<font color='#000080'>أم سهيل مسويه عزيمة على سلامه ولدها حميد وما خلت حد من أهلها ومن أهل أبو سهيل ما عزمته .. وعقب العزيمة كان أبو سهيل قاعد ويا أبو سلطان وأختهم موزة يسولفون عن العزبة وعن المشاكل يالي فيها .. أما سلطان فكان حذال سهيل يسولف وياه وكل شوي يطالع صوب البنات لأن شمسه قاعدة تسولف ويا سمر أخته يالي كانت حامل ..
سهيل: سلطان بلاك يا أخي جنك مب ويايه ..
سلطان: هيه والله مب وياك ..
سهيل: زين أقولك هزاع قاليه سالفة ..
سلطان: شو هي ..
سهيل: لا مب احينه بخبرك بعدين لأن السالفة طويلة شوي ..
سلطان وهو يرد يطالع شمسه: يصير خير ..
أما عند البنات كانت شمسه ما تقدر تقول أي شي أو إنها تسوي أي شي لأن سلطان عينه عندهم وهي مستحية شمه وسمر وايد يحرجونها وهي طبعا ساكتة عنهن عقب بتراويهن ..
شمه: أقول شمسوه بلاه سلطان يطالعنها ..
شمسه: يمكن معجب يا سخيفة ..
سمر: بلاج معصبه زين ..
شمسه: مب معصبة .. وين حصة ..
شمه: فوق ما راضية تنزل هذه البنت ما دري بلاها ..
مريم: أنا أشك إنج ما تعرفين ..
شمه: جب إنتي ما لج شغل .. أقول شموس غزيل بتي اليوم بيتنا دخيلج سويلي شوي من أيدج الحلوة ..
شمسه وهي مضايجة : ما بسويلج مساع قاعدة تضحكين عليه ..
شمه: يا الله شموس يات على هذه ..
شمسه: يعلج تاخذين ريل تبتلين فيه ..
شمه وهي تذكر ذياب: أحلى دعوه سمعتها .. المهم بسويلي ما بي شي بس سويت قول موافقة ..
شمسه: وبعد الحرمة تبا ريل خلاص بسويلج ويايه سمر بعد ..
سمر: زين جان تبيني أحرق كل يالي طابخته ..
شمسه: لا تتغلين دلع بنات على الفاضي .. أما في ميلس الرياييل كان الجو كله ضحك وناسه بس حميد كان تعبان شوي وماله خلق حتى في الضحك ..
خالد يالي كان الجبس بعده في ريله: ها حميد بلاك شكلك ياك الرقاد ..
حميد: لا والله لا رقاد ولا شي بس أحس جسمي يعورني ..
خالد: روح ارتاح ..
حميد: لا عيب شو من المذاهب فيني .. عيل شو بيقولو عني العرب ..
خالد: بعذروك انت مريض وبعدك ما شفيت ..
حميد: لا ما اقدر ..
خالد: شباب حميد تعبان شوي بيسير عنكم ممكن .. عاده الشباب ما قالو شوي عادي المهم ترخص منهم حميد وسار لغرفته محد انتبه عليه .. فوق في الصالة كانت حصة تقرا قصيد حميد يالي كان كاتبنها في واحد من المجلات حميد كان يركب الدري حصة ما حست بالي كان يركب الدري وهي تقرا منهمكة في القصيد :
اكبر ويكبر حبك اليوم وش عاد <؛<؛<؛<؛<؛ السنين اللي مضت من سنيني
علمني اسعد واجعل الحب يزداد <؛<؛<؛<؛<؛ واشعل لهيب الشوق بينك وبيني
شوقي عليك دايم الدوم وقاد <؛<؛<؛<؛<؛ مكتوب لي بعدك يقيد يديني
الفكر غصب ألاقيه ينقاد <؛<؛<؛<؛<؛ والقي قصيدي يشتكي من سنيني
آه يا عذاب وقسوة الوقت وبعاد <؛<؛<؛<؛<؛ حرام تبقي صرخة الروح فيني
كانت مندمجة فيها هذه القصيد لهنيه بس هيه ما كملتها لأنها حست في حد واقف يطالعها ويم ألتفتت له شافته حميد في يديه مخدته ويطالعها ويهه خالي من العبارات شكله غير شكله حميد يالي تعرف قبل لا يسافر فرق بين يوم كان ياي من السفر والحين .. في هذه الحظه حميد كان يدقق في ملامح حصة الطفوليه يالي أعجب فيها من يوم ما كان مراهق ويم انتبهت عليه ..
حميد بابتسامه : شو قاعدة تقرين ..
حصة وهي مستحية منه لأنها الوحيدة ما سلمت عليه يوم وصل من السفر ما سلمت عليه ويم طلع من المستشفى و لا تحمد له بسلامه " برتباك ": ولا شي قاعدة أطالع المجلة ..
حميد: شخبارج حصة ..
حصة: الحمد الله بخير وعافية .. الحمد الله على السلامة ولو إنها يايه متأخرة ..
حميد في قلبه " واصلة فديتج " : لا عادي المهم قلتيها " يبا يقول لها كم هو مشتاق لها حيل وكان يحلم بها يوم كان في الغيبوبة "
حصة: تبي شي يا حميد .
حميد و لأول مرة : هيه أبي أكلمج شوي ..
حصة وهي عارفه شو بقول : أنا بسير تحت " وجان تمشي عنه "
حميد وهو ميود في يد حصة : حصة دقيقه بس دخيلج .. " حصة تطالع في ويهه حميد تفاجأت فيه كان كله ألم ما تبا تسمعه بس شكله عنده كلام أكثر من الكلام يالي قالته لها شمه "
حميد: ها شو قلتي يا حصة دقيقه بس ..
حصة: آمر بغيت شي ..
حميد وهو يأشر لها على الغنفه: ممكن نقعد ..
حصة منزله راسها حاسة إنها بتنحرج من الكلام يالي بيقوله لها حميد ..
حميد: ما تبين تقعدين خلاص على راحتج .. حصة أنا تأكد إنه شمه قالت لج شي عني ذاك اليوم وأنا ياي أوضح هذه الشي وزين إني لقيتج ..
حصة تطالع حميد يات في بالها أفكار " شو يعني يبي يوضح هذه الشي يعني هو الحين ما يحبني من بعد ما استولى على كل تفكيري وصار كل حياتي حميد.. ليش يا حميد ليش " ..
حميد: حصة شمه ما جذبت عليج ولا بكلمه كل كلمه قالتها لج صح و أنا وايد مضايج من شمه ليش إنها قالت لج السالفة ما بيج تقولين إني إنسان ضعيف ما قدرت أقولج بس كل إنسان وله ظروفه ..
حصة: بس يا حميد خلاص ..
حميد: لا يا حصة يوم يا تني الشجاعة إني أقولج كل شي تين توقفيني أنا مب ساكت أنا لو تبيني أتكلم لين باجر ما يخلص يالي في قلبي من صوبج .. أدري إنج " وبألم " تحبين سالم أخويه بس والله لو تبين إنه أساعد في شي والله راح أساعدج وخليج تكونين أسعد إنسانه مع الإنسان يالي تحبينه ..
حصة انصدمت من الكلام يالي يقوله حميد كيف يفكر بهذه الطريقة ..
حصة: أول مرة أشوفك أناني يا حميد ..
حميد وهو فاتح عينه على الآخر: ليش يا حصة ..
حصة وعينها بدت تدمع: بعد هذه الحب يالي تكنه ليه تبي تضحي يا حميد ؟؟؟ ليش لهذه الدرجة وصل قلبك للأنانية ما توقعتك يا حميد جيه توقعتك إنسان طموح تحب وتكافح لشيء وتصل له أنا يا حميد ..
حميد وهو يقاطع حصة : حصة لا تقولين جيه إنتي تحطمين قلبي ..
حصة وهي تصيح بألم وترمس : إنتي يالي تحطم قلبي يا حميد من بعد ما حبيتك وصرت كل شي في حياتي من بعد " وتغطي ويهها بيدها وتصيح بصوت خفيف ما يسمعه إلا حميد" حميد واقف مكانه منصدم من كلام حصة " يعني حصة تحبني "
حميد والدموع في عينه : حصة إنتي تحبيني .. بس حصة ما قالت شي سارت عنه لغرفة شمه وقعدت تصيح بصوت عالي حميد يسمع الصوت ويتقطع قلبه من يسمع صوتها .. عند باب حوي البيت الشبيبة كلهم واقفين إلي بيروح بيتهم ولي بيروح السنتر يتمشى ويا ربعة ..
