بيت بوسلطان
بوسلطان : أشفيك يا سلطان ؟؟؟
سلطان : وعد ما أدري شو فيها ؟؟؟ تتصرف بشكل وايد غريب عمري ما جد شفتها بهالحاله
بوسلطان : كيف يعني
سلطان : ما أعرف يا أبوي والله روحي ما أعرف ... حتى تلفونها غالقتنه
بوسلطان : ما سألت نفسك ؟؟؟ يمكن شايفه عليك شي
سلطان بطل عيونه من الصدمه على الآخر : ها شو لالا أنا ما سويت شي غلط
بوسلطان : متأكد؟؟!!!!
سلطان : هي متأكد
بوسلطان : والعين وسالفتك فيها
سلطان حس بقشعريره وشعر جسمه يوقف : .......
بوسلطان : شوف يا سلطان اذا يتراوالك أني ما عندي علم بسالفتك فأنت غلطان لا تنسى أني أعرف كل صغيره وكبيره فحياة عيالي من صغيرهم لكبيرهم
سلطان يحس بالدم تيمع فعروقه ... مرتبك وخايف ما يبي يعرف أبوه شو يقصد كل همه أنه وعد ما تدري
بوسلطان يكمل : تذكر يوم قلت لك شو رايك بــ حميد ربيعي قلت لي ريال والنعم وقتها قلت لك عنده بنت قمر أبيك تاخذها شو رايك ... قلت لي بعدني يا أبويه ما أفكر صح
سلطان : صح
بوسلطان : بس حزتها عرفت أنه في سر كبير أنت خاشنه عني واللي يسأل ما يضيع ,, بس كنت أبيك أنت تعترف وأتقولي اللي بخاطرك بس يوم رجعت نفس اليوم وقلت لي أنا موافق فهمت أنك مدبر أمورك وريال أتعرف تاخذ قرارك وصلحتك ... بس ليتي رديتك ذاك اليوم ولا تسببت باللي بيصير ...
سلطان الصدمه باينه على ويهه ومب قادر يتصرف شو يقول ؟؟؟ كيف يفسر للأبوه الي صار؟؟؟
بوسلطان : يا ولدي أنا مفتخر باللي سويته بس للأسف ما تكمل فرحتي بك لأنك ما تصرفت بشجاعه وطلعت حرمتك للناس وأعلنت للكل أبوتك لولدك وكملت خطاك بأنك ما خبرت وعد بهالشي ولا عطيتهن حقهن لا هي ولا مزنه ام عبدالله ...
سلطان ودي أسأله بس من وين له كل هالأخبار أكيد فاضل الحقير : أبوي
بوسلطان : أدري بتقولي من وين لك هالعلوم ,,, أنا بعد ذاك اليوم راقبتك واكيد تذكر أنك كل أربعاء وخميس أتروح العين وأتم هناك .. بس يومها عرفت والباقي تكشف لي مع مرور الأيام بس سكتت كنت أبي أشوف اللي ناوي عليه كيف تتصرف وكيف بتخبرك حرمتك بهالسر ...أنا ما يهمني شي بس أبيك تعدل بينهن وتعطي كل وحده حقها أنت ظلمت وعد بأنك غبيت عنها الحقيقه ومزنه بأنك حرمتها أبسط حقوقها ...
وعلى طاري الحقوق ترى أمك من حقها أتعرف وأنا مخلي هالشي عليك وأخوانك أعتقد ردة فعل سيف اليوم عطتك فكره أنه يدري أو بالأحرى شايفنك في العين أمس في الوقت اللي حرمتك كانت بحاله ما يعلمها غير الله كنت انت أتأدي واجبك تجاه عايلتك الأولى ...
سلطان : شو كان فيها وعد؟؟؟ وليش محد خبرني
بوسلطان : اذا أنت ما تعنيت وسألت عنها ليش تبينا أنخبرك بشي ؟؟؟
سلطان نزل على ركبه ونظرة الألم والخوف فعينه ساعدني يا أبوي ألحق علي والله مب عارف اتصرف شو أسوي ما أعرف ...
