في ميلس الحريم
وعد : السلام عليكم ورحمه الله وبركاته
الكل : وعليكم السلام والرحمه
أم سلطان أول ما شافتها ارتاحت وعلى طول خذتها بحضنها الشي اللي خلا ميثا تحترق ومن غيضها تمت تضحك عليهم بصوووووت عالي
ميثا بصوت مسموع على الخفيف : شو هالتمثيليات اللي يشوفهم جنهن من سنه هب متشاوفات
عوشه: هلا والله بشيخه البنات هلا بالعروس
وعد وهي تهمس في اذن أم سطان : السموحه منج عموده ها كله من سلطان هو الي غلق تلفوني وانا ما ادري
أم سطان: برايج فديتج المهم تطمنت عليكم
وعد وهي أتحب راس عوشه : اشحالج خالتي عوشه شو أخبارج عساج مرتاحه ... وبعدين خلاص انا جيمت لين متى بتم عروس ؟
عوشه: حبتج العافيه أنا بخير فديتج أنت شو مسويه عساج مرتاحه ... برايج فديتج الحرمه لين تحمل بأول ياهل اتم عروس
وعد: بخير ونعمه ... الله يسمع منج خالتي
عوشه: الله يرزقج بالذريه الصالحه ..
وعد وهي مستانسه : آآآآآآآآآمين يا ربي
كملت وعد وهي اتسلم على كل الموجودين لين وصلت عند ميثا الي وايهتها بنفس خايسه
ميثا : ياجماعه للي ما يعرف هاي حرمة حميي(حماي) سلطان
العنود ربيعة ميثا: ماشاء الله عليها شكلها حبوبه
ميثا اتخزها بعينها : اتنكتين حضرتج
يلسن الحريم عبرد والبنات عبرد .. سوالف حش نميمه وسوالف حريم يعني
بعدها راحوا يتغدون وطبعا ميثا كانت مسويه قائمه طويله عريضه فيها مالذ وطاب
بعد الغدا يا دور التحليه فنشت وعد عشان تغرف للحريم الكبار يعني اللي يتعايزن عن النشه وكبا رالسن
طول الوقت كانت عيون العنود اتراقبها أتحاول أتشوف فيها عيب أو صفه ممكن أتكرهها فيها بس مالقت استغربت من ميثا كيف ممكن تكره
هالمخلوقه البريئه ... اتساعد الكل واتسولف وياالكل متواضعه مع أنها بنت عز أنا متأكده أنه العيب فيج ياميثا والا وعد ماعليها زود
صح هي مش حلوه مثلج بس حلاة أخلاقها تلغي أي نقص فيها .... وفجأه انتبهت على وعد اللي ماخذه صحن مليان حلو واتقدمه لها
العنود: مشكوره فديتج ماقصرتي ليش تعبتي روحج كنت بنش آخذ لي وبعدين حرام عليج ها وايد ما أقدر آكلها كله بنتفخ
وعد: ههههههه وليش شو فيهم المنتفخين فديتنا اشحلاتنا كوتوموتو
العنود : ههههههههههه ماشاء الله عليج وايد كيوت الصراحه خلاص عيل تاكلين ويايه
وعد : صحيح أنه الحلو ما ياكل حلو بس عشان خاطرج ما بردج
وفي هاللحظه بالذات ... ميثا: العنود شو هذا حشا بتنتفخين ليش جذه تارسه صحنج والرجيم شو سويتي به
العنود: هه حشى يا ميثا فضحتينا وعد يابته لي وما حبيت أردها
ميثا: اذا على وعد عيل عليج العوض لا رجيم بينفعج ولا رياضه
العنود : حرام عليج ليش اتقولي جذه بتسمعج والله حرام
ميثا : وأنا الصادقه مافي ريال يبا حرمته منتفخه شرا البالونه جذه
العنود : الصراحه أنتي اتبالغين هي صح مليانه بس هب شرات البالون مثل ما اتقولين
وعد اللي كانت تسمع كلام ميثا ما أهتمت ولا فكرت أترد عليها بس عوشه هي اللي ما عجبتها تصرفات بنتها فتدخلت تدافع عن وعد
عوشه: ما أزينها وعد فديت روحها عيل شو خانتها الحرمه اليابسه شرا السعفه ما تنطاق
ميثا: والله الناس أذواق
أم سلطان: الله أكبر ذكري الله عن تحسدينها ... ماشاء الله عليها هب متينه لهاي الدرجه بالعكس حلو الجسم المليان عليها
ميثا: أندوكم منو اللي يرمس أنتي أشعرفج بهالأِشياء الرياييل هالزمن ما يبون اللي شراتها
أم سلطان: الرياييل غير وولديه سلطان غير
وعد اتكلم أم سلطان : فديييييييييييييييييت ماماتي والله أمووووووت فيج ليش اتحرين عمرج يالغاليه
برايها هذا رأيها وأنا أحترم راي الناس واذا ريلي مرتاح وعايبنه ما يهمني راي حد ....