عبدالله: جول الله ينطبج تعالي ..
جول وهي تي و تتحرطم: ها أبود شو تبين ..
عبدالله وهو معصب: عبود في عينج عبدالله أنا عبدالله .. " جول ساكتة ما قالت ولا كلمه معصبه منه كفاية اليوم و عزيمة عندهم و الشغل وايد عندها كله فوق راسها "
عبدالله وهو يقرب منها: بلاج تطالعين جيه أقولج أسمي عبدالله ..
جول: أنا يعرف زين ..
عبدالله: زين أعرف إنج تعرفين عنلاتج .. سيري نادي سهيل قو ليله يرجع سيارته العرب بيظهرون ..
جول : زيــــن .. وسارت عنه جول ..
سالم: خييييبه شو مسوي لها .. جي ترد عليك أشو فها مستقويه ..
عبدالله: ما دري أخاف اليوم تقتلني ..
سيف: لا يكون تسويها الله يرحمك مقدما ..
خليفة: لا عاده هيه أكثر واحد تحبه في البيت عبدالله ما يصير تقتله هذه حبيب القلب ..
عبدالله وبدون نفس: جب انت و ياه جب ..
ناصر: سكتوووهووووم مساكين .. شتبون بريال قاعدين تتمصخرون عليه هاه ..
عبدالله يطالع ناصر: انت بعد وياهم يا ناصر ما هقيتها منك والله ..
ناصر ويبتسم: أنا عمري ما وقفت وياهم حبيبي .. دووووم وياك .
سالم: نصور ما عليك منه تراه يخق عليك ..
ناصر: أدري يخق يا الله عاده أنا عاطنك فيس زيادة ..
عبدالله يطالع صوب باب بيتهم : سهيل بعدك ارمس ما خلصت الرمسه .. سهيل ما قال شي شباب واقفين وهو الغلطان بس هذه الحركة ما بينساها حق عبود .. بعدها لهذه الحظه تصيح بس بدون صوت وحميد قاعد في الصالة يطالع باب الغرفة يدخل ولا ما يدخل بس ما تهون عليه تصيح بسببه .. نش من مكانه ومشى لباب الغرفة وبطل الباب وشافها يالسة تحت ومغطيه ويهها بأيدها وشعرها القصير على جتفها حميد حس بخوف يخاف إذا تقرب منها تصرخ في ويهه وإنه كل يالي سمعه كان حلم والحين بينش من الحلم تقرب حميد منها ويلس حذالها يمسح على شعرها .. حصة حست بحد يمسح على شعرها ويوم أطالعته شافته هو نفسه يالي تصيح على شانه و يالي تجرأ ونزل دمعتها ..
حميد والدموع في عينه : حصة أنا آسف على كل هذه ما تخيلت حبي لج بيب لج كل هذه الدموع يالي نزلت بسببي أحتقر نفسي يا حصة أحتقرها .. حصة هذه الكلام خلها تصحا من خبالها جيف تقول عن ولد عمها هذه الكلام وإنه أناني وهو يالي عانى بسببها كل هذه التغيرات و زعله من أبوه وعمة و الكل وقف ضده مع إنه أخوها يالي خطط لكل هذه وهي ساكتة و المشكلة إن حميد يعرف بكل السالفة بس ما قال لحد ما يبا يفرق بين أبو و ولده قلبه ما يشل على حد قلبه نظيف ..
حميد ودموعه تنزل بهدوء لا تحس فيها حصة: حصة ما بي شي منج غير إنج تسامحيني .. و انسحب من مكانه ما تخيل إنه بيتعذب أكثر ما هو متعذب .. سار لغرفته وقعد يفضي كل يالي فيه من حزن مثل قبل إذا ما في حد يسمعه يفتح الاب توب ويشكيلة همه .. ويمر الوقت ويدخل عليهم العصر الكل روح بيوتهم إلا مريم وحصة قعدو بيت عمهم بس حصة مول ما ظهرت من غرفة شمه وشمه قاعدة في المطبخ عسب غزيل بتي بيتهم ..
شمسه: شموه لا تقعدين تلعبين والله تراني ما بسوي لج شي
شمه في خاطرها : بتذلنا هذه : زين ما مسويه شي ..
شمسه: حصوه وين ..؟؟
مريم: في غرفة شمه ..
شمسه: سيري زقريها ياي ترقد هي شو.. بعد شوي بتي ربيعتهم ..
شمه: أنا بسير لــــها .. سارت شمه لغرفتها شافتها تقري قرآن وعيونها حمر ما تقدر تفتحها حتى ..
شمه: حصوه بلها عينج عيل ..
حصة: ها ما فيها شي ..
شمه: عليه أنا ... قومي زين خلنا نحدر لأنه غزيل بعد شوي بتي .. وعقب بعرف السالفة .. نزلت حصة ويا شمه ويلسو في الصالة ..
شمسه: شموه أنا خلصت " تطالع حصة " بلاها عينج حصوه ..
شمه: فيها رمد ..
حصة وبابتسامه : رمد في عينج ..
شمسه: لا صج بلاها عينج .. حصة تمت ساكتة ولا قالت شي شمه حست في بنت عمها فحبت هيه يالي توضح الأمر قبل لا اطلع شمسوه كل شي تدري في أختها ..
شمه: لا هيه ناشه من رقاد أصلن ما تشوفي عينها منفخات .. " تبا تكحلها عمتها الله يهداج شمه "
شمسه: هيه قصي عليه ياهل أنا عندج عيونها منفخات ..
شمه: يعني يا فطينه عرف إن نحن ما نبا نخبرج فلو سمحتي توكلي ومشكورة على السويت..
شمسه: زين يا شموه إذا سويت لج شي عيل المرة اليايه لو تموتين جدامي و تتسدحين والله ما سويت لج.
شمه: لا تحلفين والله بتسويلي وإلا أخبر سلطان عليج ..
شمسه: انت إيه يا السباله " وسارت لها عسب تضربها "
سلامي وهي يايه شاله ولدها: بلاكن انت وياها تضاربن .. وحصة إنتي ساكتة عنهن ..
سلامي ويهي تنتبه على سلامي: ها تعرفيهن عاده من يضاربن محد يقدر يهدهن .. في الحوي كان سالم توه ساير النادي .. ويبطل باب بيتهم ويشوف بنت واقفة ..
سالم: نعم أختيه بغيتي شي ..
غزيل يالي ما سمعته كانت تكلم ولد أخوها يالي كان يا يبنها : زين بدق حقك يوم بخلص .. وسار عنها ويوم لفت شافت سالم بابتسامه : السلام عليكم ورحمه الله وبركاته ..
سالم يرد لها بنفس الابتسامة : وعليكم السلام ورحمه الله وبركاته نعم بغيتي شي ..
غزيل: هيه شمه موجودة ..
سالم: من أقول لها ..
غزيل: ربيعتها ..
سالم: زين ربيعتها ما لها أسم شو !!!!؟؟؟؟ " فضيييييييييحة "
غزيل : بلا لها أسم بس انت لو تقول لها ربيعتها هيه بتعرف ..
سالم في خاطرة " قويه هذه " : إن شاء الله تفضلي ..
غزيل بذرابه : دام فضلك .. سالم مستغرب منها شو هذه الذرابه شو هذه الذوق الرفيع في كلامها وصوتها جنها تغني وعينها الناعسات .. سالم وهو رايح لصالة وعلى ويهه ابتسامه ومستغرب منها..
سالم: شموه ربيعتج على الباب ..
شمه: خليتها على الباب و ليش ما دخلتها ..
سالم وهو يطالع حصة : حصوه بلاها عينج .. حصة نزلت راسها ولا قالت ولا كلمه .. سالم مستغرب ما من العادة أول مرة حصة تسوي له طاف .. المهم سارت شمه وحصة وسلامي لربيعتهم و قعدو سوالف وضحك وعقب دخلت عليهم شمسه وفاطمة ومريم و قعدو وياهم .. الساعة 9 العشا حميد توه نازل من السيارة والحزن كله فوق راسه اليوم بطوله مب على بعضه حتى أبوه قال له إنه يروح البيت بس هو ما رضا يبا يشغل نفسه بشي بس عسب ما يفكر بحصة وبدموعها يالي نزلهن .. دخل البيت كان عبدالله يلاعب ولد أخوه سعيد ..
