قمازي
يلا اختي نبا التكمله بسرعه لاني بعد سبوع بسافر
وما بقدر اكملها ابي قراها قبل ما اسافر...........................
قمازي
يلا اختي نبا التكمله بسرعه لاني بعد سبوع بسافر
وما بقدر اكملها ابي قراها قبل ما اسافر...........................
ريم العين
العفو حبوبه وشاكره لج متابعتج
قمازي
تسلمين الغلا بس حبوبه القصه بعده يبالها أشويه وقت ما أقدر أخلصها الحين
بس بحطج هالجزء عشان ماتزعلين ...
والسموحه عالقصور
لو حلفت انك تبيني ،،،
وميت وهيمان فيني ،،،
بأعتبرها ألف كذبه،،،
طحت من قلبي وعيني ،،،
أموت أنا في حبهم
الجزء الثاني عشر
سكرت عنه وعد وراحت أتشوف عذيجه وبهاللحظه أتصل عارف بسلطان وكان منهار وخبر سلطان بوفاة أمه سلطان تكفل بأنه ياخذ أبوه وبو محمد المستشفى عشان يخبرونه بوفاة زوجته
وعد وصلت لغرفه عذيجه اللي كان التعب باين عليها ودموعها هميله
وعد تقربت ويلست عالشبريه عدالها : باسم الله الرحمن الرحيم أشفيج ؟؟؟؟
عذيجه لوت عليها وتمت أتصيح بحرقه ,,,,
وعد تتلفت للي حواليها تبي أتعرف سر هالدموع : باسم الله شو ياها ؟؟؟ ليش اتصيح
أم سلطان قربت من عذيجه وحطت إيدها على جتفها : يا أمي مب زين أتسوين بعمرج جذه أنتي توج مربي والنونو ما عليه شر بس لأنه متربي قاصر حطوه في الغرشه ....
وعد: شو صار عموه ؟؟؟
أم سلطان : مافيه الا العافيه ياأميه الولد ما عليه شر بس لأنه قاصر ومب زين له يتعرض للجراثيم بيخلوه في الغرشه ومتى ما تبين تعالي شوفيه ...
وعد بعد ما فهمت الموضوع رفعت راس عذيجه وخلتها أتشوفها عين بعين : عذوج حبيتي لا أتحاتين ما عليه شر روضوه روحها حطوها في الحضانه شهر تذكرين ؟؟؟؟ يلا عاد هاذوه عمي بومحمد وباباتي وبوسلطان بيوون يسلمون عليج ... أدخلهم ؟؟؟
عذيجه تهز راسها "تقصد هي "
وعد: عاد بسج من الصياح ....
عذيجه : تكلمت بتعب وضعف .... ما أصيح عليه ان شاء الله ما عليه شر بس خايفه يا وعد حاسه قلبي مقبوض وخايفه أحس شي صاير .. سكت وردت بسرعه تسأل ,,, أمي أمي شو أخبارها ؟؟؟؟ وينه هزاع أزقريه خليه يخبرنا شو صار عليها
وعد : ان شاء الله
أم سلطان: ما عليها شر ان شا ءالله ،،، خليني بتخبر بوسلطان جان عنده علومها
طلت أم سلطان برع الغرفه وزقرت بوسلطان اللي أول ما وصل عندها كان شكله ما يطمن
أم سلطان : بوسلطان
بوسلطان : عونه
أم سلطان : الغالي ما عليك أمر تخبر بومحمد عن صحة أم محمد عذيجه ذابحتنها المحاتاه
بوسلطان نزل راسه : ..........
أم سلطان : ودي مانع ؟؟؟ شو ياك ؟؟؟ خير ان شا ءالله
بوسلطان : أم محمد عطتج عمرها
أم سلطان اللي الصدمه ألجمتها : ها شو ,,, لا حول ولا قوة الا بالله انا لله وإنا إليه راجعون
بوسلطان يأشر لها عشان تسكت وأتوطي حسها : أشششش بومحمد ما عنده خبر وبنته بعد ما يصيرأتخبرينهم جذه منه والدرب
أم سلطان عضت شفاتها بأسف ودمعت عيونها : ان شاء الله ,,, بس كيف يا مانع ؟؟؟ شو ياها
بوسلطان : ما أدري يا نوره سلطان توه يخبرني وأنا قلت بخليه يتحمدلبنته بالسلامه وبشله ويايه وبنروح صوب عارف ومحمد الدختر اللي هي فيه
أم سلطان : خلاص برايكم جان بتدخلون محد غريب
بوسلطان وهو يزقر على بومحمد ، هزاع ، حميد (بووعد) : سويلنا درب
أم سلطان : إن شاء الله
دخلوا الجماعه عندها وتحمدوا لها بالسلامه وبعدها طلعوا عنها ...
بوسلطان ، حميد ، بو محمد و هزاع راحوا مستشفى دبي عند أم محمد وسلطان خذ حرمته وأمه بيوصلهم بيت بو محمد وبيلحقهم المعشره (المقبره)
عذيجه .... نظرا ً للولاده المتعسره الي مرت بها وضعفها الشديد عطتها الدكتوره إبرة منوم عشان ترتاح ... وعذيجه طلبت من وعد اتروح ترتاح وبعدين ترجع العصر اذا حبت ...
في سياره سلطان وقبل لا يتحرك من موقف السيارات اللي في مستشفى الوصل ....
