أموت أنا في حبهم

[الجنيه]

المغرب في بيت بومحمد



مبارك : بخير الله يسلمك أشحالك أنت وشو أخباركم عساكم مرتاحين

عارف : الحمدلله ما نشكي باس

مبارك : أنزين ممكن يالنسيب أشوف أم فهد ؟؟

عارف : لا مب ممكن

حمد "مالت عليك " : عذيجه نايمه

هزاع : لا توها ناشه

حمد : وأنت ما أتعرف تسكت لازم تتفلسف

هزاع :حمود عيب ها ريلها

حمد: أمحق ريل

مبارك : يلا عيل برجعلكم بعد أشوي

حمد :هي أنت وين ساير صبر خل أسويلك درب

عارف معصب :حمد

حمد : شو ؟؟؟؟؟؟!!!!!!!!!!!!!!!! البنات عندها ما يدرن أنه هني بسير أخبرهن

عارف : أيلس مكانك أنا مخبرنهن من أشوي يلا مبارك حياك

مبارك : الله يحييك



يالسه مجابله الدريشه المطله على الشارع أتشوف الصغاريه اللي يلعبون تتخيل ولدها يوم يستوي كبرهم .. سمعت الباب يندق وتوها بتنش الا ينفتح الباب ويدخل مبارك ... عارف خلاهم على راحتهم وودر مبارك عند الباب ورجع الميلس .....

دخل يمشي بخطوات بطيئه لين وصل عندها ... عظم الله أجركم

عذيجه : أجرنا وأجركم ان شا ءالله

مبارك : أشحالج ؟؟؟

عذيجه : عايشه

مبارك :الحمدلله ,,, الحمدلله على سلامتج يا أم فهد

عذيجه :الله يسلمك

مبارك : يعني وايد بتمين عاطتني ظهرج ؟؟؟ شو ما ولهتي علي ؟؟؟!!!

عذيجه : ليش ما شبعت من وله الي ما تتسمى عليك ؟؟؟

مبارك :عذيجه ,,, بس عاد كفايه اللي صار

عذيجه : كفايه أنا والا أنت ؟؟؟؟

مبارك : أنتي ليش ماخذه مني هالموقف المعادي عذيجه أنا ما سويت شي يغضب رب العالمين وأنتي تدرين أنه الشرع حللنا أربع ومب عيب أني أتزوج عليج العيب أنا أتزوج بالسر وأخليج بأحلامج ولا تدرين بشي ..

عذيجه :هههه عذر أقبح من ذنب ,, خبرني أنا شو ناقصني والا أنا بشو مقصره فحقك عشان أتسوي جذه .؟؟؟ مبارك نحن تونا الا مكملين سنه وأنت تزوجت علي أنت باعتقادك أنا ما أنجرحت ولا حسيت بالإهانه كل اللي سمع قال نفس الكلام أكيد حرمته فيها عيب عشان جذه تزوج عليها ... شو عيبي يا مبارك ممكن أعرف ؟؟؟ أنت حتى ما أحترمت اللي في بطني وكونك على ويه حياه يديده أتشوف ولدك يلعب بحضنك مسرع ما تمللت من أمه ومنه حتى قبل لا ينولد ....

مبارك : أنتي شو أتقولين عذيجه حبيبتي أنا أدري أني قسيت عليج وظلمتج بس صدقيني علاقتي بج ما بتتأثر أبد وأوعدج أني أعدل بينكم ولا أخليج تحسين فيوم أنا تخليت أو لهيت عنج ...

عذيجه : ههه وعودك ما عادت تعني لي شي أنت يا مبارك كسرت بخاطري وقلبي والمكانه اللي كانت لك فيوم مستحيل تسترجعها ... تطمن ولا أتحاتي ما بطلب الطلاق أتعرف ليش .؟؟؟

ما عطته فرصه يرد : لأن هلي تخلو عني وما عندهم استعداد يعيشون بنتهم ويكونون سندها ضد الأيام وضدك ... برجع لبيتي وماعلي منك ولا عاد اتهمني سو اللي تباه ومثل ما أتحب أنا يكفيني ولدي حبيبي بربيه ولا بخليه فيوم يحس بالنقصان ...

