أموت أنا في حبهم

[شمه]

لا .. ليش خلص الجزء,,,,,

شكــــرا.. بس اكيد نتريا التكملــــه

[الجنيه]

شمه .. شاكره لك المتابعه

أموت أنا في حبهم

الجزء الثالث والعشرون



حميد وبوسلطان وعذيجه وعارف سارو يتطالعون الصغاريه ...

عذيجه : ماشاء الله عليهم مثل القمر الله يحفظهم

حميد : الحمدلك يا ربي على سلامتهم .. يا ربي محلاهم فديتهم

بوسلطان : شوف شوف عيونه ماشاء الله عليه صوره من سلطان يوم صغير

أم سلطان : هي ماشاء الله حارب مره نسخه من أبوه ،، والبنوته طالعه على الأم

حميد : فديتها والله ،،

بوسلطان : الا ما درينا شو ناوين يسمون البنت ؟؟

حميد : ههه اذا ما خاب ظني يا غايه والا ماريه تراها من أستوت تبا هالاسمين حق بناتها

أم سلطان : الاسمين غاويين وان شاء الله بعد ما أتنش بنتخبرها عن اسم البنيه

بوسلطان : يلا عيل سرينا

رويه وعبدالرحمن : ووعد ؟؟

الكل التفت لهم

حميد : شو فيها وعد ؟؟

رويه : منو بيتم عندها ؟؟؟

أم سلطان : الحمدلله الحين ما عليها شر وما تحتاي حد عندها لنه عاطينها مهدئ وما بتنش الا بعد ثلاث أو أربع ساعات

رويه : بس ما يصير يا وخيتي أتنش وما تلقى حد عندها .. خلاص أنا بتم وياها

عذيجه : لا والله محد غيري بيتم عندها .. برايكم أنتوا من أمس ما ريحتوا أنا بتم عندها ...

حميد : بارك الله فيج يا بنتي ما قصرتي

أم سلطان : خلاص فديتج أنا بروح البيت بريح أشوي وبرد العصر وأول ما أتنش أم حارب دقي علي

عذيجه : ان شاء الله

رويه : أشوف منحازين حق حروب والبنوته فديتها محد عبرها

أم سلطان : ههه أفا عليج يالغاليه ترا حارب مولود قبل البنت بعشر دقايق

رويه : أها دام السالفه جذه خلاص عيل سامحتكم

عبدالرحمن : هههه والله أنتي الحين أم حارب والا باسم البنت تراها أمهم في الأخير

حميد : لا عاد كله ولا الغلا ما نرضى عليها ترى أنا حبي البنات أسمحلي فديتك "يرمس حروب "

بوسلطان : هههه برايكم أنتوا ويا بالبنت أنا خلوني ويا حروب ,,,

بعد ما راحوا كلهم عارف أستفرد بالصغاريه وتم يلاعبهم " طبعا هم رقود " وبعد ما ياب غدى لعذيجه راح وأشترى باقة ورد كبيييييييره ودبدوبين كبار واحد وردي والثاني أزرق حق حارب وغايه ... وبعدها راح البيت يريح لأنه هو بعد كان على أعصابه طول فتره ولادة وعد ...



العصر الساعه 4 وعد نشت من الرقاد وأول شي تلفت حواليها ما شافت حد وتمت تتلمس بطنها للحين مب متأكده اذا هي ربت والا كانت تحلم بهالشيء ,, بس تأكدت أنها ولدت يوم شافت الباقه الكبيره والدباديب " عذيجه ما قصرت خلت عارف أييب لها زينه أطفال وزينت فيها الغرفه " وعلى طول دقت على الجرس أتنادي الممرضه تبا عيالها ..

عذيجه وهي حادره الغرفه : الحمدلله على سلامتج يالغاليه ,, وأتوايها ,,مبروك ما ياج

وعد بتعب : الله يسلمج ويبارك فيج ,,, عذوج حبيبتي أبي أشوف عيالي ما شفتهم ؟؟؟

عذيجه : قمر وعدوه ما شاء الله عليهم قمر

وعد بلهفه : أبي أشوفهم

عذيجه : صبري بزقر النرس عسب أتييبهم

وعد : أنزين شو

عذيجه : شو شو ؟؟

وعد : أقصد توأم صح

عذيجه : ههه تستهبلين حلفي أنج ما كنتي أتعرفين

وعد : لا والله مب ما أعرف بس ما أعرف جنسهم واصلا ما دريت الا من شهر بس ما بغيت أقول حق حد بغيت أفاجأ سلطان " ودمعت عينها "

عذيجه أتبوسها على راسها : بنت وولد مثل القمر ... وما أبي أشوف الدموع في هالعين حشا صحتي صياح سنين في ليله

وعد بحسره : كيف ما تبيني أصيح وأنا

عذيجه أتقاطعها : وعدوه سكتي ما أبي أسمع شي الحين خليني بيب حروب وأخته

وعد : غايه .. فديتهم بسرعه عذوج

بعد خمس دقايق دخلت عذيجه شاله بيدها حارب والنرس أتدز منز غايه "منز : سرير الأطفال "

وعد خذت حارب بيد وحضتنه والدمعه على خدها وغايه بالايد الثانيه فديت روحهم .. وايد صغار عذوج

عذيجه : ما عليه ان شاء الله بيكبرون لا أتخافين وزنهم طبيعي

وعد : الحمدلله لك يا ربي والله أحس بموت من الفرح

عذيجه : باسم الله عليج شو هالرمسه

وعد : طاعي عيونهم صغيييييره الله كشخه

عذيجه : أي يالخبله هاييل مب ألعاب

وعد : ما يحتاي أتقولين لي هاييل قطعه مني وأنا أكثر وحده أعرف أنهم مب ألعاب

عذيجه : أنودكم أونه الحين مستويه أم الحكم خلني عنج يلا

وعد وهي تتطالع الباقه : هاييل من منو ؟؟

عذيجه : من الحب

وعد بفرحه : سلطان ؟؟

عذيجه : طاح حظج أي سلطان ؟؟ سلطان ولا يدري وين الله حاطه هذا حب الطفوله عارف

وعد : عذوج شو هالرمسه بعد والله أنتي حركات

عذيجه : ما قلت شي غلط عطيني خطيبي لو سمحتي بسولف وياه

وعد : ههه بخبر عليج مستر مبروك

عذيجه تقرصها على خدودها : وعدوه يالسخيفه لا أتقولين له مستر مبروك مالت عليكم

وعد : يالدبه لا أتقولين مالت عليكم فديتهم ما يخصهم ما سوولج شي بتسبين سبيني أنا

عذيجه أتبوس حارب: فديتهم حشا علي ما طريتهم أطريج أنتي وعروف السخيف هو بعد يقوله مستر مبروك

وعد : هههههههههه والله أنه فنان

عذيجه : احم احم

وعد : جب ...



بعد أشوي بدت الزيارات لوعد والكل تحمد لها بالسلامه ... حميد وبوسلطان ما يتحركون من المستشفى الا للصلاه ويبدلون ملابسهم ويرجعون ..