سلطان يأشر لأمه ,,, ويحاول يكلمها بدون لا تفهم أو تحس وعد
وعد : خير سلطان شي فخاطرك ؟؟؟؟
سلطان مرتبك : ها لالا ماشي سلامتج مافي شي
وعد معقده حياتها وشاكه فالموضوع : متأكد ؟؟؟؟ !!!!!!!!
نزلت أم سلطان وفتحت باب السياره صوب وعد سمت باسم الله وقالت : وعد قولي لا اله الا الله
وعد اللي أنصدمت من حركة أم سلطان : قالت لا اله الا الله وهي تتنفس بصعوبه وقلبها يدق بالقو ... خير شو فيه ....؟؟؟ سلطان شو صاير ؟؟؟
أم سلطان : يا بنتي الموت حق وأم محمد حرمة جبيره وعيزها المرض وربج بغاها تستريح بعد عذاب هالسنين
وعد تمت ساكته فتره تحاول تستوعب اللي تقوله أم سلطان بعدها على طول لوت عليها وتركت العنان لدموعها صاحت لين حس سلطان أنها ممكن تروح من إيده إذا ما تصرف ،،، تقرب منها ووبعد أمه اللي رجعت تيلس ورا رفع راسها ومش دموعها ,,, باسها عراسها
سلطان : وعد حياتي ،،، ذكري الله تعوذي من إبليس
وعد وهي تشهق وأتصيح : "بصوت متقطع" سس سلطان هاي حسبة أمي وبوجودها عمري ما فقدت أمايه والله يا سلطان ما أتعرف غلاتها بقلبي مب قادره أتخيل أنه الموت خذها عني أحس أني تيتمت مره ثانيه
سلطان يحاول يهديها : ترحمي عليها هي محتاجه لدعائج أكثر من صياحج تبين أتبينين غلاتها فقلبج قوي إيمانج بالله وقوي نفسج وعد لا تنسين بناتها للحين ما يعرفن ومحد غيرج يقدر يوقف وياهن ويهون عليهن مصابهن خليج أقوى من جذه أنتي يا وعد الوحيده اللي بقيتي لهم تدريبهن معزولات عن الناس وما يخالطون حد الحين هم محتايين لج ...
وعد مسحت دموعها : ان شاء الله بس سلطان أنا ما بقدر أسوي شي والله ما أقدر
أم سلطان : استهدي بالله وتوكلي عليه أنا وياج يا أمايه لا أتحاتين وهن ان شا ءالله ما عليهن شر بس عذيجه خليها يوم يرخصونها باجر بنخبرها ان شاء الله وهن يا أمي يدرن أنه الموت حق وكلنا سايرين بهالطريج الله يصبرهن ان شاء الله
وعد: ان شاء الله ,,, بتصل بيت عمي عبدالرحمن بخبرهم
أم سلطان : زين ما اتسوين يزاج الله ألف خير
سلطان :وعد أنتي بخير ؟؟؟؟
وعد تهز راسها "تقصد نعم"
سلطان يكرر السؤال : وعد أنتي بخير
وعد دمعت عيونها ومسحت الدمعه على طول : أنا بخير تطمن
سلطان :أكيد ؟؟؟
وعد :أكيد ..
وصلوا بيت بومحمد ونزلن وعد وأم سلطان ... بعد ما تطمن سلطان على وعد أتصل يشوف اللي صار على عارف ويتخبره عن مكانه ....
فاضل أول ما وصل مستشفى الوصل أتصل في سلطان اللي خبره بسالفة وفاة أم محمد وحس فاضل بأنه الوقت أبدا مش مناسب يفاتحه بالموضوع اللي ياي عشانه ,,, فسأله عن مكانه وراح له عشان يقوم بالواجب ...
في سياره بو سلطان ...
السياره ما فيها أي صوت ولا حس الكل ساكت هزاع حاس بقبضه وخوف ماعرف سببهم
حميد يدعي ربه يسهل عليهم ويصبر بومحمد وعياله يعرف شو معناة أنه الواحد يفقد شريكة حياته وأم عياله وبعد يعرف شعور اليتيم اللي ماتت أمه
بوسلطان كل دقيقه يتلفت صوب بومحمد السرحان والي باله مشغول ونظرة الخوف ما فارقته من أقترح بوسلطان يروحون عند أم محمد يتطمنون عليها ...
بومحمد حاس بأنه السالفه فيها إن ومتأكد مليون بالميه أنه أم محمد أنتقلت لباريها وهالشعور ما أنولد من فرا غ هالشعور اللي بداخله كأنه حد خبره بموتها وكأنه تلقى إشاره من ربه أنه شريكة حياته تركته وخلته وحيد ...
مستشفى دبي
عند المدخل واقف ومنزل راسه ومب حاس بدموعه اللي ما وقفن من بعد صلاة الظهر حاس بخوف ،، ألم ،، قهر ،، غضب ،،، ليش أنا اللي أنحرم من أمي ؟؟؟ ليش ؟؟؟ الحين كيف بتكون حياتنا ومن لنا من بعدها ؟؟؟
ما وعى الا بيد هزاع على جتفه ...
هزاع بخوف وترقب : حمد وين أمي ؟؟؟؟
حمد مرتبك ومب قادر يسيطر على نفسه مسح دموعه بسرعه ولف على أخوه يطمنه : مافيها شي هي بخير الحين
هزاع : لا تجذب علي حمد أرمس قول شو فيها ؟؟؟؟
حمد :قلت لك ما فيها شي وين أبويه ؟؟؟
هزاع : هاذوه وصل ...
حمد تجدمهم عشان ما يشوف أبوه ولا تتلاقى عيونهم خاف تخونه العبره وما يمسك نفسه ما يبي يصدم أبوه ففضل أنه يسبقهم ويدلهم على مكان محمد عشان هو يتكفل بالمهمه ......