مبارك : عذيجه ليش أتقولين جذه أنتي على عيني وراسي وأنتي كل حياتي بس صدقيني اللي صار شي غصبن عني وأنا ما توقعت تزعلين بهالطريقه ... صدقيني بعوضج على كل اللي صار ....

شو رايج أنروح أنشوف فهود

عذيجه : مشكور وما أتقصر شفته العصر وتطمنت عليه ,,, الله وياك

مبارك : أعتبرها طرده ؟؟؟

عذيجه : أعتبرها مثل ما أتحب أنا ما عاد يربطني بك غير فهد وأتمنى ما تتعدى حدودك أكثر

مبارك مصدوم :عذيجه أنتي كيف تنسين الحب اللي مبينا وتنهين علاقتنا بكل سهوله أنتي عارفه شو تطلبين مني ؟؟؟ عذيجه أنتي ناويه تذبحيني صدقيني متلوم فيج ومب عارف كيف أتصرف ؟؟؟ أنزين بشاورج بشي وخبريني اذا يرضيج ... شو رايج أطلقها ؟؟؟

عذيجه : هههه والله أنت ما أتخاف ربك يعني يوم شبعت منها تعلثت أطلقها عشاني ولعلمك أنا ما راح يغير شي سواء طلقتها والا تمت على ذمتك أنا مالي خص فيكم

مبارك قبل لا يرد رن تلفونها وردت عليه وطنشت مبارك اللي أنقهر وير التلفون من ايدها وأغلقه

عذيجه بكل برود : مالك حق تحرجني بهالطريقه ...

مبارك : وأنتي مالج حق تهدمين حياتي بهالطريقه

عذيجه : أنت لو كنت أهمك ما سويت الي سويته وصدقني زاد كرهي لك اليوم أكثر عن قبل يعني بكل وقاحه أتلومني وتتهمني بتحطيم حياتك و أنت كأنك البريء الي أ نظلم ما جنك ظالمني ... والله دنيا

مبارك حس أنه لو وقف دقيقه زياده ممكن يصير شي ما تحمد عقباه طلع ورقع الباب بالقو ....

عذيجه : ردت تتصل بوعد وتستمح منها ..



.......



فبيت عوشه

عوشه وأم سلطان طايحين سوالف عاديه ومخلين مهمه الخطبه للرياييل ....

في غرفة شهد

وعد: أنزين يالعروس بعد شو أخبارج ؟؟؟

شهد : خيبه سويتيني عروس مره وحده بعدني ماوافقت أنزين

وعد: ليش في إمكانية ترفضين ؟؟؟؟

شهد : ههه ليش حد يهمه رايي ؟؟؟!!!!

وعد : شهد محد يقدر يجبرج على الزواج ممكن يغصبونج على اي شي الا الزواج واذا أنتي خايفه أو متردده من وعيد سيف ماعليج منه مستحيل يمس شعره منج أو يضرج بشيء ...

مهره : أنا قلت لها مليون مره بس هي ما تقتنع

شهد : وكيف تبوني أقتنع وأنا للحين كلامه يدور فبالي مانسيت

وعد: شهد أنا كلمته اليوم العصر وسألته اذا كان يباج من خاطره أو عناد بس صدقيني هو يباج ومقتنع فيج يعني ما له داعي الخوف توكلي على الله صلي استخاره وشوفي اللي يريحج ... أنا بعطيج رقمي اذا أنتي ما تبينه وخايفه يجبرونج أتصلي فيني وخلي الموضوع عليه مستحيل عمي مانع يسمح لأبوج أيوزج غصب ...

شهد بابتسامه رضى : مشكووووووووووووووووره

وعد نزلت راسها بشكل مش طبيعي

مهره تقربت منها : وعد شو فيج ؟؟؟؟

وعد أتحاول تتكلم أتحرك شفايفها بس الكلام ما يضهر منها

مهره : وعد شو فيج

وعد" أشرت لها بايدها تبي ماي "

