أموت أنا في حبهم

[الجنيه]

شمه
الله يبارك فحياتج وعقبالج ان شاء الله
بتعرفين مصيرها في هالجزء

ربوع البلاد

خيماويه
وعليكم السلام

ان شاء الله ما ببطي عليكم

[الجنيه]

أموت أنا في حبهم

الجزء الحادي والعشرون





وصلت الشرطه لموقع الحادث تتبعهم سيارات الاسعاف ... منصور على طول خذوه بسيارة الاسعاف الى قسم الحوادث بمستشفى دبي الأقرب لشاطئ الممزر ....

موزه الضربه ياتها على الخصره وويها أبد ما صابه شي بس يحاولون يطلوعونها ومب قادرين استعانوا بشرطة الأنقاذ البري عشان يقصون الباب ويطلعونها

الشرطه أتحاول جهدها تبعد الناس المتجمهرين حول مكان الحادث عشان يقدرون يتخذون الاجراءات اللازمه بأسرع ما يمكن لأن التأخير مش في صالح موزه ،، نبضات قلبها بطيييئه وما تستجيب للمسعفين بعد محاولات لأكثر من ساعه ونص قدرو أنهم يخلصون جسمها الضئيل من السياره ونقلوها لسياره الاسعاف بس تأخروا وايد والروح فارقتها بهدوء وصمت ,,,



عبدالرحمن يكلم رويه : يلا نشي لبسي عباتج حشرتينا تراج

رويه : أنزين أشوي أشوي علينا

عبدالرحمن : هند يا هند شو بعدج ما خلصتي ؟؟؟

هند تربع وشيلتها بيدها : خلاص أبويه بس أكوي هالشيله هاي كانتا السباله ما كوتها

عبدالرحمن : الحين وقتج أنتي الثانيه أسميني أبتلشت فيكم بلشه عنبو عيل أنتوا ويه عشى برع؟؟؟

رويه :عوذ بالله من ابليسك اشفيك يا بوسهيل محتشر المطعم مب طاير

عبدالرحمن : أنتوا تخبلتو أقولكم الريال يتريانا صار له ساعه مب حلوه بعد نتأخر عليه

رويه : ما عليك من حميد ما بيقول شي الاأنت مسوي لنا حشره

عبدالرحمن : شوفوا عاد عشر دقايق وان ما ييتن بخليكن وبروح روحي

رويه : أنا خلصت تخبر دلوعتك جان زهبت

عبدالرحمن رايح صوب الباب : تعالي ويا بنتج يعني استعيليها



بعد عشر دقايق طلعوا كلهم صوب المطعم اللي عازمنهم فيه حميد .. بعد ما تعشوا يالسين يحلون وداقين سوالف فجأه رن تلفون حميد

حميد : الو

الملازم : السلام عليكم ورحمة الله وبركاته

حميد : وعليكم السلام ورحمة الله وبركاته ,,, هلا والله منو الريال؟؟

الملازم : عفواً الشيخ أنت عم موزه عبدالرحمن

حميد تغير شكله : أي نعم خير يا خويه انت منو وشو صاير ؟؟؟

الملازم : بس بغينا أنخبرك أنها مسويه حادث ,, و عظم الله أجركم

حميد : لا شو أنت شو أتقول ؟؟ الحين هي وين ؟؟؟ بأي مستشفى ؟؟

الكل تجمدت نظراته على حميد يبون يعرفون منو اللي في المستشفى

الملازم : الحين نقلناها لمستشفى دبي

حميد : خلاص نحن الحين ياين

الملازم : انزين ياريت اتبلغ أهلها

حميد : ويايه كلهم ما يحتاي فمان الله ... أول ما سكر التلفون غمض عيونه ورص عليهن بالقو عشان ما تدمع

عبدالرحمن : خير يا أخوي شو مستوي ؟؟؟

رويه : بو وعد وعد فيها شي ؟؟؟

هند : اللهم اجعله خير

عبدالرحمن يطلب الفاتوره

حميد: مافي شي بس خلونا نطلع من هنه قبل

عبدالرحمن يحط الفلوس بيد مرتبكه حس بان السالفه مب هينه

واول ما طلعو في السياره ردوا يتنشدون حميد عن السالفه بس هو تم ساكت ما يرد على حد

عبدالرحمن : حميد لا تلعب بأعصابي خبرني شو مستوي منو اللي في المستشفى ؟؟؟؟

رويه اتصيح قبل لا أتعرف بالسبب : دخيلك يا حميد طمني شو مستوي منو ميهود ؟؟؟

عبدالرحمن : حميد بعدين وياك ؟؟؟

حميد يوم قرب من المستشفى قرريتكلم : نحنا كلنا مسلمين ونآمن بقضاء الله وقدره تحملو على أنفسكم ولا أتصيحون اذا ما قدر يكمل لأنه تم يصيح من خاطره وبصعوبه يشوف الشارع

الكل تم ساكت ما يبون يعرفون حميد يتكلم عن أمنوه ,,, عند باب الحوادث نزلوا كلهم ورويه أول ما قربت من الباب صرخت بصوت عالي وهي تتطالع حميد بنتي موزه !!!!

حميد على طول غطى ويهه بالغتره ولوى على أخوه وتم يصيح في حضنه

هند حضنت أمها وتمت أتصيح وياها

عبدالرحمن مب مستوعب اللي سمعه يبعد أخوه عن حضنه يبي يتأكد منه بس حميد متقبض فيه بالقو من حزنه على بنت أخوه اللي هي حسبة بنته وأغلى

رويه أغمى عليها ودخلوها عند الدكتور صابها انهيار عصبي حاد

هند أتصيح : عمي أبويه شو مستوي ؟؟ صدق موزه ... وأتصيح

حميد ترك أخوه وراح لهند وخذها بحضنه : ترحمي عليها قولي لا اله الا الله

هند ترجع على ورى : لا عمي يقصون عليك مواز ما فيها شي رايحه ويا منصور وقالت بتييب لي آيس كريم

لا لا جذابين يمكن وحده ثانيه هم ما يعرفون هم ما يعرفون يلست على ركبها ... عمي ودني عندها ما أصدق لين أشوفها .. حميد يلوي عليها وينششها : قومي يا بنتي مب زين جي أتسوين قومي شوفي أبوج

عبدالرحمن نازل على ركبه ومغطي ويهه بالغتره

حميد : تجدم منه قوم الله يرضى عليك خلنا أنشوف البنت آخر مره قوم

عبدالرحمن يصييح بس من دون صوت مب قادر ينش يحس بنفضه في جسمه كله ريوله مب قادر يحركها

حميد يسند أخوه بيد وهند بالثانيه .. دلوهم على المكان اللي حاطين فيه موزه ودخلو ثلاثتهم ضربه



هند تمشي بسرعه وخوزت اللحاف عن ويها ... موزوه قومي عن الحركات السخيفه وتربع صوب عمها أتيره صوب الشبريه المرقده عليها موزه شوفها عمي ما فيها شي الحمدلله ما ياها شي طاع كيف مبتسمه والله بكفخج الحين نشي حرام عليج شوفي أبوي كيف صار من خوفه عليج وأمي مسكينه ياها انهيار عصبي قومي يالدلوعه .. موزه نشي الله يخليج خلاص أنا بقنع منصور يخلي عرسكم بعد خمس شهور وصدقيني ما بأذيج يوم أتكلمينه بس نشي قولي أنج بخير موووزززه وتمت أتصيييييييييح ..