سلطان وفاضل تلاقوا ويا عارف عند باب المستشفى ... بعد ما عزوه تويهوا صوب القسم اللي يستلمون منه الجثث ....
محمد وهو شال في إيده شهادة وفاة أمه خانته دموعه وأنهدت كل الشجاعه اللي كان متحلي بها عشان يخبر أبوه نزل عركبه وحضن شهادة وفاتها وتم يصيح من خاطره مب قادر يتخيل ما يسمع صوتها صح أنحرم من شوفتها مثل قبل بس كان متطمن وحاس بوجودها وياه بكل لحظه لأنه ما كان يقطعها بالتلفون دومها تدعيله وتنصحه يتزوج وهو اللي معند وراسه يابس شايل فكرة الزواج من باله نهائيا ً بعده مانسى قبل ثلاث سنين راحت تخطب له بنت يرانهم رفضوه لأنه أبوه خريج سجون ومحد يبا يزوج بنته لبيت سمعته مب زينه ....
تذكر كيف حط راسه فثبانها وقال كل اللي بخاطره وهي تسمعه من دون كلل أو ملل يا ربي كيف بصبر عنها يا ربي شو أسوي والله حاس عمري بموت .... أول ما رفع راسه تلاقت نظراته ويا أبوه ومن دون أي شرح فهم بو محمد اللي صار ويلس على أقرب كرسي ودموعه متجمده فعينه مب قارد ينزلهن عشان ما يضعف جدام عياله وما يحسون أنه مالهم سند من بعدها ...
هزاع وهو يصيح : أنتوا جذابين هاي أمي تعرفون شو يعني أمي ؟؟ في أم تتخلى عن عيالها ؟؟؟؟ ها ليش ما اتجاوبون
حمد وهو لاوي عليه بالقو ويصيح وياه ما يبي يهده لأنه ما يعرف شو بيسوي بعمره
سلطان تقرب منه : ترحم عليها يا هزاع لاأتسوي بعمرك جذه مب زين
هزاع : محد له خص فيني خلوني بروح وياها ما أبيكم أرجوكم أبعدوا عني وخلوني فحالي أبي أمي خلوني أروح لها
محمد وهو ماد أيده له ...و بيأس : هزاع تعال عندي
هزاع : لا لاما أبي حد بسير عند أمي بشوفها هي بتوعى اذا سمعت حسي أنا متعود أنششها لصلاة الفير أنتوا ما أتعرفون فجني يا حمد
عارف تجدم منه بخطوات غير متزنه وحاول يضمه لصدره ويهديه : هزاع أسمعني بس بقولك كلمه
هزاع وهو يرافس في ايد حمد : فجني يا حمد أقولك خلني بروح لها
حميد ما قدر يتم ساكت أكثر من جذه وهو يشوفهم يتعذبون تقرب من حمد وشل أيديه عن هزاع وأول ما فجه حمد ربع صوب الغرفه اللي حاطين أمه فيها
حميد : خلوه يشوفها وأنا بييبه ,,, مشى لين وصل لباب الغرفه ... حس برهبة المكان وأحتراماً لروح المرحومه ما دخل الغرفه تم واقف برع عشر دقايق بعدها زقر هزاع اللي ما رد عليه
حميد : هزاع ياأبويه تعال بغيتك بكلمه ... لا أتخليني واقف برع تراني ما أقدر أدخل تعال و أنا أبوك
هزاع طلع من الغرفه وبخطوات ثقيله تقرب من حميد ...
حميد تجدم منه وخذه بحضنه ويلسه على الكرسي اللي برع الغرفه : هزاع قول انا لله وانا اليه راجعون
هزاع : ردد وراه الجمله وحس بقشعريره تسري بجسمه .... تنهد ورفع راسه لحميد وقاله أنا بخير
نش حميد وهزاع ورجعوا لبومحمد وعياله وباشروا بإجراءات دفن أم محمد
في بيت بو محمد
وعد أول ما وصلوا دخلت البيت وسلمت على البنات ،، وطبعاً أم سلطان هاي أول مره أتييهم فعرفتهم وعد بها وراحوا يصلون الظهر بعدين بيخبرونهم ،،،، بعد ما سلمت رفعت إيدها وهي غارقه بدموعها تطلب ربها يساعدها ويقدرها على أنها أتخفف عنهن وفجأه أنتبهت لحمده اللي يت عندها ويلست مجابتلنها
حمده : تقبل الله
وعد : منا ومنكم صالح الأعمال
حمده : وعد شو فيج من دخلتي وأنا حاسه أنه فيج شي أتحاولين أتخبينه عنا
وعد اللي خلاص ما عادت تتحمل أكثر لوت على حمده وهي أتصيح : حمده
حمده حست بالدم يوقف فعروقها هي حاسه أنه طيحة أمها مابتعدي على خير فكانت متوقعه الخبر : وعد لا
وعد وهي أتهز راسها : ترحمي عليها
حمده ما تكلمت بس تمت أتصيح وفي خاطرها تقول أنا اللي تفاولت عليها من دريت أنها طاحت عليهم قلت شكلي ما بشوفها بعد اليوم يا ربي ليش جي ليش!!؟؟ وعد ما منعتها أتصيح أمها بس خلتها على راحتها وبعد ما هدت مسكتها وودتها الغرفه عشان أتكون يمب أختها روضه الحساسه والي قلبها ضعيف .... أول ما دخلو الغرفه شافوها لاويه السياده وبتردها مكانها ومبين عليها كانت أتصيح قبل لا يدخلون عليها ...
