أموت أنا في حبهم

[الجنيه]

وفا : ياويهج وأنتي صدقتي أني زعلت بس أسولف عليج

موزه : هاج

وفا: مشكور ه

وعد : لا والله ما تاخذينه أندوج خذي تلفوني ...

وفا : لا فديتج مشكوره عادي والله

وعد: عاد أنا حلفت أندوج ها وعن المنكر

وفا: ان شاء الله عمتي

وعد :أتحرى بعد

وفا: وعود خيييييييييييييييييبه شوفي كم مس كول عندج والرسايل الوارده

وعد : عادي بعدين بشوفهن خلصي مكالمتج قبل

وفا وهي أتناولها التلفون: وعود هذا ريلج على ما أضن ويه باسم الله حشا طريناه أتصل ردي عليه يمكن شي ضروري

وعد : اوكي ،،، الو

سلطان : أنت وين حرام عليج ذبحتيني أنتي بخير؟؟؟؟

وعد: هي

سلطان: وعد يا عمري شو فيج والله كنت بموت شوفي كم مره متصل فيج ليش ما اتردين واتطمنيني عليج

وعد: همم

سلطان : وعد انتي وين ؟؟؟ أنا محتاي أكلمج الحين ولا أتقولين ماأقدر ولا تتحججين بشي

وعد: ماأقدر أنا ويا بنات عمي

سلطان: بنات عمج موجودات وما بيطيرن عنج أنا محتاينج حبيبي ليش جي أتعامليني أنا ضايقتج بشيء ؟؟؟

وعد: سلطان أنا مشغوله وبكلمك بعدين

سلطان : وعد أهون عليج ؟؟؟

وعد: سلطان مع السلامه

سلطان : أنا الحين ياي بيتكم

وعد: على راحتك سو اللي تباه ,,,باي

سلطان : بس وعـ .... طوط طوط "سكرت التلفون"



ياربي أنا شو سويت معقوله هاي وعد ؟؟؟!!! مستحيل قبل التلفون ما يلحق يرن واترد عليه والحين من ساعتين مطنشتني ولا أترد علي !!! ليش يا ربي شو صاير أنا لازم أروح لها الحين وأفهم منها كل شي أنا ما أقدر أعيش جي وبعدين شو هالشي اللي غيرها علي ياربي ساعدني شو اسوي



أم سلطان : أشفيك يا أبويه ؟؟؟

سلطان : سلامتج يالغاليه مافيني شي

أم سلطان : مافيك شي ؟؟؟

سلطان : سمحيلي الغاليه بترخص عنج

أم سلطان : حرام أنك ما طلعت بهالحاله

سلطان : يا أميه مافيني شي الله يهداج بس

أم سلطان : أسمعني يا أبويه هي متضايجه ويمكن الحمال متعبنها أنت خلها ترتاح عند أبوها كمن يوم وبعد ما تهدى سر لها وتفاهمو ووعد عاجل وفهيمه وبنفسها بتراضيك

سلطان : ماأقدر يا أميه هاي أول مره تزعل وأتروح بيت أهلها وبعدين من تزوجنا عمرها ما زعلت مني على شي مثل هاليوم يعني تعودت على زعلها ساعه نص ساعه او ساعتين بالكثير لكن الجفوه اللي في نبرة صوتها أتخوفني

أم سلطان : يا وليدي شو أقولك ترا الحامل وايد يغير يأثر عليهن في منهن الي ما أتطيق ريلها ولا أتحب شوفته ومنهن اللي ما أتحب نوع معين من الروايح أو الأكلات وفي أشيا غريبه وايده ... يعني عادي يا أبويه ما يحتاي أتشيل هم شي ..



سلطان : ان شاء الله ... ماعليه يصير خير أنا بروح اتمشى اشوي تامريني بشي ؟؟

أم سلطان : سلامت عمرك الله يحفظك يا ولدي



................

فبيت ميثا

سالم : ليش أتصيحين ؟؟ شوفيج حبيبتي خبريني أنا

العنود : ما أدري شو فيها من رجعنا من المدرسه وهي هاي حالتها أتصيح وتسكت وما أتطيع أتقولي شو فيها

سهيل : يمكن حد زعلها

العنود : ما أدري ترا أنا ما رحت كلاسهم اليوم كان عندي واجب ما حليته

غيث: منو ضربج ؟؟؟ هذا سلوم أنا أدري الحين بضربه بكس بطيره في السما

سهيل : غيث حبيبي سر ألعب برع

غيث : ما أبي

العنود : خله هني بيروح برع عند منو ؟؟

سهيل : ما أتشوفينه يتفلسف

سالم : خلاص طلعوا كلكم برع وخلونا بروحنا

سهيل : يلا غيث سرينا

العنود : أنا بعد أطلع ؟؟؟

سالم: حبيبتي أنتي هي كلكم طلعوا بسرعه



بعد ما فضت الغرفه

سالم يناول نجود كلينكس : ألحين بترمسين والا كيف ؟؟؟

نجود: خلاص ما فيني شي

سالم : عاد لا تتدلعين علي تراني ما أعرف أتصرف ويا البنات

نجود ابتسمت : أنت أحسن أخو في الدنيا

سالم: أحم أحم هذا من ذوقدج يا قمر ,, أنزين الحين خبريني عاد ليش أتصيحين ؟؟ شو صاير حد زعلج ؟؟؟

نجود : أبي أروح عند أمايه

سالم: أمج !!! من وين أييبها الحين تلقينها يا معزومه لعرس والا حفله والا عشا عند وحده من ربيعاتها

نجود تهز راسها : لالا أبي أميه نوره

سالم : وي اندوكم والله ناسي أنه أمايه يعني يدوه ،، أوكي بس بشرط

نجود بفرحه : شو هو الشرط ؟؟ أنا موافقه

سالم : أنزين أسمعيني قبل بعدين وافقي

نجود : شو

سالم : أتقولين شو فيج

نجود: أوكي بس عند أمايه

سالم : خلاص تم



خليفه أول ما وصل طبعا سي أن أن البيت (غيث) خبره انه نجود من يت من المدرسه أتصيح

وعلى طول سار لغرفتها يبي يتطمن عليها ...

خليفه يدق الباب أشوي أشوي ويناديها : نجود

سالم : حياك أبويه

خليفه يدخل ونظرة الخوف باينه عليه : خير شو فيها أختك ؟؟

سالم : ما أدري والله مب طايعه ترمس ..

خليفه : وينها ؟؟؟!!!

سالم : أتغسل ويهها

خليفه : تجدم لها أول ما طلعت ...

نجود من شافت أبوها ردت الدموع لعيونها وربعت لحضنه ...

خليفه : خذها بحضنه ويلس وياها على الشبريه يمسح عراسها يحاول يهديها ويفهم منها اللي صار ,, بس يا غناتي والله قطعتي قلبي شو فيج ؟؟؟ ليش أتصيحين ؟؟ حد زعلج ؟؟ أنتي خبريني بس وشوفي كيف أتصرف وياه

سالم : ماشي فايده ياأبويه أنا من ساعه أحاول فيها وآخر شي قالت لي تبي أتروح بيت يدي عند أمايه نوره

خليفه : أنا بوديج الحين بس قوليلي شو صاير فهميني بس

نجود : تدفن راسها فصدر أبوها أكثر ومتمسكه فيه بكل قوتها ,,,

خليفه : حياتي لا أتصيحين قوليلي شو فيج ،، يا ربي ,, سالم أمك وين ؟؟

سالم : محد

خليفه : كالعاده ... لاحظ أنها تمسكت فيه أكثر من طرى أمها .. شو فيج غناتي امج مزعلتج بشي

نجود أتهز راسها بالنفي ... يا ربي شو صاير فيها ,, خلاص يا عمري انتي تبين امايه ؟؟؟

نجود بصوت مبحوح : هي

خليفه : خلاص يلا نشي غسلي ويهج وبنروح أنا وأنتي بس أوكي يا عمري ؟؟

نجود أتهز راسها وأتنش تسغل ويها ,,

سالم : بوسالم ممكن أخاويك ؟؟؟

خليفه : والله الشور شور العروس اذا وافقت ما عندي مانع

نجود والفوطه بيدها وباتسامه وسيعه : أنا مب عروس بس موافقه سالم أيي ويانا

سالم : عاشت أحلى أخت في الدنيا ,,,

خليفه : يلا أنروح ... وفجأه أنتبه لساعته ,,, جنها الساعه 11 أكيد أم سلطان الحين فسابع نومه