عبدالرحمن تقرب منها يتطالع ويها الصافي ما عليه أي خدش أو جرح يأكد أنها متعرضه لحادث .. يقول يمكن هذا مقلب مسوينه يحركها بس ما ترد عليه حط راسه على قلبها يبي يسمع دقاته بس ماشي نبضات رفع راسه لأخوه حميد وعلى طول هزه له راسه يقصد صدق يا عبدالرحمن البنت راحت عند ربها ادعيلها يا خوي ادعيلها

حميد داس على قلبه وتكفل بإنهاء كل الاجراءات واتصل بسهيل عشان يحضر بس ما خبره أنها توفت وبلغ الكل بالي صار وطلب من سلطان يخبر وعد بس بطريقته الخاصه عشان ما تتأذى أو تنصدم

حميد تنشد عن منصور وعرف أنه مرقد في غرفه خاصه وفيه أشويه كسور وخدوش ... أذنه الطبله تضررت فيها بشكل كبير وصار فيها تمزق يمكن يلاقي صعوبه في السمع وهالشي له علاج بس بعد ما يلتأم الجرح أشوي بس أذنه الثانيه ما راح تتأثر عنده كسر في ريله اليسار عند الركبه وحاطين له جبس بينشال بعد شهر او شهر ونص والحين عاطينه مهدئ عشان ينام لأنه طول الوقت يصارخ ويهاذي باسم موزه ..بس ما يدري شو صار فيها



،،،،،،،،،،،،،،،،،،

فبيت بوسلطان



وعد مجهزه الغرفه ومزينتنها ومسويه عشى رومانسي لسلطان وتترياه على أحر من الجمر الغرفه شبه مظلمه فيها اضاءه خفيفه بس عند اليلسه اللي مجهزه العشى فيها ... حاطه ميك أب خفيف وحلو بنفس الوقت ولابسه فستان خفيف بس يديد يعني سلطان أول مره يشوفه متعدله كأنها سايره عرس ,, استوت الساعه 11 وسلطان للحين ما بين بدت تيأس أنه يرجع وتوها قررت أتبدل وأتنام دخل سلطان بس خلا نفسه ما يدري انها في البيت



سلطان وهو داش رفس طرف الكوميدينو الي عند الباب : أخخخخخخخخخخ شت وتوه ياي يبطل الليت طلعت له وعد في ويهه

وعد : مساءك سكر

سلطان مندهش : مساج عود وعنبر وياسمين فديت روحج أنا في حلم والا في علم ؟؟؟

وعد تقرصه على خده على الخفيف : لا حبيبي أنت في علم

سلطان يلوي عليها بالقو : مشتااااااااااااق لج حيييييييييييييييييييل

وعد : وأنا بعد بس حبيبي أشوي أشوي على بطني بتذبحنا

سلطان يبعد أشوي : فديتكم أنتي واللي في بطنج والله لكم وحشه

وعد : ممم وأنت أكثر

سلطان يمشيها ويلسها عداله : وين رحتي عني ؟؟؟

وعد : ......

سلطان : هنت عليج ؟؟؟

وعد أتبوسه على راسه : لا حبيبي والله روحي " دمعت عينها وتمت أتصيح وتتكلم بنفس الوقت " ما أعرف شو صار لي متولهه عليك مووووووت بس ما أدري ليش جي سويت سامحني حياتي

سلطان يمسح دموعها بظهر أيده : حبيبي والله دموعج غاليه عليه لا أتصيحين حبيبي أنا مقدر ظروفج ويمكن مثل ما قالت أمي الحمال هو السبب بس صدقيني أوعدج بعد ما أيي حروب بالسلامه ما شي حمل مره ثانيه ...

وعد : لا والله مب عــ كيفك أنا أبا مانع وغايه وماريه

سلطان : يالله الحين تبيني أتحمل هالعذاب بعد ثلاث مرات ؟؟؟ لالالا أنا مش موافق

وعد : كيفك

سلطان يلوي عليها : كيفي!!!! عينج بعيني

وعد: بلى هالنظرات الخبيثه أنزين .. يلا حبيبي تعال نتعشى بموووووت من اليوع

سلطان : آسف حبيبي خليتج بيوعج للحين لو أدري أنج تترييني كنت ما بطلع من البيت

وعد : عادي يا عمري أهم شي أنك ييت

تعشوا وطول الوقت ضحك وغشمره وسوالف

سلطان " ياربي أنا شو سويت فحياتي عشان أتعذب كل هالعذاب أمووووووووووت فيها ياناس والله ما أبي أخسرها ...بس مزنه بعد ما تستاهل ياربي ساعدني شو أسوي "...

ونسى سالفة موزه أو بالأحرى تناساها قال مدام أنه الدفن بيكون الصبح يعني يخلي وعد ترتاح للصبح وبعدين بيخبرها وهي بعد الدكتور محرص عليهم ما يسببون لها أي صدمات ثانيه عشان ما يتكرر اللي صار المره اللي فاتت .........



أم سلطان : سهيل فديتك ليش ما تاكل

سهيل وهوناش : الحمدلله شبعت أمايه

أم سلطان : وأنت شو كلت يا صبي ؟؟؟ أيلس أبويه كل شرا الناس ما أتشوفه سالم ماشاء الله عليه مخلص صحنه وناوي عصحنك

سيف : ههههههههههه ألحين أنتي الله يهداج أتقارنين هالغول بسهول المسكين

سالم : الحين وقت أكل يعني مب متفيج أبد أني أرد عليك

سعيد : عند البطون تعمى العيون

بوسلطان : أشفيكم الله يهداكم هذا وقته الخبال الي انتوا فيه

في هاللحظه الخدامه وصلت أتخبر بو سلطان أنه حميد متصل .. وطبعا بو وعد خبره بسالفة الحادث لأنه روحه كان محتاي حد يوقف وياه وطلب منهم ما يخبرون وعد لأنه سلطان بيتكفل بالمهمه .. بوسلطان وعياله وسالم راحوا المستشفى عشان يوقفون ويا عبدالرحمن وحميد ...

خليفه يوم وصل بيت أبوه مالقى حد وعلى طول حدر فلته يدور على سهيل

خليفه : أنت هني ؟؟؟

سهيل يلتفت له وكمل قراية الكتاب اللي في ايده

خليفه : افا يا سهيل أنت من بد عيالي كلهم ما توقعتك بيوم تتصرف بهاي الطريقه الطايشه

سهيل منزل راسه وسكر الكتاب وحطه على الطاوله القريبه منه

خليفه : أنزين ممكن نتناقش بالموضوع ؟؟؟ ........ مب ناوي ترمس !!! خلاص على راحتك بس أنا عندي شي بقوله وبعدها أنت حر ،،، شوف يا سهيل الكلام اللي قالته أمك صح بس أنت سمعت طرف واحد ما سمعت الطرف الثاني

سهيل بلهفه وخوف : يعني سالم صدق مب أخوي

خليفه : كيف مب أخوك ؟ وأنا أبوكم ؟؟؟ سالم بس أمه غير

سهيل : هو يدري ؟؟

خليفه : لا ومتأكد وواثق أنك مستحيل أتوصل له الخبر

سهيل : لا أكيد ما بقوله اذا أنا يوم دريت حسيت بالدنيا تنصك بويهي عيل هو شو بيصير فيه ؟؟؟ الحين عرفت ليش أمي كانت أتعامله بهالطريقه

خليفه : لا سهيل أمك في حياتها ما فرقت بينكم وبين سالم ومن البدايه معتبره سالم بجرها وولدها العود بس اليوم ما أدري شو ياها وقالت اللي قالته

سهيل : انزين أنا أبي أعرف شي واحد صدق كنت أنت السبب في موت أم سالم مثل ما قالت أمي ؟؟؟!!!

خليفه يتنهد بحسره : الأعمار بيد الله ويمكن أنا كنت سبب في موتها بس بإرادة ربك

سهيل ......