في هالوقت الغرفه كانت مليانه على الآخر وطبعا وصلوا عمام اليهال سعيد وسيف وخليفه وعياله وياهم سالم أم سلطان خلتهم يدخلون لأنه ما في حد غريب عوشه وبناتها ورويه وهند بس

دخلوا الشباب وتحمدوا لها بالسلامه وقعدوا

خليفه : الحمدلله على سلامتج يا أم التوأم ومبروك ما ياج

وعد : الله يسلمك ويبارك فحياتك

عنود ونجود : يا سلام والله وناسه أخيراً في غيرنا توأم في العايله

غيث مستانس : ماما بشوفهم

أم سلطان : زين يا بويه صبر خل الكبار يشوفونهم بعدين بخليط أتشلهم شو رايك

غيث يهز راسه : لالالا بس بشوفهم ما أقدر أشلهم أخاف يطيحون

خليفه : فديت عمري والله لا أتحاتي حبيبي أنا بشلك فحضني وأنت شلهم أنا بيودهم لك

سهيل : ماشاء الله عليهم البنت أتخبل والله

سعيد : ههه والله أنك مب هين عيل أنت بعد طالع راعي بنات شرات أبوك

خليفه : غربل الله ابلسيك شو هالرمسه ؟؟ فديت البنات والله " ويحضن بناته "

سعيد : ههه أسولف وياه أشفيك أنهديت علينا مره وحده

خليفه : أشوفك أتسولف هالسوالف مره ثانيه لأذبحك

أم سلطان : باسم الله عليه شو هالرمسه الله يهداك يا بوسالم

خليفه : فديت روح اللي أتخاف على ولدها أتغشمر وياه أفا عليج هذا ولدي تراه هب أخوي ,,, عاد سمحولي الحين بروح عند الوالد بسلم عليه ..

أم سلطان : الله يحفظك ...

سيف : فديت اللي تشبه عمها والله أحبها مووووووت خلاص باخذها

وعد: نعم نعم ؟ جني سمعت اشاعه

سعيد : ههه متفائل الأخ ،، عاد حروبي سكتوا عنه محد يقدر ينكر شبهه فيني

وعد : وأنا أشهد

سالم : هي والله الصراحه جنه ولدك

سيف : هي أنا ماكل حلالكم أتدورون ضدي ؟؟؟

أم سلطان " بعدها زعلانه منه " : والله الحق حق

سيف : فديت المبوزين أنا

عوشه : الا وين بو حارب ماله شوف ؟؟؟

أم سلطان : مسافر باجر الصبح ان شاء الله بيرجع

هند شاله غايه وتلعب وياها وفجأه نشت وبطلت عينها جان تستانس وترمس بصوت عالي

هند : أويه فديتها وعدوه شوفي عيونها كيف صغار " سكتت لأنها تفشلت يوم الكل صد صوبها "

سيف فخاطره : يا ويل حالي على الصوت والله أنه غاوي مثل راعيته

سعيد يوزع ابتساماته

رويه دقت هند أتنبهها يعني أنجعمي

أم سلطان : ههه فديتج تراها بعدها صغيره لازم جي بيكونن عويناتها

سيف يتطالع شهد من دخلو بس هي مطنشتنه ولا جنها أتشوفه فقرر أنه يغايضها

سيف : مهره مبروك

مهره مستحيه : الله يبارك فحياتك

سيف: متى الملجه ان شاء الله ؟؟ أعتقد اليوم صح ؟؟؟

عوشه اترد عنها : هي والله المفروض اليوم بس بنأجلها للسبوع الياي

وعد : ليش الله يهداكم لو ملجتوا

رويه : لا فديتج ما يصير نملج وأنتي توج مربي

سيف : هي أوه تذكرت صدق........... شهدوه مبروك

شهد بحقد : الله يبارك فحياتك

سيف : منو هالي بياخذها ؟؟

عوشه : خو وحده من ربيعاتها ريال والنعم فيه

سيف : يبالي اعطيه نصايح عشان يستفيد منها دام أنه بياخذ الملسونه

أم سلطان عصبت :سيف تراك مصختها مستوي ما أتحشم حد قم نش روح أبرك لك

سعيد يتطالعه بنص عين : شو أستخفيت ؟؟

عوشه : ما عليه يا أم سلطان تراه يسولف

شهد : والله يوم بتحيده يشتكي لك مني حزتها عطه نصايحك الثمينه الي فادتك بحياتك لليوم وبعدين اسمي شهد هب شهدوه ما أحيدني أصغر عيالك

سيف كان ناوي يرد عليها بس سبقته أيد سعيد اللي يره عشان يروحون الغرفه الي حذالهم وين يالسين بوسلطان وحميد

سعيد سمحولنا بنترخص عنكم بنسلم على الشواب يلا سيفان سرينا

رويه بعد ما طلعوا : شو بلاه سيف .؟؟؟ جنه الا شال بخاطره .. ليكون كان خاطره فوحده من بنات عمه ؟؟

أم سلطان : لا يا وخيتي لا خاطره ولا شياته الا هو متعود يتناقر ويا شهد

وعلى هالحاله تموا لليوم الثاني ...

,,,,,,,,,,



اليوم الثاني الساعه 11 الضحى

في مطار دبي الدولي سعيد وبوسلطان وأم سلطان واقفين لاستقبال سلطان وحرمته وولده عبد الله ...

سلطان أول ما شافهم كان وده يطير لهم ومشى صوبهم بسرعه وحضن أبوه وسلم عليه ونفس الشي ويا أمه وسعيد

سلطان : أشحالكم والله ولهت عليكم

بوسلطان : الحمدلله على السلامه يا بوحارب

سلطان : الله يسلمك يالغالي

سعيد : مبروك ما ياك بوحارب

سلطان طاير من الفرحه : الله يبارك فيك يا بوعسكور وعقبالك

سعيد : آمين

أم سلطان وهي تحضن عبدالله وأتبوسه : اشحالك حبيبي

عبدالله : بخير ماما أحبج " وتركها وربع لبو سلطان اللي رفعه لفوق وتم يبوسه

مزنه وصلت عندهم وسلمت عليهم

أم سلطان تحضنها : الحمدلله على سلامتج يالغاليه

مزنه وعيونها تدمع لأنها أخيراً بفضل الله وثم سلطان قدرت أتشوف هالملاك اللي حبتها من أول لحظه وتذكرت أمها اللي تاخذ من ملامح أم سلطان فأختلطت مشاعر الفرح بالحزن وحضنتها وهي أتصيح : الله يسلمج الحمدلله أني قدرت أشوفج يالغاليه الحمدلله

بوسلطان وسعيد : الحمدلله على سلامتج يا أم عبدالله

مزنه : الله يسلمكم من الشر

طلعوا من المطار بسيارتين سعيد وسلطان للمستشفى ،، بوسلطان وأمه ومزنه وعبدالله للبيت



في سيارة سعيد

سلطان : بسرعه يا خي والله ما فيني صبر

سعيد : انزين الحين صابر من أمس تريا أشوي عشر دقايق وبنوصل

سلطان : لا ما أقدر أصبر ولا ثانيه فديت روحها وعودتي

سعيد يبتسم : الله يخليكم لبعض

سلطان: اتهقا بتكون زعلانه مني ؟؟

سعيد : الصراحه متأكد أنها زعلانه ولها الحق

سلطان : شو

سعيد : هي سلطان أنت ليش مددت سفرتك ؟؟؟ يعني أنتي تدري أنه ولادتها قربت كيف تتركها في الوقت الي هي محتايتنك فيه ؟؟ صح أنت مب ساير كشته بس بعد كان المفروض من أتخلص عملية مزنه ويتحسن وضعها ترجع

سلطان : سعود أفهمني والله غصبن عني ما أدري ليش حسيت بضعف يوم طلبت مني مزنه أنطول أشوي أعتقدت أنه هذا من حقها الطبيعي وقلت ما فيها شي لو تمينا أسبوع زياده وصدقني أنا حاط في بالي أنه وعد بتولد بداية الأسبوع الياي على الي قالته الدكتوره

سعيد يتطالعه بنص عين : سلطون ؟؟ خل عنك أنت تدري أنه الولاده مب دوم أتكون على حسب الموعد الي يحدده الدكتور ...

