عنبو يا سالم ريال شنبك عويهك وهاي علومك شو خليت لغيث يوم انت بتصيح فحضن أبوك ؟؟؟

خليفه التفت لها والود وده يذبحها : ميثا كملي دربج وخلينا فحالنا

ميثا : باسم الله شو فيها عينك محمره ؟؟!! ليكون حد ميت لكم ؟؟؟

خليفه يبعد راس سالم عن صدره ويحاول ينش لها بس مسكه سالم بترجي ... : عشانك بس يا سالم والا انا ناوي ارتكب جريمه اليوم النار اللي شابه في فادي مايطفيها شي غير دم هالمخلوقه المتجرده من الانسانيه

ميثا مصدومه : ليش اتقول عني هالكلام جدام ولدك؟؟؟

خليفه: زين يوم عرفتي أنه ولدي أنا ومن اليوم مالج دخل بعيالي ولا لج كلمه عليهم أنتي عيب يقولون لج أمي

ميثا وبدت الدموع تتجمع فعيونها: خليفه شو فيك علي ؟؟؟ كيف تبري عيالي مني ؟؟؟

خليفه : ميثا هاي البدايه شوفي اللي بيصير فيج اذا قربتي من واحد فيهم والله لا اتلومين غير نفسج انتي أمهم بالاسم وخليج مثل ما أنتي ميثا أنا صبرت عليج ثمنتعش سنه بس بعد اليوم ما بسكت خلاص يا ميثا كان زمان اللي أسكت فيه عنج من اليوم ماشي خدم في هالبيت ميثا خدمج كلهم اليوم بطردهم ولا بخلي لج واحد منهم ميثا انتي المسؤله عن هالبيت بكبره من اليوم بتنظفين وبتغسلين وبتشوفين طلبات عيالي واذا ما عيبج يا ميثا الباب يوسع جمل وبيت أهلج مب عيزانين عنج ..

ميثا الصدمه ألجمت لسانها ما تقدر تتكلم أو تعترض مستغربه من التغيير الي صاب خليفه ليش فجأه تغير وشو اللي خلاه يتبدل بهالطريقه ؟؟ شو اللي صار ؟؟؟ تلفتت حولها ما شافت غيرها ...

عيالي مستحيل يتخلون عني أنا أمهم و لا بيرضيهم اللي نواه خليفه .. لالا هو بس يهدد ما يقدر ينفذ الي قال عنه أصلاً ما يقدر بخليه يطلقني اذا اصر ... برجع لبيت أهلي شوفيها عندي رصيد في البنك يعيشني طول العمر مرتاحه ولا احتاج لحد ,,, بس بصير علج بحلوج الناس وخصه أم صقر عاد هاي ما بتصدق اني تطلقت الا واتوصل الخبر للأمارات بكبرها ... الله يستر بس ..

أووهوووو وأنا أشعلي منه خله يدق راسه بالطوفه بسير اتلبس عندي عزيمتين وعرس لازم احضرهم ,,



,,,,,,,,,,,



بيت بومحمد

عارف : شو صار له ألحين شو أخباره ؟؟ وينه ؟؟؟

محمد يمسكه عشان يرد ييلس : الحين هو بخير ومافيه شي أيلس بكلمك بعدين روح تطمن عليه

عارف : يعل أيدي الكسر ان شاء الله

محمد: لا يا عارف مب زين اتقول جذه وانت اللي سويته كان لمصلحته المهم الحين أنحاول أنعالجه وأبوي لازم ما يوصله الخبر أبد كفايه عليه اللي فيه

عارف : أوعدك يا محمد ما خليه يحس حتى ,,, خلاص أنا باخذه وبسافر وياه ألمانيا عندهم مصحه للمدمنين وايد اوكي خلصت كل الأجراءات وخذت له موعد يوم الخميس ويا الدكتور أول بيفحصه وبيخبرنا عن درجة ادمانه عشان يقدر يوصف له علاج وعلى اللي قاله يمكن ما يحتاي يتم هناك اذا كانت النسبه ضئيله ..

محمد يتطالعه بفخر :ما خيبت الضن يا عارف

عارف : شو اسوي يا محمد مالي غيركم أدري أني عصبي ومرات أتصرف غلط بس غصبن عني ..