وعد : تقبل الله
روضه : منا ومنكم صالح الأعمال
وعد : شو فيج ؟؟؟؟
روضه : أنا أدري أنه أمي ماتت هي وصتني قبل لا أتموت أني ما أصيح وأدعيلها
وعد فجت عيونها من الصدمه : شو ها
حمده ربعت عند أختها وحضنتها : روضوه أنتي كنتي تدرين ؟؟؟
روضه وعينها تدمع : حمدوه أنا يوم ييت أزقر عليهم أمي كانت متوفيه خلاص كنت يالسه أقرى قرآن عند راسها قالت لي روضه اذا اتحبيني لا اتصيحين وادعيلي ودير بالج على إخوانج ،، بعدها بشوي سمعتها تتشهد ويوم ييت أزقر عارف عرفت أنها خلاص ماتت ...
وعد مب قادره أتسيطر على دموعها : روضه أنتي بخير؟؟؟
روضه : هي
حمده : روضه أكيد ما فيج شي ...؟؟؟
روضه : مافيني شي ...
حمده لفت صوب وعد : خبرتوا عذيجه ؟؟؟
وعد : لا ماخبرناها توها والده وتعبانه ما نقدر أنخبرها
روضه بلهفه : شو يابت ؟؟؟
وعد : ولد ,, بس
حمده تقاطعها بخوف : بس شو ؟؟؟؟
وعد : لا ماشي بس لأنه الياهل متربي ناقص حاطينه في الحاضنه وان شا ءالله بعد شهر تقريباً بيطلعونه
حمده : .........
روضه : أبي أروح عندها
وعد : الحين مايصير بييون ناس يعزون ومب حلوه أتودرن البيت روحه
روضه : أنتي موجوده أنا ما أقدر أشوف حد ما أبي وتمت أتصيييح
وعد: روضه حبيبتي أنتي خليج هني بس لا أتصيحين حرام عليج اتعذبين أمج مب زين الصياح ،، ترى الميت يحس باللي يصيح ويتعذب فقبره يرضيج أتعذبينها ؟؟؟
روضه وهي تمسح دموعها بظهر كفها : لا ما بصيح
طلعت وعد عنهن عشان ياخذون راحتهم أشوي وأتصلت بيت أبوها أتوصي الخدم أييون ويجهزون الشاي عشان بومحمد ما عنده خدم واللي بيون يعزون يبون حد يجابلهم ...
فهالوقت وصلن رويه وبناتها
رويه أول ماشافت وعد سارت صوبها ولوت عليها وهي أتصيح : انا لله وانا اليه راجعون كيف صار جذه يا وعد
وعد تحاول تخفي دموعها : ترحمي عليها عموه هذي ارادة الله
رويه :ونعم بالله ... وين البنيات بسلم عليهن
وعد : الحين بين أستريحي أنتي
رويه : ان شا الله وتجدمت من أم سلطان يسلمن على بعض ....
وفا وهي شاله بنتها الصغيره : بعدني مب مصدقه يا وعد ,,, الله يرحمها عيل وينها عذيجه
وعد : ويه ما نسيت أخبركن تراها ولدت اليوم
وفا: ماشاء الله بس مب جنه المفروض بعدي بشهرين ؟؟؟
وعد : هي بس فجأه ياها الويع ويوم ودوها قالوا بتولد
وفا: الله يعينها .... هندووه نشن شوفن البنات أنتي وموزه
هند و موزه : ان شاء الله
مرت أيام العزا ثقيله ووعد كانت أتبات بيت أبوها عشان اذا احتاجوا روضه وحمده لشي وثاني يوم خبروا عذيجه اللي أصابها أنهيار عصبي وترقدت في المستشفى أسبوع .....
بيت بومحمد فارقته السعاده والكل صار سرحان ومهموم محد له بارض لشي ... حمد وعارف كل يوم يتضاربون على شي وهزاع يحايز مبينهم ....
روضه وحمده ,,, ما عاد ينسمع لهن حس في البيت وبما أنهن اجازه تناوبن في البيات عند عذيجه لين يرخصونها ...
حميد وايد أستانس لوجود وعد عنده وتضايق للي صاب يرانهم بس ما كان يقصر كل يوم يمر على بومحمد ويحاول يطلعه من عزلته ويلسته وحيد ,,,,
محمد ,,, قرر يطلب نقله من أبوظبي لدبي عشان يتم عند أهله
عارف الوحيد اللي من بعد وفاة أمه تغيرت أشيا وايد فحياته ... وقرب وعد منه خلاه يحن لذيج الأيام الي كان ما وده يفارقها ,,, من يومين تضارب ويا حمد ووعد يت أتحايز عن حمد
عارف : أنا وايد ساكت لك شو تتحرى البيت فندق تاكل وتسبح وأتبدل وتطلع ؟؟؟
حمد : والله أنت مايخصك فيني وأعتقد أبويه بعده عايشه فمالك حق تتدخل بحياتي أسوي اللي أباه ومثل ما أباه
عارف عصب ومسكه من كم كندوته : أنت يالحقير شو أتقول ومن وين أتييب هالرمسه الخايسه
حمد :شل أيدك عني يا عارف والا تراني بتصرف تصرف تندم عليه
عارف : والله تروعت منك ياحمود
هني تدخلت وعد اللي كانت في المطبخ أتسوي حبة الحمرا لعذيجه ... قربت منهم وعارف طبعا أستحى عويهه وترك أخوه
وعد : عارف أشوي اشوي عليه ومب بالضرابه تنحل المشاكل هذا أخوك
وأنت يا حمد عيب عليك لا زم تحشم أخوك الكبير وتحترمه واذا هو يكلمك فلأنه مصلحتك تهمه ومب زين عليك اللي أتسويه فعمرك الحين اذا انتوا الأخوان تضاربتو جنكم أعداء شو خليتوا لغيركم ؟؟؟؟؟
عارف نزل راسه ومب قارد يشوفها عين بعين ....