حميد: السلام عليكم ..
عبدالله: حبيبي " يلاعب ولد أخوه شالنه فوق وزايد حليله يضحك بصوت عالي " .. وعليكم السلام ..
حميد يطالع ولد أخوه بحنان: عبود عطني بشلة ...
عبدالله: سير لاه أنا ما صدقت على الله أشله تي أنت وتقولها بكل برود عطني بشلة ..
حميد: زين شوي والله وشوي ..
عبدالله: نوووه ويييه ..
حميد متغصص : سير ذاكر زين ما باجي شي على الامتحانات ..
عبدالله: ويعني بموت ..
حميد: عبود عطني الولد ..
عبدالله: شو بسوي يا حميد باشا ..
حميد: تراك فايج عبود والله ما ليه خلقك ..
وشوي يرن تلفون عبدالله : هلا موينع على الباب يا الله ياك .. أندوك يود الولد اشبع به ..
حميد شل ولد أخوه يالي كان فاتح عينه يطالع عمه يشبه أبوه وايد بخشمه وبحلجه .. بس العين سلامي ..
حميد يكلم ولد أخوه: يا ليتني صغير شراتك ما عنده همووووم " و يحطي شفايفه على خده ولد أخوه ومغمض عينه " يحس براحه يوم يشل ولد أخوه غير يحسسه بولود شعاع يديد في حياته يعطيه الطاقة بصوته بصياحه " حصة كانت عند سلامي و عسب تيب الحليب حق زايد وصلت الصالة شافت حميد قاعد يكلم زايد وسمعته يوم قال كلامه حست بشي غير إنها غلطت ولازم تتأسف "
حصة وهي تشل زايد: تعال حبيبي اشرب الحليب ..
حميد تفاجأ : حصة ..
حصة وبحنان : لبيه ..
حميد: .............. ما قال شي يخاف يقول شي ويندم عليه عقب ..
حصة: شو سويت في الشركة اليوم ..
حميد رافع حواجبه : هــــــــاه .. ولا شي تعرفين شغل بشغل ..
حصة: الله يعينكم صج تعب محمد أخويه ما يعرف النوم إلا إذا خلص شغله ..
حميد منزل راسه : الشغل تعب يا حصة .. " السكوت يعم المكان " حصة إنتي ..
حصة: أنسى كل يالي صار يا حميد وخلنا نبدي صفحه يديده شو رايك .. خل أحزانا ورا ظهرنا ونعيش حياتنا بسعادة ..
حميد وهو يلعب بأيد زايد: هزرج ننسى ..
حصة: إذا تبي تنسى صدقني بتنسى ..
حميد : أنا أبي أنسى .. حصة إنتي تحبيني مثل ما أحبج ..
حصة : حميد أنا ما بقولك إنك انت كل حياتي مثل ما تقول الحبيبة حق حبيبها بس انت استوليت على كل تفكيري يعني إذا غلطت باسم بقول اسمك إذا فكرت في شي انت تكون أول من أفكر فيه ..
حميد يطالع حصة بحب : يكفيني هذه يا حصة ..
حصة متفاجأة : لهذه الدرجة يا حميد
حميد: وأكثر فوق ما تتصوريــــــن يا حصة ..
حصة تبي تغير الموضوع ما تصورت يحبها لهذه الدرجة بحيث أنه كبر في عينها أكثر عن قبل: بس انت كله دايم تقهرني يوم أكلمك مالك نفس ..
حميد: إنتي ما سألتي نفسج ليش أعاملج جيه أو ليش أسلوبي معاج غير ..
حصة : بلا سألت نفسي ميه مرة بس ما تصورت إنه الجواب هذه يا حميد ..
حميد: ما أبي أبين لج مشاعري اتجاهج .. حصة لو تقدمت لج بتوافقيين عليه ..
حصة ومنزله راسها تلاعب زايد : انت ولد عمي وما بلقى أحسن عنك " حطت عينها في عينه " يا حميد
حميد : حصة " وبصوت خفيف " أحبــــــــــج .. حصة تم ساكتة مستحية منه منزله راسها كان قاعد حذاها وهي بتموت ما تعرف شو تسوي .. أما زايد كان يطالعهم ما عارف شو السالفة بس يالي يعرفه إنه محد عاطنه سالفة يطالعهم يجلب عينه يمين ويسار ..
حميد برقه : طالعي زايد يطالعنا ..
حصة: حليلة محد عاطنه سالفة .. وشي جان يمد شفايفه ويصغرن عيونه و يصيح ..
حميد: هاتي هذه حبيب عمه تعال حبيبي لا تصيح .. حصة مرتاحة كليا من يالي سوته وإنها ما بتحصل أحسن من حميد واحد يحبها ويقدرها ويقدر شعروها أحسن من إنها تحب إنسان ما يحبها ..
" في القهوة "
سلطان: متى إن شاء الله بتسافر ..
سهيل: بعد 3 شهور .. إن شاء الله ..
سلطان: زين والله .. عيل بتسفرني وياك ..
سهيل: هيه نعم بسفرك ويايه ما عندي حد يسافر يايه ..
سلطان: عمي وعموه شو بتقول لهم ؟؟؟؟..
سهيل: والله مادري محاتر أخاف يصير في أميه شي انت شفت حالتها يوم سافر حميد..
سلطان: الله يعينك الصراحة انت في موقف ما يحسد عليه .. زين وهند ..
سهيل وهو يطالع الشاي: هند خلها على الله يا سلطان ..
سلطان: ليش شسالفه؟؟؟؟؟ ..
سهيل: سلطان هند ما صرت أكلمها مرت علينها فتره يمكن شهرين ..
سلطان وهو يعدل من يلسته : ليش شلي صار يا سهيل ..
سهيل: ولا شي كل يالي في الموضوع إني خبرتها بكل السالفة عن مرضي وخيرتها بيني وبين حريتها وهي بنت ما تنلام يا ولد عمي فاختارت حريتها ..
سلطان : كيف كيف هند ما تحبك جيف تخلت عنك يا سهيل ..؟؟؟؟؟؟!!!!!
سهيل وهو يحطي كوب الشاي على الطاولة : بس يالي مستغرب منه إنها أدق حقي يا سلطان وأنا رديت عليها وقلت لها لا تتصل بس هي تعاود الاتصال ..
سلطان: ليش يا سهيل ..
سهيل: ذكرتني أنا يايبك عسب أقولك سالفة ..
سلطان: شو هي يا سهيل ..
سهيل: هزاع مال العين ..
سلطان: بلاه هزاع يا سهيل ؟؟
سهيل: ذياب ولد عمه ياي خاطب شموه ..
سلطان: شموه ذياب جيف عارفها ..
سهيل: ما دري الله
سلطان: انت خبرت عميه بسالفة ..
سهيل: لا والله قلت أخبرك وعقب بخبرهم بس ها لا تقول حق شموس أدريبك تشل الرمسه ..
سلطان وهو معصب: والله ما تستحي يا سهيل أفا أنا احينه أشل الرمسه لشمسه شو شايفني حرمه ..
سهيل وهو يضحك : بلاك يا أخي عصبت نسولف يا سلطان ..
سلطان: الحين هذه رمسه روح زين " وسار عنه لسيارة و لحقه سهيل " في السيارة ..
سهيل وعلى ويهه ابتسامة: السلام عليكم ..
سلطان: ............... ساكت ولا قال ولا كلمه ..
سهيل: ما بترمس يعني زعلان .. عاشوا إلي يزعلون .. سلطان ساكت ..
سهيل: زين بوديك بيتنا يمكن ترضى بشوف الحرمة ..
سلطان: بسرعة روح البيت بسرعة .. في البيت سعيد توه ياي من الدوام وكان وايد مستاتنس مطول على صوت المسجل و يرزف ونزل ودخل داخل البيت وهو يغني و يرزف .. وسار سيده جناحه ..
سيف وهو يغني و يسوي حركات حق سلامي: غرشوب رعبوب والخصر منهوب والشعري ميال .. " يمسك شعرها بأطراف أصابعه "
سلامي:آآآآآآآي بطل شعري الله يا خذ عدوك ..
سعيد وهو يقعد حذالها: شحالها أم زايد ..
سلامي: الحمد الله بخير وعافيه الحمد الله على السلامة يا سعيد ..
سعيد: الله يسلمني ..
