أموت أنا في حبهم

[دانة حتا]

تسلمين الغالية

[الجنيه]

شمه ... دانة حتى ... ربوع البلاد ...

ثانكس حبايبي ..

أموت أنا في حبهم

الجزء الثاني والعشرون





بعد أسبوعين من سفر سلطان ,,, في ألمانيا و تحديداً في المستشفى

مزنه قاعده على الكرسي وعيونها ملفوفه بشاش : سلطان

سلطان سرحان يفكر بوعد ولهت عليها صح أكلمها كل يوم اكثر من مره بس تولهت على شوفتها خاطري اكون يمها الحين قريب تولد وأكيد محتايتني أكثر من قبل .

مزنه : سلطان ؟؟؟

سلطان أنتبه لها : هلا حبيبتي شو بغيتي ؟؟

مزنه : الدكتور تأخر

سلطان : لاأبد توها الساعه السبع الصبح وهو قايل بيبطل الشاش الساعه 7 وربع

مزنه : متى بتطوف هالربع ساعه ؟؟

سلطان تقرب منها ومسك أيدها وحطت راسها على جتفه على طول

سلطان : خايفه ؟؟

مزنه : أشوي

سلطان : لا أتخافين حياتي ان شاء الله ما بيصير غير كل خير ,, أشوي وسمعوا صوت المترجمه تعلن وصول الدكتور

سلطان يبعد عنها : يلا حبيبتي شدي حيلج

مزنه بخوف : بتروح ؟؟؟

سلطان : لا يا عمري بكون وياج هني ويمسك ايدها

الدكتور سلم عليهم والممرضه سكرت الستاير والاضاءه كلها وظلمت الغرفه عشان يباشر الدكتور شغله

مزنه متمسكه بايد سلطان بكل قوتها ونبضات قلبها تتسارع

الدكتور بدى يخوز الشاش عن عينها ,, اشوي أشوي .... وأول ما خلص شل القطع القطنيه اللي مغطيه عيونها الثنتين ...

Mizna please try to open your eyes slowly one by one الدكتور:

المترجمه : مزنه أفتحي عيناك ببطئ واحده تلو الأخرى

مزنه سمت بالرحمن وفتحت عيونها بهدوء بس تفاجأت بالظلام الي يعم الغرفه ،، توترت وخافت تكون العمليه ما نجحت بخوف وقلق : سلطان ما أشوف شي ليش سلطان

Doctor she can’t see any thing why??? سلطان بخوف ورهبه:

Don’t worry Mr Sultan she is fine she can’t see because it’s too dark now we have الدكتور

Switched off the lights because she won’t stand to be steering in the lights for the first time…..



المترجمه : لا تقلق سيد سلطان إنها بخير قمنا بإطفاء الإضاءه لهذا السبب تعجز السيده عن الرؤيه وهذا إجراء إحتياطي لأنها لن تكون معتاده على الإضاءه في بادئ الأمر ..

سلطان يطمن مزنه : لا تتروعين حياتي مافي شي بس يبونج تتعودين على الظلمه أشوي

مزنه تتطالع صوبه : سلطان

سلطان : آمري يا عمري

مزنه : بديت أشوف الأشياء بس مش بوضوح

She can see but not so clear سلطان يكلم الدكتور

Yeah I know don’t worry sir just give her ten minutes and she’ll see very well الدكتور:

الدكتور طلب من المرضه تبدى بفتح الأنوار بدئا من المصباح الصغير اللي قريب سرير مزنه وأول ما فتحته مزنه قدرت أتشوف سلطان بوضوح وكل اللي سوته أنها حاولت تسجد لربها بس منعتها يد الممرضه





الدكتور بعصبيه :

No don’t you even think of putting all this pressure on your eyes it’s dangerous at this

Stage you need to be careful of all these things otherwise you’ll harm your self

المترجمه : رجاءً عليك بتوخي الحذر في المرات القادمه في هذه المرحله عليك بأخذ الحيطه والحذر كيلا تؤذي نفسك بعمل مماثل

I am going to give you a list of forbidden things that you have to stay away from الدكتور:

المترجمه : سوف يقوم الطبيب بإعطائك قائمه تضم الحركات اللي يمنع عليك القيام بها في الوقت الحالي ,,

الدكتور:

She is fine now but try not to concentrate on things a lot at the moment have a nice day

Thank you doctor have a nice day too سلطان :



المترجمه : أنت بخير الآن لكن عليك محاولة عدم التكريز وأرهاق عيناك هذه الفتره حتى تعتادا على الاضاءه وتتحملا الضغط......

مزنه تدمع عيونها من الفرحه

المترجمه : لا ياعزيزتي توخي الحذر الدموع في أعلى قائمة الممنوعات رجاءً أعتني بالسيده في هذه الفتره الحساسه جداً

سلطان : أشكرك ولا تقلقي سوف أقوم برعايتها بشكل جيد "يغمر لمزنه "

الدكتور والممرضه والمترجمه طلعوا مع بعض وخلو سلطان ومزنه روحهم بعد ما عطوهم قائمة التعليمات والأشياء اللي المفروض تبتعد عنها مزنه عشان ما يضرها شي ..

مزنه صلت ركعتين شكر لله وهي يالسه على السرير عشان ما اتعرض عينها للضغط وقت السجود وبعد ما سلمت شافت عبدالله في ويهها : الحمد لله لك يا ربي على هالنعمه وضمته لصدرها بحنان وحب .. وبعدته عنها اشوي عشان اتشوفه عدل أول مره أتشوف ولدها سبحان الله بعد ثلاث سنين أشتوف تقاطيع ويهه وتتطالع سلطان لأنه كان يشبه وايد ..

عبدالله ما يعرف شو السالفه تململ فيلسته عندها وبعدها تركته يروح يلعب في استراحة الأطفال والخدامه وياه

سلطان مستانس لفرحتها والدنيا مب واسعتنه من كثر الوناسه ,,

مزنه مب قادره أتشل عينها عن سلطان ما أتعرف كيف أترد له جمايله اللي ما تنعد ولا تحصى ستر عليها في البدايه وبعدين تزوجها وقدم لها أحلى هديه عبدالله وما قصر عليها بشي واليوم خلاها تملك الدنيا بلحظه ضحى بكل شي ووقف وياها لين أستعادت بصرها دمعت عينها لا إراديا الشي اللي خلا سلطان يربع بسرعه صوبها ويمسح الدمعه بيده وقبل لا يشل أيده مسكتها وضمتها لها بالحيل ،،

سلطان عارف شو تبي أتقول وحاس فيها قبل لا تنطق حط صبعه على شفاتها : أششش خلاص يا عمري ما يحتاي أتقولين شي أنا فاهم وعارف كل اللي تبين أتقولينه الحين أبيج أتريحين أعصابج ونفسج وبرجع لج الظهر أوكي

مزنه : ان شاء الله بس بقولك شي ،، عسى الله لا يحرمني منك ،، أحبك

سلطان : يا ويلي منج يا الحلوه أففف والله نسيت تعالي أول بتصل بأمي وأبوي يبون يتطمنون عليج

