أموت أنا في حبهم

[الجنيه]

سيف: أبويه سلطان وسعيد ودوها المستشفى

بوسلطان: خلنا نلحقهم وتجدمه بس رجع له مره ثانيه .. سيف منو مودي أمك المستشفى!!!!!....؟؟؟؟؟

سيف: سلطان وسعيد

بوسلطان: سلطان رجع؟ ؟؟؟!!!!!

سيف : هي نعم رجع يابويه وهو بخير









في المستشفى الأمريكي قسم الطوارئ



سلطان دخل القسم وهو يركض شال أمه وعلى أول شربيه لقاها عند المدخل حطها وطلب الدكتور

قسم الطوارئ معتفس فوق حدر الي يصارخ واللي يتألم والي يركض ...

حس نفسه وسط دوامه مب عارف كيف يتصرف

دخلو أم سلطان غرفه العنايه المركزه والدكاتره حولها اللي يقيس الضغط والي يشوف دقات القلب والي ....

سعيد وسلطان واقفين عند الباب يراقبون اللي يصيرمن فتحه زجاجيه في الباب ... ولا واحد منهم نطق بكلمه



ثواني وسمعوا يولة وراهم وأول ما ألتفتوا شافوا مجموعه كبيره من الدكاتره ووياهم مريضه على السرير

سلطان لفتت نظره وماقدر يشيل عينه عنها وسعيد على طول راح صوبها ... سلطان تم واقف مب مستوعب اللي يشوفه

ياربي هاي نسخه من وعد سبحان الله صدق يخلق من الشبه أربعين ... أستغفر الله العظيم الله يشفيها و شل عينه عنها

سعيد ليش راز بويهه وساير عندهم عوذ بالله من الفضول اللي فيه مودر أمه وساير يتطالع بنت الناس ... أفففف

سلطان : سعيد يا سعيد شو أتسوي الله يهداك

سعيد : سلطان أتصل بأبويه سلطان تصرف وعد ماأدري شو فيها الدكتور مب طايع يرمس

سلطان اللي انصدم وحس أنه قلبه بيوقف ... هاي وعد ؟؟؟!!! يعني وعد ما صار لها شي ؟؟؟!!! سعيد وعد بخير ؟؟؟ وعد ما ماتت

سعيد : سلطان أنت شو أتخربط وعد مافيها الا العافيه بس هي فغيبوبه ... سلطان دخيلك تحرك سر للدكتور شوف شو صار عليها

سلطان من الفرحه مب عارف كيف يتصرف صح قلبه عوره عليها لأنها فغيبوبه بس بعد هو مستانس أنها ما خلته وراحت

سعيد : سلطااااااااااااااااااان مبرد أعصابك أنت شو ما أتحس أقولك حرمتك ما أعرف شو ياها واقف شاق الحلج وأتوزع إبتسامات ؟!!!!!

بهاللحظه بالذات دخلو سيف وبوسلطان وعلى طول بوسلطان لوى على سلطان بالقو تم لاوي عليه فتره طويله وسلطان مستغرب أول مره

يحس بحنان أبوه أو بالاحرى أول مره يحس بحاجة أبوه له .. ما تعود يشوفه بهالحاله بس اليوم غير سلطان مب قادر يستوعب الي يصير

بيوم واحد يعرف غلاته بقلب أبوه ويعرف أنه حياته وكل دنياه حيه ترزق ... اللهم لك الحمد والشكر ياربي اتساعدني وأتخفف عنها

بوسلطان بعد ما شبع من ولده : سلطان بويه أنت وين سرت عنيه ؟؟؟ ليش جي ياولدي خليتنا نستهم عليك

سلطان تجدم من أبوه وحب راسه : السموحه منك يابويه والله غصبن عني ما أدري ليش تصرفت جذه أبويه وعد مامات أبوي وعد بترجع لي

بوسلطان: بإذن الله بتقوم بالسلامه وترد شرا قبل .... سلطان أمك شو صار عليها ؟؟؟؟

سعيد : أبويه أمايه الدكاتره عندها بعدهم ما خلصوا فحوصات ... أبويه ... وسكت

بوسلطان : خير يا سعيد شو فخاطرك ؟؟؟؟

سعيد : ماشي سلامتك ... أنا وسيف بنروح أنشوف وعد وبرنجع

سلطان: سعيد وين بتروح خلك عند أبويه وأنا بسير أشوفها

بوسلطان: سر يابويه سر شوف حرمتك الله يرحمنا برحمته

سلطان وهو ساير صوب غرفة الطوارئ شاف خليفه داخل مستعيل ويا ولده وحرمته ميثا....

