<font color='#000000'><font face="arial, helvetica, sans-serif" size=3><font color=#0099ff><strong>طلع بو بطي من حجرته عقب ما يلس روحه شوي ايفكر ويفكر شو اللي خلا فطيم بنته جيه ترمس وتوافق بدون ما تعرف منو اللي خاطبنها.؟؟ هل هو لانها تبا تيب لبيتهم فرحه حتى ولو كان على حسابها؟؟؟ ...لا اكيد فيها شي لازم اخلي امها تتخبرها بلاها...ماحد يقدر يرمسها ويعرف شو اللي بلاها غير امويمتها...ونش وطلع وسار يلس في الصاله عند ام بطي والعنود وشويخ اللي ما الها حس ودومها في حالها...الله يكملها بعقل رزينه...

ام بطي: هاه بو الغالين شو السالفه؟؟؟

بو بطي: ههههه حتى انتي يا بنت الحلال ملقوفه؟؟ شو خليتي عيل لبناتج؟؟؟

ام بطي: لا حول ثرني شو قلت؟؟ ما قلت غير اني ابا اعرف شو السالفه؟؟ امسات مودي العنود واليوم فطيم...

بو بطي: سلمج الله سعيد ثره ظهر يبا فطيم مب العنود...

العنود من سمعت هالكلام حست براحه فضييعه: الحمدالله...الصراحه يتناسبون ...

ام بطي: زين وفطيم شو قالت؟؟؟ عسى ما ردتك؟؟

العنود: ودي تيجي؟؟ فطيم ترفض سعيد؟؟؟لا سعيد ريال ذرب المعاني وحشيم ومخاوي شما ما ينرفض....

ام بطي: يوم هوه جيه عيل جيه انتي ما بغيتيه؟؟

العنود: يالغلا انتي انا سعيد اشوفه مثل اخويه...يعني مثل حميد وبعدين روحج شفتي انه طلع يبا فطيم مب اناا...هاه يعني حتى لو وافقت جان توهق المسكين..

بو بطي: الحمدالله على كل حال مكتوب يا بنت الحلال...

ام بطي: زين خبرني شو قالت لك فطيم يا محمد؟؟؟

بو بطي: والله يا الغناه ما رفضت وقالت موافقه بس ما خلتني اخبرها منو اللي يباها..بس قالت موافقه ونشت عني...

شويخ وهيه تفج عيونها: هااااااا لهالدرجه تبا تعرس...؟؟؟اسميج مقوي يا فطيم..

ام بطي وهيه تخز بنتها بعيونها خز: شويخ؟؟؟شو هالرمسه بعد؟؟؟

شويخ تمت صاخه ...

العنود: امايه شويخ الا تسولف...يا حيج يا فطيم والله وبتعرسين...واخيرا بيستوي عرس في بيتنا...

بوبطي: العنود غناتي سيري فديتج هاتي لي دلة القهوه بسيرصوب الرجاب ..

ام بطي: دوم هالرجاب؟؟ يلس اشوي ويانا خلهن يوم واحد عنك..

بو بطي: يا غناتي منو بيجابل الحلال اذا ما سرت؟؟ تعرفين اني ما اروم اتكل على البيادير..وانا اصلا ما اداني أأجل على غيري...

العنود: يا ويلي يا ويلي شويخ؟؟؟ تسمعين الشواب يتغزلوون في بعض؟؟ الا غناتي والا العيوز تباه ييلس؟؟

شويخ:ههههههه غربالله عدوج...الله يهنيهم ويخليهم لنا ...

ام بطي: اسميج يالعنود تبين لج ضرب عوذ بالله ما اروم اسولف ويا شويبتي؟؟ عاد انتن مقصاه..

العنود: زين بخليكم اتهنون في بعض وبسير انا اييب دلة هالشبشوب...((وصدت صوب ابوها)) ابويه ما تباني اييب لك سحيحه؟؟

بو بطي: زين غناتي..

وسارت عنوده تشل الدله اللي في المطبخ الداخلي وتشل طبقة السحّ وتوديهن سيارة ابوها...وعقب ما خلصت سارت صوب اختها اتدق عليها...

العنود:فطيم؟؟؟ فطيم؟؟؟ فاااااااااااطميه ويهد...

فطيم:............

العنود: فااااااااااتوم...وصمخ اجلاب..