سلطان : سعود لا أتعور لي قلبي يلا عنبو وين هالمستشفى ؟؟؟

سعيد : ويلكير يعني يبالنا وقت لين نوصله

سلطان : اففف ليش المطار بعيد هالكثر ؟؟

سعيد : ههه الله يعينك ويصبرك



كل ما تقربوا من المستشفى دقات قلبه أتزيد والخوف يتزايد فقلبه يا ربي ما تزعل مني يا رب أتسامحني ,,, كيف أقدر أجابلها ؟؟؟ يا ربي الطف فيني .. وأنتبه لوصولهم وعلى طول فج الباب ونزل بس رد لسعيد اللي ناداه

سعيد : أقول سلطان

سلطان : ها ؟؟؟

سعيد : كم يبالك هني ؟؟

سلطان : شو كم يبالك ما أعرف بس أكيد وايد ليش ؟؟؟

سعيد : أهاا أنزين شو رايك أرد لك بعد ساعتين يكفنك ؟؟

سلطان : ليش وين بتروح ؟؟ بتخليني بروحي ؟؟

سعيد : ههه الله يهداك وأنت وين ساير ؟؟ بتحارب ؟؟؟ روح لها روحك وبعدين عندي كمن شغله بخلصهن وبرجع لك

سلطان : أها أنزين عطني فلوس

سعيد : هه باسم الله عليك شو ياك ؟؟؟ كم تبا

سلطان :لا تتفلسف وايد ما عندي فلوس أبي آخذ ورد وحلاوه وألعاب وسوالف

سعيد : لا حول صدق بتفقرنا أندوك عندي سبعميه خذ الخمسميه وخل الميتن بحتايهن

سلطان وهو ياخذ الفلوس : أوكي مشكور يلا باي

سعيد والله وطردني ... وكمل دربه



سلطان مر على محل الورد اللي في ويلكير وخذ باقه كبيره وبطاقه كتب فيها آسف وطرشها ويا راعي المحل لغرفة وعد وبعدها راح للمحل اللي عنده وخذ ألعاب للصغاريه وراح لها ...



عذيجه كانت عند وعد وعارف يالس ويا حميد في الغرفه الثانيه ,,,

عذيجه : منو ياي هالحزه ؟؟

وعد : ما أدري والله يمكن عمتي

عذيجه بطلت الباب وخذت الباقه وردت داخل ,,: ورد للورد " وهي أتحط الورد عند وعد "

وعد مستغربه : من منو ؟؟

عذيجه شلت البطاقه وقرت كلمة آسف : ما أدري أندوج أقريها روحج .. المهم وعدوه أنا بروح الحين وبييج العصر اوكي

وعد : تعبتج ويايه

عذيجه : فديتج ما مبينا هالكلام يلا بتصل بج قبل لا أيي اذا بغيتي شي أوكي

وعد :اوكي

عذيجه نادت عارف وراحت .. في الممر تلاقوا ويا سلطان ,, سلموا عليه وباركو له بالمواليد اليدد وترخصوا عنه ...

وحميد كان طالع وتجابل ويا سلطان سلم عليه وبارك له بولادة وعد وترخص عنه على أساس يرجع العصر وطلب منه يسلم على وعد " طبعاً حب يتركهم روحهم عشان جي ما خطف يسلم عليها "

يمشي يدعي ربه يساعده ويهون عليه لقاءه ويا حبيبته أم عياله وعد .. طبعا من خوفه قرر يواجه وعد بعدين يشوف الصغاريه ....

دخل الغرفه شافها ماسكه البطاقه والدموع مخرسه ويها ،، تقرب منها بسرعه ومسح دموعها وحاول يحضنها بس هي بعدته عنها وصدت بويها الصوب الثاني

سلطان : حبيبي آسف والله آسف ما كان قصدي يصير اللي صار والله ما تدرين أشكثر متندم أني ما كنت وياج وقت الولاده بس صدقيني بعوضج ان شاء الله ,, مرت فتره عشر دقايق والاثنين ساكتين

سلطان يكسر حاجز السكوت : الحمدلله على سلامتج يالغاليه أم الغوالي

وعد قررت أنها ما أترد عليه ولا أتكلمه عشان يعرف أنها زعلانه منه ومب راضيه عنه ...

سلطان طلب من الممرضه أتييب له اليهال وتم يسولف وياهم وكل دقيقه يكلم وعد بس هي مسوتله طاف ما أترد عليه ولا اتعبره ،، مرت عليه أكثر من ساعه ووعد مب طايعه حتى أتشوف ويهه

سطان خنقته العبره وما تحمل : وعد حرام عليج اللي أتسوينه فيني والله كل شي صاار غصبن عني صدقيني ما كان بيدي شي اسويه وما سويته ليش اتعاقبيني على شي مالي ذنب فيه ... ربج كان رايد أني ما أكون موجود يوم تولدين خلاص عاد كم مره أعتذر منج

وعد : ............ " سكوتها يذبح "

سلطان وهو طالع وقف عند الباب " و وعد ما التفت حتى أتشوفه وهو طالع " : خلاص اذا كان هذا ردج وهالي تبينه ما بغصبج على شي ما تبينه أنا توني راجع من السفر وعلى طول ييت عندج من شوقي ولهفتي لج بس الظاهر مالي مكانه فقلبج اللي تحول حجر بسبة شي ما لي دخل فيه ,, ليش ما اتردين علي تكلمي ...

وعد حست أنه السالفه مصخت هي أساساً متخدره من الدوا اللي عطتها النرس قبل لا يدخل سلطان بشوي ...

وعد بتعب : سلطان أنا تعبانه ممكن أنام

سلطان أنصدم : يعني ساكته من الصبح ولا رديتي علي بكلمه ويوم رمستي تبيني أطلع ؟؟؟ أنتي ليش جي مستويه قاسيه ؟؟

خلاص هالكلمه خلت وعد تنفجر وأتقول كل اللي بخاطرها ..

وعد : الحين أنا أستويت قاسيه ؟؟؟ ليش ما أتشوف نفسك شو مسوي ؟؟ تاركني في أصعب فتره ومرحله من الحمل وقريب الولاده وساير اتجابل ربيعك أوكي سو خير في الناس بس الأقربون أولى بالمعروف يعني عادي عندك أنا أموت أو يصير فيني شي بس ربيعك لا؟؟ ليش ياي أتحاسبني على شي أنت كنت السبب فيه والغلطان ؟؟ أبي أفهم مب من حقي أعاتبك على الي سويته ؟؟ مافي انسان يترك حرمته في الوقت اللي هي محتايتنه فيه ... ما تدري صعوبه الليالي الي مرت عليه وأنا أتألم ومب لاقيه حد أشكي له ولا بـ لاقيه انسان حنون يحتويني يطمني ويهون علي آلامي .. أعترف أني قاسيه بس منو كان السبب في زرع هالقسوه في قلبي ؟؟؟ سلطان أنت مب ملزوم فيني وعيالك ما اقدر أمنعك عنهم بس خلاص أنا ما عدت أحتاجك بشي وتعودت أعيش من دونك ,,, والحين أسمحلي أرتاح لأني حاسه أن روحي بتطلع من الألم ...