خليفه : ما أبيك أتم محتار أنا بخبرك بالسالفه كامله وأنت بنفسك تقدر تحكم بعدها ... يا سهيل أنا في شبابي كنت طايش وايد وما أسمع الكلام وكنت راعي سوالف بنات يعني ليلي نهاري مغازل وترقيم لين شفت أم سالم لطيفه الله يرحمها وايد عجبتني ما كانت متحجبه بس محتشمه أنعجبت فيها بشكل كبير بس هي ما كانت أتعبرني أوتهتم لي ,,, هي اتصير ربيعت أمك الروح بالروح ونحن قبل كنا عايشين في بيتين مثل فلتنا وفله أبوي يعني بيتين في حوش واحد وكل ما أتي عند ميثا كنت أترقبها عند الباب وأحاول أرقمها بس هي أتطنش وقتها كان عمري17سنه قلت لأبوي أبي أتزوجها وأمي وافقت قالت ما بينصلح حالي غير بالزواج ...ما كان ناقصني شي ولطيفه وافقت عشنا أحلى سنين عمرنا في ست شهور بعدها بدت المشاكل بيني وبينها لأنها ما كانت أتييب عيال وأنا أهملتها ما فكرت أعالجها أوشي بعد اصرار من أبوي وديتها للعلاج في الخارج وعلاجها كان يتطلب وجودها الدائم في المستشفى ولأنه ما كانت عندي أي مسؤليه وكنت بعدني طايش تعرفت على شله شباب خليجيين دلوني على المخدرات وبديت أتعاطى لين أدمنت تخيل وصل بي الحال أني نسيت أنه عندي حرمه بعت تلفوني وكل ما أملك عشان أشتري هالسم حرمتي من خوفها علي بلغت السفاره اللي لقوني طايح في الشارع بعد ما تعاطيت جرعه كبيره وإغمي علي بسببها المهم تعالجت ورجعنا البلاد وحملت هي في سالم ،، وأنا بعدني على سوالف الادمان اللي محد يدري بها .. مره كنت متأخر في الرده وأول ما وصلت شفتها أتصييح قربت منها أبي أشوف شوفيها بس ما خلتني ودزت أيدي عصبت بي هالحركه وما كنت أدري أنها تعاني آلام الولاده وضربتها من دون حاسيه لين يا أبوي وشلها عني وودوها المستشفى وتوفت وهي تولد سالم .........................................

فتره سكوت مرت قبل لا يكمل خليفه ويمسح دموعه .... بعد هالحادث طبعا حاكموني لأني تسببت بمقتل زوجتي ومراعاة لظروفي أنحكم علي أني أدخل المصحه عشان أتعالج من الادمان وتميت فيها قريب السنه وبعد ما طلعت دخلني أبوي معهد تأهيل والحمدلله توفقت بعدها ,,, أبوي لزم علي أتزوج وأنا ما أخترت غير ميثا لأنها كانت قريبه من لطيفه ووايد أتحبها وقلت ما بلقى أحسن منها عشان أتربي ولدي ،، أمي ما كانت راضيه باختياري بس أقنعتها بطريقتي الخاصه وتزوجنا ....

سهيل: ما عنده شي يقوله او بالأحرى اللي بيقوله ماله أي قيمه ,,,

خليفه يمسح دمعه خانته : سهيل أنا ما خبيت هالشي عنكم الا عشان مصلحتكم ما بغيت أطيح من عيونكم ولا بغيتكم أتعرفون شي عن طيشي .. بس لي طلب صغير أتمنى أتنفذه ما أبي حد يعرف بهالموضوع ..

سهيل يهز راسه بالايجاب ...

خليفه نش بيطلع بس سبقه سهيل وناداه : أبوي

خليفه : عيونه

سهيل ربع لحضن أبوه وحبه على راسه وتم في حضنه : سامحني يا أغلى الناس سامحني

خليفه يمسح عراسه بحنان : مسموح حبيبي أصلاً أنا متسحيل أزعل عليك ..عيل سالم وينه عنك ؟؟؟

سهيل : نسيت أخبرك وحده من بنات عم وعد مسويه حادث وتوفت

خليفه : إنا لله وإنا إليه راجعون متى .؟؟؟ ليش محد خبرني

سهيل: من شوي بس درينا وساروا كلهم المستشفى

خليفه: وأنت ليش ما رحت ؟؟؟!!

سهيل: كنت عند أمايه أرتفع ضغها ويدي قالي أتم وياها

[الجنيه]

خليفه : وينها الحين ؟؟؟

سهيل : فغرفتها نامت

خليفه: أنزين نش خلني بتطمن عليها وبعدين بنروح لهم ... تجدم من الباب خطوتين وأنصدم بشوفة سالم والدموع مخرسه ويهه ... خليفه تمنى الموت ولا يشوف دموع ولده ودعى ربه أنه ما يكون سمع رمسة خليفه ويا سهيل....

سالم رجع البيت لأنه كان يدري أنه خليفه بيي البيت وحب يروح وياه بعد ما يخبره بس أول ما وصل سمع اللي دار بين خليفه وسهيل ...

خليفه بيد مرتجفه يمسح دموع سالم: أنت ما رحت ويا قوم أبوي ؟؟

سالم يهز راسه بالايجاب

خليفه : شو فيك ؟؟؟

سالم يهز راسه أنه مافيه شي

خليفه : تعال أيلس عندي

سالم ساكت

خليفه : سالم شوفيك ؟؟؟ كلمني قولي شو فخاطرك ؟؟؟ أنت سمعت شي ؟؟

سالم ودموعه تتزايد وبصوت متقطع : أبوي أنــ " بس هني خانته الشجاعه وبدى يصيح مثل الطفل الرضيع "

خليفه خذه فحضنه وتم يمسح عراسه : خلاص يا أبويه لا أتسوي بعمرك جذه ما صار شي

سالم : أبوي أنا مب زعلان من اللي سمعته

خليفه : أكيد ؟؟

سالم : أكيد أصلاً أنا أعرف من ثلاث سنين

خليفه بصدمه : ثلاث سنين ؟؟؟ كيف ومن اللي خبرك ؟؟ دخيلك لا أتقول أنها ميثا

سالم يهز راسه : لالا أمي ما يخصها أمايه خبرتني

خليفه : وطول الوقت ساكت ؟؟ ما بينت أنك أتعرف

سالم " شو تبيني أقول ؟؟ تبيني أكرهك لأمك كنت السبب في موت أمي ..؟؟ والا لأنك كنت السبب في حرماني منها ومن حنانها وقلبها " : شو كنت تبيني أقول ؟؟ ما بغيت أضايجك بشيء

خليفه يلوي عليه بالقو: سامحني سامحني

سالم يمسح دموع أبوه بظهر أيده : مسموح يالغالي أنت ما لك ذنب والأعمار بيد الله

خليفه حس براحه فضيعه : الله يبارك فيك ان شاء الله ،،، يلا حبيبي خلنا أنروح أنأدي واجب العزا

سالم: ان شاء الله



,,,,,,,,,,,,,,,,,,,,,

مع بزوغ فجر اليوم الثاني الخبر أنتشر بكل مكان خبر وفاة موزه بنت عبدالرحمن .. وعد خبرها سلطان الصبح ووقف وياها وخفف عنها ... مرت أيا العزا شديده على بيت عبدالرحمن لأنه رويه طاحت عليهم من الصدمه وعبدالرحمن نفسه كان وايد تعبان ونفسيته تعبانه أكثر ,,, منصور وصله خبر وفاة موزه وطبعاً تأثر بشكل فضيع وياته حاله نفسيه أظطرت أهله يدخلونه مستشفى علاج نفسي عشان يتجاوز صدمة وفاة موزه...





بعد شهرين من الحادثه ...



سلطان : ها مزونتي شو قلتي ؟؟؟

مزنه : ما أعرف والله بس أنا خايفه يا سلطان

سلطان : يا حبيبتي ما بيستوي بج شي ان شا ءالله أنتي توكلي على الله وكل شي بيكون أوكي

مزنه : ممم ما ادري

سلطان : بعدين لا تنسين أم هادف سوتها العمليه والحين الحمدلله بخير ونعمه ومافيها الا العافيه وبعدين الدكتور طمني وقالي انه العمليه مضمونه باذن الله ..

مزنه : كيف اروح بروحي وأنا ما أعرف أتصرف ؟؟؟

سلطان : حياتي منو قال أنج بتروحين بروحج أنا بعد بيي وياج وبكون عندج ما بخليج لحظه بروحج

مزنه : أنزين بس بشرط

سلطان : أتدللي يا قلبي آمري يا غناتي قولي شو هالشرط

مزنه : أتكون أول واحد أشوفه اذا نجحت العمليه

سلطان : عيوني يا عيوني أنتي

مزنه : لاأتدلعني وايد ترا بتعود

سلطان : تعودي حبيبتي أنا كريم وأنتي تستاهلين

مزنه : بس كيف بنسافر ووعد ؟؟؟!!

