شلون تقضي/ن الويك اند؟

السلام عليكم ورحمه الله وبركاته

حبيت اعرف اعضاءنا كيف يقضون اجازتهم الاسبوعية
مساء الخميس
يوم الجمعة الصبح الظهر والمسا
يون السبت الصبح الظهر والمسا

:14: انا مو فاتحه تحقيق لا تخافون :k_busted_cop:

مساء الخميس : نزور الاهل
يوم الجمعة الصبح وقت الراحة والاستجمام بعد صلاه جمعة يتجمعون عايلتنا على الغدا عندنا فالبيت
لين العصر بعدين اهلي يروحون رحلة بس انا اقعد بالبيت :k_devil2: اكلم صديقاتي مرات ومرات اقعد على النت ومرات اقعداشوف تلفزيون لا :icecream: لين المسا
يوم السبت الصبح لازم اروح اسوي شوبنج احلى شي فالعالم الشوبنج ..:fa35: من الصبح لين الظهر بعدين لازم نروح مكان حيلو نتغدى

بعدين خلاص العصر لين المسا ارجع ادرس او اقرا مجلات ومتى ما يكون عندي وقت فاضي ادش الواحات وبس :redface2:

هييهاااع ، هالويك إند يخلينا نشتااق له طول الاسبوع ..
لأنها فترة راحـة من الدراسة والدوامات ..

وانا عن نفسي ما اقدر اقولج شو جدولي بالضبط لأن كل مرة شي ..
بس بشكل مختصر ...

يوم ويا الربع والسينما وطلعات وعشا وجي .. ويوم صوب البر وف البر مرات ويا الربع ومرات ويا الاهل

ويوم السبت أكثر شي احاول اخلص بعض الاشياء إلي عندي ..

كل ويك اند غيـر
عادةً يكون عندي عزيـمه يوم الخميـس او الجمعه... أو عرس

اذا ابويه فاضي يطلعنا..
مرات نطلع باليخت ليوم او يوميـن
أو
نسـير البـر
أو
السينما
أو
نطلع نتريق او نتعشا

واذا انا فاضيـه .. اطلع ويا ربيعاتي.. واحاول مره كل شهرين ويوم الجمعه اسـير عند ربيعتي في الشارجه وأقيّل عندهم.. واطلع وياها ويا خواتها.. نطلع نتغدى ونسـير السينما واتعشى عندهم وارد البيت

مممم وبـس

وعليكم السلام ورحمة الله وبركاته

فرح ناز يسلموو على الموضوع الحلو

انا مساء الخميس اروح عند الشواب وضرب قصيد وميدان ونهمات وشلات

ويوم الجمعه طبعاً اول شىء نروح نصلى ونرجع نتغدا مع العائله وبعدين اطلع اروح الباطنه عمان

يوم السبت مرات يكون عندى دوام ومرات لا... يوم مايكون عندى دوام اروح البحر.. والسلام ختام

بحر المــــوده

يوم الخميس فليل "المفروض" انه يكون يوم التجمع في بيت يدي بسمرااااات نكسر هالقاعده

يوم الجمعه الصبح اطلع اتمشى صوب البحر و اتريق و عقب ارد ايلس ويا الوالده و اتريق مره ثانيه
و عقب صلاة العصر عادة اطلع ويا الزرعوني "عضو ويانا في الواحات" و نتم الين فليل

يوم السبت عندي دوام الصبح و فليل اسير مول الامارات او سيتي سنتر ادش السينما و اتعشى و ارجع
بس اليوم ما سرت D=
و كان الله غفور رحيم

هلا فروووووحه

:

أنا نفس الشي .. يعني مب كل ويك اند انقضيه بنفس الروتين ..

يعتمد ..

اذا كان عندنا عزيمه .. ولا عرس ..

وهالفتره قمت وايد أحضر أعراس :fa46: !!

بس أغلب الاحيان .. نروح بوظبي بيت عمي .. ولا الفجيره ..

وفي الشتا .. كنا كل يومين مطيحين في البر ..

ونسير السوق .. نخلص مشاويرنا .. ونخلص شوبنغ اذا حد ف خاطره شي ..

