محمد مثل ما وعد أخته أتصل بمبارك وبشره برجعت أم ولده وخبره عن شرطها اللي تقبله مبارك بصدر رحب ..بعد ما سكر عنه طلع برع البيت يشوف عارف بس ما لقاه وأول ما دخل شاف ظل شخص في الزاويه اللي مقابله غرفة أمه وهو يتقرب بدى يميز اللي يالس .... ...
محمد يلس عدالها : رويض شوفيج ؟؟؟ ليش يالسه جذه ؟؟؟
روضه ترجف بالقو وأسنانها تصتك ببعض موجهه عينها لغرفةأمها
محمد تقرب منها أكثر وخذها بحضنه وتم يربت على ظهرها يحاول يهديها : خلاص فديتج ماصار شي تعوذي من ابليس ... بسسس ششششش رواض ... حس بجسمها يرتخي وتتصبب عرق ورخت قبضة أيدها بعدها عنه وخلاها أتجابله : تعالي ويايه نش ومد أيده لها عشان تلحقه ...
روضه لا ارادياً تعلقت بيده ونشت وراه ... تتبعه .... وـــــــــ
محمد: ليش وقفتي تعالي أمشي ويايه
روضه :لا ما أبي
محمد: أنا وياج ليش أتخافين تعالي ما بيستوي شي
روضه : لا لا لا ما أقدر
محمد لف أيده عليها من خصرها ومسكها : قلت لج تعالي مابيستوي شي أنا وياج يلا سمي باسم الله
روضه تمشي وياه بخطوات بطيئه تحاول قدر الأمكان تتفادى المكان اللي سايره له
فتح الباب وبطل الليت تجدم قبلها ودخل الغرفه يلس على أقرب كرسي حس بقلبه يتقطع تمر ذكرياتها فباله كأنها موجوده يحس بريحة عطرها ويسمع حسها يوم تناديه كل أربعاء
أم محمد : فديت روحك وصلت
محمد يتقرب منها ويبوس راسها : الله الله شو هالحلاه شو هالجمال ها كله عشاني ؟؟؟
أم محمد : طبعاً عشانك وانا كم محمد عندي
محمد يحضنها بالقو : فديت قلبج يعلني ما أخلى منج
أم محمد : غانتي كسرت ضلوعي
محمد: هههه كيفي أمي ما يخصج أنتي
أم محمد : ههههه اذا السالفه جذه خلاص أنا ما لي دخل ما بتكلم
محمد: لا ياعمري انتي اللي تتكلمين تامرين وتنهين ... شبيك لبيك بوجاسم بين أيديج
أم محمد : محلاها من ثمك
محمد : أحم أحم أخاف يغار الشيبه
بومحمد وهو يرفع حياته : لا والله زين يوم ذكرت أني موجود
محمد : ههههه خييييييبه وأنا أقول من وين هالدخان ثره الغالي هنه ... يتجدم منه ويحبه على راسه
بومحمد :الحمدلله على السلامه ... ليش متأخر
محمد :الله يسلمك ... فديت روحك تأخرت لأني كنت أوصل واحد من الربع العين موتره مجيم وأبوه حلف عليه أتعشى عندهم ,,, قول زين الله ستر والا جان ماييتكم هالاسبوع حلف عليه أبات عندهم وأنا قلت له عاد ما يصير ضناك عندك وتحرم هلي مني
أم محمد : وأنت قدها ؟؟؟ أتسويها يا حمود
محمد : فديت اللي تغار عليه
بومحمد : يوم أنتي مبزتنه هالكثر شو خليتي حق حرمته
محمد: برايها خليها أتبزيني على كيف كيفها ويوم أتي الحرمه بعد بتبزى بزياده فديتني شو أسوي يوم يحبني
أم محمد: هي عاد يوم بتي الحرمه شو يسألك عنا!!!!!
