<font color='#000000'><font size=3><font color=#3399ff><strong><font face=arial>الحلقه الثانيه من الجزء الاخير:
طبعا كانت اسما في خاطرها تسمي ولدها غيث مثل ما وصاها ريلها بطي الله يرحمه قبل يتوفى وهيه اصلا ما كانت تدري انها حامل بتوأم بس الله رزقها بثنينه بدل واحد ...وطبعا من عرفت انها يابت ولد وبنت قررت تسميهم مثل ما وصى ابوهم بس عمها حلف عليها يمين انها تسميه بطي على اسم ابوه لانه وده يسمع اسم بطي وما يزول من بيته او حياته...يعني ما يبا يفكر انه بطي خلاص سار من حياتهم...بس اسما كانت وايد زعلانه لانها كان ودها تسميه مثل ما وصى بطي...
بوبطي: يا بنتي انا سميته بطي في الشهاده ولا تلوميني الصراحه ما اقدر استحمل ان اسم بطي ما بينقال مره ثانيه بهالبيت...
اسما وهيه تدمع عيونها: خلاص يا عمي ما برد لك شور بس الشي الوحيد اللي اباه اني ازقره في البيت بسم غيث ويكون اسمه في الجواز بطي...اظني بجيه بنحقق وصية بطي ..ولاّ شو رايك ؟
بو بطي: شورج وهداية الله...
وبجيه انحلت المشكله اللي كانت وايد متعبه اسما بخصوص تسمية ولدها ووصية ريلها المرحوم...
اما بالنسبه لحميد فكان مرتاح ومستانس وايد انه خلاص بياخذ اللي في باله..واللي مفرحنه اكثر انه فبل ما يرمس امه هيه اللي نصحته باللي هوه كان يفكر فيها ويحبها..واخيرا بيتهنى وبيرتاح في حياته..وهني من زود الفرحه قرر يتصل بمريوم علشان يبشرها..وبالفعل اتصل الها بس مريوم ما ردت واتصل فيها كمن مره بعد ما ردت ...
يا ترى ليش مريوم ما ردت؟؟
في بيت بو سالم اللي هوه ابو مريوم...كانوا اهل حمد يايين يخطبون مريوم وكانت ييتهم فجائيه يعني لا اتصلوا وخبروا حد ولا حتى كانوا اهل مريوم مستعدين حتى ان مريوم كانت يالسه في الصاله وتجلب الجرايد وكانت لافه شعرها محنيتنه ولابسه كندوره جديمه وهيه كندورة نوم بعد علشان الحنا طبعا...وامها وابوها كانوا سايرين العزبه وماحد خوانها في البيت وخواتها كلعهن معرسات يعني كانت روحها في البيت وسمعت جرس البيت فاستغربت ونشت توايج من الدريشه وجافت سياره مرسدس عند باب البيت.. وتحول منها حرمه ورياييل ثنينه واحد شاب والثاني في منتصف العمر بس مب شيبه وايد وحرمه...وكان الريال الشاب يتلفت ورد ايهرن بهرن سيارته وكانت مريوم ميته من الزياغ ومتلخبطه لانها حالتها حاله بس ربعت ويابت شيله وحطتها على راسها وطلعت من باب الصاله وظهرت الهم ورحبت ابهم ...
بوحمد: السلام عليكم...
مريوم: وعليكم السلام والرحمه هلا بمن يانا..
بوحمد: هلا فيج والله...بنتي هذا بيت خليفه بوسالم؟؟
مريومه وهيه مستغربه: هيه نعم هذا هوه قربوا..قربوا..
بوحمد: جريب ..جرب منج الخير ..
جربت بالرياييل في الصاله الداخليه وجربت بالحرمه في الصاله مالت الحريم وعقب ما سلمت ع الحرمه... ودخلتها في الصاله مالت الحريم استاذنت منها وربعت تقول للبشكاره تودي دلال القهوه والشاي والفواله وسارت هيه تتصل لابوها وامها واخوانها ايونها علشان هيه كانت حالتها حاله ويا هالحنا اللي حاطتنه على راسها...وعقب ربعت تبدل كندورتها الجديمه بس ما قدرت تسوي شي بشعرها...قالت خلهم يولون والله انا ما قلتلهم يهضلون هاليوم عساهم ما يهضلون...