سلطان : شو فيها وعد ؟؟

مزنه : أقصد ولادتها قربت

سلطان: حياتي وعد باقي لها شهر واسبوعين تقريباً ونحن ان شا ءالله ما بنطول فسفرتنا بس عشرة أيام وبنرجع

مزنه : خلاص على راحتك

سلطان : يعني آخذ موعد من الدكتور وأحجز ؟؟

مزنه : توكل على الله

سلطان تقرب منها وطبع بوسه خفيفه على خدها وطبعا هي أستوت طماطه

سلطان : خلاص حبيبي انا بكلم سعيد عشان ياخذ لنا موعد ويا الدكتور وبسير احجز التذاكر اليوم شي في خاطرج ؟؟؟

مزنه بحزن : بتروح ؟؟؟

سلطان: شو فيج حياتي تراني من الصبح عندج

مزنه : وليش تتحرى شوفتك هالكم ساعه أتشبع والا أتطفي نار الشوق

سلطان: بس يا عمري ما أقدر أتأخر أكثر وعد بتزعل

مزنه : وعد لها قلب وتحس ويهمك زعلها أما أنا فلا أصلاً أنا من أكون عشان تهتم لي

سلطان يقرب منها ويلوي عليها : أنتي أم ولدي أنتي أغلى ناسي ،، بس لا تستوين غيوره بلييز أنتي تدرين

مزنه أتخلص عمرها منه : هي ادري برايك روح لها الله يحفظك

سلطان : أروح وأنتي زعلانه ؟؟

مزنه بحيا : لا حبيبي مب زعلانه ،، برايك جان بتروح الله يحفظك

سلطان : فديت قلبج الطيب ،، وداعة الله ،، وهو طالع تعلق به عبدالله وتم يصيح الا يروح وياه وسلطان توهق رد دخل عند مزنه عشان تقنع عبدالله وتفاجأ بها أتصييح أحر ما عندها تقرب منها بخطوات سريعه ولوى عليها

سلطان : باسم الله عليج مزنوتي حبيبتي شو فيج ؟؟؟ شو مستوي ليش أتصيحين ؟؟؟

مزنه أتهز راسها : مافيني شي روح عني خلني فحالي

سلطان : لا ما بروح لين أتقولين لي شو مستوي توج بخير ما فيج شي

مزنه : سلطان دخيلك أتركني في حالي

سلطان : مزنه حياتي لا اتسويبي جذه ما بقدر أروح من دون ما أعرف شو فيج

مزنه : ماشي

سلطان : وغلاتي عندج ترمسين

مزنه : ماشي سلطان بس أحس أني أضغط عليك ومسببه لك مشاكل

سلطان : عشان بديتي أتطالبين بحقوقج ؟؟؟!!!

مزنه : هي

سلطان : مزنه بخبرج شي يمكن أنتي ما أتعرفينه أنا أحبج وأحبج من كل قلبي صدقيني لج مكانه عزيزه وغاليه في قلبي ما بجذب عليج وبقول أني أحبج أكثر من وعد بس صدقيني لج مكانه ما يملاها غيرج أعزج وأحبج ومن حقج أتطالبين بحقوقج وان شاء الله بحاول أعوضج عن السنين اللي فاتت كلها ..

مزنه : بس سلطان ما أبيك تملل مني قبل كل شي كان غير يعني ما كنت اشوفك الا بين فتره وفتره بس الحين صرت وايد قريب مني وما أبي أخسرك مره ثانيه .. يمكن بديت أصير أنانيه وأبيك أتكون لي وحدي

سلطان يحط صبعه على ثمها : أششش ما أبي أسمع هالرمسه مره ثانيه .. مزنه أنا اللي ظلمتج من البدايه وحرمتج من أبسط حقوقج والحين صدقيني بسوي كل اللي أقدر عليه عشان أعوضج ما أدري اذا بتصدقيني أو لا بس تقدرين أتقولين أنه ضميري صحا وما أبي أعيشج بظلام أكثر من اللي كنتي فيه وبإذن الله كل الأمور بتتصلح ..

مزنه بابتسامه حلوه : سلطان أحبك

سلطان : ها شو قلتي ؟؟؟ لالالا أنا ما سمعت عيدي بليز

مزنه : هههههههه ما قلت شي سلامتك

سلطان : مزنوه عيدي الي قلتيه والا بتندمين

مزنه : ما أبي

سلطان يتقرب منها ويمسك رقبتها يهددها : بتقولين والا كيف

مزنه : اميي باسم الله بتذبحني ،،، أحبــــــــــك

سلطان : ياويل حالي كم بعيش يا ربي

مزنه مستحيه : أنزين لا أتزاعج أذني ما تتحمل

سلطان : ههه أوكي غناتي يلا عيل دام طاح الحطب أنا ساير و دخيلج شوفي عبدالله وينه ما فيني يتعلق فيه مره ثانيه روحي متأخر

مزنه : ما يخصني أنت وولدك تفاهموا بروحكم

سلطان: أوكي يا مزاني ,,, سلطان تأكد من أنه عبدالله ما يشوفه وطلع .... يا ربي شو اللي قاعد يصير ويايه ليتني أقدر أعيش جذه من دون مشاكل مزنه وعبدالله ,,, و وعد .. معقوله في أنسان يقدر يحب هنتين فنفس الوقت اذا وعد قلبي فمزنه نبضات قلبي .. يا ربي ساعدني بس لو وعد ترضى نقدر نحن الثلاثه انعيش بسعاده ويا بعض ,, سلطان أنت شو أتخربط مستحيل وعد ترضى بهالشيء لو مزنه بترضى بس وعد غير غير وهاي المشكله الله يعيني عليها..

..........



فبيت سلطان

وعد من قرب موعد ولادتها وهي كله حاسه بخمول وتبا ترقد يعني اربع وعشرين ساعه منسدحه على الشبريه بس يوم يكون سلطان عندها تنسى الرقاد و كل اللي فيها بدت أتلاحظ أنه سلطان ما يفوت الفرصه يوم يشوفها راقده يطلع وكل ما تشكت من هالشي قال أنه ما يبي يزعجها وينششها عشان يخبرها أنه طالع بدت أتشك بحركاته وسوالفه اللي ما أتطمن ...



في الصاله



خليفه وعياله يالسين ويا أبوسلطان وأمه يشربون جاهي حليب ويسولفون ويتنشدون عن أخبار بعض

أم سلطان : زين يا بويه عاد أنته لا تهلك عمرك بهالشغل مره ما تتشاهد قلنا بتسكن عندنا بنشوفك أكثر من قبل الا أنت مستوي كله مختفي ما تبان الا بالغصب

خليفه يبوس راسها : فديت روحج والله شو أسوي هاليومين البنيان قايم سوقه ولازم نتلاحق على عمارنا عشان ما أتضيع عنا الصفقات الكبيره والحلال لاوزم أنتابعه وأنشوف اللي لنا واللي علينا

أم سلطان : الله يعطيك العافيه

بوسلطان : عيل وين البنيات ؟؟؟

سهيل : عنود ونجود يذاكرون عندهم أمتحانات

سالم: وأنت ما وراك أمتحانات يا شاطر

سيف : أندوكم منو يرمس قول حق عمرك قبل فحياتي ما شفتك قابض كتاب على الأقل سهول ينشاف بكتبه وقلامته أما أنت ما أدري كيف تنجح كل سنه

أم سلطان : الله أكبر عليك بتحسد الولد.. أشوف نسينا ما كلينا سواف

سيف : احم احم أفا عليج يا أم سلطان شو ياج قلبتي علينا مره وحده

خليفه : لا فديتك خلها ترمس اتخبرنا مغامرات الأخ سيف تذكر يوم أوديك المدرسه وأغسلك جدام الاستاذ عشان ما تشرد مره ثانيه ؟؟

سيف : بوسالم الله يسامحك هاي رمسه اتقولها جدام عيالك تباهم ياخذون فكره غلط عني

سالم : ههههههههههههه حليلك اونه ياخذون فكره غلط عني

سيف يفره بالمخده الصغيره : جب يا الويه يالدب

خليفه : ما ياكل من جيبك خله فديته مستوي ضعيفون

سعيد داخل الصاله يفرك عيونه "توه ناش من الرقاد" : هههه منو هالضعيفون والله أتنكت يا اخوي العود

