عرض للطباعة
مرحبا ^_^
قد يهتم الناس بأسنانهم فقط للحصول على ابتسامة جميلة
و لكن الأسنان أهم من ذلك من بكثير
فصحة الأسنان و الفم بشكل عام هي من صحة الجسم
الكثير من الأمراض قد تكون أول عوارضها ظاهرة من خلال الفم
كما أن أمراض الفم قد تهدد صحة الجسم
لذا فالاهتمام بصحة الأسنان أمر ضروري
فمن هنا و في هذا الموضوع
سنكون معكم ( عفاريتووو و عذبة الروح )
بما أننا طالبات في كلية طب الأسنان
لنوافيكم بالمعلومات التي قد تفيدكم في المحافظة على أسنانكم
و سنرد على استفساراتكم و تساؤلاتكم بكل ما يخص الأسنان
- قروب ألوان
بعد الاكل ، تتغير درجة الحموضة في الفم
فالحلويات و الأشياء اللي تحتوي على سكر تزيد من حموضة البيئة في الفم
و هالشي يخلي المعادن تبدأ تطلع من الأسنان مثل الكالسيوم و الفوسفيت
و عقب مدة اذا ما كان في اي شي يأثر على درجة الحموضة
تبدا الحموضةو تنقص
و ترد المعادن للأسنان
اذا مرت فترة الطويلة و المعادن ما ردت للسن تبدا البكتيريا تهاجم هالسن
و مع الوقت اذا استمر على هالحال
يبدا التسوس
أهم عوامل التسوس؟
عشان يصير التسوس لابد ان تتوفر هالعناصر
و اللي هي:
1- الأسنان
2- البكتيريا
3- السكر
4- الوقت
يعني مثلا
1- لو كان عندنا أسنان وفي بكتريا وسكر لكن ما اعطينا وقت لتكون التسوس
يعني غسلنا الاسنان بـ الفرشاة والمعجون .. مستحيل يكون في تسوس
2- لو في أسنان وفي سكر وما غسلنا أسناننا يعني الوقت طويل و ما عندنا بكتيريا .. الناتج ما في تسوس
إلخ
أما وجود الأسنان + البكتريا + السكر + الوقت الطويل بدون غسل الأسنان بـ شكل صحيح
التسوس موجود
نصائح:
-لما تاكلون حلويات او اي شي فيه نسبة سكر كبيرة ينصح بأن تاكلون كل اللي تبونه مرة وحدة
لأن الكم ما يأثر
اللي يأثر هو عدد المرات اللي تاكلون فيها
- غسل الأسنان ع الاقل مرتين باليوم بالفرشاة و المعجون
و استخدام خيط الأسنان لتنظيف الأماكن التي قد لا تصل اليها الفرشاة
( ما بين الأسنان )
-استخدام معجون أسنان فيه فلورايد
لأن الفلورايد يخلي الأسنان تتحمل الحموضة أكثر
الموضوع متجدد فترقبوا المزيد من المعلومات و لأي استفسارات نحن حاظرين ^_^
- عفاريتووو و عذبة الروح
من قروب ألوان
اشكرج على المعلومات القيمه
الصراحه ماكنت اعرف ان الكميه ماتاثر كثر ما عدد المرات الي ناكل فيها!
شكرن سيس
مشكوره على المعلومات القيمه دكتورتنا :)
بس عندي سؤال دوم اسأله لأطباء الأسنان وما يجابون عليه !!!
شو أحس معجون أسنان ؟
تسلمون ... ماتقصرون ولو عندي شي بسأل :)
تحفة
العفو عزيزتي
اهم شي ان تستفيدين منه ^_^
..