وما اتاخرت مريوم وبسرعه طلعت للحرمه...
مريوم: يا مرحبا الساع هلا والله بمن يانا..شحالج خالتيه؟
ام حمد: مرحبا بج الغاليه بخير ربي يسلمج..اشحالج انتي غناتي؟؟
مريوم: بخير
وساد سكوت شوي..لين ما قطعته ام حمد برمستها..
ام حمد: عيل وين هلج يا بنتي؟
مريوم: والله يا خالتيه كلهم سايرين ابويه وامايه سايرين العزبه والمزرعه...واخواني بعد عندهم اشغالهم وانا روحي في البيت..اسمحي لي عاد ما دريت ان حد بيينا اليوم وانا حالتيه مبهدله...
ام حمد تضحك: لا فديتج والله كان خاطرنا نتصل بس ولديه حمد صرعنا وما خلانا نتصل وييناكم فجأه... انتو المفروض تعذرونا ...
مريوم: يالله فديتج عاد احنا نفرح يوم حد ايينا مب كل يوم حد ايينا ...خالتيه انتو من وين؟؟
ام حمد: والله يا بنتي احنا من بوظبي....انتي شو اسمج؟؟؟
مريوم: والله يا خالتيه اسمي مريم...
ام حمد: حياج الله يا مريم...
وعقب اشوي يابت البشكاره دلال القهوه والشاي عند مريوم ...وقهويت الحرمه ويلست اتسولف وياها لين يت امها وابوها واخوانها وعقب سارت مريوم عنهم علشان تتسبح وتغسل هالحنا عن شعرها بس قبل تتسبح لقت 12 مس كول في موبايلها وكلهن من حميد...حتى انها فرحت واستغربت اول مره حميد يتصل الها اكثر عن الخمس مرات شو السالفه؟؟؟ بس قالت قبل بتسبح وعقب بدق له علشان اشوفه...بس مريوم طولت في سبوحها لين ما غسلت شعرها عن الحنا ويوم طلعت سارت صوب دريشتها لقت ان العرب توهم كانوا بيطلعون وكان الولد بيركب السياره ويا ابوه وامه وكان الولد هوه طبعا اللي ايسوف وشافت ان الرقم على السياره رقم بوظبي....كانت تبا تعرف شو السالفه وشو يايبنهم هاذيلا من بوظبي ؟؟؟ بس حست باحساس غريب كأنها شايفه هالولد من قبل بس وين؟ اتذكرت ان ملامحه هب غريبه عليها ...بس بعدين سمعت حد يدق على باب حجرتها وفجت الباب ولقت امها...
ام سالم: هاه مريوم شياج ربعتي عن العرب؟؟
مريوم: لا ربعت ولا شي...انتي بروحج شفتيني شو حالتيه افتضحت فيهم جربت ابهم وانا بكندوره جديمه ومحلطه من الحنا....يالله اسميج ماعندج مونه رابعه لهوشج...
ام سالم: واخيبتيه يالله بالستر وانتي تراج في البيت...حرمه ماشالله عليج..
مريوم: انزين انزين خلينا من هالسالفه...منهم هاييلا العرب؟؟
ام سالم تتضحك شوي: هاذيلا يايين يبونج انتي...
مريوم انصدمت : شووووووووه؟؟
ام سالم: هيه بعد شوه يايين حليلهم من بوظبي يبونج...يعني يا يين يخطبونج لولدهم..
مريوم: لا والله وقلن البنات في بوظبي حتى انهم يعدون لدبي؟؟؟
ام سالم: يالله بالستر منج...
مريوم: لا لا انا ما اباه ولا ابا اسير بوظبي...
ام سالم: ما يخصني فيج اتفاهمي ويا ابوج واخوانج...
