تواصل الشباب والبنات ........

السلام عليكم كلكم :fa35:
وصباح الورد :a070:

من خلال ممرستنا للأنترنيت بشكل يومي اجبرنا نتواصلنا مع اشخاص مجهولين الهويه من ذكور واناث يجمعنا فيهم مواقع مختلفة المواضيع منها العامه والأسلاميه والترفهيه. طبعا المشاركه في مثل هالمواقع ما يعطينا فكره عن حقيقة الشخص الي نتواصل معه لنه الناس انواع و اشكال وكل شخص يتطبع بيبئته التربويه فنحصل منهم الطيب الشرير الخبيث الي على نيايته وكثير من هالشخصيات المختلفه. وبسبب الفراغ الي يعاني منه اكثر الشباب خاصه البنات لنه طلعاتهم مقتصره على اماكن محدوده وهالشي خلاهم يلجأون لعالم الأنترنيت والتواصل مع العالم الخارجي من الداخل..

الحين

بمرور 18 سنه على اكتشاف الكومبيتر والأنترنيت في بلادنا انتشرت المواقع
منها المنتديات والألعااب و مواقع الصور و الجاتات وغيرها.اغلبية هالمواقع دمرت وااايدين من الشباب سواء بنات او اولاد لنه محد معصوم عن الخطاء لو كان اذكى مخلوق وانبهم تفكيرا ..

بس

في مجموعه من الناس تتواصل مع بعض على انهم اخوان ما يجمعهم الا النصيحه والكلام العفوي
الي ابي اوصل له هو شو رايكم في البنت والولد الي يتناقشون في الأنترنيت على اساس انها سوالف انترنيت ما تعدا حدود الأخلاق والأدب يعني مثال المنتدى
اذا عضوه كلمت عضو او العكس على اساس اخون
هل تحسونه هذا خارج الأدب لنهم اغراب
اذا كنت ولد
هل بتسمح لأختك انها تتواصل مع غريب في حدود الأدب
ولو شريكة حياتك كانت في هالنوع من التواصل قبل وبعد الأرتباط فيك هل بيدخل الشك بينكم او غيره من هالتفكير..(طبعا حددت اسألت الشباب لنه عندي خلفيه عن تفكير معظم البنات)
اترقب وجهات نظركم

في حفظ الله :14:

لي عودة .. ياي احجز لي كرسي ..

بانتظارك خطابكووو ^-^

مرحبااا


اممم الأسئلة موجهة للشباب مع ان العنوان فيه شباب وبنااات

عالعموووم انا بجـاوب بما يمليه علي فكري وما تشاهده عيناي لوول


بالنسبة لي

أدش النت صارلي قريب الـتسع سنوات اذا ما كانو عشر
أدرس في جامعة فيها شباب وبنات
أداوم حاليا فالصيفي واتعامل احيانا مع الشباب


بالاضافة لهذا


إخواني وأبوي يعرفون هالشي
يعرفون اني اتواصل مع الشباب في مواضيع وأشياء مختلفة على حسب المكان والظرف والحاجة اللي تخلينا نتواصل
يعني بحدود المعقول والمنطق والأدب


لذلـــك

ما أشوف هالشي غلط أو إنه ممكن يسبب الدمار
لأنه لو كان كذلك كنـت من زمااان متدمرة خخخ

في حالة وحدة ممكن يسبب الدمار

إذا كان فيه تساهل من طرف البنت وفي نفس الوقت الشاب مطامعه خبيثة وتفكيره دنيء


عمومـا


الدمـار شيء كبير وما يصير الا بعد ما نغلط غلطة كبيـرة كنا في البداية نحسبها شيء عادي

وعني أنااااا

إذا بغيت ألعب وأخربط في أي مكان من الاماكن اللي ذكرتها فوق ما في شي بيغلبني أو بيعترض طريقي
وإذا بغيت أحترم نفسي وأخلي اللي حولي يحترموني غصبا عنهم بعد ما في حد ممكن يمنعني

بالمختصر .. أنت تختااااار !


تحياتي

السلام عليكم ..

