<font color='#728FCE'><strong><font face="comic sans ms">تكملة الجزء السادس
<font size=3><font color=black>أول ما وصل عبدالله ودش الفيلا .. حس انه نسى شي .. بس ما يعرف شو هو بالضبط .. وراح غرفته وهو يفكر ويحاول يتذكر..بس صوت التيلفون قطع عليه افكاره ورد عليه وهو يبتسم.. </font></font></font></strong>
<font face="comic sans ms"><font size=3><font color=black>عبدالله: هلا غناتي.. </font></font></font>
<font face="comic sans ms"><font size=3><font color=black>ليلى: هلا عمي.. أقول.. مب جنك نسيت شي؟؟</font></font></font>
<font face="comic sans ms"><font size=3><font color=black>ضحك عبدالله وهو يتذكر اللي نساه وقال: نجمة وتاميني.. نسيت اييبهن ويايه.. وانا اقول يا ربي شو اللي نسيته؟ الحين لازم ارد اخذهن..</font></font></font>
<font face="comic sans ms"><font size=3><font color=black>ليلى: لا لا لا .. لا ترد ولا شي.. نحن باجر بني كلنا وبنظف البيت بروحنا.. </font></font></font>
<font face="comic sans ms"><font size=3><font color=black>عبدالله: لا يا ليلى انا مب يايبنكم هني تشتغلون .. أنا اباكم تستانسون وبعدين تراني عزمت عرب من دبي ع الغدا باجر واباهم يشوفون البيت نظيف يوم بيوصلون..</font></font></font>
<font face="comic sans ms"><font size=3><font color=black>ليلى: عمي ما خبرتنا انك بتعزمهم.. منو هاذيلا؟</font></font></font>
<font face="comic sans ms"><font size=3><font color=black>عبدالله: علي بن يمعه .. ريال اعرفه .. بيي هو واهله.. </font></font></font>
<font face="comic sans ms"><font size=3><font color=black>ليلى: أها.. مممممم انزين عيل بطرش البشاكير ويا الدريول..</font></font></font>
<font face="comic sans ms"><font size=3><font color=black>عبدالله: لا لا .. انا بروحي بيي اخذهن.. انتي تعرفين البشاكير ومصايبهن ما فيه اهد بهن ويا الدريول بروحهن.. </font></font></font>
<font face="comic sans ms"><font size=3><font color=black>ليلى: عمي والله حرام اتعب عمرك وترد من ليوا ..</font></font></font>
<font face="comic sans ms"><font size=3><font color=black>عبدالله: ما عليج انتي.. ساعة زمان وبكون عندكم.. </font></font></font>
<font face="comic sans ms"><font size=3><font color=black>ليلى: خلاص.. </font></font></font>
<font face="comic sans ms"><font size=3><font color=black>عبدالله: مع السلامة.. </font></font></font>
<font face="comic sans ms"><font size=3><font color=black>ليلى: في أمان الله. . </font></font></font>
<font face="comic sans ms"><font size=3><font color=black>بند عبدالله التيلفون وطلع من البيت وركب موتره.. ما كان عنده وقت يتمشى في العزبة مع انه هالشي في خاطره.. وعلى طول رد العين عشان اييب البشاكير.. بس قبل لا يوصل العين دق له سهيل المحامي .. وقال له يمر عليه في المقهى لأنه متوله عليه وما شافه من يوم راح دبي.. وقرر عبدالله يروح المقهى قبل وعقب يمر على بيت أخوه.. </font></font></font>
<font face="comic sans ms"><font size=3><font color=black>* * * </font></font></font>
<font face="comic sans ms"><font size=3><font color=black>ياسمين كانت في غرفتها ومطلعة كل ثيابها من الكبت.. ما تعرف شو تلبس باجر.. كل ما اختارت شي.. ترد وتغير رايها.. وفي هاللحظة دخل ابوها وابتسم يوم شافها معتفسة ويا الثياب.. وما حب يزعجها وطلع عنها.. بس أول ما لف بيسير صوب غرفته نطت له مرته مريم جدامه وشهق علي بخوف..</font></font></font>
<font face="comic sans ms"><font size=3><font color=black>علي: عوذ بالله.. انتي من وين طلعتي؟</font></font></font>
<font face="comic sans ms"><font size=3><font color=black>اطالعته مريم ببرود وقالت : انا هب سايرة العين باجر.. سير انته وبنتك.. </font></font></font>
<font face="comic sans ms"><font size=3><font color=black>علي: أفاااا.. أسير من دونج؟ </font></font></font>
<font face="comic sans ms"><font size=3><font color=black>مريم: هى سير من دوني.. ترا انته محد يهمك الا ياسمين.. تسدك هي ش تبا فيه انا..؟</font></font></font>
<font face="comic sans ms"><font size=3><font color=black>علي: هههههه الحين هذا كله عشاني ما رديت ياسمين في اللي طلبته؟؟</font></font></font>
<font face="comic sans ms"><font size=3><font color=black>مريم: تذكر قبل يوم اقول لك بنسير صوب العين .. ما كنت تطيع وتقول لي مالنا حاية نسير هناك.. </font></font></font>
<font face="comic sans ms"><font size=3><font color=black>علي: هى هذاك قبل بس الحين شغلي كله ومستقبلج ومستقبل عيالج متعلق بهالزيارة ..</font></font></font>
