آخـــر الــمــواضــيــع

صفحة 5 من 15 الأولىالأولى 123456789 ... الأخيرةالأخيرة
النتائج 61 إلى 75 من 211

الموضوع: أموت أنا في حبهم

  1. #61
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم

    شماسي


    الله يسلمج حبوبه
    لو حلفت انك تبيني ،،،
    وميت وهيمان فيني ،،،
    بأعتبرها ألف كذبه،،،
    طحت من قلبي وعيني ،،،

  2. #62
    عضوية البكالوريا الصورة الرمزية عنود الريف
    تاريخ التسجيل
    Jan 2002
    المشاركات
    1,934
    قوة التمثيل
    366

    مشاركة: أموت أنا في حبهم

    الغاليه الجنيه ...
    ممكن اعرف متى بتنزليلنا الجزء اليديد... ؟؟؟
    والسموحه

  3. #63
    مشترك مقبول الصورة الرمزية عاشقة الريم
    تاريخ التسجيل
    May 2005
    المشاركات
    21
    قوة التمثيل
    231

    مشاركة: أموت أنا في حبهم

    مشكوووووووووووووورة اختي الجنية

    أنا اول مرة اقرا القصة وخلصتها في ساعتين..

    القصة ما عليها كلام وااااااااااااااايد عجبتني..

    بلييييييييييييييييييييييي ييييييز نزلي الجزء بسرعة..

    في الإنتظار..


  4. #64
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم

    السلام عليكم ورحمه الله وبركاته


    عنود الريف

    السموحه منج حبوبه أدري مقصره بحقج وااااااااااااااايد بس والله غصبن عني مضغوطه على الآخر عندي جزء صغيرون كل يوم أكتب فيه كلمه بحاول أكمله قبل أمتحاناتي الاسبوع الياي وبحطه عشان خاطرج


    عاشقة الريم

    تسلمين حبوبه وبإذن الله الجزء الثامن بحطه بأقرب وقت
    لو حلفت انك تبيني ،،،
    وميت وهيمان فيني ،،،
    بأعتبرها ألف كذبه،،،
    طحت من قلبي وعيني ،،،

  5. #65
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم

    أموت أنا في حبهم 8





    عارف : يالله عذوج بلاج تمشين شرا السلحفاه

    عذيجه: عوذ بالله من شرك خاف ربك شو سلحفاته تراني حامل ما أيوز أربع شراتك وأنت شو عايلنك

    عارف ارتبك : ه أأ ه لا ماشي بس قصدي يعني ما أدري المهم يلا خلصينا ويا كرشتج

    عذيجه: ههه صبر صبر أنت أشلك مشتط تراني قلت لك أترياني في السياره ليكون يتراوالك بخليك تحدر عندها؟؟؟!!!!!

    عارف :...........

    عذيجه: عروف وصمخ

    عارف: ها أشفيج الله ياخذ عدوج شو ها فضحتيني شو عروف ريال أشطولي أشعرضي أتقولين لي عروف !!!!

    عذيجه: اللي ما خذ عقلك يتهنا به

    عارف: الحين أنتي شو تبين من الصبح محتشره

    عذيجه: كلام الملوك لا يعاد

    عارف: وكلام العبيد لا يسمع .... سكت ورجع بذاكرته لوعد ... كان متعود يقولها كلام الملوك لا يعاد وأترد عليه بهالرد ومن يومها صار

    يقولها ... ما حس بعمره الا وهو داعم واحد

    عارف: باسم الله الرحمن

    سلطان: عوذ بالله من ويهك ياأخي شو ها ما أتشوف وين عينك ؟؟؟!!!

    عارف: سلطان؟؟؟؟؟

    سلطان: هههههه هلا الغالي أشحالك وتقرب منه وسلم عليه.... أشفيك يا ريال وين ساهي بفكرك

    عارف : سلامتك والله ما أدري ....

    سلطان: عسى ماشر شو مييبك المستشفى

    عارف: هاي عذو وو ... تدارك نفسه وسكت ... الرضيعه يايه عند ربيعتها

    سلطان: أها خلاص عيل بترياك هنه جان تبا

    عارف : دقايق بس ... (غرفه وعد قريبه من الاستقبال) .... تجدم منهم عارف وسأل عن غرفه وعد حمد

    سلطان: عارف ... عارف

    عارف يترا النيرس أتشوفله رقم غرفتها : هلا

    سلطان : هاي حجرة حرمتيه

    عارف يستهبل أونه ما يعرف أنه سلطان ريل وعد :والله !!! ما كنت أدري أنك ماخذ بنت حمد ....

    سلطان: توك تدري !!! مبروك ... بس الدكتوره عندها الحين خل أهلك يتريون فغرفة الإنتظار وأول ما تخلص بخبرك

    عارف: أوكي بوصلها وبرد لك

    سلطان : تمام

    عارف يكلم أخته بصوت واطي : عذوج تعالي يلسي فغرفة الانتظار لين تطلع عنها الدكتوره

    عذيجه : ها ريل وعد ؟؟؟ ماشاء الله عليه الصراحه وسيم

    عارف : أي أنتي شو ما تستحين أتبحلقين في الريال فضحتينا أمشي أشوف

    عذيجه: هههه الله ياخذ عدوك شو أبابه أبحلق فيه ترا أنا ما جد شفته عالطبيعه وما حضرت عرسهم وبعدين عندي ريلي يسدني عن ..(سكتت )

    حست بمراره وغصه كان ودها تكمل جملتها وأتقول ريلي سادني عن الكل ومافي واحد يسواه ... بس هالكلام كانت ممكن أتقوله قبل بس الحين

    مستحيل .....

    عارف وهو حاس باللي فيها : فديت أم عروف يلا الغاليه استريحي أهنيه وأنا برجع لج أوكي

    عذبجه : باسم الله منو هاي أم عارف ...؟؟؟

    عارف : أنتي بعد شو

    عذيجه : ههه شو قالولك خبله أسمي ولديه عليك لا أبوي كافني عروف واحد مينن العالم بعد أزيد الهم عقلبي ليش ؟؟!!!

    عارف : الله يسامحج ألحين أنا هم أصلا أنتي ودج اتسمين ولدج الخسف باسمي ...

    عذيجه : عارف دخيلك مب متفيجه لك سر عند ربيعك وخلني فحالي

    عارف : ههههههههه باي



    فبيت عوشه .... الساعه 10:00 الصبح



    عوشه : مهروووووووه وصمخ...

    شهد : أمايه شو بلاج أتزاعجين تراني قلت لج تسبح يبالها وقت لين أتخلص

    عوشه : عنبو شو سبوحه الحين وهي أشعنه ما أتنش من وقت يوم تدري أنه وراها سيره ؟؟؟!!!

    شهد : هههه أمايه الله يهداج تراها ناشه من الصبح وأنتي مشغلتها على تلفوناتج أدقق لج الأرقام

    عوشه :أنطمي أنتي المحامي مالها

    شهد : والله هالبيت حاله الواحد ما يعرف شو يبون منه أفف

    عوشه : حسبي الله عليكن من بنات ما خليتن فيني حيل قومي نشي بنروح عنها

    شهد : لا أمايه حرام .... فجأه ترن ترن ترن ....

    عوشه : ويدي شهود بلاج أصمخيتي ردي عالتلفون حشرنا

    شهد : ان شاء الله أمايه مع أني متأكده أنه لج ... ألو

    ناصر : سلام

    شهد : وعليكم

    ناصر : شهالمذهب عنبو شو عليكم بعد

    شهد: تراك أنت قلت سلام وأنا أرد عليك بالمثل

    ناصر : والله أني ما عرفت أربي منو أنتي ياسودا الويه

    شهد : بنتك يعني منو

    ناصر :بترمسين شرا العالم والا تبيني أييج البيت أغسلج بالعقال شو أتحرن ما وراكن ريال يوقفكن عند حدكن

    شهد : باسم الله شو من منكر شايفنا أنسويه عنبوه هذا وأنت أبونا هاي رمستك الله العالم الناس شو أتقول عنا

    ناصر : أنا أدري محد غيرها وازتنكن عليه لا بارك الله فيها

    شهد : أبوي أنت اللي تغلط و أتعق اللوم عليها ؟؟؟!!! صدق دنيا

    ناصر : أفففف أنا شو اللي خلاني أدق الحين أحيدج هالوقت ملتعنه في المدرسه

    شهد: هههه أنا تخرجت والحين بتخرج من الكليه وأنت بعدك تذكر المدرسه

    ناصر : والله يا شهود يا أني أييج البيت وأكسر ضلوعج لا بارك الله في اللي ربتكن الله ياخذها

    جابر ... منو على التلفون

    شهد : يديه هذا أبويه ما أدري شو بلاه حرمته رافعه ضغطه ياي يطلع الحره فيني أونه بيي يكسر ضلوعي

    جابر : يخسي الا هو هاتي السماعه عنج ... خير شو عندك أتضارب البنت ؟؟؟ ما كفاك اللي سويته بأمهم هالدور على البنات ؟؟؟!!!

    ناصر : أففف أنا متصل أبي أرمس مهره خلني أكلمها

    جابر : يوم تبا أتكلمها تتصل شرا العالم والناس المحترمه وتطلبها هب تضارب وتشاتم

    ناصر : دخيلك يا عميه خل مهره تتصل بي ...

    جابر : عمرك ما بتتغير قليل أدب طول عمرك ...

    ناصر رقع السماعه فويه اليد ....