فطيم هني ما قدرت تتحمل غلاسة العنود: وخيبه اتقولج فاااتوم

العنود: فجي احسن لج لا اييج واصمج بقب بين عيونج...

فطيم: صبري اشوي..اسميج حشره..

العنود وعقب ما فجت فطيم الباب: هاه العرووس؟ شو بلاج؟؟

فطيم: عرستي ع الاقرع قولي امين..

العنود: فقدتج يا ربي شو هالدعوه اللي تلوع بجبد الواحد.؟؟ اخبرج حطي عيني في عينج شوي..

فطيم: وليش يعني؟؟

العنود : تراج بتعرسين...وابا اشوف خويتي واتمعن فيها واشوف اللي يا وخطبها ويباها دونن عن الكل شو شاف فيها...

فطيم: شاف غرابه...شو بعد شو شاف...وين شافني اصلا الا اكيد واحد من هالمقرودين...

العنود: زين عيل يوم هوه واحد من المقرودين ليش وافقتي عليه؟؟؟

فطيم: بس كيفي

العنود: حليله جانه ذابح عمره عشانج وانتي اتقولين مقرود...

فطيم: مالت عليه عساااااااااااااه...

تقاطعها العنود: جب يالسباله انتي لو تعرفين منو هذا ما قلتي هالرمسه...

فطيم اتقاطعها : ما ابا اعرفه..خليه يولي...

العنود: برايج كييفج يا حماره تراج صدق ما تنعطين ويه...

ونشت العنود من عند فطيم وسارت تيلس ويا امها في الحوي وعقب ما شغلت الفوز على الزرع سارت تزقر البشكار اييب فواله ويحطها ع المنامه...

العنود: اماايه بقولج شي...

ام بطي: عيوني يا بنتي امري انتي...

العنود: اول اتبندين رادوج هذا تراه حشرني...

ام بطي: يا ويلي منج انا هب مبنده رادويه تحيديني ما ايوز عن الشعرا ...

العنود: امايه بخبرج عن حميد...

ام بطي: واخيبتيه ولديه بلاه؟؟

العنود: لا حول يا امايه ما بلاه ولدج شي..خليني اخبرج...
ويقطع رمستها صوت هرن سياره ستيشن رماديه اول مره العنود اتشوفها...ردت غشوتها على ويهها ونشت بتنزل من على المنامه ...وشوي الا تشوف حرمتين وريال وياهن ورحبت امها بهن وقربتبهن وعقب ما وايهتهن سارت داخل اتسوي دلة قهوه لان ابوها كان ماخذ دلة القهوه وياه وزقرت البشكاره اتسير اتقول للدريول ايسير المخبز اييب لهن فطاير سبانخ وكروسان ووصت البشكار يسوي عصيده ...وعقب ما خلصت وحطت الدله والفنايين طرشت البشكاره اتوديهن صوبهم على المنامه...والحمدالله انها كانت مأمره على البشكار يحط فواله على المنامه....
وطبعا هاذيلا العرب كانوا يايين يخطبون العنود وهم من قوم السيافي..والعنود ما درت الا لين ما خبرت امها ابوها وبعدين ابوها زقرها مره ثانيه حجرته وخبرها بهالامر وقالها تفكر بس طبعا العنود كان رفضها جاهز وطبعا ابوها حاول يقنعها بس هيه ما رضت قالت لابوها انها ما تفكر وانها يوم بتفكر وبتحس انه الريال بيسعدها بتوافق من غير أي تردد..وهذا الرد كان مثل البلسم على فواد ابوها لانه كان يتحسب انه بنته مب ناويه تكمل نص دينها وتفرحه وتوافق على أي ريال يتقدملها...

وبعد مرور فتره وفطيم بعدها متعنتره على سعيد وبعدها ما تدري بالسالفه لانها طبعا دايما قافله على عمرها مع انه عمها وحرمة عمها يوا يخطبونها رسمي بس كانت قافله على عمرها ومسويه عمرها راقده وبعدين اونها نشت ويلست تتسبح ما درت ان اللي يو يخطبونها كان الا عمها اخو ابوها وسعيد غناة روحها اللي من زمان وهيه بانتظاره...