مزنه : بسرعه أتصل فيهم والله ولهت عليهم

سلطان : أكثر مني .؟؟

مزنه :لا طبعا

سلطان أتصل بالبيت ورد عليه سعيد

سعيد : هلا والله بالمعرس

سلطان : أشش الله ياخذ ابليسك بتفضحنا أنت غبي ؟؟

سعيد : ههه لا وحياتك ذكي لأنه الحب مب هني عشان جي ماخذ راحتي

سلطان بخوف : ليش وين راحت ؟؟ لاأتقول ربت ؟؟

سعيد : خخخ عنبو سرطتني خلني أكمل لا ما ربت بس سايره ويابنات بومحمد تدري عرس ولدهم قرب

سلطان : هي زين عيل وين الشواب ؟؟

سعيد : شواب فعينك هذي أمايه بتكلمك

أم سلطان : هلا والله بهالصوت فديت روحك ولهت عليك

سلطان : فديت روحج والله تولهت عليج العافيه أشحالج يالغاليه

أم سلطان : بخير دامني أسمع صوتك وبسير أخير يوم أشوفك

بوسلطان : لالالا تراني بديت أغار

أم سلطان أتطنشه : طمني عليكم يا ولديه شو مسوين ان شاء الله مرتاحين ومزنه شو أخبارها متى بيفجون الربطه عنها ؟؟؟

سلطان : كلنا بخير وسهاله ومشتاقين لكم والحمدلله اليوم فجوا الشاش عنها وكل شي بخير هاج كلميها

مزنه تاخذ السماعه ودموعها أتسيل وسلطان يمسحهن : السلام عليكم

أم سلطان : وعليكم السلام والرحمه الحمدلله على سلامتج يا بنتي

مزنه : الله يسلمج يالغاليه كيف صحتج ان شاءالله بخير

أم سلطان : الحمدلله يا بنتي ما نشكي باس المهم أنتي طمنينا عليج وعلى صحتج ان شاء الله بس أهون

مزنه : الحمدلله ألف حمد وشكر لك يا رب

أم سلطان : الله يحفظج يا أمايه أندوج كلمي بوسلطان يبي يتحمد لج بالسلامه

مزنه : وداعة الله

بوسلطان : الحمدلله على السلامه يا أم عبدالله

مزنه : الله يسلمك من الشر عمي أشحالك عساك بخير

بوسلطان : بخير دامكم بخير .. عبدالله أشحاله شو اخباره ؟؟

مزنه : الحمدلله بخير وسهاله ،، عمي سلطان بيرمسك

بوسلطان : ديري بالج على نفسج يا بنتي ,,

سلطان بلهفه وشوق : أشحالك يالغالي

بوسلطان : بخير الله يسلمك كيف حالك أنت شو علومكم ان شاء الله مرتاحين

سلطان : الحمدلله بخير يا بويه الله ومشتاقين لكم حييل عبدالله كل دقيقه يطريكم ...

بوسلطان : فديت روحه وينه عطني اياه بسولف وياه

سلطان: في غرفة الألعاب بخليك أتكلمه بعدين أبويه وعد أشحالها ؟؟ وينها من أمس داق عليها كمن مره ما ردت عليه

بوسلطان: لا أتحاتيها بخير ونعمه بس تدري آخر أيام الحمل متعبه وبعدين لاتنسى عرس محمد قريب وهي تتجهز ويا خواته عشان جذه أغلب الوقت بيت أبوها ..

سلطان: خلاص يالغالي سلم على الكل وقولها اتكلمني أول ما توصل

بوسلطان : الله يحفظكم







بعد شهر

اليوم عرس محمد والعنود مسوين حفله الحريم في حياة غراند وعشا الرياييل بنفس اليوم في حياة الرجنسي ،، الكل مرتبش ومستانس البنات راحوا الصالون ويا عذيجه ووعد .. بعد ما خلصن من الصالون رجعوا البيت عشان يتأكدون من الترتيبات كلها وبعدها يروحون القاعه

عذيجه لابسه فستان ممزوج باللونين الوردي والبني رافعه شعرها لفوق ومنزله منه خصل متفرقه ومكياجها هادي وخفيف بس طالعه جنان ..

وعد فستانها فستان حمل لونه أحمر غامج وطبعا لأنها قريب جداً بتولد فبطنها بارز ,, بس شكلها وايد طفولي وبريء مكياجها جريء لأنه أحمر ,, ممم صدق اتخبل

حمده فستانها لونه برتقالي مستويه البرتقاله وطبعا مايحتاي اوصف طالعه أتجنن

روضه فستناها لونه بحري ومدخله فيه اللون الفضي حركته غريبه يعني من جدام قصير وقصته على ينب ومن ورا طويل يزحف وراها ... مسويه تصميم أسباني وطالع روعه عليها ...



محمد متوتر واصل حده ما يعرف شو يسوي كل دقيقه يسأل عذيجه اذا كان شكله اوكي والا لا ولبسه ..

عذيجه وهي داخله الغرفه اللي يتجهزن فيها البنات : هههههه حشا ذبحنا هالمعرس

وعد بتعب : هه حليله الله يعينه شو فيه ؟؟

عذيجه : مره يسألني اذا شكله أوكي ومره يقولي شو رايج بالغرفه والصاله اوكي

وعد : ههه خليه مسكين مرتبش معرس لا أتلومينه ،، أقولج أنا ناسيه طقمي في البيت بروح بلبسه وبشوف أبويه اذا جهز وبييكم أوكي

عذيجه : طرشي الخدامه بتروح اتييبه لج

وعد : لا ما بتدل وينه ما بتأخر ان شاء الله دقايق وراجعه

عذيجه : أنزين اشوي اشوي

وعد : ان شاء الله عمتي أوامر ثانيه

عذيجه : هههه تحملي بس اليوم واذا بتربين باجر برايج

وعد : يالدبه أصلاً ما أبي بتريا سلطوني

عذيجه : ههه يحليلج أنتي والله الولاده ما تتريا حد من يدقج ويع الولاده لا بتعرفين سلطوني ولا غيره

وعد والدمعه بعينها : لا أتقولين جي عذوج ما أبي حروب أيي وسلطان محد

عذيجه : هو مب قايل عشرة أيام وبيرد

وعد : هي بس الدكتورمدد فترة العلاج ثلاث اسابيع

عذيجه : وسلطان شو الله كالفنه يتم وياه أوكي ربيعه وانسان عزيز عليه ما قلنا شي بس يتركج وأنتي بهاي الحاله بعد مب حلوه هو سوى اللي عليه أهم شي وقف وياه يوم أحتايه والحين المفروض يرجع لبيته وأهله

وعد تمسح الدمعه اللي خانتها وأنسابت على خدها بحراره : هو ما يحتاي أني أذكره أو أقوله شو يسوي اذا الشي مايا من خاطره ما أقدر أجبره

عذيجه تتقرب منها : فديت روحج وعدوه والله حرام عليج بتخربين الميك أب كله اليوم أبيج تستانسين من خاطرج عشان حمود

وعد وهي ماسكه الباب عشان تطلع : ههه حمود أصغر عيالج وأنا ما أدري ؟؟ أستحي على ويهج ريال طول بعرض اتقولين له حمود

