أموت أنا في حبهم

[الجنيه]

وفا : ياويهج وأنتي صدقتي أني زعلت بس أسولف عليج

موزه : هاج

وفا: مشكور ه

وعد : لا والله ما تاخذينه أندوج خذي تلفوني ...

وفا : لا فديتج مشكوره عادي والله

وعد: عاد أنا حلفت أندوج ها وعن المنكر

وفا: ان شاء الله عمتي

وعد :أتحرى بعد

وفا: وعود خيييييييييييييييييبه شوفي كم مس كول عندج والرسايل الوارده

وعد : عادي بعدين بشوفهن خلصي مكالمتج قبل

وفا وهي أتناولها التلفون: وعود هذا ريلج على ما أضن ويه باسم الله حشا طريناه أتصل ردي عليه يمكن شي ضروري

وعد : اوكي ،،، الو

سلطان : أنت وين حرام عليج ذبحتيني أنتي بخير؟؟؟؟

وعد: هي

سلطان: وعد يا عمري شو فيج والله كنت بموت شوفي كم مره متصل فيج ليش ما اتردين واتطمنيني عليج

وعد: همم

سلطان : وعد انتي وين ؟؟؟ أنا محتاي أكلمج الحين ولا أتقولين ماأقدر ولا تتحججين بشي

وعد: ماأقدر أنا ويا بنات عمي

سلطان: بنات عمج موجودات وما بيطيرن عنج أنا محتاينج حبيبي ليش جي أتعامليني أنا ضايقتج بشيء ؟؟؟

وعد: سلطان أنا مشغوله وبكلمك بعدين

سلطان : وعد أهون عليج ؟؟؟

وعد: سلطان مع السلامه

سلطان : أنا الحين ياي بيتكم

وعد: على راحتك سو اللي تباه ,,,باي

سلطان : بس وعـ .... طوط طوط "سكرت التلفون"



ياربي أنا شو سويت معقوله هاي وعد ؟؟؟!!! مستحيل قبل التلفون ما يلحق يرن واترد عليه والحين من ساعتين مطنشتني ولا أترد علي !!! ليش يا ربي شو صاير أنا لازم أروح لها الحين وأفهم منها كل شي أنا ما أقدر أعيش جي وبعدين شو هالشي اللي غيرها علي ياربي ساعدني شو اسوي



أم سلطان : أشفيك يا أبويه ؟؟؟

سلطان : سلامتج يالغاليه مافيني شي

أم سلطان : مافيك شي ؟؟؟

سلطان : سمحيلي الغاليه بترخص عنج

أم سلطان : حرام أنك ما طلعت بهالحاله

سلطان : يا أميه مافيني شي الله يهداج بس

أم سلطان : أسمعني يا أبويه هي متضايجه ويمكن الحمال متعبنها أنت خلها ترتاح عند أبوها كمن يوم وبعد ما تهدى سر لها وتفاهمو ووعد عاجل وفهيمه وبنفسها بتراضيك

سلطان : ماأقدر يا أميه هاي أول مره تزعل وأتروح بيت أهلها وبعدين من تزوجنا عمرها ما زعلت مني على شي مثل هاليوم يعني تعودت على زعلها ساعه نص ساعه او ساعتين بالكثير لكن الجفوه اللي في نبرة صوتها أتخوفني

أم سلطان : يا وليدي شو أقولك ترا الحامل وايد يغير يأثر عليهن في منهن الي ما أتطيق ريلها ولا أتحب شوفته ومنهن اللي ما أتحب نوع معين من الروايح أو الأكلات وفي أشيا غريبه وايده ... يعني عادي يا أبويه ما يحتاي أتشيل هم شي ..



سلطان : ان شاء الله ... ماعليه يصير خير أنا بروح اتمشى اشوي تامريني بشي ؟؟

أم سلطان : سلامت عمرك الله يحفظك يا ولدي



................

فبيت ميثا

سالم : ليش أتصيحين ؟؟ شوفيج حبيبتي خبريني أنا

العنود : ما أدري شو فيها من رجعنا من المدرسه وهي هاي حالتها أتصيح وتسكت وما أتطيع أتقولي شو فيها

سهيل : يمكن حد زعلها

العنود : ما أدري ترا أنا ما رحت كلاسهم اليوم كان عندي واجب ما حليته

غيث: منو ضربج ؟؟؟ هذا سلوم أنا أدري الحين بضربه بكس بطيره في السما

سهيل : غيث حبيبي سر ألعب برع

غيث : ما أبي

العنود : خله هني بيروح برع عند منو ؟؟

سهيل : ما أتشوفينه يتفلسف

سالم : خلاص طلعوا كلكم برع وخلونا بروحنا

سهيل : يلا غيث سرينا

العنود : أنا بعد أطلع ؟؟؟

سالم: حبيبتي أنتي هي كلكم طلعوا بسرعه



بعد ما فضت الغرفه

سالم يناول نجود كلينكس : ألحين بترمسين والا كيف ؟؟؟

نجود: خلاص ما فيني شي

سالم : عاد لا تتدلعين علي تراني ما أعرف أتصرف ويا البنات

نجود ابتسمت : أنت أحسن أخو في الدنيا

سالم: أحم أحم هذا من ذوقدج يا قمر ,, أنزين الحين خبريني عاد ليش أتصيحين ؟؟ شو صاير حد زعلج ؟؟؟

نجود : أبي أروح عند أمايه

سالم: أمج !!! من وين أييبها الحين تلقينها يا معزومه لعرس والا حفله والا عشا عند وحده من ربيعاتها

نجود تهز راسها : لالا أبي أميه نوره

سالم : وي اندوكم والله ناسي أنه أمايه يعني يدوه ،، أوكي بس بشرط

نجود بفرحه : شو هو الشرط ؟؟ أنا موافقه

سالم : أنزين أسمعيني قبل بعدين وافقي

نجود : شو

سالم : أتقولين شو فيج

نجود: أوكي بس عند أمايه

سالم : خلاص تم



خليفه أول ما وصل طبعا سي أن أن البيت (غيث) خبره انه نجود من يت من المدرسه أتصيح

وعلى طول سار لغرفتها يبي يتطمن عليها ...

خليفه يدق الباب أشوي أشوي ويناديها : نجود

سالم : حياك أبويه

خليفه يدخل ونظرة الخوف باينه عليه : خير شو فيها أختك ؟؟

سالم : ما أدري والله مب طايعه ترمس ..

خليفه : وينها ؟؟؟!!!

سالم : أتغسل ويهها

خليفه : تجدم لها أول ما طلعت ...

نجود من شافت أبوها ردت الدموع لعيونها وربعت لحضنه ...

