<font color='#000000'>
<font size=3><font color=#ff9999><strong><font face=arial>الجزء الثاني والعشرين:
الحلقه الاولى:
اليوم الاثنين الساعه اربع العصر بتوقيت المانيا كانوا عبدالله وعذيجه وامه وخواته وريل اخته وياهم يركبون الطايره علشان يردون للوطن وارض الامارات الغاليه...كان الكل ميت من الفرح لانه واخيرا بيرد عقب طول غيبه حتى انهم كانوا يتريون هاليوم بفارغ الصبر..
في الطياره كان عبدالله يالس عدال دريشة الطياره وعداله ريل اخته وكانوا يسولفون وعبدالله كان حاط على عيونه نظاره سودا غامجه علشان ماحد يشوف عيونه وصارت هالنظاره خلاص شي اساسي في حياته ما يقدر يستغنى عنها ألا اذا كان في غرفته الخاصه او بروحه..عبدالله كان صدق فرحان انه بيرد بس كان من جانب اخر يفكر في الكلام اللي بيقوله حق العنود........كيف بيفسر الها حالته وانهم مستحيل يكونون لبعض؟؟حاول يتجاهل نداء قلبه بانها ممكن ما تعير هالشي اهميه بس لا هوه مستحيل يعيّش هالانسانه في حياه بائسه...
اما بالنسبه لعذيجه وخواتها وامها كانن يعدن الساعات علشان يوصلن ارض الامارات..
في الجانب الاخر كانت العنود متوتره وميته من الفرح اليوم حبيب قلبها بيي وكانت صدق تبا تسوي أي شي علشان تشوفه بس كيف؟؟؟ يا ربي لازم اشوفه او على الاقل اكون اول من يهنيه بسلامة الوصول ...صح انه ما رمسني من يومين بس برايه انا بسويله مفاجأه وبخليه يحس اني ما بتخلى عنه لو مهما صار..المهم لازم افكر عدل شو بسوي عشان افاجأه؟؟!!َ!
اتصلت لمريوم...
العنود وهيه تتريا مريوم ترد: يعلج الدحج ردي..
وردت مريوم: والخبه تخيبج شو تحشين فيّه..ما ياني خير من قراضج...
العنود وهيه ابتسامتها على ويهها: هلا والله الرمه المرتمه عننبوج زاد ما فيج خير تتصلين؟؟
مريوم: واللي يقول حضرتج كسرتي تلفوني!!
العنود: والله انج ما تنعطين ويه ..سودالله رسّج...انا متصله فيج اباج في سالفه وانتي دشيتي في سالفه ثانيه..
مريوم: هاه خير بشريني بشرج الله!؟
العنود: البشاره يا غناة روحي هيه ان عبدالله بيي الليله من المانيا..يااااااااااااي انا فرحانه موت
مريوم: تجذبين!!! صدق صدق؟؟
العنود: والله العظيم ما جذبت..
مريوم: يا حظج واخيرااااا....بعد طول انتظار بيرد عبدالله..
العنود: انزين ابا اسوي له مفاجأه بس ما اعرف ؟؟ دخيل والديج ساعديني..
مريوم: والله ما ادري؟
العنود: الرمه خبريني عاااااااد شو اسوي مالي حد غيرج...وانا اقول مريوم ام الافكار
مريوم: ما بغيتي غيري ام الافكار
العنود: انزين بليييز فكري ويايه...
مريوم فكرت شوي وبعدين فزت: عنوووووووود!!! لقيتها
العنود: شووو؟؟
مريوم : بس لا تيلسين وتخورطين عليه وتقولين لي مب زين ومن هذا الكلام!!
العنود: انزين قولي..
مريوم: سلمج الله يا غناااتي اشتري له باقة ورد فخمه وكلها ورد جوري وخليه ايلفها بغلاف من تحت بورق احمر وخليه يسوي ديزاين حلو..
العنود وهيه مستغربه: انزييين؟؟وحق شو هاي؟
مريوم: صبري اشوي وعقب خليه يكتب بيت قصيد مثلاٌ :: نورت لبلاد بوجودك..واظلمت لي عدت مب فيها..الليالي بشعة خدودك..ينور وينزاح داجيها::
العنود وهيه فاجه عيونها على وسع: هيه وبعدين؟؟
مريوم: وبعدين يا اختي الكريمه اتطرشين راعي المحل او أي واحد وتخلينه يكتب في لافته اسم عبدالله الظاهري مثل اللي انشوفه في الافلام...وخليه يوقف وين صوب القادمين...ههههههه شو رايج بهالفكره الجهنميه..