عذيجه : عادي المهم أنتي تغير المود عندج

وعد: ههه بس لا تهذربين وايد اذا تمينا على هالحاله لين باجر ما بروح البيت يلا باي وطلعت الصاله وقبل لا تتغشى طلع عارف في ويها وتم مبهت يتطالعها ويتأملها ... وعد منحرجه منه ومن الطريقه اللي يبحلق فيها جنه مب صاحي

عارف فخاطره " ياربي جنها ملاك والله أمووووووت عليها أوه زين يوم شفتها بعطيها التمثال " : وعد

وعد " أفف أخيراً رمس حشا ذبحني بنظراته " : هلا

عارف : ممكن تتريني دقيقه بس .. ثواني والله ما بتأخر

وعد معقده حياتها : ها ليش

عارف : بس دقيقه " وربع حجرته أييب التمثال اللي حاطنه عند راسه وكل ليله يسولف له عن شوقه وحبه للي طلبته .. أويه أنا شو أسوي أخاف حد أيي والا هي أتروح ,, وبسرعه شله وطلع لها شافها وافقه بنفس المكان وتذكر أنه يجيسها الفضول اذا حد قالها شي وابتسم وهي شافته

وعد عشان تكسر التوتر اللي حاسه به : خير اشوفك تبتسم ليكون تتغشمر علي

عارف يناولها التمثال: لا ابد بالعكس ماشاء الله عليج محلوه وايد خصوصا ويا هالكرشه

وعد " باسم الله شو ياه استخف هذا " : ههه شو هذا

عارف : بطلي الجيس وبتعرفين

وعد منحرجه : أنزين شو هذا ؟؟

عارف : وعدوه بلاج مافيج صبر ياخي فجي الجيس وبتعرفين لا اتمين أتحنين على راسي

وعد تذكرت ذاك الزمان الي كان يكلمها فيه بهالطريقه وفخاطرها صدق متولهه على ذيج الأيام وأول ما بطلت الجيس دمعتها طاحت وتمت أتشوفه ومب مصدقه اللي بين ايدها : هذا اللي وعدتني فيه

عارف : وأنا عند كلمتي قلت لج لو عقب عشر سنين بييبه لج

فهاي اللحظه وعد مشاعرها متلخبطه مستانسه لأنها وفى بوعده وزعلانه لأنه التمثال ياها من انسان ركنته في زاويه من زوايا قلبها وما عاد له مكانه فقلبها بس أعجبها وفائه ولو بعد فتره طويله من الزمن حست بالدموع تتكاثف في عيونها وما بغت تتفشل جدامه وأتصيح شكرته من خاطرها وحطت غشوتها على ويها وراحت البيت .. دخلت من باب الصاله وضربات قلبها قويه اتحس بقلبها وده يطلع من مكانه حاسه بربكه وخوف " بس أنا ما سويت شي غلط وعارف هذا حسبة أخوي وصديق الطفوله ,,, ممم ما أعرف والله بس أحس المفروض ما كنت آخذه منه أنا بعد غبيه تسرعت كان المفروض ما آخذه منه شو بيقول عني ياهل ما صدقت شفته وخذته على طول "

حميد : الحمدلله والشكر

وعد نقزت : باسم الله الرحمن الرحيم ،، باباتي روعتني

حميد : ههه أشفيج يا بنتي داخله اترمسين عمرج جنج خبله ,,,

وعد : لا ماشي ، أنت خلصت باباتي ؟؟؟

حميد : هي يا بنتي خلصت بس أقول

وعد : هلا

حميد : شو هالحلاوه هاي ماشاء الله عليج طالعه قمر 14 أخاف عن يحسدونج فديتج وماشاء الله بطنج عود ليكون حامل بتوأم

وعد محمره : باباتي شو فيك أستحي عاد

حميد : هي يا سلطان فاتك فاتك نص عمرك عيل حد يودر هالقمر ويروح؟؟؟!!

وعد : باباتي بلييز لا تطريه جدامي

حميد : أفاا

وعد أتغير السالفه : باباتي أنا بروح ويا قوم عذيجه وأنت ؟؟؟

حميد : ما عليج مني أنا بشل بو محمد وبوضاحي وبنروح رباعه المهم أنتي ديري بالج على نفسج ولا أتمين أتحومين ويا البنيات وايد ترا ها تحملي على نفسج وأقري المعوذات على نفسج عن الحسد وتدرين صبري بيييب لج دعاء الحسد اقريه عن يحسدونج الحريم

وعد :هههه فديتك باباتي أنت للحين ما تغيرت ذكرتني بأيام عرس وفا نفس السيمفونيه

حميد : شو أسوي ما لي غيرج بعد أنتي تكشخين وأتخلين الناس يتخبلون عليج بعد مافينا على الحسد والعين حق

وعد : الله لا يحرمني منك

حميد : ولا منج ان شاء الله ,,

كل واحد فيهم راح لدربه وعد دخلت غرفتها وخذت الطقم ولبسته واتطالعت عمرها للمره الأخير نظره متفحصه ويوم شافت أنها خلاص جاهزه ردت بيت بومحمد وسارت ويا البنات القاعه واللي ساق بهم عارف طبعا هو ما شل عينه عنها مع أنها كانت متغشيه ,,

عذيجه : عروف لا أتم تسرع جذه مب زين

عارف وهو يتطالع وعد : ليش تتروعين من السرعه ؟؟؟

عذيجه : ما أتروع بس مب زين

روضه : لا كشخه خليه يسرع وناسه والله

حمده : أنتي جب عاد ما أتصدقين حق الأعمال الشريره أول وحده أتآزرينه

عارف : أخييي سكتن لوعتن جبدي حشا أنتوا طول عمركن ضرابه حتى يوم عرس حمود ؟؟؟!!!

عذيجه : هههههه بوطبيع ما أيوز عن طبعه ,, وعدوه شو فيج ساكته ما ترمسين

وعد بارتباك : ها ماشي شو تبيني أقول

عارف : مستحيه ؟؟

وعد بتحدي : لا والله ليش أستحي جي شو ؟؟؟

عارف " مستغرب من جرأته بس يكمل " : عيل مب من عوايدج تسكتين وأتكونين هاديه جذه

وعد " عشان تقهره " : هذاك أول والأول تحول وتعودت ما اسولف الا ويا ريلي

عارف تغصص : هه الله يرحم ذاك الزمان

وعد : آمين

عارف بداخله نار ما يطفيها غير أنه يشرب من دم سلطان اليوم حس هو شو فقد واليوم حسده على وعد يدري أنها أتغايضه ومتعود على اسلوبها تدري به يموت من الغيره وخصوصا عليها واستغلت هالشي وخلته يفور ويلبج ورداً عليها زاد من سرعته اللي أتخوفها بس ساكته ما أتبين هالشي وفي داخلها تدعي ربها يوصلهم بالسلامه ..

