علاقــات البــلاك بيــري

السلام عليكم ..

اليوم حاب أفتح موضوع ساخن نوعا ما ويمس الأغلبية تقريبا وهو عن عالم الدردشة في
البلاك بيري أو مايعرف بـ BBM واللي يصير عن طريق
إضافة رقم الجهاز PIN

مثل مانتوا عارفين أن مسنجر البلاك بيري مايختلف كثير عن المسنجر ولكن يكون مع الشخص 24 ساعة
وين مايروح فيقدر الشخص يتواصل مع الكونتاكس اللي عنده في أي وقت ومن أي مكان
وهاي ممكن تكون خدمة مفيدة للي يحسن إستخدامها، أما الوضع
عند البعض وهو تكوين العلاقات والصداقات من
خلال هالخدمة وأخص بالذكر
بين الجنسين

يعني على سبيل المثال وليس الحصر تلقى فلانه من الناس متزوجه وعندها عيال ولكن بحكم أن فلان معاها
في الدوام وييلس صوبها فضافته عندها ودايما على اتصال وضحك وسوالف معاه بجانب
البرودكاست اللي ممكن يحمل كلمات ما تنقال لشخص غريب
أو العكس من العلاقات اللي البعض يغلفها بإسم
الصداقة أو الزمالة أو غيره
من المسميات

طبعا في القروبات الوضع يختلف كون الشخص ممكن يتواصل مع مجموعة دون إضافتهم ولكن حسب
اللي أشوفه أن البعض من الشباب مايصدقون يلقون (بن) وحده البنات إلا وضافوها
من كل صوب منو ماكانت والقهر أن البنات يتفاعلون ويه هالفئة
من الشباب بحجة انهم يطرشون لها برودكاستات
حلوه ومسجات كشخه أو
نكت وغيره

أدري أن البعض بيعلق وبيقول أن أرقام الهواتف الشخصية صارت تتداول بين جميع الأطراف اليوم وبدون أي حواجز أو
حياء بحجة العمل أو الدراسة أو أي سبب آخر ولكن البلاك بيري يقوم بنفس الدور دون وجود أرقام أو أدلة
على إدانة أي طرف لأن ممكن تنبني العلاقة من وراء شاشة الهاتف ويدخل الشاب لبيت الفتاة
ويعيش وياها وبين أهلها بدون مايحس أحد لأن عالم البلاك بيري مفتوح
للجميع وإستخدامه مب في محله يني الهدف منه مب
الدردشة ولكن للأسف إستخدام جيل
اليوم غير الأهداف

القصد من الطرح مب تضخيم المسألة ولكن إذا كان بيدك القرار شو هي أفضل طريقة لمواجهة هالإستخدام السيء
من البعض وكيف يقدر كل واحد يحافظ على من حوله من هالغزو اللي دخل علينا ولما بدأ ينتشر كانت السرعة
رهيبة حتى إن ولد اختي يوم كان عمره 9 يقولي انا بطلع لي بلاك بيري جان أسأله وانت بعد شو
تبى في البلاك بيري رد علي كل ربعي عندهم وانا بعد باخذ اونه كشخه بلعب فيه،
خارج النص < اكتشفت بعد ان هالنتفه مسجل في احد المنتديات
باسم راعي الفتك وهو للحين مايعرف شو
يعني قير وسكان وريس
وبريك

^
يهال آخر زمن
:devil:

اترك المجال للنقاش في هالموضوع وأتمنى مانطلع وايد من الموضوع لأن الفكرة مب التعارف
لا الفكرة إستخدام البلاك بيري للدردشة والعلاقات اللي تصير
فيه في غياب رقابة الأهل عند
الغالبية

الاســـطـــوري
أخوكم

البلاك بيري .. صرق الأعضاء من المنتديات ..

الاسطوري اشكرك على هالطرح الجميل و الموضوع المهم ..

الموضوع يحتاج تضخيم و تضخيم و تضخيم .. لان ناس وايد يشتكون من انطواء عيالهم .. و العيال مب انطوائيين هم بس بلاك بيريين و متمسمنجرين ..


و مشكلتنا الي ما راح تنتهي .. اننا ما نعرف نستخدم التنكولوجيا الا في اللعب و تضييع الاوقات ..