سالم أول ما شاف سلطان ركض عنده ولوى عليه : عمي فديتك الحمدلله على سلامتك وين سرت ليش جي أتسوي فينا ليش

خليفه : سلطان وينك يالغالي شو أخبارك طمني عليك

سلطان وهو مب عارف يفسر الأحاسيس الغريبه اللي أجتاحته وعلى طول لوى على أخوه وتم بحضنه مثل اللي يدور على الأمان

حس أنه خلاص في وراه سند عنده شخص يقدر يعتمد عليه حس براحه عجيبه وهو بحضن أخوه ماوده يفارقه للحظه ......

ميثا: بسكم فضحتونا شو ها حتى الحريم ما سون حركاتكم

سالم: أمايه لو سمحتي إرحمينا وأسكتي يعني ما قدرتي تتحمدين له بالسلامه بس افتشلتي يوم شفتيه بحضن أخوه

ميثا: أنت قليل الأدب حد قالك هالشي

سالم : طبعا بكون قليل أدب يوم أنتي أمي

خليفه ما حب يفوت هالفرصه عليه وخلى أخوه على نفس حالته لين يرتاح .. بس كلم ميثا بصوت واطي : ميثا مب وقته الحين

أنا قلت لج من البدايه ييتج مالها لزمه ....

ميثا :أنت بدل لا أتسنع ولدك أتسمعني هالرمسه اللي تسم البدن الله يسامحك ياخليفه أظن لو أنا مكان وعد جان تزوجت علي من ثاني

يوم ولا افتكرت ....

سلطان:ميثا لا اتقولين جذه الله لا يقول أيي مثل هاليوم

ميثا: بس الفرق ناس أشطر من غيرها مجهزين الدوا من قبل الفلعه

سلطان ارتبك حس أنه ميثا قصدت تقول هالرمسه وكأنها أتعرف بسالفته بس تدارك الموضوع وما بغاها تتمادى أكثر : الله يهديج يا ميثا

خليفه اللي خلاص مب قادر يتحمل كلمه منها : ميثا أندوج سويج السياره يلسي فيها وان بغيتي اتصلي بالدريول خليه يردج البيت ... سلطان أبويه وين؟؟؟

أمايه شو ياها ؟؟؟ وليش ما أتخبروني والا خلاص بعيد عن العين بعيد عن القلب

سلطان: ما أدري يا بوسالم أنا روحي توني حادر البيت شفت أمايه طايحه عليهم ما دريت بعمري الا وأنا في المستشفى وياها ....

خليفه : أبويه وين وشو قال الدكتور وينهم خلنا أنيسر عندهم

سلطان : بوسالم هم في قسم الطوارئ الصوب الثاني

خليفه : يلا عيل سرينا

سلطان: برايكم تجدموني بسيرأتطمن على وعد

ميثابصوت عالي : خليفه شو ها أنا طوفه هبيطه عندكم ؟؟؟؟

خليفه : ميثا ردي البيت أخير لج لا أتخليني أتصرف تصرف تندمين عليه طول عمرج

ميثا : لا ياخليفه ما عاش من يهددني

خليفه لف عليها والشرر يتطاير من عيونه وهو يرص على أسنانه : شو قلت أنا ؟؟؟؟؟

ميثا طلعت بتروح السياره وهي تتحرطم

خليفه: سالم شو موقفنك هنه الحق أمك أتصل بعلي وصلها البيت وأرجع ان بغيت

سالم : ان شاء الله (تم يتحرطم فخاطره يعني من زود حبها ليدتي يايه ويانا أفففففففف)



وصل سلطان عند الغرفه اللي فيها وعد دقات قلبه متسارعه خايف ومستانس بنفس الوقت ... أحمدك يارب أهم شي بشوفها