حلم الطفولة
المعجون مجرد شي يساعد ع التنظيف
يعني عشان تعرفين وين المكان اللي بعدج ما وصلتيله
و يعطي نكهة
المهم ان المعجون اللي تختارينه يكون فيه فلورايد
بس في بعضهم يكون فيهم مادة للتنظيف بس تضر بالأسنان
و تسبب حساسية الأسنان مع الوقت
عندج كولجيت و كرست زينين
الأهم هي الطريقة اللي تفرشين فيها أسنانج
و اختيارج للفرشاة
و بحطلكم الطريقة في رد ثاني
الطريقة الصحيحة لتفريش الأسنان:
- في طرق مختلفة بس اللي أنصحكم فيها هي اللي تكون بشكل دائري
يعني تروحون على كل سن و تحركون الفرشاة عليه بشكل دائري
- تبدون من جهة معين
يعني مثلا تبدون بالأسنان اللي فوق من جهة اليسار على الجهة الخارجية
و تروحون من سن لــ سن لين ما توصلون لآخر سن فوق
عقب تروحون للجهة الداخلية بعد نفس الشي تبدون من جهة اليسار و تروحون من سن لسن
و عقب ع تحت السن و بعد نفس الشي
و نفس الطريقة للأسنان اللي تحت ..
جي أحسن عشان ما تنسون و لا سن و تكونون فرشتوا السن من كل جهاته
فرشاة الأسنان:
- الأحسن لما تختارون الفرشاة إن ما تكون فرشها كلها نفس الطول
يعني تكون مستويات
جي بيكون احسن لان الفرشاة بتقدر توصل لأكثر الاماكن
- ىتغير فرشاة الأسنان بين كل فترة و فترة
و خصوصا لو حسيتوا ان فرشها بدت تخترب
و يُنصح ان تغيرونها كل 3 شهور
- كل ما تمرضون الأحسن انكم تغيرون الفرشاة
لأن البكتيريا ممكن تكون بعدها موجودة ع الفرشاة
حلم الطفوله
رداً على سؤالج ..
من سنتين سألت دكتورة اختصاصها (طب الأسنان الوقائي - preventive dentistry) عندنا في الجامعه
عن أحسن معجون أسنان ..
وقالت لي كلنا في البيت نستخدم oral-B
معجون أسنان - سائل غسول / مضمضه الفم - خيط الأسنان - فرشاة الأسنان نوع ناعم
انتاجها كبير ويعتمد على رايي أطباء أسنان عالميين
ومن خبرتهم ومتابعتهم لـ احتياجات المرضى يتم تصنيع منتجات oral-B
.. انصحج بها ..
والسموحه
عني انا كل مره معجون شكل ... آخر مره ( من يومين ) خذت كرست وسنسوداين وحق الصبح كلوس اب الخضر
وخذت مضمضة سنسودين ... واستخدم خيط اورال بي ..
بس ماعرف احس احيانا نوع معين من الاكل يخلي الاسنان مش نظيفة لو شو سويت :(
هل الاكل له دور في ريحة الفم ؟؟؟ (طبعا غير الثوم والبصل )
المزوحي
هيه الأكل له دور في ريحة الفم
لو تم بقايا الأكل مدة في الفم بيسبب وجود بكتيريا
و هالشي يأثر على ريحة الفم
عشان جي الأحسن ان تتمضمضون عقب ما تاكلون
و عن ان في انواع من الاكل تخلي اسنانك مو نظيفة
لما تفرش اسنانك حرك الفرشاة ع كل سن بشكل دائري
جي بينظف اكثر شي ممكن
جرب و ان شالله تجوفه احسن ^_^
لنفرض إني اغسل اسناني بالفرشاة المعجون آخر الليل، وأرقد .. صح الواحد يوم ينش الصبح .. نفسه يكون
اغير بحيث إنه لازم يضرب معجون او ياكل شي عسب الريحه تتغير ...
سؤالي هل منتجان الألبان لها علاقة ..
المزوحي
ما يا ع بالي هالشي
دورت الحين عن هالموضوع
و طلع صدق ان منتجات الالبان لها دور في ريحة الفم
و اي شي فيه بروتين
لأن البروتين هو السبب اللي يجمع البكتيريا
فــ منتجات الألبان و اللحوم و الأسماك لها دور في ريحة الفم
عشان جي ينصح ان تغسلون أسنانكم عقب ما تاكلونهم
.اقتباس:
Clean your mouth after eating milk products, fish and meat.