العنود: وخيبه خيبتج شو هالفكره؟؟
مريوم: لازم افكاري مثلي
العنود: فقدتج وياها فكره...عنبوه مينونه قالوا لج؟؟ حشا عليه ما سويتها اوومف ما يا طيع زينج..
مريوم: يالله يالسباله مالت عليج جانها فكره حلوه وتخبل حتى انه عبدالله بيفرح...
العنود: اتغربلتي بتفضحيني..
مريوم: عساج العور..شو بفضحج لا بارك الله فيج...تبين سوي هالفكره ..ما تبين رضي راسج بالحيطه...
العنود: مريوم حرام عليج عاد..
مريوم: فكيني من حشرتج سوي اللي اقوله وبس وما بتندمين..
العنود: بشوف...
مريوم: انزين اخبرج ما سرتي تقديمن اوراقج؟؟
العنود: يا ختيه نسيت ماعليه شورايج نسرح باجر؟؟ بنقدم في شركات ابا اقدم في شركة الامارات للبترول يقولون لج معاشاتهم راهيه...هههههههه
مريوم وهيه مب مصدقه: في ذمتج؟؟ ما تقولينه؟
العنوود: والله...وانشالله باجر بسير اقدم يقولون لج المعاشات من عشرت الاف وفوق ..
مريوم: عيل باجر بنشوم...والله ما اخلي بقعه ما اقدم فيها ..
العنود: والخيبه والخيبه وين بتقدمين بعد؟؟
مريوم: بقدم على دايرة السياحه وعلى دايرة الصحه وعلى دايرة الكهربا...وهاذي شركتج اللي ترمسين عنها..
العنود: عيل انا وياج ريلي على ريلج..
مريوم: اخبرج عنوده عرس فطيم اختج متى؟؟
العنود: خليها تملج اول انتي..
مريوم: ومتى بتلمج؟؟
العنود: بتملج يوم بتربي اسما امره عقب ما تربي باسبوع ملجتها...
مريوم: واسما الحين أي شهر
العنود: والله يا ختيه اسما الحين في الشهر السابع توها داشتنه...
مريوم: ولّ عيل بعدها..يالله حليلها الله يعينها اسما ..
العنود سمعت دق على باب حجرتها: اقول مريوم بخليج بطالع منو يدق..
مريوم: انزين اتصلي لراعي محل الورد والا انا بتصلّه..
العنود: زين زين بتصّل
مريوم: اوكي بااااااي
العنود: باااااااايات
نشت العنود وفجت باب حجرتها ولقت فطيم عند باب حجرتها وشكلها مرتبك وزايغ..
العنود: بسم الله فطيم بلاج؟؟؟
فطيم وهيه عيونها فيهن دمووع: الحقي على اسما اتقول انها تحس بويع الربا...
العنود وهيه زايغه: شووو؟؟ بس هيه بعدها في الشهر السابع..
فطيم: دخيلج تعالي بنتلاحقها..
العنود وهيه تربع ويا فطيم صوب بيت اسما:ياويل حالي انتي سيري اتصلي لبويه ولاّ لحميد ايي يوديها..
فطيم: انزين من تلفون بيتها بتصّل
ودشن البيت ولقن اسما تتويع وتحس بالام رهيبه وشوي والاّ ابو بطي وام بطي يدخلون ويسير سيده بوبطي ويشغل سيارته واييبها صوب باب البيت وتشل العنود وفطيم اسما علشان يودنها السياره وسارت العنود ويا امها يلبسن عباياهن وساروا وتموا عيال اسما عند فطيم وتمت حالتها حاله وهيه زايغه على فطيم وكانت فطيم يالسه على دجة البيت يعني على الدري اللي برع باب الصاله لبيت اسما وشافت سيارة سعيد داشه من صوب بيتهم..وكانت هيه يالسه ويا هنوده برع والباقين يلعبون وين صوب المريحانه...
