<font color='#000000'>لي خمس سنين وانا نومي غير طبيعي يعني مرة انوم انا اطالع التلفزيون ومرة انوم
على السرير بالعرض ومرة انوم وانا اكل ومرة ومرة...واذا جا الصبح تصحيني امي
بالتليفون او ترسل لي الشغاله(عيب لاتفكرون كذا معها كوب الحليب)الا في هذا
الصباح صحيت على صراخ وطق ودز وصراخ ولاهو صوت امي ولاصوت شغالتنا ولاصوت واحد
من عايلتنا حتى وافتح عيوني المغمصة والا اربع عسكريين (ماعرف شي في الرتب
العسكرية)
المهم هذا يجرني من يدي وهذا يشد شعري وذا يشدني من رجلي بغى يسحب السروال الى
ان فزيت بعد كل ذا وما افز وانا اسئل وش فيه والا رئيسهم يقول اسكت بس وتعال
معنا يالله هناك تعرف والجيزاني اللي فيهم يقول امشي كوذي وانا اتلصق في الارض
وش السالفه وامي تصيح واخواني الاثنين المتزوجين يتفرجون ساكتين واحد منهم يقول
للثاني جهاز اوربت لي والكمبيوتر لك
وابوي يترجاهم –العسكريين-على الاقل يلبس ثوب الخروج وشماغه (ياهوووه يايبه
ياابرستيج انتا ايش هالثقة كلها ...هذا اللي قدرك الله عليه ...كلامي)والشغاله
ياحياتي بكوب الحليب وتسئلني ايس يبي على غدا متفائلة صح المهم بعد مالبست
الثوب الابيض وخذيت شماغي رجعوا يجرجرون فيني
ساعتها ابليس لعب في راسي راح تفكيري على موقعي وقلت لروحي الله ياخذ الساعه
اللي فكرت اسوي فيها موقع وش فيه موقع كله لينكات يعني الا اتفلسف واحكي في
مواضيع اكبر مني وانتقد مالت علي واتخيل ذاك الجيب الاحمر(المباحث العسكريه)ولا
الفان الاسود(من وراء الشمس)ولا اطلع معهم واشوف ذاااك ذااااك ذااك
شوقتكم صح ماعلينا اشوف ذاك الاتوبيس المليان شباب على اخره مو معقوله ان ذولي
اصحاب مواقع ارتحت شوي واطمئنيت وقلت لنفسي حشر مع الجماعه عيد....ركبت
الاتوبيس بالدف والطق والتشويت.
وطول ماحنا في الاتوبيس نسئلهم وش السالفه وش القصة وش سووينا الا ان شفنا
اتوبيس ثاني معبا شباب زينا واتوبيس ثالث ومسكنا طريق ديراب واحد يتفلسف قال
شكلهم بيطبقون التجنيد الاجباري ساعتها ولد دبي ربي يخلييه لاهله اسمه نايف قال
لهم انا واحيد امي وابوي والا يشوته العسكري مع بطنه انقلع هناك يالله بس
نايف ماسكت سوا حركة حلوة قال لهم مافي شي اكله جوعان والله قال له رئيسهم
(كل...........)كل واحد وذوقه يفسرها المهم الساعة الاولى انتهت وانتهى الخوف
معها وبدت السواليف شفت شلة شباب كويحات(عبندة=سوووود)بدوا يطبلون ويغنون
اخووكم مااصدق خبر خش معهم جو وغنينا كل الاغاني
لنا الله زنجبار ودلووعه ماخلينا اغنية في بالنا الا غنينااااها والا توقف
الاتوبيسات عند ارض فاضيه مسوورة بسوور شبك ونزلونا فيها ارض فاضيه مافيها شي
الا خيام كبيرة وطاولات عليها اكل وموية والا يطمر نايف كما الفهد في سرعته
لايسبقه أي شي ....المهم تقريبا وصل 55 اتوبيس كلهم محملين شباب.