مهره : ان شاء الله ... شهد روحي زقري أم سلطان

شهد ربعت تزقر أم سلطان وأمها

أم سلطان : ربعت عندها .... خيرأمايه شو فيج

وعد بصوت متقطع وأنفاس لاهثه : ما أدري حاسه الدنيا أتدور فيني مب قادره اشوف شي

أم سلطان :باسم الله الرحمن الرحيم ... وخذت الماي تقربه من ثمها عشان تشرب

وعد حاولت تشرب أشويه بس حست بلوعه دزت الكاس

أم سلطان : أشوه فيج يا بنتي ؟؟؟ حاسه بلوعه ؟؟؟؟

وعد هزت راسها

أم سلطان وعوشه تبادلن نظرات ذات مغزى ونشن يباركن لها

أم سلطان وعيونها تدمع من الفرح لوت عليها :مبروك يا أم حارب

عوشه : بالمبارك بالمبارك يا أم حارب

وعد مصدومه وفرحانه : شو ؟؟ كيف ؟؟؟

أم سلطان : وابوي عليج أشوه بعد شو تراج حامل ياأميه مبروك

وعد: كيف عرفتي عموه ؟؟؟

عوشه : دوك أنتوا أشو بعد كيف عرفتوا نحن ياأمايه من أنشوف الحرمه أنخبرج اذا حامل والا لا

وعد وهي تضحك مستحيه ما أتعرف شو الفروض أتسويه في مثل هالموقف أكتفت بأنها تبتسم وأتنزل راسها

عوشه نشت أتيبب : كلللووووووووووووووووووووو ش

أم سلطان طايره من الفرح : بسير أبشر بو سلطان

وعد : لا عموه

أم سلطان :ويدي ليش ؟؟؟

وعد: خليني أخبر سلطان قبل ... ممكن ؟؟؟ وبعدين لازم نتأكد يمكن يكون حمل جاذب !!!!

أم سلطان :ويه صدقج السموحه يا أبنيتي خلاص سوي اللي يرحج بس ما ظني حمل جاذب احساسي ما يخيب أبد

وعد: الله يسمع منج ويكون صادق ....عموه لاأ تحطين فخاطرج

أم سلطان أتقاطعها : لا فديتج لا بحط فخاطري والا شي اول ما نوصل البيت خذي ريلج وخبريه وأنا بخبر البقيه

وعد مستانسه : ان شا ءالله ...

[الجنيه]

في ميلس الرياييل

بعد العشا

بوسلطان : عيل خلاص يا بو ميثا شاور البنيه ورد علينا خبر ...

ناصر : بعد هاي ما يبالها مشاور

جابر: لا يا ناصر الا يبالها مشاور ونص هذا زواج ويمكن البنيه مب فخاطرها أتعرس من الحين ما يصير تجبرها

ناصر : والله عاد أنا أبوها وأبخص بمصلحتها

بوسلطان :أييك الشور يا أخوي أنا اللي بشاور البنيه وباخذ الموافقه منها أنت بس خبرها خلها أتفكر وأنا بييها بعد أسبوع وباخذ الرد منها

ناصر :الله يهداك يا بو سلطان أكيد موافقه وما يبالها رمسه

بوسلطان :ماعليه يا أخوي خلني على راحتي

جابر :بارك الله فيك وكثر من أمثالك

سعيد وسلطان يأذون سيف

سعيد : ههههه كشخه لو ترفض أسميني بتحطم

سلطان : لا شو أتحطم بنتحر على طول

سيف : ههه ههه سخافه ما يضحك

سلطان :أنزين أشفيك يالس على أعصابك جنك أنت العروس

خليفه : هههههههههههههه حسبي الله على أبليسكم خلوه فحاله

سلطان : يا أخي خلنا أنغلس عليه أشويه ,,, أنا لي الحق دومه يتناقر ويا حرمتي ويعايرها خلني أنتقم لها منه

سعيد : مع أ نه ماشاء الله عليها محد يروم لها بس بعد أنا أبي أنتقم لها

سيف : بوعسكور والله

سعيد : لا أتم أتهدد وأتحلف والا تراني ؟؟

خليفه : ههههه عنبو أنجلب الحال عندكم .. وألتفت على سلطان ... تعال فاضل راعي العين شو عنده ويا أبوي ؟؟