نجود بوزت (عبست ) : لالا اكيد واعيه

خليفه : انزين لاأتمدين البوز يلا نحن بنروح اذا هيراقده بنرجع أوكي

نجود وسالم : أوكي ,,,



فبيت بوسلطان

بوسلطان : ما عليج منه ان شاء الله كل شي بيتصلح ،، يمكن هو غلط بأنه دس عنا هالموضوع بس بعد له أسبابه

أم سلطان تمسح دموعها : بس وعد يا بوسلطان ما بتتحمل

بوسلطان : عاد هاي مهمتج يا أم سلطان حاولي وياها هي تحترمج واتطيع شورج

أم سلطان : والله أنها مب هاينه علي ولا يهون علي ضنايه أشوفه متعذب لفراقها ،، الحين هي من دون لا تدري أزعلت منه ومحاربتنه عيل جيف لو تدري ..؟؟؟ الله يستر

بوسلطان : ما عليه ان شاء الله ما بيصير الا كل خير ,,,

أم سلطان : منو ياينا هاي الحزه ؟؟!!!

بوسلطان : يمكن حد من العيال ناسي المفتاح أنا بنش أشوف الباب



عند الباب ...

خليفه : يا نجود يا حياتي شو فيج بسج من هالصياح ذبحتيني والله

سالم : خلاص يا الوالد الحين بندخل عند أمايه وبتخبرنا شو فيها ان شاء الله

خليفه لا حول الله شو اللي صاير وياها ياربي ساعدني وينج يا ميثا ؟؟؟!! أفففف ليتج كنتي مثل باقي الأمهات لو كنتي موجوده ما كان حالنا ها جذه الحين ...

بوسلطان يفتح الباب وتفاجأ : هلا والله هلا وغلا بالغالي وعيال الغالي حياكم يا بويه قربوا

خليفه : يحضن أبوه بلهفة وشوق

سالم :الله الله شو هالرومانسيه يا بو سالم

خليفه مطنش ولده : يبوس راس أبوه وأيده اشحالك يالغالي عساك بخير ,,

بوسلطان عينه دمعت من فرحته : بخير دامك بخير اشحالك أنت شو أخبارك وينك يا بويه ما تسأل عنا ؟؟

خليفه : السموحه منك والله ودي أييك بس تدري هاليومين عندي وايد مشاكل في الشغل ...

سالم حاط أيده فخصره : بوسلطان الظاهر نحن مش مرحب بنا يعني نقلب ويوهنا ؟؟؟!!!

بوسلطان : أفا والله أنتوا ؟؟ انتوا قلب هالأبو تعال فديت روحك

سالم يتقرب منه ويحضنه بالقو

بوسلطان : هههه أشوي أشوي كسرت ضلوعي يا ولدي أنا شيبه ما أتحمل

سالم : يوسع عليه أشوي ،، هذا عشان اتعرف غلاتك عندي أشكثر

نجود اتيره من كندورته عشان يفسح لها المجال

سالم : حشا فصختينا صبري أشوي خليني بعدني ما شبعت من حنانه

نجود : بسك خوز عنه

خليفه بجديه : سلوم قم عن أبوي أفسح الطريق لشيخة البنات

بوسلطان : لالا خفو علي ما أتحمل ،، فديت هالقمر والله

نجود مستحيه قربت منه وباسته على راسه ,,,

بوسلطان : تعالي حبيبتي تعالي عندي ,,, ضمها لصدره ومشاها وياه لغرفة أم سلطان ,,, نوره عندي لج مفاجأه

أم سلطان : وعد رجعت ؟؟

بوسلطان : ان شاء الله بترجع بس في ناس يايين يسلمون عليج

أم سلطان أتنش عن الشبريه بس ردت مكانها بعد ما سبقتها نجود وطاحت فحضنها أتصييييح

أم سلطان : حيالله بالغاليه بنت الغالي .. ويديه شو فيج يا بنتي ؟؟؟ نجود حبيبتي شو فيج شو صاير ؟؟؟ التفتت لبو سلطان تستفسر منه بس شافت خليفه وسالم يايين صوبها ,, خير يا بويه شو صاير ؟؟ حد فيه شي

خليفه يتجدم بسرعه ويبوسها عراسها ويطمنها : لا الغاليه ما في شي لا تتروعين مافيها الا الخير

سالم يتجاوز أبوه ويحضن يدته : فديت هالطله ,, فديت روحج يلعني كم بعيش أنا

أم سلطان تضربه على جتفه : أستغفر ربك حد يلعن عمره ؟؟

سالم : شو أسوي أنتي أتخبليبي جمالج دلالج وأنتي بكبرج أصلا جنان

أم سلطان : قم عني أقولك خلني بشوف البنت شو فيها قم

سالم : أفا الحين أنا انراغ بسبة هاي الدبه نجود ؟؟؟!!!

خليفه ييلس ويا بو سلطان ،،، خير يا ولدي شو فيك شو اللي مآذنك خبرني يا بوك

خليفه : تسلم الغالي لا تتعب روحك ويا مشاكلي ان شاء الله بتنحل

بوسلطان : أفا عليك ياولدي اذا أنا ما أساندنك وأفج ضيجتك منو بيوقف وياك

خليفه : عساك ذخر يالغالي الله يخليك لنا ,,,

بوسلطان : شو مضايجنك شو صاير وياك

خليفه : سلامتك يالوالد الموضوع نفسه اللي خبرك

بوسلطان : تطري سالفة المجمع السكني!!

خليفه : هو نفسه ياأبوي أنا عني ما صابني شي الحمدلله بس بنت بوسعيد هي اللي تضررت وأنا مستلم المشروع عشانها بس

بوسلطان : يا أبويه هي تدري أنه مشروع يتحمل الفشل والنجاح

خليفه : بلى بس تدري يعني هي وثقت فيني وأنا الي نصحتها تدخل هالمشروع

بوسلطان : لا أتشيل هم ,,, أنا بعوضها ان شاء الله

خليفه : ان شاء الله ,,,



عند أم سلطان

أم سلطان : ألحين شو صاير فيج بسج من هالصياح الخايس خبريني شو مستوي عليج

سالم : صبري يا الغاليه ,, يرفع راس نجود عن حضنها ... شوفي نجوده أنتي قلتي ودوني عند أمايه وأنا بخبركم السالفه صح

نجود أتهز راسها بنعم ..

سالم : عيل خلاص يلا ارمسي ولا أتعورين راسنا

نجود تشهق وبنفس متقطع : وين بـ بـابا

سالم : هناك يالس عند أبويه مانع

نجود ترمس بصوت مبحوح وهادي : الــ اليوم ال البنات قالولي ......... وكملت صياح

سالم: لا حول الله شو مستوي اليوم شوقالو البنات حسبي الله عليهم

أم سلطان : الحين بتسكت وأتخلينا نسمع البنت والا جيف ؟؟؟

سالم : هي خلها تشبع من هالصياح الطفس قبل ... الصراحه ما احب هالحركات البايخه

أم سلطان : بتسكت والا تبيني أروغك

سالم: نجود بسج عاده يلا ارمسي

نجود: بصوت متقطع ... البنات قالــو ل ي أ أ نن تي أمج ميي ته ؟؟

خليفه على طول لفتت أنتباهه الكلمه وتم مبهت ويشوف أبوه اللي أنرسمت نظرة الحزن على ويهه ...

أم سلطان : شو قالن لج البنيات ؟؟؟

سالم : أنزين ليش ؟؟؟؟

نجود: يقولون أنتي من دخلتي المدرسه وعمرنا ما شفناها ولا نسمعج ترمسين عنها ,, كلهم يابو أمهاتهم اليوم وكانوا مفتخرين ببناتهم بس أنا لا يقولون أنتي شاطره وأكيد أمج أتساعدج بس ليش ما أتي عشان أتشوفهم يكرمونج؟؟؟!!!!