خليفه : خذها بحضنه ويلس وياها على الشبريه يمسح عراسها يحاول يهديها ويفهم منها اللي صار ,, بس يا غناتي والله قطعتي قلبي شو فيج ؟؟؟ ليش أتصيحين ؟؟ حد زعلج ؟؟ أنتي خبريني بس وشوفي كيف أتصرف وياه

سالم : ماشي فايده ياأبويه أنا من ساعه أحاول فيها وآخر شي قالت لي تبي أتروح بيت يدي عند أمايه نوره

خليفه : أنا بوديج الحين بس قوليلي شو صاير فهميني بس

نجود : تدفن راسها فصدر أبوها أكثر ومتمسكه فيه بكل قوتها ,,,

خليفه : حياتي لا أتصيحين قوليلي شو فيج ،، يا ربي ,, سالم أمك وين ؟؟

سالم : محد

خليفه : كالعاده ... لاحظ أنها تمسكت فيه أكثر من طرى أمها .. شو فيج غناتي امج مزعلتج بشي

نجود أتهز راسها بالنفي ... يا ربي شو صاير فيها ,, خلاص يا عمري انتي تبين امايه ؟؟؟

نجود بصوت مبحوح : هي

خليفه : خلاص يلا نشي غسلي ويهج وبنروح أنا وأنتي بس أوكي يا عمري ؟؟

نجود أتهز راسها وأتنش تسغل ويها ,,

سالم : بوسالم ممكن أخاويك ؟؟؟

خليفه : والله الشور شور العروس اذا وافقت ما عندي مانع

نجود والفوطه بيدها وباتسامه وسيعه : أنا مب عروس بس موافقه سالم أيي ويانا

سالم : عاشت أحلى أخت في الدنيا ,,,

خليفه : يلا أنروح ... وفجأه أنتبه لساعته ,,, جنها الساعه 11 أكيد أم سلطان الحين فسابع نومه

نجود بوزت (عبست ) : لالا اكيد واعيه

خليفه : انزين لاأتمدين البوز يلا نحن بنروح اذا هيراقده بنرجع أوكي

نجود وسالم : أوكي ,,,



فبيت بوسلطان

بوسلطان : ما عليج منه ان شاء الله كل شي بيتصلح ،، يمكن هو غلط بأنه دس عنا هالموضوع بس بعد له أسبابه

أم سلطان تمسح دموعها : بس وعد يا بوسلطان ما بتتحمل

بوسلطان : عاد هاي مهمتج يا أم سلطان حاولي وياها هي تحترمج واتطيع شورج

أم سلطان : والله أنها مب هاينه علي ولا يهون علي ضنايه أشوفه متعذب لفراقها ،، الحين هي من دون لا تدري أزعلت منه ومحاربتنه عيل جيف لو تدري ..؟؟؟ الله يستر

بوسلطان : ما عليه ان شاء الله ما بيصير الا كل خير ,,,

أم سلطان : منو ياينا هاي الحزه ؟؟!!!

بوسلطان : يمكن حد من العيال ناسي المفتاح أنا بنش أشوف الباب



عند الباب ...

خليفه : يا نجود يا حياتي شو فيج بسج من هالصياح ذبحتيني والله

سالم : خلاص يا الوالد الحين بندخل عند أمايه وبتخبرنا شو فيها ان شاء الله

خليفه لا حول الله شو اللي صاير وياها ياربي ساعدني وينج يا ميثا ؟؟؟!! أفففف ليتج كنتي مثل باقي الأمهات لو كنتي موجوده ما كان حالنا ها جذه الحين ...

بوسلطان يفتح الباب وتفاجأ : هلا والله هلا وغلا بالغالي وعيال الغالي حياكم يا بويه قربوا

خليفه : يحضن أبوه بلهفة وشوق

سالم :الله الله شو هالرومانسيه يا بو سالم

خليفه مطنش ولده : يبوس راس أبوه وأيده اشحالك يالغالي عساك بخير ,,

بوسلطان عينه دمعت من فرحته : بخير دامك بخير اشحالك أنت شو أخبارك وينك يا بويه ما تسأل عنا ؟؟

خليفه : السموحه منك والله ودي أييك بس تدري هاليومين عندي وايد مشاكل في الشغل ...

سالم حاط أيده فخصره : بوسلطان الظاهر نحن مش مرحب بنا يعني نقلب ويوهنا ؟؟؟!!!

بوسلطان : أفا والله أنتوا ؟؟ انتوا قلب هالأبو تعال فديت روحك

سالم يتقرب منه ويحضنه بالقو

بوسلطان : هههه أشوي أشوي كسرت ضلوعي يا ولدي أنا شيبه ما أتحمل

سالم : يوسع عليه أشوي ،، هذا عشان اتعرف غلاتك عندي أشكثر

نجود اتيره من كندورته عشان يفسح لها المجال

سالم : حشا فصختينا صبري أشوي خليني بعدني ما شبعت من حنانه

نجود : بسك خوز عنه

خليفه بجديه : سلوم قم عن أبوي أفسح الطريق لشيخة البنات

بوسلطان : لالا خفو علي ما أتحمل ،، فديت هالقمر والله

نجود مستحيه قربت منه وباسته على راسه ,,,

بوسلطان : تعالي حبيبتي تعالي عندي ,,, ضمها لصدره ومشاها وياه لغرفة أم سلطان ,,, نوره عندي لج مفاجأه

أم سلطان : وعد رجعت ؟؟

بوسلطان : ان شاء الله بترجع بس في ناس يايين يسلمون عليج

أم سلطان أتنش عن الشبريه بس ردت مكانها بعد ما سبقتها نجود وطاحت فحضنها أتصييييح

أم سلطان : حيالله بالغاليه بنت الغالي .. ويديه شو فيج يا بنتي ؟؟؟ نجود حبيبتي شو فيج شو صاير ؟؟؟ التفتت لبو سلطان تستفسر منه بس شافت خليفه وسالم يايين صوبها ,, خير يا بويه شو صاير ؟؟ حد فيه شي

خليفه يتجدم بسرعه ويبوسها عراسها ويطمنها : لا الغاليه ما في شي لا تتروعين مافيها الا الخير

سالم يتجاوز أبوه ويحضن يدته : فديت هالطله ,, فديت روحج يلعني كم بعيش أنا

أم سلطان تضربه على جتفه : أستغفر ربك حد يلعن عمره ؟؟

سالم : شو أسوي أنتي أتخبليبي جمالج دلالج وأنتي بكبرج أصلا جنان

أم سلطان : قم عني أقولك خلني بشوف البنت شو فيها قم

سالم : أفا الحين أنا انراغ بسبة هاي الدبه نجود ؟؟؟!!!

خليفه ييلس ويا بو سلطان ،،، خير يا ولدي شو فيك شو اللي مآذنك خبرني يا بوك

خليفه : تسلم الغالي لا تتعب روحك ويا مشاكلي ان شاء الله بتنحل

بوسلطان : أفا عليك ياولدي اذا أنا ما أساندنك وأفج ضيجتك منو بيوقف وياك

خليفه : عساك ذخر يالغالي الله يخليك لنا ,,,

بوسلطان : شو مضايجنك شو صاير وياك

خليفه : سلامتك يالوالد الموضوع نفسه اللي خبرك

بوسلطان : تطري سالفة المجمع السكني!!

