فبيت خليفه
سالم : سهول يلا أففف تأخرنا
سهيل : أنزين ياي صبرأشوي
سالم :أففف أنا الغلطان أصلا ليش ترييتك لو رحت عنك جان زين
ميثا : أشو فيك على أخوك عنبو مافيك ذرة صبر؟؟؟
سالم : فيني صبر بس الإمام مابيتريا ولدج عشان يقيم الصلاه
ميثا : وأنت عوذ بالله من لسانك لكل شي عندك جواب
سالم :طالع عليج شو أسوي
ميثا : جان زين طالع علي ،،، الا أنت طالع على عمك
سالم وهو ساير صوب الباب ويزاعج على سهيل : سهيل بترياك ف السياره
سهيل : خلاص أنا خلصت يلا مع السلامه أمايه
ميثا :الله وياكم
خليفه وهو نازل مستعيل : سهيل صبر بروح وياكم ... ولف على ميثا ... أشعنه ما وعيتيني خليتيني راقد جان طافت علي صلاة اليمعه
ميثا مرتبكه :ها أنت هني ما كنت أدري والله
خليفه :طبعاً ما تدري أكيد توج واصله البيت لكن ما عليه حسابج بعدين ,,, وطلع عنها
,,,,,,,
بيت مزنه ... العين
مزنه : فاضل ليش أتسوي جذه ليش ؟؟؟
فاضل: خلاص أنا سويت اللي عليه والباقي عليه هو وضميره
مزنه :الله يسامحك يا أخوي الله يسامحك
فاضل: ماعليه باجر بتشكريني على اللي سويته لج
مزنه : لاحول ولا قوة الا بالله ..
فاضل : وين عبدالله ؟؟
مزنه :ما أدري عنه كان يلعب هني من شوي ...
فاضل : بسرأشوفه
مزنه :برايك أنا بسيرأشوف الغدى وبرجع
فاضل : وين سايره يلسي الله يهداج الغدى البشكاره بتجابله
مزنه :هه فاضل أنا أقدر لا أتحاتيني
فاضل طلع للحوي وشاف عبدالله يلعب في التراب اللي صوب الباب وأول ما شاف خاله ركض عشان ما ينازعه لأنه موسخ ثيابه والدنيا اللي حوله وهو يركض فجأه صرخ وطاح مكانه
فاضل : عبدالله شو فيك ؟؟؟ تجدم منه وعبدالله يصيح ويصارخ ويأشر على أريوله
عبدالله :آي يعور
فاضل رفع أريوله وشاف الدم يتدفق بغزاره فصخ غتره ولف ريوله بها وشله على طول المستشفى
مزنه طلعت للحوي على صريخ عبدالله بس يوم وصلت مالقت حد وخبرتها البشكاره أنه ريل عبدالله كانت أتصب دم بشكل غزير ... تمت أتصيح خايفه على ولدها ماتدري شو صار له ...
راحت عند التلفون وبأصابع مرتجفه دقت عليه ... مره يرن ويرن ويرن ولاحياة لمن تنادي
مره ثانيه نفس الشي حاولت أكثر من ثلاث مرات لكن نفس الشي ماشي فايده ...
حاولت تتصل بفاضل نفس الشي ... ما يرد لأنه ناسي تلفونه عندها في البيت ...
تمت على أعصابها تترياهم عند باب الحوي ..
,,,,,,,,,
بعد ما طلع من المسيد يتمشى ويا أخوانه وأبوه صوب البيت
بوسلطان :هههههه سيف حشا ما يسوى علينا جيه أمك ما خبرتك أمس ؟؟؟
سيف: لا يا أبويه ما قالت لي
سعيد :هههه مسكين وهو متحرقص من أمس أنا أتحراك تدري
سلطان : وطبعا أنت تدري بس ما خبرته
سيف : يالهرم والله أنك نذل أشعنه ما أتخبرني
سعيد : حد قالك ما تسأل ؟؟؟
سلطان : ههههههه أنزين ألحين متى الملجه ؟؟؟
بوسلطان : والله البنت ما قالت متى والحين بنشاور الولد بنشوفه متى يباها
سعيد : أكيد اليوم
سيف: جي شو قالو لك سعيد
سلطان :هههههههههه أنت بلاك مشتط
بوسلطان : هذا جنه الا حميد
سلطان : هي هاي سيارته ,,, تجدموا منه وسلموا عليه ودخلو البيت
وعد كانت عند باب الصاله لأنه أبوها خبرها أنه عند الباب فيت تستقبله ..