أنا بعد أبي أم مثل أم هنا ... كل يوم الصبح أتوصلها المدرسه وأتساعدها اتحل واجباتها وفي مجلس الأمهات دومها موجوده ... أنا عندي أم بس وينها ؟؟؟ أنا ماأشوفها ولا اعرفها .. الخدامه هي اللي تشتريلي ثيابي وأتعرف شو أحب وأكره وبابا ما يرد لي طلب بس أبي أمي أتكون معايه مثل صديقتي كل لبنات أمهاتهم وياهم وايد أوكي أشمعنى أنا ؟؟؟ ليش ماما ما أتحبنا ؟؟؟ ليش ؟؟؟ أنا أنا ...

أم سلطان : بس يا حبيبتي خلاص أنسي السالفه حبيبتي أمج مشغوله وبعدين أنا موجوده ليش ما خبرتيني كنت بحضر هالاجتماع

نجود : ما أبي ما أبي ليش أمي ما تهتم فينا ليش

خليفه نش وتقرب من بنته : نجود ،،، نجود شوفيني ,,أرفعي راسج

نجود تبعد ويهها عنه ما ابي خلني بروحي

خليفه ياخذها بحضنه غصب : حبيبتي أنتي من حقج تزعلين وأتصيحين وتتمنين أتكون أمج مثل باجي أمهات البنات صدقيني أنا حاس فيكم وأحاول قدر المستطاع أني أعوضكم عن غيابها وأنتي الحين بنت كبيره وفاهمه وأتعرفين أنا ما نقدر نغصب حد على شي ما يباه ,, شوفي كل البشر مختلفين عن بعض بس أغلب الأمور يتفقون فيها يعني كل الأبهات يشتغلون صح ... بس كل أب يتقن شي معين يعني أنا مثلا شاطر في التجاره وأشتغل فيها وغيري شاطر في أشيا ثانيه عندج المدرسه أكبر مثال ألحين هي تقريباً طول النهار وياكم بعيده عن بيتها وزوجها وعيالها ويوم ترجع البيت ما عندها وقت لهم بس أكيد أتحبهم وتسأل عن أخبارهم ..." يا ربي شو هالورطه أنا شو أخرف شو أقول أففف ساعدني يارب "

نجود : بابا أنا آسفه سامحني

بوسلطان : فديت الحلوين يوم يطيعون الشور .. تعالي غناتي تعالي عندي أنا بخبرج شي .. شوفي يا بنيتي ترا أبوج اللي يبي يوصل له هو أنه أنتوا لكم معزه في قلب أمكم بس هي لها أسلوبها وطريقتها المختلفه في إضهار هالمشاعر .. أنتوا الحين صغار ما تفهون هالاشياء بس لاحظي هي أول ما تدخل البيت تسأل عنكم أتشوف منو وصل ومنو بعده ..تغديتوا والا لا واذا حد منكم مريض أتخبر أبوكم عشان يوديكم الدختر صح والا لا

نجود : صح باباتي بس

بوسلطان : ياينج بالرمسه صبري علي اشوي

نجود: ان شاء الله

خليفه فخاطره" الله يخليك لي يا أبويه رغم كبر سني الا أني ما قدرت أتصرف ويا بنتي أو أقول لها شي يقنعها " سبحان الله صدق الكبار لهم دور كبير في حياتنا ..

بوسلطان : أنا بخبرج عن سالفتي بعدين أنتي أحكمي شوفي اذا أمج ظالمتنكم أو لا ... مثل ما تدرين أنا وأخوي اللي هو يدج أبو أمج بوميثا الفرق بينا سنتين يعني أنا أكبر منه بسنتين .. يوم أنولدت الكل كان يهتم فيني ويدلعوني ويحبوني بس يوم يوم انولد يدج خلاص الأهتمام كله أنصب عليه وأنا كنت مثلج وايد أتضايق وأحيان كثيره كنت أقول أمي ما أتحبني ولا تهتم فيني مثل قبل كنت أكره أخوي والسبه أنه أمي تسأل عنه قبلي وأشوي أشوي بديت أكبر وأفهم الدنيا عدل ولاحظت أنه أمي يوم ينادونها بأم مانع ترفع راسها بفخر وأعتزاز ودايماً تمدحني من وراي وأنا ما أدري بس مره سمعتها أتقول لأبوي الله يرحمه أحس أني مهمله مانع وأحسبه ماخذ بخاطره علي بس والله أني أحبه وأعزه أكثر من أخوه .. صدقيني يومها كانت هالكملتين كافيات بالنسبه لي عشان يبينون لي حب أمي وأني اعني لها الشي الكثير من يومها تغيرت معاملتي لأمي وأخوي وبديت أحس بواجبي تجاهم وأعتز بهم ...

اللي أبي أقولج اياه أن كل أم لها طريقتها الخاصه في حب عيالها وكل واحد منهم له معزته الخاصه عندها ... مب شرط وجودها الدائم وياج وحضورها أجتماعات المدرسه يكونون المقاييس الوحيده لحبها أنتي بجي ظلمتيها والمفروض اذا شي في خاطرج عليها اتواجهينا من حقكم عليها أنها تسمعكم وأتناقشكم وأتشوف طلباتكم أنتوا يا بنتي اللي ما عودتوها أتشاركونها بأموركم ومشاكلكم .. حبيبتي أنتوا الحين مب صغار ما تفهمون المفروض أتفكرون بعقولكم قبل قلوبكم .. أنتوا هب مثل الياهل الصغير اللي يصيح يوم يبا حليب لأنه ما يقدر يتكلم والأم تفهم اللي يباه

[الجنيه]

على طول ,, المطلوب منج يا أمايه أنج تيلسين ويا نفسج وأتحاسبين نفسج قبل أي حد شوفي انتي بشو مقصره ؟؟؟ هل أنت مأديه واجبج تجاه والدتج ؟؟؟مهما كانت معاملتها أو أسلوبها هاذي امج والجنه تحت اقدامها ورضاها لازم تسعين له ... والدموع هاي ما بتزيدج الا هم حاولي أتحلين مشاكلج قبل لا تلجئين لها ونحنا كلنا حولج ومستحيل أتوهين ونحن موجودين ,,

نجود تأثرت بكلام يدها وايد وبدت بالفعل أتحاسب نفسها وأتشوف اذا الغلط منها والا لا .. التفتت لأبوها اللي نظرة الحزن ما فارقته لحظه بس من تلاقت بظراته بنظراتها تبدلت ملامحه لابتسامه مشرقه ومد أيده لها وترك لها الخيار ..

تجدمت منه خطوتين وباسته على راسه ولوت عليه بكل قوتها : الله لا يحرمني منك وردت خطويتن صوب بوسلطان ونفس الشي باست راسه ولوت عليه .... الله يخليكم لي وسامحوني

سالم : يا سلام التبويس لناس ونحن مالنا حظ ؟؟؟

نجود أتغايضه : أنت ولد البطه السوده مالك شي عندي

أم سلطان : محد سوده غيره ...

نجود : أفا ألحين أنا اتقولين عني سوده عشان هالدب الخسف

أم سلطان : هني وحدج عاد يسواج ويسوا عشره منج كفايه أنه شبيه أبويه الله يرحمه

نجود: خلاص لاتزعلين وهاي بوسه عراسج وأنت بعد

سالم: لحظه لحظه خليني أكشخ

نجود : والله أنك متفيج

خليفه يقرب من أبوه ويحبه على راسه عيونه مليانه دموع : الله يخليك لي ويطول بعمرك يالغالي

بوسلطان : فديت روحك ويخليكم لي ولا يحرمني منكم ان شاء الله

سالم : أبوي

بوسلطان : لبيه

سالم : لبيت حاي ان شاء الله ,,, طلبتك

بوسلطان :آمين ،، تم يا الغالي وأنا كم سالم عندي

سالم: خلاص من اليوم أنا بسكن هني عندكم وأقنع الوالد دخيلك

بوسلطان : البيت بيتك يا بويه وان ما شالك البيت أتشيلك عيوني بس أقنع أبوك روحك

خليفه : سالم أنا محتاينك في البيت أنت تدري ما في حد كبير بعدي غيرك

سالم: أبويه ليش ما نرجع نسكن بيت يدي ؟؟؟!!!! الفله الثانيه محد ساكننها نفرش ونيلس عندهم أحسن