سلامي: مشكووور ..
سعيد وهو يبوس خشمها: فديت خشمج أنا .. عيل وين ولدي والله مشتاق له حيـــــــــــــــــــــــ ــــل ..
سلامي أونها زعلانه: أكثر عني يعني ..
سعيد: فديت أم زايد والله انت الكل بالكل .. وينه و لديه ..
سلامي: عند حميد عمه ..
سعيد أونه معصب: عند حميد شقا تعطيه حقهم احينه وأنا متوله عليه أكثر من ما هو متوله عليه ..
سلامي: سير له الغرفة بتلاقيه هناك ..
سعيد: ولا بعد في الغرفة .. سار سعيد غرفة حميد أخوه .. حميد في الغرفة منسدح على الشبريه وفق بطنه زايد يلاعبه وياه شمه وفاطمة يالي قاعدة على لاب توب ..
فاطمة: حمود هذه القصيدة يوم كنت في بريطانيا ..
حميد يعتدل في القعدة و يحضن زايد : هيه يوم كنت في بريطانيا ما تشوفين الغربة والصورة خالد ما خذنها في الساحة إلي في بريطانيا .. سعيد وهو يدق الباب ..
سعيد: السلام عليكم .. زايد من شاف أبوه قعد يناقز و الابتسامة شاقه ويهه ..
حميد: وعليكم السلام .. شوفو السبال من مساع ياينه رقاد وكل شوي يفرك عينه ويثاوب ..
سعيد: معلوم طال عمرك أنا أبوه .. " ويشل ولده و يدلعه " تعال حبيبي فديتك أنا " ويبوسه يقطع خدوده من البوس " ..
شمه: والله ولدك حركات بعد ..
سعيد: ها أسمع حد يغلط على ولديه أحترمن عماركن عاده ..
عبود وهو داخل : منووووه بو زايد الحمد الله على السلامة ..
سعيد: الله يسلمك يا بو حميد تسلم هذه الناس مب هذولا مالت عليكم ..
حميد وهو يضحك: ليش انت عطيتنا فرصه ..
عبدالله: ليش ما ييت العزيمة ياي احينه ؟؟؟
سعيد: تعرف بعد الشغل ما يرحم يا عبدالله والعزيمة بنعوضها بغيرها " ويطالع ولده " يا أخي مشتاق حقه حيل بمووووت عليه ..
شمه: زين لا تقطع الولد من البوس ..
عبدالله: من مساع قاعد تحبب في منوه هذه الدب ؟؟؟..
سعيد: نعم أخ بو حميد قلت شي بخصوص ولديه هـــــــاه ؟؟
عبدالله: لا أفا عليك يا بو زايد ما قلنا شي .. وفي الصالة يالي تحت كان سهيل يراضي سلطان وسلطان يدلع على الأخ والأخ ما يعرف هذه الشي ..
سهيل: يا الله عاده سلطان عن الدلع ..
سلطان: بس وايد ذليتك أشفقت عليك ..
سهيل: والله ما تستحي يا سلطان بس يا لله لكن شمسه ما بتشوفها في عينك ..
سلطان: بكيفك هو ما شوفها حرمتي هذه سير زين .. وشل التلفون ودق حق شمسه وقال لها تي وإنه في البيت وهي ما كذبت خبر جان تي ..
شمسه : السلام عليكم ورحمه الله وبركاته ..
سلطان و سهيل: وعليكم السلام ورحمه الله وبركاته ..
سلطان وهو يأشر عسب تقعد حذا : تعالي هنيه قعدي حذال ريلج " يبا يقهر سهيل "
سهيل: شموسي أبي ماي لو سمحتي يعني .. شمسه سارت تيب حق أخوها ماي وسلطان عصب لا شور ولا مشاور جيه يطرشها ..
سلطان: هو بكيفك انت
سهيل: يوم بتسير بيتكم على كيفك سو .. سلطان منقهر شوي بيلعنه كف .. يات شمسه وعطت أخوها الماي وعقب سارت وقعدت حذا سلطان ..
سلطان مخفف صوته : شحالج حبيبتي ..
شمسه بطلتها الحلوة: الحمد الله .. بلاك
سلطان يحطي عينه في عينها: ولا شي بس اليوم متوله عليج زود ..
شمسه مستغربه: تولهت عليك العافية .. سهيل على صوب يضحك أول مرة يشوفهم جيه ..
سلطان: نعم يا أخ بلاك تضحك ..
سهيل: لا أفا عليك ما أضحك بس مبتسم ..
سلطان: تحسبت بعد .. لو سمحت ممكن تفارج عسب ناخذ راحتنا أكثر ..
سهيل حس بالغيرة : شوووه خل عنك على جبدك قاعد ..
سلطان: مبتسم زين شمسي حياتي .. بعض الناس مقهورين مواااايد بعد ..
سهيل: جب يالله جب ..
شمسه: بلاك انت وياه والله تقهرون .. انتو مب صغاريه عسب تقولو هذه الرمسه .. ..
سلطان: شوفي أخوج من يوم نحن في القهوة وهو يقهرني أهون عليج عاده .. " أونه مسكين "
سهيل: والله عيــــار جدامج هذه كله ..
شمسه : والله سخافة أنا بروح عنكم انت وياه تواجعو برووووحكم ..
سلطان: شمسه يا شمسه تعالي نحن نباج في سالفة شمسووووه .. " بس شمسه سارت عنهم فوق "
سالم وهو داخل عليهم : خير إن شاء الله " وجان يطالع سلطان " هذه انته في ناس تي هذه الحزه ..
سلطان : ليش أنا مب ولد عمكم قاعدين تطردوني والله مذهب ..
سالم: المذهب عندك يا بو مذهب ..
سلطان: والله لو لا حرمتي عندكم جان ما طبيت بيتكم عنلاتك انت وياه ..
سالم: اسمعوا انتو لا تقول لحد .. يا فيسك " وجان ينسدح على الغنفه وقعد يطالع السقف ويغني يا ويلي يا من زاد بالهم يبات ليله بحسرات بايت سهيل والليل غيم والعين تذرف بعبرات . حب الحبيب سمني سم يا سلطان "
سلطان: أندوك الحبيب يحب بعد ..
سهيل: خله خله يا سلطان محد يعرف شوفي القلوب ..
سالم وهو يطالع سهيل: هيييييييه والله يا سهيل تصدق حتى ما ركزت في الدوام عليه دوام اليوم بس ما رمت التفكير شاغلني يا سهيل شاغلني " يتكلم وهو مبتسم " ..
سهيل وهو يتقرب من أخوه: ها يا سالم ما حيدك جيه ضربك سهام الحب مثل ما يقولون ..
سالم: أي ضربني إلى خشعني خشـــــــــاع يا سهيل خشاع .. ذرابه ذوق في الكلام الله جنها تغمني يوم بتي ترمس ..
سلطان عايبنه الموضوع: له له له يا سالم ما حيدك مرة وحده خشاع ..
سالم: هيه يا سلطان هيه ..
سهيل مستعجب من حال أخوه : أول مرة أشوفك جيه ..
سالم وبجديه : انتو بتقعدون تطالعوني جيه خوزو عني بسير حق حميد يعدلي قصيد عليها أبرك ليه ..
الظهر وعلى الغدا كان أبو سهيل و أم سهيل وحميد وشمسه وفاطمة و عبدالله يتغدون ..
أبو سهيل : عيل وين شموه ..
فاطمة: بعدها ما يت من الكلية ..
أبو سهيل: أم سهيل ترا مريم بنت أخويه الريال ذيج المرة رد وخطبها مرة ثانية ...
عبدالله جنه حد صب عليه ماي بارد: وهذه بعده يفكر بالزواج قو لوله ينسى البنت ما تباه ..
أبو سهيل وهو مستغرب: شدراك إنها ما تباه ها و بعدين القرار لها مب لك ..
حميد : ليش ومنوه هذه الريال ؟؟ !! ..
شمسه : هذه ريال خاطبها قبل وعقب يوم سويت انت الحادث كنسلو عن السالفة والحين ردو مرة ثانية يخطبونها ..
حميد: زين شو فيها يعني مب زين الريال شو ..
عبدالله: لا والله زين و ولد حلال بس عيبه إنه متزوج وعنده عيال وأكبر عنها بكم سنه ..
حميد مستغرب : عنده عيال ما أعتقد مريم بتهدم حياه عايله بكبرها .. و بعدين كم عمرة هو الريال ..