سعيد شاف فطيم يالسه ولف بالسياره صوب بيت المرحوم بطي...وحوّل من السياره ويا صوبها..
سعيد والابتسامه على ويهه: هود هود
فطيم وهيه تحس بويهها احمر من المستحى: هدا...
سعيد: هلا والله اشوفج هنيه ويا العيال..
فطيم: هيه عاد شسوي بشتغل حاضنه الحين ...
سعيد: ههههههههه عيل وين الربع؟؟
فطيم وهيه ما تعرف شو تقولّه: صراحه....امممم
سعيد وهو مستغرب: فطيم بلاج؟؟
فطيم: اسما شكلها بتربي...
سعيد: هاااه؟؟ احيدكم قلتوا عقب ثلاث شهور...!!
فطيم: المفروض جيه تقريبا هيه توها من اقل من اسبوع داشه السابع وشكلها استويعت الحين...
سعيد وهوه ايطالع فطيم ويغمز الها: فطيمي عيل ملجتنا جريبه..ههههه
فطيم وهيه ميته من المستحى: فقدتك يالسبال(( وتضربه على كتفه))
سعيد:ياي بتشوفين يوم الملجه شو بسوي...هههههههه ان ما لعوزتج ما اكون انا ولد ابويه..
فطيم: اتخسي الا انته والله من قاللك اصلا اني بظهر لك في الملجه..اصلا هيه الا ملجة رياييل..
سعيد: اتهبين حرام لدش والبسج الخاتم والعقد...جاني متعني ورابع اشتري دبله على ذوقي واخر شي اتقولين لي هالرمسه...
فطيم تفججن بلوطها بس ما تباه يحس انها فرحانه: بس بس ماشي هالخرابيط وبنشوف منو بتمشي رمسته..
سعيد: زين بنشوف(( وقفّا سعيد وسار بيركب سيارته))
فطيم: حووه وين تبا؟؟
سعيد: بسير بعد شوه ايلسني عندج؟؟
فطيم: الا ولله ما تسير حرام تخليني روحي ويا هاليهالووه...الصراحه انا زايغه..
سعيد: غناتي فديت هالخشم شو يزيغج..
فطيم: جب جب ان قلت هالرمسات يا ويلك تسمع...
سعيد: انا شالله بلاني بج!!...
فطيم: شوووووووه؟؟ ودك انته مسود الويه...
سعيد: ههههههههه حشا باخذ عيوز انا...
فطيم: عيوز يدتك...
سعيد: الله يرحمها....
فطيم: الله يرحمها..انزين سعيد عاد يلس شوي وعقب سير...
سعيد: فديتج عشانج بس...
فطيم: بس احترم نفسك ولا ترمس هالرمسات...والاّ تراني بخبر حميد عليك..
سعيد: حد يخبر اخوه على ريله؟؟؟
فطيم: بعدك ما استويت ريلي...
سعيد:ههههههه جريب يا غناتي جريب وبتشوفين...
فطيم: انزين اندوك يود هنوده ما اباها تسير ترابع اخافها تسير ع الشارع اقبضها بسير وبرد...
سعيد: وين بتسيرين..
فطيم: لا حوول وانته شو يخصك بسير وبرد ما ببطي..
سعيد: زين زين سيري يعلج تردين...
وسارت فطيمم ويابت دلة القهوه والتمر وصبت لسعيد فنيان قهوه وعقب سارت تسوي له عصير ويابت له فرووت...
سعيد: يا حافظ عليج من حرمه اسميج مذروبه...
فطيم: غصبن عنك ...
سعيد: مشكوره يالعروس بس يلست وياج وايد بسير الحين الساعه 7 ونص ..
فطيم: الله يحفظك..
سعيد: يالله ثرها تبا الفكه..
فطيم: لا والله بس ما اروم اعطلك يمكن مواعد حد من الشباب او عندك شغلات مني والا مناك..
سعيد: هيه صدقج مواعد وحده غرشوب يالله خوزوا عن دروبها...
فطيم وهيه متضيجه: شوووووووووو اتهبي الا انته...
سعيد: ههههههه لا يا بنت الحلال اسولف...
فطيم: اتحسبت بعد...لو هيه مب سوالف بتشوف العين الحمرا
سعيد: هههههههه اسميج سالفه..المهم بسير الحين يالله في امان الله..