بوسلطان : مره اذا خاطرك بوسالم من باجر بجدد الفرش فيها

خليفه : من خاطرك يا بوسلطان ؟؟؟

بوسلطان وهلت دمعته : من كل خاطري

خليفه يبوس أيد أبوه : تم ولك مني وعد أنه اللي صار قبل أبد ما يتكرر ,,

بوسلطان : ان شاء الله يا بويه

أم سلطان تمسح دموعها : الله يخليك لي يا بوسلطان ويفرح قلبك مثل ما فرحتني أخيراً عيالي بيربون تحت عيني

نجود تحضنها بالقو : الله بنسكن عندكم خلاص أنا من اليوم بتم هني

سيف وهو داخل غرفة أمه : لا حول الله يعني الواحد ما يقدر ياخذ راحته في هالبيت ألحين يوم أقرر أتزوج وأسكن الفله خربتوا علي مخططاتي

سالم أول ما شافه ربع له ولوى عليه : فديت روحك لاتزعل بنعطيكم الطابق الثاني ماشاء الله الفله عوده وأتسد

سيف : أندوك هذا أتقول يتصدق عليه ... فديتك والله ولهت عليك

سعيد : أحم أحم نحن هنا

سالم : الله والهنا .. خشمك بو عسكور

خليفه بعد ما توايه ويا أخوانه : الحين أنتوا أونكم عمامه حشا أتقول هاييل قوم بو الطعش

سيف: ليش أتغار يالشيبه ؟؟؟

أم سلطان : محد شيبه غيرك لا تغلط علة ولديه

سعيد : الله الله أنا ما صدقنا أتفج عنا عشان ما تاخذ كل الغلا والحين ردت حليمه لعادتها القديمه

بوسلطان : الله أكبر شوفي يا نوره شوفي عيالج جيف يغارون من ولدي

سيف وسعيد : نعــــم نعـــــــــــم ولدي ؟؟!!!!! يا سلام ونحن عيال البطه السوده

نجود فاجأت سعيد وطاحت فحضنه ولنه ما كان مستند لشي طاح وياها على الأرض

سعيد : أخخخخخ يالدبه أنتي من وين طلعتي لي !!! آآآييي كسرت ضلوعي شو تاكلين يالهمبا

نجود: دبه اللي بتاخذها ان شاء الله أتكون متييييييييييييييييييييييي ييييييييييييييينه عشان ما أتعايرني وعيالك متان مثل البطاط

سعيد : الله أكبر أسميها عياره بنتك حشا الحين عيالي وحرمتي شو يخصهم ؟؟؟

أم سلطان : الحين اللي يسمعك يقول مره صاك له درزن عيال ،،

خليفه يبوس أمه وأبوه : الوقت وايد تأخر تصبحون على خير وسمحولنا .. يلا يا عيال خلوا الوالده ترتاح

بوسلطان : بوسالك أفرشها الفله ؟؟؟

خليفه : أفا عليك كلمتك ما بردها بس خل الفرش عليه .. ان شاء الله بخبر ميثا وبشوف شو ترتيبها يمكن تاخذ أثاث الفله اليديده بعده ما كمل سنه ,,

بوسلطان : على راحتك يا بويه

أم سلطان : وأنا باجر بخلي الخدم ينظفونها لكم

سالم , نجود وخليفه : تصبحون على خير .. فمان الله

الكل : وأنتوا من أهله

سيف: نحنا بانتظاركم

أم سلطان : الله يحفظكم والله الله بالدرب يا بويه

خليفه : ان شا ءالله ،، يلا الغاليه شي في خاطرج ؟؟؟

أم سلطان : سلامت عمرك بس لاتبطي علينا

خليفه : من عيوني يا عيوني ,,,,



بوسلطان الابتسامه اللي أنرسمت على ويهه بعد اقتراح سالم ما فارقته وأخيراً حس أنه الحظ أبتسم له وبيصير اللي كان وده يصير من زمان بس كبرياءه منعه يبين ضعفه وحاجته لبجره وياه ...





,,,,,

وعد بعد ما تعشت ويا بنات عمها رجعن البيت وكملو سهرتهم للصبح .. وبعد صلاة الفجر رقدن البنات للعصر " يسترجعون أيام البطاله " وعد النوم ما لامس جفونها مستغربه من شعورها ومن اللي أتسويه ليش قاسيه على سلطان ما تدري بس حاسه بحزن للي أتسويه ...



حميد أصر عليه بوسهيل يبات وياه وبما أنه بنته أساساً بتبات عندهم ما كان عنده مانع ومنه يغير جو ويحس بالاستقرار مره ثانيه ...





سيف بعد ما رجع السياره عند سعيد ما نطق بكلمه ولا تناقش وياه بالي صار وطبعاً سعيد فهيم وعرف أنه سيف قلب الدنيا وسوى شي غلط كما هو متعود ...



خليفه من زود الوناسه ما قدر ينام الليل مب قادر يتصور رجعته لبيت أبوه يتصبح بهم ويمسي بهم حلمه اللي أنحرم منه سبع سنين عاد له من جديد .. مستحيل أخلي ميثا تحرمني منهم مره ثانيه ... لازم توقف عند حدها والظاهر أنا سكت عنها وايد والحين يا الوقت اللي لازم أحط فيه النقاط على الحروف ومن اليوم بتشوفين خليفه ثاني يا ميثا لا مش ثاني الا خليفه اللي كان متقمص شخصيه الزوج المحب اللي يحاول يصلحج بس الزين ما ينفع وياج .....



الوحيد اللي ما هنا له بال "سلطان "

بعد ما سكر عن وعد راح بيتهم ويوم وصل عرف أنها أصلا ً من طلعت من بيته ما رجعت لبيت أبوها أتصل فيها بس تلفونها مغلق وماحب يتصل بحميد عشان ما يحس باللي صاير بينهم طول الليل وهو عايش فحيره وخوف يحاول يبرر لتصرفات وعد بس مب لاقي الحجه اللي تقنعه اذا كانت تدري باللي بينه وبين مزنه ما كانت بتتصرف بهالطريقه عيل شو هالشي اللي خلاها أتعافه !!! للحين ما لقى لسؤاله جواب بس اللي متأكد منه مستحيل يعدي هاليوم من دون لا يعرف السبب ...



شهد .. سيف طلع من بيتهم بس ما فارق خيالها أتحاول تمحي صورته يوم كلمها بكل عقلانيه وهدوء ما تبي تنجذب له أو تكن له أي مشاعر بعد اليوم .. كفايه أنه تعنى ويا لبيتهم عشان يذلها وينتقم منها ... ما عليه يا سيف الايام هي اللي بتخليك اتعرف جيمة شهد ...



",,,,,,,,,,,,..................................... ................,,,,,,,,,,,,,"



بعد مرور شهر من الأحداث اللي فاتت



محمد : عارف الله يخليك قول لهم ما أبي هالمسكن ما أبي أغيب عن الوعي ما ابي والله بتحمل خلهم يودروني

عارف ماسك ايده ويمسح عراسه : حمد ما عليه تحمل عشاني خلهم يشوفون شغلهم أتغيب عن الوعي أخير لك من الألم صدقني بهالطريقه أنت تتقبل العلاج أكثر والحمدلله الدكتور يقول أنت عديت المرحله الصعبه والحين ما باقي شي بالكثير أربع أو خمس أسابيع وان شاء الله نرجع البلاد ...

حمد : بس والله تعبت دخيلك يا عارف ما أباه والله كفايه ...