بعد دقايق من الهدوء رن تلفونها وكان المتصل سلطان

وعد بهدوء : هلا وغلا

سلطان :أهلين أشحالج حبيبي شو أخبارج ؟؟ عساج مرتاحه

وعد: الحمدلله تمام أنت أشحالك وربيعك كيف صحته ان شاء الله أحسن

عارف أنتبه لها وتم يتطالعها من الجامه الي عند راسه وهي نزلت راسها عشان تاخذ راحتها أكثر عارف يراقبها والنار تنهشه عرف انها أترمس سلطان وحس بالغيره

سلطان : ماشاء الله اليوم عرس محمد باركي له

وعد: هي ان شاء الله يبلغ

سلطان : ما ولهتي علي ؟؟

وعد : عادي

سلطان : أفا عادي الله يسامحج ,, تعالي بتخبرج ليش ما أتخلين وحده من بنات خليفه أتنام عندج ؟؟؟ أنا سألت أمايه وأتقول محد يكون وياج ليش ؟؟؟

وعد : لا عادي اعود نفسي أتم روحي لأنه الظاهر سفرتك بتطول وأنا ما أبي اضايج حد أو أغثه ويايه

سلطان : لا حبيبي كلها يومين وبكون عندج صدقيني ما بطول أنا متصل أخبرج أنه بعد باجر ان شاء الله برجع البلاد

وعد : حياك الله بأي وقت الدار دارك وبتنور بوجودك

عارف رفع راسه وطاحت عينه بعينها وشاف دمعتها الي أتحاول تتداركها

وعد : خلاص برايك بكلمك يوم برجع

سلطان : عطيني أبوج بسلم عليه

وعد: أتصل على تلفونه أنا مب وياه الحين

سلطان : عيل ويا منو سايره ؟؟

وعد : عذيجه وخواتها

سلطان : ليكون أنتي اللي أتسوقين

وعد : لا عارف

سلطان بهت : شو ؟؟ عارف وأنتي كيف تطلعين وياه بكشختج ومكياجج ؟؟؟

وعد : متغشيه

سلطان : بس أنتي والا أقولج خلاص بكلمج بعدين

وعد : ما قلت شي يديد

سلطان : لا حول الله أشفيج أنتي ليش جي صايره ؟؟

وعد : سلامتك ،،، شي فخاطرك ؟؟

سلطان : ديري بالج على نفسج وسلمي على الي وياج

وعد : ان شاء الله يبلغ ،، فمان الله

سلطان : وداعة الله .

وعد رفعت راسها وبلغتهم بسلام ريلها ,,,,, بس لاحظت نظرات عارف أتلاحقها كأنه حاس فيها

عارف بشي من الحيره : وعد فيه شي ؟؟

وعد مستغربه منه : لا شي مثل شو يعني ؟؟

عارف : لا ماشي بس حسيت بصوتج تغير

وعد : لا عادي ما فيه شي

عذيجه : وأنت دومك ملقوف ؟؟؟!!!! وخزته بعينها عشان يسكت ..



,,,,,,,,,

بيت بوسلطان

خليفه : ههه حلو عليج هالاحمر ليش ما تلبسينه ؟؟

عنود : ما أعرف بابا أحسبه يكبرني وايد

خليفه : ههه الله أكبر الحين أنتي أشعرفج البسيه وبنشوف اذا يكبرج والا يصغرج

نجود : بابا هاي عبيطه وعد قالت ألبسو هالفساتين الورديه بس هاي أونه تبا أتكون سبشل غير أتألف روحها

سالم : والله أنتوا البنات مشكله أشحلاتنا نحنا الشباب لبسنا كناديرنا وحطينا الغتر عروسنا وكان الله غفور رحيم

سهيل : هي والله الحمدلله أني ولد وما أحتاي أفكر شو بلبس والا كيف بيكون شكلي جدام الناس

خليفه : عنود حبيبي يلا خلصينا عاد نحن بنوصلكن بعدين بنروح عرس الرياييل

عنود : أنزين خلاص أنا بجرب هالفستان وبشوف اذا كان أوكي خلاص بنروح

خليفه : لا حول الله يلا حياتي لا تتأخرين بنترياج برع ,, وين غيث ؟؟؟

سهيل : خذته وعد وياها

خليفه : أهاا زين عيل خلونا أنروح عند الوالد والوالده لين اتخلص ست الحسن

سيف يدق باب الصاله : هود يا هل البيت

[الجنيه]

خليفه : هدى هدى حياك بوهناد

سيف يتخاشم وياه : ها بوسالم بعدكم هنيه ؟؟ مب ناوين أتروحون ؟؟؟

خليفه : والله ناوين بس هالعيال بعدهم ما خلصو

سيف يدور بعينه عليهم كلهم : ماشاء الله كلهم هنه وجاهزين .؟؟؟

خليفه : ما اتشوف الشيخه عنود ناقصتنهم

سيف : خخخ فديتها والله أنزين شورايك أتروح أنت ويا أبويه وسعيد وأنا بوصل الوالده والبنات وبلحقكم ويا سلوم

سالم : استغفر الله ريال بلحيتي وشنبي يقولي سلوم

سيف يضربه على راسه : سلوم غصبا عن خشمك انزين

خليفه : خلاص تمام عيل

سالم : أخيي يا خي خربت كشختي

سيف : هه مصدق عمرك أنت طوف جدامي يلا

سهيل : وأنا ويا منو أروح ؟؟؟

خليفه : تعال ويانا ،، سيف اشوي اشوي على الدرب

سيف : ان شاء الله لا اتوصي حريص

خليفه خذ أبوه وأخوه وسهيل وتجدموا سيف وسالم ،،،

سيف : سلوم يالهيس

سالم : خخخخخ

سيف : أشعنه تضحك يا راسك ؟؟

سالم : ماشي

سيف : يالسبال كنت عندها يوم تهزبني صح ؟؟؟

سالم : هههههه أصلاً أنا اللي فضحتك

سيف يبا يضربه بس شرد عنه : يالجلب

سالم: خحخ والله عمي انتي غلطان ليش أتطرش مسجات وحركات عاد حظك كان حلو ذاك اليوم يوم طرشت المسج أنا كنت عندهم وهي خبرتني أنه في واحد يأذيها بالمسجات جان أشوف الرقم ا لاانه رقمك وبعفويه وبراءه قلت أنه رقمك

سيف: يالسبال يالحقير يعني لازم أتخرب علينا أفففف منك

سالم : وأزيدك من الشعر بيت ترا بعد اسبوعين ملجتها

سيف : ههه انت تحلم

سالم : يا عمي أنت اللي في خبر كان وما تدري شو يصير ،، خلاص بياخذها فهد أخو ربيعتها

سيف منصدم : شو ... أنت من صدقك ؟؟؟ روح زين أنا الغلطان اللي أسولف ويا ياهل شراتك

سالم : ليش أنت محد خبرك ؟؟؟ وحتى خالتي مهره خطبها سهيل ولد عم وعد ووافقت وان شاء الله باجر ملجتها بس ما بيسون حفله وبعد ثلاث شهور العرس

سيف منصدم : أنت شو أتخربط شو أتقول ؟؟؟ لا أتم أتألف روحك انزين

سالم : ما أتصدق أسأل عمي سلطان والا يدي بيخبرونك

سيف : وسيعد يدري ؟؟

سالم : أنا ما أدري الصراحه ,,,

سيف يركب سيارته معصب : شوف خواتك خلصوا والا لا تراني بودرهم وبروح

سالم : هاذن خلصن بييب أمايه وبييك

سيف يتنافض من كثر العصبيه اللي فيه معقوله كل هذا يصير وأنا ما أدري ؟؟ كيف تسمح لنفسها أتوافق على غيري ؟؟؟ ومهره عنبو نحن مالنا شور ولا ما كان له داعي يخبروني ؟؟ أففف معقوله أكيد أمي تدري