<font face="comic sans ms"><font size=3><font color=black>اطالعته مريم بحيرة .. وابتسم علي وخذها من ايدها وراح وياها غرفتهم.. ويوم صك الباب وراه.. </font></font></font>
<font face="comic sans ms"><font size=3><font color=black>علي: اسمعي.. بنتج طلعت اذكى عني وعنج.. </font></font></font>
<font face="comic sans ms"><font size=3><font color=black>مريم: تكلم عن عمرك ما احيدها اذكى عني.. </font></font></font>
<font face="comic sans ms"><font size=3><font color=black>علي: يا ربيييييييييه !!!.. بتسمعين ولا؟</font></font></font>
<font face="comic sans ms"><font size=3><font color=black>مريم (من دون نفس): اسمعك .. ارمس.. </font></font></font>
<font face="comic sans ms"><font size=3><font color=black>علي: تعرفين عبدالله بن خليفة؟ اللي كنت عازمنه ع الغدا أمس؟</font></font></font>
<font face="comic sans ms"><font size=3><font color=black>مريم: هى وين بلحق انساه وهو امس في بيتنا.. </font></font></font>
<font face="comic sans ms"><font size=3><font color=black>علي: انزييييين.. عبدالله هذا تدرين كم ثروته؟</font></font></font>
<font face="comic sans ms"><font size=3><font color=black>مريم (بدون اهتمام): كم ؟</font></font></font>
<font face="comic sans ms"><font size=3><font color=black>علي: بالملايين!!!.. </font></font></font>
<font face="comic sans ms"><font size=3><font color=black>بطلت مريم عيونها وفجأة صارت كل كلمة تطلع من حلج ريلها بمنتهى الاهمية بالنسبة لها.. وعلي لاحظ هالشي وابتسم .. </font></font></font>
<font face="comic sans ms"><font size=3><font color=black>علي: أول شي عنده عزبة في ليوا .. وعنده أكبر شركة مقاولات وعقارات في الدولة كلها.. وهو اللي تعاقدت وياه عشان يبني لي الفندق اليديد.. </font></font></font>
<font face="comic sans ms"><font size=3><font color=black>مريم: انزين؟ وشو يخصنا نحن ببيزاته؟؟ ناوي يوزعهن علينا ولا شو؟</font></font></font>
<font face="comic sans ms"><font size=3><font color=black>علي: لا يا غناتي.. بس عبدالله... للحين.. ما عرس.. </font></font></font>
<font face="comic sans ms"><font size=3><font color=black>فكرت مريم بكلامه وابتسم هو ابتسامة عريضة يوم حس انها فهمت اللي يبا يوصل له.. </font></font></font>
<font face="comic sans ms"><font size=3><font color=black>مريم: يعني ما عنده عيال ولا حرمة تورثه.. وكل هالثروة وين بتروح؟</font></font></font>
<font face="comic sans ms"><font size=3><font color=black>علي: هني.. ايي دورج ودوري .. وأهم شي.. دور ياسمين.. </font></font></font>
<font face="comic sans ms"><font size=3><font color=black>مريم: شو؟ ياسمين شو يخصها؟</font></font></font>
<font face="comic sans ms"><font size=3><font color=black>علي: ياسمين متعلقة في عبدالله وايد.. </font></font></font>
<font face="comic sans ms"><font size=3><font color=black>وقفت مريم واطالعت ريلها بنظرة حادة: شو؟؟؟ متعلقة فيه؟؟ وين شافته هي عشان تتعلق به؟؟ </font></font></font>
<font face="comic sans ms"><font size=3><font color=black>تأفف علي وير مرته من ايدها ويلسها غصب..</font></font></font>
<font face="comic sans ms"><font size=3><font color=black>علي: اسمعيني.. شافته قبل امس يوم كان ياي بيتنا العصر.. </font></font></font>
<font face="comic sans ms"><font size=3><font color=black>مريم: لا والله؟؟ وانت عادي عندك؟؟ تقولها بكل برود.. والله لأكسر راسها جليلة الحيا هاذي..</font></font></font>
<font face="comic sans ms"><font size=3><font color=black>وقفت مريم وطلعت من الغرفة وعلي وراها يحاول يهديها.. بس هي كانت معصبة وتدور أي شي على ياسمين عشان تطلع حرتها فيها.. </font></font></font>
<font face="comic sans ms"><font size=3><font color=black>كانت تمشي في الممر بسرعة وعلي يمشي وراها وايرها من ايدها بس من دون فايدة.. </font></font></font>
<font face="comic sans ms"><font size=3><font color=black>مريم: أنا اصلا كنت شاكة فيها من البداية واقول لك بنتك مب هينة... بس انته اللي مب راضي تقتنع.. </font></font></font>
<font face="comic sans ms"><font size=3><font color=black>علي: تعالي لا بارك الله فيج من حرمة... تعالي لا تخربين اللي ابا اسويه.. </font></font></font>
<font face="comic sans ms"><font size=3><font color=black>مريم: شو تبا تسوي؟؟؟ شو....؟؟؟ وليش تسكت عنها؟؟ باجر بتفتح لك مرقص في البيت وانته بتوقف تطالع؟؟ </font></font></font>