سلطان تفاجأ وأنصدم : شو فاضل ؟؟؟ ما أدري ليش ...؟؟؟

خليفه : أمس خطفت على مكتب الوالد شفته عنده وأول ما دخلت سكتوا وغيروا الموضوع

سلطان تلعثم : ها مم أأ ما أدري بتخبر أبويه في البيت

خليفه : يلا بسكم خطبه وخطبتوا ناوين أتباتون هنه ؟؟؟؟

الكل : ههههههههههه

جابر: أشفيك مستعيل يا بوسالم الله يهداك يلستكم ما تنمل

خليفه : تسلم والله بس أظني وقت رقادك قرب و أنا بعد باجر عندي أجتماع من الصبح للعصر

جابر: خيبه شو أجتماعه عنبو نهار كامل

خليفه :هههه الله يسلمك هذا وايد قصير احيانا يكون عندي اجتماع يومين

سلطان : أخ عيني

خليفه : يالهرم ألحين أنا جذاب ؟؟؟

سلطان : محشوم بو سالم بس عيني ما أدري شو ياها فجأه

خليفه : ماعليه أشعرفكم أنتوا فهالسوالف عيال وظايف الحكومه انتوا لو داومتوا دقيقه زياده على ساعات العمل ربعتوا تتشكون ....

بوسلطان :صدقه بو سالم فديت روحه مب مقصر الحمل كله عليه ولا من يعاونه

سعيد : نغـــــــــــــــــــــــ ـــــــــــــــــــــــــ ــــــــزه

بوسلطان وهو يطالع سلطان :لا فديت روحك بو عسكور نحن ما ننغز نحن الرمسه لي فخاطرنا أنقولها شرا الرياييل ما أنخاف من شي

سلطان حس أنه الكلام له : شو القصد يا بو سلطان ؟؟؟

بوسلطان : سلامتك .... برايكم عيل بنترخص نحن وان شا ءالله بييكم الاسبوع الياي آخذ الرد

ناصر وجابر : حياكم الله



طلعوا كل حد بسيارته ...

خليفه على بيته

سعيد وسيف ... فسيارة سيف بيتمشون أشوي ويردون البيت

بوسلطان و أم سلطان ...

سلطان ووعد



في بيت بو سلطان ....

أم سلطان دخلت غرفتها وسكرت الباب وراها : مانع

بوسلطان : لبيه

أم سلطان : لبيت حاي قول آمين

بوسلطان : آمين .... خير شو عندج ؟؟؟

أم سلطان : أيدك على البشاره

بوسلطان : شو بشارته ؟؟؟؟

أم سلطان : أول عطني البشاره بعدين بخبرك

بوسلطان : أفا عليج يا نوره ما تثقين فيني

أم سلطان : محشوم يالغالي بس أسولف عليك .... مبروووووووووك

بو سلطان بابتسامه : الله يبارك فحياتج بس على شو ؟؟؟

أم سلطان :بتصير يد (جد)

بوسلطان : والله حلفي

أم سلطان : ان شاء الله ... وعد حامل ... بس نتريا باجر بتروح الدختر تفحص عشان تتأكد

بوسلطان : اذا انتي قلتي حامل يعني حامل خوزي عن يخليني بيول

أم سلطان : حيلك يا بو سلطان فضحتنا بعده سلطان ما عنده خبر

بوسلطان : وأشعنه ما عنده خبر؟؟؟!!!!!! شو هالمذهب فيكن اذا أبوه ما تبنه يدري منو بتخبرن ؟؟؟

أم سلطان : عوذ بالله من ابليس استهدى بالله وعد قالت خلها تفحص وتتأكد بعدين بتخبره

بوسلطان : اذا ها شور الغاليه أم الغالي ما عندي مانع ... والله يا أم سلطان خلي الياهل يشوف النور وبسوي له حفله لا صارت ولا أستوت هذا ولد غالي ولد الغاليين

أم سلطان : الله يتمم على خير ويحقق لك مناك ...

بوسلطان : آمين ...



ثاني يوم الصبح سارت وعد ويا أم سلطان وأبوه وفحصت عشان يتأكدون أنه الحمل مش جاذب و أكدت لها الدكتوره أنها حامل وفي الشهر الثاني ...

بو سلطان الفرحه مب سايعتنه ومب عارف شو يسوي تم أيول في المواقف جدام السياره والناس يتطالعونه وهو مب مهتم وعد مستانسه ومب قادره تتريا توصل البيت عشان أتبشر سلطان ...