أم سلطان يلست ورا : يالله باسم الله ها خلصتن ؟؟

عنود ونجود : هي أمايه شو رايج فينا

أم سلطان: ماشاء الله عليكن عرايس الله يحفظكن

سالم : بس أنتي صاكه عليهن صكه محد يسواج يالغاليه

أم سلطان : ههه فديت روحك نحن راحت علينا

سالم : لا والله " ويقاطعه سيف "

سيف : أمايه صدق الكلام الي سمعته

أم سلطان: باسم الله الرحمن الرحيم أشفيك أتزاعج وأشو عنه ترمس ؟؟

سيف: شهد

أم سلطان : شو بلاها ؟؟؟

سيف: صدق ملجتها بعد اسبوعين ؟؟؟

أم سلطان : هي يا بويه أنت شو تباها البنت خلها في حالها والزواج قسمه ونصيب

سيف: شو أباها يعني هاي بنت عمي ومن حقي أعرف شو يصير لها وبعدين أنا مب معترض على أنها بتتزوج معترض عليكم أنتو أهلي اللي مخبين عني كل شي

أم سلطان : وابوي عليك لا مخبين ولاشي السالفه وما فيها أنه كل شي أستوى بسرعه وما مدانا نعرف الا من يومين

سيف: بتفهمين أنه خالتي عوشه سوت كل شي من دون ما أتشاور حد ؟؟؟

أم سلطان : واعلي عليها عوشه اشو بيدها عشان اتسويه الا عمك هو مخلص السالفه كلها وقال لها أتجهز البنت حق الملجه بعد اسبوعين

سيف حس براحه : البنت موافقه ؟؟

أم سلطان : أكيد موافقه عيل ليش بيقربون بالناس لو هي مب موافقه

سيف عصب : يعني هي الحيوانه تباه ؟؟؟

أم سلطان : سيف ويهد ان شاء الله ثم جلامك وأحشمني ياللي ما أتخيل عيب عليك ترمس جدام العيال عن خالتهم جذه والله أنك مضيع المذهب

سيف : سامحيني يالغلا بس والله شي يقهر يعني أكيد هي كانت أتعرفه وتباه من زمان عشان جي رفضتني

أم سلطان : سيف أقطعها هالرمسه والا والله يا أني أنزل من سيارتك الحين

سالم : سيف الله يهديك لا أتكبر السالفه أهدى اشوي

سيف: جب أنت ما يخصك يا ساس البلا

أم سلطان عصبت : سيف بتسكت والا كيف

سيف: خلاص بسكت ليش حد يهمه ألي فيني

أم سلطان: أنت يوم شبعت مغازل ولعب ويا بنات خلق الله الحين فكرت بنفسك ألحين تبانا نهتم فيك وأنفكر فيك ؟؟ ليش تتحراني ما أعرف شي من علومك ؟؟؟ سكتنا عنك قلنا شاب طايش وبيعقل بس أنت تتمادى كل يوم وبزياده ماأتخبرني بشو قصرنا عليك ؟؟؟ ما ربيناك عدل؟؟ خليناك تحتاي لشي؟؟ أتقولي أبا بنت عمي وأنت بعده قلبك متعلق بعشره غيرها ؟؟ كيف تقدر أتجابلنا كأنه ما صار شي كيف ؟؟؟

سيف: والله ما بكون أحسن من سلطان

أم سلطان بصوت عالي : سيف

سالم يتدخل : سيف الله يخليك خل هالليله أتعدي على خير دخيلك لا أتسوي لنا مشاكل وأمايه روحها ما تتحمل الله يخليك سكر هالموضوع عشاني

سيف ساكت ويسوق وهو معصب ...

أم سلطان أتصلت في بوسلطان وطلبت منه أييها عشان اتروح وياه ...

سيف : ليش تتصلين في أبوي؟؟

أم سلطان : وقف على ينب أقولك

سيف: ما بوقف وخلاص ما برمس في السالفه خلاص

أم سلطان : ما أبي يا سيف قلت لك نزلني الحين أبوك قريب من هنه الحين بييني

سيف: أستغفر الله شو هالحاله قلت لج خلاص ما برمس في السالفه ما بنطق

سالم : أمايه الله يهداج وين تبين تنزلين هنه في نص الشارع خلاص ما باقي شي وبنوصل

أم سلطان : أنا أقول وقف السياره والا ترا ما بيصير خير يا سيف

سالم : أمايه أول مره أشوفج معصبه جذه هدي الله يخليج بيرتفع ضغطج

أم سلطان والدمعه بعينها : أنا مافيني الا العافيه بس نزلني ما أبي أتم وياه ولا دقيقه

سالم : خلاص سيف نزلنا نحن وأنت وصل البنات

سيف : أنت غبي والا تتغابي قلت ما شي نزله يعني ما شي فاهم

أم سلطان أترد على تلفونها هي أبويه أنت وين ؟؟ هكي شفتها عند الاشاره صح؟؟

خليفه : هي الغاليه أنتي وين خبريني

أم سلطان : نحن الحين يايين صوبكم يلا دقايق وبكون عندكم ،، وكملت كلامها لسيف هذي سيارة خلفيه واقفه عقب الاشاير وقف عندهم

سيف : مب واقف

أم سلطان : سيف أقصر الشر ونزلني عندهم والا بتشوف شي عمرك ما شفته مني

سالم : الله يهديك يا عمي خلها أتروح وياهم عشان تهدى اشوي ووم بترجع البيت تفاهموا

أم سلطان : بتوقف والا كيف ؟؟؟

سيف وهو يضرب أربع أشاير : وأنا أقدرأرفض لج طلب

أم سلطان حطت ايدها على الباب وقبل لاتفتحه سبقها خليفه

خليفه : خير ان شاء الله شو صاير ؟؟؟

أم سلطان : مب صاير شي بس بسير وياكم يلا بنيات تعالو ويايه

خليفه يمسكها من أيدها ويسندها : اشوي اشوي ،،،

أم سلطان يوم مرت عند دريشة سيف : أغدي ريال قبل وبعدين حاسب غيرك

خليفه : شو السالفه ؟؟

أم سلطان : سلامتك يلا أبويه ما نبا نتحير على العرس

سيف تضايج من نفسه تصرف بغباء وقلة أدب ويا أمه وهي اللي فعمرها ما قصرت عليه بشي دايما كانت أتحامي عنه وأتدافع عنه اذا حد هزبه أو تضارب وياه بس اليوم يجازيها بكلامه القاسي وقلة الحشيمه لها كره نفسه ألف مره ويوم لف الصوب الثاني شاف سالم والحزن باين عليه تذكر أنه لامه على شي ما له دخل فيه

سيف بحنان : سلوم

سالم يتطالع الصوب الثاني " مطنشنه "

سيف: سلوم أنا آسف والله مب قاصد أنت أتعرفني يوم أعصب اخربط في الرمسه وبعدين أنا عادنك ربيعي أكثر من ولد أخوي عشان جي آخذ راحتي وياك لو أنت صغير في السن بس عقلك ماشاء الله يوزن بلد