سلطان واقف على الباب ومستغرب ما تخيل وعد تنفجر فويهه بهاي الطريقه .. أنا أدري أني الغلطان والسبب في اللي هي فيه بس هذا ما يعني أنها أتعق اللوم عليه ولا تسمعني " عصب وطلع عنها يمكن تهدى اعصابها بعدين برمسها "



وعد مغمضه عيونها واترص عليها عشان ما أتدمع "ياربي أنا شو سويت هذا بدل لا أقوله تولهت عليك وأتطمن عليه ,, أفف بس هو يستاهل أبيه يحس بحجم الألم الي سببه لي بتصرفه ,, "



,,,,,,,



سلطان طلع من عند وعد وشاف سعيد يترياه وراح معاه البيت ووأول ما وصل شاف مزنه ماخذه راحتها على الآخر يعني حطت شنطتها وأغراضها في غرفة وعد ،، سلطان صك الكيج عنده وأشتط عليها وين تبا هاي ؟؟

سلطان يزاعج عليها : أنتي بأي حق أتسوين جذه ؟؟؟ تخبلتي والا كيف .؟؟

مزنه ببراءه : أنزين أنا ما سويت شي بس الا حطيت أغراضي ورتبتهن

سلطان : مزنه أنتي أصلا منو يابج البيت هنيه ؟؟ ليش ما رحتي بيتنا

أم سلطان تحدر الغرفه : هيد يا أبويه أشو فيك معصب جذه أنا قلت لها أتي ترتاح عندنا اليوم وباجر أتروح بيتها جان مستحبه ..

سلطان متفاجأ ومبطل عيونه على وسعهن : يا أمي الله يهداج أنتي كيف تتصرفين جذه ما تدري أنه وعد بترجع البيت باجر وبعدين هي ما أتحب حد يلمس أغراضها أو يحركهن من محلهن

أم سلطان : يا بويه شو مستوي عليك تراها بتروح عند أبوها لين أتخلص الأربعين

سلطان : شو ؟؟ أتروح عند أبوها ؟؟ ليش ما يحتاي

أم سلطان : أشقى بعد ترا الوحده من تربي أتروح عند هلها

سلطان : بس هذا لو كانت عندها أم أو خوات يعني حج يساعدها ويا الصغاريه بس وعد منو لها غير أبو حليله اللي فيه مكفيه ما يقدر يسوي لها شي على الأقل هني أنا موجود وأنتي موجوده بنتعاون ولا تنسين أنهم توأم يعني أشوي صعبه أنها أتدير بالها عليهم

أم سلطان : والله على راحتها أتسوي اللي يريحها وحميد وده أتم عنده لو كمن يوم

سلطان : ما أعرف بس أنا مب مرتاح ومزنه اليوم بردها البيت

أم سلطان : حرام يا سلطان أنك ما أتردها ويدي خلها أتبات الليله عندنا وباجر يصير خير

سلطان : يا أميه كيف تبيني أخليها أتنام مكان وعد وتاخذ مكانها مب فغرفتها بس حتى في قلبي ؟؟؟

أم سلطان أتحاول أتسكته : أشش وطي حسك حسبي الله على ابليسك من صبي مزنه بتمسعك

سلطان : الله يهداج يا أميه بس

أم سلطان : لاأتبسبس لي ما فيني على صدعة الراس والأذيه

سلطان : كيف أتفكرين يالغاليه ما فكرتي بعيال خليفه اذا شافوها شو بيقولون ؟؟ أكيد بيسألون وان عرفوا من تكون لازم بيرمسون جدام وعد

أم سلطان : محد بيرمس و لا شي وعبدالله من يينا وهو يالس عندهم

سلطان بصدمه : شو ؟؟؟؟؟؟ هادتنه عند عيال خليفه !!! يا أمي أنتي شو أتسوي الله يهداج عيال خليفه مب صغار يفتهمون وعبادي بيرمس جدامهم يا ربي شو هالورطه " وتم ماسك راسه يحاول يفكر بالمصايب اللي بتحل عليه من فعلة أمه "

بوسلطان وهو حادر الصاله وماسك عبدالله بيده : السلام عليكم .. شو فيك يا بويه محتشر من وصلت ؟؟ ومزنه وين رايحه في عز القايله ؟؟

أم سلطان و سلطان ردو السلام : وعليكم السلام

سلطان : شو فيها مزنه شو فيها ؟؟؟

بوسلطان : أشوفها لابسه عباتها وتترياك برع شو عندها ؟؟ وين سايره ؟؟

سلطان :أفففف الحين هذا وقته دلعها هاي الثانيه والله تعبان هلكان بمووووووووت حسوا فيني يا ناس

أم سلطان : والله محد قالك أتعج الرمسه عليها وتباها تسكت

سلطان بعصبيه : أفف أنا شو الله بلاني ،، ونش سار لها

مزنه والدموع تنزل من عيونها واقفه برع في الحوش

سلطان : شو فيج ؟؟

مزنه : سلامتك مافيني شي بس ودني البيت

سلطان : مزنه أنا تعبان أبي أريح ممكن تدخلين داخل والعصر يصير خير

مزنه : ما عليه أنت روح أرتاح بس عطني مفتاح الفله بروح ويا الدريول

سلطان : خلاص أنا آسف يلا عادي والله الي فيني كافيني

مزنه : بكل بساطه أتقول آسف ما جنك جرحتني

سلطان : يا مزنه حسي فيني اشوي وعد زعلانه مني ومب طايقتني

مزنه : أعتقد قلت لك من قبل ماله داعي أتييب لي طاريها ممكن ؟؟ لأني أنسانه وعندي مشاعر وأحس اذا كنت نسيت

سلطان يتنهد : أستغفر الله العظيم ،، أنزين ممكن أتأجلين هالنقاش لبعدين وندخل الحين

مزنه : ما عندي مانع بس دخيلك سلطان أنا ما أبي أحس أني أتطفل على حياتك أنت قلت لي بعطيج كل حقوقج وبعوضج عن اللي أنحرمتي منه وأتمنى يكون هالشي من خاطرك ,,

سلطان بابتسامه : الله لا يحرمني منج

دخلو الصاله وتغدو والكل دخلوا يريحون ... في غرفهم ....