أم سلطان واعلي حليلها الدموع ما تفارقها ففرحها وفحزنها ... سعيد وسيف أتصل بهم أبوهم وخبرهم وما جذبوا خبر ترخصوا من دواماتهم وتيمعوا عند المستشفى وطبعا سيف شارك أبوه اليوال والرزف وسعيد متفشل منهم



سعيد : لاحول الله ... فضحتونا والله الناس يتحرونا خبايل سيف بدل لا تمسك أبوك أتشاركه أسميكم فشله

أم سلطان : خلهم يا بوي خلهم من زمان نتريا هاليوم ...

وعد مستويه طماطه من الحيا والحر : حرام عليكم حر بسكم عاد خلونا أنروح البيت

سيف: أقولك سعود أحيد عندك خيازرين فموترك عطني وحده

سعيد : ما عندي بسكم أنا باخذ وعد وأمايه وأنتوا خلكم هني

بوسلطان : أفا وأهون عليك

سعيد : والله ما أتهون يا بوسلطان بس أم حارب أتقول تعبانه تبا أتروح البيت

بوسلطان : يلا على البيت كله ولا تعب أم حارب

وعد بتصنع : وي تعب

أم سلطان : الله أكبر شهالمنكر

وعد : ههههه برايه عموه عشان أنروح البيت



,,,,,,,,,,,,,,

[الجنيه]

بيت خليفه



خليفه يرمس في التلفون وهو داخل البيت شاف ميثا يالسه عاطتنه ظهرها وتلعب ويا غيث رفع حياته مستغرب معقوله حلت الرحمه فقلبها وحست بعيالها ... رفع كندورته وشاف ساعته تم يدق عليها ويحركها بطريقه عشان يتأكد أنها صحيحه .. لأن الساعه كانت وحده ونص وميثا مب من عوايدها أتكون في البيت هالوقت يا معزومه يا عندها عزيمه ... المهم خلص المكالمه ورجع لأيام الشطانه راح وراها وغطى عينها ..غيث يضحك يحاول يتكلم وخليفه يأشرله بايده عشان يسكت سكت

...... : سهيل ,,, هذا أنت

خليفه أول ما سمع الصوت تخبل هذا مب صوت ميثا !!!! عيل هاي منو أول ما رفع أيده عن ويها لفت صوبه ومن الصدمه تمت مبهته تتطالعه ؟؟؟

العنود فخاطرها " هذا شو يسوي يا ربي وين أودي ويهي من الفشله " وبعد ما أنتبهت نزلت راسها وتمت ساكته ..

خليفه مرتبك ومستحي من نفسه كيف ما عرف يفرق وتحراها حرمته ... يا ويلي والله لو ميثا تدري بتقلب الدنيا على راسي ... استسمح منها وتوه بيروح صوب ولده سهيل اللي توه داخل والا أتيهم ميثا والشرر يتطاير من عينها ...

ميثا : أنت وصلت ؟؟؟

خليفه : ها هي

ميثا : أنزين روح الحجره وأنا بلحقك بعد أشوي

العنود نشت من مكانها تبي أتروح : خلاص ميثا برايج أنا بروح البيت

ميثا : لا برايج خلج هني تغدي ويا الصغاريه وبعدين لاحقه على البيت ما عندج شي اتسوينه

العنود منحرجه :لا برايج فمان الله

ميثا بحقد : سهيل وصلها للباب يمكن ما أتدل

العنود خلت نفسها ما سمعت وعرفت أنه ميثا شافت اللي صار بينها وبين خليفه ... الله يستر

أول ما طلعت العنود ميثا راحت لخليفه في غرفتهم

ميثا حاطه أيديها فخصرها وأتدق الأرض بريولها : ممكن أعرف شو كنت أتسوي حضرتك ؟؟؟!!!

خليفه : سلامتج مثل ما شفتي كنا نلعلب الغميضه

ميثا راصه على اسنانها من القهر : خليفه رد علي مثل الناس

خليفه : يوم تغدين حرمه شرات باجي الحريم وتتعليمن تحشمين ريلج برد عليج شرا الناس ,,, أحترمي نفسج عشان يحترمج غيرج ...