حمد :أنزين أنا ما سويت شي غلط يعني شو يباني أتم لازق في البيت أربع وعشرين ساعه مثل الحريم ؟؟؟؟
وعد: لاى ما يباك تلزق بالبيت بس بعد احترم البيت وناسه
حمد: ان شاء الله
عارف فخاطره ( حمود يالحقير والله لو ما وعد جان دفنتك في نص الحوي بس عشان خاطرها والله ساكت لك والا أففف يا ربي شو أتسوي فيني هاي والله أحسب بعمري مضيع وعقلي مب ويايه ،،، أستغفر الله هاي حرمة وعلى ذمة ريال ما يلحق لي أفكر فيها ... أفففف يارب تتطلق عشان أتزوجها .. وفجأه فز يوم سمع عذيجه تزقر عليه....
عارف : ياي ياي "أفف ما يخلون الواحد يتحلم"
عذيجه : خلاص حبيبتي أنتي روحي البيت وريحي والعصر بترياج عشان أنروح عند فهودي
وعد: ديري بالج على نفسج وأشربي حبة الحمره أبي أيي العصرأشوفج مخلصه الدله كامله تسمعين
عذيجه: ان شاء الله عمووووووووووه
وعد وهي طالعه تلاقت ويا عارف عند الباب هو يبا يدخل وهي تبا تطلع من نفس الباب فعلى طول ردت ورا وسوتله درب عشان يخطف وهو نفس الشي ما دخل وسع لها عشان تطلع وبعد ما أنتبهوا اثنيناتم ردو يدخلون ويا بعض بس عارف تم مبهت واقف يطالعها وهي منزله راسها من الفشله وطلعت .....
عذيجه : حوووووووووووه عروف ويهد
عارف : ههه ها شو فيج عنبو ليش الزعيج ؟؟؟
عذيجه :خلاص روحت وايد بتم واقف لي جنك حارس على الباب .؟؟؟؟ أدخل وسكر الباب وراك
عارف : ها ا أنزين أوكي
عذيجه : الحمدلله والشكر اللهم سكنهم في مساكنهم
عارف : خير يا أم فهد شو بغيتي ...
عذيجه : هو بغيتك بموضوعين نبدا في الثاني
عارف : على راحتج آمري
عذيجه : ما يامر عليك عدو .... حركاتك هاي ودرها من فضلك
عارف مصدوم : شو أي حركات ؟؟؟
عذيجه : عارف لا تستهبل علي
عارف : عذوج أحترمي نفسج تراني أخوج العود
عذيجه : الحمدلله أنا محترمه نفسي وعارفه جيمتي عدل الدور والباجي عليك
عارف عصب : عذيجه !! ما أسمح لج ,,, واذا فخاطرج شي أرمسي والا تراني بطلع
عذيجه "بحنيه " : عارف الله يهديك مب زينه هالعصبيه اللي فيك .. أنت وخوك كل يوم متضاربين حرام عليكم خافوا الله رحموا هالشيبه اللي هد حيله موت أمكم .... دمعت عيونها ... عارف أنت فاهم قصدي أنا الي أبي أقوله شي واحد بس ... وعد متزوجه وأتحب ريلها وعايشه مرتاحه وما أضن يرضيك أتييب لها الرمسه حركاتك مفضوحه وهي بعدها عند وعدها أنها ما أتطب هالبيت بس اللي صار جبرها على الييه فرجاءً ماله داعي الاحراج اللي تسببه لها .. أتراقبها جنك رادار ويتراوالك محد ملاحظ ....
عارف " تفاجأ أنه مشاعره فاضحتنه " : عذيجه أنتي شو أتقولين أنا أعرف أنها معرسه وعندها ريل ما يحتاي أتوصيني وأنا واثق من نفسي أني ما سويت شي غلط هذا موضوع وخلصنا منه شو عندج غيره
عذيجه بتردد : م ممم مبارك
عارف : شو فيه بعد ؟؟؟؟
عذيجه : من أمس يتصلبي
عارف : ههه سبحان الله ريال يتصل بحرمته فيها شي ؟؟؟؟ وليش ما رديتي عليه ؟؟
عذيجه : عارف أنت أتعرف رأيي بالموضوع ...
عارف :والله أنتي مب ياهل وعقلج فراسج وأتعرفين خلاصج ...