المسا عذيجه وخواتها ساروا لوعد وتموا قاعدين عندها لين أنتهى وقت الزياره وعارف رد ياخذهم وطلب أنه يسلم على وعد ويتحمد لها بالسلامه ,, حميد ما كان عنده مانع بحكم أنه عارف ولد جيرانهم ورابي وياها يعني شي طبيعي يسلم عليها وخبرو وعد اللي تحجبت عدل ودخل عارف

عارف : السلام عليكم ورحمة الله وبركاته

وعد : وعليكم السلام والرحمه ,,,

عارف : الحمدلله على سلامتج يا أم عارف

وعد: الله يسلمك ويبارك في حياتك

عارف : ههه أنزين بعدني ما باركت لج

وعد انحرجت " لازم يقفطني أفف منه " : ههه لا عادي أنا أرد مقدماً

حميد : ههههه أنتوا ما أتيوزون عن سوالفكم ؟

عارف : أنزين أنا عندي طلب صغير ممكن

وعد : آمر اذا شي أقدر عليه ما يغلى عليك

عارف : هو شي تقدرين عليه بس اذا تبين عموما طلبي هو غايه

وعد : شو فيها ؟؟

عارف : أبي أخطبها ممكن

وعد : ههه الحمدلله والشكر ليش أنا خبله أيوز بنتي واحد شراتك؟؟

عارف : أفا ليش أنا شو فيني ؟؟ والله فارس أحلام وايد بنات

عذيجه : عيل شوفلك وحده من هاييل وخذها أشعنه حاط عينك على غايه

عارف : والله الناس أذواق صح هي خسفه وصياحه ودلوعه مثل أمها بس شو أقول غير القلب وما يهوى

[الجنيه]

وعد : نعم نعم ؟؟ ترا ما أرضى عليها أنزين ييب عيال وتم ذمهم على كيفك

حميد : عارف أشوفك مصختها بديت تغلط على القلب " وهني صاح حارب "

عذيجه : فديتك حبيبي والله زعل كلهم يتجاتلون على هالدبه غايه وأنت حليلك ما لك غيري

وعد تاخذه منها وأتبوسه : خلاص حبيبي أنا عندك شو تبا بعد

عارف : ههه والله شكلج يضحك ما يليق عليج أتكونين أم أنتي روحج للحين دلوعه

عذيجه منصدمه منه " ها شو بلاه غبي وا لايتغابي ؟؟؟ " : عروف شو رايك تقلب ويهك ونطلع لأنها الساعه 8 وخلاص أنتهى وقت الزياره

عارف حس أنه مصخها لأنه حميد أتطالعه بنظره بتسكت والا ارقعك بكف : ها هي أوكي يلا مع السلامه

نش وطلع وخواته وياه

روضه : ههه عارف جنك قطعتها أشوي ؟؟

حمده : أشوي أنتي ما شفتي عمي حميد كيف كان يطالعه والله أشوي ويرقعه ببكس على حلجه

عذيجه : عارف تراك أنت وايد ماخذ راحتك والناس محشمينك عيب اللي سويته أدري أنت مب ياهل والمفروض ما أقولك هالرمسه بس عيب وأحترم الناس اللي محشمينك

عارف ساكت ماله ويه يرد على حد " أصلا أنا ليش دخلت أسلم ولو سلمت كان لازم أصير حمار وأخربط في الرمسه جذه ؟؟ ألحين شو بتقول عني أكيد بتقول غبي ما يفتهم مثل دوم بس هي متعود على اسلوبي وتدريبي ما أقصد اللي أقوله .. أووووووه أنا ليش معور راسي الي صار صار ما أقدر أغير شي الحين وأنتبه لعذيجه اللي أتقوله وين السياره ..

عارف : خلكم هني أنا بييب السياره

الكل : أوكي

في غرفة وعد

حميد : زين يا أمايه خلاص أنا بعد بروح البيت بريح اشوي

وعد : الله الله بعمرك يالغالي

حميد : ان شاء الله يالعيوز ,, ما قالولج متى بيرخصونج ؟؟

وعد : بلى

حميد : وين ناويه ان شاء الله

وعد : ممم أولاً لاأتخبر حد أني بطلع باجر الظهر وثانياً تعال خذني أول بنروح البيت باخذ أشويه أغراض وبعدين بنروح بيتنا مع أنه أم سلطان قالت لي لا أتروحين بيتكم خليج هني عشان تلقين حد يساعدج

حميد : أفا وأنا وين رحت ؟؟

وعد : أنت موجود بس هي قصدها يعني أنا ما أعرف لليهال وهي بتساعدني

حميد : ليش نسيتي أني أنا اللي مربنج يوم أنت بنت شهرين ؟؟؟!!!

وعد : فديت روحك ما نسيت أنت الخير والبركه

حميد : خلاص عيل بمرج باجر الظهر ... وسلطان شو رايه

وعد: ما أعرف أنا ماقلت له المهم باباتي مرني باجر الساعه 3 بعد الغدا

حميد : ان شاء الله بس على شو ناويه الحين ؟؟

وعد: خلاص باباتي بتم عندك كمن يوم اذا شفت أني ما أقدر أتصرف روحي وياهم برجع البيت أوكي

حميد : تمام وايد زين لأني ماخذ اجازه اسبوعين عشان أتفرغ لج ولعيالج

وعد أتبوسه على راسه : مشكور يا أغلى أبو في هالدنيا كلها ...



,,,,,,,,,,,,,,,,,,,,,,,,,,,,,,,,,



ثاني يوم عند الغدا الكل قاعد خليفه وعياله وبوسلطان وأم سلطان وسعيد وسيف

بوسلطان: سيف بويه نش أزقر أخوك للغدى وبعد الغدا بغيتك بسالفه

سيف ناش غصباً عنه : ان شاء الله ,, " طبعا بحكم أنه وعد مش موجوده سيف دق الباب مره وحده وبطل الباب عشان يقول لسلطان غدا وبيطلع ما يبي يحتك فيه وأول ما فتح الباب أنصدم من منظر مزنه اللي كانت ماده أيدها عشان تاخذ الشيله وتتغطى أول ما سمعت صوت الباب تم مبهت يتطالعها وأنحرج فسكر الباب على طول ورد الصاله "

أم سلطان : ها بويه زقرت خوك ؟؟

سيف ييلس عندها وبصوت واطي " زقرته بس منو اللي وياه ؟؟"

أم سلطان: حرمته يعني منو ؟؟؟

سيف : وشو أتسوي هني ؟؟

أم سلطان : شو ياك اتخبلت شو بعد بتسوي ؟؟ بيت ريلها

سيف مصدوم: ووعد ؟؟؟

أم سلطان : خير شو فيها وعد ؟؟ مافيها الا العافيه

سيف: أنتوا شو صار لكم ليش جي مستوين حرام عليكم ترضون على بنت الناس هي بشو ضرتكم أبي أفهم " طبعا على صوته وهو يرمس الشي الي ضايق خليفه ما يحب حد يرمس أمه بصوت عالي "

خليفه : سيـــــــــف ,, ماله داعي اتعلي حسك عليها فاهم

سيف: السموحه بس أنا مب قاصد

فهاللحظه دخلت مزنه ويا عبدالله وسلطان سلموا والكل ألتهو بالأكل

سيف يتطالع سعيد وفي خاطره :ليش جي يسوون ؟؟ شو صار لهم واقفين ويا سلطان وعاجبنهم الوضع وهاي الفقيره شو ذنبها يا ربي ليش جي مستوين شو صار لهم ؟؟؟



,,,,,,,,,,,,,,,,,,,





في بلجيكيا



محمد : والله احسن أني أسعد انسان في هالوجود

العنود تبتسم له : عسى دوم ان شاء الله ،،

محمد : مم ما قلتي لي وايد بتمين جيه مستحيه مني ؟؟

العنود أحمرن خدودها : لا أنا مب مستحيه

محمد : عيل ليش يالسه بعيده جذه

العنود : ها ماشي والله عادي

محمد : أنزين غمضي عيونج

العنود : هه ليش

محمد : أخيي أنا ما أحب جي يوم أقولج شي سويه بدون نقاش انزين

العنود : ان شاء الله وغمصت عيونها

محمد تقرب منها وباسها على خدها

العنود استوت طماطه ,,,

محمد : الحين لازم أتردينها

العنود بحيا: محمد

محمد : عيونه يا قلبه يا عمره

العنود : لا اتكون جذي استحي

محمد : حبيبي ليش تستحين أنتي حرمتي حلالي محد له خص فيج وبعدين أنا أحبج

العنود بصوت واطي : وأنا بعد

محمد : عنوده حياتي أببيج ترمسين أتقولين لي شو فخاطرج ؟؟؟ خاطري أعرف شو اللي يسعدج وشو الي يضايقج