خليفه : هو نفسه ياأبوي أنا عني ما صابني شي الحمدلله بس بنت بوسعيد هي اللي تضررت وأنا مستلم المشروع عشانها بس

بوسلطان : يا أبويه هي تدري أنه مشروع يتحمل الفشل والنجاح

خليفه : بلى بس تدري يعني هي وثقت فيني وأنا الي نصحتها تدخل هالمشروع

بوسلطان : لا أتشيل هم ,,, أنا بعوضها ان شاء الله

خليفه : ان شاء الله ,,,



عند أم سلطان

أم سلطان : ألحين شو صاير فيج بسج من هالصياح الخايس خبريني شو مستوي عليج

سالم : صبري يا الغاليه ,, يرفع راس نجود عن حضنها ... شوفي نجوده أنتي قلتي ودوني عند أمايه وأنا بخبركم السالفه صح

نجود أتهز راسها بنعم ..

سالم : عيل خلاص يلا ارمسي ولا أتعورين راسنا

نجود تشهق وبنفس متقطع : وين بـ بـابا

سالم : هناك يالس عند أبويه مانع

نجود ترمس بصوت مبحوح وهادي : الــ اليوم ال البنات قالولي ......... وكملت صياح

سالم: لا حول الله شو مستوي اليوم شوقالو البنات حسبي الله عليهم

أم سلطان : الحين بتسكت وأتخلينا نسمع البنت والا جيف ؟؟؟

سالم : هي خلها تشبع من هالصياح الطفس قبل ... الصراحه ما احب هالحركات البايخه

أم سلطان : بتسكت والا تبيني أروغك

سالم: نجود بسج عاده يلا ارمسي

نجود: بصوت متقطع ... البنات قالــو ل ي أ أ نن تي أمج ميي ته ؟؟

خليفه على طول لفتت أنتباهه الكلمه وتم مبهت ويشوف أبوه اللي أنرسمت نظرة الحزن على ويهه ...

أم سلطان : شو قالن لج البنيات ؟؟؟

سالم : أنزين ليش ؟؟؟؟

نجود: يقولون أنتي من دخلتي المدرسه وعمرنا ما شفناها ولا نسمعج ترمسين عنها ,, كلهم يابو أمهاتهم اليوم وكانوا مفتخرين ببناتهم بس أنا لا يقولون أنتي شاطره وأكيد أمج أتساعدج بس ليش ما أتي عشان أتشوفهم يكرمونج؟؟؟!!!!

أنا بعد أبي أم مثل أم هنا ... كل يوم الصبح أتوصلها المدرسه وأتساعدها اتحل واجباتها وفي مجلس الأمهات دومها موجوده ... أنا عندي أم بس وينها ؟؟؟ أنا ماأشوفها ولا اعرفها .. الخدامه هي اللي تشتريلي ثيابي وأتعرف شو أحب وأكره وبابا ما يرد لي طلب بس أبي أمي أتكون معايه مثل صديقتي كل لبنات أمهاتهم وياهم وايد أوكي أشمعنى أنا ؟؟؟ ليش ماما ما أتحبنا ؟؟؟ ليش ؟؟؟ أنا أنا ...

أم سلطان : بس يا حبيبتي خلاص أنسي السالفه حبيبتي أمج مشغوله وبعدين أنا موجوده ليش ما خبرتيني كنت بحضر هالاجتماع

نجود : ما أبي ما أبي ليش أمي ما تهتم فينا ليش

خليفه نش وتقرب من بنته : نجود ،،، نجود شوفيني ,,أرفعي راسج

نجود تبعد ويهها عنه ما ابي خلني بروحي

خليفه ياخذها بحضنه غصب : حبيبتي أنتي من حقج تزعلين وأتصيحين وتتمنين أتكون أمج مثل باجي أمهات البنات صدقيني أنا حاس فيكم وأحاول قدر المستطاع أني أعوضكم عن غيابها وأنتي الحين بنت كبيره وفاهمه وأتعرفين أنا ما نقدر نغصب حد على شي ما يباه ,, شوفي كل البشر مختلفين عن بعض بس أغلب الأمور يتفقون فيها يعني كل الأبهات يشتغلون صح ... بس كل أب يتقن شي معين يعني أنا مثلا شاطر في التجاره وأشتغل فيها وغيري شاطر في أشيا ثانيه عندج المدرسه أكبر مثال ألحين هي تقريباً طول النهار وياكم بعيده عن بيتها وزوجها وعيالها ويوم ترجع البيت ما عندها وقت لهم بس أكيد أتحبهم وتسأل عن أخبارهم ..." يا ربي شو هالورطه أنا شو أخرف شو أقول أففف ساعدني يارب "

نجود : بابا أنا آسفه سامحني

بوسلطان : فديت الحلوين يوم يطيعون الشور .. تعالي غناتي تعالي عندي أنا بخبرج شي .. شوفي يا بنيتي ترا أبوج اللي يبي يوصل له هو أنه أنتوا لكم معزه في قلب أمكم بس هي لها أسلوبها وطريقتها المختلفه في إضهار هالمشاعر .. أنتوا الحين صغار ما تفهون هالاشياء بس لاحظي هي أول ما تدخل البيت تسأل عنكم أتشوف منو وصل ومنو بعده ..تغديتوا والا لا واذا حد منكم مريض أتخبر أبوكم عشان يوديكم الدختر صح والا لا

نجود : صح باباتي بس

بوسلطان : ياينج بالرمسه صبري علي اشوي

نجود: ان شاء الله

خليفه فخاطره" الله يخليك لي يا أبويه رغم كبر سني الا أني ما قدرت أتصرف ويا بنتي أو أقول لها شي يقنعها " سبحان الله صدق الكبار لهم دور كبير في حياتنا ..

بوسلطان : أنا بخبرج عن سالفتي بعدين أنتي أحكمي شوفي اذا أمج ظالمتنكم أو لا ... مثل ما تدرين أنا وأخوي اللي هو يدج أبو أمج بوميثا الفرق بينا سنتين يعني أنا أكبر منه بسنتين .. يوم أنولدت الكل كان يهتم فيني ويدلعوني ويحبوني بس يوم يوم انولد يدج خلاص الأهتمام كله أنصب عليه وأنا كنت مثلج وايد أتضايق وأحيان كثيره كنت أقول أمي ما أتحبني ولا تهتم فيني مثل قبل كنت أكره أخوي والسبه أنه أمي تسأل عنه قبلي وأشوي أشوي بديت أكبر وأفهم الدنيا عدل ولاحظت أنه أمي يوم ينادونها بأم مانع ترفع راسها بفخر وأعتزاز ودايماً تمدحني من وراي وأنا ما أدري بس مره سمعتها أتقول لأبوي الله يرحمه أحس أني مهمله مانع وأحسبه ماخذ بخاطره علي بس والله أني أحبه وأعزه أكثر من أخوه .. صدقيني يومها كانت هالكملتين كافيات بالنسبه لي عشان يبينون لي حب أمي وأني اعني لها الشي الكثير من يومها تغيرت معاملتي لأمي وأخوي وبديت أحس بواجبي تجاهم وأعتز بهم ...