فطيم: فمان الكريم....
ونش سعيد وسار عنها.. وشوي وصاح التلفون وربعت صوبه فطيم وشلته
العنود وهيه تحس بتعب: الوو
فطيم: هلا والله هاه بشري
العنود: مبروووووك يابت توم بنت وولد غزلان فديت روحهم ويعلني ما اخلى من شوفهم بس هم في الحاضنه لانهم قاصرين...
فطيم وبمشاعر متلخبطه فرح علىهالخبر الحلو وحزن لانها اذكرت ابوهم الغالي "اخوها" بطي اللي ما شاف عياله :والله؟ يا ويل حالي عليهم يعل ابوهم الجنه ما الله خلاه عشان يتهنى بشوفتهم..
العنود وهي تصييح: اميين يعله الجنه يا ربي ما نقول غير الله يصبرنا على فرقاه ويسكنه فسيج جناته ويخلي عييله لموييمتهم عشان تفرح بشوفتهم..
فطيم: اميين الله يخليهم يا ربي.. واسما طمنيني عنها شو حالها؟؟؟
العنود: يا ختيه تعبانه بس الحمدالله الحين هيه راقده من اثر المنوم..
فطيم: فدييتها يا ربي..
العنود: برايج غناتي بسكر عنج ابا اتصل لمريوم..
فطيم: زين برايج..اقولج خبرتوا اهل اسما؟؟
العنود: هيه اكيد وامها ويانا الحين..
فطيم: عيل برايج خلاص الله يحفظج..
العنود سكرت عن فطيم واتصلت بسرعه حق مريوم علشان تبشرها وتقولها تسوي فكرتها وطبعا مريوم ما صدقت ان اسما تربي بهاي السرعه معقوله تربي بسرعه ومب موعدها؟؟ المهم عقب ما سكرت مريوم عن عنوده على طول اتصلت بمحل فلاور بوكس وطلبت منهم يسووون الها احلا باقه وعلى ديزاين رهيب وطبعا ورد جوري مدموج بورود بيضا صغيره ونفس اللي قالت للعنود عشان تسويه تماما يعني مع البطاقه والقصيده واخر شي حطت الاهداء من (( حرف العين )) وعلى طول طرشت دريولهم يسير يودي الفلوس لراعي المحل وطبعا طلبت من راعي المحل يطرش حد من اللي عنده يسير المطار بالورود ووصته على كل شي...
في المطار وبعد وصول قوم عبدالله وبعد ما خلصوا كل الاجراءات شاف راشد ريل منى اخت عبدالله لافته ويا ريال سوري مكتوب اسم عبدالله الظاهري واستغرب حتى ان عذيجه بعد شافت الاسم وقالت بصوت عالي: شوفوا مكتوب ع اللافته اسم عبدالله الظاهري؟... والريال السوري على طول من شافهم قال يمكن هم لانه الاوصاف تنطبق اللي عطتهن مريوم له تنطبق على عبدالله يعني كان لابس نظاره وهيه قالت له ما يشوف وانه معا اهله واللي اكد له انا هذا عبدالله كان انه هله اللي وياه من شافوا اسم عبدالله الظاهري استغربوا وتموا يشوفونه وتجدم صوبهم...
السوري: سلامو عليكم..
الجميع: وعليكم السلام..
السوري: لو سمحتوا بدي الاستاز عبدالله الظاهري ..
راشد وعبدالله مستغربين: ليش شو السالفه؟؟
عبدالله: انا عبدالله الظاهري خير شو السالفه؟؟
السوري: اخي عبدالله ممكن تستلم هالباقه ازا بتريد...
عبدالله: هاه باقه؟؟؟ من منو؟
راشد: اخويه لو سمحت من مين هالباقه؟؟
السوري: والله يا جماعة الخير ما بعرف بس كل ياللي بعرفو انو هاي الباقه للسيد عبدالله الظاهري وبس وقالوا لي روح المطار وسلموا اياها وخلاص...
عبدالله: اهاااااااا...خلاص مشكور اخويه ما تقصر..
راشد: لحظه شوي اخوي..
السوري: نعم اخي في حاجه ثانيه...