محمد: أدري والله العالم ،، يلا نش الحين استسمح من أخوك وتطمن عليه



أول ما دخل الغرفه شافهم ملتمين حوله روضه أتشربه من الشوربه اللي مسوتنها وحمده تمسح ثمه ،هزاع يتطالعه بحنيه ,, محد لاحظ وجوده الا يوم وصل عند هزاع اللي تفاجأ ونش وقف بويهه عشان يمنعه يتقرب من حمد ,, روضه تجمدت أيدها وحمده تتطالعه بترجي

عارف تجدم من حمد وطبع بوسه على راسه : الحمدلله على سلامتك

الكل تنفس الصعداء وارتاح ،، لأنه عارف ما كان ناوي على شر يوم دخل مثل ما توقعوا وعلى طول أنفضوا من الغرفه لأنهم يدرون أنه عارف يبي يتأسف من أخوه ويتطمن عليه .. فعشان ياخذون راحتهم حمده ورضه طلعوا وبعده بدقايق لحقهم هزاع,,



عارف وهو يمسح على أيد حمد: أشحالك يا أخوي ؟؟؟

حمد مستحي من أخوه ومنحرج : بخير يعلك الخير

عارف : أنا آسف

حمد : لا تتأسف أنا المفروض اني أعتذر منك

عارف: حمد بسألك سؤال بس توعدني اتجاوبني بصراحه

حمد: اوعدك

عارف: من متى تتعاطى ؟؟؟

حمد: .........

عارف : أنت وعدتني

حمد: كنت أتعاطى بين فتره وفتره بس من اسبوعين انتضمت بشكل فضيع يعني لازم في اليوم اربع او خمس مرات ...

عارف : الحمدلله

حمد ونظرة الاستغراب على ويهه : !!!!!......؟؟؟؟

عارف : الحمدلله يا حمد لأنك ما صرت مدمن مدمن أقصد يعني ادمانك ممكن التعالج منه وبسهوله ...

حمد: والله ؟؟؟ يعني في أمل ؟؟

عارف : اذا الله راد أكيد في أمل ... كل اللي أبيه منك يا حمد أنك أتقوي إيمانك وتتحلى بإرادة قويه عشان تقدر تتجاوز هالمرحله .. أدري أنها بتكون صعبه عليك بس انا وياك يا حمد وكلنا بنوقف وياك وبإذن الله بتتخلص من هالسم

حمد ودموعه تنزل : سامحني يا أخوي سامحني ...

عارف يمسح دموعه : مسامحنك يا أخوي يا حبيبي مالي غيرك وانا آسف لأني مديت أيدي عليك

حمد: مشكور

عارف : لا شكر على واجب أصلاً أيدي كانت تاكلني من زمان

حمد: وطلعت أنا الضحيه

عارف :ههه فديت عمرك يلا بسك دلع قم نش خلنا نطلع نتمسى بنمر على عذيجه ولهنا على فهود الخسف

حمد: هههه تجرأ وقول هالرمسه جدامها والله لتذبحك ...

عارف : بسك عاد يلا نش وأنا بسير أقول للقبيله يتجهزون

حمد: أوكيك



طلع عارف وخبر أخوانه وخواته باللي قرره ويا حمد واستانسوا كلهم ونشوا يتزهبون ويتلبسون





بيت عذيجه

مبارك شال فهد ويتطالع عذيجه اللي مجابله التلفزون ومتجاهله وجوده على الآخر

مبارك يلاعب فهد: بابا حبيبي شو فيك ليش زعلان ؟؟ منو مزعلنك ؟؟؟ أنا ؟؟ خلاص انا آسف والله حبيبي آسف سامحني بليييييييييييييييييييز

فهد طبعاً مب فاهم شي يتطالع خبال أبوه ...

مبارك حط فهد على الغنفه المجابله عذيجه

عذيجه : شو ها ؟؟ بيطيح شله لو سمحت

مبارك : كيفي ولدي بحطه وين ما أبا عشان يطلع شجاع مثل أبوه

عذيجه: قصدك جبان مثل أبوه

مبارك عصب : عذيجه ثمني ألفاظج

عذيجه نشت بتروح غرفتها

مبارك: يا محترمه يوم أكلمج خليني أخلص رمستي وبعدين سوي اللي تبينه ... يعني عايبنج الحاله اللي نحن فيها عايشين فبيت واحد جنا أغراب أنا ما سويت شي عشان أتعامليني بهالطريقه قلت لج غلطه وما بتتكرر كل انسان يغلط وأنا مش ملاك والله يا عذيجه أنها مسويتلي عمل صدقيني واذا تبين أثبت لج ما عندي مانع والله الحين بثبت لج أنتي بس ردي علي حسسيني بوجودج حسسيني أنج ما تغيريتي علي وبعدج عذيجه حبيبتي اللي أحبها ...