محمد: أفا وأنا أقدر عفراقكم ... بعدها ما أنولدت اللي تاخذني عنج فديت قلبج
أم محمد : يالعيار أنته عرس وبنشوف اللي بيصير ,,, الحين سير بدل ثيابك وتعال بعشيك
بومحمد : يعني توه يقولج متعشي بعدج تبينه يتعشى بسه ماشاء الله عليه مستوي جثه ما ينرام له
أم محمد :الله أكبر ،، فحياتي ماشفت أبو يحسد ولده برايه خليه يستوي أنا عايبني جذه
محمد : أفا عليك يا بومحمد صح متعشي بس مخلي مكان عشان اتعشى وياكم
بومحمد : هي عايبنج جذه باجر اللي بتاخذه بتقوله سو رجيم عشان ما تتفشل منه
أم محمد : مالت عليها جان بتتفشل منه والله يا أني أيوزه غيرها أن سوتها
محمد: ههه أنتوا يوزوني وطلقوني على كيفكم أنا بسبح وبزهب العشا وبييكم
أم محمد :الله يحفظك
نزلت دمعه على خده ... وأنتشلته حرارة الدمعه من ذكرياته ..رفع أيده يمسح دموعه شافها تمشي في الغرفه تتلمس كل ركن منها بيدها وقايه ماسكتنها بكل قوتها وصلت عند الكبت فتحته وبشكل تلقائي طلعت الصندوق الصغير اللي متعوده أول ما تدخل غرفةأمها تفتحه عودتها أمها تاخذ منه شي غالي على قلبها أتحب يكون عندها وهي في غرفتها .... مررت أيدها عليه تتلمس كل جزء منه قبل لا تفتحه وتاخذ اللي فيه وقفت عند المنظره أتشوف عمرها وهي لابستنه تتذكر كلامها
أم محمد : فديت العروس
روضه : فديت أم العروس هههههههههههههههه
أم محمد : باجر ان شاء الله يوم تعرسين بلبسج اياه في عرسج
روضه : أمايه مب تعطينه حمده والله بزعل
أم محمد : أفا عليج هاي المرتعشه لج أنتي وحمده في شي ثاني لها
روضه : شو ؟؟؟
أم محمد : هي ماأتعرف ولا أنتي أتعرفين بس يوم أتعرس بتعرفن واذا الله ماكتب لي أحضر عرسها بوصي عذيجه تعطيها إياه
روضه وهي أتدس راسها فصدر أمها : الله يطول بعمرج ويخليج لي ليش أتقولين هالرمسه والله بموت لو يستوي فيج شي
أم محمد : أستغفري ربج ولا أتقولين هالرمسه الموت حق وأنتي تدرين المرض هاد حيلي وما أدري متى ربج بياخذ أمانته ... ما أوصيج يا رويض ديري بالج على أخوانج وأبوج ولا تصيحين علي اذا كنتي أتحبيني
روضه وهي تشهق من الصياح : لا ما أبي أنا بموت قبلج لا أتقولين جي أمايه الله يخليج
أم محمد : روضه أنا ما بكون هنه ما أبيج أتزعلين أبوج وأتمرضين عمرج وغلاتي عندج ما أتصيحيني يوم أموت
روضه : أمي أنتي شو أتقولين ليش أتقولين هالرمسه ان شاء الله ما عليج شر
أم محمد : هالصندوق واللي فيه لج ولعلمج محد يعرف باللي أتسوينه الحين غيري أنا وأنتي وربج قبلنا
روضه : يعني ألحين هالسنين كلها محد يعرف ؟؟؟
أم محمد : مب أنا قلت لج هذا سرنا أنا وأنتي ؟؟؟
روضه : هي بس كنت أتحسبج أتقولين هالرمسه عشان ما أأذيج
أم محمد : هههه كح كح كح كح
روضه تركض صوبها وأتشربها ماي : صحه
أم محمد : على قلبج ... أنتوا ثلاث كل وحده منكن لها صندوق ولي وياها سر ما يعرفه غيرنا
روضه : أمايه قولي آمين
أم محمد : آمين
روضه : عسى الله لا يفرقنا ولا يبعدج عنا
أم محمد وهي تاخذ المرتعشه ترجعها للصندوق : يلا سيري رديها داخل قبل لا أيي حد
روضه بفرحه : ان شاء الله ...
