<font color='#000000'><font size=3><strong><font face=arial>الجزء الثاني:
عبدالله في هاذيج اللحظه يلس ايفكر كيف بعرفها او اعرف اهلها او اعرف هيه وين ساكنه يا ربي شو هالحظ النحس...فكر في عقله قال ما شي غير اني اسير عند اخته عذيجه عسا انها تتعرف عليها ويحصل امبينهن صداقه..عبدالله بسرعه خذ الترولي وسار صوب امه وخواته وير اخته عذيجه على صوب ..
عبدالله : غناتي عذووج طلبتج قولي تم...
عذيجه: عونك غناتي امر شو تبا..
عبدالله: تشوفين هاذيلاك البنات الثنتين المنقبات؟
عذيجه: اي بنات؟ المطار متروس من خلق الله.. ما اشوفهن تعال راوني اياهن..
عبدالله: انزين عذوج بنسير شوي لين نوصل صوبهن.. بس لا اتطالعينهن وايد..ما اباهن يشكن في شي..
عذيجه: انزين انزين عبود... بس خبرني شو السالفه..بلاهن هالبنتين؟
عبدالله: عذيجه والله يا غناتي اباج اتسيرن عدالهن شوي واباج تسولفين وياهن ..اباج اتعرفين بنات امنو ومن وين هن ..
عذيجه وهي مستغربه من اخوها بس قالت في خاطرها جنه الا خويه شي ياه..بس ماعليه انا بجاريه كله ولا عبودي..
عذيجه: انزين الغالي انته سير صوب قوم امايه عن تستغرب منا...سير طالع جان ين الشنط..وانا بسير صوب هالبنات وبسولف وياهن..
عبدالله: اوكيه خلاص بخليج بس سوي نفس اللي وصيتج عليه..
عنوده ومريوم كانن يشوفن عبدالله واخته وبس ما يبينن شي مسويات الامر عادي..
مريوم: غربالله عدوج عنود البنت يايه صوبنا...الله يستر..
عنوده: سكتي خسج الله والله ان قلبي طايح ...شو يايبنها صوبنا هاي..الله يستر تعالي بنغير مكاننا..
مريوم: وين تبين اخوج قايل ما تحتركن من مكانكن..
عنوده: هي والله صدق ذكرتيني..بس ماعليه عادي بقوله سرنا المحل اللي ايبيع هدايا وتذكارات ما يهمج تعال نسير ..عنده موبايله وانا عندي موبايلي وبينا اتصال...
مريوم: زين يالله عيل...
سارت عنود ومريوم صوب المحل و قالت عذيجه في خاطرها يا هاي قفطه انا سايره صوبهن وهن سارن عني بس ما عليه بسير اييب بنات اختي واوني بسير اشتري لهن شي من المحل.. سارت صوب بنات اختها شما وسلامه..وقالتلهن: شمامي سلووم تعالن بنسير بشتريلكم العاب..
سلامه وشما: الله فديتج خالوتي يالله بنسير..
سارت عذيجه وبنات اختها صوب المحل..ولقت عنوده ومريوم واول ما دشت المحل قالت: السلام عليكم..
عنوده ومريوم: وعليكم السلام والرحمه..
وسون عمارهن لاهيات بالبضاعه اللي جدامهن وجان تشوف عنوده لعبة عبود(( في قطعه 13)) ومكتوب عليها اسم عبود وشلتها تبا تاخذها...وفي نفس الوقت عذيجه بعد شافت هاي اللعبه وعيبتها فروحه وخذتها..جان اطالع في عنوده وتبتسم الها..ردت عنوده الابتسامه..
عذيجه: شكلنا ما خاذين لعب شخصيات قطعه 13..
عنوده وهي تضحك: هي والله جنا يهال بس الصراحه انا اموت على هالبرنامج واترياه كل رمضان...(( عنوده ما تدري شو ياها خلاها تنخرط بالرمسه))
عذيجه: اتصدقين انا بعد..ختيه من وين انتو؟
العنود: طال عمرج احنا من دبي... وانتي؟
عذيجه: والله احنا من بوظبي من منطقة السمحة..اتعرفينها؟
العنود:والله يا ختيه سمعت عنها بس والله ماشفتها اصلا انا بوظبي ما ييتها غير مره وحده.. يوم ودونا رحله من جامعتنا وبس ...
عذيجه: يالله ...قولي والله ؟ اسميج ...حد عيل في الامارات ولا ايي دار بو خليفه؟
عنوده: هي والله اسميه كان في خاطريه ازور دار بابا زايد فديته بس شو انسوي اخواني وهلي مشغولين باشغالهم..منو بيودينا احنا البنات؟ يالله انشالله الايام يايه وبنعوض انشالله...
عذيجه: انشالله بس رفجه عليج جان ييتو بوظبي اتخطفون علينا..
عنوده: هههههه خلينا نتعرف اول...
عذيجه: هيه والله صدق يالفشله والله الغاليه انا اسمي عذيجه سالم الظاهري... وادرس في جامعة الامارات وانتي؟
عنوده: انا العنود محمد الكتبي...وانا ادرس في جامعة زايد في دبي..وهاي ربيعتي وتوأم روحي مريم خليفه وهيه بعد تدرس ويايه وكلنا نفس التخصص...