مهره وهي تهمس لشهد : ههههههههههههه شهود اسمي أنه رد وعد أفحمها أنا أموت وأعرف ليش ميثا معاديه وعد ليش
شهد: بسيطه ياعبيطه أتغار منها ما اتشوفين سلطان كيف يموت فيها وريلها مب متحملنها شي طبيعي اتغار
مهره: صدق أحسد وعد على طولة بالها مع أنها أصغر مني بس أحسبها أفهم منا كلنا عقلها يوزن بلد ماشاء الله
شهد: أحلفي وعد أصغر عنج يالعيوز
مهره : هي والله ليش انتي ما تدرين كم عمرها
شهد: لا ما أعرف كم؟؟؟
مهره : 23 ما ادري 22 بس أكيد أصغر مني
شهد: ماشاء الله عليها الله يسعدها ولايحرمها من اللي أتحب
فهالوقت في واحد يتحرقص يبا يدخل عند الحريم يسلم على وحده عزيزه على قلبه ويحبها وووووووووووووووايد
سهيل : أففف يا ربي شو هالحاله الصراحه متوله على خالتي وعد صدق اشتقت لها
عمران (ربيعه وولد يرانهم ) : أنت أي شو هالرمسه عيب عليك هاي حرمة عمك شو هالكلام بعد
سهيل : الله يغربلك عمرانو أنت شو أتقول هاي مثل أختي الكبيره والله
عمران :انزين انت ليش مكبر الموضوع عندك رقمها صح ؟؟!!!
سهيل ببلاهه : هي
عمران : ياغبي خلاص أتصل فيها عشان تطلع برع واتسلم عليها
سهيل : امممم لا عندي فكره احلى بقول لعمي سلطان يزقرها
عمران : فكره حلوه والرياييل بعد روحوا مافي حد غريب يعني عادي سير خبره
سهيل أول ما دخل الميلس تفاجأبضربه على ويهه بالمخده الصغيره ... الميلس مقلوب فوق حدر والمخدات الصغيره متناثره فكل مكان
أول ما أنتبه شاف أنه عمامه يلعبون وي اسالم مسوين فريقين الفريق الأول يضم سيف وسالم وعارف والفريق الثاني سلطان وسعيد وخليفه وغيث
على طرف يالسين بوسلطان ، حميد ، بو محمد يتطالعون عيالهم الي يسترجعون ذكريات الطفوله ...
سهيل شهق بصوت عالي فالتفت له الكل
سهيل أي أنتوا شو مسوين والله لو أتشوفكم ماما بتسوي مناحه منو كسر هالفازه ؟؟؟؟؟
سالم أنتبه للفازه المقصوده هاي شارتنها ميثا من روما في الصيف وكلفتها مبلغ كبير ودوم اتحذرهم من الإقتراب منها
سالم : ههههههههه الله يرحمكم أجمعين
الكل تم يضحك وهو يتخيل شكل ميثا يوم أتعرف باللي صار بفازتها المفضله .
خليفه الوحيد اللي ما بدر منه أي تصرف كرد فعل للي يصير ... كان فعالم ثاني مب مصدق أنه بين أهله وأخوانه اللي يحبهم
ومشتاق لدفاهم وحنانهم يشوف أخوانه محاوطين عياله يلاعبونهم ويحبونهم ... نظره أبوه المليانه حنيه وشوق ابتسامته اللي ما فارقته من دخل
يفكر بنفسه شو اللي خلاني أنسى الضحك انسى السعاده ؟؟؟؟ شو اللي حرمني من هلي وناسي من اللي أحبهم وأعزهم ؟؟؟؟؟
ليش ياميثا ليش هديتي حياتي اللي كنت بانيها ليش غيرتيني على هلي ليش ... حس بألم فضيع حس بضعف تمنى لو يرتمي بحضن أبوه
يطلب السماح ويرجع البيت وياهم يربي عياله بينهم ....