وظهرت ام سالم عن مريوم ونشت مريوم وقفلت وراها ويلست اتصيح منقهره...وعقب ياها ابوها واخوانها وورمسوها عن الريال واسمه حمد وهم من عايله وايد زينه ويعني حطولها من الكلام المعسل ...بس مريوم رفضت جدام ابوها واخوانها بس ابوها قال فكري بعطيج مهله اسبوع ولا تردين الحين ونحن بعدنا ما وافقنا على الريال بنتخبر عنه واخوج يمدحهم يقول انهم ناس معروفين ومن تجار بوظبي بعدنا بنتشاور وبنرد عليهم وانا اباج اتشاورين واشتوفين جان لج وياه نصيب وانا يا بنتي الزم ما عليه راحتج وهذا نصيبج وما اروم اقطع رزقج والعرس سنة الحياه ومن الحين اقولج اني ما بغصبج على شي...
وعقب ظهروا عنها وعقب اشوي سمعت تلفونها يرن وكان مالها خاطر اتشله بس يوم شافت اسم حميد صاحت وعقب تردد ردت عليه...
حميد وهوه فرحان: الو يا اجمل حب عشته في دنياي
مريوم ميته من الصياح:..............
حميد: ادري انج زعلانه وايد عليه بس الحين بعوضج....والله وابشري يا بنت خليفه...
مريوم: بس حميد بس اسكت...
حميد مستغرب من مريوم: مريوم شو بلاج؟؟ صوتج كانج كنت تصيحين...!!
مريوم: اااااااااه من بشاكي من الملا همومي...يا ويل حالي..
حميد: شو بلاج؟؟؟
مريوم وهيه تصيح: ماشي ما فيه شي...
حميد: مريوم حرام عليج ادري اني وايد مقصر وياج بس لا تعامليني جيه ...انا كنت ياي بفرحج...
مريوم بلا نفس : اتفرحني بشو؟؟؟
حميد: مريوم غناة قلبي رمست ابويه وامايه ايون ايخطبونج....واخيرا خلاص بنكون لبعض...
مريوم من سمعت هالكلام طارت من الفرح لانه ابوها اكيد اذا يا حميد وخطبها هاليومين بيرد اللي من بوظبي وبيجرب بحميد واصلا مستحيل يرفض بوبطي وبيجرب بالغريب...بس بغت ترفع ضغط حميد: خلاص يا حميد ما بنكون لبعض...
حميد حس بماي بارد ينجب عليه: مريوم شو تقولين انتي؟؟
مريوم: اليوم يوني عرب وخطبوني من بوظبي...
حميد وهوه منصدم: جذب جذب والله انج تجذبين عليه...حلفي بالله ان عرب يوج وخطبوج...
مريوم وهيه فيها ضحكه: والله العظيم يا حميد ان عرب يوني يخطبوني...واسم الريال...
حميد قالطعها وهوه متضيج: جب هب اتقولين اسمه جدامي ايخسي الا هوه والله ما ياخذج لو شوه ما يسوي....
مريوم: حميد انته فرطت فيه وليش الحين ياييني وتبا تخطبني وعقب ما خطبوني بعد...
حميد: سمعي يا بنت خليفه هيه كلمه وحده الريال اللي ياج ان وافقتي عليه يا ويلج مني وما حد بياخذج غيري انا تفهمين ويالله الحين بنييكم انا وهلي...
وسار حميد وخبر العنود اول علشان تخبر ابوه ان مريوم يوها عرب يخطبونها وحميد كان متضيج وحشر ابوه وامه علشان يسيرون يخطبونها له وبالفعل ساروا ام بطي وبوبطي وبدلوا ثيابهم وساروا ويا بو سعيد علشان يخطبون لحميد مريوم وسار وياهم سعيد واخوانه ...
ابو سالم انصدم ماشالله اثنينه ايون في نفس اليوم ايخطبون بنته؟؟؟ شو الصدف الحلوه عاد منو بيجرب منهم...بشاور بنتي وبردلهم خبر وبعدين ابرك يوم ياها ولد بو بطي ...وتكون جريبه منه وما تسير بعيد وتتلعوز وتسير لين بوظبي...بو سالم كان حاط في باله انه بيجرب بو بطي وولده بس بعد قال بشاور البنت...
وشاور بو سالم مريوم ومريوم هالمره كانت مستحيه وقالت له بقبل باي واحد بس اللي من بوظبي ما برضا به لاني هاذيلاك العرب ما عرفهم اولا ولا اعرف اطباع ولدهم ولا بينا وبينهم معرفه..وبعدين يسكنون في بوظبي وبوظبي بعيده عنا.....وبجذيه فهم ابو سالم ان مريوم موافقه على حميد...