وبعد نص ساعه طلع لنا واحد عسكري ذو جسم رياضي (مكرش )باين عليه ان رتبته
العسكريه عاليه طق الكل له تحية عسكريه تقدم الصفوف ومسك مايكروفون قديييم من
حقات العروووس القديمة وبدا يتكلم اول شي ماكنا نسمع وش يقول وبدينا نصارخ
عليييه صوت ..صوت ..صوت
ورفع صوته وقال(كلكم مايعرف ليش احنا جبناكم هنا لاتخافون مو علشان فضايحكم
وبلاويكم وكل اللي كنتم تسوونه ...لا بس نظرا لان مجلس الوزراء قرر السماح
للمرأة بقيادة السيارة وللحفاظ على الامن تم وضع خطة لتنظيم هذه العملية قررت
وزارة الداخلية اعتقال جميع الشباب العزاب لمدة اسبوع ولاتخافون راح تلقون هنا
كرم الضيافة ونرجو الالتزام بالقواعد والتعاون معنا...
ولكم الحق في استخدام جوالاتكم او التليفونات الموجودة هنا للاتصال على
ذويكم)هو قال هالكلمتين وقلنا كلنا بصووت واحد يااهووووووووه مااقصرت المهم طلع
نايف قال ياحضرة الضابط (خسف بالتاج والنجوم اللي على كتفه) ممكن تجيبون لنا
كنتاكي وهارديز وبرجر –اووتش طمب-طاحوا طق هالضعيف قبل مايكمل .......ماعلينا
كل راح يكلم اهله دقيت على بيتنا رد علي ابوي يبه خل امي تجهز لي شوية ملابس
وخل واحد من اخواني يوصلها لي ما امداني اكمل كلامي الا سمعت ابوي يبكي
قال امك من الصبح يوم سمعت بالقرار خذت موتري وتوها طالعه به الاتصدم بموتر مرة
الجيران وسلموا على بعض ورجعت امك خذت سيارتك الكراون فيكتوريا ...قلت نعم نعم
نعم ليه تاخذ سيارتي قال ابوي قالت لي بروووح اتمشى يكفي كبت 30 سنة قلت له طيب
ليه ماخذت سيارة واحد من اخواني والا اسمع صوت اثنين يجرون البكوة جنب ابوي قلت
عندك ضيوف قال ابوي ذووولي اخوانك حريمهم خذوا سيارتهم وطلعوا من الصبح ولا
رجعوا الى الان –كان وقت صلاة العصر-واسكر السماعه وانا منصدم
والا واحد ماصل ولد نعمه كان يدرس معي بالثانوي اسمه فواز يناظرني ويضحك ويطلع
جواله ويدق على رقم تطلع رسمة قلب على الجهاز معه (يعني خويته)ويتمتم بموسيقى
ماصله زيه وشوي ولاحد يرد وينتظر وينتظر اخرتها رد صوت ناعم (نعم )رد عليها
حياتي قالت له مشغولة مشغولة يووه انت ماتفهم وتسكر السماعه في وجهه والله اللي
انا فطست من الضحك عليه...مشى وقال بروح اخذ لي سندويتشه وانا اضحك عليييييه
مرت سنة (مو اغنية محمد عبده)قصدي مر اسبوع كانه سنة عايشين على سندويتشات وفي
الليل يعطرنا نايف وثله من ذوي الاوزان الثقيله بروائع العطور الفرنسية
.....المهم جمعونا للافراج ويرجع لنا ذاك المكرش ماغيره وبمايكرفونه الاولاني
ويقول(قبل مانطلعكم بنقول لكم لوائح القيادة اللي تغيرت وذالك لمراعاة السماح
للمراة بقيادة السيارات:
اولا:أي تعرض لفتاة تقود مركبة (مركبة زي ماترد في نشرات دله) مهما كانت كيفية
التعرض يعني حد او تكبيس او شربكة بالبوري على قولة اهل الخليج الهرن او
بالترقيم فعقوبتها غرامة 5000 الاف ريال وسجن شهر.
ثانيا:المسار الايمن للرجال والايسر للنساء والاوسط يترك فارغا الا اذا ارادات
امراة تجاوز امراة ثانيه اما الرجال لايحق لهم ذالك علشان لايقربون من المحارم
ثالثا:في حالة تعطل او بنشر كفر سيارة امراة وحب رجل ان يفزع لها فعليه ان يوقف
سيارته بعيد عن سيارتها بمية متر ويحط اللطمة قبل ان يقترب منها.