    جابر : عوذ بالله من شره

    عوشه : شو عنده ويه النحس شو يبا منا ؟؟؟

    شهد :أمايه الحمدلله أنج ما تميتي على ذمته للحين جان الله يعينا عليه

    عوشه : أنجعمي أنتي أم لسان طويل ما أتحشمين حد حتى لو كان عدوج سواء دق عليج والا حدر البيت هذا ضيف

    وما ضني تربيتي كانت غلط

    شهد :السموحه منج أمايه بس والله أنا ما قلت شي والله هو اللـــ ،،،

    جابر: خلاص يا عوشه خلي البنيه فحالها أنتي أدرى بهالخايس وطريقته في تعامله ويا الناس

    مهره نزلت وهي لابسه عباتها : يلا أمايه أنا جاهزه

    الكل : ........................

    مهره : باسم الله شو فيكم ؟؟؟ خير شي صاير ..؟؟؟؟

    شهد : أبوج كان متصل وكالعاده

    مهره أتقاطعها :لا أتقولين أنتي اللي رديتي عليه

    شهد : وياريتني ما رديت ويعل أيديه الكسر اذا رديت على التلفون مره ثانيه

    عوشه : باسم الله عليج يا بنتي يعل أيده هو الكسر ليش تتدعين على عمرج مب زين يا بنتيه

    جابر : لا حول ولا قوة الا بالله ... الحين خلصونا من سيرته ... يلا عوشه شلي بناتج وسيري على أم سلطان

    عوشه : يلا يا بنيات تحيرنا

    جابر: مهره

    مهره : لبيه

    جابر : لبيتي حايه قولي آمين ... يوم تردين دقي لويه النحس ما أدري شو عنده يباج

    مهره : آمييييييييييييييييييييييي ييييين ... من عيوني يا بعد قلبي

    شهد : هههه ليش هالتقردين

    مهره : فديته يدي لا قردنه ولا شي شو قالولج شهد واتطلع لسانها أتعايرها ....

    طلعن البنات ويا أمهن عشان يزورون حرمة عمهم أم سلطان ... وخذوا لها باقة ورد ملونه وطبعا الفاله لأنه بوسلطان خبرهم أنها طلعت من العنايه

    فحسبوا حسابهم لأنه أكيد الخبر بينتشر والحريم بيروحن يزورنها ......


    لو حلفت انك تبيني ،،،
    وميت وهيمان فيني ،،،
    بأعتبرها ألف كذبه،،،
    طحت من قلبي وعيني ،،،

  6. #66
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم

    فبيت خليفه ،،، بو سالم



    ميثا وهي ترمس في التلفون : والله شو أقولج يالعنود هالولد عنيد وراسه يابس ويعاملني بطريقه خايسه ما جني أمه

    العنود : أنتي الله يهداج يا ميثا خذيه بالزين ولدج في سن المراهقه وفهالسن الشاب يكون حساس ومحتاج حد يفهمه ويوقف معاه ومن طريقتج واضح

    أنج أتعاملينه بقساوة ومالج طولة بال عليه

    ميثا : هههه والله ضحكتيني ألحين أنتي عانس لا ريل ولا ولد أشعرفج بهالسوالف ....خلينا منه يلتعن هو ويا أبوه المهم بخليج الحين أشوفج في الصالون

    العنود :...........

    ميثا : فمان الله

    العنود : مع السلامه

    من الصدمه ما قدرت أترد السماعه لمكانها تمت ماسكتنها وأتفكر بميثا ... أنا شو اللي مخلني أتحملها وليش ؟؟؟ معقوله هاي انسانه لا هاي مخلوق متجرد من الانسانيه

    كيف يتحملها ريلها ؟؟؟ أتلوم ولدها ؟؟؟ سبحان الله مافيها ذره إحساس .... وبمراره وقهر تذكر يوم خبرتها أنها أنخطبت تذكر كيف ميثا أستخدمت كل أساليب الإقناع

    عشان أتخليها ترفض اللي تقدم لها والسبب أنه هي ما أنخطبت ما كانت تبا العنود أتكون أحسن منها بشي ...أختلقت قصه وهميه من خيالها ولعبت براس العنود ..

    اللي تقدم للعنود كان واحد من كبار التجار يلعب بالفلوس لعبه ...شاف العنود بالصدفه عند المدرسه وأعجب بها ووصل لهلها يطلب إيدها ,,,

    العنود بفرحه : ميثوه عندي خبر وااااااااااااايد حلو

    ميثا : شو قولي بسرعه

    العنود بضحكه بريئه : أنخطبت ههه هههه

    ميثا : جذابه

    العنود : والله واللي خطبني واحد مليونير عنده فلوس ووسيم

    ميثا: ولد منو ؟؟؟؟ ومن وين أتعرفينه وليش ما قلتي لي من زمان

    العنود: باسم الله أشياج علي لا أعرفه ولا يعرفني ... أتعرفين موزه سالم ؟؟؟

    ميثا : هي هاي الخقاقه اللي شايفه عمرها ... خسفه لو حلوه ما أدري شو بتسوي

    العنود: هههه حرام عليج بالعكس هي وايد حبوبه وفنانه أنتي اللي ما أتدانينها

    ميثا: أففف خلها أتولي ألحين شو سالفتها هاي شدخلها بسالفة خطبتج

    العنود : ترا بطي يصيرأخوها

    ميثا : وع وع وع عنوده والله ما عندج سالفه لو وافقتي وبعدين أنتي وايد صغيره على العرس

    العنود: أتصدقين أنا بعد قلت جيه يعني ألحين أنا توني مكمله 17 وما أحس أني قد المسؤليه بس هو يحبني

    ميثا : أي ياويهج أي حب أي خرابيط شو فلم هندي لا حب ولا شي هذا واحد تافه أصلا

    العنود : لا ميثوه هو قال لأبويه بنتك أباها لوشو ما يصير واذا تبا بخليها أتكمل دراستها وأتسوي اللي تباه بس دخيلكم يوزوني إياها

    ميثا: جذاااااااااااااب والله يقص عليج

    العنود : لا حرام حتى أهله ناس وايد طيبين أمه فنانه تعرفين أول ما شافتني قالت ماشاء الله عليج مب من أشوي متخبل ولدي عليج

    ميثا : هههه ههه عنودي لا أتضحكيني ألحين أنتي شو من جمال فيج ...؟؟؟ الصراحه بياضج يلوع بالجبد جنه روسيه ومافيج جمال أنا أحلى

    العنود : أوي ميثو يعني هو يقص علي

    ميثا: هي يالهبله هالرياييل ما لهم أمان وخصوصا هالتجار عادي يتزوجج كمن يوم بعدين يطلقج

    العنود : لا باسم الله علي ما أبي أتطلق وأنا صغيره والله حرام

    ميثا : الصراحه عنود ما أبيج أتوافقين عليه والله عشان مصلحتج وأنا أخاف عليج أنتي لو أتعرفين عنه جان رفضتي على طول

    العنود : شو شو شو أتعرفين عنه ؟؟؟ خبريني الله يخليج ...

    ميثا : لا ما يخصني بعدين بتقولين أنا غيرانه منج عشان جي قلت هالرمسه وما بتصدقيني

    العنود: لا والله ميثوه حبيبتي أنتي أتعرفين ما عندي أم ولا أخوان ولا خوات وأنتي كل شي بالنسبه لي بعد باباتي أرجوج أنصحيني أنا غبيه ما أعرف شي

    ميثا : أتعرفين حصووه الصايعه ؟؟؟

    العنود : هي أعرفها شو فيها قولي ؟؟؟؟

    ميثا: تطلع وياه

    العنود :لا حرام عليج ميثوه هو مب من هالنوع والله يمكن أنتي مغلطه مب هو

    ميثا : شفتي قلت لج ما بتصدقيني خلاص عنود وافقي وأنا أنسيني ما أبي أشوفج تهدمين مستقبلج وأسكت ولا أقدر أستمر بصداقتي وياج

    العنود : لا مياثي حبيبتي مصدقتنج وخلاص اليوم بقول لباباتي أنا مب موافقه

    ميثا بخبث : وما بيقول شي

    العنود : مب أنا وحيدته واللي ماله غيري في الدنيا ..أكيد بيوافق هو أتهمه سعادتي وبس ....

    ميثا بإبتسامه خبيثه : طمنتيني الله يطمنج .....



    بعد هاي السالفه بفتره بسيطه أنخطبت ميثا وعرست قبل لا أتخلص الثانويه العامه .....



    أرتسمت إبتسامة قهر على شفاتها تلفتت حولها ما لقت غيرها والخدامه في البيت ... أبوها بعد رفضها لبطي سكت عنها وقرر أنه يخليها تتخذ قراراتها المصيريه بنفسها

    لأنه أنصدم منها يوم حاول يقنعها أنها ترضى بـــ بطي زوج ردت عليه بالكلام اللي علمتها إياه ميثا وكان كلام يسم البدن ... بعدها بأربع سنين توفي بجلطه ومن يومها

    والعنود عايشه بروحها فبيت أبوها يزورونها خوالها وحريمهم وطبعا الكل طمعان فثروتها .... خالها الكبير كل يوم والثاني يايب لها شيبه يبيها تتزوجه عشان يقدر يلعب

    بفلوسها على كيفه بس هي ترفض ... خليفه زوج ميثا مستلم إداره شركات أبوها وحلاله طبعا بعد ما أقترحت ميثا عليها هالشي وتاخذ منها نسبه من دون علم خليفه ....

    ياترى شو مخبيه لي الأيام معقوله في حد بيرضى ياخذ وحده مثلي عانس عمرها 33 سنه ؟؟؟ مستحيل ... الظاهر أنكتب عليه أعيش وحيده طول العمر ...الله يسامح

    اللي كان السبب ....................