"ايه احبك"

مابتكلم عن عالـم الانترنت بس لأن اليوم العلاقات في كل مكـان مثل ماذكرت العجيبة وعلاقـات
الشباب بالبنات في الانترنت صارت عند البعض هي الشي الطبيعي
اما العكس فبيكون مخالف للعادة، حسب
آراء كثير من الشباب
اللي سألتهم عن شي قريب من هالموضوع قالوا بأنه شي أشبه بالمستحيل إنهم يتزوجون وحده
عمرها ماحبت أو رمست ونسبة إنها تكون تعرفت على واحد بس عادي
توصل 90% يعني فاقدين الأمل في الجيل
هذا تقريبا مع إحترامي
للجميع وأكيد في بنات ماعليهم غبار ولكن الواقع يفرض نفسه وهذا اللي الكل يشوفه ويسمع عنه
ويقرا عنه، للأسف جيلنا يمكن كان ولايزال محافظ شويه بطريقة او بأخرى
ولكن الأجيال اليايه قوم بو ستايل وفشخره
ومصاخه (اللي فضخوا
الحيا بكل معاني الكلمة) غاسلين ايدنا منهم يعني قبل كانت القاعدة تقول بأن الناس يمشون في
الطريق الصح ولكنهم عرضة للإنحراف ولكن اليوم صارت القاعدة تقول
بأن الناس يمشون في طريق الإنحراف وهم
عرضة للإلتزام، بالنسبه
لي كون ماعندي حد أصغر مني في البيت ماجربت أتحكم وأسمح لحد بانه يدخل ويشارك ويناقش
أو لأ؛ بس أحس نفس ماذكرت العجيبة بأن لو كان في حدود الأدب
وموضوع محترم أو عمل محترم وشي
يشرف أوكيه مابعارض
بالعكس بشجـع ولكن غير جيه لأ بيكون في خط أحمـر لايمكن تجاوزه، الغالبيـة يغلطون ولكنهم
يتعلمون من هالشي أما البعض فتعيبهم السالفة ويستمرون لين تصير
عندهم خبرة ويبدون في التنافس وللأسف
يتدمرون أخلاقياً تماماً

كل شخص تربيته والبيئه اللي عايش فيها تحدد له مساره وهالشي يكون واضح على تصرفاته يعني
مايحتاي حد يشهد له أو إنه هو يمدح معدنه وأصله ونسبه هني وهناك
وغصب يحاول يرفع الراس لو كان واطي لأنه مابييب
نتيجة الراس بيكون في الأرض
منو ماكان

الاســـطـــوري
أخوكم

وعليكم السلام ورحمة الله وبركاااته ..

.
.


رأيي ..

ارفض ان الولد والفتاة يتواصلون ويتكلمون عالمسنجر أو الجات ..
لان صدقوووني هالمحادثة بتتطور .. وبتطور .. مهمــا كاااان ..
ومستحييييل ما يميلون للطرف الثاني في يوم ..! << أغلبهم ..

إلا .. إذا كان هناك غرض ضروري للمحادثة ..
مثلا سالفة العجيبة انها تدرس في مكان مختلط ..
يعني اذا مطلوب انها تشتغل ويا شاب في مشروع .. او بروجكت ..
فـ هالشي عااادي .. لان في غرض من المكالمة ..
وحتى في هالحالة .. تكون محادثتهم في حدود الغرض .. فقـــط ..!


لكن سالفة المنتديات ..
في شي اسمه الرسائل الخاصة ممكن عن طريقها نناقش ونتفاهم ..
مو ضروري اني اسير آخـذ إيميل الشاب واكلمه عالمسن !




وسالفة ان الشاب ياخذ وحدة كاااانت تكلم واحد "عالنت" ..
برأيي هالشي عادي .. لأن كل ابن آدم خطاء وخير الخطائين التوابين ..

وصدقوووني .. سالفة التفاهم بين المتزوجين ..
ماااحد بيحس فيه وبيفهمه .. الا اللي يعيش فيه .. بـــــــــــــس ..!

.
.



وتسلمييين إيييه أحبـــج عالموضوع ..

