من يومين حاس بضيقه ومب عارف سببها يفكر فيها باستمرار متوله عليها ومب قادر يسيطر على مشاعره وأحاسيسه .. أدري أن اللي أسويه غلط ومب من حقي بس والله موبيدي صارلي فتره وأنا على هالحال مب قادر أشيلها من بالي والله حاس بكره لنفسي كيف افكر فيها وأخون ربيعي ..ياربي أنك أتساعدني وترحم حالي والله ما أعرف كيف أتصرف أففف ... تقلب في فراشه فتره طويله بعدها حس بتعب وقرر يطلع من الغرفة عشان ما يزعج محمد اللي وراه نشه من الصبح ولازم يسير بوظبي لأنه ما نقل عدبي ...
يمشي على اطراف أصابعه وهو يسكر الباب حس بحركه في الصاله الصغيره اللي قسم المرحومه أمه .. ما أهتم للحشره طلع الحوي يتمشى يمكن أييه الرقاد وهو يتمشى يسمع شوشرة يايه من نفس المكان هالمره قرر يروح يشوف مصدرها لأن القسم مهجور تقريباً من توفت أمهم وهو عباره عن غرفتها وصاله صغيره تابعه للغرفه ومن توفت بومحمد نقل أغراضه لغرفه الضيوف اللي ملاصقه الميلس ومحد أمتلك الجرأه الكافيه أنه يستخدم غرفة أمهم ...
بدى يميز الأصوات اللي يسمعها كل ما يتقرب من المكان
هزاع :يا حيوان سو اللي تباه بس مب هنه فاهم ...
حمد : هههه أنا حيوان ؟؟؟ أنزين أي نوع
هزاع :حمد والله لو يدري عارف بيذبحك الله يلعنك مالقيت غير حجرتها أتسوي عمايلك السوده فيها
حمد: ياخي أنت ليش مكبر السالفه هي وماتت شو تبا بالحجره وهي في القبر
هزاع اللي نفذ صبره ودز أخوه بكل قوته وخلاه يرتطم باليدار وييلس على الأرض من قوة الضربه ..
عارف مصدوم من اللي يشوفه ...هزاع الملتزم يسب ويلعن ؟؟؟!!!! أكيد في شي مب هين صاير
أول ما فتح الليت شاف حمد في غير وعيه يبتسم ويضحك ويتكلم ببلاده ولامبالاه صد على هزاع اللي الخوف مسيطر عليه يبي يستفسر منه عن حال أخوه بس النظره اللي فعيونه جاوبته على أسئلته من دون لايسأل تقرب من حمد وحط أيده عجتوفه يبي يرفعه عشان يوقف عريوله ..
عارف :حمد شو فيك ؟؟؟
حمد يبطل عيونه ويسكرها بطريقه غبيه : منو ؟؟؟
عارف :حمد : قم نش أوقف ورمسني شرا الرياييل شو أتسوون هني أنت وهو
هزاع يحاول يستر عليه :ماشي عارف هو قام يمشي فرقاده وصل لهني أنا باخذه وبنروح حجرتنا الحين
عارف يمنع هزاع أنه يوصل لخوه : خله بينش روحه ...حمد يلا قم سر غرفتك
حمد يتساند على اليدار ويتمسك فيه عشان يمشي : ههه طبعاً بسير غرفتي عيل بسير غرفتك
عارف : حمد أنت صاحي ؟؟؟
حمد: لا حاصي ههههه
عارف يتقرب منه ويمسكه من كم كندورته وأول ما تقرب منه شم ريحة خايسه عنده : أنت شو ماخذ؟؟؟ على طول لف على هزاع ... شو ماخذ هالحيوان ؟؟؟
هزاع يحاول يفج حمد : ماشي أنت خله عنك أنا بوديه
عارف يتصبب عرق : هزاع لا تجذب علي هذا شو مسوي شو ماخذ ؟؟؟ أرمس لا أدفنك وياه هني فهالبقعه
هزاع : عارف انت خله الحين والصباح رباح
حمد :هههه ااااااااااااااااااااااااي حلوه هاي منو رباح ؟؟؟ ليكون بنت صباح
عارف بعده ماسكنه من كم الكندوره وسحبه لين وقف ودرزه بكل قوته على اليدار ومن قوة الضربه بدى الدم يسيل من خشم حمد ... يا حيوان شو ماخذ الله ياخذك بدى يضربه بوحشيه وقهر أنت شو جنسك ما أتحس يالحقير نحن بشو قصرنا بحقك والا تربيتك عشان تاخذ هالسم ؟؟ تبي أتموت أنا اللي بذبحك ليش متعب عمرك وتاخذ هالسم ... كله من ربعك اللوث لكن أنا اللي بربيك بخليك أتعرف منو عارف
هزاع تفادياً لأي خساير في الأرواح ركض لغرفة محمد يوعيه عشان يساعده ...