    حميد : أشوي أشوي يا أمايه مب زين عليج جذه

    وفا: هههه فديتك عمي عادي مافيها شي أصلا المشي في هالفتره وايد أوكي

    حميد : ماعليه بس ديري بالج ... والمستشفى مب طاير

    وفا: هههههه عميه والله من شوقي لوعد ... ولهت عليها ما شفتها من زمان

    حميد : أيييييييييييييييه يا وعد منو يصدق هالطيحه اللي طاحتها

    وفا: أفا عليك عمي لا أتضيق روحك ان شاء الله ما عليها شر ...

    حميد : الله كريم ... ها جنه سلطان ... وأول ما وصل عندهم ركض له سلطان

    سلطان وهو يلوي عليه : أشحالك عميه شو أخبارك طمني عليك

    حميد والفرحه باينه على ويهه : يعلني فداك يا سلطان أنت اللي وين كنت طمني على أخبارك شو مسوي و شو صار عليك ؟!!!
    سلطان : السموحه منك عمي والله غصبن عني بس أوعدك أني ما أبعد عنكم مره ثانيه ....


    حميد والدمعه بعيونه : وعد يا سلطان وعد ...ونزلت دمعه من عينه

    وفا حبت أتغير الموضوع : السلام عليك أشحالك سلطان ...

    سلطان : وعليج السلام ورحمة الله وبركاته ...(طبعا ما عرفها لأنها متغشيه )

    وفا: عرفتني ؟؟؟؟

    سلطان وهو عينه على بووعد : ههه أأأ خالتي أم سهيل

    وفا: ههههههههه الله يسامحك ألحين أم سهيل شابه وحامل ههههههههه

    سلطان: هههههه أوه تذكرت وفاء

    وفا : تو الناس

    سلطان : أفا يا أم سلطان وهل يخفى القمر !!....؟؟؟

    وفا : هههه على كيفه أونه أم سلطان لا تطمن قالولي بنيه ان شاء الله وبسميها وعد

    سلطان: والله يا أم وعد ان كانت بنت وسميتها وعد لج بشاره السموه اللي تطلبينها لو هي عيوني

    وفا : تسلم وما أتقصر بس ما عليك خلني أتنقى عكيفي وأتكتك بعدين بخبرك باللي أباه سموه



    حميد : ههه سلطان شو أتسوي خاري ...؟؟؟

    سلطان : الدكتوره داخل وأنا أترياها تطلع أتطمني عليها

    حميد : وفا أمايه تعالي بوصلج الاستراحه لين تطلع الدكتوره

    وفا: برايك عميه أدلها بروح بروحي ....

    حميد : لا بنتي بوصلج ... يلا أمايه



    سلطان : ويه عروف أنت من وين طلعت لي

    عارف : الله يغربل إبليسك تراني قلت لك بوصل الرضيعه وبييك يوم قربت شفت ناس عندكم عشان جذه ما ييت

    سلطان : أهاااا حلو ...



    ,,,,

    في غرفة أم سلطان

    عوشه : الحمدلله على سلامتج يا ويخيتي ما أتشوفين شر عساج بخير ألحين

    أم سلطان: بخير دامكم بخير ... أشحالكن يا بنات

    مهره وشهد :بخير الله يسلمج خالوه

    مهره : خالوه تريقتي ؟؟؟؟

    أم سلطان : لا يا بنيتي مالي نفس

    مهره : لا خالوه ما يصير..... أحط لج أشويه شوربه ؟؟؟

    أم سلطان : مشكوره فديتج لا أتعبين عمرج ....

    مهره : تعبج راحه ...عدلتها عشان تقدر تشرب الشوربه ...

    أم سلطان : الله يرزقج بالريل الصالح اللي يسعدج يا ربي ....بارك الله فيج ما قصرتي

    عوشه : بالهداوة يا أميه مب زين أتحركينها جذه بدفاشه

    شهد : هههه والله قطعوها صدق دفشه

    عوشه : أنتي بدل لا تضحكين على ختج فازعيها وزهبي الشوربه ... والا فالحه لطوالة اللسان

    مهره : ربج ما يضرب بعصا ههههه دوااااااااااااااج

    شهد مبوزه :...........

    عوشه : أقول يا أم سلطان

    أم سلطان : آمري الغاليه شو فخاطرج

    عوشه : ما يآمر عليج عدو ... وعد مرت ولدج هنه في نفس المستشفى صح ؟؟!!

    أم سلطان : هي بس هي الصوب الثاني

    عوشه : شهد طوفي ويايه بنمر عليها

    أم سلطان : زين أتسوين يا أختي طمنيني عليها

    عوشه : ان شاء الله يلا شهد ....

    طلعوا واتجهوا لغرفه وعد .... فهالوقت طلعت الدكتوره من عندها وسار بو وعد يزقر وفا عشان تدخل عندها
    لو حلفت انك تبيني ،،،
    وميت وهيمان فيني ،،،
    بأعتبرها ألف كذبه،،،
    طحت من قلبي وعيني ،،،

  7. #67
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم

    استراحه النساء

    و فا: هههه الله يسامحج ألحين أنا الي قطعت والله أنتي وأربيعتج مب متفيجات لي

    عذيجه : هي أنا وربيعتي والا أنتي الي ما لج دخل فينا

    وفا: الصراحه أنتي من سافرتي ما دريت عنج احيد من كم شهر سألت وعدوه قالت لي بعدها ما ردت وقلت لها أتسلم عليج

    عذيجه : هي أذكر وصلتلي سلامج ... ما شاء الله أنتي فـ أي شهر ألحين

    وفا : الله يسلمج توني مخلصه الثامن وداخله التاسع

    عذيجه :ماشاء الله والله مب باين عليج ... متى عاطينج موعد ؟؟؟

    وفا : أول الشهر يعني بعد اسبوع ان شاء الله ... وأنتي

    عذيجه : الله يقومج بالسلامه ان شاء الله .... أنا الله يسلمج على حسبة الدكتوره المفروض 11/11 عقب رمضان ان شاء الله

    وفا : الله يعينج يعني باقلج تقريبا ست شهور ... شو شعورج ؟؟؟ كيف حاسه مع أول حمل

    عذيجه : ما أعرف خايفه ومستانسه بنفس الوقت شعور حلو بس الصراحه أخاف من الولاده

    وفا: لا اتخافين ولا شي توكلي على الله وان شاء الله ما عليج شر

    حميد عند الباب : أم سيف

    وفا : ويه هذا عميه حمد .... تفضل عميه محد غريب

    وأول ما دخل حميد : السلام عليكم ورحمه الله وبركاته

    عذيجه و وفا: وعليكم السلام ورحمه الله وبركاته

    عذيجه : هلا عمي حميد اشحالك .... نشت وباسته على راسه

    حميد: ماشاء الله تبارك الرحمن وأنا أقول المستشفى منور ثرج أنتي موجوده ...حبتج العافيه يا بنت محمد أشحالج وكيف صحتج

    عذيجه : بخير بشوفتك أشحالك أنت عمي شو مسوي عساك بخير ونعمه

    حميد: الحمدلله يا بنتيه عايشين .... الحمدلله ...خير ان شاء الله شو عندج ؟؟؟

    عذيجه : سلامتك عمي بس ييت بتطمن على وعد

    حميد :أها ... نشن عيل الدكتوره طلعت عنها .....





    في العين فبيت مزنه ....

    فاضل: مزنه اللي قاعديصير ما ينسكت عنه ...

    مزنه : ....

    فاضل : مزنه أكلمج أنا

    مزنه : شو تباني أقولك ؟؟؟

    فاضل: لا أتمين ساكته فكري ويايه بحل يرضي الطرفين

    مزنه : فاضل اللي صار شي خارج عن ارادتي وإرادته وأنا مستحيل أضر سلطان بشي هو الوحيد اللي بقا لي في هالدنيا

    فاضل: أفا يا مزنه وأنا وين سرت عنج ؟؟؟!!!

    مزنه بحزن : أنت هه هه أنت يافاضل سرت مكان بعيييييييييييييدأنت يا فاضل صرت صعب المنال

    فاضل: ليش أتقولين هالرمسه يالغاليه أنا من لي في هالدنيا غيرج ؟؟؟ أنتي أهلي وناسي أنتي أغلى ما أملك

    مزنه: ليتك يا فاضل أثبت لي هالشي مب الا رمسه ...

    فاضل : مزنه لا أتلوميني على شي ما لي دخل فيه وصار غصباً عني

    مزنه : عبادي نش ؟؟؟؟

    فاضل: لا بعده راقد .... ليش أتغيرين الموضوع ؟؟؟؟

    مزنه: لأنه ما منه فايده نقاش عقيم ... فاضل خلني جذه أنا مرتاحه بحياتي والحمدلله سلطان مب مقصر علي بشي موفر لي كل شي

    عندي خدامه تشوف طلباتي ودريول وبيت باسمي شو أبا أكثر من جذه ؟؟؟؟ الحمدلله



    فاضل : بس يامزنه لا الخدامه ولا الدريول والبيت بينفعونج من دون سند ... عبادي الحين صغير ما يفتهم بس باجر بيكبر يبي حد يجابله

    أنتي اللي فيج مكفيج يمكن ألحين مب حاسه بعجزج عن رعايته لأنه صغير وطلباته بسيطه بس باجر يوم يكبر اذا مالقى حد يقوده ويفهمه

    الفرق بين الصح والغلط بيضيع من إيديج وأنتي ما لج حيله ...