راشد حط ايديه في مخبا البنطلون وظهر بوكه وطلع له المجسوم..
السوري: بتشكر اخي...
عبدالله وراشد: العفو...
وسار السوري عقب ما وصل هالباقه لعبدالله اللي كان مستغرب من هالاستقبال الحلو والغريب..وكان في خاطره يعرف منو هاللي متعني ومعبل على عمره وطرش له هالباقه اللي كان في خاطره يشوفها..
عذيجه: وااااااااو محلاها من باقه..
عبدالله: شو من انواع الزهور عذووج؟؟
منى: يا ويلي عليك ما حد عندك غير عذيجه تتخبرها...معذور شو بنقول غير مسموح..
عذيجه: يالله يالغياره ...من الغياره قطعوا صبوعم يقولونلكم...
منى : لا يا اختي لا نغار ولا شي..
عذيجه: عبودي الورود هن جوري يا حبيبي والباقه اكبر باقه شفتها في حياتي وملفوفه بورق احمر رقيق و........و..لحظه في بطاقه داخل صبر بقراها..
وخذت عذيجه البطاقه وهم يمشون لين السياره وكانت تمشي ويا عبدالله شوي شوي...
عذيجه: عبود يقولون في البطاقه نورت لبلاد بوجودك واظلمت يوم عدت مب فيها....الخ
والمرسل حرف العين...عبدالله تتوقع انها العنود؟؟؟
عبدالله استغرب وانصدم واتلخبطت مشاعره حس بمشاعر غريبه: معقوله؟؟؟ لا لا ما اتوقع بعدين انا ما خبرتها متى برد ولا حتى أي ساعه فكيف هيه يعني درت؟؟
عذيجه: ما ادري ولا انا خبرتها...اقول تعال بنركب راشد يشوفنا بطرف عينه...وهات هاي الباقه عنك...
عبدالله: لا لا برايها خليها...
وساروا من مطار دبي وقبضوا خط الامارات سايرين بوظبي وراشد يسوق وعبدالله عداله يالس والباقيين ورى...وعبدالله كان حاضن الورود خلاص الحين عرف انهم من عند العنود ماحد غيرها بيسوي هالشي....
وصلوا بيتهم في السمحه وكانن خوات عبدالله واخوانه في البيت يتريون ييتهم وطبعا جنه عرس في بيت ام عبدالله كانوا صدق مغيرين وايد في بيتهم وطبعا كانن خوات ام عبدالله وبناتهن موجودات بس عبدالله شوي يلس وياهم وقالهن انه تعبان ويبا يرتاح شوي وطبعا ما قالوا له شي ونشت عذيجه وياه توديه صوب حجرته وطلعت له ثياب عشان يتسبح ويبدل عن هالقميص والبنطلون...وعقب خلته يرتاح وظهرت هيه عنه...
عبدالله كان صدق تعبان ووده يسمع صوت غناته بس كان يضغط على عمره ما يباها تتعلق فيه وايد خلاص لازم نفترق ..هاليومين انشالله بخبرهاا...
وبعد مرور تقريبا ثلاث ايام كانت العنود من يومين يالسه في المستشفى عند حرمة اخوها واليوم ردت عنها وسارت اختها شويخ ترقد عندها وكانت صدق تعبانه بس اللي مخلي هالتعب يسير عنها هوه احساسها ان عبدالله خلاص رد وهوه الحين وياها في نفس البلاد وهذا بالنسبه لها كم يسوى....ويلست اشوي ويا هلها بس نشت عقب عنهم ورمست شوي مريوم وسولفن وعقب نشت تتسبح وعقب ما خلصت سارت وقبضت تلفونها فديت روحه بتصل له...
اتصلت العنود لعبدالله...بس طول لين ما رد..واخر شي يوم يأست من انه يرد سمعت صوت خفيف..
عبدالله: الو؟
العنود وهيه متيبسه محلها من الفرحه: عب.. عبدالله؟؟
عبدالله كان يتوقعها في أي لحظه : العنود؟؟؟ مرحبا والله.
العنود: مرحبتين اكبار هلا والله باغلا انسان في حياتي ..وصدق ان البلاد نورت...ههههههه
عبدالله: ههههههه نورت بوجودكم فيها يالعنود...