أم سهيل: أكبر عنها بوايد حبيبي ..
حميد بدون أي مبالاة : خلاص الله محلل أربع فيا خذها إذا هيه تباه .. " وكمل أكله "
عبدالله وهو ما له نفس في الأكل : حميد والله ما عندك سالفة " ونش من مكانه "
أم سهيل: وين يا عبدالله ..
عبدالله: بسير أذاكر أحس ليه .. " وسار عنهم "
فاطمة: باجر الخميس بلاه هذه ..
شمسه وبصوت خفيف : الظاهر أخوج قلبه يا كله على بنت عمه ..
أم سهيل وتطالعهم بنص بعين و تهد عليهم : بس إنتي وياها من الهذربه الزايده .. :: في الكلية شمه تتصل في البيت بس محد يشيله ..
شمه: أفففففف والله مليت محد يشل التلفون ..
غزيل : بلاج شموه محد بييج ؟؟
شمه: لا محد من مساعه أدق حقهم بس محد يشيله وأتصل في الخبله الدريول بعد ما يشيله راقد على التلفون الله يا خذ عدوه ..
غزيل: تبيني أوصلج عادي ..
شمه: لحظه إذا سالم ما رد عليه بسير وياج ..
غزيل: و حصوه وين عيل ..
شمه وهي دق على سالم : روحت خلصت اليوم بسرعة .. " ويشل سالم التلفون " ألووه هلا سالم ..
سالم : هلا شمه بلاج بغيتي شي ..
شمه: أكيد بغيت شي يعني أنا يوم بتصل فيك هذه الحزه أعرف إني بغيتك تيني الكلية ..
سالم: تمام احينه ياينج " وجان يسمع صوت غزيل يوم تقول لشمه إنها إذا ما لقت حد بعد عشر دقايق بيوصل ولد أختها "
سالم : شموه منوه هذه البنت إلي تعرض عليج خدماتها ؟؟؟ ..
شمه: يوم بتي ذيج الساعة بخبرك منوه هذه البنت .. "و صكر عن شمه أخته وعقب عشر دقايق وصل"
شمه وهي تركب السيارة : السلام عليكم ...
سالم كان في عالم ثاني كان يطالع غزيل يوم تركب مع ولد أختها برقتها في مشيتها : شمه شسمها ربيعتج؟؟ ..
شمه: أي وحده فيهم ..
سالم: ذيج إلي يات بيتنا ذاك اليوم ؟؟ ..
شمه : ليش تسأل ؟؟
سالم: بتقولي ولا مب قايلة عنلاتج والله كريهة ..
شمه: هذه غزيل ..
سالم : غزيل الشمالي ..
شمه: تنكت طال عمرك ..
سالم: ربيعتج ما شاء الله عليها حلوه ..
شمه مب مصدقه : ليش ؟؟ تقول هذه الكلام البنت مخطوبه ..
سالم بحزن: إنتي تجذبين هي مب مخطوبه ..
شمه تبي تقهره : بلا مخطوبه و الملجه شهر ثمانية والعرس شهر واحد ..
سالم يتحرقص : زين ...... ليش ما تزوجها للحين ..
شمه وهي تبتسم: أقولك العرس شهر واحد و بعدين هو يترياها عسب تخلص دراسة عقب بياخذها ..
سالم وهو مب مصدق : شمه إنتي تقصين عليه تبين بس تحريني رايت ..
شمه وبجديه : سالم والله ما جذب عليك البنت مخطوبه من ولد عمها ..
سالم وماله نفس في شي : وأنا أقول معقولة بنت بهذه الحلا بعدها مب مخطوبه ..
شمه: سالم والله ما تخيلتك إنك لهذه الدرجة تباها ..
سالم وهو يطالع شمه : لا يا شمه أنا بس عايبني أسلوبها لتحطين شي في بالج صحيح إني فكرت فيها بس ما توصل الدرجة كزوجه يا شمه ..
شمه وهي مرتاحة : الحمد الله تحريت شي ثاني والله .. تبا الصراحة أنا ما بيك تاخذ غزيل ..
سالم: ليش مو هي من قرايب الوالدة ..
شمه: بلا بس أنا ما بيها أهي أبي وحده ثانيه من زمان ما سمعنا عنها شي ..
سالم وهو يبتسم: منوه هذه يالي في بالج يا شمه قو ليلي ..
شمه تطالع بنص عين: معقولة ما تعرفها يا سالم معقولة ..
سالم معقولتين وثلاث بعد ؟؟
شمه: وحمده وين سارت يا سالم ..
سالم أول مره يحس إنه فقدها: حمده ..
شمه: هيه " وتعيب عليه " حمده ..
سالم: الله ياخذ عدوج نزلي بشوف نزلي .. و دخلو داخل البيت وتغدو .. عقب المغرب دخل حميد وأبوه توهم يا يين من الشركة سارو المسيد وعقب يو البيت ..
أبو سهيل: ها يا حميد شو بسوي ..
حميد: ما عليك أنا بكلمه لك و بنتفاهم على السعر هو ما يبي بيته يخلص بسرعة ؟؟ بلول يدفع عقب بشوف منا كل الخير ..
أبو سهيل: لا يا حميد هذه من يوم ونحن صغار وهو ويانا أمه ربتنا من بعد عين يدتك الله يرحمها راعيه الله يخليك ..
حميد: مشكلتك انت وعمي قلوبكم طيبه أبويه هذه شغل وحلال خل عنك العاطفة على صوب ..
أبو سهيل وهو مقتنع: سوي يالي يعجب يا وليدي نحن راضين فيه بس قول لمحمد يعطيك الأوراق يالي في ها الصفقة وعنده الختم بعد ..
حميد: خلاص يا أبويه أنا بسوي إلي انت تباه ..
أبو سهيل: كفو يا حميد كفو يا ليت كل إخوانك مثلك ..
حميد: لا الحين عبود يا يينك بسوي إلي انت تباه بعد ..
أبو سهيل : الله يخليكم كلكم يا رب وأشوف عيالكم وعيال عيالكم ..
حميد: إن شاء الله .. إلا على طاري السالفة شو سوت مريم بنت عمي ..
أبو سهيل: لا البنت ما تباه .. وأنا أقول أحسن بعد هذه ريال عود وايد عليها ..
حميد وهو يفكر بـعبود أخوه : زين والله بعدين وراها دراسة وعمي ما بيرضا ..
أبو سهيل: وأنا أقول بعد بيني وبينك أبي أعطيها حق عبدالله ولدي ..
حميد وهو مبتسم: هيه والله بس يمكن عبدالله ما يباها ..
أبو سهيل: و ليش ما يباها هذه بنت عمه وما بيلقى أحسن منها و بعدين مريم بنت حلوه انتو ليش ما تفكرون ببنات عمك والله ما بتلقون أحسن عنهن ..
حمي وهو مستحي: الصراحة أبويه أنا أبي أخطب حصة بنت عمي ومثل ما قلت أنا ما بحصل أحسن من بنات عيلتي وخصوصا إني أعرفهم زين ما زين ..
أبو سهيل وهو مبتسم " أحسن خبر سمعه اليوم " : الله فرحت قلبي يا حميد الله يفرحك قلبك أنا من زمان
أبي حد منكم ياخذ وحده منهن ..
حميد وهو يبوس راس أبوه : الله لا يحرمني منك يا أبويه ..
أم سهيل وهي طالعة من غرفتها: وأنا ليش ما ليه رب ..
حميد وهو يقوم لأمه ويبوس راسه أمه : لا أفا عليج إنتي الكل بالكل في هذه البيت ولا شو رايك يا أبويه.
أبو سهيل: أكيد يا حميد .. و بعدين أمك تغر مني ليش حميد ولدي يحبني ..
أم سهيل: أسكت أنت .. ليش كنتو تضحكون ..
أبو سهيل: ولا شي يا أم سهيل بس كنا نرمس عن موضوع أنا وحميد ..
أم سهيل: زين شو ه الموضوع ولا أنا ما أدخل فيه ..
أبو سهيل: لا تدخلين فيه إنتي أم المعرس يا أم سهيل ..
أم سهيل وهي تطالع في حميد : حميد بزوج لا تقول يا بو سهيل يعلني ما خلا منكم يا رب .. حميد مبتسم أخيرا بيتحقق حلمه و بيخطب البنت يالي تمناها طول حياته .. وأم سهيل متشققة من الوناسه أخيرا واحد من عيالها بيزوج ولو إنها تتمني لو سهيل يالي قايل لها هذه الرمسه ..