    مزنه : فاضل صح أني أنحرمت من شوفته بس الحمدلله مربتنه تربيه صحيحه ولا أتظن أني فيوم حسيت بعجزي .. اذا ما شفت بعيوني

    أشوف بقلبي وإيماني الحمدلله على كل حال أنت لا أتحاتيني وفرغ نفسك عشان أنروح بيت أهل هيفا العصر

    فاضل: الله يهداج كيف ما أحاتيج وأنا مالي غيرج ؟؟؟وبعدين أشوف الوقت مب مناسب للخطبه بعدني مب متقبل أنه فيوم ممكن تكون فحياتي

    إنسانه أقدر أشاركها أفراحي وأحزاني ...

    مزنه :فاضل لا أتفشلني في الناس لو سمحت أنا ما سويت هالشي الا يوم أنت طلبت ومالك حق أتي تهدم قبل لا تبني ,,, سرارتاح الحين

    وأجهز الساعه 4

    فاضل : ان شاء الله وماعاش اللي يفشلج ...





    ......



    على بحر الممزر



    سيف : مرحبا

    هيفاء : ...................

    سيف: حبيبي سوري والله أنتي ما تدرين شو اللي صار عليه فغيابج

    هيفاء : .............

    سيف : هيافي حياتي ردي عليه لا أتعذبيني والله ما أقدر أتحمل زعلج

    هيفاء: ههه ليش يا سيف ؟؟ ليش أتقص على عمرك وعلي سيف أنت ما تباني أنت بس تبا تتسلى ويايه وبعدين أظن أنا قلت لك خلاص

    بنخطب واذا الله راد وصار نصيب بتزوج هالانسان ....

    سيف: نعم نعم ما سمعت عدل عيديها الرمسه .... ههههه أونه بتزوج مسكين حالج

    هيفاء: سيف أنت شو تبا مني بالضبط ؟؟؟

    سيف: أباج لي وبس

    هيفاء : ليش ما تتقدم لي رسمي ؟؟؟

    سيف : قلت لج مب وقته

    هيفاء : أنت ما قلت مب وقته قلت اذا خطبج واحد أوكي توكلي على الله وخذيه لا أتمين تترييني

    سيف: أنا ما قلت

    هيفاء : ما بناقشك لأنك تدري أنه هذي الرمسه أنت قايلنها

    سيف: هيفاء ترى اذا فكرتي أتوافقين بوديج فداهيه بفضحج مسجل صوتج

    هيفاء : شو تباني أتوقع من انسان حقير مثلك أكيد هاللي تقدر عليه يالجبان

    سيف : يا حيوانه لاأتقولين جبان أتخسين والله للأييج لباب بيتكم وأفضحج ربيعي في أمن الدوله طبعا ما يحتاي أقولج شو ممكن أسوي

    هيفاء : ربيعك هذا ما عنده ضمير مستغل منصبه بشكل خايس وحقير الله بينتقم منك ومنه و خذها نصيحه مني سيف لا أتحاول تستفزني

    يتراوالك أني مسالمه وعلى نياتي بس صدقني يوم غايته ما عليه من حد أتبع مبدأ علي وعلى أعدائي ... ماعاد يهمني شي مثل ما

    أنت أناني أنا بعد بصيرأنانيه وبشوف مصالحي

    سيف مصدوم : ......

    هيفاء : الله لا يوفقك ...وترقع السماعه



    بعده مب مقتنع باللي صار ولا مصدق الرمسه اللي سمعها معقوله هاي هيفاء الانسانه الحبوبه الرقيقه الحنونه اللي يحبها من كل قبله ؟؟؟

    ليش جي أتعاملني ليش أنا شو ذنبي شو سويت ؟؟؟؟؟

    أمرك غريب أتحبها وتتدعي العكس ؟؟؟!!! شو أستفدت من كتم حبها باجر بيخطبها غيرك وبتوافق عليه وأنت بعدك أتفكر اذا أنت أتحبها ليش أتزعلها؟؟؟

    بس والله أنا ما أعرف كيف أعبر لها عن حبي أبي أتأكد أنها أتحبني ... شو تتأكد معقوله بعد كل هاي المده بعدك تبى تتأكد ؟؟؟ أنت أصلا مب عارف شو

    تبغي .... يحس بصراع غريب بداخله كأنه شخصين مب شخص .. يحبها ويخاف من مشاعره ... وينج ياوعد يوم أحتاجج وين ؟؟؟ ياربي ليش كل ها يصير ويايه

    أنا ما أبي غير أنها تفهمني و أتأكد منها شو اللي يضمني أنها ما بتخوني مثل ما خانت ثقة أهلها وكلمتني ؟؟؟!!!! أفففففف الله يلعنها من حاله ياربي تشفي وعد مالي غيرها

    محد يقدر يساعدني بعدك غيرها .....





    فبيت خليفه الساعه 1 ونص الضهر



    سهيل : السلام عليكم ورحمة الله وبركاته

    خليفه : وعليكم السلام ورحمة الله وبركاته ... أشحالك سهيل

    سهيل تجدم وباسه على راسه : بخير الله يعافيك أبويه ... وين سالم ما رد البيت ...؟؟؟؟

    خليفه : سالم عند يدتك في المستشفى

    سهيل : أبويه ممكن طلب ...

    عنود :هههه بدينا بالتقردين

    نجود : اسكتي خل نسمع شو يبا

    خليفه اللي يموووت في بناته : عيب يوم يرمس أخوكن الكبير تسكتن لا تتدخلن بين رمسة الرياييل

    غيث : أحسن أدبوكم يعني باباتي يوم أتكلم أنا بعد صح ؟؟!!!

    عنود : ههههههههه يا ويهك ألحين أنت طولك شبر ونص تتفلسف بعد

    نجود : آخر زمن غوغو مسوي له راس

    خليفه : عنود ونجود ممكن يا سموالأميرات أتنقطونا بسكاتكم .. سهول حبيبي آمر شو فخاطرك ...

    سهيل : مايآمر عليك عدو ,,, بس بغيت أروح أزور وعد ويدوه

    الكل : هي بابا نحنا بعد بنروووووووح بليييييييييييييز

    خليفه : وين أمكن بعدها ما يات ؟؟؟؟

    عنود : أصلاً هي متى يت طول عمرها برع ...

    خليفه أنصدم من رد بنته ماتوقع أنه عياله ملاحظين غياب أمهم المستمر عن البيت ماعنده رد ولاله ويه يقول لبنته عيب صحيح أنه

    مهما صار تكون أمهم بس هي تناست هالشي والظاهر بتخليهم ينسونه ...

    بعد فتره من السكوت

    خليفه : شو رايكم أنروح نتغدى برع وبعدين بوديكم سيتي سنتر والعصر بنروح المتشفى عند أمايه ووعد !!!!

    غيث يناقز من الفرحه : هي هي هي يعيش خلوفي أحسن بابا في العالم

    عنود : الله ونااااااااااااااااااااااا اسه بابا أنت فنان واليوم الأربعاء يعني ماشي درااااااااااااااااااااااا ااااااااسه يا سلام

    نجود: هههههه باسم الله جنهم عيال فقر وماشايفين خير ...

    سهيل : ههه والله ضحكتيني مب جنج بتطيرين من الفرح روحج مب مصدقه الخبر للحين ...

    خليفه : هههههههه يلا اللي بيتأخر ما بيروح

    ركضوا كل واحد على غرفته علشان يبدلون وما يتأخرون

    خليفه فخاطره أشياء وايده حاس بتعب وأنه محتاج لشريكة حياته توقف معاه بس مب لاقيها لاهيه من صالون لسوق

    لحفله لعزيمه حتى أمه ما راحت تتطمن عليها وتتحمد لها بالسلامه ...ليش هي أصلا تدري أنه أمي الحين بخير ؟!!!!

    يا ربي شو اللي مصبرني عليها شو ؟؟؟

    ....................

  8. #68
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم

    في مدرسه ثانويه دبي



    هزاع : والله يا حمد بخبر عليك عروف هو اللي يعرف لك

    حمد: أنت جب ما يخصك أشفيك مستوي شرات الحريم أتنقل الرمسه

    هزاع: الحين اللي يبي مصلحتك صار مثل الحريم الله يسامحك ...

    حمد: هزاع أنت ما يخصك فيني فاهم أخوي في البيت لا أكثر

    هزاع : بس ياحمد

    حمد : فكنا الله يخليك ألحين أتدور علي في المدرسه كلها وآخرتها هاي سوالفك التافهه

    هزاع: شوف أنا حذرتك هالمره بس المره ...

    حمد: أخبرك أقلب ويهك ولا تتفسلف علي فاهم ... على آخر عمري أتي أنت الياهل وتنصحني

    هزاع: الله يهديك

    حمد: هههه بدا المطوع يلا باااااااااااااااااااااااي

    هزاع : لا حول ولاقوة الا بالله ألحين اللي يطلب لك الهدايه سويته مطوع !!!!!

    فهد (ربيع هزاع الروح بالروح) : زوز خله يولي عقله في راسه ويعرف خلاصه وأنت اللي عليك سويته

    هزاع: لا يا فهد هذا أخوي من لحمي ودمي واللي يضره يضرني ما عليك منه أنا أعرف أتصرف وياه

    فهد: يلا عيل خل نلحق على الصلاه ..

    هزاع : يلا مشينا

    .........





