نهـــــــــــاية الجز العشرون ... أتمنى ينال إعجابكم .. عاد اسمحولي يمكن الجزء الياي اشوي أتأخر فيه عندي ملجة ولدعمي هالاسبوع وللحين ما سويت شي
موزه : وبعد شو أخبارك
منصور:أي يالدبه لا أتغيرين الموضوع بعدني ما سمعتها
موزه: منصور لا تحرجني
منصور: حبيبي عشان خاطري بس مره وحده أرجووووج
موزه :أحبـــــــــــــــــــــ
منصور: يا ويل حالك يا منصور يا ربي كم بعيش ؟؟؟ لالالا خفي علي أشوي أخاف أموت من الفرحه
موزه :باسم الله عليك ...
منصور: فديت روحج والله ... بسرعه قولي آخذه والا لا ؟؟؟
موزه : شو هو عاد
منصور: ما يخصج أنتي قولي هي والا لا
موزه : ممممم هي
منصور: فديت روحج حتى لو كنتي قايله لا كنت باخذه مب عكيفج
موزه : أنزين شو هو عاد ؟؟؟
منصور: ممم مفاجأه
موزه : منصور بليز عشان خاطري
منصور: ياربي من هالفضول ترا أنا ما أحب الفضوليين
موزه : أفا أتقول لموازتك فضوليه
منصور: يعل لسانه القص اللي يقول عنج فضوليه غيري
موزه : هههه الله يسامحك
منصور: خلاص بخبرج ,,, الله يسلمج عيبني دبدوب حسيته يشبهج
موزه : منصور حرام عليك لا أتعقدني ألحين أنا دبه ؟؟؟
منصور: لا حبيبي والله لو أتشوفينه ما بتصدقين أنه دب هو ضعيفون بس دب
موزه : شو هالتعبير العبيط؟؟؟
منصور: أنزين شو أسوي تراه مثلج
موزه : ههههه أنزين ثانكس
منصور : ومنو قالج أني بعطيج إياه .؟؟؟؟ هذا بخليه عندي لأنه يذكرني فيج ما أقدرأكون وياج أربع وعشرين ساعه فبصبر نفسي به ... تدرين خاطري أشوفج الحين
موزه : باسم الله انت شايف الساعه كم ألحين ؟؟؟!!!
منصور : عادي توها ثمان ونص اذا مسكت الخط الحين على 200 بوصل في عشرين دقيقه شو قلتي
موزه : لا منصور بلييز عشان خاطري لا أتي الحين خلها مره ثانيه حبيبي الوقت وايد متأخر وما أبيك تسرع
منصور : بس أنا خاطري أشوفج ولهت عليج
موزه : حتى أنا تولهت عليك بس حبيبي عشاني خلك في العين
منصور : واذا قلت لج أنا في دبي والحين صوب بيتكم
موزه : في دبي ؟؟؟!!! متى ييت ؟؟؟ ما خبرتني
منصور : ليش أنا حرمه عشان اشاورج ؟؟؟
موزه : لا منصور بس أنت كلمتني العصر وما يبت طاري وما فيها شي اذا خبرتني وين ساير
منصور :عاد الحين أنا ييت المهم يلا أتين نطلع نتعشى ؟؟؟
موزه : أنا تعشيت
منصور : مممم عادي بنروح نتمشى عند البحر باخذ لج باسكن روبنز اللي أتحبينه والحين ياي أوكي
موزه : أوكي بخبر أمايه وبتلبس
منصور : أنا ريلج ما حد له شور عليج غيري
موزه : شو قلنا ؟؟ طول ما أنا فبيت أهلي من حقهم يعرفون وين سايره ومتى برد اوكي
منصور : انزين أفففف يلا أنا ما يبالي غير 15 دقيقه وبوصل عند بيتكم
موزه : تمام برايك عيل بخليك بروح اتلبس
منصور : بشتاق لج
موزه مستحيه وفي خاطرها "فديت روحك والله أحبك " : أنزين يلا باي
منصور: أحبج
موزه : مي تو
منصور : ما أحيد أسمي جون
موزه : ههههه أحبك ... باي
منصور: فمان الله ..يا ربي ما أتخيل حياتي من دونها والله أحبهااااااااااااااااااااا اااااااااا ,, ويسمع هرن يصم الآذان من وراه لأنه كان يترنح بسيارته من الفرحه ,, نزل الدريشه وأعتذر من صاحب السياره اللي وراه وكمل دربه عند حبيبة القلب موزه وفي باله شي مستحيل يرجع العين من دون ما ينفذه ...
