الصيف قرب و السفر حان طاريه

انزيييييييين

مثل ما العنوان يقول،،
الصيف قرب و السفر حان طاريه الله يعين الي بيفارق حبيبه :fa46:


يالا يا شباب يا شطار :icon_rr:
و يا بنات يا أمورات :mf_leia:

كل واحد يقولنا شو برنامجه للصيف،،
وين ناوي يسافر و ليش اختار هالدولة/الدول،، و شو اهم معالم هالدولة و الي تستحق الزيارة

و اذا ما بيسافر يقولنا وين ناوي يسير في البلاد و شو المميز في المكان الي بيسيرله

و ياريت لو تحطون صور للاماكن الي ناوين تزورونها
او تحطون خرائط اذا كانت متوفره عندكم لتعم الفائدة على الجميع
و اذا عندكم معلومات سياحية اتمنننى انكم تحطونها عشان كلنا نستفيد

صبااح الخييير


شوف لين الحين مافي اي مخططااات للسفر ,,
لأن يمكن باخذ صيفي هالكورس
عسب جذي مافي اي مشروع
بس ان شاء الله من اخلص
الأهل يبون يروحون تركيا
خل يروحون
بس بعد الصيفي ان شاء الله يمكن انا وابوي واخوي بنروح المغرب وللا نكنسل المشروع على ابوي ونكمل العدد بأخوي العود وبنروح مصر

جذي الترتييب !!
بس نتريا شوي


وانت ..
شو ترتيبك ؟!

مرحبا ذنيني .. بما إنه للحين ماشي خطط،لكن برد على موضوعك، وبقول في احتمال اسير لندن ..

ويمكن نغير الوجهه، وفي احتمال إنه كل شي يتكنسل .. على حسب الظروووف

لين الحين عندي خيارين الأول ( ميلان - باريس - جنيف ) الثاني ( نيويورك للمره الألف اففف )

مايهزك ريح، لو مثلا خذت الخيار الاول، وين تسكن ؟

الخيار الأول .. بسير عند الإمارات للعطلات مثل كل مره وبخليهم ايرتبون لي الرحله كامله .. ^_^
عندهم فنادق معينه يتعاملون وياها .. بختار الفندق اللي يعيبني من اللسته

والرحله بتكون اسبوع لكل منطقه .. ^_^!!

جنيف

http://www.myrtn.com/freetours/Image...ee_gall853.JPG

انا هالسنة ان شاء الله بسافر لأول مره ويا ربعي،، لأني كل مرة اسافر ويا اهلي بس هالمره غير
شعارنا لهذه السفرة هو الاستمتاع بأكبر قدر ممكن و بأقل تكلفة ممكنه D=
و الزين انه ربعي الي بسير وياهم شباب صددددددق نشيطين و مب مال يلسة في الفندق و الكوفيات

المهم

الله يسلمكم نحن ناوين نسافر لمدة ثلاث اسابيع

بنبدأ سفرتنا بالوصول الى فرانكفورت في المانيا و الي منها بنأجر سيارة و بننطلق الى ميونيخ و بنبات فيها ليلتين
و بعدين بننتقل الى النمسا، و على وجه التحديد مدينة سالزبورغ و بعدين بنسير فيينـّا و عقب بنسير زيلامسي

من زيلامسي الانطلاق بيكون الى فينيسيا في ايطاليا و منها بنسير ميلان و بنتم فيها كذلك ليلة وحدة و بعدين بنسير جنيف "و ملحقاتها" 3 ايام

من جنيف بنسير باريس و ايضا بنتم فيها 3 ايام و عقب بنسير عيمان قصدي بروكسل في بلجيكا و بعد بنتم فيها يومين ثلاث و عقب بنرجع فرانكفورت و بنرد لدارنا