محمد وهو يفرك عيونه : عروف ودره بتذبحه ,,,قم عنه
عارف :خلني بربيه خليني يا محمد
محمد يمسكه من خصره بالقو وطبعاُ لأنه أضخم من عارف قدر يسيطر عليه وهزاع أخذ حمد لغرفتهم وعلى الحشره اللي أستوت نشن البنات
عذيجه : شو فيكم شو صاير ؟؟؟
روضه وحمده عارفين كل اللي صار
محمد: ماصار شي سيروا أرقدوا
عذيجه : روضه ، حمده سيرن أرقدن يلا
روضه وحمده : ان شاء الله
عذيجه وهي تتقرب من عارف : شو فيك ؟؟؟ ليش معادي أخوك يا عارف
عارف وهو يفج عمره عن محمد : سلامتج مافيني شي وهالاخو اللي ترمسين عنه تراه مدمن
عذيجه مصدومه : عارف يوم أتحيد عمرك بتغلط لا ترمس لو سمحت
عارف : أغلط !!! لين متى بتمين أتحايزين عنه يتراوالج أني عدوه .. والله يا أني أذبحه ان شفته جدامي والله
عذيجه : استغفر ربك لا اتحلف
محمد: عارف تعال أيلس
عارف : مب يالس ولا بتم فهالبيت .... طلع وهو معصب بس رجع خذ مفتاح السياره وطلع من دون لا يكلم حد منهم ...
عذيجه وهي شاله فهد تحاول أترقده : محمد
محمد بنظره كسيره : لا يا عذيجه لا أتحاتين حمد أخويه وأنا مسؤل منه والوالد مافيه شده على تحمل هالمسؤليه أوعدج أني أرده حمد القبلي وأخير
عذيجه تمسح دموعها اللي خرست ويه ولدها : بس ليش ؟؟؟ ومن متى ؟؟؟ أنا مستغربه حمد العاقل يسوي جذه وهو أكثر واحد عارف عواقب هالشيء ... تعتقد وفاة " حست بحرقه وغصه منعتها تكمل اللي بدته "
محمد بتفهم :ماعليج يا أم فهد أنتي لا أتحاتين ان شاء الله ما عليه شر
عذيجه :يا ربي تلطف بنا وترحمنا برحمتك أبوي لو درى ما أدري شو بيصير عليه
محمد: ألحين هو مب شاغل باله غيرج
عذيجه باستفهام: أنا؟؟؟!!!!
محمد: عذيجه مبارك كلم أبويه ماأدري وين أو كيف بس اللي عرفته منه أنه وايد متضايق ومب قادر يواجهج باللي في خاطره .. عذيجه وغلاة المرحومه ترجعين لبيت ريلج
عذيجه دموعها تنزل بغزاره : برجع له يا محمد والله برجع بس أبي أشوي أحس أنكم تقدرون أتدبرون عماركم من دوني ,, البنات ما أقدر أخليهن ألحين خصه روضه أنت ما تدري أشكثر شاله في خاطرها وماترمس ليومك هذا ما تقرب من حجرة المرحومه أحسبها كابته حزنها عليها للحين وهالشي مب زين
محمد: روضه خليها علي أنا بتصرف وياها المهم أنتي
عذيجه : لا أتحاتي باجر برجع بيتي بس عندي شرط
محمد: ومن الحين أقولج موافق على شروطج كلها
عذيجه : أبي أرجع بيتي بس ماأبي أشوفها
محمد: ان شاء الله الحين بدق له يكون لين الصبح تدبر أمر سكنها بعيد عنج وعن بيتج
عذيجه : خلاص عيل "فهد حاله حال المواليد اليدد يعني الليل عندهم نهار والعكس صحيح " وأنت ليش تناغي
محمد: مستانس بيشوف أبوه
عذيجه :ههه الله والأبو !!!! اللي يسمع ماجنه هذا هو الأبو اللي ما فيه صبر يشوف ولده وتزوج على أمه
محمد: عذيجه شو هالرمسه الله يهداج أنا خبري فيج وايد أعقل من جذه
عذيجه: بذمتك !!!