اللي أبي أقولج اياه أن كل أم لها طريقتها الخاصه في حب عيالها وكل واحد منهم له معزته الخاصه عندها ... مب شرط وجودها الدائم وياج وحضورها أجتماعات المدرسه يكونون المقاييس الوحيده لحبها أنتي بجي ظلمتيها والمفروض اذا شي في خاطرج عليها اتواجهينا من حقكم عليها أنها تسمعكم وأتناقشكم وأتشوف طلباتكم أنتوا يا بنتي اللي ما عودتوها أتشاركونها بأموركم ومشاكلكم .. حبيبتي أنتوا الحين مب صغار ما تفهمون المفروض أتفكرون بعقولكم قبل قلوبكم .. أنتوا هب مثل الياهل الصغير اللي يصيح يوم يبا حليب لأنه ما يقدر يتكلم والأم تفهم اللي يباه

[الجنيه]

على طول ,, المطلوب منج يا أمايه أنج تيلسين ويا نفسج وأتحاسبين نفسج قبل أي حد شوفي انتي بشو مقصره ؟؟؟ هل أنت مأديه واجبج تجاه والدتج ؟؟؟مهما كانت معاملتها أو أسلوبها هاذي امج والجنه تحت اقدامها ورضاها لازم تسعين له ... والدموع هاي ما بتزيدج الا هم حاولي أتحلين مشاكلج قبل لا تلجئين لها ونحنا كلنا حولج ومستحيل أتوهين ونحن موجودين ,,

نجود تأثرت بكلام يدها وايد وبدت بالفعل أتحاسب نفسها وأتشوف اذا الغلط منها والا لا .. التفتت لأبوها اللي نظرة الحزن ما فارقته لحظه بس من تلاقت بظراته بنظراتها تبدلت ملامحه لابتسامه مشرقه ومد أيده لها وترك لها الخيار ..

تجدمت منه خطوتين وباسته على راسه ولوت عليه بكل قوتها : الله لا يحرمني منك وردت خطويتن صوب بوسلطان ونفس الشي باست راسه ولوت عليه .... الله يخليكم لي وسامحوني

سالم : يا سلام التبويس لناس ونحن مالنا حظ ؟؟؟

نجود أتغايضه : أنت ولد البطه السوده مالك شي عندي

أم سلطان : محد سوده غيره ...

نجود : أفا ألحين أنا اتقولين عني سوده عشان هالدب الخسف

أم سلطان : هني وحدج عاد يسواج ويسوا عشره منج كفايه أنه شبيه أبويه الله يرحمه

نجود: خلاص لاتزعلين وهاي بوسه عراسج وأنت بعد

سالم: لحظه لحظه خليني أكشخ

نجود : والله أنك متفيج

خليفه يقرب من أبوه ويحبه على راسه عيونه مليانه دموع : الله يخليك لي ويطول بعمرك يالغالي

بوسلطان : فديت روحك ويخليكم لي ولا يحرمني منكم ان شاء الله

سالم : أبوي

بوسلطان : لبيه

سالم : لبيت حاي ان شاء الله ,,, طلبتك

بوسلطان :آمين ،، تم يا الغالي وأنا كم سالم عندي

سالم: خلاص من اليوم أنا بسكن هني عندكم وأقنع الوالد دخيلك

بوسلطان : البيت بيتك يا بويه وان ما شالك البيت أتشيلك عيوني بس أقنع أبوك روحك

خليفه : سالم أنا محتاينك في البيت أنت تدري ما في حد كبير بعدي غيرك

سالم: أبويه ليش ما نرجع نسكن بيت يدي ؟؟؟!!!! الفله الثانيه محد ساكننها نفرش ونيلس عندهم أحسن

بوسلطان : مره اذا خاطرك بوسالم من باجر بجدد الفرش فيها

خليفه : من خاطرك يا بوسلطان ؟؟؟

بوسلطان وهلت دمعته : من كل خاطري

خليفه يبوس أيد أبوه : تم ولك مني وعد أنه اللي صار قبل أبد ما يتكرر ,,

بوسلطان : ان شاء الله يا بويه

أم سلطان تمسح دموعها : الله يخليك لي يا بوسلطان ويفرح قلبك مثل ما فرحتني أخيراً عيالي بيربون تحت عيني

نجود تحضنها بالقو : الله بنسكن عندكم خلاص أنا من اليوم بتم هني

سيف وهو داخل غرفة أمه : لا حول الله يعني الواحد ما يقدر ياخذ راحته في هالبيت ألحين يوم أقرر أتزوج وأسكن الفله خربتوا علي مخططاتي

سالم أول ما شافه ربع له ولوى عليه : فديت روحك لاتزعل بنعطيكم الطابق الثاني ماشاء الله الفله عوده وأتسد

سيف : أندوك هذا أتقول يتصدق عليه ... فديتك والله ولهت عليك

سعيد : أحم أحم نحن هنا

سالم : الله والهنا .. خشمك بو عسكور

خليفه بعد ما توايه ويا أخوانه : الحين أنتوا أونكم عمامه حشا أتقول هاييل قوم بو الطعش

سيف: ليش أتغار يالشيبه ؟؟؟

أم سلطان : محد شيبه غيرك لا تغلط علة ولديه

سعيد : الله الله أنا ما صدقنا أتفج عنا عشان ما تاخذ كل الغلا والحين ردت حليمه لعادتها القديمه

بوسلطان : الله أكبر شوفي يا نوره شوفي عيالج جيف يغارون من ولدي

سيف وسعيد : نعــــم نعـــــــــــم ولدي ؟؟!!!!! يا سلام ونحن عيال البطه السوده

نجود فاجأت سعيد وطاحت فحضنه ولنه ما كان مستند لشي طاح وياها على الأرض

سعيد : أخخخخخ يالدبه أنتي من وين طلعتي لي !!! آآآييي كسرت ضلوعي شو تاكلين يالهمبا

نجود: دبه اللي بتاخذها ان شاء الله أتكون متييييييييييييييييييييييي ييييييييييييييينه عشان ما أتعايرني وعيالك متان مثل البطاط

سعيد : الله أكبر أسميها عياره بنتك حشا الحين عيالي وحرمتي شو يخصهم ؟؟؟

أم سلطان : الحين اللي يسمعك يقول مره صاك له درزن عيال ،،

خليفه يبوس أمه وأبوه : الوقت وايد تأخر تصبحون على خير وسمحولنا .. يلا يا عيال خلوا الوالده ترتاح

