أموت أنا في حبهم

[ديج الفريج]

ماشا الله عليج يا الجنيه


خيالج واسع

بس أبسألج ؟؟؟
ليش سميتي الأبو بو سلطان
وخليفه أكبرهم ؟؟

[قمازي]

مشكورة اختي الجنيه عالقصة بصراحة انا للحين
ما قريت الجزء 13
و14 بس اوعدج اني اليوم اكمل القصه
بتقولين ليش لاني كنت مسافره وامس راده

قمازي :crosseyed
حاطه كل الربع عشان محد يزعل ههههههههههه

[الجنية الحلوة]

اختي الجنيه.. انا بديت اقرا القصه من اولها من كنتي فالجزء ال11.. .. بس الحينه وصلتلج..وماشيه وياج.. وانتظر الجزء اليديد..

الجنيـــــــ الحلوة ــــــة

[ريم العين]

ثانكس عالجزء بانتضار اليديد

[الجنيه]

الجنيه الحلوه

ياهلا ومرحبابج غناتي ،،،


ريم العين

العفـــــــــــــــو وان شاء الله الجزء الــ 16 بنزله قريب

[الجنية الحلوة]

مشكوووره.. وبانتظار يديدج.. عاد لا تطولين علينا..

[خيماويه]

مشكوره اختيه الله يعطيج العافيه

[عاشقة الريم]

مشكوووووووووووووووورة على الجزء الرائع..

وفي الأنتظار الجزء الجديد

[المزيوونه]

هلاا والله ..

اختي الجنيه .. ممم قريت القصه بااااجلي اخر جزء نزلتيه
بقراه ان شاء الله بس حبيت ارد عليج واعطيج علم عن متابعتيه لج ..

مممم احلى ما في القصه انه فكرتها يديده .. موفقه اختيه ..


الله حيهم

[الجنيه]

السلام عليكم ورحمة الله وبركاته

السموحه منكم خواتي وأخواني أدري أني وايد تحيرت عليكم بالجزء بس والله وايد مضغوطه بحاول قدر الامكان أخلص الجزء بسرعه بيني وبينكم الجزء جاهز نصه من اسبوع بس مب لاقيه وقت اكمله ان شاء الله في الويكند بحطه لكم...
والسموحه مره ثانيه ...

[الجنية الحلوة]

مسموحه الغاليه..برايج بس لا تخيسينا وايد..

[الجنيه]

الجنيه الحلوه .,,,,

السموحه حبوبه ادري خسيتكم بس ان شاء الله بحاول انزل الجزء الحين
على غكره توقيعج حلو ...
خيماويه
العفو ,,, الله يعافيج

عاشقة الريم

العفو حبوبه وجودج الأروع
مزيونه
وأنا بانتظارج حبوبه

[الجنيه]

أموت أنا في حبهم

الجزء الـــ 17



ابتسامه مرسومه عشفاتها وملامح ويها هاديه تدل على نومها باطمئنان وهدوء ... يلتفت لولده اللي راقد عصدره ببراءته وهدوؤه يشبه الملاك يحس بشعور غريب أحاسيسه متضاربه يحس بالشوق والحنين لها وبنفس الوقت حاس بفرحه وشعور ما ينوصف بالجو اللي عايشنه .... أنا ظلمتها ,, صح أني تسرعه وتزوجتها عشان أستر عليها بس بعد ما أنكر حبي لها .. عمرها ما قصرت ويايه بشي ودوم تسهر عراحتي وأنا الي ظلمتها وحرمتها من أبسط حقوقها وهالطفل المسكين شو ذنبه يعيش كأنه يتيم وأنا موجود ..... لازم أتصرف لازم اعترف لوعد أنا متأكد أنها بتتفهمني وبتقدر شعوري تدري أني أموت فيها بس مزنه كانت فحياتي قبلها ومن حقها أتعيش مثلها تحت ظلي ويربى ولدي عندي ... خلاص أتخذت قراري بأسرع فرصه بخبرها أما مزنه وعبدالله فبعوضهم عن اللي فات ...

