السلام عليكم ..
مب من عادتي أفضفض بس هالموضوع مايتحمل الكبت!
بتكلم بلساني ولسان كثير من الناس اللي عايشين في دبي ومصدومين بالأخبار اللي تطلع كل يوم، قبل كانت فكرة إزالة بيوت ماتصير إلا للبيوت للشعبية المتهالكه وبأن الحكومه راح تبني مكانهم بيوت يديده وترد تملك هالسكان البيوت اليديده، أوكيه للحين كل شي حلو بس في الفترة الأخيرة أحس بدت تصير هاي ظاهرة وتحدي بين الشركات العقارية أكثر من كونها فكرة للتطوير وبداية كانت الأنظار على منطقة السطوة لإزالتها كونها منطقة جديمة ومكتضه بالسكان بشكل غير حضاري وفي موقع إستراتيجي خلف أبراج شارع الشيخ زايد وتم تقبل الفكرة كونهم راح يطورون هالمنطقة ويغيرون إسمها عشان تعكس الشكل الحضاري لدبي، عقب فترة سمعنا عن خبر ثاني بأن منطقة الصفا او تحديدا شعبية الشرطة عند مركز مزايا والمنطقة اللي وراها ياينها قص كونها قريبة من أرقى كيلومتر مربع (برج دبي) وبداية كان تعويض السكان بأراضي بديلة في منطقة أم الشيف عقب تغير الوضع وصار التعويض مالي فقط ومايحق لهم المطالبة بأي أرض يعني خذ الفلوس ودورلك أرض جان حصلت في آخر الدنيا (عادي تقبلوا فكرة انهم ينتقلون لإمارات ثانيه) وإذا حصلت حاول تبنيها مع إرتفاع هالأسعار بشكل كبير وزيادة التكاليف في كل شي.
عقب قالوا راح يقصون المنطقة المقابلة لكلية الشرطة في أم الشيف وراح يعوضونهم أراضي في المنطقة المتبقية من نفس المنطقة، عقب قالوا منطقة البدع والوصل بعد ياينهم قص كونهم قراب من المنطقة اليديدة اللي راح تنبني بدال السطوة وأيضا في مناطق راح تتضرر لمشروع تمديد الخور ليصل للبحر مره ثانيه من جهة الخليج التجاري وأظن راح يهم الاوليه بأخذ أراضي في البرشا وحسب شهود عيان بان أول قص يبدأ من مدرسة دبي الوطنية في شارع الضيافة إلى المنطقة اللي فيها سبنس لنهايتها يعني لين التقاطع الثالث على شارع الشيخ زايد شامله كل شي في النص يعني منطقة الصفا وأم سقيم، وبعد في مشروع جميرا قاردن سيتي وبيكون بقص جميرا 1 و 2 بس بعدهم ماأعلنوا عنه وطبعا ماراح يكون في أراضي للتعويض يعني يامواطنين دورولكم إمارة ثانية أحسن ولا إسكنوا بالإيجار إلا من رحم ربي وعنده أملاك يدبر عمره فيهم.
ثم سمعنا بإن أيضا منطقة الجافلية راح يتم إزالتها بالكامل لإقامة مشروع يديد والحين عشان يسوون جسر الشيخ راشد بن سعيد راح يقصون منطقة ند الحمر لجهتين بإقامة شارع رئيسي في النص يخدم الجسر وأخيرا كان الإعلان عن مشروع الخور الثقافي بإزالة منطقة بردبي تقريبا كلها ومنطقة مشابهه من جهة الراس في ديرة يعني راح يغيرون شكل الإمارة بالكامل وراح يكون إستنزاف لمواد البناء وعجز في الإنتاج والأسعار راح تتضاعف مرات ومرات وعادي ايي يوم اللي بناء ملحق صغير في البيت يكلف 4 ملايين يعني الناس بيسوون لهم صنادق يسكنون فيهم، أنا مابى أكون متحيز في كلامي بس لو نظرنا لخارطة دبي من أولها لأخرها بنشوف بأن أكثر من 85% من مشاريع القص صايرة في بردبي مب برديرة ماعرف هل لأن اللي يقومون بالمشاريع من ديرة وعندهم حقد على أهل بردبي ولا لأن أراضي بردبي تناسب ان الاجانب يسكنون فيها مستقبلا في المشاريع اليديده ولا لأن ديرة ازدحامها مايتحمل اي مشروع! كلها تساؤلات مانعرف تفسيرها الحين بس بيي يوم وبيتضح كل اللي يصير الحين شو اسبابه.