بوسلطان : وعليكم السلام الناس اول أتسلم أنت حادر على مسلمين هب دبش

سعيد تفشل : احم السموحه منك وتجدم من أبوه يبوس راسه وبعدين أمه

خليفه : هههه أخ عليكم رياييل بشواربكم ولحاكم للحين ما أتعرفون السنع غيث فديته أحسن منكم

وأشوي يحدر غيث الصاله وعلى طول ربع لحضن بو سلطان وحط راسه على اريوله يكمل رقاده جان يضحكون كلهم عليه

سيف : عيل أتقول غيث يعرف السنع أكثر منا

سعيد بمكر : سيف استح على ويهك يا أخي شوف صدقه أبوه يعرف السنع أكثر منا عشان جذه ربع لحضن يده ورقد عنده

خليفه يتطالع ولده بحنان فديته والله خلوه محموم الحين مافيه شده على المجامله

أم سلطان : حشا أنا فحياتي ما شفت عمام شراتكم عنبو هاييل عيال أخوكم حسبة عيالكم

سعيد يبوسها على راسها : أفا عليج يا الغاليه نحن الا أنسولف وياهم

بوسلطان : الله يهديكم بويه خليفه جنه ولدك مصخن بزياده

خليفه يحط ايده على يبهت ولده : ما ادري يا بويه جنه ... سهيل قم نش ازقر الخدامه خلها أتنادي وعد أتشوفه

سلطان وهو حادر الصاله : السلام عليكم ،،، جنكم طريتوا حرمتي

سعيد : وعليكم السلام خيييييييييييبه مب أذن عليك حشا قرون استشعار من يطرون اسم حرمته لقطه

سيف نش لأنه صار ما يحب يتواجد في نفس المكان اللي فيه سلطان

خليفه لاحظ حركة سيف : على وين يا سيف .. خلك ويانا

سيف حايس ثمه : برايكم برجع بعد اشوي

خليفه وسعيد يتبادلون النظرات وبوسلطان عصب

بوسلطان : سيف شو هالمذهب الخايس اللي فيك

سيف: اسمحلي ياابوي بس انا بترخص عنكم

أم سلطان : بوسلطان ما عليك منه هو أصلا مستوي ما ينطاج من كمن يوم ،، سلطان بويه اقرب فديتك وينك من الصبح مالك شوف

سلطان : موجود يالغاليه بس اشوي كنت مشغول ،، سعيد

سعيد : لبيه

سلطان : لبيت في منى ان شا ءالله ،، خلاص رمس ربيعك هادف عشان ياخذ لنا موعد من الدكتور ومن يخبرك بالموعد خبرني عشان احجز التذاكر

خليفه : شو السالفه ليش ترمسون بالالغاز ؟؟؟

بوسلطان : لا ألغاز ولا حايه أنت قم شوف ولدك وبعدين بخبرك بالسالفه ،، سالم بويه قم شوف الدريول وينه أبيه يوصلني بيت بو وعد

سالم ينش ويسحب سهيل وياه : ان شاء الله

سهيل بصوت واطي : أشفيك ليش ساحبني وياك ..؟؟

سالم : يالعبيط ما فهمت الطرده ؟؟

سهيل: ههه أي طرده ؟؟

سالم : ماشي قم نلعب بلاي استيشن

سهيل : يلا بس ما نبا كوره خلنا أنجرب اللعبه اليديده

سالم : خلاص تمام ,,

بوسلطان وخليفه طلعوا ويا بعض خليفه بياخذ ولده المستشفى وبيوصل بوسلطان على دربه عشان يعرف سالفة سلطان والي بينه وبين اخوه سيف



سلطان قعد ويا أمه أشوي وبعدها راح لوعد الي من دخل شافها نايمه على الغنفه اللي مجابله التلفزون وشكلها وايد تعبانه وتغمض تقرب منها وباسها على خدها .. فانتبهت له وابتسمت

وعد : حبيبي أنت ييت

سلطان : فديت روحج حياتي ليش راقده هني نشي انسدحي على الشبريه اريح لج

وعد تممتح : ما أبا كنت أترياك وايد تأخرت

سلطان يتطالع ساعته : لا حبيبي ما تأخرت توها الساعه 8

وعد : انت مب ملاحظ أنك صاير وايد تتأخر وكله برع البيت ؟؟!!!

سلطان مرتبك : لا حبيبي أنتي يتراوالج

وعد : سلطان أنت تدري أنه هالكلام مب صح

سلطان : أنزين حياتي أنتي كله راقده وأنا أتملل روحي عشان جي يوم ترقدين اطلع بس اول ما أتنشين ما أتلاقيني عندج بالذمه

وعد : ههه ألاقيك عندي بس بعد ما أنش أربع مرات وأرد أرقد بعدها ألاقيك عندي

سلطان : حبيبي لا تنسيني السالفه المهمه اللي بغيتج فيها

وعد : خير شو فيه

سلطان :أنتي ليش جي أتعامليني ؟؟ أنا شو سويت لج ليش جي قاسيه علي والله حرام عليج ما أستاهل هالمعامله منج ليش ليييييييييييييييييييييييي ييييييييييش

وعد عينها دمعت : سلطان حبيبي شو صار أنا شو سويت ؟؟ سامحني اذا ضايجتك والله مب قاصده حبيبي

سلطان أنفجر من الضحك : ههههههههههههههههههههه فديت روحج يا عمري انتي

وعد عصبت : جب يالخايس يالسخيف خوز عني ما أبي أشوفك

سلطان يلوي عليها : حبيبي تولهت على عصبيتج وشكلج اللي يجنن يوم تتروعين

وعد : والله أنك سخييييييييييييييييييييييي ييييييييييييييييييييييييي ييييييييييييييييييييييييي ييييييييييييييييييييييييي يييييييييييييييييييف

سلطان : الله كل هالحقد حقي أنا مب حرام عليج

وعد : لو سمحت خوز عني أبي أنام

سلطان يمسكها : يالدبه بسج نوم قومي بوديج تتمشين اشويه زين حق البيبي وحقج بعد

وعد : ما أبي شي منك

سلطان : أفا حبيبي أنتي وايد شاله فخاطرج علي

وعد : ليش يهمك ؟؟

سلطان : حبيبي ليش ما يهمني اذا أنتي حبيبتي وغناتي وكل دنياي ما أتهميني عيل ما يهمني ؟؟؟

وعد: حبيبتك ؟؟ هه بديت أشك بغلاتي فقلبك

سلطان زعل : حرام عليج وعودتي ليش أتقولين جذه والله زعلتيني من الخاطر

وعد نشت سايره صوب الشبريه وانسدحت : سلطان أنت تدريبي الي فقلبي على لساني ما أقدر أحس بشي وأقول عكس اللي أحسبه " بدت دموعها تنسكب بهدوء " سلطان قلبي ناغزني عليك وما أبي يصيبك شي أنا مالي حد غيرك أنا من بعدك مالي وجود ولالي حياه أنت كل شي بالنسبه لي أنت ماضيي وحاضري أنت كل اللي بقى لي في هالدنيا



سلطان نش وسار لها : وعد حياتي شو فيج أمايتي ؟؟ حبيبي شو هالرمسه انتي شو ياج الحين هذا كله من هالغبي سلطون يباله ضرب زعلج صح ؟؟

وعد : سلطان اذا أنا مت وأنا أولد أبيك توعدني أنه ولدي يتربى عند عذيجه أنت تزوج برايك بس ولدي ما أبيه يتربى عند مرت أبو الله يخليك سلطان أوعدني اتنفذ لي هالطلب أرجوك

سلطان : لا حول الله حياتي ليش أتقولين هالرمسه ان شاء الله ما عليج شر أنتي لا أتخافين

وعد : سلطان وايد حريم يتوفون وهم يولدون يمكن أنا بعد

سلطان يلوي عليها : خلاص حياتي اللي تبينه بيصير بس مسحي دموعج ولا أتفكرين بهالموضوع

وعد : سلطان

سلطان : عيونه وأغلى ما عنده

وعد : أبي أسير البحر

سلطان : الحين ؟؟

وعد : هي الحين وأبا جييز كيك مال المخبز الفرنسي يمييييييييي

سلطان : باسم الله عليج تتوحمين ؟؟

وعد : كيفك لاتاخذ لي اللي أباه وخله يطلع فولدك

سلطان : هههههههه شو بتطلع كيكه على يبهته ؟؟؟

وعد : ههههههههههههههههههههههههه هه

سلطان : يعلني فدا هالضحكه وراعيتها ... الله يديمها عليج غناتي

وعد : سلطان بقولك شي خطير

سلطان : خير ان شاء الله قولي حياتي

وعد : ممكن أتغمض عيونك

[الجنيه]

سلطان : ما طلبتي هاي العيون وسكرناها رمسي عاد

وعد تقربت من اذنه وبكل هدوء ورقه : أحبــــــــك

سلطان تخبل : وعود شو ناويه علي بموت ما أتحمل كل هالحب

وعد : ههه يلا بلبس عباتي وبييك

سلطان : يالسوسه يعني مب قايلتنها لله

وعد : الله العالم بالي في قلبي ..