بس ابو سالم قبل ايوافق على حميد اتصل لبو حمد واعتذر منه وقاله ان البنت ما وافقت وتعذر له بطريقه تخليه ما يزعل ...واصلا هالشي قسمه ونصيب...
ومن الجهه الثانيه وبالتحديد في بوظبي. بو حمد انصدم واتضايق ان العرب ما وافقوا على ولده حشاشة يوفه وولده الوحيد شو ناقصنه تراه ما عليه قصيره.. وتم ايفكر كيف بيخبر ولده وهو يدري ان حمد بيزعل لانه حالف ما ياخذ غيرها .. اسميها انها اسلاط كيف حمد بيتحمل هالصدمه او بيتقبل هالامر... اتصل بو حمد في ولده وقاله اييه ضروري في البيت ..
طبعا حمد كان في المول واول ما دقله ابوه حس ان السالفه جايده واكيد بيخبره شي بيفرحه لانه قاله شي ضروري ومب عوايده الشيبه يتصل وايقولي الحين تي..
وصل حمد البيت ودخل وسلم على ابوه وامه.. وشاف ويوههم حزينه فحس انه في شي..
حمد: السلام عليكم شوابي
بوحمد +ام حمد: مرحبا الغالي وعليك السلام والرحمه
حمد: هاه الشيبه شو عندك داقلي وامفزعني من المول اكييد شي عندك .. بعدين تعالي عيوزي بلاج امويمه؟؟
ام حمد: فديتك بويه ما فيني الا الخير لا خليت منك..
حمد: امين ولا خليت منج يالغاليه.. بس بلاكم احس عندكم شي وتبون اتقولونه خبروني شي مستوي؟
بو حمد: الغالي بغيت اخبرك ان العرب ردوا علينا..
حمد: والله؟؟ بشر شو قالوا؟
بوحمد تم ساكت وكان متردد كيف بيقوله...
حمد: خير ابويه قول لا اتروعني
بوحمد: والله يا ولديه ما ادري كيف اقولك.. اتصل ابوها وقالي انه مالك نصيب في البنت وان ولد عمها ما طاع يرخصها..
حمد وهو مصدوم ودمعه على عينه: شوووووووووووووو؟؟ مستحيل حرام ابويه خاطريه فيها.. مستحيل حد غيري ياخذها دمت حي..
ويطلع حمد مسرع صوب سيارته وهو مصدوم وايصييح .. وكان ايفكر كيف هالناس يرفضونه وهم ما يعرفون اشكثر متعلق ببنتهم... اااااااااااااااه ليتهم يدرون شو سوو فيني؟ ليش يذبحون قلبي ويرفضوني وليش ولد عمها ما خطبها من زمان..... ليش يا دنيا اللي نحبه ونباه ما يكون من نصيبنا.. ليش تحرميني من اول انسانه تمنيتها وسرت عاني عشانها.. ااااااه يا دنيا ليتني مت قبل ما اسمع هالخبر..
كان حمد حزين وما يدري وين ايسيير وتيلفونه كل حين وايصيح ومن الضيجه شله وسكره وعقه في السياره من ورا.. وما درى بعمره الا واصل للكاسر.. وقف السياره ويلس متساند في السيت وهو يصيح وايفكر.. وبعدين نزل يتمشى والافكار كانت اتوديه وتيبه وغسل ويهه بماي البحر واتعوذ من ابليس.. وعقب ما حس بالراحه يلس على صخره عدال الشاطيء.. وتم يفكر انه مب هو الانسان اللي ينرفض باجر بياخذ اللي احسن منها بألف مره والله يعوضه فيها عوض خير....
وبعد ما تعدلت كل الاوضاع حددوا ملجة فطيم وسعيد وحميد ومريوم كلهن في نفس اليوم وعقب شهر ...وكان الكل مرتبش وفرحان الا العنود اللي كانت كاتمه مافيها من لواعج الحزن وتكابر مع انها تدري انه عبدالله ما بيرضخ الها...كانت حالتها يوم عن يوم تسوء بس تسوي من عمرها انها قوية بس هيه ما كانت قويه ابدا...