حست بحركته المتواصله فنادت عليه : سلطان

سلطان : هلا ،،خير مزنه في شي ؟؟؟

مزنه تلتفت عليه : سلامتك بس حسيت أنك مارقدت بغيت أتطمن عليك ،،،

سلطان :مشكوره ما أتقصرين تطمني ماياني رقاد,,,,, أ أأ ممم كنت أفكر فيكم

مزنه : فينا ؟؟؟!!!!

سلطان :هي فيكم أدري أني ظلمتكم أنتي وعبادي ويايه بس ان شاء الله أوعدج أني أعوض عليكم

مزنه تحس بقربه منها : لا تهدم حياتك بيدك

سلطان يتقرب منها أكثر : أنتوا حياتي وألزم ماعليه راحتكم

مزنه : ما أعرف شو أقولك

سلطان وهو يضمها : مزنه أبيج أتقولين لي عن كل اللي فخاطرج مافي حرمه تسكت عن الحاله اللي أنتي فيها

مزنه ودموعها تنزل بتلقائيه : صح مافي وحده تسكت على هالوضع غيري ,, أنا أدري أنك تزوجتني عشان تستر علي وأنا لليوم ما بنسى وقفتك ويايه بس يا سلطان أنا أحبك وأنت تدري هالشي وأحياناً أحس أنك أتحبني بس ما أتبين هالشي صدقني كنت أتمنى أقولك هالكلام من قبل بس ما لقيت الفرصه المناسبه سلطان زواجك مني كان لمصلحتي ومب من صالحي أحس بزواجي منك أنكتب علي الشقا كم تمنيت أكون يمك وأتعيش ويانا أتشوف ولدك يكبر تحت نظر عينك أتحسسني بالأمان أتخليني ما أحس بحاجتي للأي حد أنت ما قصرت وياي مادياً بس معنويا أنا محتاجتنك يا سلطان وايد سكت بس أنت اللي أجبرتني أتكلم سلطان أنا حياتي مظلمه من دونك ......



سلطان متفاجأ من ردة فعلها ما توقع أنها شاله بخاطرها عليه لهدرجه ,, ما لقى الجواب اللي ممكن يخفف به عنها فضل السكوت وأنه يخليها على راحتها ,,

سلطان : خلاص يا مزنه أوعدج أني ماأتخلى عنج ولا أخليج فيوم تندمين على زواجج مني .. بس محتاي أشويه وقت وأوعدج حياتج كلها بتتغير ,,,



,,,,,,,,,,,,,,,,,,,,,

تتقلب في الفراش مب قادره ترقد ,,, أتخاف أتكون روحها متعوده على وجوده يمها وحاسه بفراغ كبير من غيابه من شوقها له رقدت مكانه محتضنه مخدته أتحاول تجبر نفسها على الرقاد بس مب قادره ...

آآآه يا سلطان وينك عني خليتني روحي ولا حتى أفتكرت تدري أني أخاف أرقد روحي بس ما عليه دواك عندي .. خذت تلفونهاوطرشت له مسج

" محبوبي يا ناس ناسيني ،، تجاهل وجودي يمكن لقاله غيري ثاني "

المسج الثاني " ياجرحي الشادي رحماك بفوادي ,,لهموم عاثت بي وتناثر رقادي "



مرت عشر دقايق قبل لا أييها الرد

"أغيب بس إني على العهد باقي ... يردني شوق على الود لازال"

"لاتزعل اذا ما سألنا هذي همومنا تشغلنا ولكن معزتك الله يعلمها ترانا ما تغيرنا "



وترد أتطرش له مسج " صح أبد ما تغيرت ... واضح مخلني روحي ويالس عند ربيعك .. تدري أني أخاف أرقد روحي لكن ما همك "

سلطان " حبيبي والله غصبن عني ومب حلوه الريال محتايني أقوله ما أقدر "

وعد " هي الريال محتاينك وأنا واللي فبطني أنولي "

سلطان "عمري لا أتقولين هالرمسه والله مشتاق لج حييييييل "

وعد" ههه ما أتضحك "

سلطان " يالدبه والله متوله عليج "

وعد" تصبح على خير "

سلطان " أفا أهون عليج؟؟!!!"