سالم بعده ساكت وحاس بضيجه من كل اللي صار

سيف : أدري أنك أتحبني وأتموت فيني عشان جذه ما رحت وياهم

سالم " أخيراً تكلم " : شو أقولك وأنت ضايجت أمك جنتك ونارك ؟؟؟ سبحان الله اللي عنده النعمه مب حاس فيها واللي محروم منها يتمنى لو يشوف ظلها بس

سيف يتطالعه بنظره استفسار : الله يهديك ماصار الا الخير وان شاء الله الوالده بنراضيها اول ما نرجع البيت أنت ليش زعلان ؟؟

سالم : أشتقت لأمي

سيف باستغراب : شو يعني ؟؟ أشتقت لها أتدل بيتكم روح سلم عليها

سالم يتنهد : أشتقت لأم سالم أشتقت لــ لطيفه

سيف دح بريك بالقو : ها شو اتقول أنت ؟؟

سالم : ماله داعي كل اللي أتسويه أنا من زمان أعرف كل شي

سيف: بس كيف ؟؟ منو خبرك ؟؟؟

سالم : أمايه الله يحفظها

سيف يتطالعه بحنان : سلوم حبيبي ترحم عليها

سالم : الله يرحمها ويغمد روحها الجنه

سيف: تدري أنت أكثر واحد أحبك من عيال خليفه

سالم : خخخ غصبا عنك لأني أشبهك

سيف : خسي شو أنتي تشبهني والله بنتحر عيل أنت الخسف أتشبه عمرك فيني لالالالا وألف لا

سالم أبتسم وما رد عليه ..

أم سلطان ركبت ويا خليفه وبوسلطان ووصلوها العرس ويا البنات ومن البدايه خليفه سألها عن اللي صار بس هي طبعها انسانه كتومه وايد ما ترمس عن اللي فخاطرها ويا أي حد من عياله غير بوسلطان وعشان جي كان صاكت طول الوقت ولا سألها لأنه يدري أنها بتخبره من نفسها وما ضغط عليها ..



،،،،،



القاعه كبيره ومزينه بأغلى و أفخم أنواع الورد الكوشه شكلها رهيييييييييب غالب عليها الطابع التراثي بس مع أشويه تعديلات حديثه في الديكور ...القاعه تسع 1000 شخص وتقريباً كانت شبه مليانه هالوقت اللي وصلت فيه أم سلطان وبنات خليفه ..

وعد وعذيجه مترأسين الاستقبال ويا حريم خال العنود ,,,

عذيجه : وعدوه هاي جنها أم سلطان ؟؟

وعد : هي والله وياها البنات فديتهن ,, تجدمت منهن وسلمت عليهم ويلستهم على طاوله قريبه من الكوشه بعدها بشوي وصلت عوشه وبناتها وسلمت عليهن وعد ووصلتهن لطاولة أم سلطان وسلموا على بعض وتمن يسولفن لين يت وعد ويا رويه وهند سلموا على بعض وتجمعوا البنات بصوب هند ومهره وشهد وأم سلطان ورويه بصوب ..



الساعه 11 حطوا العشاء وأعلنوا عن دخول العروس ،، بندو الاضاءه وتمت أضاءه وحده مصوبه صوب الباب على العروس ... وموسيقى رومانسه وهاديه تنساب على الآذان



عند الباب العنود متوتره وخايفه ويا عذيجه اللي أتشد من أزرها وأتطمنها أنه كل شي تمام ,,, تجدمت تمشي بخطوات ثابته والابتسامه ما فارقتها كل من شافها سمى بالرحمن عليها ،، ماشاء الله عليها كانت قمر فستانها الأبيض الناصع البياض والطرحه المطرزه باللون الوردي الفااااااااتح ميكاجها الهادي والخفيف وشعرها مرفوع لفوق ونازله خصله على طرف اذنها اليمين ...

وصلت للكوشه والمصوره مأذتنها الا لفي على اليمين والا اتطالعي هالصوب المهم يلست على الكوشه وين الحريم يسلمون عليها ،، وعد ماسكه ايد أم سلطان وتمشيها على الكوشه صوب العروس ..

أم سلطان : ماشاء الله تبارك الرحمن صدق غاويه البنيه الله يحفظها

عوشه : هي والله صدقتي يا وخيتي ...

وعد تجدمت منها وسلمت عليها وعذيجه واقفه عندها أتعرفها على الحريم

عذيجه : هاي ما تحتاي تعريف هاي وعد وهاي أم سلطان عمتها

أم سلطان : مبروك يا بنيتي منه المال ومنج العيال

العنود مبتسمه : مشكوره خالتي

عوشه تجدمت عشان أتسلم ،،، عذيجه وهاي خالتي عوشه مرت عم سلطان ريل وعد

عوشه : بالمبارك بالمبارك ,, الله يسعدكم يا بنتي

العنود مستانسه من دعاويهم : تسلمين خالتي ما قصرتي

نزلن من على الكوشه لأنهم أعلنوا وصول المعرس الحريم كلهن تغشن والي تحجبت وعد وعذيجه لبسن عبيهن لأنه هل العروس بيدخلون ويا المعرس وغطوها قطعه بيضا مفصله لهالغرض ...

عذيجه : وعدوه وقفي ويايه عشان أنغطيها

وعد : مافيني تعبت والله

عذيجه : بليز وعود ما أبي أوقف روحي بينهم

وعد : لا حول الله الله بلاني فيج خلاص بوقف وياج

بومحمد وبو وعد زفوا المعرس وياه خوال العنود وأخوان المعرس اللي هم عارف وحمد " هزاع ما دخل لأنه يستحي " محمد مرتبك ومستانس بنفس الوقت بس فرحته ما أكتملت لنه ما شاف العروس للحين وصل لين نص الكوشه وسلم على أخوانه وكمل دربه للكوشه

أول ما وصل عندها شلو القطعه البيضا عنها وخوز الطرحه وباسها على راسها تم يتطالعها مبهت أول مره يشوفها من قريب لهاي الدرجه ... العنود مستحيه لأن هاي أول مره أتشوفه على الطبيعه صح كانت بينهم رمسه على التلفون بس الحين غير ,, مسك أيدها وقعدها عنده وتم يسولف وياها بس طبعا ما تقدر تسمعه عدل بس تبتسم أونها تفهم شو يقول وفجأه هو حس جان يسويلها اختبار

محمد : يالخسفه

العنود تبتسم وهي مستحيه

محمد : أنتي تفهمين أنا شو أقول ؟؟ تسمعيني ؟؟

العنود بعدها تبتسم

محمد يضحك يالدبه قولي ما أسمع ليش تبتسمين " وهني خلصت الغنيه وسكتوا الفرقه لدقيقه ,, جان يقفط لأنها سمعته وتغير شكلها " وحاول يرقع السالفه وسولف وياها اشوي بعدها قصوا الكيكه وساروا للجناح اللي حاجزينه ...

