<font color='#000000'>

<font face=arial,verdana color=#996699 size=3>تكملة الجزء الواحد والعشرين:

عقب ما تحوطن العنود ومريومه وخلصن حاياتهن اللي يبنها نزلت تحت عند باسكن روبنز في الغرير وخذن كل وحده ايس كريم وطبعا كان في المحل شباب اثنينه بعد يطلبون ايس كريم بس من شافوهن شوي قاموا عشان ياخذن اللي يبنه...العنود طبعا كانت تصاصر مريومه عشان تطلب الهن ايس كريم...ومريومه كانت في خاطرها خايفه شوي لان الشباب عدالهم وخافت تنقع في الرمسه والشباب يضحكون عليها...

مريوم: excuse me i want to order for 2 ice cream one stawberay and another faneila and plz with souce and nets….

الفلبيني: ok mam just wait 1 mint plz

مريوم: ok thanks..

الفلبيني: ur welcome mam…

سارن العنود ومريوم ييلسن على الكراسي وعقب طلبوا الشباب كل واحد ايس كريم وطبعا نفس طلب مريوم والعنود...حتى ان مريوم والعنود تفاجأن بهاي الحركه ...المهم يلسوا الشباب على الكراسي بس بعيد شوي عن قوم العنود بس تموا شوي حركات طبعا ..

واحد من الشباب واسمه حمد يلس يقصد غنية جمعه بن نايم: يا ورد وش يقربلك الخد..لي صاحبه يقطفك بيديه ..شد انتباهي للشبه شد..يا ورد شللي منك تعطيه..يا ورد له عين وله قد..وله طول معا خصر يحليه...(( وكان ميت يطالع هالغزالتين اللي يتشابهن ))

وهني نشن العنود ومريوم بسرعه ياخذن الطلبه وهن مسويات عمارهن متجاهلات هالقصيد اللي يالس ويعده عليهن ...

خذن الطلبيه وطلعن بسرعه برع المحل بس حمد نش بسرعه ورى العنود ومريوم وهن كانن زايغات من هالشباب شبلاهم جيه...
مشن ومشن وكانن عدال السلم المتحرك اللي يودي فوق وهناك شافت مريوم ان حمد وربيعه مصخوها زياده عن اللزوم واصطنت مكانها من الضيجه...وصدت عليهم..

مريوم: بخبركم عاد انتو ما تستحون؟؟

ربيع حمد: ليش؟؟؟ حرام عليج ما سوينا شي...

مريوم: بخبرك عن الملاغه الزايده والله لو كانن خواتك ما ترضى عليهن ...وعيب عليكم هالحركات يا اخي عدونا خواتكم..

والعنود من صوب اتيرها عشان ما تسوي فضيحه: دخيلج انسير مريوم...

مريوم: شو هالحاله فقدت هالويوه...

وحمد تم ساكت مريوم عيبته بدرجه فضيعه لانها هزبتهم وهو ما كان يتوقع انها بتهزبهم...

ربيع حمد: معقوله هالجمال يطلع من ثمه حمم براكانيه..هبي هبيتي يا بويه...حمد بويه انسير هاذيلا ما ينعطن ويه...

مريوم صدق اتضيجت: بخبرك عاد والله احنا ما قلنا الكم الحقونا وتعالوا ورانا ولا ....

حمد قاطعها: اسفين والله اسفين تقبلي اعتذاري يا اختي...والله انج بنت اصول..

مريوم صخت مكانها: مسموح

صدت ع العنود: انسير يالله...

وسارن صوب البوابه الرئيسيه وطلعن وركبن سايرتهن اللي ما كانت مخفيه واايد يعني كانن مبينات...وطبعا عقب ما ريوس الدريول بالسياره يت السياره عدال البوابه الرئيسيه علشان يااخذون السيد وطبعا عند البوابه كان حمد وربيعه وطبعا حمد ما خلا هالفرصه اتضيع من ايده وعلى طول ركب سيارته البي ام دبليو الفضيه وعلى طول وراهم لانه كان بس يبغي يعرف وين بيت قوم مريوم...