وعد" اذا أنا هنت عليك عادي أتهون علي "

مرت فتره قبل لا يرد عليها باتصال ...

سلطان : يالدبه

وعد: نعم ؟؟؟!!!

سلطان :حبيبي بس عاد

وعد : أخوي أنت شكلك غلطان

سلطان : وعدوه يا راسج ،،، سمعيني ... والله مشتاق لج حيييييييييييييييييل بس الريال عنده كم شغله بساعده فيهن باجر وبرجع لج

وعد: كيفك سو اللي تباه

سلطان : أفا كيف بعد سو الي تباه ،، أنزين بذمتج ما ولهتي علي ؟؟؟

وعد: عادي

سلطان :وعووووووووود يالدبه مليون مره قايل لج لا أتردين علي بهالطريقه

وعد : أبي أنام ممكن أتسكر

سلطان :يالجذابه أنتي ما أييج رقاد روحج

وعد: توك تدري

سلطان : حبيبي والله غصبن عني شو أسوي

وعد وهي أتصيح : خلاص سلطان لا أتسوي شي بخليك مع السلامه وسكرت التلفون وأغلقته

...................................



بيت بو محمد



عذيجه وهي ترجع السياده لمكانها" ياربي ساعدني أرجع حياتي للي كانت عليه ما أبي شي غير أنه أبوي يرتاح من همي ولا يفكر فيني ... مبارك جرحني ولا فيوم ممكن أسامحه ,, معقوله الغلط مني ؟؟؟؟ بس أبي أعرف أنا بشو قصرت عليه بشو ؟؟؟؟وفهد شو ذنبه يتربى فبيت انسان ماله قيمه عندي وفقد احترامه ومكانته بقلبي !!! يارب أنك تصبرني عليه وترحم حالي ... غطت فهد عدل وأنسدحت عنده تحاول ترقد وتبعد الأفكار السوده من بالها بس ما قدرت فطلعت للصاله



في الصاله

محمد: الله ما كنت أدري أنج طباخه ماهره

روضه : ههههه الحين بيض وطماط وبلاليط خلوني استوي طباخه ماهره عيل لو أسويلك البشاميل وشوربة الدياي بالكريمه شو بتقول ؟؟

محمد: يا سلام عيل عشانا اليوم عليج ...

روضه: لا باسم الله علي ما فيني على العباله وحماده الساحره ما أتطيع أتساعدني

محمد : على طاري حماده هاي ما نشت أتصلي ؟؟؟؟

روضه : هههه يحليلك أنت ما تدري هاي أول وحده ترقد في البيت وآخر وحده أتنش ,, صلت وردت أتكمل رقادها ....

محمد: خييييييييييييييييبه حشا كل هذا رقاد؟؟!!!!!

عذيجه وهي داخله الصاله : قول ماشاء الله بتحسد البنيه ... صباح الخير

محمد: صباح الورد يا ورد هلا والله بالغاليه أم الغالي ...كيف أصبحتي

روضه : ههه خليه يحسدها عشان أتخف من هالرقاد

عذيجه : بخير وعافيه ... أطاعو منو يرمس سكتي الله يخليج أشوف نسينا ما كلينا يا آنسه روضه

روضه: هههه أنزين بس عاد عن الفضايح

محمد: فضايح الشو بعد ...؟؟؟

عذيجه : خلي الطابه مستوره أحسن

محمد : لا الحين لازم أعرف شو السالفه ..