وعد تمشي بتثاقل : وينه عمي بوسلطان ما أشوف سيارته ؟

أم سلطان : صبري يا بنتي بدق له وبتخبره وين .. أنتي يلسي ارتاحي

وعد : ما أقدر أذا يلست ما بنش هلكانه حاسه بتعب فضيييييييييييييييييييييع

أم سلطان وهي تتصل بــ بو سلطان : أنتي اللي يهداج ما أتطيعين الشور سايره راده ما يلستي محلج والعيون كلها عليج

وعد : ههه فديتج وين العيون عليه عيل منو كان يتطالع العروس؟؟

أم سلطان أترمس بوسلطان : وينك الله يهداك البنت تعبانه

بوسلطان : شو بتربي ؟؟

أم سلطان : وين أتربي الله يهداك بس أشوي تعبت من المراكض والهياته

بوسلطان يفتح باب السياره بعد ما وقفها عدالهم ونزل : ها الغاليه شو فيج ؟؟؟

وعد : ماشي فديتك بس أشوي حاسه بتعب من المشي

بوسلطان : يلا صعدي

وعد أتحس بألم فضيع بس قالت أكيد من العرس لأنها ما ارتاحت وأول ما صعدت السياره حست بدوخه حطت راسها على الكرسي ونامت

طول الدرب بوسلطان شاغله باله سالفه سيف للحين ما عرف ليش أم سلطان نزلت من سيارته وراحت معاهم ,, فجأه لف ورا وشاف وعد نايمه وكسرت خاطره لأنه سمعها أتئن

بوسلطان : الله يهداج يا أم سلطان جان درتي بالج عليها أحسبها وايد تعبت

أم سلطان : لا حول الله والله أني تعاييت وياها عشان تيلس بس هي اللي ما أتطيع ما عليك خلها اتنام الليله وبترتاح ان شاء الله ..

وعد انتبهت عليهم ونشت : شو أتقولون عني ؟؟

أم سلطان : الغاليه جان كملتي نوم كنت بوعيج يوم نوصل البيت

وعد : ما أقدر أحس بألم فضييع روحي بتطلع

بوسلطان تروع عليها

أم سلطان : شو أتحسين بالضبط ؟؟؟

وعد : ما أدري ما أقدر اتنفس بموت

أم سلطان : باسم الله عليج يالغاليه لا أتقولين جذه يمكن موعد ولادتج قرب

وعد بخوف : لالالا سلطان محد لا أنا ما بولد

بوسلطان : يا بنتي الله يهداج لا تتروعين ما عليه لو سلطان محد نحن كلنا عندج

وعد وبدت تدمع : لا كيف أيي ولدي وأبوه محد لالا

أم سلطان : يا بوسلطان وقف على ينب خلني اسير عندها

وقف بوسلطان سيارته على جانب الطريق ونزلت أم سلطان وسارت عند وعد أتحاول أتهديها وعد بالفعل دق عليها ويع الولاده بس هي خايفه من الفكره الي في بالها اللي هي " تموت وهي تولد "

أم سلطان : بوسلطان ودنا المستشفى هذا ويع ولاده والبنت بتربي

بوسلطان مشاعره مختلطه فرحه بخوف وتوتر: ان شاء الله الحين الحين بوديكم " ويتصل بحميد ويخبره"

وعد أتصيح : بكلمك أبوي

بوسلطان يناولها التلفون : هاج كلميه بس لا اتصيحين الله يهداج ما بيستوي شي عليج

وعد : أبوي أنت وين الحق علي

حميد روحه متروع وحاط ايده على قلبه مرت عليه ذكرى حرمته وتمنى لو كانت بينهم اليوم عشان توقف ويا بنتها وأتكون معاها في هالوقت الي هي في أمس الحاجه لها : وعد غناتي لاأتصيحين ما فيج الا العافيه أنا الحين بييكم المستشفى لا أتخافين ان شاء الله ما بيستوي شي

وعد وهي تشهق من الصياح والألم : أبوي سلطان محد سلطان

حميد : أفا عليج يا بنتي ما أحيدج جبانه وخوافه ؟؟ شو فيها لو سلطان محد أنا موجود كلنا وياج بس أنتي هدي بالج

أم سلطان تقرى عليها : يا أميه لا اتروعين مافيج الا كل خير وتوكلي على الله ان شاء الله بتقومين بالسلامه

تموا على هاي الحاله لين وصلو المستشفى بوسلطان وأم سلطان يحاولون يهدونها بس هي خايفه ومب مخليه حد يرتاح من الصياح اللي أتصيحه أتصلو في رويه عشان أتي وأتكون وياها يمكن اذا شافتهم تهدى شوي

حميد وعبدالرحمن ورويه وصلو بنفس الوقت ,,

حميد : بشر يا بوسلطان

بوسلطان : والله ما أعرف يا خوك الدكتوره أتقولد خلاص بتولد

حميد : أم سهيل دخيلج طمنينا عليها

رويه سايره صوب غرفة الولاده : ما عليها شر ان شاء الله تطمنو

أول ما دخلت رويه الغرفه شافتها وعدت وردت أتصيح بعد ما سكتتها أم سلطان

أم سلطان : لا حول الله مب زين يا بنتي هذا مب وقت صياح

رويه تحضنها : لا فديت روحج لا اتصيحين ما بيستوي شي عليج لا أتحاتين أنا بتم وياج لين تولدين

وعد : أخاف أموت وسلطان محد ولدي منو بيكون له

رويه : أستغفر الله العظيم لا أتقولين هالرمسه ان شاء الله محد غيرج أنتي وسلطان اللي بتربونه

أم سلطان عينها دمعت عورها قلبها على وعد اللي كانت ترتجف مثل الورقه من الخوف ما تقدر أتلومها ولا تقدر اتساعدها بشي غير أنها تقرى قرآن عند راسها عشان تهدى اشوي والله يسهل عليها الولاده ...

مرت أكثر من خمس ساعات ووعد بعدها ما ولدت الدكتوره خبرتهم أنه لازم يعطونها طلق صناعي لأنه الجنين وضعه ما يساعد على الولاده الطبيعه والأم "وعد " مرتفع الضغط عندها والولاده خطره عليها في هاي الحاله

تأزمت كل الأمور والكل يدعي ربه انها أتقوم بالسلامه

حميد ما طلع من المصلى يقرى قرآن ويدعي ربه يقوم بنته بالسلامه ...

بوسلطان أتصل بسلطان وبلغه عن الوضع وتم سلطان متلوم وقلبه عليها

مزنه : شو فيك حبيبي؟؟؟

سلطان سرحان يفكر بالكلام اللي قالته وعد " هي بس اذا ولدت وأنت محد صدقني طول عمري ما بسامحك" يا ربي أنا شو سويت ليش صرت أناني ووخليتها في الوقت الي هي محتايتني فيه ؟؟ يا ربي سهل عليها وقومها بالسلامه والله ما بسامح عمري على اللي سويته فيها

مزنه اتهزه : سلطان ؟؟؟

سلطان أنتبه لها : هلا

مزنه : شو فيك شو صاير؟؟؟ شو قال أبوك ؟؟

سلطان : ماشي وعد بتولد ودوها المستشفى

مزنه : مبروك ،، الله يقومها بالسلامه

سلطان ساكت وفكره عندها كيف بجابلها بعد هاليوم آآآآه يا قلبي ليش طاوعت مزنه ومددت اليلسه هني لو كنت راجع الاسبوع الي طاف جان ما كان هذا حالي