طبعا كل التنقلات بتكون بسيارة مستأجرة و المسافة بين المدن ما تزيد عن 3-5 ساعات

بالمختصر نحن نبغي نسافر و نستمتع بدون ما نكرر طلعاتنا و نبغي نشوف الاشياء المهمه في كل مدينة نزورها
و الي بيساعدنا في الرحلة هو انه نحن بنكون اربع اشخاص و كلنا على قلب واحد و في سيارة وحده
و ما عندنا حد كسلان و هيز D=

ما يهزك ريح

تدري انه نحن حرمنا نحجز عن طريق السفريات لأنهم يقصونا قصصصصصص بالاسعار !!
ربعي سافروا السنه الي طافت و سوولهم جولة شبيهة بجولتنا هذه لكن على اقل شوي
نصهم كانوا حاجزين عن طريق السفريات و نصهم عن طريق النت

على مدة الـ 3 اسابيع طلع الفرق وياهم ما يقارب 4-5 الاف درهم

ذنيني .. على حسب الفندق يفرق السعر ..
وحط في بالك اذ بتسير شهر 7 او 8 ..
هذا يعتبر الhigh Season ففكر اتسير شهر 6 وشوف فرق السعر .. صدق غيير ..
ثانيا نحنا بنكون عايله .. اذا بسوي الحجوزات بروحي بتبهدل .. وانا ما فيه على الصدعة ..
بس اتصدق يوم انسير نيويورك .. كل شي نحجزه بالنت من التذكره للفندق للموتر .. كل شي ..
بس اوروبا .. او شرق اسيا ما جد جربنا ..
كله عن طريق الإمارات للعطلات ..
مره حسبت روحي التذاكر .. ويا الفندق اذا بحجز في النت طلع عليه اغلى من الإمارات للعطلات اتصدق !

بس مره دورنا عن طريق
www.travelocity.com
و www.priceline.com >> هذا امريكي .. الأوروبي http://www.priceline-europe.com/
كان فرق وااااااايد في السعر .. بس لازم الكريديت كارد اللي عندك يكون الrate مالها عالي عشان تاخذ بالنت .. انا اللي عندي حتى ما تكفي التذاكر .. هنيه المشكله !
فعن طريق السفريات ادفع المبلغ كاش !

شهـر 5.. بسيـر لندن ويا امي لأسبوع عشـان ننتقل من شقتنا الحـاليه للشقه اليديده ونجهز الشقه للصيـف

نص شهر 7 بنسيـر لندن لاسبوع او عشر ايام.. بعدين ابويه بيي وبنسيـر نيويورك لاسبوع بعدين بنرد لندن وابويه بيرد دبي.. وعقبه باسبوع او عشـر ايام بنرد دبي
على أواخر الصيـف في احتمال نسافر مره ثانيـه كـ عايله يمكن ايطاليا لانه وايد نحبها
اذا لا
يمكن اسافر لندن ويا امي واختي الصغـيره أو أشتغـل

الخطه .. انه نسيـر نيويورك
بس بعد ولا شي أكيــد.. على حسب جدول أبويـه.. اذا يقدر يأجز لـ عشر ايام أو لا

شمعة أمل وين مكان شقتكم في لندن إذا مافي احراج ؟؟

نايتسبردج < تقريبا كلحد هناك.. لأنه أحسن لوكيشـن.. حتى الشقه اليديده في نفس الشـارع
اذا من ناحية مشي ف هو
دقيقتين من هايد بارك
على شارع هاردز ف ياخذ يمكن بعد دقيقتيـن عشان نوصل هاردز
دقيقه لـ هارفي نكلزز
دقيـقه لـ سلون سترييت
عـشرين دقيقه مشي لـ اكسفورد ستريت
نص ساعه مشـي لـ ترافالغر سكوير
ربع ساعه مشي لـ كينغز رود
45 دقيقه مشي لـ كوفنت قاردن
عشـرين دقيقه مشي لـ قصر الملكه
ربع ساعه مشي لـ سفارة الامارات

يعني كل شي قريـب وتقدر تمشـيله.. الا كم من مكان

زين ماشاء الله يوم كل شي جريب ...