بقدر أكلمها مثل قبل بتكون لي وحدي يارب أتقدرني أسعدها يا رب أتساعدها يارب تشفيها .... أستجمع قوته ودخل الغرفه

كانت مغمضه عيونها وعلى ويها إبتسامه هاديه .. مثل ما هي دوم مبتسمه معقوله تكون فغيبوبه ؟؟؟ لا ما أظن أكيد نايمه وهم يجذبون

انتبهت الممرضه عليه : عفوا شو عمل تعمل هون ؟؟؟؟

سلطان : ااه أنا زوجها

الممرضه: آسفه أستاز ... أتطمن صحتها كتير منيحه يعني ما في شي بيخوف الدكتور بيقول احتمال تستعيد وعيها هيدا الاسبوع بالكتير

سلطان : والله متأكده أنتي

الممرضه : أكيد أستاز وهيدا التقرير وازا بدك أتشوف الدكتور المناوب ببلغو

سلطان: أكيد الله يخليج بس خبريني وين مكتبه بروح عنده

الممرضه : منا مشكله بعد نص ساعه بدوا يعملا جك أب ثاني فيك تحكي ساعتها

سلطان: ان شاء الله مشكوره ... ممكن أقعد عندها ؟؟؟؟

الممرضه : أي أكيد ... وطلعت عنهم

سلطان تقرب من السرير مد إيده ولمس خدها حس برعشره تسري بجسمه رفع إيده عنها ... مسك ايدها ونادى عليها بهمس

وعد... حبيبي ... مافي جواب كرر المحاوله : وعد يالدبه ردي علي أنتي ما أتعرفين شو صار لي وعووود والله كنت بموت

روعتيني عليج يالعنز ما أحبج أنزين وأنا زعلان نشي والا ترا صدق بروح عنج ولا بتشوفيني أبد ....

وعد خلاص أنا آسف والسموحه منج ... مممم وعد ترا بومحمد وبنته بيزورونج باجر ربيعتج بعد موجوده هي محتاجتنج ألحين يعني لازم اتنشين

وعوووووووووووووود والله حرام عليج ارحمي حالنا وعد أمايه طاحت علينا ما أدري شو ياها ،،، وعد ماماتي نشي الله يخليج أنا محتاجنج والله

الكل ضايع من دونج أبويه يا وعد الدمعه ما أتفارق عيونه وأنتي أتعرفين غلاتج عنده ما يحتاي حد يقولج وعد أرجووووج ،،،

خلاص بهاللحظه أنهار سلطان ماقدر يمثل دور الانسان الصابر اللي ما يتأثر بالمشاكل بدت دموعه أتهل ويغزاره سكت عن الكلام ودموعه

هي اللي عبرت عن اللي فخاطره عن حزنه ،،، عن خوفه ،،، عن حاجته لأغلى ناسه ،،،،



دخلت الممرضه الغرفه وشافت سلطان بهالحاله غمضها : له له ليش هالدموع استاز لشو عم تبكي انت انسان مؤمن والمفروض بهالوقت تدعي لا

سلطان حس بالاحراج وعلى طول مسح دموعه ما قدر يرد عليها بس اكتفى باتسامه مغصوبه .....

الممرضه : هيك بدنا أنشوف هاي الابتسامه الحلوه .... هلا الدكتور بيمرق عليكون ... تؤمرني بشي استاز ؟؟؟؟

سلطان : مشكوره ما اتقصرين

الممرضه : خليك مبتسم هيك بتحس فيك وبتسمع لك

سلطان ومن كل قلبه : أتمنى تسمعني وترجع لي ،،،،









في بيت عوشه أم ميثا



عوشه : بلاج مويمه (مبوزه ) يا ميثا هذا مب وقت عتب وضرابه الله يهداج وأشعنه ما خبرتيني يوم عن نوره

ميثا : امي الله يهداج أنا فوادي وأنتي فوادي يعني أقولج ولدي ما يحسب لي حساب وأبوه مساندنه

عوشه : والله محد سوابه جذه غيرج يا ميثا عيل كيف تبينه يحترمج وأنتي ما تحترمين يدته ؟؟!!!!