    سعيد: ألو مرحبا فينا نحكي مع القمر

    سيف فخاطره , ييت بوقتك : هلا أشحالك بو عسكور

    سعيد : الحمدلله منيح أنت شو أخبارك شو عامل

    سيف : ههه لا اتضحكني ما يليق عليك ارمس شرا العالم

    سعيد : فديتك حبيبي أنته

    سيف: أعوذ بالله من الشيطان أشفيك أنت !!! مستخف ؟؟؟؟

    سعيد : باسم الله شو فيها لو دلعت أخوي حرام والا عيب يعني لو وحده قايله هالرمسه جان تشققت من الوناسه

    سيف : روحك قلتها لو وحده يعني هالسوالف أتلوق على البنات مب الشباب

    سعيد : ههههه أتلووووووق أي لغه هاي ؟؟؟؟

    سيف : يا أخي حل عن سماي شو عندك أشعنه متصل تستعبط عليه

    سعيد : أفا حياتي شو فيك ليش متضايق

    سيف : سعود أرمس عدل والا بسكر التلفون والله مب فايج

    سعيد : أفا ليش خير شو فيك أنت وين خبرني

    سيف : عند الممزر

    سعيد : أفا طع الخيانه

    سيف: لا والله بس كنت متضيج أشوي قلت أتمشى

    سعيد: أنزين لف وراك أشوي

    سيف وهو يلتفت وراه : يالنذل ألحين منشف ريجي من الصبح ومأذني وأنت وراي

    سعيد : الصراحه أنا كنت خاطف على السريع شفت موترك مستن في الباركنات قلت خل أغلس عليه أشوي

    تجدم منه وتوايه وياه ....

    سيف: باسم الله سعود بديت أشك في سلوكك أنت شي فيك ؟؟؟ متعاطي شي؟؟؟؟

    سعيد :هههههههههه حرام أبوس أخوي !!! حرام أوله عليه ؟؟؟؟

    سيف: ما قلنا شي بس يوز عن الطفاسه

    سعيد: ههههههههههههههههههههه تريقت ؟؟؟؟

    سيف: لا والله مصراني متقطعه من اليوع

    سعيد: عيل قم وياي عازمنك على الريوق

    سيف: يلا،،،،،، أنروح بموتري والا موترك

    سعيد : لا كل واحد يروح بروحه

    سيف: ليش شو عندك تبا أتروح بروحك؟؟؟

    سعيد: سلامتك بس يمكن أنت تبا أتسولف ويا الحب ...

    سيف: يالسخيف لا حب ولا خرابيط شو ماشي شغل يعني

    سعيد : أفا روميو شو صار فيك ليش أعتزلت الفن

    سيف : سعيد أذلف عن ويهي خلاص مب ساير وياك

    سعيد : أفا تزعل من بوعسكور ؟؟؟!!! أسولف وياك يلا قم بنروح بموتري ...

    سيف: ان غلست علي والله بودرك وبروح ...





    في غرفة وعد



    عذيجه لاويه على وعد: فديت روحج وعود حبيبتي نشي

    وفا وهي تدمع: أستهدي بالله يا عذيجه مب زين هالي أتسوينه أدعي لها

    عذيجه: مب مصدقه اللي يقولونه هي راقده الحين بتنش ... وعدان نشي شوفي أنا حامل

    وفا تلطف الجو : ههه وعود نشي أنا بعد حامل والفال لج ان شاء الله

    عذيجه: لو سمحتي لا أترزين بجرشتج بينا

    وفا: لا والله أصلا أنا الوحيده اللي يحق لها ترمس لأني بسميها وعد ان شاء الله

    وفجأه عم الهدوء ... اشوي وسمعوا حد يدق الباب ودخل

    عوشه : السلام عليكم ورحمه الله وبركاته

    شهد: السلام عليكم

    سلموا على بعض وتموا يسولفون اشوي وبعدين وصلت رويه أم سهيل وخذت وفا وراحت

    أما عوشه وبنتها رجعوا عند أم سلطان يطمنونها على وعد وعذيجه رجعت ويا عارف



    في السياره

    عارف : عذوج طمنين عليها أشحالها؟؟؟

    عذيجه :...................

    عارف : عذوج أشفيج صاخه شو ياج ؟؟؟؟

    عذيجه بدت بنوبة بكاء بطريقه هستيريه .....

    يا ترى شو اللي صار



    ترقبوني في الجزء الياي وأقولكم من الحين بيكون بعد اسبوعين لأنه عندي أمتحانات ....
    لو حلفت انك تبيني ،،،
    وميت وهيمان فيني ،،،
    بأعتبرها ألف كذبه،،،
    طحت من قلبي وعيني ،،،

  9. #69
    مشترك مقبول الصورة الرمزية عاشقة الريم
    تاريخ التسجيل
    May 2005
    المشاركات
    21
    قوة التمثيل
    231

    مشاركة: أموت أنا في حبهم

    مشكوووووووووووووووووووووو ووورة على الجزء الرائع



    أنا اليوم شفت الجزء وقريته قبل الإمتحان..

    والله يوفقك في امتحاناتك..

    وفي الإنتظار..

  10. #70
    مشترك مقبول الصورة الرمزية مزون
    تاريخ التسجيل
    Jun 2005
    المشاركات
    18
    قوة التمثيل
    229

    مشاركة: أموت أنا في حبهم

    مشكورة على القصة وفي انتظار اليديد

  11. #71
    أحسن عضو الصورة الرمزية ريم العين
    تاريخ التسجيل
    Apr 2004
    المشاركات
    1,689
    قوة التمثيل
    327

    مشاركة: أموت أنا في حبهم

    ثانكس حبوبه عالجزء وفانتضار الجزء 9

  12. #72
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم

    عاشقة الريم
    الله يسلمج ويوفقنا أجمعين

    مزون **** ريم العين

    العفو حبايبي واتمنى يعجبكم الجزء الــ 9
    لو حلفت انك تبيني ،،،
    وميت وهيمان فيني ،،،
    بأعتبرها ألف كذبه،،،
    طحت من قلبي وعيني ،،،

  13. #73
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم



    أموت أنا في حبهم



    الجزء التاسع




    في السياره

    عارف : عذوج طمنيني عليها أشحالها؟؟؟

    عذيجه :...................

    عارف : عذوج أشفيج صاخه شو ياج ؟؟؟؟

    عذيجه بدت بنوبة بكاء بطريقه هستيريه .....

    عارف بركن السياره عند أقرب محطة بترول ونزل ياخذ لها غرشه ماي وبنفس الوقت يبي يترك لها المجال أتعبر عن اللي في

    خاطرها ... عارف مقدر شعورها لأنه وعد كانت الإنسانه الوحيده اللي أتعرفها أو بالأحرى اللي تمت على صله وياها بعد سالفة

    سجن أبوهم ... كل ربيعاتها أهلهن أجبروهن يبتعدون عن عذيجه لأنه أبوها كان مسجون بالكويت ومحد يبي بنته أترابع بنت خريج سجون حتى لو كان مظلوم...بس وعد غير كانت أختهم اللي ما يابتها أمهم همهم همها وفرحهم فرحها وعد جزء لا يتجزأ من حياة عذيجه وغاليه على قلبها ( عارف فخاطره بس مب أكثر من غلاتها فقلبي ) وأكيد بتتأثر باللي صار لها ....



    المحاسبه : 5 Dh sir

    عارف أنتبه أنه في حد يكلمه : excuse me !!????

    المحاسبه : 5 Dh sir

    عارف : sorry here you go

    المحاسبه : Thank you sir , have a nice day

    عارف : thanks , same to you

    بعد ما وصل للسياره شافها أتصيح بس بهدوء وشكلها أرتاحت أشوي ... فتح غرشه الماي وقربها لها

    عارف : عذوجه أشربي أشوية ماي وتعوذي من إبليس

    عذيجه خذت الماي وشربت منه أشوي ورجعت راسها على الكرسي وغمضت عيونها وصورة وعد ما أتفارقها

    عارف يحاول يغير الجو : عذوج شو رايج أنمر على اليهال ؟؟؟

    عذيجه: هم ممممممم

    عارف : شو همممم أقولج شو رايج أنمر على الشبيبه وأنروح نتغدى بمطعم ؟؟؟؟؟

    عذيجه : كيفك بس أنا نزلني البيت عند أمايه

    عارف : شو نزلني البيت مب بكيفج وبعدين أمايه تغدت الحين الساعه 1 وأنتي عارفه الدكتور موصي تتغدى من وقت وتاخذ دواها الحين ... يعني حتى لو رحتي البيت بتلقينها راقده ... يلا غناتي خلينا نستانس أشوي ...

    عذيجه: مالي خلق عارف والله مالي خلق

    عارف : ما يخصني أنا بمر على حمد وهزاع قبل بعدين بناخذ روضوه وحموده

    أتصل بالدريول يقوله أنه هو اللي بيمر عليهم كلهم وأول ما وصل عند المدرسه وركن سيارته أشوي بعيد وأتصل لـ هزاع وحمد

    أول ما وصلوا بدت الحرب العالميه



    هزاع يمشي بسرعه : أنا بيلس جدام ما يخصني

    حمد: يالنذل أنا أكبر منك وأنا اللي بيلس جدام

    هزاع : ما يخصني وعلى طول فتح الباب وأنصدم ....!!! باسم الله أنتي شو أتسوين هني

    عذيجه اللي أنفجرت من الضحك عليه: ههههههههههههههه شو شايف يني ؟؟؟!! شو يعني شو أسوي هني ؟؟؟ عبببببببببببببببببببببببب بببببببببببببط

    حمد: ههههههههههههههاي والله وأحترق الويه الله داواك تستاهل عشان تتأدب ومرة ثانيه تحترم أخوك الكبير

    هزاع: هه هه والله ضحكتني أنا أحترم اللي يحترم نفسه

    عارف : جنكم مصختوها وأنا ساكت لكم ؟؟!!!!