,,,,
فبيت بو سلطان
سلطان ياب مزنه وسكنها في وحده من فلل مجمع أبوه وأستقروا في دبي للأبد ,, بعدها خذهم لبيت أبوه عشان يتعرفون على عايلته وأهله ,,, أم سلطان وايد أرتاحت لمزنه وحبتها من الخاطر وطول الوقت أتقارن بينها وبين وعد ومب شايفه فرق بينهم هنتيناتهن طيبات ويحبن الخير للغير ويحشمون الصغير قبل الكبير وفي خاطرها تتمنى لو وعد تتقبل أمر زواج سلطان من مزنه ويعيشون كلهم في بيت واحد وبسعاده ..
أما بوسلطان فخوزوا عنه من يا سلطان وياحرمته وولده وهو ماخذ عبدالله وحاطنه في حضنه يحببه ويلعب معاه ويلبي طلباته من اللبان للسياره الي من شافها على واجهة البقاله ما سكت لحظه عن بوسلطان لين ماخذها له ..
سيف من شاف سلطان ويا حرمته أنقهر وأرتفع ضغطه .. كفايه انه محتقر سلطان والسبه زواجه من مزنه والحين ياي يكملها ويايبها البيت عندهم هاللي ناقص ... شو هذا ما يحس ؟؟ هذا من شو مخلوق ,,, طبعاً ما تحمل الوضع سلم على مزنه مجاملة وتععلث بشغله وطلع من البيت ...
سعيد : استانس لشوفة ولد أخوه اللي يشبهه وايد وتعلق به من أول لحظه ...قاعد مع سلطان وأبوه في الميلس ويتناقش ويا سلطان في موضوع مزنه
سعيد : سلطان ليش ما أتسفرها للخارج أكيد عندهم علاج لمثل هالحالات
سلطان : والله ما أدري يا خوك من سنتين طرشت التقارير لمستشفى كبير في لندن بس قالولي للحين ماعندنا أي علاج لهاي الحاله ...
سعيد : سلطان تذكر ربيعي هادف ؟؟
سلطان : هي أذكره ليش ؟؟؟
سعيد : أمه بعد صار لها نفس مزنه ومن ست شهور سفروها ألمانيا وسوت عمليه والحين الحمدلله أتشوف ومافي أي مضاعفات الحمدلله
سلطان : لا أحلف
سعيد : والله اذا تبا بتخبره عن اسم المستشفى وبطرش تقارير مزنه لهم
سلطان : والله بتسوي خير والله يجعله في ميزان حسناتك
سعيد : ان شاء الله بعد اشوي بخطف علي هادف وبرد عليك خبر بأسرع وقت
سلطان : الله يجزيك الخير ... عيل أنا الحين بترخص
بوسلطان وهو يبوس عبدالله : وين يا بوعبدالله تو الناس بعدنا ما شبعنا منكم
سلطان : ما عليه يا بوي أنت أدرى بالحال مافينا على المشاكل
بوسلطان : الله يهداك بس ما أدري لين متى ناوي أتخش عنها
سلطان : ما عليه يا بوي يوم أحس أنها ممكن تتقبل الخبر بخبرها والله يعيني عليها
بوسلطان : وأنت ليش ما أتراضيها وأتردها البيت ؟؟؟
سلطان : الله يهداك يالوالد أنت تدريبها كيف عنيده وعمي حميد قالي خلها على راحتها مثل ما طلعت من بيتك بفسها بترجع بنفسها ان شاء الله ...