بوسلطان : بوسالك أفرشها الفله ؟؟؟

خليفه : أفا عليك كلمتك ما بردها بس خل الفرش عليه .. ان شاء الله بخبر ميثا وبشوف شو ترتيبها يمكن تاخذ أثاث الفله اليديده بعده ما كمل سنه ,,

بوسلطان : على راحتك يا بويه

أم سلطان : وأنا باجر بخلي الخدم ينظفونها لكم

سالم , نجود وخليفه : تصبحون على خير .. فمان الله

الكل : وأنتوا من أهله

سيف: نحنا بانتظاركم

أم سلطان : الله يحفظكم والله الله بالدرب يا بويه

خليفه : ان شا ءالله ،، يلا الغاليه شي في خاطرج ؟؟؟

أم سلطان : سلامت عمرك بس لاتبطي علينا

خليفه : من عيوني يا عيوني ,,,,



بوسلطان الابتسامه اللي أنرسمت على ويهه بعد اقتراح سالم ما فارقته وأخيراً حس أنه الحظ أبتسم له وبيصير اللي كان وده يصير من زمان بس كبرياءه منعه يبين ضعفه وحاجته لبجره وياه ...





,,,,,

وعد بعد ما تعشت ويا بنات عمها رجعن البيت وكملو سهرتهم للصبح .. وبعد صلاة الفجر رقدن البنات للعصر " يسترجعون أيام البطاله " وعد النوم ما لامس جفونها مستغربه من شعورها ومن اللي أتسويه ليش قاسيه على سلطان ما تدري بس حاسه بحزن للي أتسويه ...



حميد أصر عليه بوسهيل يبات وياه وبما أنه بنته أساساً بتبات عندهم ما كان عنده مانع ومنه يغير جو ويحس بالاستقرار مره ثانيه ...





سيف بعد ما رجع السياره عند سعيد ما نطق بكلمه ولا تناقش وياه بالي صار وطبعاً سعيد فهيم وعرف أنه سيف قلب الدنيا وسوى شي غلط كما هو متعود ...



خليفه من زود الوناسه ما قدر ينام الليل مب قادر يتصور رجعته لبيت أبوه يتصبح بهم ويمسي بهم حلمه اللي أنحرم منه سبع سنين عاد له من جديد .. مستحيل أخلي ميثا تحرمني منهم مره ثانيه ... لازم توقف عند حدها والظاهر أنا سكت عنها وايد والحين يا الوقت اللي لازم أحط فيه النقاط على الحروف ومن اليوم بتشوفين خليفه ثاني يا ميثا لا مش ثاني الا خليفه اللي كان متقمص شخصيه الزوج المحب اللي يحاول يصلحج بس الزين ما ينفع وياج .....



الوحيد اللي ما هنا له بال "سلطان "

بعد ما سكر عن وعد راح بيتهم ويوم وصل عرف أنها أصلا ً من طلعت من بيته ما رجعت لبيت أبوها أتصل فيها بس تلفونها مغلق وماحب يتصل بحميد عشان ما يحس باللي صاير بينهم طول الليل وهو عايش فحيره وخوف يحاول يبرر لتصرفات وعد بس مب لاقي الحجه اللي تقنعه اذا كانت تدري باللي بينه وبين مزنه ما كانت بتتصرف بهالطريقه عيل شو هالشي اللي خلاها أتعافه !!! للحين ما لقى لسؤاله جواب بس اللي متأكد منه مستحيل يعدي هاليوم من دون لا يعرف السبب ...



شهد .. سيف طلع من بيتهم بس ما فارق خيالها أتحاول تمحي صورته يوم كلمها بكل عقلانيه وهدوء ما تبي تنجذب له أو تكن له أي مشاعر بعد اليوم .. كفايه أنه تعنى ويا لبيتهم عشان يذلها وينتقم منها ... ما عليه يا سيف الايام هي اللي بتخليك اتعرف جيمة شهد ...



",,,,,,,,,,,,..................................... ................,,,,,,,,,,,,,"



بعد مرور شهر من الأحداث اللي فاتت



محمد : عارف الله يخليك قول لهم ما أبي هالمسكن ما أبي أغيب عن الوعي ما ابي والله بتحمل خلهم يودروني

عارف ماسك ايده ويمسح عراسه : حمد ما عليه تحمل عشاني خلهم يشوفون شغلهم أتغيب عن الوعي أخير لك من الألم صدقني بهالطريقه أنت تتقبل العلاج أكثر والحمدلله الدكتور يقول أنت عديت المرحله الصعبه والحين ما باقي شي بالكثير أربع أو خمس أسابيع وان شاء الله نرجع البلاد ...

حمد : بس والله تعبت دخيلك يا عارف ما أباه والله كفايه ...

عارف : خلاص حمد لا أتعبني وياك بليز

حمد: أبي أرجع عند أبوي ما أبي أتم عارف خلهم يرخصوني بروح بلادي ووبكمل العلاج

المترجم : يا أبي خليك معانا شهر وبعديها ان شاء الله ازا حالتك بتسمح هنرجعك الامارات بس اهم حاجه أنك تتقبل العلاج وما تتعبناش

عارف : شفت سمعته شو يقول .. يعني أنت اصبر اشوي

حمد: بس ما عاد فيني صبر أحس بخنقه أبي أطلع من هالجحيم

المترجم : ماعليش يا أبني كلها كام يوم وبعديها تتشافى ان شاء الله وأنا عارف الغربه صعبه أسالني أنا

حمد: الله يلعن اليوم واللحظه اللي جربت فيه هالسم

عارف : استغفر ربك مب زين تلعن اليوم والا اللحظه هذا كله حكم ربك

حمد: استغفر الله العظيم من كل ذنب عظيم

المترجم : أيوه يا أبني خليك جدع وتوكل على ربنا ,,, الله يطرح البركه فيك

عارف : تسلم والله ما قصرت يا حج

المترجم : أهو خلاص دلوقتي هينام وأنت ياأخ عارف مالكش لزمه النهرده تقدر أتروح وازا عاوز ترجع براحتك بس أديني قلت لك مالكش لزمه اليوم ... وازا عزت حاجه أنا موجود ,, أشوف وشك بخير

عارف : تسلم والله يا حاج محمد وان شاء الله بروح الفندق اريح وبرجع المغرب

المترجم : ربنا معاك





عارف خذ له شاور على السريع وقرر يستغل الوقت بالتسوق يبا يتشرى لخواته ,, يتمشى في ربوع ألمانيا حاس بملل وضيجه خطف عند محل يبيع أشياء مستخدمه بس بعد التعديل والترميم ,, لفت نظره تمثال لبنت تعزف على الغيتار على مقعد حديقه .. وقف عنده يتأمله لفتره طويله ودار في باله موقف مر عليه أكثر من عشر سنين ..