وصبــاااحج عاافيــة .. ^_^

مدام في حدود الأدب والذوق ونواياهم صافية ... مافي أي مشكلة

حالي من حـال العجيبـه بالضبط ..
و كنت يايه بكتب اللي كتبته بالضبـط !

انت اللي تختار طبيعه الشي اللي يصير بين نفسك واللي حواليـك ! ~
شكرآ ع الطرح ايـه أحـبـك .. كان الود ودي أكتب شي زيـاده بس ما حصلت أحـسن عن رد العجيبـه
وذا كان لي تعقيب ع الردود .. برد ان شا ءالله ~ =)
تسـلم يمنـاج ع الطرح ولا هنتـي ~

بسم الله الرحمن الرحيم

الحمدلله والصلاة والسلام على أشرف الأنبياء والمرسلين ، سيدنا محمد صلى الله عليه وسلم
أما بعـد

في البداية اختي الكريمة ، ومع فترة وجودي في هذا العالم الملئ بالاشياء الطيبة والسيئة في الشبكة العنكبوتية ومجال المنتديات ، مريت بمواقف ، ومروا بها غيري .. واستفدت منها واعتبرت منها في نفس الوقت

فلانة من الناس

حدرت عالم الانترنت وهي ما تعرف عن الدنيا شي .. وتفكيرها محدود جدا لصغر سنها وقلة تواصلها وبحكم طبيعة الفتاة الفطرية ، طبعا الشي الي كانت تتصف فيه هو سذاجتها في الحكم على الأمور وقلة وعيها وفهمها ، الله أعلم هل هو تقصير منها أم لا مبالاة أم سوء تربية أهلها لها !
الله اعلم

وخطوات تغيير المنكر ثلاث مثل ما وضحه رسولنا الكريم في حديثه
إما باليد ، أو باللسان ، أو بالقلب وهو أضعف الإيمان

قدمنا الي قدرنا عليه من نصح وتوجيه وارشاد ( باللسان )


ع العموم كانت النتيجة غير مرضية رغم النصايج المتكررة على مدار شهور ويمكن توصل سنين
لأنه الي معدنه غير طيب وغير سليم ،، ما انقول غير ربنا يهديه ، ونرجو له الهداية من رب العالمين

///

فلانة من الناس

خذت كل الأمور بساطة ، وشافت انه الدنيا هاي عسب اتحس انك متطور فيها لازم تختلط بالناس
سواء كان الاختلاط حلال أم حرام ، مش هامنها هالشي ، بس تبا تختلط بهم بحجة انها تبا تستفيد منهم ...

الإسلام وديننا الحنيف يوم حرم الاختلاط ، تم تحريمه لاضراره الجسيمة على الفرد والمجتمع
بتقولون شو الأضرار .. ! بقولكم كل واحد يشوف حوله وبيعرف
شوفوا حالنااا وين وصل ! شوفوا حال معظم الشباب ومعظم البنات وين وصل إلا من رحم ربي ..

ونرجع لصاحبتنا فلانة ...

تعرفت على شاب من أحد المنتديات .. وتطورت العلاقة بينهم ، بدأوا بالمحادثة الكتابية ثم المحادثة الصوتية حتى وصلوا إلى اللقاء النظري ومن ثم اللقاء الجسمي والجنسي والعياذ بالله

ولا تقولون لي يا هيثم انت تبالغ ، هالاشياء استوت .. والله يستر عليهم

- - -

خلاصة الكلام
أو هي رسالة أحب اوجهها لكل من يقرأ هذه المشاركة

كل ما ابتعدتوا عن دينكم ، صدقوني بتزيد همومكم
وإلي يعصي ربه في شي .. النتيجة بتكون في شي ثاني

بعطيكم مثال
سواء إنت أخي الشاب ، أو انتي اختي الفتاة
ارتكبتي معصية من المعاصي أو ذنب من الذنوب ، إذا شفت نفسك عقب هالمعصية استغفرت ربك وقمت اتطيعه وتدعي ربك إنه يغفر لك ، ها معناه إنه قلبك لا زال صاحي وواعي وينبض بالإيمان