<font face="comic sans ms"><font size=3><font color=black>علي عصب من رمستها وقبل لا تبطل باب غرفة ياسمين يرها بقوة وقال لها: ان دشيتي الغرفة ولا قلتي لها شي والله بتندمين..</font></font></font>
<font face="comic sans ms"><font size=3><font color=black>اطالعته مريم بدهشة وهو اللي عمره ما عصب عليها وسكتت .. مب لأنها تحترمه او تبا رضاه.. بس صج انصدمت من اسلوبه وياها وما عرفت كيف تتعامل وياه وهو معصب جذه.. </font></font></font>
<font face="comic sans ms"><font size=3><font color=black>علي (بصوت واطي عشان لا تسمعه ياسمين): انا ابا عبدالله ياخذ ياسمين .. أول شي بيعيشها احسن عيشة وما بيبخل عليها بشي.. وبعدين ياسمين متعودة على الدلع وواحد في عمر عبدالله بيدلعها حتى اكثر عني.. </font></font></font>
<font face="comic sans ms"><font size=3><font color=black>مريم:............. </font></font></font>
<font face="comic sans ms"><font size=3><font color=black>علي: وطبعا عيال بنتج بيورثون حلاله كله عقب وفاته .. وين بتحصلين مثل هالريال لبنتج؟؟ خبريني؟</font></font></font>
<font face="comic sans ms"><font size=3><font color=black>ابتسمت مريم بمرارة وقالت: وشو دراك انه ياسمين مب يالسة تلعب؟؟ انته تعرفها بنتك تتخبل على كل شي وبسرعة تمل.. والاهم من هذا شو دراك انها ما ترمسه او انها متعرفه عليه..؟؟</font></font></font>
<font face="comic sans ms"><font size=3><font color=black>علي (بثقة): بنتي اعرفها زين .. واعرف انها مستحيل تنزل راسي الارض.. </font></font></font>
<font face="comic sans ms"><font size=3><font color=black>تنهدت مريم وقالت وهي تمشي سايرة عنه صوب الدري: سو اللي تباه بس يوم بتخرب عليك بنتك لا اتي تشتكي لي انا.. </font></font></font>
<font face="comic sans ms"><font size=3><font color=black>في هاللحظة طلعت ياسمين ويوم شافت ابوها واقف عند الباب ضحكت وقالت له: شو تسوي واقف هني ابويه ليش ما دخلت؟</font></font></font>
<font face="comic sans ms"><font size=3><font color=black>علي: هاذي امج غثتني .. واقفة ساعة هني تتشكى لي.. </font></font></font>
<font face="comic sans ms"><font size=3><font color=black>ياسمين: قلت لك الف مرة عرس وخذ لك وحدة لبنانية تدلعك بس انته اللي ما رضيت.. </font></font></font>
<font face="comic sans ms"><font size=3><font color=black>علي (يبتسم لها بحنان): لا مهما كان .. أمج ما تهون عليه.. </font></font></font>
<font face="comic sans ms"><font size=3><font color=black>ياسمين: بس " انته " .. تهون عليها.. </font></font></font>
<font face="comic sans ms"><font size=3><font color=black>علي: لا تظلمينها.. </font></font></font>
<font face="comic sans ms"><font size=3><font color=black>ياسمين: مب مهم.. أبويه تعال اختار ويايه شو بلبس باجر والله احترت ما اعرف شو اختار.. </font></font></font>
<font face="comic sans ms"><font size=3><font color=black>وقبل لا يرد عليها علي.. دخلته غرفتها وفرت جدامه ثيابها كلها ووقف علي يطالعها وهي معتفسة ويا الثياب وابتسم وهو يتخيلها عروس ... ومب أي عروس.. هاذي ياسمين.. ومحد يستاهلها الا عبدالله.. وفجأة تكونت في عقله آلاف الصور .. صورة فيلتها الفخمة اللي بيبنيها لها عبدالله.. فيلا في جميرا وفيلا في العين.. وبيخليه ياخذ لها مزرعة في دبا.. ويعيشها احسن عيشة.. وفي هاللحظة ابتسمت له ياسمين ببراءة كأنها حست باللي يدور في باله وقالت له من خاطرها: والله والله يابويه انه محد يسواك في هالدنيا كلها.. </font></font></font>
<font face="comic sans ms"><font size=3><font color=black>ضحك علي وقام يطلع عنها يوم شافها ردت تنشغل بثيابها .. وهو يفكر.. معقولة عقب كل هالتخطيط.. يفاجئني عبدالله وما يخطبها؟؟ </font></font></font>
<font face="comic sans ms"><font size=3><font color=black>* * * </font></font></font>
<font face="comic sans ms"><font size=3><font color=black>يوم وصل عبدالله المقهى شاف سيارة مبارك موقفة هناك وتردد يدش ولا لاء.. لأنه عقب ما تلفت بين السيايير ما شاف سيارة سهيل.. وما فيه يجابل مبارك بروحه.. وهو اللي ما شافه من يوم الحادث .. أكيد لو شافه بترد له كل ذكريات اليوم المشئوم وفوق هذا مبارك ما بيقصر ولسانه ماشالله ما بيقصر بعد.. وأكيد بيخرب عليه مزاجه.. وعقب تفكير اتصل بسهيل .. </font></font></font>
<font face="comic sans ms"><font size=3><font color=black>عبدالله: سهيل وينك الله يهديك خليتني أوصل لك المقهى وانته مب موجود؟</font></font></font>