الكل : السلام عليكم ورحمة الله وبركاته
وعد : وعليكم السلام والرحمه تقبل الله
الكل : منا ومنكم صالح الأعمال ..
وعد تقربت من أبوها أتسلم عليه : أشحالك باباتي
حميد : بخير الله يسلمج ...مبروك
وعد : الله يبارك فحياتك ... سلطان تلفونك رن مليون مره نفس الرقم
سلطان وهو يتناول التلفون من أيدها : ول الخييييييييبه سبعه مس كول منو داق هالكثر أول ما شاف الرقم تغيرت ملامحه والكل لاحظ أرتباكه ...
بوسلطان : خير يا أبويه شو ياك ؟؟؟ منو داق عليك ؟؟؟
سلطان :ها لا ماشي هذا فاضل ما أدري شو يبا
بوسلطان : دق له وشوف شو يبا لا تتحير بنترياك في الميلس عشان نتغدى ضربه
سلطان :ان شا ءالله
... بعد ما راحوا كلهم
وعد :سلطان شو فيك ليش جي شكلك مرتبك ؟؟؟؟
سلطان : أنا مرتبك ؟!!! لا بس مستغرب شو يبا فاضل
وعد : أنزين دق عليه وشوفه شو يبا
سلطان : بعد الغدى
وعد :سلطوني صح ما يخصني بس أحس الموضوع جايد لأنه كان يتصل ويخلي التلفون يرن لين يقطع روحه
سلطان وهو ساير صوب السياره خلاص برايج بدق له وبرجع
وعد :يعني لا زم أتدق له من السياره ؟؟؟
سلطان :لا يالهبله بس أكيد يبا يسألني عن شغله والأوراق اللي يبا يسأل عنها في السياره
وعد : أنزين هبله حرمتك لا تغلط علي
سلطان :فديت حرمتي الهبله ... يلا حبيبي روحي داخل عن الشمس
وعد :ان شاء الله ...
بخطوات سريعه تجاوز المسافه الي تفصله عن سيارته ووعد أتراقبه من عند باب الصاله
ياترى شو هالشي اللي يخليه مستعيل ومرتبك فنفس الوقت ؟؟؟
سلطان وصل سكر الباب وعلى طول ضغط اعادة اتصال على نفس الرقم
بصوت مرتبك ردت : ألو
سلطان : السلام عليكم خير مزنه شو صاير؟؟؟ شو فيكم ؟؟؟
مزنه اللي حست أنه الروح ردت لها من سمعت حسه : سلطان عبدالله
سلطان بخوف : شو فيه ... شو فيه عبدالله ؟؟؟
مزنه : ما أدري الخدامه تقول تعور وشله فاضل المستشفى أتصل به بس مايرد علي أنا خايفه يا سلطان دخيلك ألحق علي .. وخلاص بدت تشهق من كثر الصياح وصار كلامها مش مفهوم
سلطان :مزنه لا أتخافين ان شاء الله ماعليه شر أنا الحين بييكم
مزنه : لا بس أنا كنت خايفه ما عرفت شو أسوي غيرأتصل بك
سلطان :ماعليج دقايق وبكون عندكم ... وهو يرمسها شغل السياره وطلع من البيت ساير صوب العين
بعد ما سكر عنها كان يسوق بسرعه صاروخيه يوم أتصلت وعد
وعد :سلطان وين رحت ؟؟؟
سلطان :ها أو سوري حبيبي نسيت أخبرج بروح العين
وعد : العين !!! الحين ؟؟ أنت ما تغديت بعدين ليش جي مسرع ؟؟؟
سلطان :بعدين بخبرج المهم استسمحي لي من أبويه وأبوج أوكي
وعد : ما يخصني ما أبي عنبو أنت خفف السرعه قبل سلطان حرام عليك وايد مسرع
سلطان : لا أتخافين حياتي والله الشارع فاضي وأنا أبي أوصل بسرعه
وعد: أنزين ما عليه بس لا تسرع عشان خاطري
سلطان وهو يخفف السرعه تحت الـ 120 : عشان خاطرج بس والله ها جي أوكي
وعد: هي أوكي بس لا تسرع أول ما أسكر ترا أعرف حركاتك
سلطان يضحك بتوتر : ههه ان شا ءالله يلا مع السلامه
وعد: الله يحفظك وأول ما توصل العين طمني أوكي
سلطان : حاضر
،،،،،،
بعد ما رجعوا من الصلاه أتلموا كلهم عشان يتغدون رباعه ....