عذيجه : أدري عشان جي بغيتك أتخبره يطلقني وماله داعي يعرف أني ولدت
عارف فتح عينه عوسعها : أشوه يطلقج ؟؟؟؟!!!! أنتي ينيتي والا شو ناويه تذبحين أبوج وأتحطين راسنا في التراب ؟؟؟؟؟ لا يا عذيجه صح قلنا لج القرارا بيدج لكن قرار بايخ مثل هذا مب بايدج فاهمه
عذيجه وهي أتصيح :عارف حتى أنت ناوي توقف ضدي ؟؟!!! معقوله ترضالي الذل والمهانه ؟؟؟!!!!! واذا خايف عمصاريفي وولدي فطمن بالك اول ما أخلص من الأربعين بدور لي شغله وبصرف على نفسي وولدي
عافر تقرب منها والشرر يتطاير من عينه : أنتي هي شو ما تفهمين .... حاول يمسك نفسه عشان ما يرتكب فيها جريمه أبتعد عنها بعصبيه وقرر يطلع ويخليها أتفكر بعقلانيه ... وصل للباب ورد ألتفت لها
عارف : عذيجه مبارك أبو فهد ومن حقه يعرف بوجوده وأنا الحين ساير أتصل به وأخبره وعن الطلاق لا تحلمين نوافق وبعد ما أتخلصين الأربعين بيت أبوج يتعذرج ,,,
طلع وخلاها فدوامه أفكار أتوديها وأتييبها ,,, كيف يتخلون عني وهم أهلي وسندي من بعد اللي سواه مبارك ؟؟؟؟ كيف أرجع له وأسكن فبيته وهو حاطلي شريجه ؟؟؟؟ ليش محد يحس فيني ولا يقدر شعوري أنا بشر والله بشر يعني أنا ما غلطت بحقه فشي ليش يعاملوني جذه؟؟؟ اذا أهلي ما بيوقفون ويايه من أتوقع يساندني ؟؟؟؟ وتمت أتصيح على حظها الردي " والظاهر بتستسلم وترجع لريلها ...
عارف أول شي سواه بعد ما طلع عنها أتصل بمبارك اللي كان مسافر وراجع من يومين وخبره أنه حرمته ولدت ويابت ولد وسمته فهد وخبره بوضعه الصحي ورحب به اذا ناوي يزور حرمته ... مبارك أنصدم من اللي عرفه عن وفاة أم محمد وقرر يزور عذيجه بعد صلاة المغرب ...
وعد أول ما رجعت بيت أبوها سبحت وصلت ونزلت تتريا سلطان عشان يتغدون رباعه ...
وعد وهي أتجلب القنوات من غيرلا اتشوف التلفزيون أتفكر بعارف .... أنا يتراوالي والا هو صدق وفجأه حست بالدنيا أظلمت أتحاول أتشوف بس مب قادره في أيد راصه على عيونها ومتأكده أنه سلطان خلت نفسها عاديه ولا مهتمه
وعد :سلطان يوز عن حركات اليهال
سلطان : لا تعليق ................
وعد : أفف سلطان بس عاد يلا نش خلني أزقر باباتي يتغدى ويانا
سلطان : .........
وعد دزت إيده ونشت عنه وأول ما لفت أنصدمت : هههه عمي ؟؟؟؟
عبدالرحمن : يا سلام عليج يا بنت حميد ما أتشوفين الا ريلج ألحين هالجمال كله في سلطان ؟؟؟!!!!
وعد : ههههه نشت وايهته ... والله فديت ريلي طبعا جميل ...
عبدالرحمن : لا حول الله أسميكن بنات اليوم ما أتشوفن زين عيل أنا بذمتج لو أخطف من عند البنيات يتخبلن عليه ويقولن صوبنا يالحلو
وعد: ههههههههههههههههههه عمي والله أتضحك لا أتخليني أخبر عليك أم سهيل وأنت أدرى بها
عبدالرحمن : ههه لادخيلج خلاص بسكت
نوره : بووووووووووو
وعد : باسم الله الرحمن الرحيم أنتي من وين طلعتي
نوره ركضت وحضنتها : أناييت ويا يديه عشان أتغدى عندج
وعد : فديت روحج زين سويتي
عبدالرحمن : أنا تراني ما جذبت يوم مسمنج ساحره ثرج ساحره البنيه من يت وهي الا تباج ؟؟؟
وعد: أعوذ بالله من شر حاسد اذا حسد أتغار ؟؟؟؟
حميد : حيالله من يانا هلا والله بو سهيل أشحالك
توايهوا الشواب
نوره : السلام عليكم يدي
وعد : يالعيوز الحين أبويه أتقولين له يدي ؟؟؟؟
حميد : حي الله بنت سهيل وعليج السلام والرحمه أشحالج بنيتي
نوره : بخير يعلك الخير أشحالك أنت وشو أخبار عيالك وحرمتك وعيال يرانكم
وعد : وابويه عليج
حميد : بخير وعافيه ويسلمون عليج
عبدالرحمن : ههههههه الله يغربل أبليسكم بخبركم تراني ميت يوع ناوين تغدونا والا ؟؟؟
حميد :أفا عليك يا بوعوف ... وعد نشي أمايه شوفي ريلج وينه ؟؟؟
وعد: الحين بيوصل يلا نواري خلينا أنروح أنزهب السلطه
نوره : أوكي يلا
عبدالرحمن : الله يرحمج ياخلود وين أنتي أتشوفين بنتج حرمة بيت
حميد : الله يرحمها ويغفرلها ... الا يا خوي ما قلت لي سهيل أشعنه ماأتيوزه مره ثانيه البنت ياخوك محتايه لرعاية حرمه ...
عبدالرحمن : !!!! عجيب أنت يا حميد تطلع منك هالرمسه ؟؟؟
حميد : وليش لا وسهيل بعده صغير يعني لا زم يشوف حياته من بعد المرحومه
عبدالرحمن : الله يهداك يعني تحيده بيطلع غير عنك تراه ياخذ منك فكل شي حتى في هالشي أنا ورويه عيزنا نقنعه بس هو ميبس راسه ... يذكرني بك يوم أحن عليك تتزوج
حميد : لا ما عليك منه أنا بقنعه أنتوا بس دوروله بنت الحلال ونحن بنحاول وياه
عبدالرحمن : على طاري بنت الحلال ترا رويه أتقول بنت ناصر بوميثا ...