عذيجه: تشرفت والله...((ويقطع عليهن صوت موبايل عنوده ، وكان اخوها متصل الها ايقولها وين هيه؟))
عنوده: غناتي برايج بخليج الحين اخويه يباني اظني هلي وصلوا...برايج الغاليه..
عذيجه: برايج غناتي.. (( عذيجه ما يا في بالها هالمره انها تاخذ رقم العنود ))
وبينما كانت العنود ومريوم ظاهرات كان في وجوههن عبدالله بيدش المحل ونزلت العنود ومريوم اعيونهن بسرعه من المستحى..اخر اشوي عشان يظهرن وقالهن:
عبدالله: اسمحلي..
عنود ومريوم: مسموح بالحل...
ظهرن بسرعه وسارن صوب بطي ولقن ام بطي وابوبطي وحميد وفطيم ..سارت عنوده ولوت على ابوها بقو جدام الناس واتحببه في ويهه: فديت روحك يالغالي والله اني متولهه عليك موت..
بو بطي: فديت روحج عنودتي والله اني متوله عليج ويعلم الله اني حشرتهم عشان انرد دبي دار الحي الا عشانج..
فطيم وبطي وحميد: نعم نعم نعم.....!!!!!
فطيم: ما عليه يالشيبه..انا بزعل عليك ولا برضى...
بو بطي: ههههههههههههه فديتج اتراج انتي ويايه ..واشوفج اجبالي 24 ساعه ..بس عنودتي لا ..
ام بطي: حسبي الله ع البنات اسميهن بيموتن على ابوهن اكثر عن امهن..بس ابرايكن...
بطي: فديت الغاليه بنت الغاليه..فديتج يا اليازيه بنت حمامه والله انه ماحد يسواج عندي ...في ذمتي ذمه..
سارت عنوده تلوي ع امويمتها..وشلت برقعها تبا اتحبها على خدودها..
ام بطي: يوزي عنوده هب جدام الناس...عيب بيشوفون ويههي عيب..
عنوده: برايهم ما عليج منهم..فديت هالويه انا غناتي هب تزعلين فديت روحج ((وصاصرت امها علشان ما تزعل(غناتي تدرين اني سرت سلمت على ابويه لان ابدى يسلمون ع الريال والا السالفه مب مثل ما تتصورين انتي) استانست ام بطي وحبت بنتها على خدها ))
وعقب السلام والكلام سارت ام بطي وفطيم ومريوم وعنوده يركبن السياره..بس عنوده كانت تتلفت اتدور عبدالله اللي شل قلبها بس ما لقته قالت معقوله ايسيرون ؟؟ وينهم احيدهم يتريون شنطهم..ياربي يالله ايكونون بعدهم هنيه..... وهن ظاهرات صوب السياره شافت سيارة عبدالله ايحط الشنط في سيارة رنج ..وكان في ريال ايساعده..وهو في هاذيج اللحظه انتبه الها وتم ايطالعها ...ركبت السياره في مكانها المعتاد...وخطفت سيارتهم عدال سيارة عبدالله وكان عبدالله بعده واقف..ويطالع السياره واول ما خطفت عداله صد صوبها وحط ايده عدال خشمه وعطاها تحيه بالخفيف عشان ما حد ايحس ..من شافت عنوده الحركه فز افوادها وغمضت عينونها النعس وردت ابراسها ورى على السيت..((فديتك يا عبدالله)) ..ما ادري كيف بعرف الحين عنك شي يا ربي حتى عذيجه ما خذت رقمها ..شو هالحاله يا ربي...
ردن البيت عقب ما خطفوا مريوم بيتها..وفي البيت حرمة اخو عنوده كانت ماشالله عليها مسويه هاذاك العشا الفنان وكانوا ذابحين ومسوين مشواي ومسوين ثريد واكلات وحاطين حلويات جنه العيد...عنوده في خاطرها ماشالله عليج يا حرمة اخويه اسمينا ما بنتعوض فيج..والله ليتني اكون مثلج قد المسئولية...حتى ريحت البيت حلوه ريحة عود وعطر.. سلامي عليج يا بنت مطر..
دشت العنود علشان اتفر عباتها وتبدل اثيابها...بس شافت الكيس اللي حطته عدال الابجوره ...وشلته وظهرت منه لعبة(( عبود)) وحظنتها ...وعقب سارت وحطتها على مخدتها وين ترقد...من اليوم وساير عبودها بيرقد وياها لين ما تلتقي بعبودها الاصلي...ان الله كتب...
سارت برع صوب الصاله عند اهلها ..
ام بطي: بنتي سيري افديتج طالعي حرمة اخوج تراها في المطبخ ما ادري شو تعابل ..سيري ساعديها يارج الله..
عنوده: من عيوني الغاليه انتي تامرين امر وانا انفذ..
ام بطي: فديت روحج ربي يرزقج كل خير ..قولي امين..