وطول الطريج ماكانن يدرن انه في سياره تلحقهن ...خطفن على مجطة بترول وحلفت مريوم انها تصب بترول في سيارة قوم العنود على حسابها وردن على طول بيت مريوم وكانت الساعه 8 وثلث ...وطبعا حولت مريوم وحمد كان وراهن بس بعيد ومن شاف مريوم حولت ريوس بسيارة ورد لف وسار مادام عرف البيت ورقمه خلاص عيل...وكملت العنود سارت صوب بيتهم اللي عدال بيت مريوم بس مب في نفس الشارع...

وصلت العنود ولقت ابوها وامها في الصاله واخوها حميد وسلمت على الكل وسارت داخل حجرتها وحطت الاغراض ويلست تفرز اغراضها عن اغراض اسما وعقب شوي دخل عليها حميد في الحجره وهيه اتحط اغراض اسما والبيبي في اكياس علشان تسير اتوديهن صوبها ..

حميد: هاه بنت محمد ماشالله عليج شو هاالاغراض كلهن ؟؟؟ شي خلتي في السوق ما خميتيه؟

العنود: ههههه والله يا ولد محمد هاذيلا الاغراض الا حق اسما وبيبيها...تعرف ما تقدر تسير تشتري لعمرها...

حميد: هيه زين وراوينا شو اشتريتي عيل ...

العنود: صبر بطلع لك اللي اشتريته حق البيبي...

وطلعت العنود كل الثياب اللي اشترتهن للبيبي...

حميد : ماشالله شو هالذوق يا بنت محمد..معقوله انتي ذويقه جذيه؟؟؟؟

العنود تبا تغيظه: لا فديتك كل هالاشياء مريوم متنقيتنهن وانا متنقيه بس الفوانيل...

حميد وهو مرتبك شوي: مريوم؟؟؟ هيه ماشالله ذويقه...

العنود: اكيد...الا حميد ما خبرتك؟؟؟

حميد: لا ما خبرتيني ...شوه بعد عندج انتي يا ام قرافين

العنود: زين يا حميدان...قول مبروك....

حميد: ليش انخطبتي وانا ما ادري؟

العنود: لا مب انا اختي الغاليه مريوم انخطبت لواحد شو ......يعق الطير من السما ...سولعي وظبياني و...

قاطعها حميد وهو حاز في نفسه: صدق؟؟؟

العنود تبا تقهره اكثر: هيه عيل اقص عليك انا..انزين خلني اكمل لك....وشو يا ربي؟؟ هيه يالله يا حميد يدرس في فرنسا بعد وعنده جواز دبلوماسي..يا حظج يا مريماتي والله صبرت ونالت.

حميد وهو متغصص ويحس بريجه ناشف ومنزل عيونه تحت: الله....الله يهنيها

العنود: امييييييييين ويهنيك يا ربباللي في بالك....

نش حميد وهو يحس انه في صيحه خلاص مريوم طارت منه عشان جيه ما ترمسه ولا تسويله سالفه...يا نحس بختك يا حميد...سار حميد وركب سيارته وكان في خاطره يتصل الها بس قال لا انا ما بذل نفسي...وما حس بعمره الا مطرش الها قصيده فويس مسج هوه يقصدها عليها:

طلبتك بس لو تسمح
تناسى غلطتي واسمح
ترى والله مب قصدي
اكدر خاطرك واجرح
انا احبك انا اغليك
انا كلي متيم فيك
يا كيف ازعلك مني
وانا اللي همي بس اراضيك
تأكد اني ما اقدر
على بعدك ولا اصبر
اذا تبعد انا بجيك
واذا تزعل انا اتكدر
اوقع واعترف وابصم
بأنك في عروقي الدم
وفي كوني وتكويني
حبيبي حبك الاهم
تقبل بالغلا عذري
جرحتك دون ما ادري
وانت تدري بقلبي
غلاك كبيريا عمري