روضه: بلييز لالالالا والله حرام عذوج وراس فهد مات أتقولين

عذيجه : باسم الله على ولدي من حلفانج ما يخصج فيه وبعدين السالفه تافهه ليش أتكبرين الموضوع ؟؟

روضه منحرجه: عذوج بليييز

محمد يلوي عليها : فديتج رواض عادي ما فيها شي أنتي تدرين أنا طول الأسبوع في العين وما كنت أنزل الا يومين يعني ما أعرف عنكم وايد الصراحه خليني أعوض اللي فاتني

روضه : انزين عفصتني خوز عني

محمد: ههه صدق ما فيج خي رعيل في وحده في هالكون ما ودها بحضني ؟؟؟

روضه : طع هذا صدق ماخذ مقلب فعمرك

محمد: برايه خليني آخذ مقلب أنا راضي لاأتغيرين الموضوع

عذيجه: ههه السالفه ومافيها أن الآنسه روضه رقدت في المدرسه حصتين والأبله جكتها ومن ذاك اليوم حرمت تسهر وايد عشان ما ترقد في الحصص فصار رقادها قلييييييييييييييييييل

محمد : ههههه يالفضيحه حد يرقد في الصف خخخخخ

روضه مبوزه :أنزين كنت مريضه

عذيجه : خل عنج لا مريضه ولا غيره الا قولي من السهر

محمد: ثرج مب هينه والله

روضه: هههههه

عذيجه : محمد

محمد: لبيه

عذيجه: لبيت بمنى ان شاء الله ... عارف ما رجع للحين ؟؟؟

محمد تغيرت ملامحه وأختفت ابتسامته " الظاهر نسيت المصيبه اللي حلت علينا ونسيت أنه ما يحق لي أعيش بسعاده" وفجأه انتبه لعذيجه الي ردت تسأله بعد ما حست بشروده

محمد: لا بعده ما رجع الحين بتصل أشوفه وين

عذيجه : تمام وأنا بروح أبدل لفهد قبل لا ينش ويبدى يصيح

روضه: خليه أناببدل له

محمد: تقدرين والا بتعورينه ؟؟؟

روضه: أقدر أنزين ولا تستخف بقدراتي الأمويه

محمد: أمويه والا عباسيه

روضه : ماعليه باجر يوم بتعرس بتقولي تعالي يودي عيالي

محمد: باسم الله عليهم منج

روضه : انزين يلا باي

محمد : أقول رويض لا تسنين أتسكرين الباب قبل لا تدخلين

عذيجه : باسم الله الرحمن الرحيم شو فيك عليها خلها أتروح

محمد : يعني هي ما همتج كل همج هعالمفعوص ولدج

عذيجه: ودك بواحد مثله

محمد: أنزين لا أتخقين وايد

عذيجه : على طاري العيال محمد شو سويت بالموضوع ؟؟؟

محمد: أي موضوع ؟؟

عذيجه معقده حياتها : عن العبط

محمد: ههه ما أستعبط شو تبيني أقول لج ؟؟

عذيجه :سلامتك لا أتقول شي بس أنا اللي بتصرف

محمد: هههه ان شاء الله تصرفي ،، توكلي على الله

عذيجه : حلو أعتبر الموضوع منتهي ولا تنسي أتطمني على عارف

محمد ان شا ءالله,,,



تفرقوا الأخوان كلن بصوب ومحمد راح لغرفته عشان يتصل بعارف ويتطمن عليه

[الجنيه]

فغرفة هزاع وحمد



يالس في الزاويه ضام ريوله لصدره يحس برعشه رغم دفا الجو تقرب منه وغطاه بس الرجفه بعدها مثل ما هي ...ياربي شو أسويبه ما أقدر أفج الباب أخاف يكون عارف هني ان شافه بيذبحه ... تقرب منه وحاول يناديه للمره العاشره : حمد .... حمد

حمد وهو يئن من الويع وبصعوبه : ها

هزاع أرتاح : شو فيك ؟؟ شو أتحس ؟؟؟

حمد: ها ماشي

هزاع: كيف ماشي وأنت شاب ضو من الفليل وأنت تون ... بتروح العياده ""