رابعا:احقية المرور في الدوارات اصبحت للنساء مو للي في الدوار
خامسا:على المراة نص عقوبات الرجال في كل شي وللعسكري حرية الغاء اعطاء
المخالفة للمراة بس اما على الرجال فيلزمهم.
سادسا :طريق الامير عبدالله وشارع التخصصي وشارع الثلاثين يومي الخميس والجمعه
للعوائل يعني يارجال وزوجته او نساء فقط.وياويل شاب يدخل هناك.
وطلعونا وركبنا الاتوبيسات اللي ماقصرت نزلتنا في معارض الشفا وقالوا كملو انتم
الباقي اللي خذ ليموزين واللي ركب اتوبيسات خط البلدة واللي كملها مشي المهم
رجعت للبيت وانا اغني راجع بشوقي ولهفتي لبيتي وسيارتي وانا اتوقع ان امي
بتنتظرني بالاحضان والدموع ايه هين يالدموع وادخل البيت الا والكراون فيكتوريا
مليانه حكات مع الجنب صرخت وش ذا وتطلع امي واجي بانط في حضنها والا تقول لي
تخبر ورشة زينة
قلت يمه وش سوا بالسيارة كذا قالت يوووه اسمع الكلام بس قلت خلاص بكرة وبعد
بكره برووح بسيارتي للجامعه والاتهب فيني امي ايش ايش سمعني سيارتك اسمع
الكراون فيكتوريا هذي لي لين ابوك يعقل ويشتري لي سيارة ولااي سيارة بعد يا
فياجرا يا بي ام وان مرة مرة لينكولن قلت يمه طيب من يوديني للجامعه بكرة قالت
لي الوانيت اللي برا وش ناقصة ولاانشالله تبيني اخذه علشان تتطنز علي ام مساعد
وام عبدالرحمن
قلت لها بس هذا وانيت موديل 78 بركة فيه انه ما انقرص ولاتبخر من حرارة الشمس
قالت امي وصلك الكلام بس....قلت باخذ سيارة واحد من اخواني قالت اخوانك قسموا
مواعيد السيارة بينهم وبين زوجاتهم ياقلبي يازجاتهم مثل حالاتي.
المهم زي العادة.......رضخت للامر الواقع وخذيت مفاتيح الوانيت واصبح الصبح
الجميل واركب الوانيت وبعد ساعة من المفاوضات قرر الوانيت انه يشتغل واروح به
على اقرب محطة بنزين واقول للهندي عبي فل الا وتجي جنبي سيارة صني فيها بنتين
خبز بر-يعني كويحات او سوود اللي يريحكم- واحدة تسوق والاخرى مرتزة جنبها وانا
اطالع للمحل اللي وراهم وتجلس واحدة فيهم تطالع فيني شوقوني لايام الترقيم بس
من يرقم كويحات وبوانيت بعد
الا تنزل البنت النافذة وتقول لي لو سمحت قلت هلا واللي في خاطري اقول لها لعنه
وش تبييين قالت معك 50 ريال قلت خير على بالي طرارة متطورة قالت لي نسيت جزداني
عبده وتقول جزداني شنطة ويخب عليك قلت مامعي الا مية ريال 50 للبنزين الرخيص
وخمسين مصروف اكلي في الجامعه قالت لي بنزرة يعني ماراح تعطيني قلت لها لاوالله
اسف قالت كذا قلت كذا الا وتلفت الثانية علي قالت الظاهر انك ماسمعت بقانون
التعرض
قلت الا قالت تهقا الحين اننا نصارخ ونتهمك انك تعرضت لنا قلت انااااااااااا
قالوا ايه قلت بس بس قالت الاولى هاه تجيب الخمسين ولالا توني باقول ايه غصب عن
ابو اللي جابني وتقول لها الثانية وش خمسينه قولي المية يالله هات المية قلت
طيب وبنزين سيارتي من يدفع حقه قالت ماعلينا منك بتجيب ولا شلون قلت لاخلاص
امسكوا ورهنت ساعتي كضمان للهندي لين اجيب ثمن البنزين ومشيت للجامعه ووصلت الى
مبنى كلية الطب ورحت للمواقف الوسييييييييييعه المظلله اللي محاااطة بالاشجار
