دخلو غرفة سهيل لأنها الوحيده المرتبه وكانت موزه تتجهز فيها .....
وصلوا بعد صلاة المغرب بشوي دخلو يصلون وبعد ما خلصن بدو المعازيم بالتوافد بما أنه المعرس من العين فحبوا يخلصون الملجه بسرعه عشان اللي بيرد العين ما يتحير الفليل .... تعشوا الحريم والملجه كانت روعه
وأول ما خلصوا عشا دخلو العروس ... موزه كانت لابسه فستان أزرق غامج ومطرز باللون الفضي ... نازله من أطرافه سلاسل فضيه ومكياجها هادي ومتناسب ويا ويها البيضاوي ... أما الشعر اللي يوصل للركب رافعتنه بشكل خصل ملتويه لنص الظهر ... دخلت على موسيقى هاديه ورومانسيه وكل الأنظار متجهه صوبها
مشت والابتسامه مرسومه على شفاتها ...مرتبكه ومستحيه أشوي بس ما بان عليها الارتباك .... وصلت للكوشه ويلست وين ربيعاتها يسلمن عليها ويباركن لها واللي ترقص واللي تحش والي مرتبشه واللي اللي .. بعد نص ساعه تقريباً أعلنو عن وصول المعرس ...
دخل منصور ويا أبوه وسهيل وعبدالرحمن هاي كانت أول مره لمنصوريشوفها أول ما وصل عند الكوشه تم مبهت يتطالعها واللي رحمها الطرحه الخفيفه الي حاطتنها على ويها المحمر ... شل الطرحه عنها وباسها على راسها وهمس بكلمه مبروك في أذنها ... لبسوها الشبكه والكل أستانس والساعه 11 أنفضوا الناس من الحوي وكلن سار بيته ...
طبعاً منصور فضل أنه يتركونهم روحم عشان يقدر ياخذ راحته وياها ويتعرفون على بعض أكثر ....
منصور وهو يسكر الباب : مبروك عليج أنا
موزه متسحيه "وفي خاطرها والله خقاق " : الله يبارك فحياتك
منصور يسوي عمره ماسمع : خير شو قلتي ؟؟؟
موزه : قلت الله يبارك فحياتك
منصور : وياج يا رب ... ممم شوأخبارج
موزه: الحمدلله بخير
مبارك : أنا بعد بخير وعافيه وصحه وسلامه وووكل شي زين
موزه تضحك ونزلت راسها
منصور جابلها ورفع راسها وهاي الحركه خلت موزه تتجمد وفجت عيونها على الآخر
منصور : باسم الله بلاج ما باكلج أنا بس كنت أبي أشوف ويهج من دخلتي وأنتي منزله راسج أبي أتأكد أنهم ما غشوني يمكن تكونين شلقا والا حولا والا فيج شي
موزه هني ضحكت من خاطرها على أستهباله
منصور : ماشاء الله علي أصلح أبعد التوتر وأغير الجو .... السموحه منج بس بغيتج تتعودين عليه وما أتخيلين مني ترا لساني طويل ووايد أحرج الناس تحمليني شوي
موزه : ما أحب حد يحرجني
منصور: أقطع راسه الله يفكر مجرد التفكيرأنه يحرجج
موزه : وياترى الكلام ينطبق عليك أنت بعد ؟؟؟
منصور: ههههههه أنا أولهم .... أنا وايد مستانس وحاس أنه أنتي هي الأنسانه الي كنت أتمنى أقضي كل عمري وياها ...