لكن ياا أسفاه على الي يعصي ربه ولا يبالي
ربنا عطانا هالدين الكامل المكمل ، والله صدقوني لو نتمسك فيه بنعيش حياة سعييدة من غير هموم ، وهالكلام عن تجربة ، إلي متمسك بدينه وبشرع ربه ومحافظ على الطاعات وعلى القرآن ، وحاط نصب عينه قبل أي شي يسويه شو راي الدين في هالشي ، والله إنه بيعيش حياة سعييدة بقلب مرتاح

الاختلاط نتايجه وخيمة جدا
البنت إذا كانت تشتغل مع الشاب أو تختلط معاه في مكان ، يمكن في بادي الأمر تكون مستحيه ومنزله راسه وخدودها ( حمره ) ،، لكن مع الأيام الحياء بيزول .. وإذا زال الحياء فاصنعوا ما تشاءون

ردا على سؤالك إختي الكريمة إيه أحبك
أنا لا أرضى أن تختلط زوجتي أو اختي أو بنتي مع الرجال ...
لأني بتحاسب عليهم يوم القيامة ،، بتحاسب عالابتسامة الي ممكن تطلع منهم

وأعيـد وأقول أنا مب ضد عمل المرأة ..
لأن المرأة هي الي بتعلم بناتنا ، وهي إلي بتعالج حريمنا
لكني ضد الاختــلاط ..

للأسف قبل سنين ... كنا نسمع عن المستشرقين
ولكن وللأسف اليوم قمنا نسمع عن المتفرنجين

بناتنا تفرنجوا ،، قاموا يقلدون الغرب في كل شي حتى في كلامهم مع بعض
ماخذين الحياة سهلة وهم ما يدرون إنهم والله بيتحاسبون على كل شي

شبابنا تفرنجوا فـ لبسهم وعاداتهم وتقاليدهم وكلامهم وتفكيرهم
إلا من رحم ربي

قمنا نشوف البوي فرند والقيرل فرند
هالأشياء بذمتكم تمد للإسلام بصلة !!!

قبل كم يوم كنت يالس مع رجل بريطاني كبير في السن
دخل الإسلام تقريبا من حوالي ثلاثين سنة

يقولي أنا إذا ييت أنصح الكفار ... يردون علي شو الفرق بينا وبينهم
لبسهم شرا لبسنا ، عاداتهم هي عاداتنا .. ما في شي يميزنا عنهم ...

^^ ما عرفت شو اقوله ! ولا هو عرف شو يرد عليهم .. !
لأنه هذا الواقع

وللأسف نحن فـ يوم القابض فيه على دينه كالقابض على جمر ...

وأصبح الفاسق والعاصي والمقصر هو الصح
والملتزم هو الي غلط ...

والسمووحة

كـنت اندهش يوم أشوف بنت تتمشى بزينتها وشعرها وتبرجها ..
واتســائل كثييير .. وين أخوها عنها؟ والدها؟ أهلها؟

بس عقب ما دخلت لبيئة أكبر .. وشفت العالم ..
استغربت والله يوم دريت ان الأهل يرضون بهالشي ..!!


سبحاااان الله..
أنا البنت وأقول خاااطري أكفخها وأأدبها ..
عيل أخوها الشاب .. أو أبوها .. وينهم عنها ..؟؟!


وهالفئة يسمونه .. ديوث ..
وهم اللي ما يغارون على أهلهم .. وهالشي منتشر بكثـــــــرة بهالزمن ..



صدقوني ..
إذا في حد يقدر يردعهم ويوجههم للطريق الصحيح ..
أظني بيتعدلون ووبيهتدون ..
لكن .. الكــــل في سبات عمييييـــق .. وفي عالم التخلـــف .. >< !

.
.




الحمـــــــــــدلله .. الحمــــــدلله .. الحمــــــــــــدلله ^^

.
.


اممم السموحة عالرد .. الخارج عن الموضوع ربما ..
بس تعقيب أخوي خطـّاب أجبرني عالمداخلة ..