خلاص حميد وصل حده واعلن استسلامه ما يقدر يجاري مشاعره واحاسيسه ولا يقدر يكتم كل حبه لمريوم..اللي مستحيل بالنسبه له انه مستحيل مريوم تكون لحد غيره...ومن سابع المستحيلات..
صدق ان العنود قدرت تحقق اللي مريوم تباه من زمان واخيرا بس مجرد هالكلام هز كيانه وهالكلام كان مب حقيقي...يعني كانت العنود تجذب على حميد بس علشان يفكر ويعرف زين شو اللي يالس يسويه...لازم يتخذ قرار يكون في صالحه..ليش يضحي بحبه هوه ومريوم علشان ياخذ حرمة اخوه؟؟ ليش واسما اصلا من سابع المستحيلات انها تاخذ واحد عقب حياة بطي الله يرحمه؟؟ اصلا اسما كانت رافضه الفكره هاي من اساسها وكانت تتريا تطلع بس من عدتها علشان تقول حق حميد انها اصلا مستحيل تفكر في العرس عقب بطي وانها بتعيش وياهم صح في بيتها هيه وبتربيا عيالها جدامهم وانها اصلا ما بتلقى احسن من عمها وعمتها يكونون بمثابة الاب والام الها...وهيه مستحيل تربي عيالها الا جدام يدودتهم...
كانت العنود تدري بهالشي بس قالت لاسما انها يوم بتطلع من العده تتفاهم ويا حميد على هواها..

في السياره وحميد حالته حاله وما يدري وين يسير ...سار ويلس على عرقوب جريب من شعبيتهم وكان الجو حلو ولطيف..بس هوه كان حزين ويندب حظه وحاول يتصل في مريوم اكثر عن مره بس هيه ما ترد عليه ..اخر مره طرش الها مسج..
(( مريوم دخيل والديج تردين عليه والله ما تسمعين صوتي اذا ما رديتي..تراني بدعي على عمري انه الله ينفدني))

مريوم من قرت هالمسج بغت تموت كانت تبغي تحرق اعصابه كانت تدري بالسالفه اللي خبرتها بها العنود بس كانت تبغي تقهره..اخر شي ما قدرت تستحمل بس اللي صدق حز في قلبها يوم طرش هالمسج وعلى طول اتصلت له...
اول مره تتصل له من عقب غياب شهر وشي على هالانقطاع حتى انه يوم اتصلت فيه وشاف اسم بو زايد تخبل ..كان قبل يوم تتصل له يترياها تسكر وعقب يرد يتصل عليها اما الحين لا اول مره يرد عليها من لهفته وبسرعه..

حميد: الوو

مريوم وهيه تحاول تسوي عمرها بارده: نعم.؟؟

حميد: مريوم؟؟ ليش جيه تكلميني؟؟

مريوم: اخويه شو تبا؟؟؟

حميد وهو منصدم: لا لا ما اصدق انج انتي جيه ترمسيني...وين كلامج وعواطفج انتي الحنونه الوحيده اللي حسستني بالحب؟؟

مريوم: جتلتها يا حميد..جتلتها..

حميد: لا لا تقولين هالرمسه حرام عليج..والله بموت..

مريوم بخوف: لا يا حميد هب ترمس جيه تراك تذبحني..

حميد: صدق؟؟؟

مريوم: صدق شوه؟؟

حميد: انج بتعرسين؟؟

مريوم: هيه بعد شو؟؟ مب انته اللي قلت لي انه في مليون واحد يتريا بس اشاره مني ؟؟ مب انته اللي قلت لي انك بتاخذ حرمة اخوك وبتربي عيال اخوك؟؟

حميد: دخيلج ارفضيه يا مريوم...ارفضيه

مريوم: وبعدين يعني؟؟ وعقب ما ارفضه؟؟ بتتقدم لي حضرتك؟؟

حميد تم ساكت....