همم في خاطري اسير ايطاليا .. مازرتها إلا مره، لكن يبالينا نفصصها ..

السلام عليكم



الصيف و متى يييي هالصيف بس


مخططاتنا دومها تتغير لين اخر لحظة
بس غالبا بيكون جي


اول شي بنسير صوب البلاك فورست في المانيا
شي مدن صغيرة هناك و قرى حلوة :fa35:
مثل تيتيسي تجمع بين مدينة صغيرة و بحيرة و غابات

http://oasis.bindubai.com/bin/upload...1205773782.jpg

و جريب منه يويروبارك احلى ملاهي شفته :fa41:

و بعدين بنسير متجع centrparc
عندهم في واييد اماكن في اوروبا
مكان حلو و فيه وايد activities
و اللي بنسيرله ان شالله في reims في فرنسا
يديد و شكله حلو
شي فلل ع البحيرة و فلل في الغابات و فلل في جزيرة

و عقب بنسير هولندا و بلجيكا
بس اول مرة اسيرلهم فماعرف عنها

و عقب باريس :fa41:
اللي ماراح باريس انصحه يروحلها
احلى مدينة في العالم :fa41:

و عقب سويسرا و نتم في القرى
امم وايد اماكن فيها حلوة
مونتركس .. لوزينرن .. زيورخ .. بيرن .. ساس في .. زرمات .. جنيف
و شي اماكن فرنسية جريبة منها و حلوة نفس ايفيان و اننسي

و عقب ميونخ حق السوق

و ان شالله بس ما يكنسلوونه لين الصيف :fa52:

..

ما يهزك ريح

لو تحجز بروحك من النت احسن
بتلاقي واييد اماكن احلى

عفاريتوو .. بحجز في حاله انه انكون 2 - 3 اشخاص .. ما عندي مشكله .. مب 10 اشخاص !

خليتوني اتوله ع الصيف بسرعـه ..

هممم هالسنه اول شي بنسير لنـدن حق اسبوعين وعقب بسير و لأول مره *برشلونه* :inlove:اسبانيا لانه كزنتي كانت راده من فتره من هني موون
وسألتنا شو احسن مكان تسوقتو فيه قلنالها ميلانو لندن جنيف قالت عيل احسن مكان شفته حق سوق برشلونه جان نتحمس كلنا وقررنا نسير السنه :icecream: وبعد لانه اول مره اسير برشلونه ..


وعقبها بنسير *ميلانو* ايطاليا بعد حق اسبوع وبنرد لبلاد ..
بس لين الحين مب متأكده إذا اول شي بنسير لندن والا بيخلونها آخر شي !!! :k_icon9:

الياه اتحملوا من الحراميه في اسبانيا .. ^_^

فيه منطقه اسمها ماربيلا في اسبانيا وايد يمدحونها وفيها منتجعات ^_^

أسبانيا يمدحونها وفي خاطري اسير لها، ههههه مب كأني وايد اماكن ابغي أزورها .. يبالي تذكرة مفتوحة حول

العالم ..

مايهزك ريح : لول ان شاء الله .. مادري انا ماعرف اسبانيا بس متحمسه حق برشلونه 3> shopping shopping lol

المزوحي : هههه جان زين لو احصل هالتذكره

عفاريتوو
سنتر باركس صدق صدق صدق كشخه وونـاسه
يوم كنا صغار دوووم نســــــيررررر .. سرت لـ كمن واحد بعد.. يمكن 4
صدق استاسنا .. فييه كل شي.. سياكل.. روك كلايمينغ.. كانووو .. كل شييي < اياااااااااااااااام 3>

اتووقع مصر لاني ابا احظر دكتورااه عمتي .. :)

انا ساير هالسنه ان شاء الله مانيلا .. الفلبين ..