مزنه: وأنت ليش متضايج ؟؟ ان شا ءالله بتقوم بالسلامه

سلطان : أنتي ما تدرين يا مزنه هي كانت رافضه أني أسافر عشان ما تولد وأنا محد وقالت لي طول عمري ما بسامحك اذا ولدت وانت مسافر ,, جنها كانت حاسه أني ما بكون وياها

مزنه : أنزين مافيها شي

سلطان متفاجأ : مافيها شي ؟؟؟!!! شو يعني ما فيها شي أنتي ما أتعرفينها وعد عنيده وراسها يابس واذا زعلت مستحيل ترضى عليه

مزنه : اذا زعلت تعال عندي ولا يهمك بشيلك فعيوني اذا البيت ما شالك

سلطان : مزنه أنتي وايد تغيرتي

مزنه : كيف يعني ؟؟ من أي ناحيه ؟؟

سلطان : ما أعرف

مزنه : يعني لأني بديت أطالبك بحقوقي وما أسكت عن حقي صرت متغيره

سلطان : مزنه ارجوج خليني أبروحي ،، روحي يالس على أعصابي والمشلكه الدكتوره أتقول صعب أنها تولد طبيعي الجنين مب في وضعه الصحيح وما أعرف شو هذا غير ضغطها اللي ارتفع بشكل مفاجأ

مزنه : خلاص على راحتك أنا بسير أشوف عبدالله

سلطان ما رد عليها بس نزلت دمعه من عينه توصف الحاله اللي هو فيها ما كان وده يكون بعيد عنها هالوقت وخصوصا وهو عارف مخاوفها .. ليتني ألحين يمج ...



وعد من كثر التعب أتنش ويغمى عليها من فتره لفتره ... وفي وحده من المرات اللي نشت

وعد بتعب : س للطان

أم سلطان : وعد حبيبتي ؟؟

وعد : سلطان ما يا ؟؟

أم سلطان : لا فديتج ان شاء الله باجر الصبح بيكون هني

وعد أتصيح : الساعه كم الحين ؟؟

أم سلطان : عشر ونص

وعد : ليش للحين ما ولدت ؟؟ شو في ؟؟ الجنين فيه شي ؟؟

أم سلطان أتهديها : لا فديتج مافي شي بس الله ما راد ما عليج الحين عطوج ابره اتخفف الويع وان شاءالله بتولدين قبل الظهر

وعد : وين أبوي ؟؟

أم سلطان : برع

وعد : يستوي يدخل ؟؟

أم سلطان : هي فديتج الحين بزقره لج

طلعت أم سلطان وشافت عذيجه وعارف توهم واصلين

عذيجه سلمت عليها : خالتي أشحالها وعد ؟؟

أم سلطان : حالها ؟؟ الله كريم دخلي عندها هديها أشوي

عذيجه : ان شا ءالله ودخلت عند وعد اللي من شافتها ردت أتكمل صياحها

وعد : عذيجه شوفي محد طايع يخبرني شو مستوي

عذيجه : وعود حبيبتي مافيه شي عادي انتي تتحرين الحرمه من تحس بويع الولاده أتربي؟؟ لا فديتج

وعد : متأكده أنه كل شي عادي مافي شي

عذيجه : ان شا ءالله ... شافت رويه يالسه على الكرسي ونايمه ... نششتها وحاولت وياها أتروح البيت بس رويه ما طاعت قالت مب طالعه لين تولد بالسلامه ...

حميد يمسك نفسه عشان ما تدمع عيونه وهو يشوف وحيدته بهاي الحاله ,,, تقرب منها وباسها على جبينها

وعد : أبوي

حميد يسكتها : أشششش لا أتصيحين هالدموع أبدن ما أبي أشوفها سامعه

وعد أتهز راسها أنه اوكي

حميد : أوعديني أتكونين شجاعه ما تتروعين خلي إيمانج بالله قوي الولاده صعبه ما بجذب عليج لأنها طلوع روح من روح بس شو في الأجر اللي تاخذينه بمجرد أنج تولدين تنمحي كل ذنوبج واستغلي هالوقت بالدعاء مب الصياح أدري أنج تتألمين بس حبيبتي حاولي تستفيدين من هاي الفرصه ,,"هني دموعه بدت أتطيح غصبن عنه " و

وعد تمسح دموعه : خلاص شوفني ما فيني شي ولا اصيح فديتك سامحني

حميد يبوس ايدها : بارك الله فيج بارك الله فيج "وطلع "

بعد ساعتين بشرتهم أم سلطان بحارب واخته غايه " هاي مفاجأه " ولادتها كانت عسيره جداً بس الله سهل في الأخير والحين هي نايمه

أم سلطان وهي تمسح دموعها طلعت من غرفة الولاده وسارت صوب بووعد وبوسلطان

حميد وبوسلطان : بشري يا أم سلطان

أم سلطان أتمد لهم ايدها : أول عطوني البشاره

بوسلطان : لج الي تبينه المهم طمنينا على البنت والياهل

أم سلطان : مبروك الحمدلله البنت الحين بخير بس تعبانه اشوي ونايمه أما اليهال

بوسلطان وحميد : يهال ؟؟؟؟؟؟؟؟؟؟؟؟؟؟؟؟!!!!!!!!!!!!!!

أم سلطان : هي يهال ماشاء الله توأم بنت وولد

حميد : ماشاء الله ما شاء الله تبارك الرحمين

بوسلطان : عيل ما خبرتنا من الأول

أم سلطان : والله روحي ما أدري

بوسلطان : يالله زيادة الخير خيرين ،، ببشر سلطان

سلطان ما خلا التلفون يكمل رنه : ها ابويه بشر

بوسلطان : مبروك ما ياك يالغالي الحمدلله على سلامة أم حارب وأخته

سلطان : الله يسلمك يالغالي وعد اشحالها أقدر اكلمها الحين ؟؟

بوسلطان : لا يا بويه الحين هي نايمه العصر ان شاء الله بخليها اتكلمك

سلطان : الحمدلله ألف شكر لك يا ربي وحروب اشحاله منو يشبه

بوسلطان : ههه أشوفك نسيت أخت حروب

سلطان : منو أخت حروب ؟؟

بوسلطان : ليش أنت ما دريت ياك توأم

سلطان وأشوي بيطير من الفرحه : شووووووووو كيف ؟؟

بوسلطان : ههه الله يهداك شو بعد كيف ربك رايد جذه

سلطان : يا ربي والله ما فيني صبر ارد البلاد

بوسلطان : يلا بخليك الحين بسير اتطمن على أحفادي

سلطان : بوسهم عني

بوسلطان : ان شاء الله ...

الكل درى بولادة وعد وتفاجأو بالتوأم لأنها ما يابت طاري لحد وخلتها مفاجأه للكل ...



،،،،،،،،،،،،،،،،،،،،،،،،، ،،،،،،،،،،،،،،،،،،،



محمد والعنود بعد العرس سافروا الى بلجيكا وبعدها بيروحون جزيرة سيشل يكملون شهر العسل ... مستانسين وبأحسن حال ...

مهره نظراً لظروف ولادة وعد أجلو ملجتها لين الاسبوع الياي ويا ملجة شهد ...

,,,,,,,,,,,,,,,,,,,,



نهاية الجزء الـ الثاني والعشرون ...

أتمنى ينال اعجابكم ,