    عذيجه: الله ياخذ إبليسكم أنتوا كله تتناقرون عنبو جنكم عدايل

    حمد: ههههه كله من هالمطوع

    هزاع: أحسن منك ويشرفني أكون مطوع... الحمدلله على الأقل أعرف ربي

    حمد: شو قصدك ؟؟؟ أشوفك تغلط على كيفك

    عارف : أفففف أستغفر الله صدق أنكم بلوه أصلا أنا الغلطان اللي ناوي أطلعكم تدرون بنزلكم في نص الدرب أخذو تكسي وروحوا البيت ونحن بناخذ البنات وبنروح نتغدى

    حمد : نعم نعم حلوه هاي لا حبيبي أستريح مب نازل من السياره ما يخصني

    عذيجه: خلاص صدعتوني والله حتى البيبي بدى يرافس من حشرتكم .....

    هزاع : فديت البيبي وماماته خلاص عذوجه عشان خاطرج والا بعض الناس ما يستاهلون ...

    حمد: وي عارف كيف تسكت له ؟؟؟؟ أنا منك جان غسلته بالعقال

    عارف : وأنا منك جان حطيت لساني فــ ثمي وسكت

    عذيجه: ههههههههههههه الحمد لله والشكر يلا عن نتحير على البنات

    مروا على مدرسة البنات وطلعتهم عذيجه لأنه دوامهن يخلص الساعه 2 ونص

    روضه متروعه: باسم الله شو صاير عذيجه بلاج أمايه شي ياها ؟؟؟ شو فيكم حد من أخواني فيه شي ؟؟؟؟

    حمده: عذوج شو صاير والله ما أقدر أتحرك من الزيغه وليش جي ويهج ؟؟؟ كنتي أتصيحين

    روضه وهي تبلع ريجها: عذيـ ــ ــ ــ جـــ ـــ ه

    عذيجه: حووووووووو شو بلاكن أنتي وياها أستخفيتن ألحين هاي يزاتي يايه بطلعكن أنروح نتغدى مسويات لي فلم هندي ؟!!!!

    روضه: الله يسامحج روحي من الصبح قلبي منقبض ما أدري شو فيني وأتين أتطلعيني فجأه والله تروعت

    حسبالي

    عذيجه أتقاطعهن : بسسسسسسسسسسسسكن من الهذره يلا أمشن فضحتونا لو يسمعني مدرساتكن بيقولون ونعم الأخت مطلعه خواتها عشان يتحوطن ....

    روضه وحمده : هههه رحم الله إمرءٍ

    عذيجه : أوكي ألحين أنا الغلطانه

    روضه وهي أتبوسها : فديتج والله أنتي تاج راسي

    حمده : بدى التقردين

    روضه : جب

    عذيجه : بديتن !!! نحن ما نخلص من زوز وحمد تبدن أنتن والله ليذبحكن عروف

    حمده : فديت هالطاري فديت روحه

    روضه : الحمدلله والشكر

    حمده: جب يالغياره

    طلعن من المدرسه وركبن السياره وطبعا في البدايه أشوية ضرابه وياالشباب بعدين أصطلبوا وتموا يسولفون

    ... راحوا مطعم قصر الهند

    وتغدوا طبعاً طول الوقت ضحك وغشمره وجو حلو .... بعد الغدى رجعوا البيت وكلهم رقدوا بعد التعب ...



    في العين ... بيت سهيل عبدالرحمن (ولد عم وعد)

    نوره مبوزه : ...........

    سهيل : فديت القمر فديت حياتي والله على منو طالعه ؟؟؟

    نوره: أكيد مب عليك

    سهيل : أفا !!! خلاص أنا زعلان

    نوره : لا بابا ما يصيرأنا كنت زعلانه قبل يعني أول لازم أتراضيني بعدين أنا براضيك

    سهيل : أممممم خليني أفكر أشوي

    نوره : بابا شو أتفكر أنا بنتك دلوعتك زعلانه منك وأتقول بفكر خلاص أنا بعد فكرت بسالفة خالتي سلوى

    سهيل عدل يلسته وبطل عيونه على الآخر : شو شو يعني ؟؟؟؟!!!

    نوره : ماشي

    سهيل : نواري حبيبي شو هالرمسه بعد الحين يهون عليج بابا أتخلينه وأتروحين عنه؟؟ ؟؟

    نوره: لا فديتك باباتي مستحيل أروح عنك

    سهيل : هاي خالتج لو الله يهديها وأتودر عنها هالسوالف الي ما منها فايده زين

    نوره : هههههههه بابا ترا هي بتي تتغدى ويانا اليوم

    سهيل : عوذ بالله من شرها ليش ما قلتي لي ؟؟؟

    نوره : عشان تشرد !!! ههههههه

    سهيل : يالشيطانه .... ليش أشرد !!! ماله لزمه اليوم لازم أوقفها عند حدها

    نوره : بابا لا تتضارب وياها بليييييييييييييز

    سهيل : عشان خاطرج .. فهاللحظه دق الجرس ..... أففف أكيد وصلت

    نوره وهي تغمز له : بسير أستقبلها

    سهيل مسكها من خصرها ورفعها فووووق ونزلها ،،، وقرصها بالخفيف على خدها.... وفي خاطره مستانس

    أحمدك يارب ... صح أني أنحرمت من أمها بس وجودها معوضني ومصبرني على العيشه وحيد .......
    لو حلفت انك تبيني ،،،
    وميت وهيمان فيني ،،،
    بأعتبرها ألف كذبه،،،
    طحت من قلبي وعيني ،،،

  14. #74
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم

    سلوى خالة نوره الوحيده متزوجه عندها مايد 4 سنين ومزنه 2

    متزوجه ولد عمها ..دكتور في الجامعه ... طبعاً من توفت أختها وهي تلح على سهيل يخليها أتربي نوره وأتسكنها عندها دوم أتحاول تقنع نوره بهالشي وأتشيشها بس طبعاً لا نوره ولا أبوها يبون هالشي أو يرضون به

    سلوى: السلام عليكم ورحمه الله وبركاته

    سهيل : وعليكم السلام والرحمه ...حيالله من يانا

    سلوى : الله يحييك ويبقيك أشحالك ...

    سهيل : مانشكي باس ومن صوبج؟؟ ؟

    سلوى : الحمدلله ... سلم عليك بو مايد

    سهيل : هي الله يسلمه عيل ليش ما يا وياج ؟؟؟؟

    سلوى : تدريبه مشغول هاليومين يجهز امتحانات الطلبه لنهاية الفصل

    مايد: ثلام عليكم ,,, تجدم وتوايه ويا سهيل(السلام عليكم )

    سهيل : عليكم السلام والرحمه هلا والله أشحالك حبيبي شو أخبارك

    مايد : بخيل الله يثلمك (بخير الله يسلمك )

    سهيل: ياربي عليها منو هالحلوه الأموره ؟؟!!!! مزوني فديتج تعالي عندي

    مزنه: بابي ( ما أبي )

    سهيل : بعطيج حلاوه

    مزنه: حواوه ...؟؟؟ بح .. دني خدا ( حلاوه ...؟؟؟ بح ... الجني خذاه )

    سهيل وهو يفتح إيديه : لا ما خذاه الدني أنا خذيته شوفي

    قربت منه مزنه وشلها على طول يلسها عجتوفه وسار صوب المطبخ التحضيري اللي متعود يحتفظ فيه

    بحلاوه وشبس وسوالف لنوره ....

    مايد ركض وراه : عمي أنا بعد أبي حلاوه ...

    سهيل : أوكي

    مايد : ثلني أنا بعد .....

    سهيل : هههههه بثلك تعال

    سلوى: نوره تعالي يلسي عندي

    نوره : ان شاء الله خالوه

    سلوى : حبيبتي شو سويتي بالسالفه اللي خبرتج عنها قلتي لبابا ؟؟؟؟

    نوره : لا

    سلوى وهي معصبه : ليش ؟؟؟؟!!!!

    نوره خافت منها : نسيت

    سلوى : أنا كم مره متصله أذكرج كيف تنسين ها؟؟ ؟؟؟

    نوره : خالو أنا ما أبي أيي عندج بتم هني عند بابا

    سلوى : ليش ؟؟؟؟ تعالي عندي بحط لج سرير في غرفة مزنه وبشتريلج ألعاب وايد

    نوره : بس أنا أبي بابا ...

    سلوى: عاد أنا ما علي منج وايد عطيتج ويه وأشاورج بتيين ويايه غصبن عنج

    سهيل وهو طالع من المطبخ سمع الكلام اللي دار بينهم ويوم سمع جملة سلوى الأخيره ما تحمل أسلوبها ولا زعيجها على بنته دلوعته ....

    سهيل وهو ينزل مزنه ومايد ويحطهم على الأرض : سلوى

    سلوى : أعتقد أنا في بيتك ولا زم تحشمني ولا ترفع صوتك علي عيب

    سهيل : لأنج فبيتي ومحشمنج ساكت لج والا كنتي شفتي شي عمرج ما شفتيه ... لا أتضنين أني ساكت خوفا منج او شي لا أنا ساكت احتراماً لروح المرحومه وأنا أدري أنه هالشي وايد بيضايقها لو كانت موجوده فدخيلج أحترمي قراري وقرار بنتي ,,, صح أنا ما أقدر أستغني عنها بس لو هي بغت هالشي صدقيني ما بحرمها منه

    سلوى :هاي ياهل ما أتعرف مصلحتها ولا تدري شو الي يفيدها واللي يضرها أنت طول النهار في الشركه ومن ترجع يدوب تتفيج لها نوره بدت تكبر وتفهم ومحتاجه لأم ترعاها وأتعلمها الصح من الخطأ ..