بالنسبة للمناطق اللي القص مايتجرأ ايي صوبهم لا الحين ولا بعدين هم منطقتين مافي غيرهم زعبيل وند الشبا يعني اللي ساكن هناك يتطمن بأن الامور طيبه ومايخاف دامه في السليم، تدورن حادث سوق نايف أحس إنه مب صدفه مثل ماكانت حوادث بيوت سطوة الجينكو سابقا تصير ويوميا تكون الاعذار مب مقنعه وكان الهدف للتخلص منها بطريقة مايكون فيها معارضه وهذا احس اللي صار في سوق نايف بان بتنسيق تم احراقه عشان يقدرون يغيرون مكانه مثل ماتم الاعلان عنه خلال كم يوم وحطوا المخطط اليديد للسوق بسرعة البرق وهذا ان ربما يدل على ان المخطط كان جاهز والله اعلم مابحط في ذمتي بس الامور بدت تخوف بصراحه في دبي ومحد يقدر يرمس او يعترض لأن طبيعي النظام عندنا يقول كل واشرب وانت ساكت ولا ترا بتشوف شي مايسرك.
للعلم نحن مب ضد التطوير ولا ضد بناء المشاريع بس أحس كل شي يكون بقياس يعني ممكن الواحد يتقبل فكرة إزالة المباني الجديمة بس ليش يتم إزالة المناطق اليديدة والمباني اللي توها حتى ماكملت سنتين ثلاث، أحد التجار توه باني برج وياه القص وكان التعويض حتى مايساوي ربع التكلفه وسمعت انه زعل وطلع من البلاد وماوده يرد وكثير غيره بدوا يسحبون فلوسهم ويشتغلون فيها برع لأن هني محد ضامن شي والكل يخاف على أملاكه، قبل يومين واحد ماخذ المخطط اليديد لدبي أظن من مؤسسة محمد بن راشد بس قالوله شوف هذا لين الحين عادي عقب فترة يتغير يعني يقصدون عادي مناطق يديدة اييها القص في الفترة اليايه وانا احس جميرا كلها بتنشل لين برج العرب وبذكركم.
المواطن مأكول حقه اليوم يعيش تقريبا مثله مثل الاجنبي يدفع مثلهم يتحاسب على اشياء هو مب متسبب فيها وماحس في اي شي اليوم يميز المواطن عن الاجنبي غير بعض الاشياء البسيطة ومنها منح الاراضي والقروض والمستشفيات والمدارس وحتى هالاشياء بدت تقل وبدت الرسوم تدخل شوي شوي فيهم لين ماايي اليوم اللي يتحاسب فيه المواطن باسعار اكثر من الاجنبي وهالشي مب مستبعد بصراحه دام التوجهات تشير بأن المواطن هو آخر من تفكر فيه الحكومه يعني لو رمسنا عن سالك وشفنا كم عدد سيارات المواطنين اللي تستخدم هالشوارع وكم عدد سيارات الاجانب اللي تستخدم نفس الشوارع بيطلع المواطن مايخصه في الزحمه بس يتحاسب مثلهم والمشاريع اللي كل يوم تطلع واللي تغير الشكل التضاريسي للإمارة كثير علقوا عليها بأن لابد في يوم البيئة راح ترد على هالتدخل (وقالوها قبل لاتتعبثون بالطبيعة) وقوة الماي مافي شي يوفقها وهزات المناطق الشرقية والشمالية بدت تزيد يعني الله يستر بصراحه.
اللي ماسكين هالامور (ينعدون) وماراح اييهم شي بتاتا ولو كان في شي راح يكون لمصلتحهم اولا ثم لصالح الحكومه ثانيا واذا لا سمح الله صار شي ترا بيشلون قشهم وبيطلعون والشعب بياكلها، احنا مانبى اكثر من المواطن تكون له حقوق والحكومه تحسب له حساب ويخلونه يعيش في سلام ويسوون اللي يبونه في اللي يملكونه بدون مايضايقون الشعب، المشروع الاخير تكلفته 184 مليار يعني أكثر من ميزانية دول كثيرة وبدل ماينصب في خفض اسعار البترول والديزل والسلع الثانيه وتأمين الاستقرار للشعب لا يتم إزالة عمران لإنشاء عمران مع ان المساحات الخالية الباقية في دبي حسب اللي اشوفه تقريبا حدود النص بس يمكن يكون في خطه لإنشاء مدينة جديدة للمواطنين بعيدة عن دبي الجديدة.
الحمدلله على كل حال ترا في النهاية هي مجرد أمور دنيوية وراح تنتهي في يوم
سبحان الله وبحمده أشهد أن لا إله إلا أنت أستغفرك وأتوب إليك
الاســـطـــوري
أخوكم