سيف: ها مريوم تبينه ولا ما تبينه .. " يسولف وياها "
مريم وهو مضايجه: سواف الله يخليك باجر عندي امتحان وأنا ما ليه خلق ..
سيف: ميود تعال هنيه بشوف ..
مايد وهو يشوف كونان : سير عني لاه والله ما ييتك ..
سيف يعصب علية ويحمر عينه : تعال بسرعة أنا أخوك العود ..
محمد: يا سيف انت شو تبابه خله قاعد يشوف ..
سيف: والله محد مدلع الولد غيرك يا محمد ..
محمد وهو يبوس مايد: فديت قلبه في العيد بوده ويايه دبا ..
سيف: انت تخبلت شوه ..
مايد عيبته السالفة : بلا بسير وياكم بشوف السيايير عسب أتعلم جيف يشلون على تايرين ..
مريم: طاعو انتو ها اونه بشله على تايريين خلص مدرسة بلول والله ..
مايد: مالج خص إنتي سوالف رياييل ليش تدخلين ..
سيف رافع أيده : ما أقدر أقولج شي لأن الولد معاه حق هذه سوالف رياييل ..
مريم: والله محد مخرب الولد غيركم بس والله لا خبر سلطان عليكم ..
محمد: سيري خبري خفنا احينه من سلطان ..
سيف: لا يا محمد خلها تخبر سلطان أنا أخاف وايد منه دخيلك " يسولف "
مريم: ما عليه لكم يوم بخبرة سو يالي يعجبكم .. أنا بسير أحسن " وسارت غرفتها تكمل مذاكرة " ..
سيف: حمود انت من صجك بتوديه وياك دبا ..
محمد: ما فيها شي بوديه أول شي بقول لأميه بشوفها فتوافق ولا لاء ..
مايد وهو زعلان: بتوافق ودني وياك يا محمد ..
سيف: يوم بي العيد ذيج الساعة تكلم صبر انت بلول ..رد مايد يشوف التلفزيون والكلام يالي قاله سيف مول ما عيبه و يوم أطالع محمد حس بطمأنينة وأنه بوديه وياهم .. مرت الأيام بسرعة ويا العيد و اجتمعت العايلة في أول يوم في العيد والكل مستانس في الصالة في أول أيام العيد شباب كاشخين والبنيات أكشخ والكل يطالع يالي يحبه بنظرة ثانية ..
حميد وهو قاعد يطالع حصة بعينه الناعسة وكان كاشخ آخر كشخه بس على شان حصة ويبيها تشوفه في العيد وهو متعدل و متسفر.. بس حصة تتغلى على الحبيب ما عاطتنه فيس يتحرقص وهي بعد مشتاقة له بس هي تبيه يتنزرفز تبيه يرمس وشوي يات عينها بعينه بلغلط وهو هادي يطالعها بعصبيته الهادية وهي عارفه إنه معصب بس هو ما يبين .. شمه تطالع في حميد أخوها ..
شمه: بلاه حميد الله يهداه بس ..
حصة: أش فيه بعد ..
شمه: ما فيه شي .. وشوي جان أي حميد عندهم ..
حميد: السلام عليكم ورحمه الله وبركاته كل عام و انتو بخير بنيات ..
الكل: و انت بخير ..
حميد شحالج سمر عساج طيبه
سمر: الحمد الله يا ولد عميه بخير وعافيه ..
حميد: الله يعافيج " ويطالع حصة" حصة هاتي زايد أبوه يبيه ..
حصة وهي عاجبنها العطر يالي متعطر منه حميد مازر البقعة الكل يسأله من وين شارنه : ليش والله ما شبعت منه قوله بعدين بيبه له والله حميد دخيلك ..
حميد وهو يتقدم لها: بتيبينه ولا شوه ..
حصة زعلانه : هاك أخذه والله والواحد ما يقدر يستانس .. " وعطته زايد .. سعيد ما يبي الولد بس يبي يقهرها شوي مثل ما هي قهرته " سار حميد وهو يبوس زايد ولد أخوه وحصة تطالعه مستانسه شو معجبه بهذه الريال من بعد ما كانت ما تستحبه ..
شمه: والله حميد أخويه ما دري من وين يشتري هذه العطور ..
حصة: الله والله فن هذه العطر أول ما دخلت صالتكم شميت العطر والله جنان يا شمه ..
شمه: أفا عليج بقول حق حميد و يعطيه حقج ما يغلى عليج شي يا حصة ..
حصة: جب إنتي جب ..
سمر وهي ما لها نفس في شي " حامل " : إنتي وياها ما يعوركن صوتكن عنبوه ..
مريم وهي تستهبل: كيف يعور الصوت بعد ..
سمر: جب إنتي الثانية مب فايجه حقج ..
عند الشباب كان الجو رابش عندهم سالم و عبود يسوون سوالف لشواب و الشواب يضحكون ..
عبود: ها عميه شو قلتي عني تراني كاشخ اليوم متسفر و ما قلت شو رايك فيني أنفع اشتغل في الشركة..
أبو سلطان وهو مبتسم: هيه تنفع من بونك كاشخ ..
عبود: أدري إني كاشخ بس اليوم غير عاده " ويغمز حق عمه " ..
أبو سهيل: وابي عليك شو ها الحركات بعد تسويها حق عمك ..
عبود: لا أفا عليك أبو سلطان فاهمني زين صحيح عمي ..
أبو سلطان: والله ما دري عن شو ترمس بس فاهمك يا عبدالله فاهمك يا بو حميد ..
حمي وهو يلاعب زايد: زين يا سعيد ما قلتلي أي خريطة بغيت عسب البيت بنبدا بعد أسبوعين إن شاء الله و انت للحين ما قلت شي ساكت الظاهر عيبتك القعدة في البيت ..
سعيد: حميد والله غثيتني من البارح و انت قاعد تقولي هذه السالفة انت ما تشوف الدنيا كيف رابشه بسبه العيد بعدين ..
حميد: هيه بس انت مكلمني من شهر و انت ما خذ الأرض من شهر يعني لازم نحرك من احينه ..
سعيد: سالم خوز أخوك من هنيه .. حميد سير عند الوالد تراه يرمس عن الشغل ..
حميد: لا إله إلا الله ..
سعيد: محمد رسول الله ..
سلطان: ما بسك انت وياه حشرتونا ..
سعيد: سير اقعد هناك جان تبا ترمس ..
سلطان: والله ما من وراك فايده .. " وشوي جان يدخل سيف وياه محمد و مايد "
سعيد: شوف شوف حمود من يالي ياي محمد سير أرمس انت وياه عن الشغل تراه ينفعك ..
حميد: أكيد بسير " سار حميد لعيال عمه و وايهم وهم وايهو الرياييل و قعدو رمسه وسوالف لين أذن الظهر وعقب صلاه الظهر "
حميد وهو ياي جان يشوف حصة قاعدة عند الكراسي مبتسمة ومنزله راسها ..
حميد: السلام عليكم ورحمه الله وبركاته ..
حصة تفاجأت : وعليكم السلام ورحمه الله وبركاته .. تقبل الله ..
حميد: منا منكم إن شاء الله .. كل عام و إنتي بخير ..
حصة: يايه متأخرة ..
حميد: أحسن عن غيري على الأقل قلتها غيري ما قالها ..
حصة تضحك : شو يعني من سبق لبق ..
حميد: ممكن أقعد يا حصة ؟؟
حصة: أفا عليك البيت بيتكم ..
حميد وهو يقعد : مشكورة الغالية .. وأخبارج بعد و علومج ..
حصة: زينه ..
حميد: حصة أنا كلمت الوالد وإن شاء الله عقب العيد بيخطبج حقي من عميه .. حصة تمت تطالعة بخجل وابتسامه على ويهها ما تفارجها .. :
يعل أيامك سعــــــــيـــــــــــــد ه
يعل أيامك ســــــــــــــــــــــرو ر
كل عـــــيد الله يعــــــــــــيده
و انت في بهجــــــــــــة ونور
سلطان: يا سهيل انت مب صغير لازم تخبرهم ما تم على شي على السفرة ..
سهيل: أنا بخبرهم على الأيام اليايه قبل السفرة إن ساء الله ..