    سهيل :!!!! سبحان الله وأنتي شو رادار راصده تحركاتي !!...؟؟؟ لعلمج بس نوره ما أفارقها الا الصبح وهالفتره تكون في المدرسه ومايمديها ترجع الا أنا واصل البيت ومتغدي وياها .. والعصرأذاكر لها دروسها وبعدها نطلع نتمشى وترقد الساعه 8 كل هذا يا هانم يصير بوجودي وتحت إشرافي ... ما أضن ياسلوى يرضيج أنه حد يتدخل في تربيه عيالج ويعلمج كيف أتعاملينهم ومافي أم أو أب في هالوجود ما أتهمهم مصلحتهم

    سلوى: أنت ياسهيل معاند وماخذ الموضوع بحساسيه كبيره أنا اذا حد ينصحني بشي في مصلحة عيالي مابهتم من يكون هالشخص أو مدى قرابته لي طالما أنه نبهني لشي في مصلحة عيالي مستحيل أنسى جميله ..

    سهيل : في ضنج إبتعاد بنتي عني لمصلحتها ؟؟؟؟ وعلى طاري مصلحه عيالج خليني أخبرج ترا بنتج مزنه مشيتها مش سليمه ويكون أفضل لو تعرضينها على طبيب عظام الظاهر عندها إعوجاج فالقدم ....

    سلوى: فال الله ولا فالك باسم الله على بنتي أنت شو تتبلى عليها ما أتخاف ربك ؟؟؟!!!!

    سهيل : ليش يا سلوى أحيد انتي ما تنسين جميل اللي ينبهج لشي في مصلحة عيالج مسرع ما نسيتي رمتسج

    سلوى:لو صدق كنت تبي مصلحتها ما عايرتها وتبليت عليها أصلا ً أنا الغلطانه اللي حاره قلبي عليكم مايد يلا ماماه خلنا أنروح البيت هالناس ما يفتهمون شي ....

    سهيل : غدانا يا سلوى

    سلوى : عليكم بالعافيه .... بعد ما عليت قلبي تباني أتغدى وأتسمم بكلامك لا مشكور ما أتقصر ...

    سهيل : الله العالم ياسلوى أني ما تبليت على بنتج وأنه اللي قلته صح ...

    سلوى وهي ترقع الباب بالقو : فمان الله

    سهيل : الله يهديج ويصلح بالج

    نوره : بابا ليش أتضاربت وياها

    سهيل : حياتي ما ضاربتها كنا نتناقش هاي ما يسمونها ضرابه يلا نشي تغدي عشان أقولج عن المفاجأه الي مسونها لج

    نوره : الله مفاجأه شو هي بابا ؟؟؟!!!!

    سهيل : ما بتكون مفاجأه لو قلت لج

    نوره مبوزه: ما أبا

    سهيل : عن الدلع يلا بسرعه عشان أخبرج

    نوره : أوكي



    في غرفة أم سلطان ....

    عوشه بعد ما راحت وتطمنت على وعد رجعت ويا شهد ويلسن عند أم سلطان وفي هاللحظه دخلوا سعيد وسيف بعد ما تريقوا ريوق متأخر جداً أقصد غدى لأنه سيف ما كل غير كروسونه أما سعيد الملقوف ما خلى شي الا وخذ منه وتريق ريوق دسم يغنيه عن الغدى...

    سعيد وسيف : هود هود

    عوشه : هدى هدى قربوا حياكم

    سعيد : السلام عليكم ورحمه الله وبركاته

    عوشه : وعليكم السلام والرحمه هلا والله هلا بالشيوخ أشحالكم شباب

    سيف: سلام

    شهد : سعيد وعليكم السلام ورحمة الله وبركاته ..... سيف عليكم

    مهره : وعليكم السلام والرحمه

    سيف: باسم الله أي شو ها عنبو حد يرد السلام جذه ؟؟؟ وأشمعنى سعيد صفيتي له السلام صف وأنا ؟؟؟

    شهد " الرسول عليه الصلاة والسلام قال " بما معناه : لازم أنرد السلام بالمثل أو بأحسن " فأنا رديت على كل واحد فيكم بمثل اللي قاله ...........

    سيف: وأشعنه شاقه الحلج ومستانسه يعني مسويه أنجاز حضرتج

    شهد : الحمدلله والشكر اللهم سكنهم في مساكنهم

    عوشه : عوذ بالله من لسان هالبنت أنتي شو ما أتحشمين حد

    سيف اللي أستغل الموقف: مب لاقيه حد يردها ويوقفها عند حدها لو ترخصيني بقص رقبتها

    عوشه : يبالها حد يقص لسانها

    شهد: خسي والله ما عاش اللي يمد أيده علي .... هاللي ناقص وأنتي يا أمايه بدل لا أتدافعين عني تبين هذا يمد أيده علي ... وأنت صدق ما أتخيل تبا تستريل علي وأتمد أيدك!!!!! صدق ما أتخيل

    سيف : جـــــــــــــــــــــب ولا كلمه والا قسماً بالله أكسر ويهج ألحين

    أم سلطان : سيف عيب عليك شو هالرمسه

    عوشه : خليه يوخيتي خليه يأدبها ما أتشوفين لسانها شمطوله

    مهره : شهد بس طبي السالفه تعوذي من إبليس

    شهد : هي ترا أنا كل من هب ودب بيأدبني ليش ما تذبحيني وترتاحين من شري مره وحده مب أحسن

    سيف: شو هب ودب وخرابيط صج ويهج لوح يعني بعد كل هالتهزيء بعدج ترمسين

    شهد : أكيد برمس ولا بسكت لأني ما غلطت بحق حد

    عوشه: والله يا شهد ياتسكتين والا بخليه يكسر راسج بس عاد ما تخيلين توه متناقره ويا أبوها في البيت والحين ويا ولد عمج شو ما تستحين

    سعيد : سيف عيب أسكت عنها ما يخصك بها

    سيف: لا والله يخصني ونص وغصبن عنها تسمع الرمسه

    سعيد : سيف أقصر الشر وأترك البنت فحالها

    سيف: واللي يقول مب ساكت عنها

    سعيد : الله يهديك

    شهد : سعيد مشكور وما أتقصر بس ما يحتاي أتوصخ لسانك وياه خله يقول اللي يباه ما يهمني

    سيف: ما أهمج ها ...؟؟؟ بنشوف يا شهد يا أنا يا أنتي ,,, ومن الحين أقولج الاسبوع الياي ملجتنا وعمي ما بيرد لي طلب وبتشوفين ما أكون سيف بن مانع ان ما كسرت خشمج وخليتج تركعين عند إريولي

    سعيد : سيف تراك مصختها أمش معاي

    سيف اللي ترك إيده : سمعتيها الرمسه ؟؟؟!!! محد غيري بيربيج

    مهره مصدومه مب قادره تستوعب اللي يصير سيف بيملج على شهد !!!! لا مب مستحيل أبوي ممكن يسوي هالشي حتى من دون لا يشاورها أي يشاور عادي يقوله خذها من دون عرس او حشره .....!!!!!! رفعت عيونها اللي أصتدمت بعيون سعيد .... نظراتها له كانت ترجي تستنجد به محتاجه لوقفته وياهم ....

    سعيد : سيف عن الرمسه اللي مالها معنى

    سيف : سعيد أنا ما أتغشمر وان ما ملجت عليها السبوع الياي هالعقال مب عراس ريال

    أم سلطان مصدومه ومب قادره تتكلم أو تترجم عن اللي يدور بخاطرها ,,,, الدكتور قايل اليوم العصر بيرخصها والمفروض ما يعرضونها لصدمات ،، بس سيف عنيد وراسه يابس بينفذ اللي في باله لو على موته ..... حست بحيره وخوف تنقلت بنظراتها صوب عوشه أم شهد اللي المفروض ما تسكت عن اللي يصير ولا ترضى به بس أنصدمت من اللي شافته ....

    عوشه منزلة راسها مثل اللي مستسلمه للي يصير أتعرف الأثنين عدل ريلها ما بيرد سيف لأنه من الأساس ما يهمنه بناته و عادي عناداً فيهم يوافق وسيف أعند من العناد نفسه دامه حط البنيه براسه مستحيل يشلها وخلاص بالنسبه لها شهد صارت حرمته حلاله ولا حد له شور عليها غيره .....
    لو حلفت انك تبيني ،،،
    وميت وهيمان فيني ،،،
    بأعتبرها ألف كذبه،،،
    طحت من قلبي وعيني ،،،

  15. #75
    عضوية البكالوريا الصورة الرمزية الجنيه
    تاريخ التسجيل
    Jul 2003
    المشاركات
    2,182
    قوة التمثيل
    361

    مشاركة: أموت أنا في حبهم

    أم سلطان : سيف

    سيف: عيونه آمري يا بعد عمري

    أم سلطان : تعوذ من أبليس يا بويه والقرار اللي تتخذه بلحظه غضب ممكن يرد عليكم أنتوا الأثنين بالشينه

    لا تتسرع يا أبويه ولا تاخذ السالفه عناد وتحدي

    سيف: فديت روحج أنتي أرتاحي الحين وماعليج مني وانالو ما كنت مقتنع بها جان ما طلبتها ........