عارف : خلاص حمد لا أتعبني وياك بليز

حمد: أبي أرجع عند أبوي ما أبي أتم عارف خلهم يرخصوني بروح بلادي ووبكمل العلاج

المترجم : يا أبي خليك معانا شهر وبعديها ان شاء الله ازا حالتك بتسمح هنرجعك الامارات بس اهم حاجه أنك تتقبل العلاج وما تتعبناش

عارف : شفت سمعته شو يقول .. يعني أنت اصبر اشوي

حمد: بس ما عاد فيني صبر أحس بخنقه أبي أطلع من هالجحيم

المترجم : ماعليش يا أبني كلها كام يوم وبعديها تتشافى ان شاء الله وأنا عارف الغربه صعبه أسالني أنا

حمد: الله يلعن اليوم واللحظه اللي جربت فيه هالسم

عارف : استغفر ربك مب زين تلعن اليوم والا اللحظه هذا كله حكم ربك

حمد: استغفر الله العظيم من كل ذنب عظيم

المترجم : أيوه يا أبني خليك جدع وتوكل على ربنا ,,, الله يطرح البركه فيك

عارف : تسلم والله ما قصرت يا حج

المترجم : أهو خلاص دلوقتي هينام وأنت ياأخ عارف مالكش لزمه النهرده تقدر أتروح وازا عاوز ترجع براحتك بس أديني قلت لك مالكش لزمه اليوم ... وازا عزت حاجه أنا موجود ,, أشوف وشك بخير

عارف : تسلم والله يا حاج محمد وان شاء الله بروح الفندق اريح وبرجع المغرب

المترجم : ربنا معاك





عارف خذ له شاور على السريع وقرر يستغل الوقت بالتسوق يبا يتشرى لخواته ,, يتمشى في ربوع ألمانيا حاس بملل وضيجه خطف عند محل يبيع أشياء مستخدمه بس بعد التعديل والترميم ,, لفت نظره تمثال لبنت تعزف على الغيتار على مقعد حديقه .. وقف عنده يتأمله لفتره طويله ودار في باله موقف مر عليه أكثر من عشر سنين ..



وعد: عارف بليييز أباه ما يخصني اصنعه سو طلبيه من الخارج اي شي المهم أباه

عارف : يا وعودتي والله أنتي بتذبحيني الحين من وين تبيني أخترع لج هالتمثال عنبو أنتي من وين اتييبين هالافكار ؟؟؟

وعد: عارف عشاني حاول والله خاطري فيه

عارف : أنزين أنتي أتعرفين وين يبيعونه ؟؟ شفتيه في مكان ؟؟؟!!

وعد : لا بس خاطري فيه

عارف : لا حول الله والحين كيف يعني .؟؟؟

وعد: اذا لي معزة فقلبك اتييبه لي

[شمه]

الجنيـــــه

وصلت نهاية الصفحــــة ال 5 و مب قادره اكمل عيوني طلعــــــــت..
بس فيني فضول..

المشكله ان باجر دواااااام .. يا ربي ما انروم نتأخر طوالي الخصم جاهز..

ان شاء الله بكملها..

ما شاء الله عليج طلعتي مبدعــــه

[عاشقة الريم]

مشكوووووووووووووورة أختي الجنية على الجزء..

وفي الأنتظار الجزء الجديد..

[شمه]

خلصت القصـــــه.. بس اتريا التكملــــه..

بس في ملاحظــــــه .. تدرين مرات اندمج و فجأة احس عمري برع السالفــــه.. يعني اشوي الحبكــــه ايكون فيها خلل..

يبالج اتركزين اكثر.. عشان انتم مندمجــــــــين..

اوكي ..

[المزيوونه]

هلاااا والله ..

يالله يا الجنيه .. مابغيت ادش القصه لين ماتخلصينها وانتي بعدج ..
خاطري اقرا يميع الاجزاء ورا بعض .. يوم بخلص سعيات برد اقرى ..

موقفه

[الجنيه]

عاشقة الريم

العفو حبوبه ....


شمه

أشكرج عزيزتي على التنبيه الصراحه أنا بعد حسيت أنه في خربطه في الموضوع المشكله كنت أحاول أوصل اللي أبيه بس ما بغيته يكون على شكل حوارات ..
ما عليه السموحه منكم وان شاء الله مستقبلاً اذا فكرت أكتب (ولو أني متأكده أني مستحيل أكتب ) براعي هالشي وبحاول قدر المستطاع ان شاء الله



المزيونه

هههههههههه الله يخليج خفي علي اشوي والله كان ودي يكون الجزء الأخير بس شوفة عينج بعده باقي اشوي بس اوعدج أني أنهي القصه قريباً وأكيد قبل 2006 *_^


تقبلوا ودي ومحبتي

نانو

[شمه]

الجنيـــة..

مب جنج طولتـــــي علينـــا..
انزين حطي لنا لو نص جزء..

مليت من الانتظار..

[الجنيه]

شمه الغاليه خفي عليه ان شاء الله باقرب فرصه بحط لكم الجزء العشرووووووووون

[الجنيه]

أموت أنا في حبهم

الجزء العشرون



بعد اسبوعين

خليفه : سمعي اليوم خلصي من ترتيب ثيابج باجر ان شاء الله بنبات في فلتنا كل شي جاهز وسالم ساكن هناك من اربع أيام يعني ما باقي غير تاخذين اللي تبينه لأنه العيال ودينا أغراضهم كلها ...

ميثا : خلاص يا خليفه روح أنت وعيالك وأنا بتم هنه

خليفه : وأنا أقول هالشي ما بيصير الا يوم أطلقج

ميثا : ما تقدر

خليفه : لا تتحديني صح أنتي بنت عمي وما برضى عليج بس صدقيني اذا خيرتيني بينج وبين أهلي كفة أهلي هي اللي بترجح وانتي بتمين اتعضضين أصابعج من الندم شوفي يا ميثا حواليج شوفي عيالج منو منهم مستعد يوقف وياج أو يسندج ؟؟؟ ولا واحد أنتي أصلاً مالج وجود فحياتهم أنتي صفر على الشمال ..

ميثا بتحدي وغرور : أنا مب محتايه لحد أقدر أعيش نفسي أحسن عيشه وأبيع اللي يبيعني ,, أنا ميثا بنت ناصر وما عاش اللي يمشيني على كيفه ...



مندمجين في ضرابتهم وناسين اللي تمنوا الموت على أنهم يشوفون أمهم وأبوهم وكل واحد فيهم يغلط على الثاني ويتحداه وناسني وجودهم ... عنود حاطه راسها على حضن نجود واتحاول قدر المستطاع أتطنش اللي تسمعه ما تبي تكره أمها أكثر من كرهها لها الحين ,, أنا مستغربه من أمي شو اللي تبي توصل له .؟؟؟ ليش أتعاملنا كأنها عبء ثقيل على قلبها ؟؟؟!!! معقوله في أم ماأتحب عيالها ؟؟؟ أستغفر الله أعوذ بالله من الشيطان .. الظاهر أنا صرت مثلها من دون لا أنتبه ,, لا أنا ما أبي أفكر بشي خلهم يتفاهمون على راحتهم واحنا علينا طاعتهم مهما صار ...

نجود : أفففف عنود يالدبه كسرتي ريولي نشي

سهيل : ليش ماشي مكان ثاني أتحطين راسج فيه غير حضنها !!! تتحرين عمرج ريشه شو .؟؟؟؟!!!

عنود: جب

سهيل : أحترمي نفسج وثمني ألفاظج

نجود : لا كفايه بلييز ما نبي مشاكل يعني ما اتشوفون الحرب اللي صايره بين أمي وأبوي تبون أتنافسونهم ؟؟؟

غيث لاهي بدنيته يلعب بلاي أستيشن ولا همه اللي يصير حوله بس من فتره لفتره يسأل سهيل ليش بابا وماما يصارخون ؟؟؟وسهيل اللي صاير الأم الحنونه لأخوانه يوم شاف حالة أهله اخذ أخوانه وجمعهم كلهم بأبعد غرفة في البيت اللي هي غرفة سالم اللي دايماُ وأبداُ يفضل الاستقلاليه والأبتعاد عن أجواء البيت الخانقه بالنسبه له ...

أنا بعد أسأل نفسي ليش أمي اتعاملنا جنا عيال ريلها ؟؟ ليش ؟؟ يعني لو مرت أبونا يمكن عذرناها بس هاي أمي كيف ممكن أتسوي جذه ؟؟؟ كيف ؟؟؟



في الصاله

ميثا : أسمعني هذا بيتي ومحد له الحق يطلعني منه فاهم

خليفه : لا يا ميثا هالبيت بيت عيالي واذا أنتي بتمين فيه كونج أمهم على العين والراس أما أتقولين هذا بيتي فهذا فأحلامج لا غير ..

ميثا : لا يا خليفه أنت نسيت أنك بنيته لي أنا ؟؟؟

خليفه : هه أنتي ما تفهمين ؟؟؟ نعم بنيته لج بس في فرق بين أني أبنيه لج وأني أكتبه باسمج ,, هالبيت اللي أنتي عايشه فيه باسم ولدي سالم

ميثا مصدومه كيف ؟؟؟ يعني هالبيت مب باسمي ؟؟؟؟

مستحيل لالالا ما بتنازل عنه كيف ؟؟؟ هزت راسها وكانها تبعد هالفكره عن بالها : خليفه أنت شوأتقول ؟؟؟

خليفه : اللي سمعتيه واذا سالم بيرضى أنج أتمين في هالبيت أنا ما عندي مانع أتعيشين فيه بس متى ما يبا يقدر ياخذ البيت منج ويرد يسكن فيه ...