حست برعشه وأستوعبت اللي يصير ... هي فغرفة أمها اللي تركتهم وراحت ... لفت وراها أتشوف محمد يتطالعها وعيونه تدمع مد أيده لها عشان تيلس عنده استسلمت ويلست عنده بدت أتصيح بصمت لفتره طويله بعد ما حس أنها طلعت اللي بخاطرها وما عاد فيه مجال للشك أنها تكبت شي من الحزن فقلبها رفع راسها وبعد شعرها عن ويها : روضه خلاص ترحمي عليها
روضه : الله يرحمها ,,, محمد وايد أتوله عليها أبي أشوفها بس مره وحده بس
محمد نش وتقرب من طرف الشبريه خذ الصوره اللي في البرواز وناولها لها : خليها عندج هي وياج فقلبج وهالمهم لا أتسوين بعمرج جذه ولا أتزعلينا أتعرفين غلاتج عندها دوم كانت أتوصيني فيج ما أبي أزعلها لا أتخلين شي يضايقج ... الموت حق والله رحمها يوم ماتت بنفسج شفتي أشكثر تعذبت وتألمت عشانا وبسبة مرضها خليها ترتاح فقبرها .. أتعرفين الصياح على الميت يعذبه ؟؟؟
روضه تهز راسها : هي
محمد : خلاص باجر الصبح أتين أتنظفين الغرفه وأتدخنينها مثل قبل ماأبي أشوف باب الغرفه مقفول مره ثانيه خليها مثل ما كانت أتحب بابها مفتوح دوم وريحتها عطر وعود
روضه : ان شاء الله ...
محمد: يلا نشي غسلي ويهج صلي الصبح وأرقدي
روضه: ان شا ءالله
محمد : العصر بوديكم العين أنتي وحمده وهزاع وحمد أوكي
روضه : انزين
محمد : ما تبين ؟؟؟
روضه : بلى بسير
محمد: وعي الدبه حمدوه عشان أتصلي
روضه : تصبح على خير
محمد : ههههههههه أصبح بعدج تبيني أصبح ؟؟؟ الصبح طلع والشمس أشرقت
روضه : هههه الله أكبر توه مأذن الصبح ,,
محمد : يلا أنا ساير بوعي الوالد وبنروح المسيد
روضه : تباني أسويلك ريوق ؟؟؟
محمد : ليش ما بترقدين ؟؟!!
روضه : لا أصلا أنا ما أرقد عقب صلاة الصبح
محمد : غريبه ليش عيل ما تطلعين ؟؟؟
روضه : ما أدري عشان مافي حد واعي أيلس في الحجره أقرى قرآن
محمد : بارك الله فيج ,,, خلاص سويلنا ريوق محترم تراني ميت يوع
روضه وهي سايره حجرتها : ا ن شاء الله بسويلك أكل تاكل أصابعك وراه
محمد :ههه لا يا أبوي خلي أصابعي لي ...
روضه : ههههههههههههههههه
........................
يدور في الشوارع مايعرف وين يروح حاس بضيقه وده يفضفض عن اللي فخاطره بس مب لاقي اللي يفتح له قلبه ,,, بعد مامرت ساعه وهو يتفرفر في الشوارع لقلى نفسه واقف عند بيتها ... سمع المؤذن ينادي لصلاة الصبح توجهه للمسيد على طول بعد الصلاه يلس فركن يقرى قرآن يستغفر ربه يدعي لهله وأخوه بالأخص الي سواه كان رد فعل طبيعي بس اللي في خاطره أكبر من جذه ما توقع أخوه يطيح ضحيه هالسم الفتاك لكنه وعد نفسه ينتشل أخوه من اللي فيه ويلحق عليه قبل يلا يغرق..... حس براحة وطمأنينه رجع المصحف مكانه وطلع
سعيد : سواف ها ما جنه عارف ؟؟
سيف : وينه .... هي بلى بس ها شو يايبنه هني ؟؟؟ بيتهم وايد بعيد ؟؟!!!