ميثا : ما علينا من هالرمسه اللي ما لها معنى بس ممكن أتفسر لي اللي صار من اشوي

خليفه وهو يلبس جلابية بيت : ما كنت أدري أنها ربيعتج أتحراج أنتي تلعبين ويا غيث بس يوم رمست عرفت أني غلطان أستسمحت منها وأنتهى الموضوع

ميثا: خليفه أنت ملاحظ أنك مستوي مراهق هاليومين الا سرحان والا تبحلق في البنات مب عيب عليك

خليفه مزاجه حلو ورايق مب متفيج يصدع راسه وياها : برايني خليني أعيش مراهقتي الي أنحرمت منها بزواجي وبعدين نسيت أخبرج ترا وعد حامل توها أمايه متصله أتبشرني اذا تبين اتروحين أتباركين لها مع أني اشك المهم أنا نازل بتغدى ويا العيال والعصر بنروح انبارك لها اذا حبيتي اتشاركينا بس من دون نكد من فضلج



وهو نازل عشان يتغدى ويا عياله الابتسامه شاقه حلجه ما يدري ليش بس حاس بسعاده بعد اللي صار وتم يفكر بالعنود ,,, مسكينه الله يعينها على لسان ميثو حشا راغتها بأدب أونه والله لو شو اتسوي هاي لو ينقعونها في بحر من الأدب والأخلاق لينضب ....






تتمشى في البيت تنتقل من حجره للثانيه كنها مضيعه شي وأتدوره أتحاول أتلاقيه باستماته ... وصلت لباب الغرفه للي صار لها شهر ما قربت صوبها تحس برعشه خفيفه ورهبه ... حطت إيدها على مقبض الباب بس ما عندها الجرأه والشجاعه عشان تفتح الباب .. فجأه تبطل الباب وهي ردت خطوتين لورى كرد فعل .... شافته يمسح دمعته ويحاول يبتسم ... هالغرفه صارت ملجأه والمكان الوحيد اللي يقدر يطلع اللي فخاطره....

عارف بحنان : رواضي

روضه وهي منزله راسها : نعم

عارف : شي بغيتي ؟؟؟

روضه وهي أتداري دموعها و أتهز راسها : لا

عارف حس أنه الوقت مناسب عشان يحاول يخفف عنها ويساعدها أنها تدخل الغرفه اللي من يوم وفاة أمها وهي مبتعده عنها مستحيل أتمر من حذاها أو حتى تدخلها ... مسك أيدها وقالها تعالي وياي

مشت خطوتين وعلى مدخل الباب تجمدت بمكانها حست بريولها متخدره ما تقدر اتحركها

عارف التفت لها: شو فيج ؟؟؟ رواضي دخلي أنا وياج ليش زايغه؟؟؟

روضه: ماأقدر

عارف: لا بتقدرين أنتي بس حاولي

روضه: أحس ريولي ما أتشلني

عارف: روضه ريولج مافيها شي الحمدلله بس أنتي محتايه أتقوين إرادتج وأتصممين على هالشي أنا أدري الموقف صعب وايد بس صدقيني لصالحج أنتي لازم أتحاولين تتأقلمين ويا الوضع وما تكبتين اللي فخاطرج أنا من وفاة المرحومه وأنا أحاول أكلمج بهالموضوع ... رويض أبويه مافيه حيل ولاشدة على الهم خلاص من راحت المرحومه وهو صاير حساس وبسرعه يتأثر خايف عليج أنتي أكثر وحده ... الكل يرمس يقول اللي في خاطره ويعبر عن حزنه الا أنتي ... أنتي أكثر وحده تدري أني ما أدخل هالغرفه الا يوم أشتاق لراعيتها والا أكون متضايق أحس بوجودها بهالغرفه أحس بأمان وينشرح صدري ان دخلتها

روضه حاولت أتفج أيده عنها ومب قادره أتشوف جدامها من كثر دموعها : ما أبي خلاص خلني بروح

عارف :لا يا روضه أنا أبي أساعدج أنتي بس حاولي مره وحده صدقيني بعدها بترتاحين

روضه : لالالالالا عارف ما أبي فج أيدي

عذيجه كانت خاطفه يوم شافت عارف ماسك أيد روضه وسمعت اللي دار بينهم وتدخلت في اللحظه اللي أنهارت فيها روضه ...