بحر المودة عفوا بس (تشد) ساير لها من قبل ؟

ياحيك اخوى المزوحى

هيه اخوى اخر مره رايح لها فى صيف 2005 بس تميت فيها اسبوع

هالمره شهر كامل بنروح جزرها الغاويه وعندك حى مكاتى الراقى فى مانيلا ومنطقة باجيو شمال الفلبين

وبالحياه لين هاك اليوم وان شاء الله عملة البيسو ماتنزل وايد واتم على مستواها العادى واى سؤال بتقوله عن الفلبين نحن حاظرين بالرد ..السموحه

تسلم على الرد بحر الموده،، مرات تحصل شخص يسافر لبلاد معينه من سنين ومايسيرون لها العرب وايد،

أو يسافرون لكن مب ذاك الزود ...

يعني مانيلا كم يبالك تيلس فيها وتشبع منها .. أسبوع - عشر أيام ؟؟

الله يسلمك ويخليك اخوى المزوحى

سلمك الله مانيلا تكفى اسبوع هذا اذا ماطلعت برع مانيلا لانه مانيلا مافيها الا مراكز حدايق والزحمه يمدحونا وايد

وكل زاير الفلبين اول مابيوصلها مابتعيبه مثلى انا اول مازرتها شفتها مدينه عاديه كلها خناخيش لكن يوم زرت المناطق والجزر ورجعت الى مطار نينو اكينو الدولى واعلنت طيران الامارات على المغادره ..تشوقت لها وايد وقلت ياريت لو تميت اكثر فى هذا البلد الحلو وشعبهم لى يحترم شعب الامارات ...المهم حصلت صور حليوه عن مانيلا الورده..

احلى شىء يوم تسوق فى بلاد الغربه تحس صدق تسوق سياره ههههه

http://travel.maktoob.com/photo/data...BayWalk_09.jpg

هذا الكورنيش مالهم اذكر مار عليه كشخه فى الليل عندهم ضرب غنا لين طلوع الشمس حشره ههه

http://travel.maktoob.com/photo/data...BayWalk_13.jpg

هاى الركشه مثل لى فى مومباى وركبتها ب 200 بيسوو يعنى عشرين ربيه مالنا لووول

صور ابراج مانيلا وهالمنطقه يسمونها مانيلا A

http://travel.maktoob.com/photo/data...BayWalk_14.jpg

الغرووووب عذااااااااااااب شوف كيف الشمس واضحه عندهم

http://travel.maktoob.com/photo/data...Manila_817.jpg

والتذكره على البزنس 9 ونص والموعد فى الصيف ان شاء الله

والله هاي الفلبين !!
تعرف بحر دوم اتحرى الدول الأسيويه عدى اليابان وهونغ كونغ وصخين XP
بس بارك الله فيك غيرت نظرتي فيهم XD
--
عن نفسي نحن قوم بيتنا ما يسون بلانغ حق السفر الا قبل السفر بيومين عاد اذا كانا لاكي حصلنا حجز واذا لاء يلسنا في بلادنا الحلوه في ايام الصيف XD
واذا حطوا بلان قبل السفر بمكن الشهر نبصم بالعشره انه ما بيتم التنفيذ XP

ذنيني رحلتكم حلوة انا وريلي ما نحب سفر الصيف عسب كثرة العرب ولاجنك مسافر عموما فينا ما حبيتها حسيتها دبي بس حاطين ببالين احتمال نسافر قبل الصيف وتكون الوجهه زيلامسي وننطلق من خلالها تعرف ما سكنا بفدف في زيلامسي بس بشقة مفروشة وايد حبيناها مجابل مكالدونالد وتحت مطعم صيني...خبرنا عن تكاليف الرحلة والامكن الي بتسكنونها ونحن حتى ولو عدنا عيال نحبنستكشف المكان الي نحن فيها نستمتع بكل شيء مب رقاد ويلسه في الفندق ...بالنسبة للسيارة المستاجرة مب مسؤولية وفيها نافيجيشن ما اعرف كيف تنكتب وما في خطورة بالسفر