زين كلنا نستفيد من بعض :) على العموم مشكورة ع الموضوع
http://oasis.bindubai.com/bin/upload...1201028869.gif
تسلـمون ع هـ الموضــوع المفيــد =)
http://oasis.bindubai.com/bin/upload...1201028869.gif
المزوحي
هيه :)
العفو اخوي
..
طير الغرام
الله يسلمج
و اكيد ما نستغني عن ارائج و معلوماتج في هالمجال ^_^
انا عندي سؤال بعددد
انا سمعة انه رائحة الفم مايخصهـا في اذا تفرشين اسنانج ولا لا.. لكن يخص اللسـان فـ لازم تنظفون لسـانكم بهالعصا مال اللسان
صح ولا؟؟
شمعة أمل .. كلامج صح وانا عندي منها
شمعة أمل و المزوحي
هو تنظيف اللسان له دور
بس مب انه لو ما فرشتوا أسنانكم هالشي ما يأثر ع ريحة الفم
لأن شي واييد أسباب لريحة الفم:
- بقايا الأكل اللي في الفم اللي ما يروح الا بتفريش الأسنان
- البكتيريا اللي ع اللسان
- التهاب اللثة
- أدوية
- التهاب اللوز
و أسباب ثانية ..
معلومات يديده! بسيـر اخبر وحده اعرفها لانها يلست تقولي انه كل مشاكل الضروس والفم بس تستوي يوم ماتنظفين ضروسج:rock:
انا الحمدالله ماعندي مشاكل بـ ضروسي الدكتور دوم يمدحني:biggrin:
عفاريتووو من هاي اللي عندي
http://www.awas1.com/upload/image/toungescraper.gif
يعطيكم العافيه ^_^
الموضوع جدا مشيّق ومفيد
المزوحي.. هذا عباره عن شو؟
===
انزين انا عندي سؤالين ..
كيف تتكون طبقات الجير؟
وكيف ممكن التجنب منها؟
وغير جي
سمعت وجربت ان المسواك يقدر يقاوم طبقات الجير
اذا استخدمناه بشكل دوري
ياليت لو نسمع منكم ونستفيد ^_^
شمعة أمل
لوول انزين قوليلها
هو تنظيف الاسنان ممكن ان يقلل من المشاكل
بس مب ان هو السبب الوحيد
مثلا في اسباب وراثية تاثر ع لون الاسنان
في اسباب مرضية ممكن تاثر ع الاسنان و اللثة
ال life style بعد يأثر مثل التدخين
و الادوية اللي خذتوها لما كنتو صغار
و جي يعني
شطوووورة D= و الله يبعدج عن كل مشاكل الاسنان ^_^
..
المزوحي
هاي اسمها tooth scraper
تنظف اللسان
بأن تشل البكتيريا و الخلايا الميتة من اللسان
بنت الدلع مثل ما قالت عفاريتتو اسمها بالانجليزي وبالعربي كاشطة اللسان
يعني تبتدين تنظيف من آخر اللسان ( ولو تحسين بلوعه، بس كملي ) لأنه في نوع من البكتيريا تتكون على اللسان
زين شو رايكم اشل ويايه المسواك الدوام :look:
:
.
السلام عليكم ..
الصـــــــراحه ،،
موضوعكم :thumbup1: ..
متـــابعه أكيد =)
.. .
بنت الدلع
كيف تتكون طبقات الجير؟
أول شي اذا مر يوم و ما فرشتوا أسنانكم بالشكل الصحيح
يتكون البلاك اللي هو طبقة بيضا من البكتيريا و مواد ثانية
و اذا مرت بعد ايام و بعده البلاك ما راح
بيتراكم اكثر اكثر
و عقب فترة بتدخل فيه اشياء ثانية و بيبدا ييبس
هني بيتحول ل جير
وكيف ممكن التجنب منها؟
عشان تتجنبون منه لازم ما تخلون البلاك يتراكم
و البلاك ينشل بالتفريش الصحيح للأسنان
و هيه السواك يفيد لانه يخوز البلاك ..
..
المزوحي
هيه المسواك واييد زين :thumbup1:
..
سكون
عليكم السلام
يسعدنا متابعتج ^_^
موضوعكم حلـــو . .