بوسلطان يحط أيده على جتفه ويرفعه عشان يوقف: سلطان أهم شخص الحين وعد لازم تدري ولازم اتخبرها بأسبابك واذا هي تفهمت،،، المشكله انحلت
سلطان : بس وعد مستحيل ترضى
بوسلطان : سلطان تأكد أني بوقف وياك مهما صار بس أنت شد حيلك ولا حاول تتصرف صح
سلطان: ما أعرف ياأبويه والله ما أعرف وعد بس لو عرفت بيكون آخر يوم لها وياي أنا أعرفها مستحيل ترضى مستحيل وأنا ما أقدر أداري على وجود مزنه وعبدالله فحياتي أكثر من جذه وايد ظلمتهم والحين لازم كل حد ياخذ حقه ,,
بوسلطان : وهذا اللي أبيه ،، تركه وراح حجرته يرتاح
سلطان حس بضيقه وخنقه ركب موتره وطلع وين ؟؟ روحه ما يدري المهم بعيد عن أي شي يذكره بوعد مشتاق لها ومب قادر يتحمل يعادها ساعات عيل لو باجر تدري بسالفة مزنه أكيد بتودرني للأبد لا أعوذ بالله من الشيطان ,,, الله لا قال ان شاء الله بتتفهم وما يصير اللي أنا خايف منه ..
,,,,,
هند: باسم الله الرحمن الرحيم عنبو وعد بتذبحينا أنتي
وعد: جب أنزين يوم أتزيغين من سواقتي ليش رازه الويه ويايه ؟؟؟
موزه : هههه ماعليج منها هاي أصلاً أتخاف من سواقة الحريم أياً كانت اللي أتسوق ومهما كانت سويقه ماهره
وعد: مالت عليج
هند: أشوي أشوي لا أتصدين ورى شوفي الشارع
وعد : طع هاي أي أنتي يا طبرج أتقولين همبا خضر أنا مب من اليوم أسوق أنزين
هند: الله يوصلنا بالسلامه ...
كملن دربهن سوالف وضحك وغشمره لين وصلن عند وفا اللي كانن متصلات فيها من قبل وخبرنها بمخططاتهن وفي الأساس هي كانت ناويه أتروح بيت أبوها وهن قالن بيمرن عليها...
،،،
سعيد : سيف !!!
سيف: نعم
سعيد : باسم الله ليش ماد البوز جنك مصفوع
سيف: يعود ايلس عني والله مالي خلق
سعيد : عنبو لو هي بنت ما سوت سواتك مب أنت أول أو آخر واحد ينرفض يوم يخطب وايد غيرك أنرفضوا بس محد سوا عمايلك ياخي البلاد متروسه بنات
سيف: أنت ما تفهم أسكت
سعيد: شو أصغر عيالك عشان ما أفهم .؟؟؟!!!
سيف: أففف مب قصدي سعيد بس عاد لا أتطفر بي
سعيد: أنزين بس جاوبني قبل على سؤالي
سيف: أففف أسأل شو عندك
سعيد : أصلاً أنا الغلطان اللي لاحقنك أوني بشد من أزرك
سيف: ههه بوعسكور فديت خشمك لا تزعل والله مب قاصد بس متغصص
سعيد : أنت كنت تبيها لأنك تحبها ؟؟؟
سيف: هي عايبتني وااااااااااااايد وبغيتها من خاطري
سعيد : واللي يبي الشي من خاطره جي يسوي؟؟؟
سيف: أنا شو سويت ؟؟؟
سعيد : أبد ما سويت شي ولا قلت شي بس كنت دفش وهددتها ومسحت فيها الأرض
سيف: سعود يالهرم لا تتبلى علي
سعيد : سيف أنت أخوي وأنا أعرفك عدل شوف لو السالفه مب صايره جدامي يمكن كنت بقول البنت بالغت اذا رفضتك بسبة الله شافته منك بس أنت طريقتك كانت همجيه وغلط أي وحده مكانها كانت بترفض اذا تبي أتعيش حياه مستقره ومرتاحه ..
سيف: شو فيك علي يا أخوي ؟؟؟
سعيد : سيف لا تزعل بس هاي الحقيقه ...
سيف : أنزين كل شي صار فلحظة غضب
سعيد : ترا أنت عيبك الوحيد لسانك هالطويل الي ما تقدر تقضبه وقت الغضب يا عصبي
سيف: أفففففف
سعيد : لا تتأففف عندي لك فكره بس يمكن ما تنفع
سيف : شو قول ؟؟؟؟
سعيد : شوف أنت رمس البنت ووصلها الرمسه بس بطريقه محترمه ومن دون همجيتك وخبالك
سيف : ومنو اللي بيوصل رمستي لها ؟؟؟ لازم أكلمها شخصياً
سعيد : انزين بييك بالرمسه يا هالويه أصبر أشوي ..