ميثا : الحين أنت تكتب بيتي باسم هالي ما يتسمى ...؟؟؟

خليفه : هذا اللي ما يتسمى فضله عليج يغرقج لو أتمين العمر كله تدفعين جيمة جمايله لج ما أتردين ربعه

ميثا : أنت أكيد تمزح الحين تبي تقنعني أنه ولد لطيفه الـ

خليفه يقاطعها بكف خلاها أتطيح من طولها : جب ولا كلمه لا تلفضين أسمها بلسانج الوسخ



ميثا تضربني يا خليفه ؟؟؟ تضربني أنا يالحيوان(الله يعزكم )

خليفه فقد أعصابه ما تحمل من ميثا اللي سمعه وتناسى أنسانيته ... هدوءه ... حكمته ... وكل شي منعه في يوم أنه يمد أيده عليها ... ضربها ضرب يمكن في حياتها ما شافت مثله ... ميثا رغم الضرب اللي يضربها اياه الا أنها أتعاند وترمس في سالفه لطيفه

ميثا : أتمد أيدك علي ؟؟؟ هاي رجوله بنضرك تبغي تذبحني مثل ما ذبحتها ؟؟؟ آآآآآآآآآه

خليفه : جب أسكتي ما أبي أسمع صوتج

ميثا : ما بسكت وينهم عيالك خلهم أيوون يشوفون أبوهم المحترم يضرب أمهم وخلهم يعرفونك على حقيقتك يالمتوحش يال

خليفه بدى يلهث من كثر ما ضربها مسك نفسه وأبتعد عنها بس رجع وزادها لأنها ما تبي تسكت

كل هذا وعياله متصنمين مكانهم مب مستوعبين اللي يشوفونه أبوهم يضرب أمهم !!! ما تعودوا توصل بينهم السالفه للضرب وأول مره يشوفون خليفه بهالطريقه ...

ميثا حلجها ينزف دم ,, تزقر عيالها : سهيل ألحق علي,,, نجووود آآآي ,,, بيذبحني مثل ما ذبح أم سالم الحق على أمك يا سهيل

خليفه بعد هاي الجمله تجمد مكانه كأنه حد صب عليه ماي بارد أنصدم من ميثا ما توقع أنها تنحط لهالمستوى وعلى طول ألتفت لعياله وأتفاجأ من النظره اللي على ويوهم .. ما لقى لها تفسير نجود على طول ركضت لغرفتها وسهيل دموعه على خده ... عنود طلعت برع البيت ما تبي أتشوف اللي يصيرأو تسمع صراخ أمها

غيث يالس على الأرض يصيح ما يعرف شو اللي صاير خايف من أبوه خايفه يذبح أمه وبعدين يضربهم كلهم ...



خليفه : سهيل تعال حبيبي لا تسمعها تعال

ميثا : آآآي الله يلعنك كسرت ضلوعي .. سهيل لا أتروح عنده تعال عندي أنا أمك أبوك جذاب سالم مب أخوكم أقصد مب ولدي سالم أمه وحده ثانيه ماتت على أيد أبوك ضربها مثل ما ضربني بس

سهيل : كفايه حرام عليكم حرااااااااااااااااااااااا ااام خلونا في حالنا ما نبي شي منكم ما نبا شي وطلع للشارع يركض بدون أي هدف ما يعرف وين يروح أو لمنو يلجأ... خذت أريوله لعند الانسانه اللي يحبها ويقدرها واللي تفهمه ....



في بيت بومحمد

وعد : أشحالهم هل ألمانيا

عذيجه : بخير ويسلمون عليج و ان شاءالله الاسبوع الياي بيرجعون

وعد : الله يردهم بالسلامه ان شاء الله

عذيجه : فديت روحه والله أنه أعتذر والحين رجعت علاقتنا مثل قبل وأحسن مليون مره

وعد : ههه حشا شو هالخبال عنبو تعفدين من سالفه لسالفه ... والله كفو عليج الصراحه أنا لو مكانج مستحيييييييييييييل حطي تحتها أربع خطوط حمر أوكي مستحيييييييييييل أرد له لو يذبح عمره عشاني

عذيجه : لا وعود والله هي مستوله سحر وبعدين أنا أحبه وهو يحبني كل أثنين متزوجين أتصير بينهم مشاكل وأنا فتره حملي كانت صعبه عليه وعلي الوحام والغثيان اللي كان أييني الصبح خلا نفسيتي زفت يعني مستحيل كنت أبتسم له أو أتقبل منه كلمه حسيت بكره تجاهه ما أدري ليش حسيت ببرود حبه وأنه خلاص الحين ما يحبني وهو نفس الشي حس بابتعداي عنه وقلة اهتمامي فيه وراح يدور هالحب والاهتمام اللي فقده عند غيري بس الحمدلله الحين عادت المياه الى مجاريها

حمده : هههه ماشاء الله الأخت ترمس وهي في وادي ثاااااااااااااااااااااااا اااااااااااااني

عذيجه : أنتي بعدين وياج كم مره قايلتلج يوم أتشوفينا نرمس بسوالف حريم لا أترزين بويهج ويكون أفضل لو تقلبين ويهج و أتصيرين شرات أختج الصغيره مع أنه المفروض أنتي قدوتها ... الحمدلله أنها ما أتقلدج

حمده : الله يسامحج ليش أتقطعيني جدام وعد ؟؟ والله عيب أنا مب ياهل وبعدين أنتوا ما رمستوا بشي حريمي وايد يعني عادي هالحوار اللي دار بينكم ممكن يصير بأي مسلسل أو فلم والا تبيني أبدل القناه بعد ؟؟

عذيجه : حشا كلتينا بلسانج عنبو لسان طوله عشرين متر ما أقول غير الله يرحمك

حمده معقده حواجبها : على منو تترحمين

عذيجه : هههه وي ما دريتي ؟؟؟ الله يسلمج أترحم على اللي بياخذج

حمد مدت البوز شبرين ونشت عنها ,, سارت لروضه اللي قاعده أتنضف غرفة أمها وأتدخنها

عذيجه : حووووووووووه نحن هنا

وعد أنتبهت لها وأبتسمت لها أبتسامه تدل على أنها ما كانت وياها أبد ولا سمعتها

عذيجه أ أخبرج أحيده أبوي يباني أوعيه الحين بسير اوعيه وبرجع وأنتي لا تسرحين وايد مب زين الياهل بيطلع سرحان على طول ومبهت

وعد تبتسم غصب : ههه .. يعني الحين سلطان بيدوروحده بديله عني ؟؟؟ بس هو يحبني ... أنزين حتى مبارك يموت في عذيجه بس قص عليها وقال أنها سوت له عمل ... صح والدليل أنه طول فتره حملها ما فكر بهالشي ولا اكتشفه الا يوم ربت وبعدين كان ماخذ وحده مش مواطنه عشان يسهل عليه تطليقها ويردها بلادها بعد ولادة عذيجه

معقوله ياسلطان أهون عليك ؟؟؟ لا مستحيل أسامحك لو أتسويها مستحيل انت أكثر واحد عارف أني ما أتحمل فكره حد يشاركني فيك أنا لو الود ودي أتكون لي وحدي حتى أهلك ما يقربون منك...

هههه والله أقص على نفسي اذا عذيجه كانت عند ريلها ووياه فنفس البيت مل من طبايعها وتعبها الدائم يوم حامل وتزوج عيل كيف سلطان ؟؟؟ وأنا بعيده عنه وهو متعود على وجودي حوله والكلام الحلو اللي أسمعه إياه بعدد نبضات قلبه .. ينحرم من كل هذا فجأه أكيد بيدور على غيري عشان يسد هالنقص اللي يحس به في غيابي

هالفكره خلتها ترتعب مستحيل ترضى أنه وحده غيرها أتكون بحياته .. لبست عباتها سلمت على عذيجه وترخصت منها عشان ترجع بيت أبوها وتتصل بسلطان ترجع البيت وياه ...