حميد : هي أعرفه تطري عم سلطان
عبدالرحمن : هي بارك الله فيك تقول بنته ما أذكر شو أسمها تقول راعية واجب ومربايه زين
حميد : والنعم ويازين ما أخترت
عبدالرحمن : لا وأتحب نوره وايد وهي ماخذه عليها
حمي د: زين عيل بمر عليه اليوم المغرب وبكلمه
عبدالرحمن : زين أتسوي وأنا أ خوك تراها رويه ماكله جبدها وهذا غير خالة البنيه كل يومين أتحن عراسه أونها تبي أتربي البنت عندها ...
حميد : لا والله الشور مب شورها والبنت بنتنا ودام أبوها عايش بتربى عندنا
عبدالرحمن : الله يهديه ويطيع ..
وصل سلطان وتغدوا يميع بعد الغدى كلن راح بدربه ،، نوره تمت عند وعد تبا تيلس عندها والمغرب بيردها حميد وياه ..
سلطان يالس ويا وعد : هي وعوده شو رايج باللي قلت لج عنه ذيج المره؟ ؟؟
وعد : شو ؟؟؟ ما أذكر
سلطان : وعوده شو هالنسيان اللي عليج قلت لج أنروح الفجيره
وعد: هي ان شا ءالله بس خل الأمور تهدى أشوي
سلطان : أي أمور ؟؟؟؟
وعد : أقصد أم محمد ما كملت أسبوعين من توفت وعذيجه بعدها محتايتني
سلطان بقهر : وأنا يعني مب محتاينج ؟؟؟؟
وعد : حبيبي أنا ما أقصد بس أنت تدري يعني
سلطان: خلاص عندج هالاسبوع آخر شي بعدها بحجز شاليه وما علي منج
وعد: هههه باسم الله شو بتخطفني ؟؟؟
سلطان : هي بخطفج كيفي حرمتي محد له خص
وعد : ههه انزين نش خلنا أنسير عند نوره بنلعب بلي أستشين
سلطان : يهااااااااااااااااااااااا ااااااااااااااااااااال
وعد : ما يخصك كيفنا
سلطان : أوووووووه نسيت
وعد : خير شو نسيت ؟؟؟
سلطان : ياشاطره زهبي عمرج اليوم بعد صلاة المغرب بمر عليج بنروح بيت عمي خطبون شهد
وعد : شهد ؟؟؟؟ أوه صدق تذكرت نسيت سالفتهم بالمره ... أنزين أتصل بسيف خله أييني
سلطان رافع حياته : ليش ان شاءالله
وعد تضربه عجتفه : ما يخصك سوالف شباب
سلطان : يا سلام سوالف شباب ؟؟؟ ما بتصل
وعد وهي أتطلع له لسانها : برايك روحي بتصل به
سلطان : قومي قومي خلني أجابل الحلوين ... نواري تعالي بنلعب سباق سيارات
وعد: انزين يا سلطون دواك عندي بعدين
سلطان : ههههههههه ما أخاف...
فبيت عوشه ...ان شاء الله يكون الجزء عند حسن ضنكم وأتنمى لكم قضاء وقت ممتع وترقبوا الجزء الـ 13 اللي تقريباً نصه جاهز
أتصل ناصر وخبرهم أنه بيت عمهم يايين بيخطبون شهد ... طبعاً أهتمن البنات بترتيب الفواله والميالس
مهره : حووووه وين سرحانه ؟؟؟
شهد : ها باسم الله روعتيني الله يغربل عدوج
مهره : ههه مسرع لحقتي تسرحين
شهد بضيج : سكتي عني والله ما أدري كيف أحس قلبي يعورني
مهره بحنان :شهوده حبيبتي ما عليج شر توكلي على ربج واللي الله كاتبه بيصير...
شهد : ونعم بالله ,,, الله يستر
فجأه سمعوا حشره وصريخ ربعوا الصاله يشوفون ميثا جالبه الدنيا على راس أمهم
ميثا : وكيف ما أتخبروني ؟؟؟ يعني أسمع الرمسه منه وأنتوا ما أتخبروني جي أنا مب أختها ؟؟؟
عوشه : تعوذي من ابليس يا أم سالم ماصار الا الخير
ميثا : أي خير وألي يناسب هالأشكال وين يشوف الخير
مهره تجدمت منها عشان أتوايها : أشحالج ميثا
ميثا : زينه ,, وعلى طول لفت على شهد وأنتي ليكون ناويه أتوافقين عليه ؟؟؟؟ هذا صايع ضايع ما تمت بنت الا ويعرفها
شهد : ما أدري ما أدري وركضت حجرتها ...
مهره : ميثا الله يهداج لاأتزيدينها روحها كافيها اللي فيها
ميثا : عاد أنا ماعليه منكم برمس أبويه وبتفاهم وياه كفايه عيشة الهم اللي عايشتنها
عوشه : ويدي شو هالمنكر أي هم الله يسامحج هذا وأنتي مب قاصر عليج شي هاي رمستج عيل جيف لو مقصر عليج بو سالم الله يطول بعمره ...
ميثا : أوهووووووووو أناسايره
عوشه : وين تبين شاله بعمرج القايله بتطلعين يلسي تراهم بيون بعد المغرب
ميثا : أمايه لا تقهريني زود خليني على راحتي ... فمان الله
عوشه : الله يحفظج ويهديج ...