العنود : ممم أحب كل شي وأول انت

محمد : فديت روحج والله ،، حاس أني ملكت الدنيا وياج

العنود : ممم شو أقولك وأنا ما تتخيل السعاده اللي حاسه فيها ما كنت متصوره ايي هاليوم

محمد : بالعكس وحده بجاملج ما أتقول هالرمسه

العنود : هه جمالي ؟؟ ألحين أنت أتشوفني جميله ؟؟؟

محمد : وأجمل الجميلات

العنود : وينها ميثا عن هالرمسه

محمد : منو ميثا

العنود : المفروض أعز ربيعاتي

محمد : المفروض ؟؟؟ شو السالفه ؟؟

العنود : تذكرها اللي رمستك عنها قبل ريلها أخو سلطان ريل وعد

محمد : هيييييي حرمة خليفه ؟؟

العنود : هي

محمد : ما حضرت عرسنا ؟؟

العنود : لا أصلا ما أدري عنها شو صار فيها

محمد : ليش شو بلاها ؟؟

العنود : من كم شهر ريلها شل عيالها وسكن فبيت أهله هي ما طاعت أتروح معاه

محمد : وعادي اتودر عيالها ؟؟

العنود : هه ليش هي متى أهتمت فيهم ،، ما علينا منها شو رايك نطلع الجو وايد حلو

محمد : وأنا أقدر أرفض لقلبي طلب

العنود : الله لا يحرمني منك

محمد : ولا منج يالغاليه ..



،،،،،،،،،،





فبيت عوشه ..

عوشه : بس يا بنتي ما يستوي مودره عيالج وأتهايتين كل مكان

ميثا بعصبيه : شو أهايت ترا هم ما يبوني شو أسوي بالغصب أخليهم يحبوني ؟؟

عوشه : والله ما أعرف شو أقولج الناس كلت ويوهنا

ميثا :أشعلي أنا من الناس المهم الحين شو سالفة بناتج ؟؟

عوشه : أي سالفه

ميثا : هاي الخبله مهروه من صدقها بتاخذ هالارمل اللي عنده بنت ؟؟

عوشه : استغفر الله العظيم ،، شو هالرمسه

ميثا: واللع غبااااااااااااااء ما أدري كيف قصوا عليها وين تبا تاخذه

عوشه : لا اله الا الله ما يخصج أنتي هي راضيه أشتبين منها

ميثا: كيفها والله حشا شو اللي كالفنها اتوافق عليه ؟؟؟ توه الناس عليها وقطار الزواج بعده ما فاتها عشان ترضى بأي حد مثل ما سوت العنود

عوشه : الله أكبر الحين أشعنه ترمسين عن بنت الناس سبحان الله هذا نصيبها

ميثا : أصلا تحمد ربها أنها لقت واحد فكر فيها وخذها هاي العانس

عوشه : عوذ بالله من هاللسان ما تقدرين أتقولين جلمه حلوه فحقها لا أتذمينها

ميثا: أووه أنتي ما يعيبج شي من سوالفي وينهن هالثنتين أشحقه منخشات فحجرهن جي ما أين يسلمن عليه والا أنا ما أستاهل ؟؟

عوشه : ما يدرن أنج هني وأنتي مب غريبه راعيه البيت خطفي على حجرهن وسلمي عليهن ما بيطيح نصج

شهد وهي حادره الصاله بعد تردد كبير " تدري بسلاطه لسان أختها " : السلام عليكم ورحمة الله وبركاته وتجدمت منها أتوايها

ميثا : تو الناس لو ييتي بعد ما أروح مب أحسن

شهد : كنت نايمه توني ناشه

ميثا : مبروك

شهد : الله يبارك فحياتج

ميثا : عيل سرتوا عند وعد ؟؟

عوشه : هي سرنا لها وسألت عنج

ميثا : عاد من زود حبي لها تسأل يا ويها

عوشه : عافاني الله محد سلم من هاللسان

ميثا : خير شو أتقولين يا أمي ؟؟

عوشه : سلامتج

ميثا : يقولون يابت توم

شهد : هي ماشاء الله عليهم قمر طالعين على أمهم

ميثا : شو هالنكته ؟؟؟ طالعين على أمهم !!!

عوشه : ليش نكته وهي الصادقه يشبهون أمهم ما شاء الله عليهم طالعين حلوين عليها

ميثا أتحيس بوزها : المهم أنا بسير ألحين يلا فمان الله

عوشه : ومب راده بيت ريلج ؟؟؟

ميثا : مب سايره مكان بتم في بيتي واللي يبيني أييني

عوشه : الله يهديج أخاف أييج يوم ما تلقين حد حولج لا رفيج ولا صديج

,,,,,,,,,,,,,



اليوم الثاني الصبح الساعه 9



مزنه : سلطان حبيبي بسك نوم يلا نش عشان تتريق

سلطان يتلحف مره ثانيه : خليني أرقد بس خمس دقايق

مزنه أترد أتير اللحاف عنه : سلطانوه قم نش بسرعه بتتأخر بعدين بتاكل جبدي قم ما فيني على صدعتك

سلطان ينش ويلوي عليها ويرقدها عداله : أرقدي أشوي ويايه بس أششش

مزنه تضحك : يالدب قم عني خلني بنش

سلطان : ما أبي ما أبي

وهالوقت تلفونه رن للمره المليون

مزنه : سلطون يالدب قم شوف منو يتصل بك تلفونك من الصبح فوق الألف مره يرن يمكن هاي وعد

سلطان أول ما سمع اسمع وعد فز من الفراش وربع يرد على التلفون

سلطان يتطالع الشاشه شت مب هي : ألو

المتصل : السلام عليكم ورحمه الله وبركاته

سلطان : وعليكم السلام والرحمه هلا والله منو؟؟

المتصل: أنت سلطان مانع ؟؟

سلطان : هي نعم آمر منو ويايه

المتصل : حاولنا نتصل فيك أكثر من مره من شهر بس محد يرد

سلطان : هي كنت مسافر والبارحه راجع بس منو معاي ؟؟؟

المتصل : مزنه معاك ؟؟

سلطان مصدوم يتطالع مزنه : هي بس أنت منو ليش ما ترمس ؟؟

المتصل : أنا بدر أخوها

سلطان : شووووووووووو!!!