انأجل السيره طبعاً لين نفضى كلنا !!


أحياناً نطلع كلنا نسير نتعشى مع اخواني ..

ولا انه نعزم اعمارنا بيت اخواني ولا خواتي غصب :biggrin: ..!

:

بس يوم اليمعه الكل يتيمع بيتنا ... ونستاااااااااانس وايد .. :m_9afgah:

:

طبعاً في الويك اند .. أيلس ع النت وايد ..

وأحصل فرصه أطالع تلفزيون ! :h_daleel:

وأكمل كتابة قصتي :11: ..!

وبس ..

:

موضوعج وايد حلو حبيبتي .. تسلمين :a070:

خــّطاب:12:ههه الي قلته هذا ويك اند كل الشباب تقريبا نفس الشي لول

شمعة أمل

يالزيز يارايق .. ((( ماشاء الله عليكم))) حلو الرحلات البحريه بسس هااااااا تعرفين تصيدين ولى لا :a042:

بحر الموده
ماشاء الله عليك طلعت من محبي الرحلات هه عكسي تماماً
مااقدر ابتعد عن التكنولوجيا!!

ذنـيـنـي
تقريبا الويك اند مالك نفس خــّطاب .. مسكين تداوم يوم السبت :glare: انا فالويك احاول مااسوي اي شي تابع للشغل بس مرات اضطر اشتغل واحس اني مااستانست فالاجازة مااقول غير الله يعينك


ملاك الروووح

واخيرا تلاقينا :fa35: في ناس يحبونج ويمدحون فيج ( بس ماابقول مينو) :tounge: هههه

حلو الويك اند مالج الله يخليكم لبعض ان شاء الله لول

يعني الحين اغلب التجمعات تصير يوم الجمعة :fa34:اهم شي يخلون السبت فاضي حق الطلعه

اممممممممم يوم الخميس لازم لازم لازم نتيّمع كلنا (خالاتي وحريم خوالي وعيالهم) في بيت خالوه "أكبر خالاتي":fa35:



الجمعة كل العايلة "أهل أميه" يتيمّعون في بيت خالوتي الثانيه بس نحن ما نسير دوم لأننا نسير بيت عمّوه

و مرّات انقيّل عند ناس نعرفهم (هل عيمان)
ومراااااااااااااات أظهر أتغدا و يا أصغر خالاتي و عيالها:a070:


و السبت مرات يكون يوم ممل لأني أدرس فيه اذا عندي امتحانات

و مرات يكون يوم حلو و أظهر فيه ويا أميه إذا ما عندي دراسه:heart:


...

الويك اند ... شي جميل والله ....


إذا كنت أفكر أرد البيت في الويك اند ...

فمعنـاته اني بقضي يوم الاربعاء في الشارع .. طريق العودة للبيت

غالبا اوصل الساعة تسع ونص أو قريب العشر ... هذا في أحسن الحالات ..... وإذا في الأسوأ أوصل 12

طبعا راح اول يوم

الخميس .. الصبح أكون بروحي في البيت لأن الكل في دواماتهم

البشكــارة اتيي توعيني أتريـق ... وشوي سووالف وعلووم وياهــااا

ايلس عالنت أو أشوف التلفزيون أو أقـرا شي وبعض الاوقات سوالف ويا أبوي ... ويخلص الصبااااح ويأتي الغدااااء ....

اتغدى ويا الاهل ومن غدى بشكارتنـا الله يطول بعمرها ... وهذا يعتبر من أجمل الاشياء اللي تصير في الويك اند


المســا ... يا انه فيه عزيمة أو حفلة في مكان مـا ... أو طلعة مع إخوانــي ...

ويوم الجمعة الصبح ,,, لازم أقوم من الصبح عشان أيلس ويا مـاما لأن ما لحقت أيلس وياها لا أربعاء ولا خميس ..

وبعدين أرتب أغراضي ... أو أصلا ألقاها مرتبة وجاهزة .... وأتغدى وأطلع الساعة وحدة ونص متوجهة للجامعة مرة ثانية :/ وهذي تكون أسوأ لحظة في الويك اند ...




إذا أصلا ما رجعت البيت في الويك اند ... أقضي الويك اند بين دراسة ونوم ونـت ...