أول ما دخلت البيت شافته يالس في الزوايه لام ركبته لصدره ومنزل راسه ... حاضن نفسه بقوه

وعد تتقرب منه بخوف : سهيل شو فيك ؟؟؟ سهيل شو صاير ؟؟؟ سلطان فيه شي ؟؟؟ سهيل رد علي الله يخليك شو مستوي ؟؟؟ حد فيه شي ,, أستغفر الله العظيم سهيل الله يخليك أرمس قول شي شو مستوي ؟؟؟

الخوف تسرب في داخلها للدرجه اللي خلتها تبدى أتصيح من دون لا أتحس ما تعودت من سهيل القوي الي بنظرها كتوم وشجاع يكون بهالضعف اللي أتشوفه فيه ... وما يهزه الا الشي العظيم واذا هالشي هزه يعني ممكن يحطمها بس شو الي مستوي ؟؟؟

وعد برجا : سهيل دخيلك أرمس طمني شو صاير

سهيل بعد تردد : ماصار شي لا أتصيحين

وعد بدت تتمساك أشوي : عيل أنت ليش جي غادي ويهك ؟؟؟ شو فيك حد مزعلنك ؟؟؟ وليش يالس هني عند الباب؟

سهيل : كنت أترياج

وعد: نش أدخل ويايه

سهيل ينش ويتجه صوب باب الحوي : لا خلاص أنا بروح

وعد أتيره من كم كندورته : عن المصاخه عقيت لي قلبي وألحين تبي أتروح !!! ادخل اشرب عصير وبعدين روح اذا تبا ... مم تعال أنت منو موصلنك ؟؟؟

سهيل : ما أبي خلاص وعد خليني على راحتي

وعد : لاما بخليك على راحتك وللحين ما رديت علي منو موصلنك ؟؟؟

سهيل : ييت بروحي

وعد: سهيل لا أتطولها وهي قصيره بتدخل يعني بتدخل طيب غصب فاهم يلا طوف جدامي

سهيل : ان شاء الله

بعد ما يلس وهدت نفسه وشرب عصير .... يتطالع وعد اللي مبحلقه فيه من يلس وتبي تفهم السالفه منه بس هو متردد يرمسها في الي بخاطره ياترى وعد هي الشخص المناسب اللي المفروض اتنشدها عن السالفه ؟؟؟؟أفففف يا ربي ساعدني كيف اطلع من هالمصيبه الحين هي مستحيل أتخليني أطلع من دون لا أتعرف شو صاير شو أقول لها ؟؟؟ يمكن هي روحها ما أتعرف لا أكيد هي بعد ما أتعرف ....

وعد : سهيل وايد بتم على هاي الحاله ساكت ما ترمس ؟؟؟

سهيل : ها لا ماشي

وعد تبتسم له بحنان : أفا يا سهيل ما تعودت أشوفك مهزوز وضعيف أنت شجاع

سهيل : ههه شجاع آآآآآآآآآآآآآآآآآآآآآآآه

وعد : الله يريح بالك أنت بس لو أتخبرني شو صاير بترتاح فضفض شو في خاطرك ؟؟؟؟

سهيل : ماشي بس أمي وأبوي كانوا يتضاربون وأنا ما قدرت أتحمل أشوفهم يغلطون على بعض تضايجت وطلعت من البيت ما كنت أعرف وين أروح جان أيي عندج

[الجنيه]

وعد : زين سويت يوم ييت عندي ,, سهيل ما أبيك تعطي الموضوع أكبر من أهميته كل المتزوجين أتصير بينهم مشاكل ويمكن يغلطون على بعض بس أنت لا تتحسس من هالموضوع يمكن أهلك غلطوا في أنهم خلوكم أتشاركون في هالشي بشكل أو بغيره بس أنت لا أتخلي هالشي يأثر عليك المشاكل ممكن أتصير بين أي أثنين حتى مب شرط المتزوجين يعني سوء الفهم يصير بين الأخوان والخوات والأهل والأصدقاء بس بعدين النفوس تهدى والقلوب تصفى

سهيل ياخذها على قد عقلها لأنها ما أتعرف بالطامه الكبرى اللي هو درى بها ,, يلس عندها ساعتين وبعدها خبرته أنه رايحه بيت سلطان وقرر يروح معاها وهو في باله شي واحد محد غيرها عنده الجواب لأسئلتي كلها .. أم سلطان .................................................. ..............

شهد : أففف وبعدين شو هالحاله

مهره : أشفيج أنتي مبرطمه وتتحرطمين ؟؟

شهد : شو بعد هو نفسه

مهره : اللي يطرش مسجات ؟؟؟

شهد : هي ،، الله ياخذه

مهره :ههه أشعرفج أنه هو مب هي ؟؟؟ يمكن وحده من ربيعاتج تبي أتخسس فيج عشان جي ماأترد عليج

شهد : عاد هاي مصاخه كلهم يدرون أني ماأحب التفاهات هاي

مهره : أنزين أنتي ليش ترفعين ضغطج على الفاضي طنشي وروحهم بيعيزون ... الحين خليج من هالسالفه ما رديتي عليه شو صار ذاك اليوم ويا سيف ؟؟

شهد : الله يلعنه لا أتيبين لي طاريه أكرهه تفهمين شو يعني أكرهه

مهره : أستغفري ربج ما أيوز تلعنينه حرام

شهد : غيري الموضوع بلييز وخبريني شو سالفة هاي أم سهيل

مهره : أنتي شو ما عندج أحترام لاي حد ؟؟؟

شهد: أستغفر الله العظيم وأنا شو قلت الحين ؟؟؟ بس أسأل شو بغت

مهره : ماشي تخطب

شهد : نعم نعم ؟؟ وتخطب منو ؟؟

مهره : جي أنا مب ماليه عينج ؟؟؟

شهد : ههه ماليتنها وفاضيه منها بعد بس استغربت أتحريت تخطبني أنا

مهره مبوزه: لا والله وجي بس انت اللي تنخطبين وأنا بنت البطه السوده يعني ؟؟؟

شهد : فديت روحج مهاري ما أقصد بس ما أعرف المهم قولي تخطبج لمنو ؟؟ ما أحيد عندهم ولد غير سهيل

مهره : أبو نوره

شهد : نعم نعـــــــــــــــــــــــ ـم أبو نوره ؟؟؟ شو الدنيا مصخره شو ؟؟ ليكون أنتي ناويه أتوافقين يا حظي ؟؟

مهره : والله للحين ما رديت على أمايه بس شو فيها اذا وافقت ؟؟

شهد : شو الله جابرنج تاخذين أرمل لا وعنده بنت

مهره : بس أنا أحبها وهي بعد

شهد : مهروه حبيبتي أنتي حلوه وما شاء الله عليج ما ناقصنج شي يعني لا أتوافقين لأنج أتحسين أنه قطار الزواج بيفوتج والله توج صغيره والعمر كله جدامج

مهره : أنتي لو ما أتعرفين ترمسين أسكتي يكون أحسن شو هالمره الماصخه بعد أي قطار زواج أي بطيخ ؟؟ شوفي أنا اذا بوافق بوافق وأنا مقتنعه به

شهد : أوووف كيفج سوي اللي تبينه ... بتزوجين وبتسكنين في العين ؟؟؟؟؟

مهره : أذا اللي باخذه ساكن هناك لازم بكون وياه

شهد : الله الله تعالي أنتي ليكون كنتي أتقردينين البنت عشان توصلين للأبو

مهره عصبت من خاطرها : يالسباله ياللي ما تستحين علىويهج يوم بتحديني بنت شوارع تعالي أرمسي هالرمسه فاهمه أصلاً أنا اللي أستاهل يوم أني أسولف وياج جلبي ويهج عني لا بارك الله فـــ ... أستغفر الله والله أنج أتطلعين الواحد من طوره

شهد أتبوسها على خدها بالقو : فديت روحج لا تزعلين ما قصدت اللي أنتي فهمتيه وأنتي محشومه يالغاليه بس كنت أسولف وياج أنزين

مهره : ما ابي شي منج خوزي عني

شهد : أفا مهاري ميرا بيار (حبي ,,, بالهندي )

مهره : ههههههه ياللوتيه أونج اتقردنيني بالهندي

شهد : شو أسويبج تراج ما ترضين بالعربي يمكن لو راضيتج بلغة أهلج تقتنعين

مهره أتفرها بالمخده: يالدبه أهلج أنتي نشي نشي شوفي تلفونج أذنا حشا مليون مسج في دقيقه

شهد: خليه يولي أكيد هالتافه مطرش

مهره : عطيني بشوف ... أويييييييييه شهود ألحقي يعرف أسمج

شهد بطلت عيونها على وسعهن : شووووووووووووووو

مهره : يالغبيه هاي أكيد وحده من ربيعاتج محد بيعرف اسمج غيرهن

شهد : والله براويهن في الكليه قسماً بالله بيشوفون شي مب زين والله

مهره : أنزين بسج توعد ونشي نتعشى ويا أمايه

شهد: بس همها بطنها

مهره : ما بطلع أحسن منج



...........................