بدر: الله يخليك ما أبيها أتعرف أني قاعد أكلمك ألحين أنا بس أبيك أتخبرني أنتوا وين وأنا اللي بييكم وبفهمك كل السالفه

سلطان يفرك عيونه : أأأ أنزين أنت وين ؟؟

بدر : أنا اللي عرفته أنه أنتوا في دبي وأنا حالياً توني واصل دبي وياي أهلي

سلطان : أها تمام خلاص حياكم الله "وعطاه عنوان بيتهم عشان أييون " وأول ما سكر شاف مزنه تتطالعه تبي أتعرف منو المتصل وشو كان يبغي

سلطان : أأ هذا واحد من الشباب ياي ويا أهله

مزنه : واحد من الشباب ؟؟؟!! حياه الله

سلطان : أنا بدخل أسبح وبرد

مزنه : خلاص عيل أنا بروح أجهز الفاله والريوق وبرتب الميالس بعد

سلطان : زين

مزنه حست أنه الاتصال من شخص غير مرغوب فيه بالنسبه لسلطان وشكت في السالفه بس قالت خلنا ننتظر اشوي وكل شي بيبان,, سلطان خبر أبوه أن أهل مزنه يايين " الكل كان عارف بسالفة مزنه كامله " فقال له أنه بيستقبلهم وياه...



بعد ما يقارب النص ساعه وصلو الي تكلم عنهم سلطان بس الغريب أنه كلهم دخلو ميلس الرياييل "حريم ورياييل" والي هم خالد وزوجته عليا . بدر وأمه وأبوه

بوسلطان : حيالله من يانا

بوفاضل: الله يحييك ويبقيك

بدر وخالد تجدموا منه وسلموا عليه وبعدها لفوا على سلطان اللي عرفهم على نفسه و أخوه العود ..

بدر بدى الكلام لأنه أكثر واحد كان متماسك ومسيطر على أعصابه

بدر : والله يا أخ سلطان قبل كل شي حبينا نشكرك على وقفتك ويا مزنه

سلطان : ما سوينا غير الواجب

بدر :سلطان يمكن أنت ماخذ فكره غلط عنا صدقني اللي صار أشبه بروايه أو فلم خيالي ,, أكيد أنت عارف كيف كانت الأمور وشو الي صار بالضبط وأي حد في مكانا كان ممكن يسوي اللي سويناه وأكثر

سلطان : معقوله في حد بهالوحشيه وهالحيوانيه ؟؟؟

بوسلطان يسكته ويطلب منه يتريا الريال يخلص الكلام الي عنده

بدر : سلطان لا أتلوما نحن ما كنا عارفين شي والحين بس أتضحت الحقيقه كامله ونحن يايين اليوم نطلب العفو والسماح من بنتنا ومنكم يا أهل النخوه والكرامه

بوسلطان : والله يا ولدي البنت بنتكم ومن حقكم تتفاهمون وياها هذا ريلها موجود وأنا الحين بطرشها لكم وأن شاء الله تتصالحون ..

بدر : ما أتقصر يا بوسلطان بس أول بادي حبينا أنخبركم السبب الي خلانا أني اليوم بالذات ،، يمكن كلكم تدرون أنه مزنه اللي خذها من عند البيت واحد أسمه علي وهالريال كان قاصد بنت الجيران ومزنه طلعت وركبت وياه وهي أتضن أنه فاضل أخوها .. بس هو ما أتقنع أنها مب اللي قاصدنا وصار اللي صار .. وهالريال يانا من شهر تقريبا يطلب السماح ويخبرنا بالحقيقه اللي أنكرناها كلنا .. مزنه بريئه وكل اللي صار سوء تفاهم كانت ضحيته

سلطان : والحين بعد سبعد سنين صحى ضميره ؟؟

بدر : سبحان الله ربك ما يضرب بعصا بعد الحادثه عاش مرتاح بس من سنتين أكتشفوا فيه المرض الخبيث " عافانا الله " وهو مثل ما أتقول بغى قبل لا يموت يبري ذمته وينصف انسانه ظلمناها كلنا ...

خيم السكوت على المكان وكل واحد يتطالع ويه الثاني

خليفه كسر هالسكوت : ما عليه الله يسامحه ويشفيه .. أعتقد الحين يا الوقت اللي تتلاقون فيه ويا بنتكم أنا بسيرأزقر عليها " نش خليفه وترخص منهم بوسلطان بعد عشان يقدرون ياخذون راحتهم ويا بنتهم "



خليفه يحدر الصاله : السلام عليكم ورحمة الله وبركاته

أم سلطان : وعليكم السلام والرحمه ... حيالله بو سالم أشحالك فديتك كيف اصبحت

خليفه يبوسها على راسها : بخير دامج بخير ياالغاليه ... مزنه أشحالج

مزنه : بخير الله يسلمك بوسالم كيف صحتك

خليفه : بخير الله يسلمج

بوسلطان : أمايه مزنه سيري الميلس ريلج يبغيج

مزنه تمشي صوب الباب : ان شاء الله .. راحوا الي عنده ؟؟

بوسلطان : هي ما في حد غريب

طلعت مزنه للميلس وبوسلطان خبر أم سلطان عن اللي يايين وتموا في الصاله ينتظرون الي بيصير وفي هالوقت يلست أم سلطان أتخبر ريلها عن سالفه سيف والي سواه ليلة عرس محمد



مزنه وصلت الميلس وهي حاسه بقبضه في قلبها حاسه بخوف وتوتر ما أتعرف أسبابه أول ما حطت أيدها على مقبض الباب حست برعشه فضيعه سرت في بدنها لأنها سمعت صوت مستحيل تناساه لو مهما يصير

خالد يمسح دموعه : أنا اللي ظلمتها وعذبتها وخليتها تكره العيشه ويانا أنا السبب

أم فاضل : وأنا شو أقول يا ربيه أنك أتسامحني وأتحنن قلب بنيتي عليه

بدر: لا حول الله أستهدوا بالله ما بيصير الا كل خير مزنه قلبها طيب وأتعرف أنه الي صار صار غصبا عنا وان شاء الله بتسامحنا على اللي سويناه فيها

بوفاضل يرمس سلطان : كيف بجابل ربي وهاي أمانتي اللي خاينها كنت أسكت عنهم يوم يعذبونها سواء بالكلام والا بالضرب محد رحمها ولا رحم ضعفها وعماها

سلطان يحاول يخفف عنهم : ما عليه ان شاء الله ما بتطلعون من أهنه الا والقلوب صافيه والكل راضي " حس أنه حد عند الباب وعرف أنها مزنه نش عشان يدخلها عندهم "

أول ما فتح الباب شافها والدموع أتسيل من عينها والألم واضح على ملامحها .. طمنها مسك أيدها وشد عليها بالقو " يعني أنا وياج لا أتخافين " سحبها عشان تدخل بس حس بها متجمده في مكانها وخايفه

سلطان يطمنها : مزنه حبيبتي لا أتخافين والله محد بيمس شعره منج وأنا موجود هاييل أهلج يايين يعتذرون منج ويستسمحون على اللي صار من سنين يلا حبيبي تعالي معايه لا أتخافين أنا وياج

مزنه أتهز راسها بخوف : سلطان خالد خالد بيذبحني اذا شافني لالا سلطان أنا ما بدخل " وركضت للصاله ,, لحقها سلطان وحاول يقنعها بس هي من الخوف يلست في الزاويه تتذكر كيف كان يضربها خالد وكيف سحبها من شعرها ودزها على الطوفه اليوم الي رجعت فيه من المستشفى

خالد يسحبها من شعرها ويدزها في حجرتها : لا بارك الله فيج من بنت ليتج متي ولا رجعتي هالبيت يا مسودة الويه هاي حجرتج يالخايسه تسمعين اذا شفتج شبرتي خطوه برع هالحجره بنحرج هنيه سامعه " وهو يضرب رسها باليدار " دلعناج وشفنا النتيجه الحين بتشوفين الويل وبشوف منو هالحيوان اللي يباج يالعميا

سلطان حط أيده على جتفها ونقزت من الخوف

سطان ينششها : مزاني حبيبي نشي قومي فديتج محد بيأذيج والله بكسر أيده اللي يمدها عليج نشي

وأول ما نشت تمت فحضنه دافنه راسها في صدره وأتصيح أحر ما عندها وهو يمسح عراسها يحاول يهديها ...