موزه : الحمدلله
منصور بتردد : موزه ما ودج أتعرفين ليش طلقت حرمتي الأوليه ؟؟؟
موزه : على راحتك اذا تبي أتقول ،، لأنه شي ماضي وأنتهى وعلى حسب اللي سمعته لأنها مسويه عمل لأمك صح ؟؟
منصور: أمم م الصراحه لا ،، ولأنج حرمتي ومتأكد الرمسه ما بتطلع من بينا بخبرج بالسبب الحقيقي
موزه : كان عندي أحساس أنه مش السبب الحقيقي
منصور :الله يسلمج أكتشفت أنها على علاقة بواحد وماودرته حتى بعد ما ملجت وأنا مستحيل أرضى بهالشي أو أعرف عنه وأسكت فطلقتها حتى أمي ماتدري شو السبب لأنه طلقتها في الفتره اللي كانت فيها وايد مريضه وحد من المطاوعه خبرها أنه وحده مسويه لها عمل فأنا أستغليت هالشي لصالحي وخبرت أمايه أنه حرمتي هي الي مسويه العمل وأقتنعت فأنتشرت السالفه ...
موزه : أها ,, بس ليش ما خبرت أمك بالسبب الحقيقي ؟؟؟
منصور :ما كان ودي أفضحها وأسبب لها مشاكل خصوصاً أنه أهلها ناس محترمين وملتزمين يعني تدرين شو ممكن يصير وبعدين مستقبلها بيتدمر أنا أهم شي عندي أنها أعترفت لي
موزه : حلو
منصور : منو أنا ؟؟؟ مشكوره بس الصراحه أنتي وايد أحلى وخصوصاً اليوم ما شفتيني كيف بهتت من شفتج
موزه وهي تتطالع ساعتها : هههههه الاعتراف بالحق فضيله
منصور : والنغزه وصلت .... ههههههه
موزه :لا والله مب قصدي
منصور :أدري بس أسولف وياج خلاص برايج أنا بترخص الحين عشان أتروحين ترتاحين أدري بسوالفكن أكيد من الصبح حاطه روب على ويهج ويا قطعتين خيار على عيونج وبعدها ماأدري شو صابغه ويهج ياحبكن حق هالسوالف
موزه: ههههههههههه وأنت من وين عندك هالعلوم .؟؟؟ظ
منصور :بعد نحن أنعرف كل حركاتكن
موزه :هههههههه الله يستر بس
منصور وهو يتطالع الكوميدينو : هذا تلفونج ؟؟؟
موزه :هي
تجدم منه وخذاه : مممم كم رقمج ؟؟؟
موزه : ها
منصور : كم رقمج
موزه متردده : مب حافظتنه
منصور فاج حلجه : معقوله
موزه :هههه والله لأني ما أستخدمه وايد
منصور : من اليوم بتستخدمينه ووووووووووووووووووووووايد .... ودق رقمه وسيفه باسم حبيبي وأتصل على تلفونه عشان يحفظ الرقم وقرب التلفون منها : شو رايج ؟؟؟
موزه مرتبكه : ها هي أوكي
منصور : هههه أحرجتج عادي أدري أنا وايد أهذرب ومن نص ساعه قايل بترخص بس ألحين صدق بترخص تامريني بشي ؟؟؟
موزه :ما يامر عليك عدو... بس الله الله بالدرب وعن السرعه الزايده
منصور :ان شاء الله من عيوني يا عيوني يلا تصبحين على خير
موزه : و أنت من أهل الخير
أول ما طلع عنها كانت الساعه 12 الا ربع يعني كل الوقت اللي تم وياها فيه 45 دقيقه بس تقدرون أتقولون أنه ملك قلبها ووايد أرتاحت له وحمدت ربها أنه الله رزقها بواحد مثله طيب وحبوب ومفرفش ...
بهالوقت فبيت بومحمد وفي غرفة هزاع وحمد تحديداً
هزاع :حمد أنت ليش أتسوي جي ليش ؟؟؟؟
حمد : هزاع أنت ما يخصك بشي ولا تتدخل بشي ما يخصك
هزاع : يا حمد أنت أخوي وأخاف عليك
حمد : أنا مب ياهل
هزاع : بس هاييل بيورطونك
حمد :أنت أشلك أنا اللي بتورط وبعدين أنا مب ياهل أعرف أدبر نفسي
هزاع : يعني أنت شايف أنه الدواخه بتخليك أتصير ريال ؟؟؟
حمد :أنا ريال غصبن عنك واذا أدوخ فبكيفي فاهم ...