وتووني بادخل
الا طابور من السكيرتي هبوا فينيي هناااك ابعد ورى ورى (وين نرقص في عرس)حسبت
ضيف كبير بيزور الكلية نزلت نافذة الوانيت بيدي وقلت له خير وش فيه قال الصفوف
العشر الامامية للطالبات بس والخلفية الخمس للطلاب والطالبات قلت له بس الطلاب
اكثر عدد قال ان مارحت كلبشنا سيارتك قلت لهم لاوش عليه خلاص وادور لي موقف ورى
وزجمة وسيارات لاصقة في بعض وتوني نازل من سيارتي اغني (ارفع راسك انت
سعودي)والا اسمع ذاك الصوت(نييييييييييييئ)
والتفت الا بدوية معها صالون صحن فتحت باب سيارتها بقوة وحك بباب سيارتي وطلع
مخش وش كبره توني باصرخ فيها وجع تذكرت القانون ونقطة التعرض قلت الله يعوض
وبامشي الاتناديني ياورع ياورع قلت تناديني قالت هو به غيرك هنا قلت خير قالت
وش بك توقف سيارتك كذا عند الحريم قلت لها الله يصلحك مواقف الحريم على قولتك
قدام قالت اترك هالهرجة الان وشلون بتزين سيارتي ولا اشتكيك عند المرور قلت
تشتكيني!!!!!
قالت ايه المهم تعوذت من ابليس كتبت لها رقم بطاقتي وتليفون بيتنا وجوال امي
وقلت صلحي سيارتك وانا ادفع لك بعدين توني ماناوله الورقة الا وينطوون على
السكيورتي صدناه صدناه صدناه تعرض تعرض تعرض شهر سجن وغرامة يابن الحلال وش
تعرصه تعوذوا من ابليس انا باغازل هذي وما امداني اقول هذي الاوهدت فيني
البدوية وش فيها هذي وجع يخلخل عظامك ويقطع اصلك ياقليل الادب والحيا ايه
ياحضرة الضابط
قلت أي ضابط هذا سكيورتي مو ضابط وانا قلت كذا ومادريت الا هالسكيورتي تشاقلوني
وجرجوني الى مكتب العميد وتلفقت القصة على اني ملاحق البدوية من الدايري
ولازّ(ملصق) سيارتي بسيارتها في المواقف وبعدين رقمتها ويوم حاولوا الضباط قصدي
السكيورتي نصحي ولا اعتدي عليهم واشتم في الكلية والعميد .........حصلت بعد كل
هذا على انذار و توقيف عن الكلية اسبوع وفوق كل ذا الزمووني اصلح سيارتها
وتوقيف في المرور اسبوع مع الشفقة
وفعلا قضيت اسبوع ولا اروع في توقيف الناصريه قابلت خلال ذيك الفترة مجموعه من
الوجوه الشابه التي لم تستوعب القوانين الجيدة المهم بعد ما مر الاسبوع مرني
زميلي واخذني من الناصريه وجلس يهدي فيني وقال ولايهمك يابو سعود باعشيك في
المطعم الفلاني (لو قلت اسمه صارت دعاية) في الملز قلت له بتهكم حي القطاوة قال
لي ايه وفعلا رحنا الملز ملتزمين بالمسارالايمن وماشين بشويش والطريق كان فاضي
وفي سيارة كاديلاك على المسار الايسر (يعني بنت)
والا فجاة تلف علينا بكل قوتها مو حد لفت علينا ماكان عند خويي الا انه يلف الى
اليمين زيادة وتخش سيارتنا في الزباله الكبيرة الله من ايقاف لزبالة وياقلبي
تصبر وبين اه وايه واووووه والاتنزل البنت وهي متحمسة الحمدلله ماصار شي –بس وش
هي من بنت جرح يمشي-شفتها مقبله صوبنا قلت لخويي بعد ارفع صوتك تميوت والا تبعد
عنا وتشوف قطوة تقول الحمدلله يا بوسي اني ماصدمتك مرة ثانية انتبهي وانتي
تقطعين الشارع وتشيله وتحطها على الرصيف الثاني وتركب سيارتها وتمشي