في بيت عبدالرحمن

رويه : أنا كلمت أم البنت وقالت بنشاور البنت وبنرد عليكم آخر الاسبوع

هند : والله زين الله يوفقهم ويسهل الأمور ان شاءالله

رويه : الله يسمع منج

هند : حوووووووه نحن هنا

موزه : ها شو فيج أنتي يالدفشه

هند : محد دفش غير العيناوي

موزه : جب ما يخصج

هند : ههه ما يخصني أونه

رويه : أنتي متى بتيوزين عن أختج ؟؟؟ حشا واقفتلها مثل العظمه في البلعوم

هند : الله يسامحج ألحين أنا عظمة في البلعوم ؟؟؟

رويه : عاد أنا ما عندي سالفه يوم أرد عليج يالهذربانو

هند مبوزه : خلاص ما برمس وخلي موزوه تنفعج

رويه : موزان ردي على تلفونج أذنا فديتج

هند : طاعو حتى لو أتقطعها أتقطعها بحب وحنان مب أنا يحليلني

موزه : السموحه منج أمايه أنا بسير حجرتي شي في خاطرج ؟

هند : يعني ما يستوي أترمسين حبيب القلب جدامنا ؟؟؟

رويه : سيري غناتي الله يحفظج .... وأنتي حرام ان ما سكتي لا أنش وأغسل شراعج عنبو مب مخليه حد في حاله

هند : انزين دواج عندي يا رويوه جان ما يوزت بوسهيل بنت بو ثمنتعش سنه أتجدد شبابه ما أكون هندوه

رويه :طع مسودة الويه شو أتقول صبري عليه الحين براويج

موزه نشت عنهم ودخلت غرفتها عشان أترد على منصور



منصور : الحمدلله على السلامه

موزه : الله يسلمك والسلام عليكم ورحمة الله وبركاته

منصور : تتطنزين حضرتج ؟؟؟ لو ما رديتي مب أحسن ؟؟

موزه : منصور كنت يالسه ويا أمايه وأنت ما أتحب أكلمك يوم حد عندي شوأسوي ترخصت منها وييت غرفتي

منصور : بس كنتي تقدرين أتردين عليه و أتقولين لحظه لين أتين غرفتج صح

موزه متضايجه من أسلوبه : منصور ما صار شي لو سكرت كنت برد أدق لك

منصور : وأنتي تدرين زين أني ما أحب أتصل وما أتردين مره ثانيه ما أتعيدينها فاهمه

موزه : ان شاء الله

منصور : شو أخبارج

موزه : الحمدلله أشحالك أنت أن شا ءالله مرتاح

منصور : مزجم وبلاعيمي أتعورني

موزه : سلامتك ما أتشوف شر ... رحت العياده ؟؟؟

منصور : لا ما أبي تدريبي ما أحب المستشفيات والدكاتره

موزه : بس مب زين حبيبي روح عشان تاخذ دوا بتخف بسرعه ان شاء الله

منصور : أوهو قلت لج ما أحب المستشفيات

موزه : على راحتك

منصور : انتي ليش أتحبين أتزعليني ؟؟؟ مليون مره قايل لج لااتقولين هالجمله ما أحبها أنتي ما تفهمين ؟؟

موزه : منصور أنت ليش جي متغير علي شو فيك شو اللي قلبك علي ؟؟ عنبو من تتصل لين أتسكر أتفاتن وأتضارب شو فيك مليت مني ؟؟ اذا مب طايقني طلقني وارتاح

منصور بصدمه : نعم شو قصدج ؟؟ شو هالنغمه اليديده اللي متعلمتنها شوفي عاد أنا ما أطلق مني والدرب فاهمه والسخافه هاي خليها عنج يوم بتستوين حرمه سنعه وتسمعين الرمسه بتشوفين كل خير مني

موزه: منصور أنت متغير وأنا قلت لك من البدايه ما أحب هالاسلوب

منصور :موزان حبيبي أنتي ليش أتكبرين الموضوع ما صار الا الخير

موزه : منصور أنت على كيفك أتغير الموضوع متى ما تبي وأنا لازم أتأقلم ويا مزاجك ما أدريبك متى مستانس ومتى متضايج ما عرفتلك رسيني على بر

منصور: يا عمري يا حياتي أنتي تدرين أني أتنرفز بسرعه وخصوصا يوم أتصل وما أتردين بسرعه

موزه : بس أنت لازم تعذرني وما تنسى أني بعدني فبيت أهلي ولهم حق علي مثل ما لك وغيره لازم أتحط لي ألف عذر يوم ما أرد أنت ما تدري بظروفي يمكن أكون أصلي .في الحمام وأنت بكرامه أو راقده او برع الغرفه والتلفون فيها يعني ما يصير تحكم على كيفك

منصور :عاذرنج حياتي وعشان جي أقولج خلينا أنسوي العرس بسرعه عشان ما تتقيدين بحد أو شي وأكون وياج تحت سقف واحد أداريج وأتداريني

موزه : منصور أنت بديت تتغير وهالشي مخوفني وايد يمكن فكرت فلحظه أوافق على طلبك بس الحين مب متأكده أسمحلي ما أبي أندم

منصور: موزه أنتي مول مب صاحيه حد ساحرنج أكيد يوم بيي بوديج عند المطوع يقرى عليج

موزه : لا تتوهم أشياء ما لها وجود لا مسحوره ولا شي بس أنتي الي أجبرتني أتغير عشان أتماشى ويا أطباعك محيتني من الوجود ما أقدر أتخذ أبسط قرار من دون شورك ..حلو أنك أتحسسني بوجودك في حياتي وأهمية أني أشاورك في كل صغيره وكبيره بس المفروض تترك لي الخيار أنا وبس مب تفرض علي قراراتك كأنه مالي وجود



منصور :الحين ها كله أنا أسويه ؟؟؟

موزه: تبيني أذكرك أو أثبت لك ؟؟؟

منصور: ها

موزه : تذكر يوم الاسبوع اللي طاف قلت لك بروح ويا أمي وأختي السوق

منصور: أففف خلاص أنزين ... موزان أنتي مستويه نكديه

موزه : مشكور

منصور: وزعووووووووووووله نمبر ون

موزه : وأنت أبد ما يحتاي أرمس

منصور: فديت روحج والله أحببببببببببببببببببببببب بج مووووووووووت يا ناااااااااااااااااااااااا اااااااااس أحبها والله أحبها

موزه أحمرن خدودها وأستانست : أنت أتخبلني ما أعرف شو اقولك

منصور: قولي أحبك

موزه مستحيه : منصور

منصور: عشان خاطري

موزه بصوت واطي :أحبك

منصور : ما سمعت شوفي أنا كيف زاعجت حتى اللي يمشون حذالي يتحروني خبله أبيج أتزاعجين مثلي

موزه : أنت مينون

منصور: مينون في حبج ...

[شمه]

امممممم.. مبروووك عليكم.. و عقبالج..

بس انزين قولي ..بتموت موزه ولا لاء؟؟ و عقب كملي القصــــه..

بليـــــــــــــــــز..

[ربوع البلاد]

يلاااا نتريا بفارغ الصبر

[خيماويه]

السلام عليكم
مشكوره اختيه عاد لاتخلينا نتريا وايد
نحن بنتظارج

[الجنيه]

شمه
الله يبارك فحياتج وعقبالج ان شاء الله
بتعرفين مصيرها في هالجزء

ربوع البلاد

خيماويه
وعليكم السلام

ان شاء الله ما ببطي عليكم