هزاع : حمد أبتعد عن هالشله الفاسده والله بتندم
حمد :لا أتهدد أنا ما بندم ولا بخاف من رمستك
هزاع : لا أتخاف مني خاف من ربك
حمد : أففف بتخليني أرقد والا أطلع أرقد في الصاله ؟؟؟
هزاع : الله يهديك ...
******
فغرفة حمده وروضه
حمده :أنتي شو أتقولين ؟؟؟؟ مستحيل
روضه : والله حمدوه أنا شفته بعيني
حمده :متأكده
روضه : مليون بالميه .... حمدوه أنا مب ياهل وما أفتهم صدقيني شفته يطلع لفافه صغيره وقربها من خشمه وبعدين ما أدري حسيت به مثل المدوخ يعني ما أدري كيف
حمده : يا ربي أرحمنا برحمتك معقوله حمد يسوي جذه وليش؟؟؟؟
روضه : شورايج أنخبر عذيجه عشان تتصرف
حمده : لا روضوه بتستوي مشكله كبيره
روضه : بس نحن ما نقدرنسكت عنه تستوي مشكله كبيره والا يروح من أيدنا ونحن نتطمش ؟؟؟
حمده : ما أدري خلينا أنخبر هزاع قبل يمكن يقدر يتصرف هو
روضه : ههه والله أتنكتين من متى حمد يخاف من هزاع أو يسمع له ؟؟ ما ينفع لازم أنخبر عذيجه والا أقولج بخبر عارف
حمده :لالالالا عارف لا تبينه يذبحه ؟؟؟
روضه : شوأنسوي حمدوه كفايه اللي صار لأمي
حمده: خلاص أنتي أرقدي أنا بتصرف
روضه : وين بييني الرقاد وأنا من أغمض عيوني أشوفه جدامي
حمده : رواضي أرقدي وأنسي الموضوع أنا بكلم عذوج باجر ...
روضه : بحاول ... تصبحين على خير .
حمده : وأنتي من أهله ...
تظاهروا بالرقاد لكن ولاو حده منهن قدرت أتغمض عينها وترقد مرتاحة البال اذا الكلام اللي أتقوله روضه صح معناتها بداية مأساه يديده لعايله جروحها ما تشافت من وفاة الأم ,,, الله يستر من اللي ياي ...
*******
خليفه : كنت فـ بيت بوسهيل عم وعد مثل ما أتعرفين اليوم ملجة بنته ولازم أشاركهم فرحتهم
ميثا : عاد اللي يسمع ماخذه واحد من الأمراء الا واحد حافي منتف ومطلق
خليفه :أنتي هي شو أتقولين ؟؟؟؟ أعوذ بالله من لسانج اذا مارحتي أتباركين لهم وأتشاركينهم في أفراحهم على الأقل لا ترمسين عنهم رمسة مثل السم ... لاحول الله أنتي أنسانه حسوده وحقوده لأبعد الحدود
ميثا : والله أنا كانت عندي عزومه أهم وأرقى
خليفه :ههه خليج ويا الرقي بنشوف وين بيوصلج ليتج بس تتعلمين أتكونين راقيه بتصرفاتج وألفاظج
ميثا : خليفه أنت شو مشكلتك أشفيك منقلب علي مره وحده ؟؟؟
خليفه :تسأليني أنا ؟؟!!!! والله أمرج عجيب أقول خلني أرقد أخير لي ...
ميثا :وأنت بس هاللي فالح فيه
خليفه لف عنها الصوب الثاني ورقد وهي تمت تتحرطم روحها ...
رد مع اقتباس
مواقع النشر (المفضلة)