سيف: غرد أطربني أشوف
سعيد : بسيطه كلم وعد وهي بتدبرها لك
سيف: وعد ؟؟؟؟؟؟
سعيد : هي وعد بلاه ويهك اتقول صافعتنك جنيه
سيف: ماشي سلامتك
سعيد : تعال تعال شو هالرمسه اللي قلتها لسلطان اليوم ؟؟؟؟
سيف: الله ياخذه
سعيد : سيف مهما صار هذا أخوط لا تدعي عليه
سيف: لا بارك الله فيه من أخو اذا هذا أخوي
سعيد : سيف ليش شال بخاطرك عليه ليش ؟؟؟؟ ما أحيد بينكم شي
سيف : بينا سواد ويهه أخوك المحترم عنده حرمة وولد غير وعد
سعيد : شووووووووو شوأتخربط أنت أي ؟؟؟
سيف: ما أخربط شفته بعيوني الي بياكلها الدود
سعيد : بس ليش وكيف ؟؟؟ و وعد!!!!
سيف: ما قاهرني غير هالشي حليلها وعد ما تستاهل وهو يحبها ويموت فيها اونه
سعيد : يمكن أنت غلطان سواف
سيف : لا سعيد مب غلطان ولاشي هاي حرمته قبل لا ياخذ وعد
سعيد : أنت كيف أتعرف
سيف : فاضل خبرني
سعيد : فاضل ؟؟؟
سيف : هي أمس شفته وهو قالي أنها أخته وسلطان ما خذنها من سبع سنين
سعيد : معقوله ؟؟؟!!!! حرام و وعد
سيف: الله يعينها وايد غمضتني هاي ونحن ما شفنا منها غير كل خير عيل لو كانت مثل الساحره ميثوه شو كان بيسوي ...
سعيد : لاحول الله ,,, وعد تدري ..؟؟
سيف: ما أضن
سعيد : لا يمكن تدري عسب أمس المغرب وايد كانت متضايجه وأغمى عليها
سيف: والله ؟؟!!
سعيد : هي
سيف: كله من هالسلطان والله أنه طاح من عيني
سعيد : سواف مب لهادرجه عاد هو ما سوى شي غلط
سيف: شو يعني ما سوى شي غلط كفايه أنه خدع هالمسكينه وعد اللي عدته نظر عيونها
سعيد: أكيد له أسبابه اللي خلته يدس عنا زواجه
سيف : مافي شي يغفر له والله سرت ما أطيقه أكرهه تعرف شو يعني أكرهه
سعيد: سيف هذا أخوك ومالك بد منه
سيف: كرهته يا ريال والله وعد ما تستاهل منه كل هذا أنت تدري بمكانتها عندي أعز مثل أختي وأكثر
سعيد : حتى نحن أنعزها ولها مكانتها الخاصه فقلوبنا بس شي صار مانقدر انغيره
سيف: أحس لو درت بتطلب الطلاق
سعيد: فال الله ولا فالك ،،، لا ان شاء الله بتنحل المشكله بدون طلاق ماتدري شو ممكن يصير بأبوي لو تطلقوا هاي وعد غناته بنته اللي ما يابها ما بيسكت لسلطان عنها
سيف : يستاهل مسود الويه
سعيد: سيف !!!؟!؟؟؟ بسك عاد وايد حاط عليه
سيف: من القهر
سعيد : عشان شهد رفضتك؟؟!!!
سيف : أفففف لا أتذكرني اللي فيني كافيني
سعيد : قم نش ويايه ..
سيف: وين
سعيد : أنا بحل مشكلتك أنت بس أمش ويايه
سيف: وموتري ؟!!
سعيد: بنرجع له ،،،
سيف: الله يستر من عمايلك
سعيد: باجر بتشكرني
سيف: ياخوفي أذبحك ؟؟!!
سعيد يمشي من دون لا يرد عليه ....