عنوده : امين(( في خاطرها اتمنى ربي يرزقني شوفة عبودي))..ههههههه
سارت العنود صوب حرمة اخوها وين المطابخ وساعدتها هي وشويخ...وفي ذاك اليوم العرب كلها يت اتسلم على هلها وتتحمد الهم بالسلامه على ييتهم من السفر..ومن يت الساعه 9 ونص ما رامت تم مبطله اعيونها صلت العشا وحطت راسها ورقدت...
في الطرف الثاني عبدالله كان في خاطره ايعرف شو رمست اخته ويالعنود...بس قال ما عليه بتريا لين ما نوصل البيت وهناك بتخبرها شو رمسن مع اني ما اروم اقبض عمري...وهو على باله ان عذيجه اتعرف الحين رقمها واتعرفت عليها وين هيه ساكنه..
وصلو البيت واول ما حولوا سار عبدالله حول الشنط ويا راشد ريل اخته...وقرب بهم ودخلوا البيت وكانت اخته العوده وخواته المعرسات هناك يترين بيسلمن عليهم..قال في خاطره ياهاي حوسه الليله اسميها ما بتعدي على خير..المهم طاف الوقت وسار عبدالله المسيد يصلي اذان العشا ورد البيت سيده مع انه مرهق وتعبان ويبا الرقاد الا انه سار وزقر عذيجه عشان تي حجرته وتخبره عن عنوده..
عبدالله: ها غناتي خبريني عن البنت..فديتج شو عرفتي..
عذيجه: ما بخبرك لين ما تخبرني اول شي انته شو سالفتك ويا هالبنت ...انته تعرفها؟ بس اتصدق ما ينبان عليها جيه ينبان عليها انها حشيم...
عبدالله: لمي ثمج والله اني ما اعرفها ولا شي ..بس السالفه يا انسة عذووج ان هالبنت جد شفتها مره في المارينا جنهن يايبنهن جامعتهن اظني ..ما ادري شو السالفه بس انا شفت الباصات..وشفتها هناك..وعيبتني واخلاقها حلوه...وتمنيت اشوفها مره ثانيه والله اني اباها على سنة الله ورسوله عشان جيه والله اني ما صدقت اليوم عمري يوم شفتها في المطار ..تحسبت عمري اتوهم والا وحده تشبهها بس لا ورب الكعبه اني من شفتها حسيت بقلبي اتغيرن نبضاته.. وعلى طول قلت لج اتسيرن اترمسينها وتتعرفين عليها..
عذيجه: أهااااااااااااااا وان اقول ليش كنت من زمان عادي عندك يوم قلنا لك بنخطب لك بنت قوم الياسي ..وبعدين بسرعه غيرت رايك وقلت لا ما تبا تعرس ..الحين عرفت شو اللي غير رايك و...
قاطعها عبدالله: اخبرج هب وقتها هاي الرمسه الحين..خبريني شو اسمها وبنت امنو وين ساكنه؟
عذيجه: والخيبه والخيبه صبر عليه انا روحه راسي مفتر من الطياره والمطارات..المهم كل اللي عرفته عنها ان اسمها العنود محمد الكتبي و..و...و...تصدق ما عرفت وين ساكنه...
عبدالله: حرااااااااااااااااااااام عليج انا هب موصنج يالله منج اسميج ما تعرفين تتصرفين..المهم انا بتخبر عنها وغير شو اتعرفين قولي ابسرعه...
عذيجه: اللي اعرفه انها تدرس في الجامعه وهي صدق كانت هاذيج المره يوم شفتها في المارينا مول..اول مره تي بوظبي وهي وربيعتها وياها اسم ربيعتها مريم خليفه ويدرسن نفس التخصص..
عبدالله: ما ابا علوم ربيعتها المهم شو تخصصها هي ....
عذيجه: ما ادري والله عبود كنا يالسين انسولف واتصل الها اخوها......هيه اخوها اسمه بطي بعد...
عبدالله: يالله منج بس هاللي عرفتيه عنها ؟؟؟؟؟؟؟؟؟؟؟امحق معلومات .. ..حشا ... يا ربي شو هالحاله وين بشوفها والا بعرفها الحين ..حتى انج ما تعرفين وين ساكنه في دبي..
عذيجه: اخبرك انا عندي اربيعه تدرس في جامعة زايد مالت بوظبي بخليها تدور اسمها في البنات اللي يدرسن في جامعة زايد مالت دبي..
عبدالله: شقايل جيه بعد؟؟؟؟ فديتج جانج اترومين ابسرعه..
عذيجه: زين يا بويه انا الحين في اجازه بتصبر لين شهر 9 ...
عبدالله : ياربي وانا شو يصبرني شهر كامل..
عذيجه: على هواك ولا انا ما اروم بعد...
طلعت عذيجه من عند اخوها..وتم عبدالله ايفكر في عنوده ويحلم انه في يوم من الايام بيلاقيها ...شوي الا وعبدالله في سابع نومه...
</font></strong>
<font face="arial, helvetica, sans-serif">ان شاء الله عجبكم هالجزء انتظروا الجزء الثالث قريبا</font>
</font></font>
رد مع اقتباس
مواقع النشر (المفضلة)