و لي عودة ان شاء الله


اشكرك يالاسطوري مره ثانيه عالموضوع و الاسلوب

السلام عليكم

طرح جميل ومنسق ,,,


شكرا لكاتب الموضوع .. وموضة العصر هي البلاك بيري ,.,

اقتباس:

---

البلاك بيري .. صرق الأعضاء من المنتديات ..

---

فلآنه وفلآنه وفلآنه
كــآنو من اول المتواجديــن فــي كل تفـآصيل حيـآتي ..
وبحكم امتلآكهم هالإخترآع وانآ لآ ..
صآروا من آخر النـآس المتوآجدين فـي حيـآتي .. وبإستمرآر للعــدم =)


شكرا الاسطوري على الموضوع ..

مرحبا الاسطوري شكرا على هذا الموضوع

باختصار في كل زمن نلقى شي يسوي ضجه

يعني وايد امور تكون غلط او نسئ استخدامها ، وعقب فتره يظهر شي ثاني وننسى الأولاني

البلاك بيري مب إلا بعد بين الناس

انا أصلا ما تقبلت فكرته لأنه الربع ماعادوا ربع

سواء بين الشباب ( شاب وربيعه ) أو بين البنات ( البنت وربيعتها ) لااااااااو هالمره يضيفون البن كود ( زميل عمل ) مصيبه

ومثل ماقلت كأنه الواحد يغزي بيت الناس بعد

ومن فتره صادفت واحد من الربع ماشفته من سنين ، ضحك عليّه عشان ماعندي بلاك بيري

ما تصدقون اشكر إني ما أطيق هالجهاز ، ما أحب حتى منظر الأشخاص اللي يمشون واهمه ماسكينه ،
حتى لو ماكانو يتعبثون فيه ، خلاص لا إرادي صرت أنفر منه ولله الحمد !.

بالنسبه لي ، بنتظر تواصل غيري بالموضوع ـ اظن الاغلب عندهم اياه ـ بما إني مادري وايد عنه غير إن الناس تناقزو عليه ،
+ أشوف أخوي العود مهدد اختي الاصغر ، كانت تبي تاخذه ومهددنها اونه لو خدتيه بكسره =/

السلام عليكم..

الحمد الله انه ما عندي... و لا افكر اشتريه.. بالرغم انه ما يمر يوم الا و حد من ربعي يطرشلي يبون الكود مالي !!

كل هالتكنولوجيا اللي حوالينا بدت تعزلنا عن كل حد... بيينا زمن محد بيكلم الثاني الا بالتراسل

همم انا عكسكم يا بنات احب البلاك بيري ولا احس اني اقدر ارجع لنوكيا ولا سوني لوول

الي دوم اقوله حق الاجانب الي في الدوام انه الشعب الاماراتي عاش فترة التقدم والتطور بما يعادل قرن من الزمان في الدول الغربية في مدة عشرين سنه فقط اذا مب اقل
يعني دخلنا في عالم التكنلوجيا بشكل مب طبيعي
الموبيلات صارت عند كل حد
الكاميرات عند كل حد
لابتوبات الخ الخ
والبلاك بيري في اخر سنتين

طيب
نحن لو ما دخلنا التكنولوجيا في الامارات الدوله ما بتتقدم ولا بتتطور من جميع النواحي
ولو دخلنها بتطلع سلبيات التكنلوجيا على المجتمع

وهاي فترت العشرين سنه مب طويلة يعني امي وابوي الله يطول في عمرهم ما يعرفون شو فيه الكومبيتر الي هو عمود التكنلوجيا عشان يعرفون شو هو البلاك بيري
في اذا قلنا الرقابة الي المفروض العائلة توفرها انه هي السبب او جزء من السبب الي يؤدي لاستخدام التكنلوجيا بشكل غلط
بقولكم هذا يعتبر ظلم !!
كيف تتوقع من انسان ما اختبر شي انه ينصح بالايجابيات والسلبيات الي فيه

خلاصة الكلام انا احس انه المستخدم نفسه هو الي يحدد طريقة استخدامه لشي
لاالتربية ولا نصايح هي قابلة انها اسوي شي
وشعبنا معروف عنه انه الاغلبية تعشق انه اطبق مبدا خالف تعرف
يعني لو كان شي زين غصب بصير مب زين