حمد :لا روحي بستوي بخير

هزاع : ليش يا حمد ليش أتسوي جذه ؟؟ مب حرام عليك ؟؟؟

حمد دموعه على خده تسيل: هزاع والله مب قصدي بس ما أدري كيف

هزاع: ياما نصحتك تبعد عنهم بس ما كنت أتطيع الشور

حمد: ندمان يا هزاع والله ندمان ما أدري ليش سويت جي صدقني حاولت أودر هالسم بس ما قدرت أحس بروحي تطلع مني والله حاس بنهايتي قربت

هزاع: تعوذ من ابليس واستهدى بالله ما بيصير الا الخير

حمد: والله يا هزاع محتقر نفسيوحاس بإشمئزاز من عمري .... آآآآآآآآآآآآآآآآآآآآآآآآآ ه

هزاع يحط راس أخوه فثبانه : شو فيك شو صار .؟؟؟

حمد يشد على أسنانه : بمووووووووت يا هزاع بمووووووووت

هزاع : باسم الله عليك يا خوي لا اتقول جي ... حمد ........ حمد ...

أيده بدت ترتجف حس ببروده جسم أخوه يحاول يوعيه بس ما يرد عليه ومن الخوف ربع لحجره أخته يبي حد يساعده يسوي أي شي المهم أخوه ما يروح من أيده

هزاع عذيجه دخيلج تعالي بسرعه حمد ما يرد عليه ما أعرف شو فيه جسم بارد مثل الثلج عذيجه تعالي شوفيه بسرعه الله يخليج بسرعه ,, أول ما ألتفت عشان يرجع غرفته شاف أبوه وراه مصدوم وحركته مشلوله يسمع اللي يقوله بس نظرته مجمده صوب حجرتهم

تجدم منه ومسك أيديه أبويه شو فيك ؟؟؟؟ أبويه ....

على حشرته طلع يشوف اللي صاير وأول شي لقطه صورة أبوه وشكله ... وصل عندهم وحاس بقلبه بيطلع من بين ضلوعه ... شو صاير ؟؟؟ هزاع شو فيك

هزاع بعد ما شافه خلاص تبيرد وحس براحه حس أنه في حد غيره يقدر يساعد أخوه كل اللي قدر عليه يأشر صوب غرفته ...

محمد فهم الموضوع وعلى طول ربع الحجره وأول ما دخل شاف منظر حمد يقطع القلب ....

شفايفه مزرقه وعيونه مبطله على الأخر أيديه الهنتين ضامنهن لبعض ومتكور على نفسه ... محمد عرف أنه مختنق فقام باللازم رغم خوفه بس لأنه ماخذ دورة اسعافات أوليه قدر يساعد أخوه ويخليه يرد يتنفس

حمد" كح كح كح ... وبتعب شديد "

محمد: حمد تسمعني .؟؟؟ حمد رد علي اذا تسمعني .... اذا ما تقدر حرك ايدك بس

حمد يحرك أيده بببطء

محمد نادى هزاع وخذو حمد للمستشفى ... بومحمد بعد ما تطمن على ولده يلس في الصاله وذهنه مب وياه دموعه تسيل على خده والخوف باين عليه... ما يتحمل صدمه ثانيه كفايه أنه فقد شريكة حياته ....



الساعه 12 رجع محمد وهزاع وحمد ... الدكتور شخص حالته أنها إرهاق وأنها حاله نفسيه سيئه واحساس بالذنب محتاج أشويه رعايه وما عليه شر ...

عذيجه رجعت لبيتها بعد ما تطمنت على أخوها ....



بيت عذيجه "العصر"

مبارك شال فهد : نورتوا البيت ... تستاهلون سلامة حمد

عذيجه من دون ما أتشوف صوبه : الله يسلمك

مبارك : ولهت عليكم

عذيجه :........