شهد : الصراحه سلوم فديته محد أحسن منه وأحسبه يتضايج من تصرفاتج ويا أهل أبوه أنتي حاولي تاخذينه بالزين هو مراهق

والكلمه الحلوه أتأثر فيه ...

مهره : طيعي الشور يا ميثا أنتي أبخص بمصلحتج ومصلحة عيالج

ميثا: هاللي ناقص قومن ضربني وعلمني السنع على آخر عمري هاليهال يتفلسفن عليه

عوشه : وانتي كلمه الحق تكون تفلسف على قولتج ؟؟؟!!!!

ميثا : أوهووو أنا الغلطانه أصلا لو رايحه بيتي أخير لي تصبحين على خير ... وينه محي الدين خليه يوصلني

عوشه : ميثا باجر بمر عليج بنروح عند أم سلطان واعليه عليها ما تستاهل

ميثا : أنا مشغوله باجر خذي البنات وياج

عوشه : ويدي شو الي شاغلنج وعمتج مرقده في الدختر ؟؟؟؟!!!

ميثا : عندي جلسه ليزر في الصالون ماأقدر أفوت الموعد

عوشه : شو جلسته هاي بعد ؟؟؟؟!!

شهد : أمايه هاي جلسة تنظيف بشره بس بأشعة الليزر

عوشه : الله أكبر عليج وأشله هالغربال بشرتج ما يبالها شي ... اسميج أنتي عياره

ميثا : يلا وداعة الله ...







في بيت بو محمد

عذيجه وهي أتصيح : فديت روحها والله أصيله

عارف : والحين هي كيف حالها ؟؟؟

عذيجه : ما أدري يا عارف أبويه يقول في غيبوبه والدكتور يقول احتمال توعى الاسبوع الياي

عارف : انتي زرتيها ؟؟؟؟

عذيجه : لا الصراحه ما بتحمل أشوفها مرقده من دون حس

عارف : الله يسامحج الحين هي وصلت لهالحاله بسبتج وما تبين أتسيرين عليها !!! ما يصير

عذيجه : والله مب عن شي بس ما أبي أشوفها بهالحاله ... الحين وعد البشوش الانسانه الحبوبه يصير بها جذي ليش ياربي ليش

عارف: استغفري ربج وتعوذي من ابليس ادعيلها مب وقته هالكلام أبد وباجر الصبح اجهزي أنا بوديج عندها ...

عذيجه : ان شاء الله ... يلا تصبح على خير ....

عارف : عذيجه

عذيجه : لبيه

عارف : لبيتي حايه قولي آمين

عذيجه آمين ... خير بغيت شي ؟؟؟؟!!!!

عارف : ما أتقولين لي لين متى ناويه أتمين على هالحاله ؟؟؟

عذيجه : أي حاله ؟!!

عارف : عذوج ماله داعي الاستهبال

عذيجه : عارف اللي صار مب شويه عليه أنا بشر يا عارف عندي احساسيس

عارف : عذوجه فديتج كل شي بالتفاهم ينحل

عذيجه : أي تفاهم يا عارف أنت شو أتقول ؟؟!!! تبيني أرجع للي أهاني للي جرح احساسي واللي باعني برخص التراب ؟؟!!!!!

مستحيييييييييييل

عارف : يا عذيجه الله يهداج بعد كمن شهر بتولدين وهالولد شو مصيره فكري فيه على الأقل لو ما أتهمج مصلحتج والريال ما سوا

شي غلط تزوج خير شو يعني ترا الشرع محلل له أربع والا نسيتي

عذيجه : عارف ..... صدقني ما بتحسون بوجودي ولا بكلف عليكم بمصاريفه بشتغل وبصرف على نفسي وأنا الي أقول أخوي سندي درت ضدي

وياه لأنه ربيعك وأنا صرت الغلطانه الحين ...

عارف : عذوج شو هالرمسه الخايسه أنتي أختي وتاج راسي ما أبيج أتفكرين بهالطريقه مستحيل أتعايز أصرف عليج وأنا ما قلت هالكلام الا

لمصلحتج مب لأني متآذي منج أو شي ....