عذيجه وصلت عندها وحضنتها بالقو ولفت صوب عارف : خلها على راحتها لا تغضبها

عارف : عذيجه دخلي وياها صدقيني هالخوف اللي بداخلها والضياع اللي تحسبه بيتلاشي

عذيجه : ما عليه عارف خلها اليوم مره ثانيه أنا اللي بوديها بنفسي

عارف: بس يا عذيجه

روضه وهي تقاطعه : دخليج خليه يفجني ما أبي والله ما أبي

عارف : خفف من ضغطه على ايدها : خلاص برايج سوي اللي تبينه



.......................



دخل البيت على أطراف أصابعه ما يبي حد يشوف اللي بيده خصوصاً السوسه سعيد وسيف عاد هاييل سالفتهم سالفه وبيسووله فضيحه ... وهو داخل بكل خفه وتخفي كانت عيون تترقبه وتتريا وصوله وأول ما شافت سياره وقفت ورا الباب ناويه أتسويله مقلب خفيف ... أندست ورا الباب حاطه أيدها على قلبها من الفرحه أتحس بنبضاتها متسارعه ويمكن تفضحها ...

فتح الباب وشاف الغرف مظلمه .. " فخاطره : يمكن في الحمام "( عزكم الله ) ... تجدم خطوتين وأول ما سكر الباب

بوووووووووووووووووووووووو ووووووو

بطل عيونه على وسعها ونقز على الخفيف : باسم الله الرحمن الرحيم ... أعوذ بالله من الشيطان الرجيم

وعد: هههههههههه ناوي تختم القرآن .؟؟!!!

سلطان مسك أيدها وحطها على صدره يسمعها دقات قلبه : ما أتخافين ربج شوفي قلبي كيف يدق لو يتني السكته القلبيه ومت شو بتسوي عقبي ؟؟؟

وعد بشهقه : الله لا قال باسم الله عليك يعله فيني ولا فيك

سلطان : فديت روحج والله ... برايج سوي اللي تبينه بس يوم أيي حروب لا أتقولين توحدو فيني الولد وأبوه

وعد متفاجأه معقوله خبروه وهي موصتنهم محد يقوله وبخيبة أمل : أففف عنبو ما في شي يندس هذا أكيد سيف أنا متأكده

سلطان :الحمدلله والشكر بلاج ؟؟؟؟

وعد : ماشي سلامتك المفاجأه وخربوها بعد أشو تبا ؟؟؟

سلطان : اللهم سكنهم في مساكنهم ... المهم غمضي عيونج

وعد بدلع : للل ييييييييييييييييييش ششششششش؟

سلطان : لا اله الا الله أسميها الحرمه أستخفت ... شو بريك سيارة هو ؟؟؟ غمضي عيونج

وعد : ما أبي

سلطان : حبيبي يلا عاد عن المصاخه بسرعه

وعد :أنزززززززززززززين

أول ما سكرت عيونها جدم أيده اللي داسنها ورا ظهره من دخل وكان فيها باقة ورد أحمر يجننن وفي نهاية الباقه صندوق صغير ,,, قرب الورد من خشمها وعلى طول فجت عيونها

وعد مستانسه وتشم الورد : الله مشكوووووووووووووور

سلطان : أفا بعد كل هذا مشكور حاف بدون شي ؟؟؟

وعد وبنظره شيطانيه : يعني شو تبا ...؟؟؟

سلطان أونه زعل لف الصوب الثاني : سلامت قلبج يالحلوه ما نبا شي

وعد تقربت منه وبكل هدوء طبعت بوسه رقيقه على خده وربعت بعيد عنه

سلطان تفاجأ وتم مبهت : شو سويتي ؟؟؟

وعد بحيا : شو

سلطان :لا هاي مب محسوبه أنا ما كنت فوعيي عيديها لو سمحتي

وعد : عن الطمع يلا سر بدل عشان أنروح نتغدى

سلطان : ما أبي ... ما أبي

وعد : يوم أنت هاي سوالفك شو خليت حق حروب ؟؟؟

سلطان : أي ها فديت حروب وأمه خليه أيي والا ندري عنه بعدين يصير خير بتنازل له عن أشويه

وعد بنظره متشككه : يعني أنت ما تدري ؟؟؟

سلطان :أدري بشر ؟؟؟؟

وعد مسكت أيده ويلسته على الشبريه وحطت الباقه على ينب : سلطان مم م

سلطان : آمر يا عيون سلطان يا نبضات قلبه يا كل دنياه يا بعدعمري أنتي تدللي حبيبي قولي اللي فخاطرج و لاتترددين ... شبيك لبيك سلطان بين أيديج ....