<font face="comic sans ms"><font size=3><font color=black>سهيل: اسمح لي والله الأهل أخروني في السوق .. ألحين بوديهم البيت وبرد لك.. انته ايلس ترياني شوي.. </font></font></font>
<font face="comic sans ms"><font size=3><font color=black>عبدالله: مابا ايلس بروحي داخل.. </font></font></font>
<font face="comic sans ms"><font size=3><font color=black>سهيل: هههههه .. شو هالمنكر اليوم بعد؟</font></font></font>
<font face="comic sans ms"><font size=3><font color=black>عبدالله: مب منكر .. بس مبارك هني.. </font></font></font>
<font face="comic sans ms"><font size=3><font color=black>سهيل: ومبارك شو بيسوي لك؟</font></font></font>
<font face="comic sans ms"><font size=3><font color=black>عبدالله: ما فيه على نغزاته اروحي متظايج..</font></font></font>
<font face="comic sans ms"><font size=3><font color=black>سهيل: مبارك تغير يا عبدالله مب هو مبارك الاولي .. لا تحاتي.. </font></font></font>
<font face="comic sans ms"><font size=3><font color=black>عبدالله: انزين ما ينفع نسير مقهى ثاني؟ </font></font></font>
<font face="comic sans ms"><font size=3><font color=black>سهيل: ليش تغير المقهى؟؟ عشان مبارك؟؟ والله ما يرزى.. والله ربع ساعة بالكثير وبكون عندك .. ما بتأخر.. </font></font></font>
<font face="comic sans ms"><font size=3><font color=black>بند عبدالله عنه وتنفس بعمق قبل لا ينزل من موتره ويدش المقهى.. وأول ما دش.. غصبن عنه كانت عيونه تفتش بين الطاولات وتدور ويه مبارك المألوف بالنسبة له.. وعقب ما تجول بنظراته في المكان.. لمحه يالس في الزاوية ويا ربعه والشيشة في ايده.. وحمد ربه انه ما كان منتبه له بس وعبدالله يمشي ساير صوب الطاولة الفاظية في الجهة الثانية وقفوا شلة شباب يسلمون عليه وسووا حشرة وانتبه مبارك انه عبدالله موجود.. وتم يطالعه باستغراب.. كانه مندهش من وجوده هني وفي هاللحظة بالذات.. شو الللي رده من دبي؟ المفروض حسب كلام سهيل انه بيتم هناك ليوم الجمعة.. </font></font></font>
<font face="comic sans ms"><font size=3><font color=black>عقب ما يلس عبدالله على طاولته يتريا سهيل.. تنهد وطلع موبايله بملل يطالع المسجات اللي فيه .. وعقب دقيقة حس بحد واقف على راسه ويوم رفع عيونه تفاجئ.. مبارك كان واقف ويبتسم.. ولو انها ابتسامة مصطنعة .. بس كانت ابتسامة وعبدالله عمره ما حصل له الشرف وتلقى ابتسامة من مبارك.. </font></font></font>
<font face="comic sans ms"><font size=3><font color=black>وقف عبدالله بذهول وسلم على مبارك اللي كان يسلم عليه بهدوء.. ويلس وياه على نفس الطاولة.. وهالشي صدم عبدالله أكثر ويلس وهو بعده يطالعه باستغراب.. </font></font></font>
<font face="comic sans ms"><font size=3><font color=black>مبارك: هههههه مستغرب مني صح؟</font></font></font>
<font face="comic sans ms"><font size=3><font color=black>ابتسم عبدالله: بصراحه هى.. </font></font></font>
<font face="comic sans ms"><font size=3><font color=black>مبارك: من زمان ما شفتك ومهما كان اللي بيننا نتم اخوان يا عبدالله ولا انته شو رايك..؟</font></font></font>
<font face="comic sans ms"><font size=3><font color=black>عبدالله: والله يا مبارك هذا ما كان كلامك قبل ولو انك تعتبرني اخوك جان سمعتني وعاملتني بشوية احترام من قبل.. </font></font></font>
<font face="comic sans ms"><font size=3><font color=black>ابتسم مبارك وسكت لأنه الجرسون يا ويايب وياه ماي وقهوة لعبدالله.. وطلب مبارك نسكافيه وراح الجرسون اييب الطلب.. </font></font></font>
<font face="comic sans ms"><font size=3><font color=black>مبارك: عيال اخوك ما خبروك اني ييت لك البيت ادورك يوم السبت؟</font></font></font>
<font face="comic sans ms"><font size=3><font color=black>عقد عبدالله حياته وهو يتذكر وقال: لاء.. محد خبرني.. خير يا مبارك؟</font></font></font>
<font face="comic sans ms"><font size=3><font color=black>مبارك: لا .. خير ان شالله.. كنت اباك في موضوع بس الحين ماله داعي خلاص.. </font></font></font>
<font face="comic sans ms"><font size=3><font color=black>عبدالله: شو هالموضوع؟</font></font></font>
<font face="comic sans ms"><font size=3><font color=black>مبارك (وهو يغير السالفة): انته تتريا سهيل.؟</font></font></font>
<font face="comic sans ms"><font size=3><font color=black>عبدالله: هى اترياه .. شو الموضوع اللي بغيتني فيه؟</font></font></font>
<font face="comic sans ms"><font size=3><font color=black>اطالعه مبارك بحدة وقال: انته تعرف الموضوع زين.. يا أخ عبدالله انته استغليت فترة ابتعادي عن الشركة وخذت مشروع علي بن يمعة من بين ايديه.. </font></font></font>