وطبعا في هالفتره تحددت ملجة فطيم عقب ما تظهر اسما من العده وتربي وعقبها على طول بيملجون لانه سعيد ما عنده صبر وكان محتشر يبا يسلم على خطيبته بس ابوه هزبه وقاله يغدي رزين وما يسوي عمره مخفوف...
وبعد هاليوم كان سعيد دوم يزورهم بس ما كان يلقى فطيم كان مستغرب وينها؟؟؟ شو بلاها ما تظهر لهالدرجه تتغلى؟؟ الله يعيني من دلعها وسعيد ما درى ان فطيم ما تدري بالسالفه...وكان يوميا مطيح في بيتهم ...هوه امبونه دوم في بيت عمه بس الحين قامت تكثر يياته اكثر عن اول وفي كل هالييات ما تكون فطيم موجوده...الكل استغرب منها....
اخر شي قررت تظهر من بياتها الشتوي ومن قوقعتها اللي هيه منخشه فيها وكان هذاك اليوم يوم الاحد وماحد كان في البيت ..امها سايره ويا ابوها صوب الحلال والعزبه والعنود كانت سايره ويا مريوم ربيعتها السوق تبا شوية حاجات وكانت اسما موصتنها على لبس حق البيبي المنتظر...وشويخ كالعاده يالس اطالع هالتلفزيون بتموت على الافلام الوثائقيه...وحميد ساير وما تدريبه وين ....ويلست اتحاوط في البيت وهيه ضايجه...ما بغت اتسير عند اسما لانها ضاجت من اليلسه داخل بغت تيلس برع وخصوصا لان الجو حلو وغيم شوي وكان وقت مغيربان يعني الشمس توها غاطّه تحت ومسويه وهج جميل...وسارت ويلست على المنامه وصدت في اتجاه واحد وهيه رافعه راسها تشوف الغيم والجو الحلو وما كانت متحجبه بس لابسه شيله وقصتها ظاهره...وكانت متسانده على حد المنامه...

فجأه تنهدت وتخيلوا منو كان واقف وراها؟؟؟؟ كان سعيد اللي كان خاطف يبا يسلم على عمومته واتفاجأ بفطيم يالسه وسرحانه وهوه كان فرحان وما حس بعمره الا وهو حاط ايديه على عيونها يبا يغمض على عيونها ...

فطيم من حست بيدين على عيونها حاولت اتفج اليدين: منووو؟؟؟ ......منو؟؟؟ عاد شو هالحركات؟؟

سعيد:...........

فطيم وهيه تحاول تزيح هاليدين وهيه اتحس انهن يديدن ريال لانهن كبار شويه بس سعيد كان كل ما تحاول تفج ايديه ايزيد من قوته: حميدوه؟ حميد ما حد غيرك راعي هالحركات عاد يالله فج ايديك ...اوه الله يغربلك عاد فج ايديك ..تراك لعوزتني

سعيد وعقب ما فج ايديه فجأه: جب انا مب حميد....يالسباله عنبوه ما تعرفين ايد حميد من ايدي معقوله اكون مثل حميد ايد حميد جشعه وعوده وانا حليلي ايديه رقيقه...

فطيم وهيه منصدمه بشكل فضيع وويها محمر وتعدل شيلتها تبا تتحجب: خسك الله الا انته شو ها الاخلاق؟؟؟ عنبوه ياهل انته تسوي جيه...

سعيد استغرب منها: ياهل؟؟؟ يعني ما اروم اداعب خطيبتي؟؟؟

هنيه حست فطيم باعظم صدمه.......شو هالكلام اللي يقوله سعيد؟؟؟ شو خطيبتي ما خطيبتي؟؟

فطيم وهيه تشل عمرها تبا تسير داخل عنه بس يودها من ايدها : وين تبين فطيم؟؟

فطيم: انته شكلك فيوزاتك مختربات ...فج ايدي اقولك...

سعيد:شو بلاج؟؟؟ قلت شي غلط؟؟؟

فطيم وهيه خلاص اتحس بعمرها معصبه عليه: اونك ما تدري؟؟ شوف عمرك شو ترمس يوم انته خاطب اختي وترمسني جيه وتسوي ويايه هالحركات ...شوف انا ما اداني هالحركات...ويوز والا والله تراني لخبر عليك العنود...

ويقاطعها سعيد: تعالي شو دخل العنود ما بيني وبينج؟؟؟انتي شو ياج؟؟؟ اشهد انج مب صاحيه...