مبارك : لا تقسين عليه جذه

عذيجه : عطني الولد بغير ملابسه

مبارك : لا أرتاحي أنتي أنا بغير له

عذيجه :مب محتايه حد يساعدني فرعايته أو تربيته

مبارك :أفا عليج ألحين أنا صرت أي حد ؟؟؟

مشت عنه من دون لا أترد عليه حاسه بمشاعر متناقضه مستانسه لشوفته وكارهه وجوده خافت تفضحها مشاعرها وأتقوله ولهت عليك ففضلت الانسحاب من دون اي رد فعل على اللي يقوله أو يسويه ... دخلت الغرفه أنصدمت من اللي شافته ... الأثاث متغير .. لون الغرفه ... الأثاث الأرضيه .. رفعت راسها للدريشه ...

مبارك : كبرتها مثل ما تبين .. والاثاث نفسه اللي عيبج في أيطاليا ,,, لون الغرفه اللي يعجبج والسيراميك بعد

عذيجه حاسه بداخلها بنار تشتعل ما تعرف شو أتقول أو كيف تتصرف معقوله في انسان يناقض نفسه لهدرجه ؟؟؟؟ هذا هو مبارك اللي تزوج عليها بنفس اليوم اللي زفت له خبر حملها ... هذا نفسه مبارك اللي أبتعد عنها ولا سأل شو هدفه لشو يبي يوصل ؟؟؟؟؟

تقرب منها وحط أيده على جتفها : عذيجه حبيبتي أنا آسف

تمالكت نفسها وأعصابها وببرودة شلت أيده عن جتفها تبعده عنها ...

مبارك بنظرة أستعطاف : دخيلج لا أتعامليني بهالطريقه ... أعترف أني خطيت بحقج بس حاولي تفهميني والله يا عذيجه أنا بنفسي ما كنت عارف شو اللي صار فيني وليش تعلقت فيها ... ورحمة أمج يا عذيجه أني ما أعرف شو اللي صار لي لين أمس أكتشفت أنها مسويه لي عمل والله يا عذيجه صدقيني الله يخليج خلينا نرجع لحياتنا الأوليه ما ولهتي لها ؟؟؟؟

عذيجه : بس يا مبارك خلاص اللي بينا كله أنتهى لا أتحاول تقنعني باللي تقوله أنت ماض فحياتي وأنتهى واذا أتظن رجعتي هاي تعني شي فأبشرك رجعتي بس عشان خاطر أبويه ولا تظن فيوم أني ممكن أرجع عذيجه المغفله الأوليه من اليوم وساير بتشوف عذيجه ثانيه ,,, عذيجه اللي تعلمت درس عمرها ما تنساه عذيجه اللي عمرها مابتثق فيك أو تعتمد عليك بشي .... أنت زوج بالاسم وأعفيك من مسؤليتي كامله أنا وولدي ...

مبارك : عذيجه أنتي أعصابج تعبانه ريحي اشويه وبعدين بنتناقش في هالموضوع ...

عذيجه : مافي شي أسمه بعدين من الحين أبي أحط النقاط على الحروف ... أنا وولدي بنسكن في الغرفه الثانيه وأنت سو الي تباه ماعدت تعنيلي شي .... تجدمت منه وخذت ولدها وراحت للغرفه الثانيه ....

[مزيونة الشمال]

ههههههههههههههههه
السلام عليج اختي الجنيه
اشحالج عساج الا ابخير ؟؟
اعلومج عساها طيبة
انا بصراحه صارلي فترة متابعه قصتج وانا وياج على الخط والحين من حظي الحلو انج اتنزلين الجزء وانا موجودة وقاعده اقراه بس جيه خطافي لازم اتمعن فيه وبقطع عليج الحين
وتسلمين وايد على القصة الحلوة وربي يحفظج من كل عوق ومكروه عندي شي اتسلابه الحين بدل جتب اليامعه اللي اقراها
يالله انا تحت وياج ورا الكواليس وما بعلق بشي بس حبيت اتعرفين اني وياج واشجعج
ودمتي بود