الخميييييس أرد من الجامعه وانا ميييته ومن التعب وأررررررقد لين أذان المغررب D=
وبعدها باللييل أسير ويا اختي لبيت عمي ونمر على بنت عمي حبيبتي ونكملها حواطه في أرجاء الشارجه لول وبالاخص على بيوت الاهـل
يستانسوون يوم نسوي هـ الجوله ههه بس مب دووم على حسب المود يعني xD
يوم الجمـعه موول ما أحبه أستغفر الله .. بس دوم أحس بكـآبه فيه وكل الاشياء اللي مب زينه تصادف هـ اليوم xD
بس أكثر شي نسير مزرعتنا اللي ترفع لي الضغط مرات xD بس أحـب أسيرها يوم يكون فيها حد مثل قوم عمي وجذه
أو نسير مزرعه يدي وقوم خالاتي وخوالي وعيالهم هنااااك ونتم لين اللييل يعني نتغدى ونتعشى منااك واذا رمنـا نظهر ويا عيال خالتي ونتحوط لول

يوم السبت أنش من الصبببح وأخـلص أغراض الجامعه واللي علي من سوالف وواااجباااات وبالعصر أظهر ويا الاهـل ونسير وين ما يحلالنا الجو P=
وجان تخلص الاجـازة D=

:
.

السلام عليكم ورحمة الله وبركاته ..

ما شاء الله ..
أغلب الاعضاء والعضوات يقضون اجازة الويك اند
بتواصل اجتماعي طيب أكان صوب الاهل ولا الربع ..

طبعا عكس حضرة جنابي للأسف ..,، !

:


بالعاده أقضي اجازتي بين الشغلات اللي تسد حاجة النفس ..
أكان من هوايات .. كالرسم ومشتقاته .. أم الكتابه إن أسعفي اللفظ ..
وبالعاده اكون حاطه ابـ بالي امر عمواضيع بالواحات واخلص بعض الشغلات البسيطه ..,، !
لأن فيني طبع غريب بكوني ما أتصفح المواضيع ان كنت متيقنه بإني مابملك التعقيب ..
فأحط هذول المواضيع ابـ لسته ذهنيه أمر عليهم وقت ما أقدر ^_^ ..

ممكن اقرالي كتاب .. أخلص اللي علي من أمور الجامعه ..
ممكن اتواصل مع رفيجاتي بالفون .. وأحيانا نظهر لمكان هادي نسبيا ..,،

ووو مادري .. ,، !!

مستصعبه أحدد الشغلات اللي ممكن أسويها
لأن ماعندي روتين معين أو شغله ممكن تنذكر .. :fa46: !

:

حبيت تواصلج اختي فرح ناز ..
ويسعدني هذا النشاط الطيب
من اخت نحسب ابها كل الخير ..

حفظج الرحمن حبابه ..
ويسر لج درب الخير بإذنه ..

:

احترامي ..
والمعذره ..

اختج أنامل قلب .. :redface: ,،

:.

ويـك إنـد عـن ويـك أنـد يفـرق وانتوا كملوا الباجي لوول

إذا كنـت رادة البيـت بـ [ الأربعـا ] ، يكون للرقاد لا أكثر ولا أقل وعـقب يكون جـدولي كـ الـتالي يوم الخميس. .

~ أنـش من غبشه على حشرة عيال ختيه ، وايلس انا وياهم عند امايه ، نـتريق ونسولف ونضحك ونعلب وخلاف ع الضحى ، يـتشرف خالتيه وخاليه وييلسون ويانا ،من يأذن الظهر ، اروح أسبح الكتاكيت ، لانه امهم توصل ع السـاعه 1 ، عقب ماتوصل ختيه ويخبلون بي عيالها ، نيلس نسولف وجيه وبعدين الكـل يـروح . .


ع الـظهر ، أترقب وصول هـل المدارس ، وابويه من دوامه ، لو كنت مب شايفـتنه ، أروح وأسلم عليه وأبوسه فـوق راسـه ، واتغـدى ويـاه طبـعـاً . .

العـصر غالبـاً مايكون ممل ، أما تلـفزيون ، او يلسة مع خواتي . .