سالم: شو شو السالفة ما فهمت شي ..
سهيل: لازم تعرف يعني ..
سالم: بتسافر خذني وياك مرافق ..
سهيل: الله يخليك يا سالم اسكت ..
سالم: بلاه ولد عمك يا سلطان ..
سلطان: والله ما دري بلاه شكله بسير يغازل البنات يالي في الأمارات ما عيبنه ..
سالم: ما عنده سالفة هو صحيح بنات البلاد لسانهن طويل مثل طول شعرهن بس والله يعجبنك ..
سلطان: هيه والله يدشون الخاطر والله ما تندم انك خذتهن ..
سهيل: ليس الكل بل البعض لا تجمع يا سلطان ..
سالم: والله هذه وجهت نظر إذا عيبتك زين ما عيبتك هذه شي راجع حقك ..
سهيل: زين أنا احينه شو قلت سلطان يالي فتح السالفة أنا ما رمست عن بنات بلادي الله يحفظهن من كل شر يا رب ويستر عليهن ..
سلطان: زين غيرو السالفة لأنا نبي نتغدا قومو.. سارو الشبيبة للغدا وكان اليوم بنسبه لهم شي حلو اجتماع العايله ما في منه الكل يستانس عليه .. في ثالث أيام عيد الأضحى ناصر كان عازم الشبيبة على الغدا عندهم في الفجيرة ومنها بسيرو دبا و مايد قبل لا يسيرو كان فاتح مناحة إلى يسير وياهم بس أم سلطان منعته وخلته يسير بيت خاله يلعب وياهم .. وفي دبا كانت الناس ملتمه والكل يشوف شو يسوي الشباب يالي صابغ سيارته و إلي يخق عسب شو فوني يا ناس كيف أشفط وإلي يرفع على تايرين ..
عبدالله وهو قاعد على الموتر من فوق : سواف شوف شوف هذه ربيعك مال دبي عجيب موتره ..
سيف: يعدل فيه من شهر احينه جيف ما تبيه يخق ..
سالم وهو ما عايبنه الوضع : شو ها الناس والله يريتني ما ييت ..
عبدالله: حد ضربك على يدك و قالك تعال بروحك راز فيسك ..
سالم وهو يشل تلفونه لأنه يرن : جب انت جب ..
محمد: أنا بنزل بسير عندهم بشوف هناك شو يسوون ..
ناصر: تعال يا محمد لا تسير خلك هنيه أحسن ..
عبدالله: هيه والله صدقه هنيه ما ينشاف شي جان تجدمت شوي يا ناصر ..
ناصر: تبا تموت سير جدام .. المهم من كل هذه سار محمد عند الشباب جدام وشوي جان يسمعون سيارة انقلبت محمد خاف ورجع على ورا يشوف من بعيد أحسن قعد يطالع البحر ويطالع العوايل يالي فيه شكلهم مستانسين وايد وبدون سابق إنذار يات سيارة وشلت خمس من الشباب ومن بينهم محمد يالي كان واقف ما عرف شو السالفة يالي عرفه انه سيارة دعمته وهو منسدح على الأرض ويشوف الشباب يطالعون ويحاولون ينقذونهم مو عارف هذه الوجوه يالي قاعدة تحاول تنقذه .. هو فاتح عينه يطالع يغمضها بهدوء كل شوي يغمضها يفتحها بصعوبه راسه انفتح من شده الضربة ..
عبدالله: حمود وين عيل يا لله ورانا خط لين دبي ..
حميد: دق دق حقه شوفه وين .. ودق عبدالله لولد عمه بس ما يرد ..
حميد: ها شوه ..
عبدالله: ما يرد عنلات عدوه عيبه الموضوع الظاهر ..
وشوي جان يطوف واحد من الشباب يستغفر ربه ويقول : استغفر الله خمس أرواح الله يعين أهلهم والله.
عبدالله من سمع هذه الكلام حس بنغزه في صدرة يحس انه ولد عمه شي صاير حقه بس مو عارف شوه.
حميد: سالم حمود وين ..
سالم : ما دري وين والله
عبود: أنا بسير أدورة أحسن ليه .. " وسار ولحقه حميد وسالم وسيف يالي تبع عيال عمه ويوم وصلو شافوا الشباب قاعدين ينقذون الشباب يالي دعمتهم السيارة وراعي السيارة ما عارف شو يسوي راكبنه الذنب من فوقه لتحته .. عبدالله تجدم حس انه في واحد منهم يعرفه و يتجدم عبدالله في باله يحس بس هو يطمن نفسه إنه ما يكون محمد ويوم وصل لعن على عمرة إنه يا هذه المكان " ..
عبدالله: لالالالالالالالالالا " وهو يربع لمحمد " محمد قوم محمد ..
حميد حس بقشعريرة تسري بجسمه : عبود انت شو قاعد تقول تخبلت ..
سيف وهو يحظن أخوه : حمود حمود قوم حموووووود أميه شو بقول لها حمووود قوووم ميود شو بقول له حمووووود ..
سالم: محمد يا محمد قوم ..
محمد و بصعوبه الدم يصب من راسه يالي كله دم شكله مفتوح : حمــ .... حمي...يد ..
سيف وهو يصيح : حميد تعال بسرعة يبيك بسرعة حميييييييييييييد ..
حميد وبسرعة : هلا محمد محمد بلااااااااااك ..
محمد وبهدوء : حميـ.....د أنا آســـ ..... آآآآســف .غلـــ ......ط...ت عليـ ..... ك " ويتنفس بصعوبه "
حميد وهو أيود أيده : محمد أسكت أنا مسامحك والله مساحك يا ولد عمي الظفر ما يطلع من اللحم يا الغالي ..
محمد يطالع في عيال عمه و أخوه : ســـ ... لـــ ..مو على أمـــا يـــ....ـه و أبـــويــه.. وعلى خــو....أتي .." ويطالع سيف " سـ ســـــ ...واف ديـــر .. بــــا ...لك على مـــ مـــايد .. على ميـــ ...ود .. "وتنزل الدمعة من عين محمد يالي عارف إنه بروح من هذه الدنيا" ..
سيف منفعل : لا يا محمد لا انت لا تقول هذه الرمسه انت بدير بالك على ميود لا تقول جذيه ..
محمد: ســ ..الم ..
سالم وهو يقعد على ركبته : لبيه ..
محمد: رااا ... سي راسي يعـ ... ورني ودني ... المــ .. سست .. شفى ..
سالم من سمع هذه الكلمه قعد يدور على يالي دعمه و سار له وضربه والريال تم ساكت لأنه غلطان ما عارف شو يسوي بيهدم عوا يل بسبه هذه الحادث .. المهم شل سالم ولد عمه من بعد ما هدوه الشباب عن الريال و سارو المستشفى كان محمد راقد على حميد ولد عمه وحميد يصيح بصوت خفيف و الدموع تنزل على محمد يالي قاعد يشوف دموع حميد وهي تنزل عليه وجنها تغسل الخطايا يالي محمد سواهم.
وصلو المستشفى من بعد فترة من الزمن و دخلو محمد الطوارئ وظهر لهم الدكتور و قال لهم أن محمد توفي لأنه نزف وايد نهارو الشبيبة سيف ما عارف شو يسوي ظهر برا المستشفى كان سالم هناك واقف وهو يكلم شمه أخته وشوي جان يشوف سيف ياي يمشي و الدموع مغطيه ويهه ..
ناصر: ها يا سيف بشر ..
سيف و الدموع في عينه : ناصر حموووود ماااااااات يا ناصر ما ليه غييييرة شو بقول حق أميه وأبويه يا ناصر شو بقوووول لهم ..
ناصر وهو يحظن سيف: لا إله إلا الله إنا إلا الله وإنا إليه راجعون بس يا سيف بس قول الحمد الله ..
سيف مول ما يقدر يتنطق بكلمه الصياح شال صدره ..