<font face="comic sans ms"><font size=3><font color=black>عبدالله كان متوقع انه مبارك بيفاتحه في هالموضوع وجوابه كان جاهز: انا ما خذت أي شي منك يا مبارك ومب بس انته اللي كان عندك عزا.. حتى انا فقدت اخويه ومرته في هالفترة.. وابتعدت عن الشركة اسابيع.. ويوم رديت.. علي بن يمعة دق لي انا واتفق ويايه انا.. </font></font></font>
<font face="comic sans ms"><font size=3><font color=black>حس مبارك بألم في قلبه وهو يتذكر الحادث.. ورغم انه هالالم بيّن في عيونه للحظة بس اختفى بسرعة وقال وهو يرد قناع البرود على ويهه: هالموضوع منتهي يا عبدالله بس حقي اكيد باخذه..</font></font></font>
<font face="comic sans ms"><font size=3><font color=black>عبدالله (يبتسم ): وكيف ناوي تاخذه..؟</font></font></font>
<font face="comic sans ms"><font size=3><font color=black>مبارك: هذا مب اخر مشروع ينطرح وان شالله ببطل عيوني عدل المرة الياية وبعرف كيف ارد لك الحركة..</font></font></font>
<font face="comic sans ms"><font size=3><font color=black>عبدالله: ههههههه .. انزين انا ما عندي مانع.. بس نصيحة وخذها من "أخوك العود" يا مبارك.. </font></font></font>
<font face="comic sans ms"><font size=3><font color=black>مبارك: شو؟</font></font></font>
<font face="comic sans ms"><font size=3><font color=black>عبدالله: يوم تبا العملا يكثرون عندك.. اهتم بعمالك وتابعهم.. انته تعرف انه عمالك يبدون شغلهم الساعة عشر الصبح ويخلصونه ثنتين الظهر؟؟ وتعرف انه المهندسين يوم يدوامون وعشرة لاء؟؟ كيف تبا مشاريعك تخلص في وقتها وهم يهملون في شغلهم جذي؟ ليش ما تسير لهم في موقع البناء واتابعهم هناك بنفسك؟؟</font></font></font>
<font face="comic sans ms"><font size=3><font color=black>انقهر مبارك من كلام عبدالله وهالمرة بين هالشي في عيونه وقال بنبرة حادة: ماشالله عليك يا عبدالله .. من متى وانته تراقبني؟؟ </font></font></font>
<font face="comic sans ms"><font size=3><font color=black>عبدالله: انا ما راقبتك بس..</font></font></font>
<font face="comic sans ms"><font size=3><font color=black>مبارك: هى انته ليش اصلا تنزل من مكانتك وتراقبني.. كافي الجواسيس اللي مشغلنهم في شركتي وكل ما رسيت على مشروع يخبرونك وتلهفه مني.. </font></font></font>
<font face="comic sans ms"><font size=3><font color=black>انصدم عبدالله من كلامه وقال : انا عمري ما تعاملت بهالاسلوب ولا افكر في يوم اني اتعامل به.. </font></font></font>
<font face="comic sans ms"><font size=3><font color=black>مبارك: هه.. يكون في علمك.. عمالي يبدون ويخلصون شغلهم بمعرفتي انا.. انا مب ظالم شراتك اكرف العمال من الساعة سبع الصبح لست المغرب.. مصلحتهم عندي فوق كل اعتبار.. </font></font></font>
<font face="comic sans ms"><font size=3><font color=black>اطالعه عبدالله بنظرة اشفاق.. كان يعرف انه يتحجج بأي شي عشان يخفي ظعفه ويعرف انه ما يبا يعترف بغلطته .. طول عمره وهو عنيد ومستحيل يسمع نصيحة عبدالله.. وعبدالله حس بعمره صج غبي.. يعني في المرة الاولى يوم نصحه كانت ردة فعله نفس الشي.. ليش رد يتدخل في شغل مبارك الحين؟؟ </font></font></font>
<font face="comic sans ms"><font size=3><font color=black>مبارك: ع العموم انا بس حبيت اسلم.. وتمنيت تكون تغيرت في داخلك شوي يا عبدالله بس الظاهر انك بتم جي على طول..</font></font></font>
<font face="comic sans ms"><font size=3><font color=black>عبدالله: قولها يا مبارك .. قول اني بتم حسود طول عمري.. عادي.. </font></font></font>
<font face="comic sans ms"><font size=3><font color=black>مبارك: انته اللي قلتها مب انا.. </font></font></font>
<font face="comic sans ms"><font size=3><font color=black>وقف مبارك وسلم على عبدالله وراح عنه .. وأول ما يلس مبارك على طاولته ويا ربعه.. دش سهيل المقهى وسلم ع الشباب ويلس حذال عبدالله اللي خبره باللي دار بينه وبين مبارك قبل شوي.. </font></font></font>
<font face="comic sans ms"><font size=3><font color=black>* * * </font></font></font>
<font face="comic sans ms"><font size=3><font color=black>في غرفة أمل وسارة، كانت ليلى يالسة تطلع ثيابهن اللي بيلبسنهن باجر وهن سايرات العزبة.. وطلعت لهن بنطلونات جينز وقمصان بيض.. بس أمل شهقت أول ما شافتهن وركضت صوب الكبت وقالت: لا لا لا .. مابا هذا..!!!</font></font></font>
<font face="comic sans ms"><font size=3><font color=black>ليلى: عيل شو تبين؟</font></font></font>