وعد: عارف بليييز أباه ما يخصني اصنعه سو طلبيه من الخارج اي شي المهم أباه

عارف : يا وعودتي والله أنتي بتذبحيني الحين من وين تبيني أخترع لج هالتمثال عنبو أنتي من وين اتييبين هالافكار ؟؟؟

وعد: عارف عشاني حاول والله خاطري فيه

عارف : أنزين أنتي أتعرفين وين يبيعونه ؟؟ شفتيه في مكان ؟؟؟!!

وعد : لا بس خاطري فيه

عارف : لا حول الله والحين كيف يعني .؟؟؟

وعد: اذا لي معزة فقلبك اتييبه لي

[الجنيه]

عارف : الله العالم بغلاج فقلبي ولج مني وعد يا وعودتي ان شاء الله يوم الاقيه بيكون في أيدج لو عقب عشر سنين

وعد مبوزه : هي قص علي

عارف : لا فديتج والله ان لقيته بييبه لج وبذكرج

وعد: لو سمحت محد يتفداني غير ريلي

عارف : يالدبه وأنا شو ؟؟

وعد: ههه مصدق عمرك وايد

عذيجه : افف وعدوه الكيكه أحترقت بسبتج يالدبه

عارف : عذوج ما ارضى عليها لا تغلطين من فضلج

وعد أتغايض عذيجه : عاش بو العرف يعلني ما خلا منك

عارف فديتها والله ولهت عليها ...أنا وعدتها والحين غايته أني أوفي بوعدي .. ممم ما أعتقد ترفضه هي اللي طلبته وخلتني أوعدها أنا بوفي بوعدي وباخذه لها والباقي عليها ...





..........................



العنود : حبيبي فديتك لا اتصيح .. يا ربي شو فيك بس عاد لا أتزعلني منك .. تدري خلاص هونت ما أباك لاأنت خطيبي ولا أنا أعرفك طلقني

عذيجه وهي حادره الميلس : عوذ بالله من هالطاري حشا ما يسوى عليج عشر دقايق وخلاج تطلبين الطلاق وين وأنتي ناويه ترتبطين وياه برباط مقدس لطول العمر

العنود : ههههههههه فديته والله بس الصراحه وايد يصيح يعني يا أنه راقد والا يصيح ؟؟؟؟!!!

عذيجه : أتخبريني عنه طول الليل سهارى ومن عداه الصبح رقد ولا حسيت به نحن قالبين ليلنا نهار ونهارنا ليل

العنود: أييج راي أنتي ظلمي له الحجره في النهار يعني غيري ستايرج خليهن بويهين صوب سود والصوب الثاني أبيض في النهار خليهن سود وفي الليل بيض عسب ما يعرف هالفصعون

عذيجه : ههههه والله أسميج متفيجه ... المهم خلينا في الأهم شو رايج ؟؟؟

العنود: والله ما أدري أنتي شو أتقولين ؟؟؟

عذيجه : شوفي أنا ما بمدحه لج بس الحمدلله أخوي ماشاء الله عليه ما ناقصنه شي جمال ودلال وأخلاق وشجاعه

العنود: ههه حلوه هاي شجاعه شو أبيه ينقذني من العملاق الشرير !

عذيجه : شوفي أنتي خذي وقتج الكافي وردي علي براحتج وصدقيني مهما كان جوابج علاقتنا أبد ما بتتغير ولا أتحطين فبالج أنه ممكن يكون طمعان باللي عندج ترا هو للحين مايدري منو بخطب له ..

العنود : لا أفا عليج أنتوا ناس ما عليكم كلام والنعم فيكم ومب أنا اللي أفكر بهالطريقه والله ..

عذيجه : فديت روحج والله .. غاليه وما جذبت يوم سميتج غاليه ... انزين أبي أخبرج بشي يمكن يكون عقبه في هالزواج

العنود: خير ان شاء الله ؟؟

عذيجه : الله يسلمج هي سالفه جديمه بس الناس ما نسوها ولا يمكن يتناسونها فبدل لاتسمعينها من غيري أنا بخبرج بها . الله يسلمج يوم نحن صغار أبويه كان ساير الكويت في محمل النوخذه عمران للتجاره واتهموه أنه أختلس فلوس من الشركه اللي تعاملوا وياها وسالفه كلها ملفقه بس نتيجتها كانت سجن أبوي لفتره طويله في الكويت وبعدها رجع البلاد وطبعا سالفته كانت منتشره بكل البلاد وأغلب الناس نبذونا وأعتبرو أبونا مجرم

العنود: حليله والله ما يستاهل .. بس ما أعتقد هذا ممكن يغير شي بالنبسه لي ما أقدر أحكم على انسان وأتهمه زور من دون لا أثبت هالشي وبعدين مثل ما قلتي سالفه قديمه وما لها أساس من الصحه

عذيجه : والله أنج..... ما أعرف شو أقولج بس والله كبرتي فنضري أكثر

العنود: فديتج والله .. خلاص عيل اسمحولي بترخص عنكم الحين أكيد ريلج على وصول

عذيجه : على وين تو الناس بتتغدين ويانا

العنود : لا غناتي مره ثانيه ان شاء الله بيت خالي بييون على الغدا عندي

عذيجه : الله يعينج عليهم وطبعا بيتمون عندج لين الجمعه ؟؟؟؟

العنود : ههههه صرتي حافظه جدولهم

عذيجه : الصراحه ما أطيقهم الله يصبرج عليهم انتي وافقي بس وبعدها ولا بتشوفين شيفهم

العنود: ههههه الظاهر هاللي بسويه ... يلا فمان الله

عذيجه :الله يحفظج



,,,,,,,,,,,,,,,,,



سلطان : عبادي تعال حبيبي خلاص بابا تعبت

عبدالله : ما أبي ما أبي

مزنه : خلاص عبادي خل بابا يرتاح الحين بعدين بيلعب معاك أوكي

عبدالله بوز : لا ما أبي أنا ما أحبك خلاص زعليت منك

سلطان : فديت الزعول تعال باباتي بنروح الدكان

عبدالله : لا ما أبيك

سلطان يسوي عمره راقد ويغمض عيونه : خلاص عيل أنا برقد .... خخخخخخ ( أونه يشاخر )

عبدالله يركض عند أبوه يفتح عيونه بالغصب بابا أنت رقديت ؟؟؟؟

سلطان : هي رقديت

مزنه : ههههه أول مره أشوف حد يرقد ويرد !!!