عذيجه تتطالعه وأتقاوم الرغبه في أنها أتقوله مصدقتنك واحبك وأبيك بس أتكابر ما تبي أترد له بهاي السهوله عشان مره ثانيه قبل يفكر يخونها لو في أحلامه يفكر بليون مره ... عطته نظره ذباحيه ومشت عنه ... أول ما دخلت غرفتها شافت تلفونها يرن ... الغاليه يتصل بك

عذيجه بوله وشوق : هلا وغلا بالغاليه أشحالج شو أخبارج علومج شو مسويه عساج مرتاحه

الغاليه : هههه فديت هالصوت يا ربي يعلني ما خلا منه أنا بخير دامج بخير نورتو الفريج

عذيجه: فديت عمرج والله أني ميت وله عليج ،، طمنيني عليج شو مسويه يالقاطعه ياللي ما فيج خير

الغاليه : ههه فديتج والله سوري بس تدرين مشاغل ،،، أشحاله خطيبي فهودي حبيبي

عذيجه : حبيبج ؟؟ الحين توج تذكرينه

الغاليه :عذاج حياتي والله سوري مب قصدي أقطع بس صارت عندي ظروف

عذيجه : خير عسى ما شر ؟؟؟

الغاليه : شو أقولج .. خليها على الله ،،

عذيجه : أفا عليج اذا ما أتقولين لي لمنوه بتشكين ؟؟؟

الغاليه : ماعليه غناتي مره ثانيه ما أبي أغثج من الحين وخصوصاً بعد هالغيبه الطويله صدق ولهت عليج أتصدقين كل يوم أوايج صوب بيتكم و أتذكركم ...

عذيجه : يالعياره .... أنتي بعد كنتي على بالي من فتره وقلت يوم برجع بكلمج

الغاليه : خير شو عندج؟؟؟

عذيجه : كل خير بس الحين مب وقتها السالفه لازم أشوفج

الغاليه : أفا عليج ما طلبتي ،، أصلاً أنا اليوم كنت بييج بس قلت مب حلوه خلج تستقرين وباجر الصبح أنا عندج ان شاء الله ...

عذيجه: حياج الله البيت بيتج فديتج ... اسمحيلي عاد بخليج الحين أخوي على الخط الثاني

الغاليه : مسموحه حياتي أمووووووووواح هاي حق خطيبي فهووووووودي يلا فمان الله

عذيجه : الله يحفظج ،، بترياج باجر

الغاليه : أوكيك



عذيجه أترد على الخط الثاني

عذيجه : هلا المعرس اشحالك

محمد: هههه باسم الله بلاج اتخبلتي شو ؟؟؟

عذيجه : وي كيفي أنت مايخصك

محمد : ههه يوم الا جي عيل صرفي على العرس روحج

عذيجه : والله فداك تستاهل يوم الغالي بياخذ الغاليه والله ما بقصر عليكم بشيء

محمد: يالله الحماس أنزين بس بس لا أتهذربين وايد ... أقولج شو أتسوين.؟؟؟

عذيجه : ماشي ملانه

محمد : والله !!!

عذيجه : هي والله

محمد: أحسن ،، هههههه

عذيجه : يا ويهك يوم ما عندك شي فيه خير لا ترمس انزين

محمد: قومي تلبسي يلا بسرعه عندج عشر دقايق قبل لا نوصل بيتكم عازمينج أنتي والخسف ولدج

عذيجه : محد خسف غيرك و حرمتك وعيالك أنزين

محمد: هههه حشا ما أدري شو قلنا عاده الحين شو ترتيبج بتخلصينا والا أنروح عنج؟؟؟

عذيجه : منو وياك ؟؟؟

محمد: كلهم

عذيجه: منو كلهم ما لهم أسامي يعني ؟؟؟

محمد: أففف الله يرحمنا من هاللسان والفضول عارف هزاع حمد والبنات زين

عذيجه: وأبوي ؟؟؟

محمد: وصلته بيت عبدالله المحامي

عذيجه : أها اوكي خلاص عيل ثواني وبجهز

محمد: يالملقوفه .. وينه مبارك موجود؟؟؟

عذيجه : لا

محمد: خلاص عيل لا تتحيرين

عذيجه : ان شاء الله بس انت سكر عشان اقدر ازهب

محمد: وجان تروغني يلا أنزين .. باي

عذيجه : فمان الله ,,,

.......