<font face="comic sans ms"><font size=3><font color=black>يلست أمل على ركبها وابتدت تفتش في الكبت وتطلع ثيابها وفي الاخير لقت تنورة قصيرة لونها ازرق فاتح وعلى طرفها ورود صغيرة وطلعت وياها قميصها الابيض اللي بدون اكمام وابتسمت وهي تعطيه حق ليلى.. </font></font></font>
<font face="comic sans ms"><font size=3><font color=black>ليلى: بتحترق كتوفج من الشمس اذا لبستي هذا..</font></font></font>
<font face="comic sans ms"><font size=3><font color=black>أمل: والله ما بسير في الشمس.. </font></font></font>
<font face="comic sans ms"><font size=3><font color=black>ليلى: اااخ منج ..انزين خلاص.. وسارة انتي شو بتلبسين؟</font></font></font>
<font face="comic sans ms"><font size=3><font color=black>سارة: نفس أمل.. </font></font></font>
<font face="comic sans ms"><font size=3><font color=black>ليلى: زين خلاص ياللا تحركن سيرن الحمام واغسلن اسنانكن.. ومابا سهر ارقدن من وقت باجر بنسير العزبة من الساعة 11 الصبح.. </font></font></font>
<font face="comic sans ms"><font size=3><font color=black>عقب ما غسلن اسنانهن واتأكدت ليلى انهن رقدن.. طلعت عنهن وسارت تحت وخذت خالد عن يدوتها وردت غرفتها فوق عشان ترقد.. خالد ما عذبها اليوم ورقد بسرعة وتمت ليلى مبطلة عيونها مب قادرة ترقد.. وتتحسس المصحف بإيدها في الظلام وتفكر بحميد.. متى اشترى لها اياه.؟؟ ومتى كان ناوي يعطيها هديته هاذي؟؟ وردت تسأل نفسها السؤال اللي تم يتردد في بالها طول الايام اللي طافت.. وبيتم في بالها على طول.. هل كانت هي اخر شخص طرى على باله قبل لا يموت؟؟ </font></font></font>
<font face="comic sans ms"><font size=3><font color=black>حست ليلى بكتلة من الحزن في قلبها ودفنت ويهها في المخدة عشان لا ينش خالد على صوت صياحها.. وصاحت بحرقة لين حست انه كل الالم اللي في قلبها راح وتبخر ويا دموعها.. وانجلبت صوب خالد وباسته على خده وهو راقد.. </font></font></font>
<font face="comic sans ms"><font size=3><font color=black>كانت تتمنى ما ترد تفكر بحميد.. تتمنى تفقد الذاكرة وتضيع كل ذكرياتها وياه.. حرام تتعذب جذي وهي تحس انه كل يوم يمر تنمسح ملامحه شوي شوي من مخيلتها.. ليش؟ ليش ما عندها حتى صورة تذكرها فيه؟؟ معقولة بتمر سنين وبيي اليوم اللي بتحاول فيه تتذكر ملامح هالانسان اللي يعني لها اكثر من حياتها .. وبتكتشف انها نسته؟؟ </font></font></font>
<font face="comic sans ms"><font size=3><font color=black>ترددت هالفكرة في خيالها وهي تحاول ترقد وفي النهاية رقدت .. وكالعادة تمنت تحلم به بس ما تحقق لها هالشي.. انحرمت منه حتى في الاحلام.. </font></font></font>
<font face="comic sans ms"><font size=3><font color=black>* * * </font></font></font>
<font face="comic sans ms"><font size=3><font color=black>الساعة سبع المغرب.. طلع مبارك من المقهى لأنه ابوه دق له يباه يوصله بيت يده.. ومبارك اصلا كان متظايج وماله نفس يقعد ويا الشباب ويسمع سوالفهم.. كل شي بالنسبة له صار من دون طعم حتى سوالف ربعه اللي كان يموت عليها الحين صارت تسبب له الملل.. وأول ما ركب موتره.. حس برهبة كبيرة يحس بها دوم وهو يشغل الموتر.. ويحس انه اللي صار يمر في خياله مثل الشريط السينمائي يعذبه ويعذبه ويعذبه بدون رحمة.. متى بتبرد ذكرياته ومتى بيقدر يتغلب على حزنه؟ صور مرته وعياله شالهن من كل مكان .. ما يبا يشوفهم ولا يبا يعيش ذكراهم.. ولا يعيش ذكرى الحادث وشعوره بالذنب على اللي صار في احمد ومرته وفي حميد.. </font></font></font>
<font face="comic sans ms"><font size=3><font color=black>محد يدري انه مبارك يشتعل في داخله ويحس بالذنب في كل ثانية تمر عليه.. محد يدري شكثر يتمنى انه عبدالله يزاعج عليه ويطلع حرته كلها فيه.. سكوت عبدالله عنه وتجاهله للي صار وتحمله له ولإهاناته يزيد من عذابه ويزيد من القهر اللي يحس به.. </font></font></font>
<font face="comic sans ms"><font size=3><font color=black>رن تيلفون مبارك وهو يشغل الموتر وتم ثواني يطالع الرقم وهو مستغرب.. ورد عليه عقب ما قال: توه كان في المقهى وما سوى لي سالفة شو يبا الحين؟</font></font></font>
<font face="comic sans ms"><font size=3><font color=black>مبارك: الو؟</font></font></font>
<font face="comic sans ms"><font size=3><font color=black>سهيل: هلا مبارك.. شحالك؟ </font></font></font>
<font face="comic sans ms"><font size=3><font color=black>مبارك: الحمدلله بخير.. انته شحالك؟</font></font></font>
<font face="comic sans ms"><font size=3><font color=black>سهيل: الحمدلله.. بخير .. </font></font></font>