عذيجه : عارف بلييز غير الموضوع

[الجنيه]

حمد(21) + هزاع(20) : السلام عليكم ورحمه الله وبركاته

عارف وعذيجه : وعليكم السلام ورحمه الله وبركاته ... .

عذيجه : ماشاء الله وايد من وقت راجعين الحبايب !!؟؟؟ جان كملتوا لـ 12

هزاع : أنا ما يخصني من زمان مخلص وأتريا حماده يمرني بس هو متأخر في السينما

حمد : عذوجه والله كنت ويا الشباب نتعشى وتأخرنا أشويه وبعدين توها 11 ونص

عذيجه :لا والله

حمد : فديت أحلى أخت وأغلى ناسي فديت روحها

عارف : بسك تقردين وأنا ساكت لكم من زمان أنتوا الاثنين كم مره منبه عليكم قبل الـ 11 ترجعون البيت ما يخصني

شو كنتوا أتسون والا ليش المهم 11 انتوا منثبرين في البيت ...

حمد : أففف تفلسف الأخ .. والله أظن أبويه بعده عايش وهو اللي يحاسبنا مب أنت

عارف : نعم نعم شو قلت عيدها الرمسه أشوف

حمد : مب متفيج لك

نش له عارف وشكله ناوي له نيه مب زينه : شو قلت ؟؟!!!

عذيجه : حمد .... عيب عليك كيف اترمس اخوك العود بهالطريقه ها ؟؟؟ عارف لو سمحت ماله داعي تتجاتلون نصايف الليل

بتذبحون أمي روحها اللي فيها كافيها ... زوز شل حماده وسيروا رقدوا

عارف: هذا مب متربي أخوج بس أنا اللي بربيه يا عذوج

حمد : روح زين

هزاع : حماده الله يغربلك اسكت ما نبا مشاكل

حمد : روح لاه يالجبان شو يعني أخوي العود والله أنا مب ياهل يتحكم فيه ولا بنيه انزين

هزاع : أنا مب جبان أوكي واذا أنت اتشوف طولة لسانك هاي شطاره فأنت غلطان ... أنا ما أخاف منه بس أحترمه لأنه أخوي الكبير فهمت

حمد : عيل ما أشوفك تحترمني يالهيس

هزاع : بخبرك تراك مصدق عمرك وايد .. قم قم خلني أرقد



دخلت غرفتها اللي ما تغير فيها شي ... على يسارها طاوله صغيره تتوسطها فازه كبيره على شكل قلب محتفظه فيها بالورود اللي اهدوها لها

من ربيعاتها من اخوانها من زوجها .. حست بغصه دارت دمعتها اللي هلت غصبن عنها .... استرجعت ذكرياتها الجميله

تذكر أول ما خطبها مبارك كانت أتحس بخليط غريب من المشاعر ما أتعرف كيف تتصرف وعلى طول راحت لوعد اللي وقفت وياها وفرحت لفرحتها

لليوم تذكر رمستها ....

عذيجه :وعود لحقي علي

وعد : باسم الله اشفيج توني مسكره عنج شو بغت أمج وما كانت تبيني أعرف؟؟؟

عذيجه : تدرين امايه شو كانت تبا مني ؟؟؟؟

وعد : أنتي هبله والا تستهبلين توني أسألج

عذيجه : هههه والله ما أنتبهت وعود أنخطبت وعلى طول غطت ويها بايدها وأحمرن خدودها

وعد : ههه أتصدقين أنا عرست وعندي ياهل

عذيجه : وعود يا حماره ما اتغشمر جد أرمس أنزين

وعد : قولي أحلفي

عذيجه : هههه والله وعود مبارك بن حارب خطبني

وعد : خييييييييبه ما جذب خبر حشا مب كلمه سبال هاي اللي خبلتبه

عذيجه : أويييه وعود تعتقدين خطبني عشان ينتقم مني

وعد : باسم الله شو هالخراريف شو ينتقم ما ينتقم ما يبالها رمسه أصلا هو خبلتيبه من شافج والا نسيتي نظراته كان بياكلج بعيونه

عذيجه : وعود شو أسوي

وعد : قومي أرقصي..... عذوج شو هالرمسه اصطلبي أشوف وخليني أنصحج

عذيجه : مصدقه عمرج أنتي

وعد: عذوج بسرعه أتقوليلي كل اللي صار من طأطأ للسلام عليكو ما يخصني ...