وفات الشهر بسرعه وقبل الملجه بيوم سارن البنات يتحنن مريوم وفطيم وشويخ والعنود ...سارن معا الدريول محي الدين...
محي الدين الدريول: هاه ماماه وين ايريد سير؟؟
فطيم وكانت مرتبشه: محي الدين اقولك سير صوب صالون فلورا...
محي الدين: زين ماماه...
مريوم: ليش ؟؟ انا حاجزه عند حمام الهنا بنسوي اول حمام مغربي وبعدين بنتحنا ...شو العنود شو رايج؟؟
العنود وبابتسامه مصطنعه: كيفكن...اللي تبنه زين...
فطيم: عيل رايج يالريم وهداية الله..(( وصدت صوب الدريول تكلمه)) محي الدين اقولك سير شارع الرقه قبل..
محي الدين: اوكي ارووووسه...
فطيم: وايه فقدت هالويه وانته منو عطاك الزاعي وقالك اني بعرس؟؟
محي الدين: ههههههههه((ويهز راسه)) هذا باباه سأيد خبر حق انا هوه قول سأيد وماما فتيم سوي شاديه...
مريوم: والخيييييييييبه خيبتك انته و...
فطيم: بس لا تكملين عوذ بالله منج...بتقصبين لي ريلي قبل ياخذني...
شويخ: يالله وين تبين انتي ريلي؟؟؟؟ بعده ما استوى ريلج اليوم بيملج وعقب 6 شهور عرسج...
العنود:ههههههه هيه والله...
فطيم وهيه تتنهد: اااااااااااااايه يا ليت الحول باجر والحايله ورى باجر...يا ليت اليوم عرسي...
شويخ والعنود ومريوم ميتات من الضحك عليها...
العنود: اهبي يالمستلغثه عنبوه حشا ثرج قطيعه...
شويخ: الله يعينك يا سعيد يا ولد عمي...بتطفر من فطيم...
مريوم: ههههههههه هيه والله ثرج جيه صدعه؟؟؟؟ زين انج بتفلين قبل ايي بيتكم...
فطيم: هههههههههه من قال حبيبتي بتلقيني كل يوم طابه بيتكم ..
العنود: لا لا بنقول لريلج يرصغج عنده...
فطيم: اقول محي الدين بالله عليك شغل اف ام بنسمع اغاني ابرك عن حشرة هالحبصيات...
محي الدين: زين ارووسه..
فطيم: وعوق لله في جبدك..
البنات يضحكن على فطيم...وبعد ربع ساعه وصلن صوب حمام الهنا للنسا في شارع الرقه...ودخلن في العماره وسون حمام مغربي العرايس وعقب ما خلصن سارن على طول صالون فلورا ووسون تنظيف بشره وغيرن من اشكالهن وايد وعقب وتحنن مريوم وفطيم تقريبا لين فوق كوعهن بشوي اما العنود وشويخ فتحنن حنا بسيط والعنود بس حنت ايديها على الاطراف وخذت معاصير حق اسما علشان ع الاقل تحني اصبوعها روايب..
وعقب ما خلصن ردن البيت وطبعا فطيم دومها ميته يوع فطلبت ايخطفون على كنتاكي اونها مشتهيه زنجر...وطبعا خطفوا واشترت العنود وكلن كلهن وحتى الدريول ما نسنه..وردن البيت الساعه 9 ونص وخطفن مريوم بيتها وبعدين سارن بيتهن ويوم دخلن لقن عمهن وحرمة عمهن وسعيد ويا امهن وابوهن وحميد يالسين في الصاله وطبعا فطيم من شافت سيارة سعيد ضربت بالغشا علشان اولا ما كانت تبا سعيد يشوفها لين باجر ولانها مغيره وايد في ويهها علشان جيه كانت تباه باجر يشوفها ويتفاجأ بها...وسلمت على عمها وحرمة عمها وهيه متغشيه...
بو سعيد وعقب ما سلمت عليه فطيم: منيه هالبنيه المتغشيه؟؟؟
ام بطي وهيه تضحك: ههههههههه ما عندنا علم بها جنها الا من زود المستحى ضربت بالغشا...