<font face="comic sans ms"><font size=3><font color=black>سكت مبارك وهو بعده مستغرب.. ويوم لاحظ سهيل سكوته قال: مبارك انته مشغول باجر؟</font></font></font>
<font face="comic sans ms"><font size=3><font color=black>مبارك: ليش هالسؤال؟</font></font></font>
<font face="comic sans ms"><font size=3><font color=black>سهيل:ابا اكلمك في موضوع مهم.. وقلت لو ما كان عندك شغل.. بنتغدى ويا بعض وبنسولف.. </font></font></font>
<font face="comic sans ms"><font size=3><font color=black>مبارك: بفضي لك عمري لو انه الموضوع يستاهل .. بس اذا عادي تأجله.. ؟؟</font></font></font>
<font face="comic sans ms"><font size=3><font color=black>سهيل: أنا اشوف انه مب في صالحك يتأجل هالشي.. </font></font></font>
<font face="comic sans ms"><font size=3><font color=black>استغرب مبارك وقال: وليش ما ترمس الحين؟</font></font></font>
<font face="comic sans ms"><font size=3><font color=black>سهيل: مب وقته..</font></font></font>
<font face="comic sans ms"><font size=3><font color=black>مبارك: أها.. خلاص.. باجر نتلاقى .. بس وين؟</font></font></font>
<font face="comic sans ms"><font size=3><font color=black>سهيل: في الانتركونتيننتال.. الساعة 1 ونص.. </font></font></font>
<font face="comic sans ms"><font size=3><font color=black>مبارك: تمام.. </font></font></font>
<font face="comic sans ms"><font size=3><font color=black>سهيل: مع السلامة.. </font></font></font>
<font face="comic sans ms"><font size=3><font color=black>مبارك: حياك.. </font></font></font>
<font face="comic sans ms"><font size=3><font color=black>بند مبارك وهو يحس بنغزة في قلبه.. شو يبا سهيل منه؟؟ وشو هالموضوع اللي يبا يرمسه فيه؟؟ من متى كانت من بينهم مواضيع؟ شو اللي ناوي عليه يا عبدالله؟؟ هو بجى شي للحين ما خذته مني؟؟ </font></font></font>
<font face="comic sans ms"><font size=3><font color=black>حرك مبارك سيارته وروح البيت ويوم وصل ودش الصالة سلم على امه وتخبرها عن ابوه.. </font></font></font>
<font face="comic sans ms"><font size=3><font color=black>ام ظاعن: بطيت عليه فديتك خلاص سار ويا الدريول.. </font></font></font>
<font face="comic sans ms"><font size=3><font color=black>تظايج مبارك: انزين جان ترياني شوي.. </font></font></font>
<font face="comic sans ms"><font size=3><font color=black>ام ظاعن: تعرفه ابوك مول ما يادني يتريا.. انزين ايلس فديتك ليش واقف؟</font></font></font>
<font face="comic sans ms"><font size=3><font color=black>يلس مبارك وما قدر حتى يبتسم كمجاملة لأمه من الظيج اللي يحس به.. واللي زاده انه عيال اخوه ظاعن يو ويا امهم ودشوا الصالة في هاللحظة .. ويت مي بنت اخوه الصغيرة وركضت صوبه ومدت ايدها بتسلم عليه.. </font></font></font>
<font face="comic sans ms"><font size=3><font color=black>سلم عليها مبارك وهو يبتسم من خاطره لأنها دبدوبه واسنانها اللي جدام كلهن طايحات وشكلها يوم تبتسم وايد يضحك.. فشلها مبارك ويلسها في حظنه عقب ما سلم على فاخرة مرة ظاعن وبسمة بنته العودة.. </font></font></font>
<font face="comic sans ms"><font size=3><font color=black>فاخرة: مي من الصبح تسأل عنك وأذتني كل شوي تنشدني متى بيرد عمي مبارك.. </font></font></font>
<font face="comic sans ms"><font size=3><font color=black>حظنها مبارك بقوة وباسها على خدها وهو يقول: فديتها يا ربيه .. ميوه.. تولهتي عليه؟</font></font></font>
<font face="comic sans ms"><font size=3><font color=black>اطالعته مي بأرف وقالت وهي عافسة ويهها وحاطة ايدها على خشمها: انته غتلت اتنانك اليوم؟ </font></font></font>
<font face="comic sans ms"><font size=3><font color=black>انصدم مبارك منها وضحك من خاطره وقال: هى غسلتهن .. مرتين بعد.. ليش؟؟</font></font></font>
<font face="comic sans ms"><font size=3><font color=black>مي: ماماه ليحة ليحة.. </font></font></font>
<font face="comic sans ms"><font size=3><font color=black>ضحكوا كلهم عليها وقال مبارك: اسمحيلي بنت اخويه العزيزة هاذي ريحة الجيكارة .. ما دريت اني لازم اعقم حلجي قبل لا ابوسج.. </font></font></font>
<font face="comic sans ms"><font size=3><font color=black>أم ظاعن: شو تبا بهالسم تشفطه كل يوم؟؟</font></font></font>
<font face="comic sans ms"><font size=3><font color=black>مبارك: خليني امايه على الاقل احصل لي شي يريحني.. </font></font></font>