,,,,,,,,,,,,,,,,,
عارف : يلا بسكم عاد أففف حمده وروضه ردن ورا عسب يستوي مكان لعذيجه وولدها
حمده : أنزين هزاع أنت روح أنا ما أحب أيلس ورا
هزاع: هههه ما أتحبين تيلسين ورا والا يالدبه ما تقدرين تنزلين عدل ههههههه
حمد: هههههههههههههههه هزاع
حمده : الدبه حرمتك الشلقه الخسفه أنزين
روضه: ههه وييييييو فشلوها يوم أقولج خفي وزنج أتقولين أنا جي مرتاحه
حمده: كيفي ما يخصكم
محمد: بخبركم محد له خص فــحمودتي خلوها ان ماشالتها السياره أشيلها بعيوني
عارف: يالله ما أنروم منو قدهم بعض الناس
هزاع: دخيلك محمد تراها بتصدق عمرها
روضه: ههه والله وصدقت طع كيف تتطالعنا بطرف عينها
محمد: خلوها يحق لها برايها ... الحين شو ترتيبكم هذي عذيجه وصلت
عذيجه تفتح الباب : السلام عليكم
الكل : وعليكم السلام ورحمة الله وبركاته
روضه أتزاعج : عذاج عطيني فهودي فديته بيلسه عندي
عذيجه : ولو أني ما أأمن على ولدي عندج بس يلا شو أسوي غصبن عني
محمد: لا والله هذا يزاها المسكينه ؟؟؟
عذيجه : فديت حبيبتي رواض والله لو منها هنتين في هالدنيا جان نحن بألف خير
روضه: احم احم
عارف : الله يرحمنا برحمته خلاص الحين شو بيفكنا من الخقه الحين
الكل : ههههه
محمد: ها على وين
حمده وحمد : على حمر عين
عارف : ياحبهم للسخافه عاد كله ولا الحمد ما يصدقون جاهزين للعبط
محمد: يبا لوين ؟؟
حمده وحمد: على حمر عين
روضه : شو حمر عين جي ماشي شغل ؟!!!
عارف : حمود شو رايك أنروح القصر الهندي ؟؟؟
عذيجه: لا ما فينا على الفلفل
عارف : مشكله اللي ما يفكرون يا بابا في أكلات من دون فلفل ...
هزاع : شو رايكم بـ Apple Beans الي على شارع الشيخ زايد الله يرحمه
حمده : هي هي كشخه والله أكلهم حلو عندهم سلطه أتهبل
عارف: تبون تاكلون أكل محترم ؟؟
الكل : طبعاً
عارف : عيل ثقوا بالمتان
حمده: شو قصدك ؟؟؟
عارف : ههه فديتج أقصد أكلهم حلو هالمطعم مجربنه من فتره وايد غاوي
محمد: خلاص يعني ننطلق الى Apple Beans
كملوا دربهم ضحك وسوالف وغشمره ... لين وصلوا المطعم ,,,
,,,,,,,,,,,,,,,,,,,,,,
وفا: عنبو ما بغيتوا توصلون
وعد : هههه والله يا وفوي عندنا جبانه بتموت اذا زدت السرعه أشوي
هند: المهم وصلنا أنزين
موزه: هههه وصلنا بعد الشو ؟
وفا : سيفان حبيبي أيلس عاد
وعد : وين حبيبتي وعوده فديت سميتي والله
وفا : وعد عند أبوها بيوديها بيتنا بعد أشوي
هند: أفا
موزه : لا مب أفا أحسن عشان نقدر أنروح نتعشى فمكان محترم
وفا : احم احم وأنا عازمتنكم
هند: الظاهر توها معبيه بترول
وعد: ههههه آخر الشهر نزلن المعاشات
وفا: تطنزن يالمتان المهم الحين وين بنروح؟؟؟
موزه: مافي غيره
وعد: أففف ذبحتينا أتقولين ماشايفه خير ما أتعرفين غير هالمطعم ؟؟؟
موزه: بس حلو وهالوقت هادي مافيه حد
وعد: أنزين لا أتصيحين علينا ،، بس ما خبرت باباتي
وفا: يالله الحين سلطون صار باباتها وعمي فديته ؟؟!!!
وعد: يالعيوز أنا كنت أطري أبوي
وفا: عيوز محد غيرج أشدراني أحيدج الخطوه ما تخطينها من دون شور سي السيد
وعد: كيفي
وفا بلهجة جديه : وعود أنتي متضاربه ويا ريلج؟؟؟
هند: عنبو لازم كل لحظه تاخذ أذن لكل حركه تتحركها ؟؟؟؟
وفا: هند اسكتي أنتي ما يخصج بهالسوالف فاهمه
موزه: هند كم مره أقولج هالشيء ظروري لازم المتزوجه تاخذ أذن ريلها اذا بتطلع لمكان والا تلعنها الملائكه... عرفتي ليش ؟؟
هند: أنزين الحين شو تبون مسوين من الحبه قبه ودونا نتعشى وبسكم من هالمحاضرات ذبحتونا
وفا: بس كل همها بطنها
’’’’’’’’’’’’’’’
نهاية الجزء الـ 18
رد مع اقتباس
مواقع النشر (المفضلة)