السموحة مرة ثانية ^_^

ما بني على باااطل فهو باااطل !!

حبيت اوضح انه الأراء في هالموضوع مشتركه بين البنات ولأولاد
بس حددت كمن سؤال حق الشباب عسب اشوف وجهة نظرهم
--
العجيبه - الأسطوري - دموع قلم - ولد الشحوح - قرموشه - خطاب - مجموعة انسان

اسعدتني ردودكم وتواجدكم في موضوعي :fa35:

احترامي لرايكم الخاص :14:
--
خارج الرسمية
مجموعة نفرات وضح
ما فهمت عليك ؟؟

الدم لين الركب

o - o
؟؟؟
شويعني ؟؟منو بيجتل منو؟؟

كلامي تقريـبا نفس العجيـبه وأقدر أحط نفسي بـمكانها بما اني أدرس في جامعه مختلطه وجد اشتغلت صيفي واختلطت ويا شباب
ومثل ما قالت العجيـبه.. إنت تختـار
اشتغلت صيفي مرتيـن وكملت سنتيـن في الجامعه وليـن يومكم هذا محد عنده رقمي أو إيميلي الخاص اذا برمس عن الشبـاب
الوحيدين الى عندهم ايميلي وهو ايميل خاص للجامعه.. هم شباب اشتغلت وياهم في قروب


الاختلاط والتواصل عادي بس بحدود.. وإذا البنت تختلط ويا حد يفضل تخبر أهلها .. حتى لو ماتسوي شي غلط.. يعني أهلي يعرفون اني اشارك في واحات بن دبي..
التواصل حلوو .. ووايد تتعلمون.. لكنـه غلط يوم مثلا البنت تعطي الولد ايميلهاا..انا ضد هالشي.. اذا البنت تبا تختلط خلها تختلط جدام النـاس.. مب وراهم

في الاخيـر البنت هي الى تختار مدى الاختلاط ونوعيـة العلاقه الى بتكّونها مع الشخص

تعرفين انا دايما يوم اشارك في الواحات اكون بالضبظ مثل ما انا يوم ارمسج انتي او ارمس ربيعاتي " الي وايد كلوز" حتى بصراحه اقولها انا مب مستوعبه ان هالنك نيمات لاشخاص صدقيييين! ماقدر مستحيل اتخيل مادري ليش ;/
انا مع ناس غرب مستحيل تلقيني جيه ...

لــيش؟

لأن التعامل في المنتدى احسه ياخذ شكل شخصي اكثر من عام (نظرتي الشخصيه)! ف يوم اسولف القى عمري اسولف بنفس الطريقه الي اسولف فيها وي ربيعاتي يعني نتمصخر عادي لاني انا وربيعاتي متفاهمين بس هني يوم بتقولين شي بتحصلين كمن reaction.

صادفتني (فعل ماضي) مواقف خايسه بسبة هالشي ( مس-اندرستاندات ) كثر شعر راسج وي الاعضاء " الاولاد" واعتقد ان السبب كانت عفويتي و نظرتي الشخصيه الي ذكرتها فوق! ( طبعا الجدام بس بيعرفون عن شو انا ارمس ) يالله صدق اني قضيت عمر في هالمنتدى!

الموهيم

مريت في مواقف وايده في حياتي فيها اختلاط بس رياكشناتي تعرفينها لول! انا وايد رسمي وي الاولاد لدرجة انهم يتحسبوني خقاقه =/ .. واعترف ماحب اتعامل وي الاولاد من القصص الي تمر علينا علشان جي اتفادا اي احتكاك وي الاولاد ..