سعيد : أمش بنسلم عليه
سيف يسبقه يلا : السلام عليك
عارف يلتفت له : وعليكم السلام والرحمه ... ويتوايهون
سعيد : هلا والله أشحالك
عارف : بخير الله يسلمك ,,, علومكم ان شاء الله مرتاحين
سيف : الحمد لله يسرك حالنا ،،،
سعيد : ماشاء الله أشوفك صوبنا ؟؟؟
عارف : ها أأ هي ماياني رقاد وكنت أحاوط وصلت هالصوب وأذن عاد نزلت أصلي
سيف: عسى ماشر ؟؟
عارف : مامن شر بس الظاهر مافيني رقاد ...
سعيد : اللي ماخذ عقلك
عارف : ههه لا ماخذ عقلي ولا شي عادي
بوسلطان : السلام عليكم
عارف ،سعيد و سيف : وعليكم السلام والرحمه ...عارف تجدم يتوايه وياه
أشحالك عمي بوسلطان ؟؟؟
بوسلطان: بخير يعلك الخير ، شو أخبارك وأخبار أهلك عساهم مرتاحين
عارف : بخير ونعمه ويسلمون عليك
بو سلطان : الله يسلمهم ... أقرب يابوي
عارف : تسلم ما أتقصر والله
بوسلطان : أنزين أقرب بتتقهوى
عارف : مره ثانيه ان شاء الله , بروح البيت عن يحاتيني الوالد
بوسلطان : وأنت هب ياي من البيت ؟؟؟
عارف : لا ،، كنت عند الربع وتوني طالع
بوسلطان :زين بارك الله فيك سلم على الوالد وخله يزورنا
عارف :ان شاء الله
سيف ملاحظ التناقض اللي فرمسة عارف وحس ان السالفه فيها إن تباطأ فدخلته للبيت عشان يسأله
سعيد يتثاوب : يلا أبوي سمحولي أنا بسير أخمد أشوي قبل الدوام
عارف :مسموح فمان الله
سعيد : سلام
سيف :عارف
عارف : هلا
سيف: خير شو في خاطرك ؟؟؟
عارف : ها ماشي
سيف :عارف هالرمسه مب علي عدني أخوك الصغير وأفتح لي قلبك والا ماشي ثقه ؟؟؟
عارف :أفا عليك محشوم
سيف: يعني في شي ؟؟؟
عارف يتنهد : هي خلها على الله ...
سيف : ياخوك كل مصيبه ولها حل
عارف : والله ما أعرف شو أقولك ،،
سيف: يا ريال ما مبينا هالكلافه خذ راحتك أبدى من وين ما تبا
عارف :اوكي تعال بنتمشى في الموتر
سيف وهو يفتح الباب : يلا
عارف : أخوي مدمن
سيف فاج ثمه :شو ؟؟؟؟؟؟ ؟منو وكيف ؟؟؟
عارف : حمد
سيف: متأكد ؟؟؟
عارف : هي متأكد عشان جذه طلعت من البيت بعد ما ضاربته
سيف: لا يا عارف لا أتصلح الغلط بغلط وانت اذا صدق تبغي أتساعد أخوك وده وحده من هالمصحات عشان يعالجونه وخلك يمه لا أتحسسه أنه منبوذ بسبة اللي سواه كلنا نغلط
عارف : ما أعرف ياسيف وين اوديه ؟؟؟
سيف: ماعليه يا عارف أنا عندي واحد من الشباب تعالج فمصحه بتنشده عنها وبرد عليك خبر بس انت لا أتشيل هم وأي شي تباه أنا حاظر تحت أمرك
عارف : مشكور يا سيف وما قصرت والنعم فيك
سيف: أفا عليك اذا الأخو ما يساعد أخوه منو بيساعده
عارف : ماعليك زود ... أشوفك على خير
سيف: دير بالك على نفسك
عارف : ان شاء الله وسلم على سلطان
سيف بإشمئزاز : ان شاء الله
عارف :ليش حايس بوزك شو ياك ؟؟؟
سيف يتصنع الابتسام : هههه لا ماشي بس جذه
عارف : تمام يلا فمان الله
سيف: وداعة الله ...أتمنى ينال إعجابكم
رد مع اقتباس
مواقع النشر (المفضلة)