بوسلطان : وهو يراقب خليفه حس به من دون لا ينطق عرف أنه سكوته دليل شوقه لهم حس أنه في صراع داخلي مؤلم
تمنى لو يلوي عليه ويطمنه ويقوله أن كل شي بيتغير ولللأحسن ... قلبه ما طاوعه يشوف ولده بهالحاله فراح له وتم مجابلنه يشوفه
كأنه ما شافه من سنين . ... مرت دقايق كأنها سنين ولا واحد منهم قادر يتكمل أو يعبر عن اللي فيه
................
سهيل : عمي ماسلمت على حرمتك
سلطان : شو تباها حرمتي ما يخصك فيها
سهيل : حرام عليك أزقرها بنسلم عليها تولهنا عليها والله أنتوا مول ما أتفكرون فينا ولا أتزورونا
سيف : فديت سهولي والله حبيبي نحن مشغولين أنت ليش ما أتمر أتسلم عشوابك
سهيل : ماما ما أتخلينا نطلع بروحنا شو أسوي
سلطان : انزين لا أتصيح علينا بتصل بوعد بخليها أتيكم
سالم : زين أتسوي أنا بعد بسلم عليها خلوني أتكشخ أشويه
سيف : هههههههه ياللوتي والله لو يسمعك بيذبحك
سالم : باسم الله أنا شو قلت حرام أتكشخ عشان أشوف القمر
سلطان : لا يالهرم تتغزل بحرمتي وأنا موجود خليفه ترحم عولدك
خليفه وهو يوقف بينه وبين سالم : أبعد عن ولدي يلا أشوف تذبحه عشان حرمتك مايسوى علينا
سلطان توه بينطق الا يسمع وعد تتحرطم
وعد : السلام عليكم باسم الله علي بلاكم أتحشون فيني بغيت أطيح عويهي حسبي الله على الابليس
خليفه: هلا والله حيالله من يانا أشحالج وعد
وعد استحت منه : بخير الله يسلمك اشحالك بوسالم عساك بخير وعافيه
خليفه: بخير ونعمه الحمدلله شو فيج تتحرطمين
سعيد وسيف يضحكون عليها ويعلقون : توه اللسان أشطوله أول ما شافت خليفه بلعته هههههههه
سلطان : مايخصكم بقمري فديته أنا
وعد وخلاص من الحيا صدق مب قادره ترفع راسها : سلطاااااااااااااااااان
سلطان : عيونه آمري
سالم يقاطعهم : السلام عليج أشحالج وعد
وعد : هلا والله هلا وغلا هلا بالحلوين اشحالك سالم لالا شو هالكشخه ماخليت شي لعمامك ماشاء الله عليك صرت ريال
سالم وهو مبوز : شو قصدج يعني قبل مب ريال ؟؟؟
وعد : هههههههه الله ياخذ ابليسك مب قصدي يعني بغيت أقول أنك كبرت
سهيل وهو ماد بوزه شبرين : هي وأنا ولد البطه السوده المخفي اللي ما انشاف صح
وعد: أفا والله سهيل الغالي كله ولا زعلك أنت أحلاهم أصلا وبعدين أنت أسبيشل لك سلام خاااااااااااص
سهيل هني خلاص حس بإحراج شديد هو وايد اتعيبه وعد ويحترمها ويعتبرها أخته ..... سهيل باحراج: هههه والله ودلعوني
سلطان: جني طوفه ولا معتبرين ولاحاسين بوجودي أنا زعلالالالالالالالالالالال الان
وعد: مشكله اليهال اللي يغاروووون
سلطان : ما يخصني خلاث (يقلد اليهال ) ما ثي بلوووح عند ماماتي عثان تعطيني حواوه وبقولها وعد مو دينه ما أحبها
(مايخصني خلاص مابي شي بروعند ماماتي عشان تعطيني حلاوه وبقولها وعد مو زينه ما أحبها * ترجمه )
وعد وهي مطنشتنه سارت عند أبوها : شفته يابوي كيف مأذني خلاص برجع البيت عندك
رد مع اقتباس
مواقع النشر (المفضلة)