سعيد: هههههههههه يا ويلي ع المستحى حد يستحي من خطيبه...
بو بطي: شدراني بخطيبتك ؟؟؟
فطيم وهيه متفشله: اسمحولي...
بو سعيد: لا ما نسمح تعالي بنتخبرج عن علومج وبنشوف حناج...
ام سعيد: لا حول ولا قوه شو تبا بالبنيه خلها باجر بتشوفها انته وولدك...سيري اميه فطيم برايج ما عليج منهم ..
وسارت فطيم حجرتها ...بس العنود يلست وياهم هيه وشويخ وسولفوا ..
العنود: حميد ؟؟
حميد: عونج..
العنود: عانك الله بس خبرني سرت لانسابك الليله؟
حميد: هيه عيل اكيد اني بسير ..مب الا انا سرت وقوم ابويه وامايه ساروا ويايه...
العنود: هيه تراها ملجة فطيم ومريوم كلهن هنيه يعني اتفقنا ان مريوم بتي هنيه...
حميد: هيه انزين ادري شو الجديد هالشي من زمان متفقين عليه...
العنود: هههههههه اذكرك قلت يمكن من زود الوله تربع بيتهم....
بو بطي: هههههه يسويها هالمطفوق.....
بو سعيد: لا فديته ريال شو مطفوق...والله يا حميد ماحد يسواه عندي...
بو بطي يشوف حميد ويبتسم: هيه فديته حتى انا ما حد يسواه عندي...
هنيه العنود اتذكرت بطي وهلت دمعتها ونزلت راسها بسرعه ونشت وسارت حجرتها وتمت تصيح اخوها بطي وتشوف الحنا في ايديها وهيه تقول يا ليتني ما تحنيت...بس بعدين استغفرت ربها وسارت واتوضت وصلت ركعتين لربها...وقرت قرآن عن روح اخوها بطي ...وعقب سارت عند اسما وشلت وياها المعاصير علشان تحط اسما بس اسما رفضت وما طاعت...
اسما: لا والله يا العنود ما احط على ايدي ...
العنود وهيه عيونها حمر: اسما امايه حلفت اذا ما حطيتي على روايبج ع الاقل ما تحط هيه على روايبها...
اسما : يالعنود ما اقدر صدقيني مالي خاطر..
العنود: افرحي لفرحة فطيم ومريوم دخيل والديج...
اسما وبعد تردد: ما عليه خلي لي معصار بعدين بحط..
العنود: لا ادريبج ما بتحطين هاتي انا بحطلج على روايبج...
اسما: لا فديتج روحي بحط بس انتي طالعي غاليه وبطي...
العنود: فديتهم يالله عيل هاتي عنج غاليه انا بعاطيها مرضعة هالشاي...
اسما: فديتج والله انشالله الله بيسعدج في حياتج...
العنود وهيه تبتسم بسخريه: انشالله...
ويلست اسما تحط على روايبها حنا وبعدين تمت العنود وياها وسولفن ورقدت العنود عند اسما...والصبح الكل نش من وقت ..طبعا يوم الملجه والكل مرتبش... اسما ما طاعت تسير وياهن الصالون بس اللي سار العنود وفطيم ومريوم وشويخ وسارن صوب صالون مورا لانهن حاجزات عنده وطبعا سارن تقريبا جيه من الساعه وحده الظهر وكل وحده سووا الها مكياج على نفس لون فستانها طبعا مريوم وفطيم كان مكياجهن عادي وناعم وكان مخلنهن روعه وطلبن من الممكيجه اتحط الهن لماعي على ويوههن وعلى ايديهن وجتوفهن...اما العنود وشويخ فطبعا مكياج خفيف وحلو وبسيط اما عن التسريحات فالكل كانن فاتحات شعورهن على تسريحه بسيطه وحلوه وكلهن ماشالله شعورهن طويله...</font></strong>
<strong><font face=arial>وعلى الساعه 7 الا ربع خلصن وردن البيت وطبعا كان البيت مزدحم بالحريم ومريوم طبعا يت وياهم....</font></strong></font></font></font>
رد مع اقتباس
مواقع النشر (المفضلة)