عذيجه : ماشي أمايه قالت لي عذيجه ناس خاطبيـــ و أتقاطعها وعد ... أنا شو قلت ؟؟؟! من البدايه أبي من أول ما قالت لج سكري التلفون

وتعالي حجرتي أبيج بسالفه ...

عذيجه : أنزين أنتي أتعرفين البدايه

وعد: ما يخصج يلا بسرعه

عذيجه أنزين بس لا اتقاطعيني

وعد: أوني يلا ارمسي أطربيني

عذيجه : أول ما سكرت عنج سرت عند أمايه الحجره شفتها تبتسم وتتطالعني بنظرات حسيت أن السالفه فيها إن جان

تقول لي (وهي أتقلد أمها ) عذيجه يا بنتي أنتي أتعرفين أنه كل بنت مصيرها بيت ريلها وأنتي ماشاء الله عليها مب ناقصنج

شي ويا اليوم اللي بتصيرين فيه حرمة بيت ومسؤله من ريال ....

وعد وهي متأثره وعايشه الموقف: واااااو

then , what happend tell me

عذيجه :قلت لج لا ترمسين انزين ...

وعد : أوكي

عذيجه : طبعا أنا كنت مستحيه وساكته وبعدها جان تسألني أتعرفين مبارك الكتبي ربيع أخوج عارف ؟؟؟

هزيت راسي بلا طبعا ما أقدر أقولها أني سبيته يوم تحريته يلاحقنا على الشارع ههههههه

وعد : تتخيلين كانت بتذبحج والله

عذيجه : هههه هي والله ... المهم قالت لي هو خطبني من أبويه وأبوي موافق مبدئيا ويبون يشوفون رايي قبل لا يقربون بهم

وعد: حظج عذوج عندج أم وخصوصا في هالوقت البنت وايد تحتاج أمها

عذيجه : وعوده حبيبتي ماماتي ماماتج صح يعني ماله داعي هالكلام كله .....

وعد اللي ما حبت أتخرب على ربيعتها فرحتها ووناستها تصنعت البسمه وكملت وياها : عذوج أوييه شو بفصل حق ملجتج

عذيجه : ههه ضحكتيني والله ماماه ماشي حفله ملجه وخرابيط بنملج وبنفس الاسبوع العرس يعني فكري بفستان العرس على طول

وعد : خيبه ليش جي مستعيلين هم ؟؟؟

عذيجه : الله يسلمج ترا هو نازل اجازه ثلاث شهور بعدين بيرد أستراليا يكمل دراسته فقبل لا يرد يبا يعرس وبيشلني وياه

وعد: عذوج بتروحين وأتخليني بروحي ؟؟؟!!!!

عذيجه : وعوده يالدبه أنتي ليش أتجهزين الدوا قبل الفلعه اذا صار نصيب ما اقدر أقول لا وبعدين بس سنه وبنرجع ان شا ءالله

وعد : حلو أتصدقين أحسن عشان أتصير سنه عسل بدل شهر عسل ...أنا بعد يوم بعرس بسير وياريلي سنه شهر عسل

عذيجه :اي استحي عويهج انزين

وعد: هههههههههه من حقي كيفي بستانس ويا ريلي ما يخصج

عذيجه : وعود الاسبوع الياي بييون وهو بعد عشان يشوفني

وعد : شو هالمنكر ماجنه شايفنج بعد ليش هالمنكر

عذيجه : ما ادري والله أنا من الحين حاسه بربكه شو بسوي اذا صدق يوا !!!