بوسلطان : بس يا ولدي
سعيد : أبويه لا أتعور قلبك ويا هالسالفه وعد تتغلى وان شاء الله ما بتطلو عند أبوها
سلطان : ههه بوعسكور أشوفك وايد متفاءل
سعيد : هههههه والله مب متفاءل بس شو أسوي أحاول أرفع معنوياتك
سلطان : الله يسامحك أسميك شجعتني
في هالوقت وعد وسهيل وصلوا البيت وعد على طول حدرت الصاله وتفاجأت بوجود مزنه وطبعاً أم سلطان توهقت وأرتبكت وتمت تدعي ربها أنه الموضوع يعدي على خير ,, أم سلطان عرفتهم على بعض
أم سلطان : حيالله بالغاليه مرت الغالي فديت روحج نورتي بيتج
وعد تتقرب أتبوسها على راسها وتحضنها : الله يحييج يالغاليه فديتج كيف صحتج ان شاءالله بخير ... والله ولهت عليج حيييييييييييييييييييييييي ييل
أم سلطان أتدزها على الخفيف : ويه حسبي الله على ابليسي عسى بس ما تعورتي ؟؟
وعد: هههه ولا هزيت شعره مني
أم سلطان لاويه بوزها : هي حسبالي بعد عاد كله ولا حفيدي فديت روحه
وعد بوزت : يعني ما أهمج أنا كل همج هالدب اللي مأذني
أم سلطان : السموحه منج غناتي مزنه نسيت أعرفج على حرمة سلطان وعد
مزنه ملامح ويها تغيرت ومدت أيدها عشان أتسلم على وعد بس لأنها ما أتشوف ومن صوت وعد قدرت أتميز المكان اللي واقفه فيه ومدت أيدها ذاك الصوب بس وعد كانت الجهة الثانيه منها وغيرت مكانها عشان اتسلم عليها وتتوايه وياها .. أستغربت من حركة مزنه المهم تجدمت منها وسلمت
وعد: أشحالح حبوبه
مزنه : بخير الله يلسمج أشحالج أنتي
وعد : بخير الله يعافيج
مزنه : ماشاء الله حامل
وعد تتطالعها بنظرات أستغراب هاي هبله والا تستهبل عنبو ما أتشوف كرشتي !!!: هي فديتج
مزنه : الله يقومج بالسلامه ان شاء الله
أم سلطان أنتهزت هالوقت ونشت عشان أنتبه سلطان بس وعد سبقتها ونشت
وعد سايره صوب الميالس : اسمحولي بعق عباتي وبرجع
أم سلطان : برايج غناتي بس حجرتج هالصوب "أتأشر صوب غرفة وعد "
وعد : هههههه والله ما نسيت بس بسلم على عمي أول
أم سلطان : ما عليج سيري عقي عباتج قبل لاحجه على عمج
وعد طلعت من الصاله تقريبا : لا عموه بسلم وبرجع ما بتحير سمحيلي مزنه
مزنه : بالحل يالغلا
مزنه فخاطرها ... الحين هاي وعد ؟؟ سبحان الله يالصدف أحس أني أعرفها من زمان وهي خذت عليه بلمح البصر كان ودي ألمس ويها أتخيل شكلها أحسبها وايد حنونه وطيبه بس ان شاء الله ما أتصير مشاكل .. وين سلطان يا ربي أخاف أتشوف عبدالله عنده الله يتسر بس
وعد أول ما طلعت من الصاله شافت سعيد شال عبدالله ويلعب معاه وأول ما شافته قالت أكيد هذا ولد مزنه تجدمت من سعيد اللي كأنه حد صب ماي بارد عليه تبيرد مكانه ما يعرف كيف يتصرف يخاف أيي سلطان وأتصير مشكله تجدم منها بسرعه وما خلاها اتكمل دربها للميلس
سعيد : حيالله بأم حارب نورتي البيت
وعد: الله يحييك أشحالك سعيد ؟؟ ان شاء الله مرتاح
سعيد : الحمدلله
وعد تتطالع عبدالله : ماشاء الله منو هالحلو ؟؟؟
سعيد : ها لا أأ