عبدالله : يالدب خوز عن ماماتي

سلطان حاط راسه في ثبان مزنه : ما أبي هذا حرمتي مالي

عبدالله يصيح : ماما خوزيه عنج هذا مكاني

سلطان يتعلق بها أكثر: ما أبي هاي ماماتي أنا أنت روح دور على أمك

مزنه : حرام عليك سلطان لا أتصيحه ... تعالي حبيبي أنت أيلس هني (أتأشر على ريولها من الصوب الثاني)

عبدالله :ما أحبك يالدب

سلطان : يالغيار ... ههههههههه أنزين تعالي عندي

عبدالله : ما أبيك لوح عني

سلطان : أفا وأنا أقول بوديك الدكان ؟؟؟؟ خلاص بسير بروحي .. ونش يمشي صوب الباب

عبدالله لحقه من سمع طا ري الدكان : بابا حبيبي صبر شوي بروح معاك

سلطان : الله أكبر شوفي عيارة ولدج توني دب وما أتحبني شو اللي تغير الحين ؟؟؟

مزنه: عبدالله تأسف من بابا عشان يوديك معاه

عبدالله : آسف باباتي

سلطان : ما أبي عطني بوسه قبل

عبدالله يتقرب منه عشان يبوسه على خده بس سلطان يمسكه ويفرك خده على خد عبدالله بالقو (طبعا اللحيه أتنغزه )

عبد الله : آآآآآآآآآآآآآي

سلطان : ههههههههه تستاهل عشان أتعرف مره ثانيه كيف يوم اقولك شي تسمع الرمسه

مزنه : سلطان

سلطان : عيونه

مزنه : تسلم العين وراعيها ... شو فيك ؟؟؟ أحسبك متضايج مب من عوايدك أتمرنا فنص الاسبوع

سلطان : لاأبدا ما فيني شي بس تولهت عليكم قلت بيي أتطمن عليكم اذا ما تبيني بروح

مزنه: أفا عليك أنا ما أباك !!! ...؟؟؟ أنا لو بيدي أخليك ويانا للأبد ,,, بس ما أدري أحس فيك شي ومب طايع ترمس

عبدالله أير كندورة أبوه : يلا بابا بنروح الدكان

مزنه : عبادي روح عند سوزن خلها أتبدل ثيابك وبعدين روح الدكان

عبدالله : بابا صبر أترياني لا أتروح زين

سلطان : اوكي يلا بس لا تتأخر

عبدالله : صبر شوي اوكي

سلطان : يا حبيبي روح بترياك يلا

عبدالله : وعد

سلطان فز أول ما سمع الأسم وبهت

عبدالله : بابا وعد تصبر لي ؟؟؟!!!!

سلطان : ها ... هي "يتنهد بحسره" ... وعـــــــــد

مزنه : سلطان

سلطان : هلا

مزنه : وين سرحت ؟؟؟

سلطان : لا أبد ماشي

مزنه : أنت متضارب ويا وعد ؟؟؟

سلطان : لا

مزنه : عراحتك أنا احساسي ما يخيب بس بغيت أخفف عنك اذا أقدر واذا أنت عادني غريبه أو ما يحق لي ما أقدر أجبرك

سلطان يلس عندها ومسك أيدها : أفا عليج أنتي مني وفيني وما غريب الا الشيطان بس ما حبيت أضيج بج بمشاكلي وهمومي

مزنه: سلطان أنت ريلي والوحيد اللي بقى لي في هالدنيا ولا أتضن فيوم أني أتضيج منك فرحك هو فرحي وهمك هو همي واذا بيدي شي أسويه صدقني ما بتردد أو أتراجع لحظه

سلطان : تسلمين يا أم عبدالله الله يخليج لي ان شاء الله ... شو أقولج والله مب عارف من وين أبدا وعد حالها منقلب 180 درجه من اليوم الي عبدالله جرح أريوله اذا تذكرين

مزنه :هي أتذكر .. بس ليش ؟؟ هي عرفت شي ؟؟؟

سلطان : ما أدري المشكله مب طايعه ترمس أنا لو اعرف باللي في خاطرها برتاح صدقيني ما هنالي بال من ذاك اليوم تصرفاتها غريبه أمي أتقول يمكن الحمال مأثر عليها

مزنه أتقاطعه بحماس : ماشاء الله حامل ؟؟؟ما خبرتني .. أي شهر ؟؟ظ

سلطان : ما أدري يمكن راح من بالي ... توها في الخامس

مزنه : الله يقومها بالسلامه ان شاء الله ... وأنت تدري يمكن مثل ما قالت أمك الحمال مأثر عليها

سلطان : بس أنا مب مرتاح مب متهني فعيشتي تدرين صارلي أكثر من أسبوعين مب مداوم وما عندي شي أسويه كل يوم أنش الصبح أتلفت حولي أقول يمكن رجعت تبا أتفاجأني بس ما ألاقيها أطلع وما أرجع الا في الليل أقول يمكن رجعت بس أدخل وأشوف الغرفه مظلمه وما لها وجود

مزنه حاسه بالغيره من حبه لها ... ليش ما يحس فيني أوكي صح أنه متضايج بس هذا ما يعني أنه ينسى وجودي يغايضني بحبه لها ويبين لي أشكثر هو متعلق فيها وأنا وين مكاني فقلبه ؟؟؟ أنا بعد بشر لي أحاسيس لو أني محرومه من نعمة البصر بس قلبي مش حجر ... هه يا حظج يا وعد صدق خاطري أشوفج وأتعرف عليج أبي أعرف شو من البشر أنتي وكيف قدرتي تسحرينه وأتخلينه ما يتنفس بغيابج ..

سلطان : مزنه ؟؟؟!!!

مزنه تنتبه له : هلا

سلطان : أشفيج ؟؟؟

مزنه : أبد بس كنت أقول أنها محظوظه لأنها تحتل مكانه كبيره فقلبك

سلطان : وأنتي بعد رغم أني مقصر بحقج بس صدقيني غلاتج فقلبي ما لها حدود ...

مزنه : هممم

سلطان : مزنه أبوي يبيني آخذكم ويايه دبي

مزنه : كيف ؟؟؟؟

سلطان : أبوي يدري بوجودكم في حياتي من زمان بس ما تكلم والحين قالي المفروض آخذكم ويايه وولدي يتربى عند أهله شو رايج أنتي ؟؟؟

مزنه : ما أدري والله بس أنا تعودت على الحياه هني وعبادي بعد روضته وربعه ما أدري والله ... أنت شو رايك ؟؟؟ وبعدين وعد للحين ما تدري كي بتتصرف ؟؟؟

سلطان : أفكر أقول لها وأرتاح والله حاس بالهم جاثم عصدري

مزنه : سلطان المفروض أتمهد لها الموضوع وبعدين لا تنسى أنها حامل والحين مرحله جداُ صعبه على الحامل في هذا الوقت الجنين يبدى يتكون ويكون شبه مكتمل والحاله النفسيه للأم بامكانها أتأثر عليه وأتضره .. هي من دون لا تدري زعلانه منك ومتغيره فمابالك لو درت شو ممكن يصير فيها

سلطان أرعبته فكرت أنه وعد تدري .. مب قادر اتصور شو ممكن أتكون ردة فعلها .. غمض عيونه بالقو يحاول يمحي الصوره اللي بدت تنرسم فباله تذكرالحوار الي دار بينهم فيوم