المغرب ، خواتي وريايلهم يكونون فـ بيـتنا

طبعـاً الرياييل رواحهم ، ونحن الحريم يفـرونا فـ الملحق لوول يفـتكون من حشرتنا واليهال معانا اكيد . .

وعقب سـهره ع التـلفزيون أو النت وبس


الجمعة

يـعتمد / لـو كنت راقدة بدري انش الصبح ، واتريق مع ابويه ويسوي لي جاي كرك ( أحلى مافـ النشه ) ، أقرأ الجـرايد ، أو بالأحرى أفصفصهن لوول . .

قبل لا يروحون اخواني المسيد ،أبخرهم ( لااااااااااازم )

الظـهـر

الكل يـتيمع عندنا ، العـايله الكريمه من بنات وأولاد . . .


العصر يروحون ، اتم عند عيال ختيه . .


المغرب نتعشى ، وبعد العشـا نطلع مع ابـويه ، كـل جـمعه . .

سـنه مؤكده لوول

نطلع طلعة عائليه ، نسير منيه ومناك ، ماعندنا مكان معين ، احيان نتحوط فـ السياره بس ، واحيان نروح صوب البحر او شي .

قبل لا أرقد ، ازهب شنطتي ، وعقب سهره ع التـلفزيون . .

السبت ، يشـلوون قشهم ويروحون ~ العــين . . .



طبعـاً الويك اند احيان يكون أستثنائي لـو رحنا مكان ، او شي جيه . .



فــرح :

ثـانكس ع الموضوع
. .

[QUOTE=


ملاك الروووح

واخيرا تلاقينا :fa35: في ناس يحبونج ويمدحون فيج ( بس ماابقول مينو) :tounge: هههه

حلو الويك اند مالج الله يخليكم لبعض ان شاء الله لول

يعني الحين اغلب التجمعات تصير يوم الجمعة :fa34:اهم شي يخلون السبت فاضي حق الطلعه[/QUOTE]

شينوووووووووووو مينوووووووووووووو :boxed:

منو اللي طراني جدامج !!

منو اللي يعرفني ! :14:


استويت أشهر من النار ع العلم :h_daleel:


بترياج عالخاص يا حلوه :k_harhar1:

السلام عليكم

شو اسوي في الويك اند؟؟

ساعات نروح بيت يدي
ساعات انروح الشارجه
ساعات نروح دبي
واغلب الاحيان اقعد اخلص اشغالي بروحي في البيت
والاهل هم اللي يظهرون

<<ويك اند ممل ادري هههـ

الوييييكند يعتمد على الإحتمالااات !!

يوم الأربعاء

اول شي يبتدي الويكند يوم الأربع الساعه 7 ..
أوصل البيت ..
واقعد شوي مع الأهل
وبعدها بلي ستيشن لييين ما ينطر مخي
مرااات لين الساعه 12 او 1 او اكثر بشوي
الكل ناايم اللا خفاش البيت قاعد ..
المهم اقعد على الأفلام والتلفزيون لين الفجر
اصلي وارجع اسوي ريوق لي ولابوي
وكل مره يسبني على الريوووق المب شي ( مره الملح زايد .. مره ماشي ملح ,, مره ماعرف شو مسوي )



الخميس

إما ... أو ..

اذا قعدت الصبح .. اسير اتحلق
واذا اتحلقت الصبح يعني انا ساير دبي المسا


واذا ما قعدت الصبح
اكيد راقد هع هع
( ذاك اليوم اسمع في البث المباشر .. مطعم حاط لافته ,,"" المطعم غير مفتوح لانه مغلق ""))

وانش الساعه 2 او 3
يعني انش للغدااا ,.,
اتغدا .. وبعد الغدا والجاي والسويت وهالسوالف
بلي ستيييشن لييين المغرب
عقب اروح اتحلق
وارجع البيت اشوف افلااام لين ما ارقد

ومرااات يكون عدنا تطوع يوم الخميس




يوم الجمعه

يمكن اروح دبي
ولا اقعد لين المسا واروح دبي



يوم السبت
ارقد كثر ما اقدر
لان يووم كئيييييب
لان اروووح العيييين .,.