سلطان : انزين حبيبي مري على أمايه قبل وأنا بترياج في السياره

وعد : اوكي أقول سلطوني شورايك ناخذ الصغاريه ويانا

سلطان : أي صغاريه .؟؟

وعد : مداك تنسى .. عيال خليفه

سلطان : لا حبيبي نبا نطلع روحنا عندي سالفه أبي أشاورج فيها وما أبي حد يكون ويانا

وعد: اهاا اذا جي خلاص اوكي عطني عشر دقايق بكون عندك

سلطان : حبيبي لا تتأخرين

وعد: ان شاء الله ...



،،،،،،،،،،،،

دفبيت بومحمد

الكل ملتف حول عارف وحمد اللي رجعوا البلاد من سفرتهم بعد ثلاث شهور ,, كان المفروض يرجعون من شهر ونص بس حالة حمد تدهورت وتطلبت بقاءهم عشان يتعالج من أول ويديد

عذيجه : الحمدلله على سلامتكم

عارف وحمد : الله يسلمج

روضه لاصقه في عارف : ولهت عليك هالكثر وهي تفتح ايديها على وسعهن

حمده : أنا بعد والله البيت موحش من دونكم

محمد : يالدبب وأنا شو عنبو جاملوني قولو أخوي فديته كان ويانا يونسنا يطلعنا يعبرنا والا خلاص رجع حبيب القلب عروف

روضه : ههههههه فديتك والله شكلك كشخه يوم أتغار

حمده : احم احم شو عليك يالمعرس منو قدك الحين بدال الثلاث........ أربع بيتفدنك

عارف بطل عيونه على وسعهن : شووووووو

هزاع : هههه الحبيب في خبر كان والطيور طارت بأرزاقها

حمد: حمود لا أتقول أنك بتسويها وبتعرس؟؟؟

محمد: يالهرم ألحين أنا أخوك العود أتقولي حمود؟؟ باجر بعرس و

عارف : بتعرس وبتسمع حمود من الحب بس صح

الكل : صـــــــــــــــــــــح

محمد أحمر : بس عاد ما يصدقون وهالدب وياهم "وهو يأشر على فهد " الحين أنت شو فهمك ليش نضحك ؟؟

عذيجه : بخبرك ييب عيال وقولهم دببه ما يخصك بولدي

محمد : عاد من زينه

حمد : أنزين ما خبرتونا منو هي صعيدية الحظ ؟؟

محمد : صعيديه في عينك

عارف : ههههه بعد ما يرضى عليها والله تطورنا

حمده: محمد ما عليك منهم يغاروون يالغياريين

عارف: الحمدلله والشكر عاد ما بغيتينا أنغار الا على هالطاري .. نش وتجدم من أخوه وتوايه وياه

عارف : مبروووووووووووك يابوجاسم وعقبال ما أنشوف جاسم ان شاء الله

محمد: الله يبارك فحياتك والفال لك ان شاء الله

حمد : متى العرس؟؟؟

روضه : ملقوف

حمد : سكتي يالدبه

هزاع: العرس ان شاء الله بعد شهر من اليوم

عارف : يالخاين ما قلت بتريا أخوي ،،، أنزين ما عندها أخت ؟؟

عذيجه : عروف احلف أنك تبا أتعرس ؟؟ والله من باجر أخطبلك شيخة البنات

عارف : باسم الله علي من هالطاري حشا ما صدقت هالعيوز لافديتج ما أبي أعرس بس اسولف وياه

حمده : ليش ؟؟ كنا بنستانس بدال العرس بيصرون أثنين

عارف : لا والله شو رايج آنسه حمده أنيوزج عشان يصيرون عرسين

حمده استحت : عذيجه شوفيه

عارف : أتشوفني قبل لا أتشوفج خلي عنج الدلع

روضه : ههه والله قفطوها

عارف : ليش وأنتي تتحرين عمرج بتسلمين ؟؟ ما بيوزها الا واحد عنده أخو يفكنا من شرج

حمد : هههههههههه عيل اللي يرحمهم أسميهم بيدعون عليك يا عارف

هزاع: والله من كثر ما يتضاربن بينتحرون رياييلهم

محمد : عاد بسكم مصختوها من زينكم أنتوا

عذيجه : زين جي أكن نشن زعلانات

عارف : ما عليج منهم والله مب زعلانات ولا شي حركات هالبنات

عذيجه : عاد كيفكم وياهن يلا أنا بترخص بوفهد عند الباب يترياني

عارف : الله الله شو هالزين شو السالفه هالشهور الثلاث اللي غبناهن أشياء وايد تغيرت لللأحسن الحمدلله

عذيجه بحيا : الحمدلله

عارف : وليش مستر مبروك ما يعرف يحدر يسلم ؟؟؟

عذيجه : مبروك فعينك وبعدين شو السلام حلاوه عنبو تراه هو اللي مستقبلنكم في المطار بعد شو سلامه ؟؟؟!!!

عارف : سلام أهل البيت

عذيجه : محمد سكته عني بليييييييز

محمد : عارف عيب عليك خلها أتروح

عارف : أنزين سكتنا

غداكم عندي باجر by the way :عذيجه

عارف : عدال أونه باي ذا وي عنبوه ليكون أمج برتش وأنا ما ادري ؟؟

محمد وحمد وهزاع على طول تغيرت أشكالهم وعارف حس على دمه : الله يحفظج والله الله بالغدى السنع

عذيجه بابتسامه صفرا : ان شاء الله لا اتوصي حريص الله يحفظكم

عارف حس بضيقه من طرى أمه كفايه أنه طول فتره سفرتهم وهي عباله تذكر يوم سار وياها ألمانيا تتعالج ،،مر على كل الاماكن اللي كانت وياه فيهن حس بغصه ودخل غرفتها يطلع اللي بخاطره ....

بعد ساعه نش ودخل حجرته وبطل الشنط يعطي أخوانه وخواته الهدايا اللي يابها لهم ...

روضه : الله روووووووووووووووعه عارف هذا حق منو ؟؟

عارف يره من أيدها بسرعه : هذا مب لكم

روضه : باسم الله شو ها كنز قارون مثلا الا بنوته تعزف على غيتار على كرسي حديقه وجان زين لو يديد

عارف يبتسم : انتي ما يخصج كفايه أنه عايبني

حمده : ليش هالابتسامه أخوي عارف ..؟؟ شو السر خبرنا

محمد : الله يرحمك الحين دام طاحن فيك

هزاع : عوذ بالله منهن مستويات وحشيات حشى يقطعون الواحد تقطع

حمد: ما عليك الحين أنا رجعت وبخليهن يتقطعن عمارهن من الفشله .