العنود: اشحالك .....عبدالله؟
عبدالله وهوه حاس بترددها: بخير والحمدالله اشحالج انتي العنود؟؟
العنود وهيه تحس ببروده شوي: بخير ربي يسلمك وشحال هلك؟؟
عبدالله: يسرج حالهم وانتي شحال هلج؟؟ عساهم بخير؟؟
العنود: بخير ونعمه من يومين حرمة بطي الله يرحمه مربي...(( كانت تحس بتوتر وبغت تيب أي سالفه))
عبدالله: مبروك وشو يابت؟؟
العنود: توم ولد وبنت...
عبدالله: مبروكين انشالله وشو سميتوهم؟؟
العنود: البنت غاليه والولد سميناه على حياة ابوه بطي الله يرحمه ...
عبدالله: الحمدالله على سلامتهم وسلامة امهم...
العنود: يسلم لك غاليك يا ربي...
وبعدين سادت فترة صمت من بينهم...وما قطع الصمت الا عبدالله..
عبدالله: العنود؟؟
العنود: عونه..
عبدالله: عانج الله...ما ....ما انخطبتي بعدج؟؟
انصدمت العنود يوم سمعت عبدالله جيه يرمس: عبدالله تعرف اني موت احبك يا عبدالله ومستحيل اكون لحد غيرك...
قاطعها عبدالله وهو يحس بسجاجين تقطع قلبه: العنود ابا اقولج شي واشرح لج وضعي...
العنود: عبدالله مهما يكون اللي بتقوله صدقني انا احبك وما بتخلى عنك..
عبدالله وبدى يعصب: العنوود...سمعيني انا خلاص ما اقدر اخذج..تسمعين وكل ياللي بينا انسيه ما اقدر اخذج يا بنت الحلال...
العنود وبدت اتصيح ما توقعت في يوم من الايام عبدالله يتغير : عبدالله حرام عليك لا ترمس جيه..
عبدالله: وليش ما ارمس جيه يا بنت الحلال..انا ما انفعج واللي بييج لا تردينه...
العنود: لا يا عبدالله لا تخليني وانا بامس الحاجه لك..
عبدالله: الله لا يحيجج لحد انشالله..العنود اسمعيني انا انسان معاق..ما بتلقين سعادتج ويايه ..
العنود: حتى ولو كانت فيك بلاوي الدنيا كلها مستحيل مستحيل اتخلى عنك...
عبدالله وهو خلاص ضاقت به الدنيا: سمعيني يا بنت الناس انا ما ابا اتعسج دخيل والديج تفهمين..
العنود وهيه تقاطعه: ما ابا ما ابا انا اباك انته وبس تسمعني؟؟ والله ثم والله ما تتخلى عني..
عبدالله: لا تحلفين...
العنود بغت تغيض عبدالله: والله يا عبدالله لو انطبقت السما ع الارض ما تاخذ غيري تسمع والا شو؟؟؟ تتحراني لعبه متى ما بغيتها تاخذها ويوم تلوع جبدك منها عقيتها؟؟
عبدالله يبا يصحح الها: العنود...
العنود ما خلته يكمل: والله يا عبدالله ان ما اثبت انك ريال وييت وخطبتني ما تلوم الا نفسك...جدامك فتره بسيطه واذا ما خطبتني فيها والله اخبر الناس كلهم انك انته كنت تتصل لي وانك كنت تلاحقني يوم سرنا المارينا والله ما اخليك في حالك...
عبدالله تم منصدم من رمسة العنود كيف ادنت لهذا المستوى...
عبدالله: ما كنت اتوقع انج تتدنين لهذا المستوى..
العنود: جب ولا كلمه ما اسمح لك تغلط عليه تسمع....انا اشرف عن كل البنات بس والله ما اخليك في حالك عقب كل اللي سويته لك وانته تجازيني بهالشي...
عبدالله وهوه يحس بالقهر والاشمئزاز: بس بس من هالرمسه ما ابغي اسمع رمسه وايد راسي يعورني ابا ارقد..
العنود: ارقد ما حد يودك يالله باي...