فطيم: الا اصحا عنك....سير عني لا اشبك كف...

سعيد: وخيبه السالفه فيها كف بعد لا حول ولا قوه...ماشالله هذا وبعدنا ما عرسنا وانتي مستقويه...

هني عاد فطيم ما رامت توقف جان تيلس وهيه خلاص تحس ان قدرتها خارت..واندحجت مره وحده اتصيح جدام سعيد...كانت هاي ثاني مره اتصيح جدامه اول مره كانت يوم توفى اخوها بطي وثاني مره الحين...

سعيد ما هانت عليه غناته وهوه يشوفها اتصيح جان ييلس جدامها ويحط ايده تحت ويهها يرفعه..

سعيد: فطيم ليش الصياح ابا اعرف...

فطيم:اااااااه((وتكمل السينفونيه))

سعيد: فطيم شو بلاج؟؟؟ يالله عاد قلبي عورني خبريني؟؟؟

فطيم:.............

سعيد: ادري انج زعلانه عسب سالفة العنود بس والله ما كنت اباها هيه بس ابويه تسرع وسار يخطبها لي بس انا ما رضيت وسيده ييت اصلح غلطة ابويه وخطبتج بروحي من عند عمي...ادري انه حز في خاطرج انا كنا نرمس واقولج كل شي وانتي قلتي لي كل شي بس عاد شو اسوي بابويه الله يهديه...

فطيم: يعني.......يعني انته اللي خطبتني صح؟؟؟

سعيد وهوه مستغرب : عيل منو غيري؟؟؟جيه ثرج حاط عينج على حد غيري؟؟؟

فطيم: لااااااااااااااااا

سعيد وابتسم شوي: الحمدالله ريحتي بالي...

فطيم هدت شويه بس الاحساس اللي حسته كان غير فرحانه على متلخطبه على مشاعر وايده...كيف انها وافقت على اللي خطبها وهيه ما تدريبه منو...اسميني ظهرت ياهل صدق...حليلك يا بويه استغربت مني....ههههههه

شوي الا ويسمعون سيارة كلوزر وهرن...ونش سعيد من جدام فطيم وهوه مرتبك: ههههه وخيبه الحين عمي بيهزبني لو شافني يالس وياج روحي...

فطيم وهيه مرتبكه: زين قوم عاد سير جدم سيارتك خلهم يدشون بسيارتهم..

سعيد: لا والله بسير مافيه للهزبه...ههههههههههه...

فطيم: براويك سعيدان....

سعيد: سعيدان الحين هااه بس خلينا نعرس براويج منو سعيدان هااا....

فطيم: جاااب يالسبال والله انك طفس ودفش وكل شي ...

سعيد: شو قلت والله ما قلت شي افكاري سليمه مية مية...الا انتي اللي افكارج وسخه..هههه

فطيم: سير لا فلعك بهالفنيان على راسك يالله سير...

وسار سعيد وسلم على عمومته وتعذر منهم وسار ...اما بو بطي وام بطي يوم شافوا فطيم يالسه...

بوبطي: العنود بعدها مايت؟

فطيم وهيه متفشله من سعيد والموقف ومنزله راسها: لا بعدها...

ام بطي: يوم ولد عمج هني جيه ما زقرتي شويخ تيلس عندج؟؟ تعرفين انه الحين خاطبنج يعني عيب تيلسين وياه رواحكم...

فطيم: والله انا ما دريت انه خطبني الا توني...

بو بطي: ما خليتيني اخبرج تراج ربعتي عني ....

سكتت فطيم وهيه ميته من المستحى....
اما العنود ومريوم فكانن في هالوقت في بيبي شوب ياخذن سامان حق البيبي المنتظر طبعا بما ان اسما ما تقدر تطلع وهيه في العده ففضلن ياخذن الها وللبيبي وطبعا ما خلن شي من مراضع وملابس للبيبي وفوانيل...ورغوة الاستحمام وزيت الاطفال ...ظهرن من بيبي شوب مخسرات فوق السبعميه وطبعا العنود اشترت حق هنوده بعد شوية بدلات...وسارن عقب مركز الغرير وخذن حق اسما قطع يديده وشوية ملابس نوم بتلبسهن في المستشفى...</strong>

</font></font></font>