بوسلطان شاف الوضع يتأزم فطلع لأهلها في الميلس وقالهم يقربون في الصاله

أم فاضل كانت أول الداخلين للصاله ... ومن شافتها مزنه ربعت لحضنها ...

أم فاضل : فديت روحج سامحيني يا بنتي سامحيني

مزنه : مسموحه يالغاليه مسموحه ,, الحمدلله لك يا رب أني شفتكم قبل لا أموت الحمدلله

بوفاضل يتقرب منها : باسم الله عليج من الموت يا الغلا

مزنه تربع لحضن أبوها : أبوي فديت روحك " أتبوس أيده وراسه "

بوفاضل يمسح دموعها : لا يالغاليه ما أبي أشوف هالدموع والله أنها غاليه عليه

عليا تقربت منها وحضنتها : فديت روحج أشحالج

بدر : أحم أحم ممكن أتخليني أسلم على الحب

عليا أفسحت المجال له

مزنه تتطالعه بشوق ولهفه " ما نست وقفته وياها وكيف كان يحاول يساعدها بس من دون لا يحس بهم خالد "

بدر مد أيده لها وخذها بحضنه

بدر : فديتج يا أغلى الناس فديت روحج وقلبج أشحالج ؟؟ سامحيني يالغلا سامحيني لأني كنت جبان سامحيني لأني ما وقفت وياج سامحيني دخيلج عشان أرتاح

مزنه تمسح دموعه : فديتك حبيبي والله أنت ما قصرت والي فات مات مسامحتنك دنيا وآخره مسموح يا أغلى ناسي مسموح ... "

بدر : مزنوه عسرت ويبت بنت سميتها مزون

مزنه : مبروك تتربى في عزك ان شاء الله .. وينها ؟؟

بدر: ما يبتهم ويايه ان شاء الله بييبهم في الزياره القادمه

مزنه : وأنا عندي ولد سميته عبدالله

بوفاضل " أسمه عبدالله " : فديتج حبيبتي وينه الغالي ؟؟

مزنه صدت صوب الباب وتجمدت نظرتها على خالد الي واقف ومنزل راسه على طول غمضت عيونها

بدر مسك خالد من أيده وقربه منها

أول ما حاول أنه يحضنها ردت لورى على طول ودفنت راسها بحضن سلطان من الخوف

خالد ردت ادموعه تنزل : مزنه سامحيني

مزنه أتصبح بهدوء وما أترد عليه

الكل يتطالعهم .. خالد أكثر واحد أذى مزنه وضربها وكرها وكرهم فيها زرع الأفكار السودا كلها في بالهم وما ترك لها المجال أتقول لهم عن الحقيقه وأتبري نفسها ... كيف بتقدر تتغاضى عن الي سواه فيها!!!! كيف تقدر تنسى أنه كان السبب في شتاتها وضياعها ؟؟كيف تقدر تتناسى أنه السبب في العيشه اللي عايشتنها اليوم ؟؟؟ كيــــــــــف ..

خالد يركع على اريوله : سامحيني يا أختي الطاهره العفيفه سامحيني أدري أني ما أستاهل بس والله غصبن عني مزنه أنتي تدرين بغلاتج فقلبي بس ما أدري كيف الشيطان لعب بعقلي يومها وصار الي صار .. أنا أدري أني غلطان بس بعد أنتي لازم تعذريني لأنه الي صار والله ما كنت حاسب له حساب ولا تخيلت فيوم أني أمد أيدي عليج بس لحظتها والله يا مزنه لو شو أقولج يمكن ما أتصدقين بس كل اللي أقدر أقوله سامحيني ... مزنه أنا بعد الي سويته فيج ما تهنيت فحياتي لحظه حرمتي تحمل ولا حمل يثبت لها أخر مره أبتسمت فيها كانت قبل سبع سنين آخر مره حسيت أني عايش كانت قبل سبع سنين ليتني أقدر أرد الزمن لقبل سبع سنين وأمحي أي شي بعده غير هاليوم مزنه سامحيني سامحيــــــــــــــــــــ ـــــــــــــــــــــــــ ــــــــــني

مزنه عورها قلبها على خالد بعد الي سمعته تذكرت أنه خالد كان توه معرس من شهرين ودوم كان يتمنى حرمته تحمل وأييب ولد يسميه عبدالله عشان يشيل أسم أبوه ودوم كان يغايضها ويقول لها بسمي ولدي عبدالله قبلج لأنه حتى لو سميتي ولدج عبدالله الغلا يكون لأول واحد تسمى بهالاسم ... تقربت منه ونلت على ركبها ومسحت دموعه بأيدها وهي أتصيح .. خالد أنا مسامحتنك من زمان والله العالم بالي في قلبي يمكن يوم أنظلمت دعيت عليك بلحظه ضعف ما كنت أقصد والي صار صار نحنا عيال اليوم خلنا نبدى بصفحه يديده من هاليوم وننسى الي صار..

خالد من لهفته لها نش وحضنها وتم يدور بها وهي فحضنه : الله يريحج بالج مثل ما ريحتي بالي

سلطان أخيراً قدر يتنفس الصعداء وحس بالراحه

صارت الساعه 12 وبوسلطان لزم على أهل مزنه يتغدون عندهم وبعدها اذا يحبون يرجعون العين .. فتموا يالسين ياخذون أخبار بعض وتعرفوا على أم سلطان وعبدالله وسعيد وسيف الي أنجبر ييلس وياهم ويجاملهم

,,,,,,,,,



فهالوقت وعد مستغربه من سلطان الي ما ياها ولا حتى أتصل وقالت أكيد حاط فخاطره فقررت أتسوي له مفاجأه وأتروح له البيت ,,,

حميد : ها جاهزه

وعد: هي ،، باباتي أول بروح عند سلطان بعدين بنروح البيت أوكي

حميد: ان شاء الله يا بنتي يلا شلي عيالج وسرينا

وعد : باباتي شل حروب

حميد يتناوله منها : لا عطيني غايه الحب

وعد : لا شله حرام عليك اتفرق بينه وبين اخته والله تراني ما ارضى عليه فديته

حميد : ان شاء الله عمتي أوامر ثانيه بعد ؟؟

وعد : لا بس مم لا خلاص ما في شي

حميد :قصورج يا بنت حميد تتأمرين عليه

وعد : هههه يلاأنزين ممكن أنروح ما اقدرأتم شاله غايوه وايد

حميد : قلت لج عطيني إياها حروب أخف

وعد : لا بتعود وباسم الله على بنتي



,,,,,,,,,,,,,,,,,,,,,,,



نهاية الجزء الثالث والعشرون... ترقبوا الجزء الأخير بحلول 31/12/2005 " من فضلكم ما أبي حد يكتب في رده بانتظارج ووينج ومن هالاشياء للأني ان شا ءالله بحط الجزء الأخير يوم 31/12 فرجاءً قدروا هالشي من فضلكم .."
أوعدكم يكون الجزء الأخير دسم وحلو بس الصبر ثم الصبر

ودمتم بود ..