أنا والأسنان معناه لاتنتهي ~ . . .
يعطيكم العافيه عفاريتوو وعذبة الروح على هالموضوع . . .
وموفقين ان شاء الله . .
ما شا الله عليج عفاريتوو .. كفيت & وفيت
متابعه لـ ردودج ...
مميزة
مــهابه
يبالج تشوفين اللي عندي ..!
على قولة بعض الناس ..
باب النجّــار مخلّــع
كله بسبة دوا استعملته .. من 3 - 4 سنوات
سبب لي جفاف .. dry mouth / xerostomia
ما قول الا ..
الحمد لله على كل حال
مهابه
الله يعافيج عزيزتي
الله يعينج
و ان شالله تفتكين من هالمعاناة ^_^
..
عذبة الروح
و اضافاتج مالنا غني عنها ^_^
ماشااللــه موضوعكم حلو :k_smile2: و يفيد الكل
أنا بعد الحمدلله الحمدلله الحمدلله مليووووووون مرة ما عندي مشاكل في ضروسي
بين فترة و فترة أسوي تنظيف و أجيّك عليهم عند الدكتور
انزين دكتورنا العزيزة عفاريتو : بسألج
تنظيف الأسنان متى نسويه ؟ ، يعني تقريبا بعد كم شهر نسويه ؟
أنا أسويه كل 6 شهور =)
و بالنسبة لتبييض الأسنان ، زين ولا يضر ؟
لأنه قالوا لي إنه بتم ضروسج تعوّرج لو سوّيتيه ، و ما يفيد وااااايد
قصايد غلا
ماشالله عليج
6 شهور زين .. واييد زين ..
اصلا هو المفروض ان كل 6 شهور تزورون عيادة الاسنان
عن التبيض ..
يعتمد ع الطريقة اللي يستخدومها ،،ؤحاليا اكثر شي يستخدمون الليزر
هيه هو يسبب حساسة للاسنان بس مؤقت يعني يظل بس كم من يوم عقب التبيض ..
و هل هو يفيد ولا لا ..
هو يفيد و يبيض .. بس يعتمد و يختلف درجة البياض من شخص لشخص
حسب طبيعة اسنانه ..
بس ،، هل يتم لفترة طويييلة و لا يرد مرة ثانية ؟
هالشي يعتمد على اهتمامج باسنانج عقب التبييض ..
ان شالله اكون فدتج
و اسمحيلي ع التأخير ^_^
أسباب تغيير لون الأسنان ؟
هناك اسباب داخلية و خارجية ..
الاسباب الداخلية:
- مرض وراثي يأثر على نمو السن بشكله الطبيعي
- الفلورايد بكميات كبيرة في مرحلة الطفولة ممكن يأثر على لون السن
- مضاد حيوي tetracycline اذا اخذ في مرحلة الطفولة و اذا خذته الحامل ممكن يأُثر على اسنان الجنين
الأسباب الخارجية:
- الأكلات و الحلويات الملونة
- الشاي و القهوة
- المشروبات الغازية مثل بيبسي و كولا
- التدخين
- بكتيريا
- تجمع البلاك و الكلس
و للحفاظ على الاسنان من كل هذه الملونات ، ينصح بغسل الاسنان بعد كل وجبة
او المضمضة بالماء .. خصوصا بعد اكل او شرب الاشياء اللي تأثر على تلون الأسنان ..
و مع تقدم السن ، شي طبيعي ان يقل درجة بياض الاسنان مع تراكم هالاشياء
و شوي شوي تضعف الطبقة الخارجية للسن فتبدا تبدا تبين الطبقة الثانية و اللي هي صفرا ..
ماشاء الله عليج
احس عمري عند عمي
أو مجاابله ابو شماسي و هو يتحرطم عليه...لأني من سنة يدي مارحت لدكتور اسنان
بس معلووماتكم جدا سلسة و تنفهم
احب زيارة دكتور الأسنان,,كل مايحط لي شي على سني لابد اني اتذوقه=q عسب كذى مايعطوني موعد يطفرووون مني=q بطفرج في القريب العاجل=q