المهم .. بس بغيت اقول انه صدق اساس الشخصيه الـ healthy هي الارتكاز على الدين وسبحان الله دينا كامل.. مستحيل يكون اي حد بسبة نت بيكونون اخو و اخت ...هذا كلام يهال... =/

محد ممكن يحل مكان الاخ والاخت والام والابو لو مهما شو.. محد يحبنا ويهتم فينا غير اهلنا الي من لحمنا ودمنا .. محد فعلا ممكن تكون صديقتج اكثر من امج حتى لو في فروق .. لان صدق محد بيخاف علينا وبيصارحنا وبيحبنا وبيعطينا دافع وبيساعدنا غير اهلنا

اتمنى اني ماطلعت برع الموضوع :)

يا اييه احبك انا قصدي من الكلمه
ان لو البنت داخله عسب ادور شباب او تبي تتعرف والولد بعد نفس الشي
ف اتأكدي ان هذا باااطل
وان نهايته بااطل


ولا تنسوون ان في شيطاااان في مخ كل واااحد فيييكم




الحمدلله الحمدلله
انا صح اني اسولف مع البنات هني
وصدق مرات اعرف عمري اني اسولف مع البنات اكثر من الشباب
(سوري يعني ,, حتى في الشغل احب اتعامل مع بنات )
مادري لييش


بس والله ولا في عمري فكرت اني اسوي علاقه وشي
لاني اعرف عمري ما يخصني بسوالف حب ,,
انا شخصيتي شخصية واااحد دفش سوالف حشره خرشه
يعني صدق ما يليق لي اني احب
so
انا قصدي بالباطل هو سبب الإشتراك في المنتدى !!!

:
.

السلام عليكم ..

حبيت الموضوع واضافات الاعضاء ما شاء الله ^_^ ..
ووووان شاء الله يكون لي إضافه إن حضرني شي مانذكر ><"

:

سلمتي عالطرح ..
ويزاكم الرحمن خير عالتواصل الطيب ..

تقديري ..

:.

الموضوع حلـو ~ . .


يـمكن أشيا وايد تغيرت فـ مجتمعنا ، وفـ طرق تواصلنا ، أجبـرتنا أنـه نحن نتعـامل مع الـطرف الأخر . .

لكـن ! . .

ما تجبرنا عـلى طريقـة تعامل معينه ، لأن الشخص نفسه هو اللي يـحددهـا . .


وأهم شي في التعامل مع الأشخاص والطرف الآخر أن يكون هناك [ حـدود ] . .

يـعني مثـال :


~ المنتديات :


نحن نتعامل مع الشباب ونتناقش معاهم ، وأحيان سوالف بسيطه وجيه في حدود المعقول ،

وهالشي ربما يـتطور لأشيا أخرى بإختيـار ( الطرفين ) البـنت والولــد .. . .

فـي المقابل . .

يمكن نتعامل مع أشخاص ونستفيد منهم ومن خبرتهم ، يعـني للغرض اللي تواجدنا فيه ( وشخصياً ما أشوف فيها شي ) . . .


وأعـيد وأررد أنه كل شخص فينا هو اللي يحدد طريقـة تعامله مع أي شخص آخر . .



وبـ أختيـارنا يصير كل شي . . .




إيـه أحبك :


شكــراً ع الطرح

وايد مستانسه لتفاعلكم في الموضوع خاصه انه اول موضوع لي في الواحة المفتوحة والحمدلله انه عيبكم :fa35:

ِشمعة أمل
تحفة
مجموعة انسان
أنامل قلبي -- نترقب ردج :a070:
مهابه

تواجدكم حقا مميز واقدر بشده وجهة نظركم السليمة

اتمنى انه في احد غيري استفاد من وجهة نظر اعضاءنا المميزين
:8:

السلام عليكم والرحمه..قبل كل شي احب اشكرج ع هالموضوع..

اممم الناس اجناس واشكال والوان..وكل واحد غير عن الثاني..وانا عن نفسي ما اثق في اي حد اكلمه بالنت..مادري ليش..بس ترى اللي يقابل الناس بويه ثاني..بي يوم وبيبين كل شي..بس في ناس تقدرين تستفيدين منهم..مثل لو كنتي محتاجه شي وتبين تتعلمين احس انه مافيها شي لو كلمتي حد بغرض انه يعلمج بس طبعا تكون فيه حدود مايتعداها..كل شخص يتعلم من غيره...اما اللي يقعد بالبيت ومايكلم حد ولا يعاشر..احس بتكون ماله قيمه خاصة هالايام..

وومشكوره ع هالموضوع ونتريا يديدج..