مهره : هي ليش جي ؟؟؟ أبي أعرف شو قاصرنها عشان دوم تتبلى على الريال ؟؟؟
عوشه : ما قاصرنها شي يا غيرأنها بطرانه ومب ويه نعمه
مهره : أمايه أنا بروح أشوف الكيك اللي مستونه تامريني بشي ؟؟؟
عوشه : مايامر عليج عدو الله يحفظج أمايه بوطي راسي شويه وعيني لصلاة العصر
مهره : ان شاء الله ..
فبيت عبدالرحمن
سهيل : وين نوره ؟؟؟ ؟؟؟
وفا : عند وعد
سهيل : وعد ؟؟ جي هي عندنا ؟؟؟؟
وفا : لا أبويه سار يتغدى عندهم وسارت وياه وتمت هناك
سهيل : أفا وأنا
وفا : يا أخي أنت أمرك عجيب البنيه محتايه حنان وتبا حد يسمعها
سهيل :الله يسامحج يا أم سيف ألحين أنا مقصر عليها بشي
وفا وهي أتحط وعد فمنزها "سرير الأطفال " : أنت مب مقصر عليها بس هاي بنت محتايه لأم أتشوف طلباتها وأتداريها أنت شغلك ما يسمح لك تتواجد وياها على طول سهيل البنت بدت تكبر وحاجاتها تكبر ليش تحرمها شي أنت قادر عليه ...
سهيل :وفا أنتي شو أتقولين أنا شو بيدي وما سويته ...؟؟؟
وفا : بيدك ياأخوي تتزوج وأتييب لها أم ترعاها
سهيل : أتزوج ؟؟؟؟ كيف تطلبين مني مثل هالطلب وأنتي أدرى باللي فخاطري
وفا : سهيل خلود كانت أعز ربيعاتي وأنا أدرى باللي يرضيها صدقني حالك ما بيعيبها اذا أنت صدق أتحبها نفذ على الأقل وصاتها والا أنت ناسي وعدك لها بالزواج من بعدها ؟؟؟؟!!!!!
سهيل : والله صعبه يا وفا ما أقدر
وفا : لا تقدر واذا خايف من اللي تاخذها تكون مب زينه والا مااتعامل نوره عدل تطمن أحنا مستحيل أنرشح بنت ما تصلح لك
سهيل : ههه ومنو هاي اللي بترضى تاخذ واحد أرمل وعنده بنت
وفا : سهيل هالرمسه ممكن الأرمله أتقولها بس مب أنت أنت ريال وما يعيبك شي وبعدين الشرع حلل أربع بس أهم شي أنت تقتنع وما تظلم بنت الناس وياك ...
سهيل : الله كريم .... يصير خير
وفا : يعني موافق أقول لأمي أتروح تخطبها ..؟؟؟
سهيل : خييييييييييييبه وأنتن مجهزات البنيه بعد ؟؟؟
وفا: هههههههه هي شايفينها فعزا أم محمد وأنعرفهم من قبل بس الحين تقدر أتقول شفنا أنها تناسبك وبنتك أتحبها واااااااااااااااااااااااا اااااايد
سهيل : ؟؟؟؟؟؟؟ مني هاي ؟؟؟
وفا : أنت وافق قبل بعدين بخبرك
سهيل : عطيني فرصه أفكر
وفا: خذ راحتك بس لا تتحير عن أتطير البنت من ايدنا ونتحسف عليها ...
سهيل : أتطير البنت والا أغيررايي ؟؟؟
وفا: ههههههههههههههههههههه شيطان
هند : ههههههههههههههههههههههههه هههههه وفوي سمعي
وفا :أ شششششششششش حشا غودزيلا هب بنت سكتي حشرتي الدنيا والله لو نشت وعد بذبحج
هند : أفييييييييييييي شو هالبيت عنبو مايصير أنسوي شي
سهيل : شو هالشي العبيط اللي مضحكنج ؟؟؟
هند: عبيطه بنتك
سهيل نش وسارلها : نعم آنسه هند ما سمعت شو قلتي عيديها الرمسه
هند: وأنا رمست ؟؟؟ حشا علي
وفا: أنزين الحين شو تبين حاشره الدنيا من الصبح ؟؟؟
هند : عندي لج خبر يساوي مليون دولار
وفا :شو ؟؟؟
هند : مواز أنخطبت
وفا وسهيل : شووووووووو
سهيل : ومنو اللي خاطبها ؟؟؟
هند :ما أدري بس أمي كانت أتخبرأبويه أنه أم منصور تبيها لولدها منصور
سهيل : منصور هاييل اللي في العين ؟؟؟
هند : هي أعتقد
سهيل : بس منصور مطلق
وفا : واذا مطلق شو فيها ؟؟؟
سهيل : لا ما فيها شي بس ما أدري ما أعتقد موزان أتوافق
وفا : وليش ما أتوافق الكل يدري أنه منصور طلق حرمته لأنها مسويه سوا لأمه وبعدين لا تنسى هو بس ملج عليها وقبل لا يسون حفلة العرس طلقها
سهيل : ما أدري والله وأبوي شو رايه ؟؟؟؟
هند : قالها بالبركه اذا البنت موافقه
وفا : هندوه خليج عند وعد بروح أشوف شو صار
سهيل : أنا بعد
لو حلفت انك تبيني ،،،
وميت وهيمان فيني ،،،
بأعتبرها ألف كذبه،،،
طحت من قلبي وعيني ،،،
الذين يشاهدون الموضوع الآن: 1 (0 من الأعضاء و 1 زائر)
ضوابط المشاركة
رد مع اقتباس
مواقع النشر (المفضلة)