سالم : أبويه طلبتك قول تم
خليفه :تم اذا أقدر عليه بس
سالم : لا أتحاتي طبعاً تقدر ... الله يسلمك ويطولي بعمرك
سهيل :لا أتقردن وايد عن تغص باللقمه
عنود ونجود : ههههههههههههه
سالم : جب أنته
خليفه :عيب يا عيال شو ما أتحشون حد أنتوا
سهيل : السموحه منك أبويه
سالم :الوالد بغيت أسير بيت أبويه مانع
خليفه : أنزين وشو اللي مانعك ؟؟؟ الدريول موجود
سالم : صح موجود بس أنا أبي أبات عندهم اليوم
خليفه :والمدرسه ؟؟؟!!!
سالم : عادي بروح من بيتهم عمي سيف بيوصلني
خليفه :اذا جي ما عندي مانع
سهيل : أنا بعد بروح وياك
سالم : أفف أنت لازم أتقلد ؟؟؟
سهيل : ما أقلد من زمان ما شفتهم ولهت عليهم
ميثا : ماشاء الله أشوفكم أتقررون وعلى كيفكم ولا جني موجوده
خليفه ألتفت لها والشرر يتطاير من عينه : خير ميثا على شوأعتراضج ؟؟؟
ميثا : خليفه لا أتعاملني بهالطريقه جدام عيالك هم روحهم ما يسوولي أعتبار
خليفه :ميثا ما صار شي يبون يباتون بيت يدهم برايهم البيت يوسعهم
ميثا : بس باجر أول يوم دراسه يعني لازم يطلعون من البيت
خليفه :وليش أنتي ناويه أتنشين من الصبح وتتطمنين عليهم ؟؟؟ ؟؟؟!!!!!
ميثا : حتى لو ما نشيت يعني مب حلوه
سالم :أففف أنا خلصت سهيل بترياك في الميلس بنعلب سوني أوكي
سهيل : أنا بعد خلصت بغسل أيدي وبلحقك
ميثا :أنتوا ما تستحون ولا أتخيلون عنبو أنا ماخلصت رمستي كيف أتنشون جذه ؟؟؟ شو هالمذهب اللي فيكم!!!
خليفه : ميثا كلميني أنا وخلي عنج العيال ...
ميثا :ليش أنا مب أمهم والا مالي حق عليهم ... حملت بهم تسع شهور وتعبت عليهم وشقيت وياهم وبالأخير أطلع مالي لزمه
خليفه : محد قال جذه بس أنتي مسويه سالفه من شي ما يسوى
ميثا : طبعا أي شي أنا أقوله أو أسويه عندك مايسوى شي ما أدري شو يعيبك
خليفه :أنا يعيبني حرمتي أتكون موجوده يوم الجمعه الصبح وأتنششني لصلاة الظهر مب هايته عني ولا تدري باللي يصير فبيتها
نجود وعنود : بابا نحنا خلصنا أنروح ؟؟؟
خليفه :روحوا برايكم
ميثا : خليفه أنت ملاحظ أنك وايد مستخف بي ؟؟؟
خليفه :ميثا أنا مصدع دخيلج فكيني من الصدعه وحلي عن سماي ... نش عنها وراح حجرته ...
ميثا يالسه فمكانها مصعوقه من اللي أتشوفه محد يبي يكون وياها أو قربها ألتفتت حولها ما شافت غير غيث يلعب بالكره وبس ...
ترقبوا الجزء الـ 15 قريباً جداًاحتمال اليوم بعد المغرب لأنه تقريباًFINISHED
رد مع اقتباس
مواقع النشر (المفضلة)