قال لي خويي عبدالعزيز بوسي مو زوجة نور الشريف قلت له الا قال طيب ليه شكلها
كذا قلت له هذا المكياج ومايسوي وجلسنا ربع ساعة ننضف انفسنا من الزباله
والجروح الدامية في كل جزء من اجزاء جسمنا جا راعي كابريس ولد حلال شالنا لاقرب
مستشفى وضمدونا من الوجع نسينا الاكل وحطني زميلي في البيت ولاجت الساعة 12
منتصف الليل ويقرصني الجوع بزوود قلت ياولد مالك الا الكراون فيكتوريا دام امك
نايمة ولاعندها عرس الليلة واخذ المفاتيح الاحتياط الي عندي
واطمر بسيارتي للتخصصي ابي اتعشى في مطعم وارجع ايام من عمري مضت ولاتوني واصل
الاوذاك التفتيش و على يساري بنية متلثمة معها هوندا 99 ويسئلها الضابط رخصتك
ياقمر قالت نسيتهاا آسفه قال لها وابتسامته شاقة وجهه عادي تصير كثير طيب
الاستمارة ياعيوني قالت لها يوووه بعد آسفة هذي سيارة ابوي وابوي ماخذ
الاستمارة رد عليها هههههههه الابهات دايم كذا اخس عسكري اسمه فيحان ويقول
الابهات
المهم قال طيب يا ام احلى عيون شفتها في حياتي معك أي اثبات للشخصيه قالت له
تصدق (بنعووووووووومة)رد وهو خار تماما هلاااااا قلت ابوي توه مارضى يطلع لي
ابوي متخلف مررررة مو قال لها مووووين والله ياعيووني كان ودي لقانا يطول بس
اخاف اعطلك قالت له ايه انا مواعدة زميلاتي بنتعشى في المطعم.....قال لها ياليت
بعد ماتتعشين تمرين وتقوليين لي بس هاي يا خالد قالت انت خالد ولا فيحان
رد عليها فيحان اسم الشهره ردت عليها بضحكة جنان على العموم خالد ولافيحان كلهم
حلويين اما على اني امرك باحاول انشالله بس ما اضمن لك ....ودقت سلف وفيحان قلب
رشدي اباظه يلوح لها مع السلامة يا احلى عيون الا وش اسمك ماقلتي لي والبنت
دعست انا كنت بعدها طلعت الاستمارة والرخصة وبطاقة الاحوال وقلت تفضل طال عمرك
ولاهو يمي السيد فيحان يانقيب يا لواء المهم مدري وش اللي خلاني انقهر واضرب
بيدي على البوري(المنبه-الهرن) وطلع صووت طااط وينرعب فيحان ويبدا بالتهزيء
نعم خير وش تبي احترم نفسك وانا اعتذر له وقدمت له الاوراق قال صف على جنب قلت
له خير قال صف بعدين اعلمك اجل خير المهم صفيت على جنب وبعد مالطعني عشر دقايق
جاني قال ماتدري ان المرور من شارع التخصصي ممنوع على الشباب ولاماتقرى قرارات
وبيانات وزارة الداخلية قلت الا طال عمرك بس القرار يقول قبل الساعة 12 وانا
الان الساعة 2 ونص الفجر قام فيحان يتلعثم وقال بس ولو انا وش يضمن لي انك
ماكنت تدور قبل الساعة 12
المهم اكتشفت ان الشرح للوح اصرف من الشرح له وبعد نص ساعة اقنع فيه قرر ان
يسمح لي ان امشي ومشيت ونصيت مطعم ....... ورحت مع شباك طلبات السيارات ولا 3
دقايق مو جا دووري الا شدووني من علباي(العلبا = اعلى الياقة في الثوب) صدناك
صدناك صدناك والتفت الا اربعه من رجال الهيئه معهم عسكري فيه نوم صاف بعييد لو
مالبسه كان حسبته سواق ماسكينه قلت خير وش صار وليه صايديني قال يعني ماتدري
انت ووجهك
قلت له لا بس ايش وش سويت ...يعني داخل هنا وملاحق سيارات البنات قلت لا ياشيخ