محمد: هههههههههه لا مافيني آخذ الذنب بس تدرين أنا ما كنت قريب من أي واحد فيكم
عذيجه: أدري وايد كان ودي أقولك هالرمسه بس كنت أخاف من ردة فعلك عشان جذه كله كنت أتجنبك
محمد: بس الحين غير أوعدج أكون لكم الأم والأبو ولا أقصر عليكم بشيء
عذيجه: الله يخليك لنا ويديمك ذخر ,,, محمد
محمد : لبيه
عذيجه: لبيت حاي قول آمين
محمد: آمين ،،، خير شو بغيتي ؟؟؟
عذيجه: أتعرف شو آخر أمنيات أميه ؟؟؟
محمد يعقد حواجبه : شو ؟؟؟
عذيجه : أتعرس وتستقر
محمد يبعد نظره عنها ويركز جهة الباب : ويتراوالج اللي مثلي يحق له ؟؟؟
عذيجه وهي تناوله فهد: ليش لا يا أخوي أنت مب قاصرنك شي وكل بنت تتمناك
محمد يحس كأنه أنطعن فقلبه ... يحس بمرارة رفضه آخر مره تقدم فيها لبنت يرانهم ورفضوه بسبة سالفة أبوه
حلو الواحد يتمنى ويحلم بس بحدود الخيال لا أكثر أنا شو اللي سويته والا بشو أخطيت عشان آخذ ذنب غيري لا شو ذنب غيري أبوي بريء وأنا أكثر واحد عارف هالشيء ,,الظاهر الغلط فيني لأني للحين أحمل أبويه مسؤليه العيشه اللي نحن عايشينها .. لازم أبدى بنفسي وأغير من نفسي عشان أقدر أغير الغير وطريقة تفكيرهم
عذيجه : محمد !!!!
محمد انتبه لها : هلا
عذيجه : وين وصلت ؟؟؟
محمد: الحدود
عذيجه : وبعدين ؟؟
محمد: ماشي لحقتي عليه قبل لا أدخل بلاد ثانيه ما تقدرون أتطالبون فيني فيها
عذيجه : ههه الحمدلله والشكر اللهم سكنهم في مساكنهم "أتوجه كلامها لفهد" الظاهر خالك استلبس علينا
محمد: هههه الله يسامحج ,,, طع الهرم يضحك عليه
عذيجه : محمد لا أتغير الموضوع شو قلت؟؟؟
محمد : شو شو قلت منو هاي اللي تباني صدقيني بنرفض وبنجرح مره ثانيه وأنا ما عاد فيني قدرة أتحمل
عذيجه : وان يبت لك وحده بترضى فيك من دون شروط
محمد والانتباه بان عليه : صدق ؟؟؟
عذيجه : صدق يا محمد كفايه حزن كفايه ألم وجراح خلونا نستانس أشوي خلونا أنريح المرحومه فقبرها طول عمرها تتمنى أتشوفك معرس وأتشوف عيالك ....
محمد: صدقج يا أختي أحس الفرح غير دربه عن دروبنا و البسمه علينا بالحسره
عذيجه : خلاص بإذن الله بيعود لنا ولا بيفارقنا بس محمد دخيلك لا تتخلى عن حمد ساعده سو أي شي بس رده عن اللي هو فيه وعارف
محمد يقاطعها: ماعليج من عارف الحين بيرجع وحمد خليه عليه بوديه مصحه يتعالج فيها من الادمان خلي كل شي عليه وأنتي ريحي بالج وحاولي تسترجعين ريلج وترجعين حياتج مثل ما كانت
عذيجه: ان شاء الله ...
محمد: خلاص عيل يلا شلي ولدج وسيروا أرقدوا
عذيجه : ان شاء الله ,,, تصبح على خير
محمد وهو يطبع يبوس راسها : وأنتي من أهل الخير
عذيجه حست بشعور غريب حست بالأمان والطمأنينه لوجود أخوها يمها وما قدرت أتعبر عن فرحتها باللي تحس به الا بدموع أحترمها محمد ولا حاول يزعجها بعد ما حست براحه شلت راسها عن صدره وخذت ولدها ودخلت غرفتها تدعي ربها يسهل عليها ويساعدها تتخطى اللي هي فيه من حزن وألم على حياتها الزوجيه ..
رد مع اقتباس
مواقع النشر (المفضلة)