<font face="comic sans ms"><font size=3><font color=black>اطالعته فاخرة بحنان وحست بتعاطف وياه .. وايد يعيبها مبارك وتعرف انه الالم اللي يحس به يوم يشوف بناتها وايد كبير وتعرف انه يتذكر عياله بس مع هذا ما فكر في يوم انه يعامل مي وبسمة بجفاء او ببرود ومع انه مي تتلصق به وايد عمره ما حاول يوضح لهم انه متظايج منها مع انه لو وضح هالشي فاخرة وظاعن بيتفهمون مشاعره .. </font></font></font>
<font face="comic sans ms"><font size=3><font color=black>مي: ترت اللودة اليوم</font></font></font>
<font face="comic sans ms"><font size=3><font color=black>اطالع مبارك فاخرة اللي قالت وهي تضحك: ميوه عن الجذب متى سرتي الروضة؟؟ </font></font></font>
<font face="comic sans ms"><font size=3><font color=black>مى: والله ترت.. </font></font></font>
<font face="comic sans ms"><font size=3><font color=black>ابتسم مبارك لفاخرة وقال لمي: ومنو شفتي هناك ؟ الابلة؟</font></font></font>
<font face="comic sans ms"><font size=3><font color=black>اطالعته مي وهي مستانسة وقالت: هى.. ابلة متلية ليحتها خايتة.. </font></font></font>
<font face="comic sans ms"><font size=3><font color=black>مبارك: هههههه خلق الله كلهم ريحتهم خايسة عندج انتي.. </font></font></font>
<font face="comic sans ms"><font size=3><font color=black>يلست مي تخربط عليه وهو يحاول يركز على رمستها ويفهم اللي تقوله .. وأم ظاعن تطالعهم وهي مبتسمة وسرحانة في افكارها الخاصة.. تتمنى وتدعي في داخلها انه الله يزيل الهم والحزن من قلب مبارك ويعوضه عن عياله ومرته.. بس واحد عنيد مثل مبارك صعب حتى انها تفتح وياه هالموضوع.. فكيف بتقدر تقنعه في يوم انه يرد يعرس ويكون اسرته من اول ويديد.. ؟</font></font></font>
<font face="comic sans ms"><font size=3><font color=black>* * * </font></font></font>
<font face="comic sans ms"><font size=3><font color=black>يوم الخميس الصبح الساعة ثمان.. بطل محمد عيونه وابتسم بكسل وهو يعرف انه الحين بيرن تيلفونه.. كل يوم الساعة ثمان بالضبط تتصل به غناته وتقعده عشان يروح يداوم.. </font></font></font>
<font face="comic sans ms"><font size=3><font color=black>غمض محمد عيونه وعد من الواحد للثلاثة وعلى طول رن تيلفونه ورد عليه وهو يبتسم .. وحس بقلبه يدق بقوة وهو يسمع صوتها الناعم.. </font></font></font>
<font face="comic sans ms"><font size=3><font color=black>وفاء (بكسل): صباح الخير</font></font></font>
<font face="comic sans ms"><font size=3><font color=black>محمد: هلا حبيبتي.. صباح الورد والياسمين..</font></font></font>
<font face="comic sans ms"><font size=3><font color=black>وفاء: ياللا نش بسك رقاد..</font></font></font>
<font face="comic sans ms"><font size=3><font color=black>محمد: لا اليوم ماله داعي انش من وقت ما بسير الدوام..</font></font></font>
<font face="comic sans ms"><font size=3><font color=black>وفاء: ليش؟</font></font></font>
<font face="comic sans ms"><font size=3><font color=black>محمد: بنسير ليوا.. </font></font></font>
<font face="comic sans ms"><font size=3><font color=black>وفاء (بدلع): لالالالا لا تسييييير.. </font></font></font>
<font face="comic sans ms"><font size=3><font color=black>محمد: ههههه .. ليش؟</font></font></font>
<font face="comic sans ms"><font size=3><font color=black>وفاء: مدري.. يوم تطلع من العين أحس انك بعيد وايد عني.. </font></font></font>
<font face="comic sans ms"><font size=3><font color=black>محمد: فديت روحج والله محد يسواج.. </font></font></font>
<font face="comic sans ms"><font size=3><font color=black>وفاء: انزين لا تسير وياهم.. </font></font></font>
<font face="comic sans ms"><font size=3><font color=black>محمد: ما اقدر.. عمي ما بيطيع.. </font></font></font>
<font face="comic sans ms"><font size=3><font color=black>سكتت وفاء.. وردت قالت : خلاص عيل بدق لك عقب.. </font></font></font>
<font face="comic sans ms"><font size=3><font color=black>محمد: زعلتي؟</font></font></font>
<font face="comic sans ms"><font size=3><font color=black>وفاء: لاء.. بعدين برمسك .. اختيه نشت .. ياللا باي..</font></font></font>
<font face="comic sans ms"><font size=3><font color=black>محمد: باي..</font></font></font>
<font face="comic sans ms"><font size=3><font color=black>بند عنها محمد وابتسم وهو يرد يغمض عيونه.. وصورة وفاء كالعادة ما فارقت خياله.. </font></font></font>
<font face="comic sans ms"><font size=3><font color=black>نهاية الجزء السادس</font></font></font></font>
رد مع اقتباس
مواقع النشر (المفضلة)