طير الحب


اسمحيلي على التأخير لأنه من يوم تحول دوامي للفترة المسائية اعتفس يومي لا صار نهاري نهار ولا ليلي ليل >> اشوفني جلبت الموضوع لفضفضة :d010:


بالنسبة لسفرتنا
عددنا تقلص الى 3 اشخاص فقط و هالشي معناته انه بناخذ غرفة وحده مع سرير اضافي بدال ما ناخذ غرفتين ،، و هالشي معناته توفير نص قيمة السكن :vertag:

و الي ناوين عليه هو انه نحجز كل شي من هناك لأنه عن تجربة الاسعار اقل بوايد من انه نحجز من هني :10:




السواقه هناك متعة ما بعدها متعه،، و سهلة لأبعد الحدود
انا سقت هناك يوم كان عمري 18 في رحلة وحده و السنه الي عقبها سقت بشكل رسمي و كنت اسوق ميني فان بو 9 اشخاص "شرات مال المخبز:doh:"

لو نزلتوا في زيلامسي بتكونون على مسافه 3 ساعات من فينيسيا و 3 ساعات من ميونيخ و 5 ساعات من فيينا،، طبعا بالسيارة

سيروا و استانسوا و اهم شي انكم تأجرون سيارة :fa42:

بس سؤال ليش ما تبدون من ميونيخ ولا عشان نهاية الرحلة في بليجكا الي هي اقرب لفرانكفورت عن ميونيخ


وبرد بعد في الاسئلة

هذا واحد من الاسباب

السبب الثاني هو انه في فرانكفورت ايجار السيارات ارخص و السيارات متوفره بكثرة
ثالث سبب هو انه نحن نبغي نشوف فرانكفورت "لأنه العرب ما يسيرونها" فـ نبغي نعرف هالمدينة شو فيها

حد سار هالحديقة .. Europa-Park


موجوده في ألمانيا .. على الحدود ويا فرنسا .. يقولون انها تبعد عن ميونخ ساعتين .. مادري عاد بالسيارة ولا القطار !

http://www.europapark.de/lang-en/c51/default.html

مايهزك ريح مب هاي اللي في استراليا ؟؟؟

ابصراحه ما اعرف .. هم كاتبين انها في المانيا .. مادري اذا شي منها في استراليا !

يمكن تكون نفس الفكرة وانا اتخربطت،

في استراليا عندهم دريم وورد

http://www.dreamworld.com.au/content/drw_2008_home.asp?

وهنتين من غير

هيه انا سرتلها
وايييد حلوة
من يوم ما سرتلها الحين كل سنة اسيرلها
بالسيارة تقريبا 5 ساعات من ميونخ
لو تسيرلها من زيورخ اقرب
و عيبتني اكثر عن يورو ديزني مليوون مرة

و المناظق اللي حوليها بعد حلوة
دووم نيلس هناك

مايد انا سايرنلها 3 مرات
وايد فنانه

حتى احيد آخر مره سرتلها كنت انا الي اسوق و ضيعت سيارة اهلي و ما عندي خريطة و تيلفوني مافيه رصيد،، يني لا ارسل ولا استقبل لول

بس الحمدلله وصلت من عقب ما وصلت لحدود سويسرا و رديت p=

ناصر .. ما شاء الله عليك مول ما ضعت ..بس وصلت لين حدود سويسرا .. ^_^

انا اذا بأجر موتر في السفر .. بشل الـ GPS ويايه .. ما فيه اضيع ^_^
اتذكر مره ضعت في واشنطن .. اسميني اتخبلت >_<

ما عليك سويسرا تبعد مال ساعه تقريبا،، وصلت لحدود بازل


اشترينا جارمين حق السفرة فيه خريطة اوروبا و الشرق الاوسط
جان تبا منه خبرني،، ربيعي عنده محل معدات صيد وملاحه و اييبهن باسعار حلوة