حمده وروضه : ما تقــــــــــــدر

حمد : أوكي الأيام بيننا وبنشوف يالدبب

عارف : بوجاسم متى العرس ؟؟

هزاع : تراني أقولك بعد شهر ان شاء الله

محمد : الله يسلمك أنا ملجت الاسبوع اللي طاف والعرس بعد شهر من اليوم

عارف : يالله مستعيل العود

محمد: ليش عندك مانع يالطيب ؟؟؟

عارف: لا أفا عليك الله يهنيكم بس تعال منو هاي سعيدة الحظ ؟؟

محمد : وحده من ربيعات عذيجه

عارف : عذوج راس مالها وعود

محمد : عر وف احترم نفسك شو وعود أصغر عيالك ؟؟ هاي حرمة ريال الحين

عارف تفشل : سوري مب قصدي المهم منو هاي

محمد : اسمها العنود راشد

عارف يصفر : وااااااااااااااااو راسم على شي كبير الأخ أتعرف هاييل ناس راهيين وايد

محمد : راهين حق عمرهم

عارف : الله يوفقك ان شاء الله بس وين بتسكنون ؟؟؟

محمد : ان شاء الله هني وين تبيني أروح وأودركم

عارف : ممم تدري خذ غرفة المرحومه ودخل عليها الصاله الصغيره

روضه على طول شافته بنظرة خوف : لالالا عارف لا تاخذون غرفة أمي خذو غرفتنا أنا وحمده بنسكن في غرفة أمايه

عارف : لا روضه خليه ياخذ الغرفه لأنها أكبر والصاله تابعه لها يعني يقدر يحط باب للصاله عشان يقدرون ياخذون راحتهم ..

محمد : لالا ما يحتاي اذا ما تبين خلاص

عارف : لايا محمد يحتاي وبعدين الحي أبقى من الميت وأمايه الله يرحمها فقلوبنا قبل عقولنا وأكيد هي ما بترضى بغير هالشيء

روضه :خلاص سوو اللي يريحكم ... ونشت بتروح غرفتها

عارف: روضه صبري اشوي ... نش وسار لها عند باب الصاله .. أنتي مب زعلانه صح

روضه والدموع متيمعه في عيونها : لا مب زعلانه

عارف : وليش هالدموع الحايره ؟؟

روضه : ماشي بس أبي آخذ الأغراض اللي في غرفتها

عارف :على راحتج خذي اللي تبينه محد بيمنعج بس حطي في بالج أنه هاي أشياء ممكن مع الأيام أتضيع او تتكسر وهاي كلها أشياء ماديه والباقي هو الحب اللي فداخلنا وقلوبنا ..

روضه أتهز راسها بصمت



،،،،،،،،،،،،،،،،،

بعد اسبوع ... يوم السبت الصبح



بيت عوشه



شهد : أففف الصراحه ملل سالم وايد تأخر

مهره : هههههههههه ما قلتي شي يديد من تخرجتي وأنتي هاي جملتج ما أتملين منها ؟؟

شهد : والله أنا قلبي مب ميت مثلج أتطوف عليج الأيام ولا تدرين شو تبين أوشو هدفج في الحياه

مهره : الله يشفيج

شهد : ليش شايفتني خبله ؟؟؟

مهره : بس أسكتي هاذي أمايه يت والله لو تسمعج تتحرطمين بتذبحج

عوشه وهي تحدر الصاله : السلام عليكم ،، أشحالكن بنيات

مهره وشهد : وعليكم السلام والرحمه .. بخير أمايه أشحالج أنتي ؟؟

مهره : وخالتي أم سلطان كيف صحتها ان شاءالله أحسن ألحين

سالم وهو يتجدم يتوايه ويا خالاته : اللي يبي يعرف أخبارها يوصلها البيت

مهره تضربه على جتفه : بس تكلم محامي الدفاع

شهد : والله فديتك بغينا أنييكم بس أمايه ما طاعت

عوشه : بس هاالي فالحه فيه التشكي وبس

شهد : لا حول الله الواحد ما يقدر يفتح ثمه في هالبيت

عوشه : هي ما تقدرين تفتحين ثمج يوم هاي علومج ... أنا بروح أشوف الغدا مهره تعالي ويايه

مهره : ان شاء الله

سالم : هههه حليلج خالوه والله تغمضيني وايد

شهد وهي تسمع رنة المسج : أففف أسكت أنت الثاني

سالم : باسم الله وأنا شو قلت

شهد : أطري التلفون مب أنت

سالم : أنزين هذا جماد شو ذنبه

شهد أتفر التلفون عليه : ما أدري منو هالسخيف مأذيني يطرش مسجات مليون مسج في اليوم

سالم : أفا عليج ألحين براويج شو بسوي به " يتطالع المسج والرقم رقم سيف " هذا عمي سيف

شهد : شووووووووووو سيف ؟؟؟

سالم : هي عمي سيف

شهد : ومن وين ماخذ رقمي ؟؟؟

سالم يتذكر : أهااا الحين فهمت من قبل شهر أو أكثر كنت عندهم في البيت يوم أتطرشين لي مسج كاتبه فيه سلوم حبيبي تولهت عليك متى بتمر عندنا ؟؟ جان أضحك وهو شاف المسج وتم يأذيني لين قلت له هاي خالتي شهد يمكن خذ الرقم ذاك اليوم

شهد : أهاا أوكي عطني التلفون بلييز

سالم : هاج

شهد أتصلت بسيف وأول ما رد عليها : يا حقير يا حيوان أنت ما تستحي ما فيك ذره رجوله كيف تسمح لنفسك تاخذ رقمي من دون أذني وتستهبل علي أنت ما تستحي على ويهك شو ما تفهم يوم أقولك أكرهــــــــــــــك ومره ثانيه ما أبي أسمع شي عنك ولا أشوفك فاهم

سيف على الخط الثاني ساكت يسمعها تهزبه وما يرد يفكر هو ليش سوا جذه ليش بدى يلعب عليها بهاي الطريقه مب مستوعب شي من اللي أتقوله لأنه في الدوام وما يقدر ياخذ راحته عدل

سيف: خلاص أنا بتصل بعدين

شهد : لا تتصل ولا شي قلت لك ما أبي أسمعك ولا أعرف شي عنك فاهم ... وسكرت التلفون فويهه

شهد كانت متوتره وواصله حدها خذت تلفونها وأتصلت بريعتها عفرا اللي فاتحتها بموضوع خطبتها لخالها وقالت لها أنا موافقه وخلي أمج أترمس أمي ويتفقون على كل شي



,,,,,,,,,



فبيت عبدالرحمن

عبدالرحمن : هند عطيتي أمج دواها ...

هند : هي أبويه من أشوي خذته

عبدالرحمن : ما طلعت نتايجج؟؟

هند : المفروض اليوم ,, هنادي بتشوف نتيجتي وبتخبرني

عبدالرحمن : الله يوفقج .. قومي بارك الله فيج شوفي أخوج سهيل وينه

هند : ان شاء الله ..

بعد عشر دقايق سهيل وهو يحب راس ابوه : السلام عليكم أشحالك يالغالي كيف أصبحت ؟؟

عبدالرحمن : وعليكم السلام والرحمه ... الحمدلله بخير ونعمه ..

سهيل : خير يالغالي أشفيك مويم ؟؟

عبدالرحمن : سهيل من دون لف ودوران بعد المغرب أنروح نخطب بنت بوميثا

سهيل: بس يا أبويه

عبدالرحمن : لا أتبس بس لي خلاص اللي صار صار وهاي كتبة ربك والحياه لابد أنها تستمر سهيل ما أتشوف أمك كيف غاديه بعد اللي صار ؟؟ ثلاث شهور مرت وكأنها ثلاث دقايق الحاله اللي هي فيها مب زينه لها واذا تمت على هالحال الله العالم شو ممكن يصير فيها والدكتور موصي أنغير لها جو بس هي الي يهداها مب طايعه أتسافر



سهيل : وزواجي هو الي بينسيها ...؟؟؟ّّّّ!!!