سكرت العنود بسرعه في ويه عبدالله وهيه كانت تصيح...يا ربي معقوله تكون يا عبدالله بهاي القساوه وانا اللي مستعده اسوي كل شي عشانك ارخص الغالي عشانك وانته تجازيني بانك خلاص بتنهي كل شي بسهوله ولا ما ابيخ هالعذر ...اونه معاق...ليش يعني المعوقين مالهم حق يعيشون السعاده والاّ خلاص من وجهة نظره بيحرم نفسه من السعاده وبيحرم غيره ايحس بها؟؟؟ ليش جيه تسوي يا عبداالله...
في اليوم الرابع ظهرت اسما من المستشفى بس غاليه وبطي عيالها بعدهم في الحاضنه لانهم قاصرين وصغار وايد بس الحمدالله صحتهم زينه وكانت يوميا تسير الهم وترضعهم بما انها طلعت من عدتها بمجرد ما ربت...
وفي هالفنره كان حميد متردد شو يسوي بخصوص مريوم بس قال بحسم امري وبرمس قبل اسما وبشوف شو بيستوي بس اسما يوم شافته في بيتهاعقب ما ظهرت من المستشفى عرفت هوه ليش ياي وخذت هيه زمام الامور ورمست هيه قبل ما يرمس هوه...
اسما: حميد انا اعرف زين ما زين انته ليش ياي هنيه...
حميد وهوه مستغرب بس مبتسم شوي: تعرفين؟؟ انزين خبرني شو تعرفين؟؟
اسما: انا اعرف انك ياي علشان تقولي انك تبا تتزوجني علشان اني مخلفة اخوك ومب زين اني اتم جيه وعيالي ايتمون بلا ابو...وانك تبا تربي يعالي عقب ابوهم الله يرحمه ويغفر له...
حميد: الله يرحمه...اسما..
اسما قاطعته: حميد اسمحلي اني قاطعتك بس اباك تسمعني وتفكر في كلامي عدل..حميد انا الحمدالله ما عليه قصيره وعمي وعمتي مب مقصرين عليه في شي وانته بعد مب مقصر يعلكم انشالله طولة العمر...وعيالي ماشالله باجر بيكبرون وبيغدون رياييل وبيسدون متطلباتي ومتطلبات خواتهم...اللي بغيت اقوله يا حميد انته بعدك صغير علشان تتولى مسؤولية اسره مكونه مني ومن عيالي الخمسه...وانا مستحيل اتزوج بعد حياة بطي وما افكر في أي انسان يحل محله...بطي وبس اللي في حياتي..انته عمهم ولك حياتك وانشالله باجر بتعرس وبتيب عيال وبتفهم ليش انا ارمس جيه...وبعدين لازم اتعرف اني مهما صار بتم عندكم ومستحيل اسير أي مكان وعيالي بيربون جدام عيونكم اذا هذا اللي انتو خايفين منه...
حميد: يا اسما انا ما اعرف شو اقول...
اسما: لا تقول شي يا حميد والله يوفقك في حياتك...
حميد اول مره يبتسم من خاطره صدق صدق عقب ما توفى اخوه وحس ان الدنيا تبتسم له مره ثانيه..حس بحمل ثقيل ينزاح عن ظهره ..واخيرا بيكون هوه ومريوم مع بعض..الحين ماحد بيفرق من بينهم باذن الله...
حميد: انزين يا اسما عيل انا استأذن منج يا اسما..
اسما: ربي يحفظك يا حميد..
حميد: واللي يقول مثل..
سار حميد وخبر ابوه بكل اللي صار..
بوبطي: اصيله يا اسما والله انج اصيله..علني ما خلا ولا عدم منها..
ام بطي: فديتها والله امبونها بنت عرب حشام..
حميد: انزين يا ابويه انا عاد صدق الحين اباك تخطب لي عرب هم صدق في خاطريه من زمان بس ما رمت ارمس في ظل هالظروف اللي استوت علينا..
ام بطي: هيييه يا بو بطي ثره وليدك حاط عينه على وحده ويبا يعرس والله وكبرنا...
حميد: امايه تراج الا تعرفينها البنت ودومج تمدحينها..
ام بطي: انشالله اتكون هيه اللي في بالي اباها تكون لك...؟؟
حميد: هههههه عاد انا شدراني باللي في بالج؟؟ يالله خبريني..