الله (طالب ثانوي او متوسط واقول له ياشيخ حسبي على اللي مسكهم صوالين)هذا شباك
طلبات السيارات جزاك الله خير قال اكبرهم ايه وماتدري ياخوي انه صدر قرار من
الامارة بمنع الشباب من الطلب بالسيارة قلت له والله ماعندي خبر قال اوه اسفين
طال عمرك المفروض مبلغينك شخصيا بالقرار ولاياخذون رايك فيه قلت لالالا مو كذا
بس انا وش يدريني
قال المهم بلا كثرة حكي تطلع سيارتك الان ابتسمت ابتسامه صفرا قلت الله يرضى لي
عليك ماقدامي الا سيارة ووراي سيارتين يعني اصبروا وتجملوا وعدوها غلطة سفيه
ثانيا انا والله جوعان ماكلت شي ومابقى على الفجر الاربع ساعه قالوا ابدا
تطلعها يعني تطلعها ومن ورى بعد وفعلا طلعت سيارتي وحككت بالجدران وماعلينا
ياقلبي المسكين وفيما جلست زي انسان مغلوب على امره اتحسر على سيارتي الا واذن
الفجر وطار العشا ةالجوع يزداد
ويالله يابطني سرينا ضاقت الدنيا علينا ورجعت للبيت وانا احاول ازرع البسمة على
خشتي واغني راجعين الا واحنا عند الاشاره واشووف ذاك اللكزس فيه بنت تعوذت من
ابليس وجلست اطالع بالدريشة الا راعية اللكزس تنزل النافذة وتبي تكلمني قال
عقلي لا قال قلبي يمكن ضايعه تبي واحد يدلها وانزل النافذة قلت لها هلا امري أي
خدمه
قالت لي ياهووووووه الى الان انت مرسم بالثقل ياشيخ فك النشا شوي قلت عفوا انتي
تعرفيني قلت نسيت يوم انتم في شارع العليا في الصالون الاسود صالون تركي (هو مو
تركي صالون فهد صديقي بس مسمسي نفسه تركي) وتلحقون اللكزس هذي ولا كل يوم لكم
صيده قلت لها لاوالله قالت اسمع بصراحة خويك سخيف وانا راسمه عليك من اول بس
انت زودتها بالثقل حقك قلت اناااااا قالت ايه وتطلع لي كرت وترش عليه عطر
(تذكرت اللي يبيعون في محل )
ماتلاحظون طولناها شوي اصلا مطوفين الاشارة وانا شيطاني يقول لي يعني 3 مرات
وانت ماشي في حالك واكلت تبن جرب هالمرة صيده ولااحلى قلت بس هذي خوية صديقي
....ماعلييك هي تقوول انه سخيف يعني كذا ولاكذا بتتركه طبعا كل هالكلام لشيطاني
اللي معي وامد يديني الا وعينكم متشوف الا النور 3 دوريات وصالونين هيئه ونزلوا
كلهم علي ولا احد فكر يشوفها ومردغوني مردغه
بعد ذا كله سئل ضابط فيهم البنت (صح هو ضايقك وتعرض لك وحاول يعتدي عليك صح صح
لاتنفعلين في البكا خلاص بنوريك شغل الله فيه) ورجال الهيئه يصارخون يامجرم
يازنديق اتريد ان تشيع الفاحشة في ارض المسلمين انا بصراحة تقبلت الامر بروح
رياضيه سكرت السيارة وفتحت الباب يعني كملوا مردغتكم فيني البنت للامانه ماقالت
ايه حتى ومشت بسيارتها اما انا فتم ايداعي بالحبوس بالتهم التالية:
اولا:التعرض لفتاة بريئة مسالمة في الطريق في منتصف الليل
ثانيا :تعطيل حركة المرور
ثالثا تهديد الفتاة وابتزازها بطريقة او اخرى
الحكم الايقاف شهرين في سجن الحاير وغرامة مية الف ريال .....تم تنفيذ الحكم
وتوني طالع امس وعن اذنكم الان بارقد وعلى قولة الشاعر (يامدور الهين ترا
الكايد احلى وهيك ياما هيك مش لايئة عليييييييك
==============================</font>
رد مع اقتباس
مواقع النشر (المفضلة)