وعد: بس تدرين أحسن تقدرين تسألينه عن السبب اللي خلاه يخطبج منه تاخذين وتعطين وياه ومنه تتأكدين أنه ما يبا ينتقم منج عقولتج

عذيجه : أميي ما أتخيل عمري أكلمه

وعد : باسم الله جي شو دراكولا والا بياكلج يعني

عذيجه : بعدين تعالي أصلا تعتقدين بيخلونا انرمس بعض ؟؟؟ ما أظن

وعد: ليش حبيبتي نحن مب في عصر الجاهليه عشان ما يخلونج أتشوفينه وأتكلمينه اذا الشرع حلل للخاطب يشوف اللي بيخطبها

منو يقدر يعترض ؟؟؟

عذيجه: ما ادري أحس عارف ما بيطيع

وعد حاست بوزها : شو وليش منو عارف ان شاء الله أهم شي أبوج راضي محد له خص

عذيجه: وعدوه توه الناس على هالسالفه بس لازم اتيني بعد باجر تراهم بيون

وعد: عذوج حبيبتي والله ما أقدر صدقيني كل شي بيكون أوكي لا أتحاتين

عذيجه : خلاص وعد كفايه 8 سنين وأنتي ما حدرتي بيتنا بس هالمره تعالي عشان خاطري ما أبي أتم روحي بلييز

وعد: يالهبله ما بتمين روحج عندج روضوه وحمدانه

عذيجه : بتذبحج حمده لو تسمعج تقولين حمدانه

وعد: اتولي ما يخصها أصلا كيفي أقول اللي أباه



..................



في العين وفبيت مزنه تحديداً

فاضل: مزنه أنا السبب بالي أنتي فيه وأنا الي بحل مشكلتج

مزنه: فاضل دخيلك ماله داعي أتسوي شي وأنا ما عندي أي مشكله الحمدلله عايشين أنا وعبادي ومب محتايين شي

فاضل : أنتي شو ماأتحسين كل هذا وأتقولين ما فيني شي ليش يامزنه أنتي ما لج ذنب واذا هو مب قدالمسؤليه ليش يعذبج

مزنه: فاضل الظروف اللي يمر فيها ألحين وايد حساسه وأنت أدى وأنا ما أقدر أبني سعادتي بهدم بيت غيري

فاضل : لين متى يا مزنه وأنت صابره يعني قبل لا أتكون فحياته غيرج ما كان هذا حاله

مزنه: أنت أكثر واحد لازم تعذره وأنت عارف الظروف الي تزوجنا فيها

فاضل : ماله عذر يا مزنه محد قاله يستعرض بطولاته

مزنه: فاضل هو ستر عليه ولا له دخل باللي صار ... فاضل لا تنسى أنك السبب في اللي صار

فاضل نزل راسه ماله ويه يرمس كيف يعترض او يعصب وبالفعل هو كان السبب في ضياع أخته ومستقبلها المجهول

تذكر قبل سبع سنين وبالتحديد يوم ولادة حميد

رغد فجأه تدهورت حالتها الصحيه واتصلت بمزنه تستنجد بها بما أن فاضل كان مش موجود وتلفونه مغلق

رغد: دخيل الله يامزنه عجلي ما عادي فيني أتحمل

مزنه: ان شا ءالله رغد انتي هدي بالج بعد أشوي بكون عندج بحاول أطلع من دون ما يشوفوني أهلي

رغد: حاسه حالي بمووووت يا مزنه والله بموووووت

مزنه: باسم الله عليج تعوذي من ابليس الحين بييج يلا باي ..

سكرت عنها وعلى طول لبست عبايتها وشافت الأوضاع في البيت ... أمها وأبوها وأخوانها الصغار في دبي

أخوها بدر وحرمته سايرين بوظبي .... خالد الوحيد اللي في البيت وراقد يعني الأمن مستتب تقدر تطلع وترد من دون لا حد يعرف

اتصلت بفاضل وقالها أنه عند الباب ... أول ما طلعت شافت مرسيدس أسود مخفي وعرفت أنها سياره أخوها .....

دخلت وقعدت عداله

مزنه: يلا فاضل بسرعه تحرك بسرعه

..... : أنطلق بسرعه الصاروخ وما مداها أتفج الغشوه الا شافت شي ما توقعته أبد ... الشخص اللي يسوق مب فاضل أخوها

أنصدمت وماعرفت شي أتسوي على طول وبكل براءه سألته أنت منو ؟؟؟؟






تحياتي الجناويه