مريوم: هاه شفت ؟؟ ما بتاخذني قيس ما اتعب عمري واترياك ع الفاضي...سير بويه سير خذ حرمة اخوك ورب عيالها..

حميد: مريوم حرام عليج ...لا ترمسين جيه ..ليش جيه غديتي قاسيه؟؟؟

مريوم: الايام خلتني قاسيه...المهم شي في خاطرك راسي يعورني وابا ارقد ..باجر بيونا العرب رسمي يخطبوني...

حميد وهو فاج عيونه: تجذبين؟؟؟ قولي والله؟؟ والله ما تعرسين الا على موتي..

مريوم: حميييييييييد وبعدين وياك انته ورمساتك؟ شو يعني بتخليني اعنس وانته تستمتع بحياتك؟؟

حميد: ما شي عرس تفهمين...

مريوم: كيف منوه؟

حميد: كيفي انا...وهذا الظبياني ما بتاخذينه...

مريوم: مستعده ارفض بس على شرط...

حميد: شو هوه ؟؟

مريوم: تي باجر وتخطبني رسمي من هليه...غير جيه ما ارضى بحل ..ويالله باي

وسكرت مريوم عقب ما حطت حميد في الامر الواقع...


هاذيج الليله اتصل عبدالله حق العنود وطبعا هالمره روحه لانه خلاص يروم يمشي بنفسه وخلاص اتعود وعود نفسه على فكرة انه ما بيشوف مول..وكان يخبرها انه بيرد جريب وانه الحمدالله بخير وسهاله وكان يسولف وياها شوي وما يطول وياها اكثر عن خمس دقايق..
لدرجة انه العنود تنقهر من هالشي وتترجاه ما يسكر عنها..
حتى انه ما قام يقولها الكلام اللي متعوده تسمعه من حبيبها وغناة عيونها اللي طال انتظارها له والي مهما طال ابتعاده عنها بعد بتم تترياه...

وعقب ما رجع غرفته كانت عذيجه في غرفته...

عذيجه: هلا والله ومرحبا الساع بالغالي

عبدالله: هلا عذيجه...

كان عبدالله حاس بضيج وقلبه يعوره انه قام يغير طريقة تعامله ويا العنود...يدري انها ما تستاهل وهوه اصلا يحبها بس مستحيل يخليها تفكر فيه على اساس انه بيكون الريال اللي بتعيش وياه طول عمرها ..ما يباها تعيش في هم وغم...ما يبا يعذبها وهو انسان عاجز كانت مليون فكره وفكره اتدور في راسه...خلاص مستحيل ايكون من نصيبها مستحيل ايكونون لبعض ..كان في باله بعض التصورات عن حياتهم ...اكيد بتكون مرتاحه في البدايه لانها خذت اللي تحبه ...بس بعدين بتتأفف وبيضيج بالها..بتتندم انها خذت واحد ما يشوف ما يقدر يحوطها وما يقدر يشوفها اصلا...انسان ما يقدر ايراويها أي شي في بلاده ويشرح الها عن كل شي وهم في فترة العسل...لا لا خلاص قرر قرار نهائي يوم بيوصل بلاده بيواجهها بالحقيقه اللي ما قدر ايقولها اياها في المانيا...لازم ايقولها انه اعمي ما يشوف ولازم يحط حد لعلاقتهم..

عذيجه: عبدالله حووه وين سرحت.؟؟؟

عبدالله وهوه يتنهد: اه يا قلبي يا عذيجه لو تدرين ما بي من هموم جان عذرتيني...

عذيجه: بسم الله عليك يا خويه...شو فيك؟؟

عبدالله: يوم بنرد البلاد بخبرج...وهانت ما بقى غير يومين...

عذيجه: يالله يا عبدالله اسميني متولهه موت على الامارات وخاصة السمحه فديتها والله...



انتظروني في الجزء الثاني والعشرين والاخير...
الابيات للشاعر احمد بن هويدن</font></p></font>