مثل ما ذكرت فوق اني احب البلاك البيري وحب البي بي ام
لكن تدرون انه عندي 48 رساله من خلق الله مب فاتحتنهم لين الحين عشان اقراهم
ومره راح عليه تسليم بروجكت لني ما قريت رمست ربيعتي وهي تذكر بنات الكلاس بيوم التسليم لول

بنسبة لوجود اشخاص ذكور في مسنجر الاناث او العكس الي من الدوام
بتكلم عن نفسي
انا عندي مديري الهندي و جي ام الشركة السوري
حاطتهم في قروب الدوام عشان لو طرشت برودكاست للبنات ما يوصل لهم
واساسا البلاك بيري كان الهدف من تصنيعه انه يستخدم للبزنس وحتى البي بي ام
كان موجود من استوى لكن ما انتشر بين الشباب والمراهقين الا في الفتره الاخيره
فا اتعامل وياهم عن اشياء اتخص الدوام بكل رسميه

فالي يبا يسولف و يضحك ويا مال الدوام بيطلع العله من البلاك بيري انه هو الي خرباه
والي يبي يستخدمه بشكل صح بيطلع الف طريقة او طريقة عشان ما يغلط

واااو صدق وايد اتكلمت :Oo: لوول لنه عيبني الموضوع

شكرا الأسطوري

صباحكم بلاك بيري :inlove:

قريت الردود وحسيت فيه هجوم على هذا الجهاز البرئ

العيب ليس بلبلاك بيري

العيب في طريقة استخدامه !!

تماما كأي جهاز آخر استعمالنا له هو إلي يحدد إذا كان زين وإلا شين

عن واقعي ...

أخوي عصب علبلاك بيري .... وفجأه اشتراه لعياله لأنهم صاحوا يبونه

العذر كان .... مجرد جهاز بدون خدمه !!

بعد شهر تماما صار عدهم الخدمه !! إنزين حلوم هاييل يهال شو بيسوون يعني :k_icon28:

أبدا ما حبيت منطق أخوي بهالموضوع !! حسيت إنه بيخرب عياله بإيده

لبلاك بيري ... كجهاز وااايد حلو للتواصل بين لكبار العاقلين

صح إنه أغلب أخباره خريط بخريط بس كمسن وتصفح للنت واااايد حبيته :boxed:

ولكن بإيد المراهقين واليهال دمار شامل

العتب على الأهل مش على لبلاك بيري

الأسطوري .... موضوعك طر :tounge:

طر = كلمة يديده تعلمتها أمس :k_winner_third_h4h_

أنا كنت من المعارضين للبلاك بيري

لانه أول ما عرفته كنت أعتبره مجرد موضه عشان جيه كل حد ماخذنه :tongue:

بس عقب ما فهمت نوع الخدمات اللى فيه غيرت رايي و خذته ؛)

هو زين حق اللى يعرف يستخدمه صح

و الناس اللى يستخدمونه عشان يكَونون علاقات

اممم.. في رايي ما أشوف انه البلاك بيري هو السبب

لانه حتى لو ما كان هالجهاز موجود شي وايد طرق ثانيه ممكن أنهم يستخدمونهن عشان يتعرفون على ناس من الجنس الثاني

و بالنسبه لليهال.. ما له داعي يكون عندهم بلاك بيري ! لانه الخدمات اللى فيه حق الكبار.. مب مهمه للصغاريه

هــــــــــلا ..

"خنفروش"

اممم هو صح البلاك بيري ساهم في سرقة بعض الأعضاء بس مابنقول ان هو السبب الرئيس لان موقع
وجه الكتاب < اونه عشان ماقول اسمه بالانجليزي والمواقع اللي تشبه هم اللي صاروا
يجذبون الغالبية هالايام مع اني ماشوف ان فيهم روح مثل
المنتديات بالعكس التواصل عقيم
عقيم عقيم جدا

طبعا هالظاهرة نتوقع تتلاشى عقب فترة بعدما تطلع اشياء يديده او بعدما يمل منها مستخدميها ويردون يخلونها
محدوده كالسابق ومجموعة كبيرة من الناس تطرقوا لهذا الموضوع من خلال افلامهم
في مشاريع التخرج او بالمواضيع وغيره عشان توصل
الفكرة للاهالي من خطر إساءة
استخدام هالاداة

لو مريت بمواقف أو غيره من خلال تعاملك مع البلاك بيريين خبرنا
عنها عشان نتعرف أكثر على فئات المجتمع
وطريقة إنخراطهم ورا
الآخرين

"أنت أنا"

وعليكم السلام والرحمة

العفو اخوي انا بس حبيت اطرح هالنقطة للنقاش لمجرد محاولة التعرف أكثر عن الأشباب لو قدرنا فلو لك
تجربة في هالمجال وحاب انك تشاركنا بها تفضل وقول عادي .. اظن ان هاي مشاركتك
الاولى في المنتدى فمرحبا بك اخوي من بينا وان شاءالله تلقى كل
ماهو مميز في هالمكان فلاتحرمنا من
تواجدك ومشركاتك

"مزيونة العرب"

إذا كان اللي كتبتيه صحيح فهذا معناته ان هم ماكانوا الصديقات اللي ينشد فيهن الظهر لان بمجرد امتلاكهن هالجهاز
مثل ماذكرتي تخلوا عنج وراحوا يمشون ورا ما في ايدهم فلو انا كنت مكانج المفروض افرح اكثر
مما اتضايق لاني عرفت منو هالناس اللي عطيتهم الثقه وقربتهم مني خاصه
ان انتي بعدج صغيره حسب الظاهر والحياة مازالت
مفتوحه امامج وان شاءالله بتلتقين
بمن هم يناسبونج اكثر

ولكن مابنقول ان البلاك بيري جهاز سيء لان هو جاهز مثله مثل غيره والاستخدام هو اللي يحدد اذا بتكون
النتيجة سيئه او ايجابيه، حاولي تسألين اي حد قريب منج وعنده هالجهاز غير اللي ابتعدوا
عنج ويمكن تكون نظرتج مختلفه لو تعددت الآراء وخذتي
نظرة الناس له من جميع
الجوانب

دايما احب اقدم مثال عن الكرة بان ممكن تكون الكره جدامنا لكن انا اشوفها من صوب واحاجج الناس عن
اللي اشوفه ويكون الشخص اللي جدامي بعد يشوفها ويرمس و و و ولكن هو يشوف الجهه
الثانيه وانا لازم افهم بان ممكن الجهه اللي هو يشوف منها مختلفه
عن الجهه اللي انا اشوفه منها وبالتالي يشوف
اشياء انا ماشوفها والعكس
صحيح

مشكورين على الردود

لي عودة للبقية

السلام عليكم

مساكم الله بالخير

القضية قضية رقيب ذاتي لا أكثر و ذلك لمن عقل و فهم أما الأحداث إن كان أساس التوجيه مختل عندهم فمن الطبيعي أن تختل تصرفاتهم مع كل طفرة جديدة و تكنولوجيا جديدة .

التطور سمة من سمات الحياة و في كل يوم تكاد تكون الاختراعات معجزات إذا ما قارناها بالإختراعات الماضية و غالبية الاختراعات إيجابية و لكن نحن من يتشبث بسلبياتها و نترك إيجابياتها .

اخي الكريم الإسطوري ..

في السابق كانت الحاجة أم الإختراع .. و كان الإختراع لا يلقى ترحيب إلا متى طغى بفوائده على غالبيات الفئات .. أما اليوم .. و كما يحدد ركن من أركان التسويق : يجب تحديد الفئة المستفيدة !

الفئة المستفيدة : النكسة التي يعانيها مجتمعنا .. كالتالي

10% ملتزمين
10% محترمين
10% عمليين
10% بين و بين
10% أي شي
50% تقلييييييييييييييييييد
(الإحصائيه هاي تأليف طبعاً)

فئتا الأي شي و التقليد .. تغلب .. و تصرفاتها تأتي على المجتمع كظاهرة مرفوضة و السبب في ذلك الفراغ النفسي أو العاطفي أو سمها عقدة النقص أو إنعدام الرقيب الذاتي أو سوء التوجيه لا التربية ..

لذلك .. يجب أن تجعل من نفسك مثال يقتدى به إن أردت أن تعالج ظاهرة في محيطك أو مجتمعك .. لا بالنصح و التوجيه .. إنما بإسلوب حياتك و كيف تعيشها .. و إن تأثرت بك فئة فقد كان لك دورك و لا تطمع بأكثر من ذلك و على غيرك أن يكمل .


شكراً لك و لهذه المساحة .

اخوكم عايش

السلام عليكم ......... صراحه ها هجوم حاد عالبيبي انا ماستغنى عنه لاني ممكن اكلم اخواتي في اي وقت بحكم ظروف حياتنا وبعدنا عن بعض وصراحه الي يستخدمه مايصبر عنه السيئه الوحيده فيه تسرع الناس في نقل اخبار وتفاهات مالها معنى من توصلني امسحها على طول وأحد من نشرها وانصح مرسلها

اقتباس:

---

إذا كان اللي كتبتيه صحيح فهذا معناته ان هم ماكانوا الصديقات اللي ينشد فيهن الظهر لان بمجرد امتلاكهن هالجهاز
مثل ماذكرتي تخلوا عنج وراحوا يمشون ورا ما في ايدهم فلو انا كنت مكانج المفروض افرح اكثر
مما اتضايق لاني عرفت منو هالناس اللي عطيتهم الثقه وقربتهم مني خاصه
ان انتي بعدج صغيره حسب الظاهر والحياة مازالت
مفتوحه امامج وان شاءالله بتلتقين
بمن هم يناسبونج اكثر

---

انآ معآك في هالنقطه وفعلآ مآ تضآيجت كثر مآ اني استفدت .. صح الوآحد يحز في خآطره بس العقل لآزم يكون متوآجد في مثل هالموآقف ..
مثل مآ في نآس رآحت بعد ترى في نآس تمت مثل مآ هي =)
..

اقتباس:

---

ولكن مابنقول ان البلاك بيري جهاز سيء لان هو جاهز مثله مثل غيره والاستخدام هو اللي يحدد اذا بتكون
النتيجة سيئه او ايجابيه، حاولي تسألين اي حد قريب منج وعنده هالجهاز غير اللي ابتعدوا
عنج ويمكن تكون نظرتج مختلفه لو تعددت الآراء وخذتي
نظرة الناس له من جميع
الجوانب

---

انآ مآ اقول انه جهآز سيء .. واصلن مآ اقدر احكم عليه عشآن استخدآم شخص او اثنين ..
العيب كآن فيهم مو فيه ..
البلآك بيري من وجهة نظري انه تكنولوجيآ حديثه انتشرت بشكل كبير فـي ظرف سنتين ..
وكل تكنولوجيآ تنتشر لهآ ايجابياتهآ وسلبيآتها يحددهمآ طريقة الإستخدآم ..
وايتم كجهآز مثله مثل البآقي يمتلك مميزآته الخآصه فيه ..

شكرآ الاسطوري =)

اقتباس:

---

دايما احب اقدم مثال عن الكرة بان ممكن تكون الكره جدامنا لكن انا اشوفها من صوب واحاجج الناس عن
اللي اشوفه ويكون الشخص اللي جدامي بعد يشوفها ويرمس و و و ولكن هو يشوف الجهه
الثانيه وانا لازم افهم بان ممكن الجهه اللي هو يشوف منها مختلفه
عن الجهه اللي انا اشوفه منها وبالتالي يشوف
اشياء انا ماشوفها والعكس
صحيح

---

حبيت اصفق لك يالأسطـوري ..عين العقــل ،، ماشالله عليك ياخوي ..

وجهـة نظـر لو فهمناها و أقتنعنــا فيها .. كثير من الأمور في حياتنا .. ما بتكوون بهالتعقيد اليوم..


متاابعة بإعجــاب ،،

ما شاء الله الموضوع يا في وقته , ^_^


ع قولتكم الموضوع ما يعتمد عالجهاز , السالفة كلها تعتمد على المستخدم نفسه ,
من ناحيتي , الحمدلله اطرش شي حق غيري أو أسوي برودكاست ها نااااادر ,
أصلا خييير أشيك برودكاست البنات , !

الحلو في البلاك بيري بنسبة لي تواصلي ويا أهلي خااااصة خواني , ومن فترة
وقفت الخدمة عندي لأني مااااحس منها فايدة أصلا , بس عقب رديته بس عشان
خواني حشروني إلا أرد الخدمة , مسوين قروب فيه كل خواني واختي ونتواصل دوم ويا بعض ,
ربي يخليهم لي يااااارب ^^


اتناقشت ويا حد من فترة عن سالفة زملاء العمل , اممم مابي اتفلسف لأني ما عشت جو العمل ,
بس برأيي مافي داعي أسوي له أد عالبي بي , لأن إذا الغرض صدق العمل ممكن عالايميل أو حتى مسج عالفون ,

وماتخيل كيف البنات يسولفون ويا الشباب عالبي بي , أحس إذا أي واحد عنده البن كود حق وحدة ,
هو يستوي يظهر اسمها وكل المعلومات عنها , قصدي في حالة الرقم بإسمها يعني ,
وصدق مووول ما أداني أي حد يسوي آد حق قروب ما يعرفها , ناس فاضيييييـن ماعندهم سالفة ><

عسى الرحمن يكفينا شر هالجهاز يااارب ,



يزااك الله خير الاسطوري عالموضوع ,
ربي يحفظك وييسر دربك إن شاء الله :)

البلاك بيري ...


قل لي في يد من ... أقل لك ماهو



مستمتع بهذه الردود الطيبة ... ولربما لي عودة ...

متـــابـــع .. من ورا العــــاكـــــس

لي رجعة آن شآءآالله
عجبني آلموضوع ~

موضوع العصر

البي البي وسمعته

على فكره كل مشكله البلاك بيري في البي بي ام بس .... سعنس لو بسكرون الخدمه معظم المراهقين بيودرون الجهاز الا اذا مشغلين المسن الثانيات

بصراحه انا من مؤيدي البلاك بيري خااااصه للشغل... يعني يكفي ان ايميل الدوام ترد عليه لو شي ضروري لو اننك اجازه او عملك مبداني

اما بالنسبه للبنات روعه لاختيار البضاعه بالسوق عن طريق اخذ صور البضاعه والمشاوره عليها بين الصديقات والخوات

واهم شي لو كانوا بره البلاد... وياما رياييل بصورون نوع المكرونه مثلا من الجمعيه وبسالون حريمهم هل هذا النوع اللي كتبتيه في قائمة الطلبات خخخخخ وينك بالمنصوري

بعنب احس ان الدنيا بين ايدينا نحن الكبار

لكككككككككككككككن

هالبي بي شو يسوي عند اليهال مدري؟

والله انا فواتير تلفوناتي خفت من عقب البيبي... قبل كاه مكالمات خارجيه الحين لا .... طرق التواصل تطورت

كل شي له سلبيات وابجابيات ومثل ما ذكروا الاخوان احنا نحدد الفايده والخساره بطريقه الاستخدام

ويعطيكم العافيه

هــــــــــلا ..

"المزوحي"

هلا بالمزوحي، صح كلامك بس عاد مب في كل زمن لأن الطفرة التكنولوجية تطلع لنا شي يديد كل كم يوم
وهذا أحد الأشياء اللي لقى إقبال الناس عليه بسرعه رهيبة بعدما تم تطوير الأجهزة وإضافة
بعض المميزات، هو يمكن بعد فئة وقرب فئة أخرى لأن العيب مب في
الجهاز بل في طريقة إستخدامه مثل ماذكرنا قبل
ويمكن أنت اليوم تقول جيه
وباجرتغير رايك

ولد خالتي قبل كان يشكك في ذكورة الشباب اللي يستخدمون هالجهاز بسبب الخضوع التام اللي كانوا يعيشونه
لهذا المنتج وكنت أقوله بييك يوم وبتاخذ هالجهاز وفعلامرت الايام وإذا بجهة العمل اللي
هو فيها يوفرون له هذا الجهاز ومن ثم هو ياخذ جهاز خاص فيه
فبعدما كان رافض إنه يمتك هذا الجهاز اللي كان
يعتبره سخيف صار يمتلك
جهازين بدل واحد

"أنامل قلب"

لاتصيرين عدوانية وايد ترا في رجال أعمال وأصحاب مناصب أو اللي وظايفهم تتطلب التوصل الالكتروني
الفوري فهم يحتاجونه لأداء مهامهم الوظيفية اليومية سواء كانوا خارج المكتب أو في السفر
أو في أوقات مابعد الدوام الرسمي وهالفئة مالهم ذنب لو غيرهم
خذاه بقصد التسلية أو الدردشة أو مواكبة
العصر كما هو الحال
عند البعض

يعني وياج إن الإستخدام السلبي اللي نشهده في المجتمع أثر على نظرة الناس له وخله البعض ينفرون منه بس
حطي في بالج ممكن في يوم تكونين في موقع يتطلب وجود هالجهاز عندج عشان تأدين
أحد الأدوار أو تقومين بإحدى الواجبات وبالتالي الحكم لازم
مايكون أبدي بل متغير حسب الحاجه
في الزمان والمكان

"شوق القلوب"

وعليكم السلام، لما قريت كلامج تخيلت السيناريو وحسيت إن نحن نتجه للوراء في العلاقات الإجتماعية بعدما
كانوا الجيران مثل الإيد الوحده ويتشاركون في كل صغيرة وكبيرة ويه باقي عيال الفريج صار
اليوم محد يعرف الثاني وشوي شوي بدوا حتى اللي عايشين في البيت الواحد
يبتعدون عن بعض وممكن حتى مايشوفون بعض ولا
تجمعهم وجبه وحده إلا في الاسبوع
مره إذا ماكانت مده
اطول

الله كريم بس إن شاءالله مانتأثر بالتغيرات والغزو الخارجي ونظل متماسكين لأن مازال عندنا ماهو أقوى من
كل هذا واللي من خلاله نقدر نترابط ونتماسك ونتعاون ونوقف وقفة رجل واحد ضد كل شي
ممكن يأذينا إلا وهو الدين الإسلامي عن طريق الكتاب والسنه، أتمنى إن
نكون أقوى ونربي عيالنا على ماهو أصلح من خلال
غرس المبادئ والقيم الحميدة لتأهيلهم على
مقاومة كل ماهو سبب في
تفكيك الناس عن
بعض

ملاحظة: البلاك بيري مجرد تلفون فيه بعض خدمات الكمبيوتر واللي يميزه الانترنت على
مدار الساعه ومن اي مكان فمابنظلمه ولكن لنبحث عن الأسباب أكثر
عشان نلمس الجرح ونبدأ نداويه قبل مايكبر
ويصعب معالجته
:bye2:

ولكن
مازال للبلاك بيري إيجابياته الكثيرة ومحد يقدر ينكر هالشي
ولازم نعطيه حقه من هالناحية
:fa32:

باخذ بريك وعقب برد على البقية

شو هي ايجابياته .. قولوها .. عشان آخذ لي واحد اتمسنجر به عالاقل يقولون بوخنفش اتطور ,, و صار كووووول مثل فرفوش يا لذيذ يا رايق

حلـووو النقـآش

مـآ آقدر آناقش ف الموضوع بحكم آني مـآ آملك هالجهـآز

بس آظن آنه المشكله مب ف البي بي نفسه ، المشكله ف الشخص نفسه ..

يعـني شرآت المسن ع آيام آول ، آنا بآمكـآني آستخدمه للتواصل مع هلي ، ربيعـآتي ، ... الـخ
وآقدر آستخدم لـ غرض ثـآني آلا وهـو التعـآرف

وشرآت التـلفـوون ..

والحين البـلآك بيري ..


وشي ثـاني آنه عندنـا وايد نـآس " حشرن مع الناس عيد " ، يعني لـيش فـلانه عندهـا وانا ماعندي ؟!

تـقليد آعمـى >< وبس ! ..


الـتلفـون احتـاجه لآني اتواصل مع آهلي ، ربيعـاتي ، وهالشي مع البلاك بيري ولا بدونه آقدر آوصل له بغض النظر عن السرعه " محد بيركض ورانا عسب نوصل للي نبغيه "


يعني مثلأ هذيـل لي يقولون سريع ومادري كيف ، يعني لو نفرض مثـلا هالجهاز ما انوجد من الاساس خلاص بتتعطل مصالحكم ؟..


يمكن اللي يشتغلون يحتـاجونه ، لكن شرآت هالوضع لي نشووفه

كل واحد وحده 24 منزلين هالرآس ويضحكون اروحهم " مب صاحين " سووري ع هالكلمه بس وآيد انقهر ><


ولو تشوفون المحتوى ل رسـآيلهم ، نكـت " بعضها سخيييف جداً " وسوري مره 2 ع هالكلمه ..


الشي الثـآني : الاشـآعـآت لي لهــا بدآيه ، مـآلهـا نهــايه ، آلا الشيخ الفـلآني مـآ آدري ش فيه ، وآلا جامعـه مآ آدري منوه آحترقت ، ......


يعـني الناس تداول معلومات كلها غلط فـ غلط


حكومه البحرين منعة خدمه البـلاك بيري مسنجر بسبة الاشاعات لي تظهر ع الحكومه وعلى آشيا وايد " هالكلام ع ذمه جريده البيان " ..

السلام عليكم....


ما ادري من ناحيتي حبيت فكرة البلاك بيري خلاني أتواصل مع صديقاتي يوميا مش من خلال الشات على الاقل البرود كاست لاني من طبعي ما احب اتكلم بالتيلفون ولا اكتب وايد...بس أشوف و أعرف اخبارهم من خلال البلاك بيري...بس طبعا ما استخدمه دوووم لاني حاطه به رقم ما يعرفه حد يعني مش مضطرة احمله معاي دوووم...وهذا الي حبيته فيه بس كاستعمال يومي جدا ملل .

البــلاك بيــــري الا جـــــــهاز نحـــن اللــي نتحــكم فيـــــــه
والــي أســـاسن ما يـــبي يستخـــدمه استــــخدام مــب زيـــن وخــاصة البي بي مسنجـــر
مــــــب لازم يظيـــف أي حد ... عن نفســــــــي مب ظايفــه إلا الأهل فقـــط حتى ربيـــعاتي بس 2 ظايفتنهــن بعد
ليــش عــــوار الـــــــراس والصــدعه بلـــيا فــــــايده... عافنــي اللـــه بعضهــم هــب شــــايفين خيـــر جنه شـــــي واو
الا هو مجــرد تلفـــــون عــادي بس استخـــدامهم الغبـــي خلا الـــــــرمسه تظهــر على هالجهــــاز المسكيـــن اللي هو مجــرد جــــــماد ما فــيه حيلـــه

ربـــي يعيــنا ويستـــر ع الجميـــــــــــع

عيل الحمدلله إنه ماعندي بلاك بيري

اوه صح مايخصه

بس البنات يرفعن الضغط

ما يخالف لو عندج بلاك بيري بس خليه في الشنطه مافي داعي ترفعينه فوق ونتي تمشين

بسم الله الرحمن الرحيم

~

موضوع البلاك بيري موضوع متشعب وتكلموا فيه الناس كثير
وحاله من حال أي جهاز وأي وسيلـة .. سلاح ذو حدين ويعتمد على طبيعة الشخص الي بيستخدمه
وحلو إن الشخص يكون عارف السبب من وراء اقتناء هذا الجهاز

صنف من الناس ، خذوا الجهاز لأنه انتشر وصار بين الكل وحس إنه غريب بينهم وهو لا يمتلك هذا الجهاز وخذاه لهذا السبب

وصنف آخر ، رأى بحاجته لهذا الجهاز سواء للبريد الالكتروني أو التصفح أو التراسلات الفورية وغيرها

أنا عن نفسي كنت غير مقتنع بالجهاز في البداية ولكن على نهاية فترة دراستي ف الجامعة ويوم شفت إن معظم ربعي في الدفعة خذوا هذا الجهاز وكلنا بنتخرج ، فـ حسيت إني بستفيد من الجهاز إذا خذذته عشان أتواصل مع الشباب .. وفعلا مرتاح منه الحين

ولكني استغرب من الي يستخدمه استخدام خاطئ .. على سبيل المثال يرسل أمور مخلة بالآداب عن طريق رسالة البث الخلوي .. ولا يكتفي بمشاهدته للأمور السيئة بل يحث الناس عليها ، وهالأمر فعلا يضايجنا ويضايج المجموعة بأكملها ..

والجهاز إما أنك تتحكم فيه ، أو هو يتحكم فيك
اختـــار ...

وشكرا

~

الهيثــم

السلام عليكم...

انا بعد حاليا بديت افكر اخذه... لسبب اني بديت احس اني معزوله عن صداقاتي و ربعي... لانه ماصار عندي وقت للمكالمات و السوالف... و وقت ما افضى ما احس انه يكون مناسب اني اتصل لحد و اسولف..

و وحده من ربعي اقنعتني فيه .. اتقولي انها من بدت تستخدمه زاد تواصلها ويا البنات..

واتوقع انه الانسان نفسه هو اللي يحدد مدى استخدامه... يعني حاله حال المسنجر العادي...

^^ بالضبط هذا الي صار وياي .. والحمدلله اشوف استخدامي له ممتاز ..

ملف مرفق 1234
---------------------

موضوع يستحق الطرح