"أوكي وعدوه ان ما خليتج تندمين على هالرمسه ما أكون سلطان ،،،بييبلج عديله عسب تتأدبين هي اللي بتخليج أتعرفين جيمتي وبتدلعني

وعد : سلطان اذا فيوم فكرت تاخذ وحده غيري أرجوكطلـــــــــــــــــــــــ ـــــــــــــــقني وبعدها سو اللي تباه"

لالالا مستحيل لا ما أقدر

مزنه :سلطان أشفيك

سلطان : ما أبي أخسرها ما أبي ولا إرادياً دموعه بدت أتسيل ... كيف بعيش أنا من دونها ؟؟؟!! وعد بتطلب الطلاق اذا درت هي أتغار علي من نسمة الهوا كيف اذا عرفت أنه في انسانه ثانيه أتشاركها فيني ؟؟؟ يا ربي ساعدني أرجوك أنا ما أبي أضيعها من أيدي أنا ليش سويت جي ليش ؟؟؟؟

مزنه صدمتها حالته والطريقه اللي كان يتكلم بها أهانها وهو مب حاس بعمره ..الحين حس بأنه اللي سواه كان غلطه يعني زواجه مني غلطه !!! وولده عبدالله بعد غلطه ... يعني كلام فاضل كان صح اذا سلطان أنحط بموقف أنه يختار بيني وبينها أكيد خياره بيكون وعد لنه يحبها ويموت فيها أما أنا وولده ما نعني له شي .. سلطان طلقني

سلطان حس بتأنيب الضمير وأنتبه على نفسه والكلام اللي قاله ... مزنه مالها ذنب ليش أحسسها بأني تزوجتها شفقه أو عشان أحافظ عليها صح أني أميل لها ويمكن أحبها بس هي غير و وعد غير كل وحده لها مكانة خاصه فقلبي بس قلبي كله ملك وعد أنا ظلمتهم الثنتين ومب عارف شو مصيري وياهن .. مزنه تطلب الطلاق ؟؟؟؟ حس ببرودة تسري في جسمه معقوله أطلق مزنه ؟؟ أم ولدي والي محتايتني ؟؟ما أبي أغضب ربي ولا أبي أحرم ولدي أنه يتربى فعز أبوه وظله ... لا يا مزنه ما بطلقج وأنتي أمانه برقبتي ليوم الدين مستحيل أتخلى عنج أوضاعي بتتصلح بس وجودج لا بد منه في حياتي وخلاص أبيج انجهزين نفسج وعبدالله عشان تنتقلون دبي مؤقتاً بسكنكم في شقه قريبه من بيتنا وبعد ما تهدأ الأوضاع وتستقر بنعيش كلنا فبيت واحد ان شاء الله ..

مزنه : سلطان ما أبيك أتحس بالشفقه علي ,, ولا أبي أكون عبء ثقيل عليك ات حر اذا حبيت أتطلقني ما أقدر أبني سعادتي على تعاسة غيري وما أبي خراب البيوت

سلطان : خلاص يا مزنه أنا ما برجع فكلامي وتعذري لي من عبدالله أنا بترخض

مزنه : سلطان دخيلك لا أتسوي جذه كلمه بنفسك ولا أتخليني فموقف صعب وياه عبدالله بدا يكبر ويفهم وما بقدرعليه ان طلعت عنه من دون لا يسلم عليك خلاص الولد تعود عليك أرجوك يا سلطان

في هاللحظه دخل عبدالله وربع للأبوه عشان ياخذه بحضنه .. سلطان تجاوب وياه وشله وياه .. خلاص عشر دقايق ونحنا راجعين ولا تنسين يا مزنه عندج أسبوع أتخلصين كل أمورج هني وبالنسبه لروضة عبدالله اذا تبين بروح أخلص أجراءات نقله باجر ان شاء الله

عبدالله : شو فيه الروضه مالي ؟؟؟

سلطان : ما فيها شي بس بنغيرها

عبدالله : ليش؟؟؟

سلطان : عشان بنروح دبي

عبدالله :وين هاي ؟؟

سلطان : حبيبي خلاص بنروح مكان ثاني بيت ثاني عند أبويه

عبدالله : الله أنا بعد بروح معاكم

سلطان :خلاص أنت بعد بتروح معانا ....

مزنه : عبادي حبيبي لا أتأذي بابا اوكي

عبدالله : أوكي ....



,,,,,,,,,,,,,,,,,,,,,,,,,,,,,

فبيت حميد



حميد : وعد أمايه شو فيج ؟؟ لين متى بتمين على هاي الحاله ؟؟

وعد : خير يا أبويه شو صاير؟؟

حميد : لا تتغيشمين عليه ... أنتي زعلانه على ريلج

وعد: لا

حميد : عينج فعيني

وعد: أبويه خلني عراحتي وانا مب زعلانه عليه .. ليش أنت متضيج من يلستي عندك ؟؟

حميد : افا عليج أنا أتقولين لي هاي الرمسه والله ما هقيتها منج

وعد أتنش واتحب راسه : فديت روحك لا تزعل مني بس والله ما أعرف شو فيني روحي متضايجه من هالوضع

حميد : أنتي لو بس اتطيعين الشور وتيلسين ويا ريلج تسمعينه وتاخذين اللي بخاطره بترتاحين

وعد : ان شاء الله بحاول أكلمه اليوم

حميد : تبيني أتصل فيه ؟؟

وعد :لا خله أنا اللي بتصل به بعد أشوي

حميد : الله يهديج ويريح بالج ... انزين أنا بسير عند بو حامد شي في خاطرج ؟؟

وعد : هي روح عند ربعك وخلني أنا ويا الطوف هني

حميد : أفا ما هقيتها منج يا بنت حميد

وعد: فديت اللي يزعل يا باباتي يا حبيبي يا عمري اسولف وياك والا خلاص صرت ما تتحمل كلمه مني !!!؟؟

حميد : ههههه شو هالهبل اللي فيج ؟؟ هذا وراثه والا ؟؟؟ الحمدلله ما أحيدني أهبل ولا المرحومه

وعد: ههههههههه انزين يلا باباتي عشان ما تتحير على بوحامد وانا بسير عند عذيجه

حميد : منو بيوصلج ؟؟؟

وعد: باباتي عذيجه هني بيت أبوها

حميد : هي زين عيل أنا ما بتحير ساعتين بالكثير وراجع ان شاء الله وأبي أشوفج متصالحه ويا ريلج فيهن وشاله قشارج ورايحه بيته مفهوم

وعد: مفهوم يا باشا أوامر تانيه ؟؟؟

حميد : سلامتج .. وداعة الله

وعد: الله يحفظك

.................................................. .........................................



نهاية الجزء الــــــــــــــتاسع عشر

أتمنى يعجبكم ويكون تعويض عن التأخير ....