    في هالمعمعه كلها محد لاحظ غياب شهد اللي من سمعت الحلفان والتوعد نشت وطلعت على طول حست بخنقه وأنها ممكن تنهار بأي لحظه بس هي ما حبت أتبين ضعفها وخوفها لأي كان ... صح ملسونه بس جبانه من داخلها تخفي ضعفها بطولة اللسان والتظاهر بعكس الواقع .. من صغرها نمى هالشي وياها لما كانت أتشوف أبوها المستبد كيف يعاملهم و أمها ...

    وهي تمشي في ممرات المستشفى حست بدوخه وأظلمت الدنيا فويها تسمكت بأول كرسي لقته ويلست عليه شايله همومها ... صح أني كنت معجبه بشخصيته وأسلوبه وعناده بس مستحيل أتقبله بعد هاليوم ،،،معقوله ينفذ اللي في باله عناداً فيني ؟؟!!! والله جايز مب غريبه عليه .. مافي حد بيوقفه عند حده غير يدي جابر مافي غيره .. مشت منزله عيونها للأرض بسرعه و متجهه للباب ... فجأه وقفها أصتدامها بجسم صلب هو أنسان بس حست به مثل الحجر ...

    سيف والشرر يتطاير من عيونه : على وين ؟؟؟؟

    شهد أرتبكت : أ أأ أ أ بروح البيت

    سيف: ومن متى تطلعين روحج وما أتخبرين حد ؟؟؟؟

    شهد : لا بروح الكليه

    سيف: تعالي ويايه أمج أتدور عليج

    شهد : لا خلاص أنت خبرها أني رحت

    سيف: شهود أمشي جدامي لا أيرج جدام الناس وبعدين كلمه حطيها فبالج زين ماشي كليه فاهمة

    شهد: أنت مالك حق تتدخل بحياتي وقراراتي فاهم

    سيف: الظاهر نسيتي اللي صار من أشوي

    شهد وبشراسه : لا مانسيت بس يوم بتخطبني وبوافق عليك وبتصير زوجي رسمي ساعتها لك الحق ترمس بس لذاك الوقت أبعد عن دربي ولا أتفكر تتحداني لا تضن أني بسكت وبرضى بك فاهم ... على طول طلعت ولقت السايق عند الباب ..ركبت السياره وقالت له يوديها البيت بسرعه ...

    سيف: عض على شفايفه وهو يتوعد لها في خاطره ...



    ,,,,,,,,,,,,

    في الصاله



    العصر وبعد ما رجعت أم سلطان من المستشفى

    بوسلطان : الله يهديج يا نوره لو رحتي حجرتج ترتاحين أشويه

    أم سلطان : خلني يا بوسلطان تمللت من اليلسه روحي واشتقت لبيتي وعيالي

    سعيد : فديت روحج والله البيت أنور

    سالم: أمايه خذتي دواج؟؟؟؟

    سيف : أففف مشكله الحشره ... هي خذته توني معطنها إياه

    سالم : أتطمن عليها والا أنتوا مالكم أمان

    بو سلطان: هههههه الله يهداك يابويه شو هالرمسه بعد

    سيف: اللهم طولج ياروح ... الولد وأبوه طاحو فينا طيحه شو هالحاله

    سلطان وهو حادر الصاله : مساء الخير ,,, تجدم من أبوه وباسه على راسه أما أمه فعلى طول طاح فحضنها

    سالم: باسم الله عمي شو فيك ؟؟؟ بذبحها نش عنها يالدب

    سعيد : أندوكم ألحين أنا آخر العنقود دلوع ماما ماسويت شراتك وانت الشحط تتدلع عيب

    سيف : طع هذا من صدقه أي بابا نش هاي مب شبريه ...

    بوسلطان : سلطون يالهرم خوز عنها ذبحتها

    أم سلطان : ويديه أشفيكم عولديه خلوه ليش هالغيره ....

    الكل : هههههههههههههه

    بوسلطان : ثرج الا أنتي مدلعتنه ....

    سلطان : أفففف شو هالحقد والغيره عنبو الواحد ما ياخذ راحته فهالبيت فديت أمي تولهت عليها فيها شي ؟؟؟

    سعيد : والله أضني اللي يوله عليها يسأل عنها الصبح مب الا راقد عنها

    سلطان: والله تعباااااااااااااااااااااا ااااااااااااااااااااااااا ااان وبعدين أنا كنت عندها الصبح قبلكم كلكم

    سيف: ههههههههه انزين لا اتصيح علينا ....

    سالم: وتكلم المعرس

    سيف : انجعم اليهال ما يتكلمون

    سلطان : المعرس ؟؟؟ شو السالفه .؟؟؟

    سعيد : أخوك المحترم سيف

    سلطان: متى وكيف وليش ومن العروس ؟؟

    سيف: باسم الله شو حلال عليكم وحرام على غيركم ؟؟؟؟

    سلطان : حشى ما قلنا شي بس أمس مافي شي فجأه اليوم من دون مقدمات يعني ؟؟؟؟

    بوسلطان: مافيها شي يا بويه شاف بنت عمه وخاطره فيها لا هو عيب ولا حرام

    سلطان: أي وحده فيهن ؟؟؟

    بوسلطان : شهد ...

    سلطان : غريبه

    أم سلطان أتحاول أتغير الموضوع لأنه بوسلطان ما يعرف كيف صا رالموضوع (الضرابه اللي بين سيف وشهد واللي كان نتيجتها الخطبه )

    سلطان : ولله في خلقه شؤون .. عيل متى الملجه ؟؟؟

    بوسلطان : بعد يومين بنروح نخطب رسمي وان شاء الله الملجة بنحددها بنفس اليوم ...

    أم سلطان بحزن : على خير ان شاء الله ...

    سلطان من نبرة أمه حس أنه السالفه فيها إن بس ماحب يسألها الحين أجل الموضوع ليوم يكونون روحهم...

    وفجأه .... السلام عليكم ورحمه الله وبركاته

    أم سلطان : أنفرجت أساريها وأبتسامتها مافارقت شفاتها ... هذا خليفه وعياله بعد ما غداهم ولعبهم مروا المستشفى ودروا أنه أم سلطان رخصوها ييوها البيت ...

    سهيل : شال باقه ورد كبييييييييييييره في أيده ... حطها على الطاوله وسلم على يدته وتم فحضنها

    عنود ونجود : الحمدلله على سلامتج أمايه

    غيث: مايعرف يعبر فعلى طول لوى عليها وتم يبوسها ......

    سيف: لا حول الله هاييل ناويين يخلصون الحنان كله اليوم ....

    خليفه : أشفيك على عيالي ما يخصك بهم خلهم يسوون اللي يبونه

    سعيد : خلهم يسوون اللي يبونه بس مب يطنشونا...

    بوسلطان الي ردت له الروح بشوفتهم : حيالله من يانا

    ونشوا كلهم عن أم سلطان وتوزعوا يسلمون على عمامهم .....



    وبهالوقت وصلواحميد و عائلة عبدالرحمن أخوه يايين يتحمدون بالسلامه لأم سلطان

    الرياييل تيمعوا فالميلس والحريم حدرن الصاله،،،

    فميلس الرياييل ...

    مانع: حيالله من يانا

    حميد : الله يحييك ويبقك يا بوسلطان

    عبدالرحمن: علومك وأخبار الشغل

    مانع: الحمدلله بخير ونعمه والشغل ماشي تمام التمام...

    سهيل : تستاهل سلامة أم سلطان عمي بوسلطان

    بوسلطان: الله يسلمك عاش من شافك بو نوره

    سهيل : عاشت أيامك ... والله أنت أدرى بالشغل وأهواله

    بوسلطان : هي الله يسهل عليك .. أشحالك بنتك عساها الا بخير

    سهيل : بخير يطولي بعمرك ...

    سيف: سهول وينك ياريال مالك شوف أبد !!؟؟؟

    سهيل : أسمع منو يرمس عاد أنت اللي مكسر بابنا من كثر يياتك ... خلها على الله

    سلطان: هههه الله يهداك أشوي أشوي علينا

    سهيل : عيل ما أتشوفه متفيج يعاتب وما يشوف عمايله

    سلطان: ترا سيفوه عمره ما تغير هاي طبايعه من يوم يومه...

    سهيل : الا ما خبرتني وعد شو أخبارها الحين ان شا ءالله أحسن ... اسمحلي يا خوك ما كنت أدري اليوم واصل

    وخبرتني أم سيف ونوره حليلها ذبحت روحها من الصياح أنت تدري بغلاة وعد عندها

    سلطان: أفا عليك بونوره لا أتشيل هم وان شاء الله ما عليها شر أزمه وأتعدي ....

    سلطان وهو يكلم سالم: وينه أبوك ؟؟؟

    سالم : قال بيسلم على خالتي أم سهيل وبيرد

    سلطان : أها ... زين

    سهيل : ماشاء الله كبرت وصرت ريال

    سالم: إحم إحم أخجلت تواضعي

    سعيد : أسميك ما تنعطى ويه

    سلطان : حوه لا تغلط عليه ما أرضى

    سالم: فديت روحك يعلني فداك يالغالي ...

    سيف: أي لا تتعاونون على خويه فديته

    سلطان : جيه شو شايفني ليكون أنا ولد البطه السوده وأنا ما أدري

    سهيل : هههههههههه والله أمركم عجيب صدق ما أتوبون أبد ....




    لو حلفت انك تبيني ،،،
    وميت وهيمان فيني ،،،
    بأعتبرها ألف كذبه،،،
    طحت من قلبي وعيني ،،،

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •