التجهيزات لسفرة الصيف

السلام عليكم ورحمة الله وبركاته
http://www.lifepr.de/attachment/1549...g777-200LR.jpg

طبعا عرفتوا عن شو الموضوع دام إنه قريتوا العنوان ... لكن هالمره بطريقه ثانيه ومن وقت بعد ..
مثل كل سنه الناس ترتب للسفر، وحد تكون سفراته مفاجأة، أو من غير ترتيب سابق ... أو من خلال اجتماع الأهل
والأحاديث اللي تدور من بينهم، تلقى واحد من بينهم يقترح زيارة دولة معينه، وفي من الناس اللي كل سنه تسافر لنفس الدولة
يعني لازم تكون الدولة في اللسته ...


صح الصيف باجي عليه وايد ، وما بخفي عليكم إنه في ناس تسافر عطلة الربيع أو إجازة الإيستر اللي قاموا يعطون المدارس .. الخ
بس كأنه الصيف شي أساسي ...
----
وبالمناسبه حبيت تخبرونا عن خططكم الأوليه للسفر، حتى لو بيكون في تغيير ... بس كتبادل راي وتجهيزات ...
واللي مسافر قبل ممكن يرد يحط لنك موضوعه هنيه ...
وشو أهم شي تحبون تاخذونه وياكم، وإلا كل شي موجود في المكان اللي تسيرون له ..
أبغي منكم تفاعل عسب الكل يستفيد ... وبتكون فتره كافيه للرد على الموضوع لين هذاك الوقت
:m_bye:

هالصيف سفرتنا بتكون غير غير غير عن كل سنه

هالمره ناوين نطلع كروز
بننزل في لندن و بنتم فيها يومين او ثلاثه
و عقب بنطلع في باخره و بنمر على الدول الاسكندنافية "السويد و النرويج و الدينمارك"
مدة الكروز ١٣ يوم و عقبها انا برجع البلاد او بتم في لندن يومين او ثلاث و اهلي بيسيرون سويسرا "لوزان"

بشكل مبدئي هاي خطتنا و اتمنى اني اضعف الين فتره ما قبل السفر p=
لول

ذنيني أظن العام انته سافرت مع ربعك وانبسطت أكثر، لأنه سفر العوايل ماتريحك، ياخذون فتره لين مايجهزون ..

بإختصار الوقت يضيع ...

طبعا موضوع الكروز بيكون شي حلو ... بس نشوف التجربه اللي بتمر فيها، طبعا هذا لو ما حصل أي تغيير ...

بالنسبة لسويسرا ... ودي أزورها مره ثانيه الصراحه ..

وإن شاء الله بتضعف ذنيني ...

انا الحين بعدني مب مخطط للصيف لأنه ان شاء الله في سفره لسان فرانسيسكو .. على شهر ابريل
وعقب الرضيعه تبا تسحبني وياها لدريزدن - المانيا .. ومادري بعدين وين بنسير ..
اهم شي اني مفتك السنه من سالفة الويزه لأني مسوي حق الأهل كل الويز من وقت ( شنجن - والأمريكيه )
واحلى شي انه سويسرا انظمت شهر 12 للشنجن فما احتاج ويزه زياده ^_^
ذنيني .. خفف اشويه من الأكل .. وحاول تمشي ساعه كل يوم .. وما تحتاج اكثر من جيه ^_^
وسالفة الكروز كانت في بالي .. بس اني اطلع من كندا او امريكا !

شي حلو مايهزك ريح تزور أمريكا ...

أنا أمس كنت أفكر في موضوع الويز، أقول لو الواحد يسويهم بفتره، بس الواحد ما يضمن عمره خلاص بيسير أو بيغير الوجه ..

أنا ما أميل السفر للدول العربيه، بالذات مصر، ولد عمي يمدحها ويقول فنانه وأهلها كشخه ...

حد يقول هي حلوه حق السهرات، يعني في حياه في الشارع، وهذا ممكن يكون حتى عندنا في البلاد، بس يمكن

لأنه الواحد يغير جو فيكون غير ... بس إنه يهال يحبون مصر هذا شي غريب !

المزوحي
مصر ما تنفع لعائلة

مصر حق شباب ما يبون يشوفون الشمس
سر وعربده لين الصبح
ههههه


انا اذا الله راااد رايح لبنان السنه

مادري عيل ليش أنا ما حبيت لبنان ...

كل واحد له وجهة نظر، بس خلنا نشوف وين وجهتنا السنه ..

شكرا لك على المشاركة

السنة هاي مو مبين ان في سفر بس ان شالله
لو سافرنا ان شالله بنروح المانيا صوب البلاك فورست يعني المناطق اللي حولين فرايبورغ
و من هناك بنسير المناطق الجريبة من سويسرا و فرنسا

كنا مقررين نسير كندا و امريكا بس شكلها اتاجلت للسنة الياية .. ان شالله ..

الله يكتب لكم اللي فيه الخير ... بس عفاريتووو هالمنطقه زايرينها قبل وإلا بتكون أول مره ؟!

امبلا زايرينها ثلاث مرات قبل
حلوة المنطقة واييد حلوة
من الاماكن اللي رحنالها في اوروبا هالمنطقة عيبتنا اكثر شي
الطبيعة فيها واييد حلوة غابات و بحيرة
و الحلو فيها ان جريبة من سويسرا ( زيورخ و باسل )
و جريبة من فرنسا بعد
و جرييبة من يورو بارك
يعني في واييد اماكن حوالليها ..

وأظن يا عفاريتووو ألمانيا أحلى عن سويسرا وفرنسا .... يعني ماتملين منها بسرعه .. انا الصراحه ماسرت ألمانيا

وفي خاطري أزورها ..

المزوحي
ما شاء الله الأهل كل ما يحصلون فرصه يروحون لبنان
يرتاحون هناك
مكان نظيف ويغيرون جو مال 5 ايام

عاد الحين ماسكين زام
كل فتره حد يروح

المنطقة اللي طرتها عفاريتووو

black forest GERMANY

http://www.galenfrysinger.com/germany_black_forest.htm

المزوحي هالمره ما بنسير ويا عوايل
بس بروحنا
يعني انا و اخواني الثلاثه و الوالده الله يطول عمرها
ها بالنسبة للكروز و عقب صوب سويسرا بيتلاقون ويا حد من بيت يدي "الله يعلم اي خال او خاله فيهم لول"
بس بالنسبة لرحلة السفينه بنكون بروحنا و بدون ازعاج الخلق

بالنسبة لانترلكن ( سويسرا ) منطقه هاديه، بس ماتقدر تيلس فيها وايد

كنسلوا الكروز اليوم
طلع وايد وايد مكلف لأن الغرف العادية خلصت و ما بقى غير الغرف الي وايد VIP لول

احتمال كبير يأجلون الكروز للسنه الي عقبها و يحجزون من اول سنة 2010
عشان نحصل الغرف الي نباها

بالغرف العادية بيطلع الشخص الواحد بـ ٢٥ الف تقريبا
بالغرف الي بقت الشخص الواحد بـ بخمسين الف تقريبا
يعني خمسين في ٥ ميتين و خمسين الف عشان نركب لنج و يودينا ١٣ يوم p=
يخسون والله لول


الخطة اليديده هي انهم ناوين يسيرون جنيف اسبوعين
و عقب صوب لوزان و زيورخ اسبوعين

طبعا بتغير رايها الف مره بس عادي بقولكم عن كل مره تتغير فيها الوجهة عشان ازيد من الافكار في الموضوع p=

اشكرك اخويه ذنيني على التفاعل، صدق استانست من ردك يوم قلت

( بس عادي بقولكم عن كل مره تتغير فيها الوجهة عشان ازيد من الافكار في الموضوع )

لأنه لو تميت لين قبل ما تسافر بأيام، ما كنت بترد على الموضوع، مب مشكله لو تكتب شو اللي مفكرين فيه، وعقب

تتغير الخطط ...

تسلم ذنيني ... :a042:

افا عليك يالمزوحي
اصلا انا احب اي شي عن السفر و استانس عليه

ذنيني يوم تاخذون كروز تأكدوو انكم تاخذون واحد صح.. لانه في ناس نعرفهم سارو وآخر شي طلع انهم على كروز شياب وعيايز :s


من ناحية عايلتنا لين الحين مافتحو الموضوع.. بس أكيد لندن!

شمعة أمل ( أكيد لندن ) في القايمه والبلاد الثانيه ماتعرفون وين !! بس المحطة الاصليه لندن ..

خبرينا عن لندن شو تحبين فيها ... !!

وإذا تعرفين عن محلات Primark هل فيها شي يستاهل ؟؟

ممممم الصراحه ما جد سرت برايمارك:s .. بس الى اعرفهه انه محل كله يبيع اشياء رخيصه وبحسبة (سناء) الى في دبي

أنا ابااااا اسيـــر السعوديـــة ... أرخص وأحلى بلاااااااد فالعاااالم لول

سلام عليكم ورحمة الله وبركاته
موضوع فى محله ويشوقنا فى شىء اسمه السفر
انا السنه بسير الفلبين ان شاء الله وتقريباً بيلس هناك 20يوم بكون فى مانيلا العاصمه فى حى مكاتى الراقى
وبزور جزيرة ليتى وتكلوبن وسمر وبورقاى وسنتانا .. ومنطقة باجيو وطبعاً بتكون ثانى رحله الى الفلبين
وبالحياه لين هاك اليوم وشكراً على الموضوع الحلووو
سلامت سا

شمعة أمل ،،، يمكن لأنه محل كبير ويبيع وايد شغلات ... مـــادري كل شي جايز ..

العجيبة الله ايسر لكم ..

بحر الموده مرحبا ... الله يطول بعمرك و يبالك تقرير عن الفلبين ...

80 % هـ الصيف أقعد مع اخواني بالبيت =( شكلي يحزّن

ابوي و امي و خواتي راح ينزلون بانكوك امي و ابوي رايحيين قبل بس خواتي لأ

مزن هتان ليش ما تكون رحله عائليه، اقنعيهم ...

نحنا لين الحين الجماعة متفقين يسيرون كلورادو - امريكا >_<
ويمكن يتمون شهر ونص ..
اذا في اي تغيير في الخطه بسويلكم update ^_^!!

ربيعي يقول امريكا حلوه، بس شهر ونص مب وااايد وإلا وناسه، وشو عنك بيعطونك إجازة طويلة ؟

^
شهر ونص وزين اذا يمديهم ايخلصون مشاري >_<....
لأنه كلورادو وايد فيها اماكن ونحنا من زمااااااااااااان ما سرنا لها !
من ناحية الإجازه فأكيد بسير وياهم وبرد قبلهم لأنه ما بيعطوني اجازه هالكثر .. اصلا رصيدي ما يغطي ..
او يمكن ايسيرون قبلي وانا الحقهم ^_^

احسن خلهم يسيرون وتردون ضربه، لأنه مابتقدر ترد وهم هناك ، عن تنقهر ..

وإن شاء الله تنبسط

صدق تذاكر السفر رخصت ؟؟؟

وشو عن لندن ، هل السكن ارخص حاليا ؟

اليوم سرت سويت مقابلة الفيزا في السفارة الامريكية
الحمدلله الامور كلها كانت متيسرة و الفيزا ان شاء الله بتطلع هذا الاسبوع

=======

اخر خطه رسينا عليها هي
10 ايام في لوس انجلس
10 ايام في سان فرانسيسكو و ما جاورها
10 ايام في كندا, فانكوفر

و الرجوع بيكون من سياتل

رحلة موفقه ذنيني

لين الحين ماعرف بالضبط وين بسير فالصيف XD يوم بتأكد شو بيستوي بخبركم ان شاء الله ..

بس فنص هالشهر بسير 4 ايام جزيرة في تايلند اسمها Krabi حق ريلاكسيشن مساج وسبا وسباحه...الخ
قريت عن المكان طلع وايد حلووو فيه خصوصيه
كنت متردده الصراحه لانه كلهم اول مره يسيرونها بس عيبتني عقب

برجع وبدرس عدل عشان شهر 5 يوم اجازة الجامعه مال الامتحانات بسير لندن لوول بس سفرة الصيف للحين ماااعرفففف شي!!!!

هـالصـيف بـنسيـر " فينـا " ان شاء الله مـع أبـويه بـدون امـايه

بخلـص امتحـآنـآتي تـآريخ 13 وآبـويه بيطلع اجازه تـآريخ 1 - 7 وبـنسيـر 15 يـوم تقـريبـاً ..



احس مب شــي ، نسير 3 بنـآت وابـويه بس ..

انا ان شاء الله اخر الأسبوع ساير سان فرانسيسكو .. وبوافيكم بآخر الأخبار من هناك ^_^!!

والصيف كل شوي يغيرون رايهم !

الياه نايس الصراحه ... وبما إنج خبيرة لندن شو رايج بمانشستر ( تشد سايرتلها ) ؟

مهابه ( انجوي يور تايم )

مايهزك ريح ... كيف بتخلي رصيد الاجازة حق رحلة الصيف :) المهم ( انجوي )

^المزوحي : سرتها من زماااااان .. اذكر اكثر شي ستانست فيه هو حديقة الملاهي تون تور تجنن
بس هي جي بلاد ريفيه يعني وكلها طلاب جامعات .. ووايد هاديه


لندن حلاتها انها حيّه وكل شي عدال بعض

المزوحي لو عندك اي استفسار عن مانشستر لا تتردد
اخويه يدرس فيها و بيجاوبك على اي سؤال