عبدالرحمن : محد يقدر ينسى بس أقل شي بيلهيها

سهيل : اللي أتشوفه يا بويه

رويه تتجدم منهم : سهيل أبويه أشحالك

سهيل نش وسندها عشان تيلس : بخير يا ويه الخير .. كيف أصبحتي

رويه : الحمدلله ما أشكي باس

سهيل : شو رايج أنسير نخطف على أم سلطان صار لنا زمان ما شفناها

رويه : مالي خاطر اذا تبا خذ بنتك وروحوا

سهيل : واللي يقولج أنه حالف ما يطلع من دونج

رويه تبتسم : فديتك لا تربط عمرك فيني أنت سيرتك أخف وسلم عليها وتعذر لي منها

سهيل : حتى لو كانت عندي لج بشاره ؟؟

رويه : هي يا سهيل من بعد ذاك اليوم نسينا شي اسمه فرح

سهيل : أفا عليج أستغفري ربج مب زينه هالرمسه ... الا من اليوم وساير ما بتسمعين غير العلوم الي أتسرج

هند وهي تركض لحضن أبوها : وأولها نجاحي بامتياز

رويه : مبروك يا بنيتي مبروك

عبدالرحمن : الله يفرح قلبج مثل ما فرحتينا

سهيل يحضن أخته : مبروك يالغاليه ألف ألف مبروك آمري تدللي شو تبين آخذ لج هديه

هند بحزن : تسلم وما أتقصر اللي أباه محد يقدر عليه

سهيل : أفا ما في شي يغلب سهيل بن عبدالرحمن

هند والدمعه بعيونها : موزه

الكل تجمد بمكانه وسهيل تمنى تنشق الأرض وتبلعه ولا يشوف هالنظره بعين أمه وأبوه وكسر حاجز الصمت

سهيل : الله يرحمها ان شاء الله ،،، أنزين ما باركتوا حق المعرس والا أنا ما أستاهل

رويه وبابتسامه حلوه : يعني خلاص أخيراً عزمت

سهيل يبوسها على راسها : هي الغاليه وأبيج أتسيرين اليوم بعد المغرب وتخطبينها لي

هند : الله الله منو هاي اللي تباها ؟؟؟

سهيل : ما يخصج يالدبه

هند: ههه أونك عاد تبا أتسوي فيها مفاجأه يا بابا روح أعرفها محد غيرها مهرووه

عبدالرحمن : لا حول الله الحين أنتي بدل لا تتناقرين ويا أخوج قومي نشي هاتي لنا شي حلو عشان هالأخبار الحلوه

هند أتجدم أصابعها من ثمه : أفا عليك حاضرين للطيبين

سهيل : باسم الله عليك يا بوسهيل حشا هاي ناويه اتنفدك هاي البنيه شو تبينه يتسمم بايدج

هند : ههه أصلاً أنت ودك بظفر من أظافري

سهيل ملاحظ التغير اللي طرأ على أمه بدت تضحك على سوالفهم فحب يكمل : طع هاي روحي شوفي ويهج في المنظره قبل بعدين رمسي أونه ودك بظفري وععع من زينه

نوره : أحسن أحسن

هند : ههه يا ويهج جب أسكتي يالهبله

سهيل : محد غيرج الهبله فديت نواري

هند : أفففف روح زين أصلاً انا الي ما عندي سالفه أعبرك

سهيل : شو أنا شارع والا بحر ههههههه

عبدالرحمن يضحك من خاطره على هبل عياله : ههههههههه حلوه منك يا بونوره

هند التفت له والشرر يتطاير من عيونها : أفا شو هالخيانه خلاص درت ضدي ويا ولدك الدب

سهيل : دب اللي بياخذج يالهبله

هند : ومنو قص عليك وقالك اني بتزوج

رويه عصبت : اشو هالرمسه الوسخه بعد غصبا عنج بتعرسين يوم أييج النصيب

هند : ما أبا صح باباتي ؟؟ أنا وهو متفقين

عبدالرحمن : لا يا بنتي مب زينه هاي الرمسه كل بنت مالها غير بيت ريلها

هند حايسه بوزها : أنزين باسم الله لا أتعصبون علي

رويه: خلاص عيل أنا بتصل بأم سلطان وبخبرها عشان أتخاويني بيت عوشه

عبدالرحمن: خلاص ونحن بنكلم ناصر أبوها وبنشوف شو الترتيب وياه

نوره : الله وناسه بنتكشخ في عرس بابا

سهيل : أنتي مستانسه ؟؟

نوره : هي بس لأنها مهره ولأني أحبها واااااااااااااااااااااااا ااااااااااااايد

سهيل : لا والله الصراحه بديت أغار يعني أتحبينها أكثر مني ؟؟؟

نوره : لا أحبك أنت واااااااااااااااااااااااا ااااااااااااااااااااااااا اااااااااااااااااااااايد بس أشوي أكثر منها لأنك باباتي

سهيل يلوي عليها : فديت روحج يا قمر

رويه : الله يديم المحبه بينكم ويدوم السعاده عليكم

سهيل : علينا وعليكم ان شاءالله ,,,



,,,,,,,,,,,,,,,,,,,,,,,,,,,,,,,,,,,,,,,,,,,,



بيت بوسلطان

وعد يالسه مجابله المنظره أتسحي شعرها تقرب منها سلطان وخذ المشط من أيدها وتم يسحيها وهو ساكت

وعد : حبيبي

سلطان : هم

وعد : شو فيك ؟؟

سلطان : ماشي سلامتج

وعد : عينك بعيني

سلطان يبتسم : حبيبي والله ما في شي بس

وعد : شفت كيف قلت بس يعني في شي

سلطان : هه لا حياتي بس واحد من الشباب حليله مريض ولازم يسافر برع للعلاج وما عنده حد مرافق

وعد : حرام الله يشفيه ان شاء الله ،، هو وين بيسافر

سلطان : ألمانيا

وعد : وما عنده أخوان ولا حد من أهله يروح وياه ؟؟

سلطان : لا

وعد : أوييه الحين كيف بيسافر

سلطان : حبيبي شو رايج أسير وياه مرافق

وعد بطلت عيونها على وسعهن : شو

سلطان : ماشي بس كنت أفكر أسير وياه هو مسكين ما قصر ويايه فشي وبعدين علاجه ما بيطول كلهن عشرة أيام وأنا راجع البلاد ان شاء الله

وعد : بس سلطان أنا ولادتي قربت كيف بتودرني وبتروح

سلطان : حبيبي أنتي مب روحج وأهل البيت كلهم عندج وما بيقصرون وياج بشي واذا على الرقاد روحج خذي وحده من بنات خليفه وخليهن يرقدن عندج

وعد أتنش عنه : يعني أنت مخطط لكل شي وليش تعبت عمرك وسويت نفسك تبا أتشاورني

سلطان يمسكها من أيدها : حبيبي لا أتصيرين جي مب مخطط ولا شي بس الحين فكرت اذاما تبين ما بروح ما حيدج قاسيه جذه

وعد : لا برايك روح الله يحفظك ويشفيه

سلطان : مب من خاطرج

وعد : لا من كل خاطري وعشان أثبت لك ها "باسته وشردت عنه "

سلطان : تعالي تعالي

وعد: لا ما أبا

سلطان : يالدبه أبي بعد وحده عشان أتأكد

وعد: يالطماع ماشي

سلطان : خلاص خليني أسافر بدور لي غرشوبه أتبوسني ليل نهار

وعد : سلطان يوم أتحيدني مت قول هالرمسه وسو اللي تباه انزين

سلطان : لالالا كله ولا زعلج يالحلوه

وعد ساكته وما أترد عليه

سلطان "فخاطره يا ربي أنا هاللسان شو أسوي به " : حياتي تعالي براويج شو أستوى بيدي

وعد ..............

سلطان : آي والله تعورت

وعد قلبها ما طاوعها تقربت منه عشان أتشوف أيده ،، سلطان أول ما قربت منه لوى عليها بالقو وتم يدغدغها ...

وعد : سلطان أكرهك ودرني بسرعه

سلطان : بس أنا أحبــــــــــــــــــــــ ــــج مووووووووووووووت

وعد : قلت لك ودرني

سلطان : بوسيني بعدين بودرج

وعد : أكرهك ما تفهم بس هدني ما أبيييييييييييك

سلطان : بوسيني

وعد : والله أنت ما تستحي ... أنا حامل وفشهوري الأخيره لا تستهبل راسي دار

سلطان : ما يخصني أبا بوسه

وعد : أففف أنزين ودرني لا اتم ادورني جذه

سلطان : ها ودرتج

وعد باسته وطلعت عنه لأنها تدري بحركاته

سلطان يناديها قبل لا تطلع : أنزين ما قلتي لي موافقه أروح وياه

وعد : هي بس اذا ولدت وأنت محد صدقني طول عمري ما بسامحك

سلطان : هه لا ان شاء الله



،،،،،،،،،،،،،،،،،،،،،،،،، ،،،،،،،،،،،،،،،،،،،،،،،،، ،،،،،،،،،،،،،،،،،،،،،،،،، ،،،،،،،،،،،،،،،،



نهاية الجزء الحادي والعشرون