وعد :سلطان أنا ما أعرف اتكلم جي لا تتطالعني بعيوني

سلطان : أوه نسيت ما تحبين حد يتطالعج عين بعين يوم ترمسين صح

وعد :صح

سلطان : بس أنا غير صح

وعد : صح

سلطان وهو يتقرب منها : يعني عادي أطالعج عين بعين وترمسين

وعد: عادي بس الموضوع أشوي بيزعلك

سلطان بعد عنها أشوي : خير شو صاير ؟؟؟

وعد : سلامتك حبيبي ماصاير شي بس

سلطان يبلع ريجه : شو مستوي أرمسي

وعد :بس لاتزعل أرجوك

سلطان : وعد حرام عليج أرمسي قولي طيحتي لي قلبي

وعد : ممم س سسلطان أنا

سلطان بنفاذ صبر : أنتي شو وعدوه أرمسي والله بعضج شو مستوي .؟؟؟

وعد : سلطان أنا ممم أنت

سلطان عصب : أنا شو ؟؟؟ وأنتي شو ؟؟؟؟ وعد شو صاير

وعد دمعت عيونها لأنه زاعج عليها :سلطان أنا حامل

سلطان : أنزين يعني لازم ... وفجأه سكت يحاول يستوعب اللي سمعه ... تردد صوتها فباله سلطان أنا حامل لف عليها شافها تمسح دموعها رفع راسها أنتي حامل ؟؟؟

وعد أتهز راسها بالايجاب

سلطان دمعت عيونه ولوى عليها من فرحته حس ما عنده الكلمات اللي يقدر يوصف بها شعوره تموا فتره على هالحاله وبعد عشر دقايق تقريباً بعدها عنه وتم يتطالع ويها المحمر ...

سلطان وهو يمسح دموعها : آسف حياتي والله ما كان قصدي

وعد :لا عادي بس أنت أول مره أتزاعج علي

سلطان : يعل بلعومي القص لو زاعجت عليج مره ثانيه

وعد أتقاطعه : سلطان شو هالرمسه

سلطان : حبيبي والله ما كنت أقصد بس أنتي يعني لعبتي بأعصابي أشوي وأنا ما عرفت شو أسوي سامحيني

وعد :مسموح بس عشانك سلطوني

سلطان :فديت روحج ... وتناول الباقه من على الشبريه وقدمها لها مره ثانيه

وعد :مشكور

سلطان :لا شكر على واجب أنا لو كنت أدري جان ترست الحجره ورد عشانج

وعد: زين يوم ذكرتني أ نت ليش يايب الباقه ؟؟؟ أنا تحريت سيف مخبرنك

سلطان : أشوه سيف يعني هم يدرون قبلي ؟؟!!!

وعد :باباتي كنت أبي أخبرك بنفسي مثل الحين

سلطان :أيوه الحين فهمت يوم تتحرطمين على سيف أتحرينه مخبرني

وعد: هيه

سلطان : هههه أنزين خبرتي أمايه وأبوي .. أوه صبري بطلي الصندوق اللي لازق بالباقه

وعد :أيها والله فاتك أبوك تم أيول عند المستشفى هو وسيف وسوو يوله ... شو فيه الصندوق ؟؟؟

سلطان : لا والله أكيد بوسلطان طاير من الفرحه ... أنتي بطليه وشوفي روحج

وعد : الله رووووووووعه يجنن سلطون مشكور حبيبي

سلطان :هاللي كان فخاطرج صح ؟؟

وعد :هي فديت روحك هو نفسه الخاتم اللي في المجله

سلطان : أهم شي عيبج

يلا نشي أنروح نتغدى



طلعوا للصاله وين الكل متيمع عشان يتغدون طبعا الكل بارك له وتموا يخططون ويسولفون عن المولود المرتقب اللي ناويه أتسميه وعد حارب اذا ولد واذا بنت بيسميها سلطان غاليه ....





تحيــــــــــــــــــــــ اتي الجناويه ،،، ان شا ءالله ينال اعجابكم ...