طبعا طبعا
الويكند يعتمد على روحة الأهل لراس الخيمه

الويك اند كل مرة يختلف,,:k_smile2:

يعني نادر ما يطوف ويك اند ويكون شرات اللي قبلهـ >>:whistling:

أغلب الاوقات الخميس ما نظهر اونهـ بريك عقب الدوام لولز :k_harhar1:

واذا طلعنا طلعة خفيفة ههههه >> يعني مكان جريب مب بعيد :4:

والجمعهـ

أغلب الاوقات يمعة عائلية يعني نسير بيت قوم يدي والا حد من خوالي والا عمامي والا حد من الاهل :love:

يعني لازم شي عزيمة كل ويك اند الا نادر :fa42:

وساعات عزيمة الغدا وعزيمة العشا :pullhair:

والسبتـ

يانظهر طلعة مع أختي

والا نيلس فالبيت نكمل أشغال الكلية:a058:

يعني حسب

ساعات ايينا ويك اند نظهر الخميس والجمعه والسبت:fa56::fa56:

وساعات بس الجمعهـ:fa46:

ع حسب كل ويك اند

يختلف عن الثاني

وهيكـ:inlove: ^^

إجازة نهاية الأسبوع

غالبا كل نهاية أسبوع بالعين (ما نخلي بقعه
فيها ما نخطف عليها)
أحيان نغير و نروح الفجيره و خورفكان
بس أوقات نخطف على كذا إماره بـ ويكند
يعني نروح الخور و عقبها الفجيره نرد
الراك عيمان شارجه ندخل دبي نكمل
دربنا للعين تعب من الخاطر بس و ناسه صج
(الله يخلي لنا أبوي يتعب صج)

و اذا قاعدين بـ دبي الخميس راحه بعد الدوامات
و اليمعه بعد الغدا بيت يبه (أهل أمي)
كل 6 شهور و الا 3 نروح الراك عند (عمي و عمتي)
و السبت نخلص الالتزامات اللي علينا

و أحلى شي يوم أقعد بالبيت و ما أطلع
طول الويكند( ما تصير إلا إذا بابا مسافر)

أحاول ما أكلم رفيجاتي بالويكند
طول الاسبوع معاهم

قصايد غلا

لول الناس كلها تسير دبي فالاجازة وانتوا تسيرون عيمان :birgits_giggle:

العجيبة

الله يعينج كلها فترة وتعدي ان شاء الله :wink:

قرموشة

شغلة وايد حلوة انج تزورين اهلج ماشاءالله انتي سويت حييل
هيه والله الاجازة تمر بسرعه :birgits_giggle:يبالنا يوم زياده



ملاك الروووح
أول شي ببتزج بعدين يمكن اقول!!! ههه

شو بتعطيني !!! :rock:


1234
ليش حبيبتي ماتطلعين :wacko: بتملين اذا على الحاله لازم تغييرن جو .. يلست البيت تخلي الواحد كسوول ديري بالج لا يحوشج :huh:

مجموعة إنسان
:wacko: انا احب الالعاب الالكترونيه عاد مب جذي الله يهديك :huh: :a0360:


رمش الغلا87

انتوا شراتنا :inlove: تقريبا نفس ترتيب الاجازة .. اعتقد هذا هو الشايع بين الناس

مزن هتان

ماشاء الله عليكم حلو الويك اند مالج والله يعطي الوالد العافيه
مرات احس اني ابا اقعد بالبيت وماسوي اي شي هذا يوم اكون مشغوله طول الاسبوع بس


ان شاء الله ما اكون نسيت حد لول :4:

http://oasis.bindubai.com/bin/upload...1201028869.gif

الويكـ اينـد وماأدراكـم ما الويكـ اينـد ،، نتريــــــــــــااااه من خاطر خاطرنــا كل اسبوع :4:
لنه صدق اتكون راحه نفسيه من عقب اسبـــــــــــوع اطويــــــــــل

:

يوم الخميس

أحسبه ضايع ضايع
لنه دوامي يخلص 4 ونص وفـ عيمـــان ولين ما أرد بوظبي طبعاً يعتمد متى أظهر من اهنــاك
أغلب الأوقات أوصل البيت ع الساعه 8 ،، وع حسب مرات احصل حد من اهليه فـ بيتنــا أقعد معاهم
أو إذا محد ايلس مع قوم امايه وخواتي ويمكن أروح بيت قوم يدتيه ،،وأكووووووووووون
امسطله من الخاطر >> لني ما أكون راقده العصر فـ هاليوم وغير الدوام اللي من الصبح لين العصر والدرب الممل
فـ أرقد من وقت بمعنى من وقت :k_blush-anim-cl: لين اليوم الثاني عادي أقوم 12 ،، 11 >> وااايد ارقد :fa36:

يوم اليمعـه

ع ايام الدوامات يوم السبت ما كنت احب هاليوم استغفر الله

المهم ملخص هاليوم انه يمعة الأهل فـ بيت قوم يدتيه أو بيتنـا ع حسب >> بيتهم إلا فرة احصــاه عنــا :fa47:
فـ أغلب الأوقات احب اطبخ وااايد فـ الويك ايند أظهر الطاقه اللي فيني من اسبوع :4:
ومرات العصر نظهر ،، أو انسير صوب البحر اشوي قبل الغروب عن خاطريه :inlove:
والقعده ع النت بين فتره وفتره ع حسب

يوم السبت

ماااااااااااا أحب هاليوم
احب ارقد وااااااايد وااااااايد ما ابا اقووم >> فـ هاليوم بالذات يومي يمر بسرعه
ولازم أخلص أشغالي ونادر ما أدرس لني فـ البيت الصراحه ما احس انه جو دراسه أو انا نفسياً
أبا احس اني بعيده عن جو الدراسه ،، مرات الظهر انروح المول أو الصبح إذا قمت من وقت ع حسب ومرات ما انروح ومرات أقعد اشوي ع النت

ع الظهر ولا العصر متى ما أكون فاضيه أزهب شنطتيه وع المغرب أويـّـه صــوب عيمــان
وبس خلص ويكـ ايندي :3:

:

ومرات ما أرد البيت أتم فـ السكـن>> دراسه + تلفزيون + ارقـاد
فـ لاتنشدون ع ويكـ ايندي الكئيب اللي فـ السكن >> يوم اربيعتيه اتم معايه يكون وناسه صدق :a074:

http://oasis.bindubai.com/bin/upload...1201028869.gif

مـــــوضوعج حلو ...

يوم الخميس :- اكوووون في الدوااااااااام

الويكند عندي بس يوم الجمعه (( يعني اما يكون في بيتنا او اتكون خاصه بالطلعات ... ))
يعني بين (( الشـــوبينـــج ، الســــينما ، المــــــطعم))
واذا حصلت في ويكند بالسبت والجمعه او الخميس والجمعه طبعا اذا صادف الداي اوف مالي هاليومين ..
فاتكون ( رحله بريه - او نزهات مع الاهل ) .
.
.
وهذا هو الويكند مالنا
وسلامتج
اختج/ الشوق

اقتباس:

---

المشاركة الأصلية كتبت بواسطة فرح ناز

قصايد غلا

لول الناس كلها تسير دبي فالاجازة وانتوا تسيرون عيمان :birgits_giggle:

---

شو فيها ؟!

كلّن يرقد على الينب اللي يريحه الغاليه :)

و سيرة العزبة و اليلسة في البر أخير من زحمة دبي في الويك إند

دبي نسيرها حق المشاري من المولات والخياييط مب حق الراحة في الويك اند :fa35:

عندي إجااااااااااازه

باجر بسير البحرييييين

طير الغرام

الله يعطيج العافية الويك اند مالج حافل ماشاء الله عليج وانا كنت اشتكي من الويك اند مالي!!!

الشوق
شاكرة لج مرورج الكريم على مواضيعي .. :11:وان شاء الله كل ويك اند تقضينه احلى من الثاني

قصايد غلافي هذة صدقتي اتبنوني علشان اروح معاكم هههههه :heart:راس الخيمة مكنسلينها من خارطة البيت حدي لين صحارى سنتر بس :fa46:

مجموعة إنسان

تسير وترد بالسلامه لاتنسى الهدايا حقنا كلنا