ام بطي: اللي في بالي مرايم بنت بو سالم...حافظ عليها اسميها انها حشيم وذربة المعاني ماريت مثلها..فديتها والله ما تقصر نــفّـاعه..
حميد: هههههههههههه فديت هالمخ وانا اقول على منو ظاهر ثرني ظاهر على امايه اذواقنا متشابهه...ههههههههاااااي
بوبطي: وايه سودالله هالشوارب جيه وانا هب مازر عينك؟؟ اقول ام بطي ترى الريم مثل ما قلتي ما تتفوت...
حميد وهوه فرحان: ياااااااااي امايه دخيلج اتصلي فيهم وخبريهم الحين..
ام بطي: يالله بالستر يا ولديه اربز هب زين جيه..خلك ريال...
بوبطي: ثره ولدج مستلغث ومستقطع يا ام بطي...
ام بطي:ههههههههههه وعلى منو طالع في هالشي؟؟
بوبطي: هاه شو قصدج يعني؟؟ طالع عليه؟؟الله يسامحج انشالله...
ام بطي: ايه يالشيبه ثرك ما تقهر السوالف...
في بوظبي العاصمه حمد يالس يفكر في مريوم اللي شافها في مركز الغرير واللي حازت على اعجابه وقرر انه يخطبها بسرعه لانه مب قادر يشلها من باله...حمد انسان طيب وعلى نياته بس فيه عيب واحد انه بيموت على البنات بس هالمره هاي البنت الوحيده اللي تخبل عليها لدرجة الجنون..ما يذكر انه لحق أي بنت لين بيتهم وما يذكر ان أي بنت صدته من قبل بالعكس كانن يرحبن فيه بما انه وسيم وايد...حمد الى جانب هالشي غني وايد وعنده من الخير اللي يعم بلد...ماشالله عليه عند ابوه شركات في كل مكان وهو وحيد امه وابوه واللي يباه ما يقصرون فيه ولا يردونه عن شي في خاطره ..بس هم احسنوا تربيته..
واليوم قرر ايسير لبوه شركته ويصارحه باللي في باله..ابوه واهو مثل الاخوان حتى انهم عادي لو يرمسون بكل الرمسات جدام بعض...
سار حمد صوب ابوه في الشركه ويلس وياه وفاتحه في الموضوع وخبره عن كل شي استوى في المركز لين ما تبعهن ووصل لشعبيتهم...وخبره انه مستحيل ياخذ غير هالبنت..
بوحمد: بس يا حمد انته مب شايف ان اللي سويته غلط؟؟
حمد: ابويه انا استسمحت منهن بس الصراحه ماقدرت اخلي هالبنت اطير من ايدي ومستحيل حد غيري ياخذها..انا ابغيها هيه ..
بوحمد: انا ما اعرف شو بقولك بس خلنا نتخبر عن العرب..
حمد: ما يحتاي يا بويه انا روحي اتخبرت واستقصيت عنهم..وهم عرب زينين وايد والكل يمدح فيهم وفي مخوتهم..
بوحمد: عيل انا برمس امك اليوم وبنحدد يوم علشان نتصل فيهم..
حمد: لا يا بويه ما نبا نتصل ابا هالشي جيه اونه عرب نعتونا بهم...
بوحمد وهوه متردد: بس يا ولديه..
حمد: ابويه دخيلك الغالي لا تردلي هالطلب فديت خشمك...
بوحمد وعقب ما ابتسم: فديتك يا ولديه وانا اقدر ارفض لك طلب ؟؟انته لو تبا عيوني ما يغلن عليك..
حمد: يسلمن عيونك يا بويه...الحين بقوم اسير عاد تراني مواعد الربع اليوم نسير صوب مركز المارينا...
بوحمد: ربي يحفظك يا ولديه بس هالله هالله في السواقه العدله...
حمد: اوكي يا بويه لا تخاف انشالله ما اسرع ولا ازيد عن ال100...ههههههه
بوحمد: خلاص عليك الرب حافظ...
ونش حمد وحب ابوه على راسه: اشوفك على خير يالغالي..
وسار حمد من عند ابوه وهو مستانس وفرحان انه ابوه ما عارض له هالطلب...</font></strong>
</font></font></p></font>
رد مع اقتباس
مواقع النشر (المفضلة)