سالم: بلاك سيف بلاك .. " ناصر نزل راسه سالم فهم السالفة وسار عند أخوانة يالي كانو داخل عبدالله كان ساكت ويصيح بصمت أما حميد فكان حزين وقلبه يتقطع على ولد عمه ويتخيل شكل حصة يوم بتعرف بالموضوع " وعقب ساعة الكل عرف بوفاة محمد أم سلطان كانت بتموت من الحزن وحصة تهديها وهي تصيح ما عارفة شو تسوي تهدي أمها ولا نفسها ولا أختها يالي قاعدة حذا لها .. وبعد مرور ثلاثة أيام بعد وفاة محمد سيف كان وايد تعبان وتوه طالع من الميلس الرياييل روحو وهو ساير غرفته عسب يرتاح ويوم وصل فوق جان يشوف غرفه محمد أخوه مفتوحة فكر يسير غرفة أخوه عسب يطلع كل يالي فيه من صياح ويوم دخل جان يشوف مايد قاعد على الشبريه ويهزز ريوله ومشغل البليستيشن
سيف مستغرب : مايد شو قاعد تسوي هنيه!!!!!!!!&# 33;!!! ..
مايد و الدموع في عينه : ماشي أتريا محمد قال ليه أشغل البليستيشن قبل لا يوصل بعدين بيفتن عليه .. ولين احينه ما وصل متى بيوصل ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟ ..
سيف تيمعت الدموع في عينه وسار لأخوه : بند التلفزيون يا مايد محمد مابي ..
مايد: هييييه انته تباه يفتن عليه ..
سيف سمع هذه الرمسه و حضن أخوه وقعد يصيح بهدوووووووء .. أما مايد فهو يعرف أنه أخوه محمد متوفى بس مب مقتنع ..
بعد مرووووووووور سنتيـــــــــــــــــــــ ـــــــن
سهيل: أمايه يا أمايه وينج يا أم سهيل ..
أم سهيل وهي تي صوبه : هلا هلا حبيبي سهيل الحمد الله على السلامة ..
سهيل: الله يسلم غاليج يا الغالية " ويبوس راسها "
أم سهيل: هلا حبيبتي عايشه شحالج
عايشه بنت عمت سهيل : الحمد الله بخير وعافيه عموه ..
سهيل: أبويه وينه عيل يا أميه ..
أم سهيل: قربو .. أبوك وين بعد في الشركة وياه عبدالله أخوك ..
سهيل: زين والله زين .. عيل سلامي وسعيد وينهم سرنا لهم في البيت بس ما شي جواب ..
أم سهيل: سلامي خذها سعيد بيت أهلها و وياهم زايد
سهيل : زين والله زين .. و فطوم وينها عايشه تبا تسلم عليها "عايشه كبر فاطمة"
أم سهلي: وفاطمة لحظه بناديها لك.. " وسارت أم سهيل تنادي بنتها "
سهيل: ها يا عايشه وبيتنا يبتج بتروحين بعد بيتكم ..
عايشه تدلع: لا زم تقهرني يعني ..
سهيل مبتسم: لا فديتج بس تعجبيني جيه ..
عايشه وتضربه على جتفه : فديتك أنا أحبك ..
سهيل: يا عمري والله .. " هذه سهيل تزوج من بنت عمته من 3 شهور وهو توه ياي من بوظبي من دوامه وهو مستانس وياها حيل طبعا خذاها من اختيار أمه وطبعا من عقب ما وصل من سفرته ونجحت عمليته قعد يفكر بهند وايد بس حس با لأهانه و فعرضت عليه أمه عايشه بنت عمته أخت خليفة وعايش معاها بساعده .. أما سالم فخطب حمده يالي كانت أول شي مب موافقة عليه عقب أقنعتها شمسه .. أما عبود الحين يدرس في الجامعة وإن شاء الله بيتخرج و بشتغل عند أبوه وهو قاعد يتعلم الشغل من عند حميد أخوه وخليفة ولد عمته عسب يوقف ويا أبوه وعمه في الشركة .. أما سيف بعده ما يفكر بالزواج لأنه صغير عليه على قولته وعايش حياته مثل أول بس مفتقد محمد أخوه " ..
سهيل : يا أميه بسرعة بنسير المستشفى احينه .. في المستشفى كان حميد عند حصة ما يفارجها خير شر
حميد: تعرفين عاده بسميها حصة ..
حصة وهو تمسح على شعر بنتها بحنان : شو حصة أنا حصة ..
حميد: لا حبيبي بنسميها حصة ..
حصة: لا دور اسم غير ..
حميد: خلاص أنا في بالي اسم واااايد يعجبني فقلت ما ليه غير بنتي حبيبتي أسميها عليه
حصة: شو هو يا حميد ..
حميد: مزنه وايد يعجبني الاسم و ناعم يليج على بنتي شو رايج ..
حصة : الله حلووو وايد حلووو " وتطالع بنتها " شو رايج بالاسم يا مزنه " وفترة بسيطة تمت حصة فيها ساكتة وبحزن "
حميد: بلاج حصة
حصة: كان ودي بولد عسب اسميه محمد ..
حميد حس بحزن زوجته: الحمد الله هذه سمر اختج سمت ولدها محمد على أخوج الله يرحمه من بعد وفاته على طول ... " يبي يغير السالفة " إلا شخبار أمج يا حصة من أسبوع ما سرت لها وأنا قلت بلقاها اليوم عندج ..
حصة: الله يرحمه .. أميه الحمد الله بخير وتوها روحت ميود ما طايع يذاجر فسارت له و مريوم ما تقدر عليه .. شموه أختك ما أحبها حتى الحمد الله على السلامة ما قالت عنلاتها ... وشوي جان يدخل سلطان وشمسه .. وعقب ربع ساعة دخل سهيل وعايشه وفاطمة و أمه و قعدو يرمسون ..
في العين دار الزين وفي المرخانيه بذات كانت شمه توها ناشه من رقاد وكان مروان قاعد يلعب في الصالة ومكسر الدنيا ويوم شافها تم ساكت " ما يعرفها بعده زين " وشكله كان يضحك خالي من أي عبارة توضح بشو هو يحس ..
شمه وهي تناديه : مروان تعال حبيبي .. مروان وهو يربع ..
شمه: شو سويت حبيبي ليش كسرت الدنيا ..
مروان: ما أعرف ..
شمه وهي تبتسم : زين تعال اقعد حذالي ..
مروان: ليش ؟؟؟؟؟
شمه ما عارفه بشو تجاوبه : بعد ليش تعال انت بقولك شي .. وشوي جان يظهر ذياب من الغرفة كان متسبح والماي بعده على شعره .. مروان شاف أبوه ربع حقه ..
ذياب: هلا حبيبي " ويشله " ها شو سويت في المدرسة ..
مروان: ما سويت شي لعبت ويا ربعيه ..
ذياب: شاطر حبيبي لا تضربهم زين ..
مروان: أنا ما ضربتهم أنا لعبت معاهم باباتي ما تفهم ..
شمه ضحكت بصوت عالي ذياب استغرب منها أول مرة تضحك جيه ..
ذياب وهو يطالع شمه: شفت مرواني ضحكت ماماه عليه ..
مروان وهو فاتح عينه على الآخر : ماماتي ؟؟؟؟؟؟؟؟؟ هذه ماماتي " ويأشر عيلها "
ذياب: هيه حبيبي هذه أمك صح شمه ..
شمه: هي انا أمك ما بتي لماماتي ..
مروان يطالع شمه: أنا يوعان أبا كافي ..
شمه: إن شاء الله حبيبي نسير بعطيك كافي .. نشت شمه و يودت في أيد مروان هو مب متقبلنها بس مع الأيام راح يتقبلها سارت وعطته كافي وعقب سار يلعب برا البيت لأن عيال خالت توهم واصلين ..
ذياب يكلم شمه : شمه ..
شمه تطالعه وهي مستحية : لبيه ..
ذياب : أحـــــــبـــــــــــــــ ــج ومصيري ويـــــــــاج دووووووووم ..
شمه : شـــــــاك في هذه الشي يا ذياب ..
ذياب: شو شوه أجين فديتج والله أحبج يا شمه " ويبوس خشمها " شمه تمت ساكتة ولا قالت ولا كلمه بس ذياب يالي كان يرمس و يسولف وهي تسمعه ودقق في شكله يالي ما تقدر حتى ترفع راسها له يوم يكونون بروحهم ..
لو نثر حروف وقتي في كلام
تاه كلي حاير في كلمتين
تنكتب بين الألم وسط الملام
تنكتب والحبر من ها لدمعتين
لا نطقها خافقي حول غمام
يلمس أوجاعي ويدفن غيمتين
عايش بين الرضا وبين الخصام
كني اللي عايش في دنيتين
النــــــــــــــــــــــ ـــهايـــــــــــــــــــ ـــــــــــــــة</font>
رد مع اقتباس
مواقع النشر (المفضلة)