وعد: باسم الله أشفيك مختبص ؟؟؟
سعيد : هههههههه لا أقصد هذا ولد ربيعي
وعد تتقرب من عبدالله : شو أسمك حبيبي ؟؟؟
عبدالله دافن وييه في صدر سعيد أونه مستحي : أد الله
وعد: ههه فديتك والله تعال عندي
سعيد : الله يهداج وين أتشلينه حرام عليج خايفي على حروب
وعد: ههه أويه والله مرات أنسى أتصدق
سعيد يسمع خطوات تتقرب من باب الميلس : وعد ماعليج أمر بس دخلي داخل ربيعي بيطلع من الميلس
وعد ربعت الصاله : سوري
سعيد : يتنهد بارتياح لا عادي
سعيد : سلطان الحق
سلطان يتطالعه : خير شو فيه ؟؟
سعيد : وعد
سلطان نش من الخوف : شو فيها ؟؟ خبرني شو بلاها ؟؟
سعيد : ما بلاها شي بس هي الحين في الصاله عند أمي
سلطان : شافت مزنه ؟؟؟
سعيد : وأنا أشعرفني بس أكيد هي وشافت عبدالله
سلطان قلبه طاح فبطنه : ها
بوسلطان : شو سويت أنت ؟؟
سعيد : لا ما عليك أنا قلت لها عبدالله ولد ربيعي وما خليتها تحدر الميلس أونه ربيعي داخل
سلطان : ريحتني الله يريحك ... يا ربي سترك يا خوفي يستوي شي عند أمي
بوسلطان : ما عليك أنا اللي بسير لها وبخلي مزنه تطلع لك أنت أطلع من الباب البرعاني
سلطان: أوكي يلا حبيبي عبادي أنروح
عبدالله :أنلوح البيت ؟؟
سلطان: هي حبيبي يلا نش
عبدالله : ماأبي أبي بابا ويربع في حضن بوسلطان
بوسلطان : فديتك حبيبي روح الحين مع بابا وأنا بعد أشوي بييك البيت أوكي
عبدالله يبوسه : وعد ؟؟؟
بوسلطان : هههه وعد محد مخلني متروعين غيرها
عبدالله مب فاهم بس سار لأبوه وطلعوا الأثنين للسياره
بوسلطان وهو حادر الصاله : هود هود
أم سلطان : هدى هدى أقرب بو سلطان
وعد ترمس ويا مزنه : هذا ماشاء الله ولدج؟؟
مزنه : هي عبدالله ..
وعد: ماشاء الله عليه بس أتصدقين وايد يشبه سعيد أخو ريلي
مزنه تبتسم بتوتر : هي حليله
بوسلطان : أحم احم الشيخه بنت حميد !!!!؟؟؟
وعد توها تنتبه له ونشت صوبه : هلا والله بأغلى الناس أشحالك باباتي عساك مرتاح
بوسلطان أونه مبوز : بخير توج تسألين عني
وعد: أفا زعلان مني ؟؟؟
بوسلطان : يهمج ؟؟؟؟
وعد : والله يهمني والسموحه منك
بوسلطان : هههه لا يا بنتي أزعل من أم سلطان ولا أزعل منج
أم سلطان اتكلم مزنه : شفتي كيف بدل لا يحامي عني يقول هالرمسه
مزنه : هههه أفا عليج عمتي وأنا وين رحت
وعد على طول صدت صوب مزنه وكأنها حست بغيره ما تبي حد يقول لأم سلطان عمتي غيرها أو أي وحده من حريم عيالها يعني مزنه وحده غريبه ما يحق لها أتقول عمتي ليش ما أتقول خالتي
بوسلطان أنتبه لنضرات الشرر اللي تتطاير من عين وعد جان يتدخل : أم عبدالله
مزنه : لبيه
بوسلطان : لبيتي حايه .. عاد أنتو ما ينمل منكم بس سل أأ بوعبدالله ما يسمع الرمسه
مزنه أتنش : مشكور يا عمي ما أتقصر وان شاء الله المره اليايه بنطول أكثر
وعد ردت تتطالعها بنفس النضره وفي خاطرها : هاي شو على كيفها مسوتنها عمومتها ؟؟؟
مزنه أتسلم على أم سلطان
أم سلطان وعد : أمايه قوديها للباب
بوسلطان يتطالع أم سلطان بنضره "يعني تبينها أتوديها عند ريلها ؟؟؟!!!!!" لا برايج خلج هني وين بتوصلينها للباب ..تجدم من مزنه وخذ أيدها وبعد ما سلمت على وعد وصلها لين السياره وسلطان طاااااااااااااااااااااااا ر بالسياره طيران
في الصاله
وعد : أمايه
أم سلطان : عيونها
وعد: تسلم العين وراعيها .. مزنه طبيعيه ؟؟
أم سلطان : الله يسلمج من الشر .. الحمدلله هي نعم طبيعيه شو فيج ؟؟
وعد: بس غريبه ماأدري اذا أنا اللي لاحظت والا هي أصلا جي يعني أحسبها ما تحشم
أم سلطان : ويدي جيف ما أتحشم ؟ أفا عليج بالعكس الحرمه حشيم وؤدبه
وعد: عيل حد يرمس ويتطالع الصوب الثاني ؟؟ يعني أترمسني ما أدري وين أتشوف عنبو هذا احترام ؟؟
أم سلطان : أتسغفري ربج يا بنتي مب زين تحكمين على الناس قبل لا أتعرفين بظروفهم ... مزنه ما أتشوف
وعد :أوييه مسكينه الله يشفيها أستغفر الله وأنا والله ما توقعت بس أستغربت من تصرفاتها
أم سلطان : ما عليه يا بنتي تراج معذوره وما دريتي الا الحين
وعد : لا والله أنا متلومه فيها ما عاملتها زين يعني ما أدري كيف مب مرتاحه والله
أم سلطان : لا ويشهد الله أنج ما سويتي شي غلط أو جرحتيها بالعكس الحرمه طالعه من عندنا مستانسه
وعد : ان شا ءالله أتكون مستانسه ... مممم سلطان وين ؟؟
أم سلطان : ما أدري عنه والله تبيني أدق له وأتخبره ؟؟
وعد : لا الغاليه لاأتعبين روحج بسوي له مفاجأه
أم سلطان : هي عيل زين والله ولج وحشه ... تموا دق سوالف أم سلطان خبرتها بالمستجدات كلها الي هي انتقال خليفه وعياله للسكن في فلتهم الأوليه اللي في حوي بيت بوسلطان طبعا وعد أستانست وايد ودعت ربها يديم الود والمحبه اللي بينهم ...
بعدها راحت غرفتها عشان ترتاح وأتجهز المفاجأه لسلطان ... وبمساعدة سعيد .. اللي مهمته يبعد سلطان عن البيت لين الساعه 10 في الليل ....
،،،،،،،،،،،،،،،،،،،
في سيارة سلطان
مزنه :ماشاء الله عليها وعد احسبها وايد متفهمه وطيبه
سلطان : هي فد
مزنه : ليش سكت كمل هاي بعد حرمتك
سلطان يغير الموضوع : هم أنزين الحين الساعه 8 شو رايج أنروح نتعشى بمطعم عـ ذوقي ؟؟؟
مزنه : و وعد ؟؟؟
سلطان : ما عليج منها " فخاطره أبيها أتحس فيني واتعرف بعدها شو سوى فيني "
مزنه : والله اللي أتشوفه
سلطان : تمام عيل بنمر مطعم دبي موغل أكله جنااااااااان بس أشويه حار تدرين مطعم هندي
مزنه : هههه الله يستر عاد أنا حلجي يحرقني من الفلفل
سلطان : باخذ لج آيس كريم يمي
مزنه : خلاص أوكي
ساروا المطعم وتعشوا وأستانسو وبعدها وصلهم سلطان البيت وكانت الساعه 11 قرر بعدها يرجع البيت عند وعد الي توله عليها من خااااااااااااااااااااطره ...
،،،،،،،،،،،،،،،،،،
فبيت خليفه
ميثا بعد الضرب اللي كسر ضلوعها خذت حبوب مهدئه ونامت
خليفه يحاول في نجود أتفج الباب عشان يفهمها الموضوع بس هي معانده وما أتطيع ...
خليفه الحمدلله أنه محد غير نجود وسهيل اللي سمعوا هالعله ترمس ... وهالاثنين واثق فيهم أكثر من نفسي أنهم مستحيل أييبون طاري لهالموضوع
عنود : بابا شو فيك ؟؟
خليفه : ماشي بس اذا نجود فتحت الباب زقريني بس لا أتخلينها تدري أوكي
عنود : ان شاءالله ,,, أنزين وسهيل ؟؟؟
خليفه : وين راح هالثاني ؟؟؟
عنود : ما أدري شفته يركض برع يوم كنت في الحديقه لحقته بس ما رد علي
خليفه : ما عليج أنا بلقاه يلاأنتي سيري تعشي وخلي أختج تتعشى بعدين خبريني أوكي
عنود : ان شاء الله
خليفه أتصل بتلفون سهيل بس طبعا سهيل مطنش ما يبا يرد عليه
سهيل وسالم يالسين في فلتهم اليديده يلعبون بلاي استيشن
سالم : سهول رد على تلفونك اذانا
سهيل مكمل لعب ولا هامنه شي
سالم : سهول وصمخ ...
سهيل : أففف شو تبا ؟؟؟
سالم : عنبو تلفونك يصيح رد عليه
سهيل شل التلفون وغلقه ...
سالم : أحسن .. كملو لعب أشوي وتلفون سالم يصيح
يا تاج راسي يا قلبي ويا عيني ما عاش منهو يكدر خاطرك ساعه "رنه تلفون سالم خاصه لأبوه "
سالم : هلا والله بأغلى ناسي
خليفه : ههه أهلين أشحالك يالمهاجر ؟؟؟
سالم : يا سلام يا خليفه والله لو أتشوف النعيم الي كنت عايش فيه هاليومين ودك أتم ويايه أنا وأنت بس
سهيل يتطالع سالم ويوم سمعه يقول خليفه أتحراه واحد من ربعه عشان جي طنش وكمل لعبه
خليفه : تهنى اليوم آخر ليله من باجر نحن وياك
سالم: أففف لازم أتنكدون على الواحد عيشته
خليفه: خل عنك المهم شفت أخوك اليوم ؟؟
سالم : هذوه عندي
خليفه : أششش ما ابيه يعرف أنك أتكلمني
سالم"مستغل الوضع " : ههههههه شو مسوي يالردي ؟؟
خليفه : سلوم يالهرم أنا ردي
سالم : والله محد قالك
خليفه : أنزين دواك عندي يالدب
سالم : ههه شو أسوي آكل من جيبك
خليفه : ما عليه أستغل الوضع الحين بس بييك الدور المهم أسمع أبيك أتخلي سهيل عندك لاأتخليه يتحرك خطوه وحده أنا الحين بييكم أوكي ولا أتخبره
سالم : أفا عليك لا أتوصي حريص
،،،،،،،،،،،،،،،،،،،،،،،،، ،،،،،،،،،،،،،،،،،
منصور :مواز حياتي شو قلتي ؟؟؟
موزه : ما أعرف شو أقولك تراك ما تسمع الرمسه شو أسويبك
منصور : والله أحببببببببببببببج حسي فيني ما أبي أكون بعيد عنج ولا لحظه
موزه أحمرت : أنزين منصور بس ما فيه فرق يعني بعد شهرين والا خمس نفس الشي
منصور: الله أكبر ظهر الحق ظهر الحق
موزه : منصور أنتبه للدرب شو ياك باسم الله عليك وبعدين كم مره أقولك شل ريلك لا اتحطه جي يوم أتسوق
(منصور حاله من حال كل الشباب يسوق بريله اليمين واليسار يسندها بطبلون السياره )
منصور: عادي حبيبي
موزه : لا
منصور وهو ينزل اريوله انزين
موزه : جي احسن الحين كمل شو كنت تبا اتقول
منصور: فديت اللي يخاف عليه أنزينتراج روحج قلتي شهرين والا خمس ماشي فرق يعني بعد شهرين بنعرس
موزه : لالالا ما قصدت جي
منصور: ما يخصني أنتي قلتي وأنا ما أحب أتردين في كلامج
موزه : حبيبي م ـــ
منصور : شوه ؟؟ شو قلتي ؟؟ عيدي عيدي
موزه مستغربه : شو ما قلت شي
منصور: قلتي شي يبدا بحرف الحاء
موزه : بحرف الحاء ؟؟؟ شو هو
منصور : ما يخصني قلتي حبيبي
موزه : همم أوكي شو يعني
منصور : ترا ما سمعتها عدل فلو سمحتي عيديها عشان أعق عمري من السياره
موزه : اللهم سكنهم في مساكنهم ..وبعدين نزل اريولك
منصور: قولي
موزه : أول نزل ريولك ؟؟؟
منصور: حياتي ما أعرف أسوق غير جذه
موزه : ما يخصني يلا عاد
منصور: قولي والا والله ها ... بدى يدور بالسياره على الدوار كمن دوره
موزه : هههه منصور والله بدوخ
منصور : ما يخصني قولي
موزه : حبيبي خلاص عاد
منصور : بعد مره
موزه : حبيييييييييييييييييبي يالطماع بس عاد
منصور: فديت روحج والله أنج أتخبليبي
موزه : قلت لك خلاص عاد لا أتم أتدور مثل المينون
منصور :وافقي انعرس بعد شهرين
موزه : لا منصور ما بيمديني أتزهب وفستان العرس روحه يباله شهرين خياطه
منصور : خذي جاهز بعطيج اللي تبينه بس وافقي بلييييييييييييييز
موزه : منصور والله أحس بدوخه ولوعه حرام عليك أوقف
منصور: وافقي
موزه : خلاص أنزين سو الي تباه بس أوقف بلييييييز
منصور من الوناسه اللي فيه رفع أيده عن السكان والسياره أفترت عن الشارع ودعمت بعمود الكهربا صوب موزه وبعدها تقلبت كمن مره قبل لا توقف وسط الشارع
هدووووووووووووووووووووووو ووووووووووء قاتل خيم على المكان
الناس تجمعوا والي نزل من الموتر يتطمش والي وقف على الشارع المجابل يشوف شو اللي صار ومنهم اللي فيه الخير وتبرع يتصل بالشرطه والاسعاف عشان ينقذون اللي في السياره لأنه مستحيل يطلعون من دون أي اصابات بعد هالحادث المأساوي
فتح عيونه بصعوبه ويحس بساثل بارد ينزل من على يبهته فوق العين اليسري ,, يحاول يحرك أيده بس مرصوصه بين الباب والسكان ..راسه داق بالدريشه الي جدام ويحس بشي في أذنه اليمين .. حاول يتحرك بس ما قدر حس بألم فضيع في أريوله اليسرى لف ويهه بصعوبه الجهه الثانيه شافها وغمض عيونه
أثنين من الشباب يو صوب منصور وفجوا بابه وطلعوه بصعوبه بالغه (واحد منهم مسعف في الشرطه بس مش بدريسه عشان جي قدرو يطلعونه بطريقه سليمه ما أتسبب أي مضاعفات )
المسعف : الطيب تسمعني ؟؟؟
منصور يتأوه : موزه موزه
المسعف : ما أقدر أجازف وأطلعها الحديده يايه في خصرتها
منصور يفتح عيونه وبألم : خلوني أنا بطلعها ,, يحاول ينش بس يمسكه المسعف
المسعف : لا تتحرك أرجوك أي حركه أتسويها ممكن أتضرك الحين الاسعاف بيوصلون وان شاء الله بنطلعها
منصور دموعه تنزل على خده : خلوني أموت بس هي أسعفوها الله يخليكم موزه حياتي
المسعف يهديه , يا الشاب اللي ساعد المسعف يقوله : الحرمه يمكن ماتت ما تتنفس ولا تتحرك
منصور : لا لا مستحيل ما ماتت أنت ماأتعرف شي آآآآه ما (ما كمل جملته وأغمى عليه )
رد مع اقتباس
مواقع النشر (المفضلة)