يوميات صغاار الواحات

السلام عليكم ورحمة الله وبركااااته .. :h_mar7aba:

من فترة طويييييييله في باالي موضوع .. وكل ما ابا احطه اتعااايز :m_afaker: .. والحين تحمست اني احطه ..

الموضوع هو ..
كل عضو أو عضوة يكتبون يومياتهم يوم كانوا صغاار سواء كانت شطانه أو جذبه أو مأساة ..... ولآخره = الفضاايح



بخبركم عن يومياتي يوم كنت صغيره ..

يوم كنت صغيره ..
تقريبا كنت في روضه أوله ..
كنت حذاال الدكاان اللي عند بيتنا أرسم ع الرمل ( الأخت رساامه ومالقت مكان ترسم فيه هع هع ) ..
المهم سمعوا شو صاار .. !!!

يت سيااااره ودعمتني.. اللي احيده انه التاير يا ع بطني .. :6:
يا الريال شلني ودق جرس بيتنا .. ومنوه فتح الباب طبعاا امي ويدوه وجنه اختي بعد كانت موجوده..
والريال ما يبى يقول الصدق انه دعمني .. قاال انه في أحد دعم بنتكم بالسيااره ..:fa52:
ولاا يدوه ع طوووول وبطولة اللسان قالت له انت اللي دعمتها ( وجاان تنكشف الحقيقه):k_devil2:
( طبعا كل هذا صاار بالصراخ وعفسه:a046: ) يدوه وامي واايد يسوي قرقر
:k_mad_argue: :k_icon28: :a058:

ما أذكر بعدين شو صاار .. بس انه ابوي ما حب انه يسوي مشااكل وما رفع قضيه ع الرياال ( فديت ابويه)

واللي سمعته من امي انها تقولي اني كنت قرييب وبمووت :fa39: :fa43:



يوم كنت صغيره :-
كنت واقفه حذاال بيتنا .. وكنت انفخ البالونه ( اظني كانت بالونه طويله مش دائريه)
وفجأه يا واحد من شلة الفريج وشل عني البالونه وهرب .. وانا ع طووووووول جان اصيح :fa43: :d010:
ولاا يو شلة الفريج ( احييد كانوا واااااايد :h_mar7aba: ) يقولون لي شو فيج ؟؟
قلت لهم سرق بالونتي .. قالوا لي تعالي ويانا بنييب لج بالونتج ( يويلي عالفزعه هع هع )

ودوني اليين بيتهم .. وأول ما شافني بط بالونتي هالصبي المعفن :k_harhar1:
وجااااان اصييح :fa43: :d010: وأحشر الدنيا ابا بالونتي ..
و ع طوول كل شلة الفريج ودوني الدكاان وشرولي كيس بالونات :k_devil2: :icecream: :m_9afgah: :a068: :fa46:


أحب طفولتي .. أتمنى لو أرد أعيش فيها بس يوم واحد !!! يليييييت ^_^"

وانتوا شو فضايحكم احم أقصد يومياتكم يوم كنتوا صغاار ..:k_devil2:

ياهلا بعروسنا


انتي بعدج ما عرستي @___@


مممممممممممممم بفكررررررر وعقب بكتب لكم لوووول

ياحبكم للفضايح خخخ

ههههههههههههههه حلوة ذكرياتج يا شهودة

هيه صدق متى بتعرسين؟ ===> عشان أبارك لج :woot: و أغايضج مثل ما غايظت بنت خالي لين يوم عرسها ، كل يوم أقول لها : وييييييييييييييييييو بتعرّس ، وييييييييييييييييو العرس قرّب :k_harhar1:


إن شا الله يوم بتذكّر بكتب شي من ذكرياتي ، بس كل اللي أحيده إنه يسمّوني لزقة أمها خخخخ لأني ما أفارجها وليــــــــن أحين نفس الشي:fa52:

http://oasis.bindubai.com/bin/upload...1181768909.gif

ههههه صدق فضايــح

انا يوم كنت اصغيره كنت شيطانه بس شيطانه من تحت لتحت
وشطانتيه اترد عليه هههه كل سنه طايحه فـ المستشفى :woot:
ماخليت باتمان ماقلدته وماخليت سوبرمان ما قلدته ههههه
حتى الشرطه وصلتلهم ههههه >> احمسكـم هههه:birgits_giggle:

بس الحمدالله الحينه عقلنا وفرق السما والأرض :k_harhar1:

http://oasis.bindubai.com/bin/upload...1181768909.gif

بسم الله الرحمن الرحيم ..

يلا خلنا انطلع الفضايح شوي لووول ! ..

احيد لما كنت صغير كانت الوالده رابطه ريلي ف الطاوله عشان ما اطلع برع ..

وكان صوبي تمر والاخ الم ترى طايع فيه طيح والحفاظه مافيها حيله :vampire: ..

وبعد اذكر كنت ف بيت يدتي وكنت فوق البيت ويالس افرفر حطب تحت ولا اسمع واحد يزعج ! ..

اوووب شو السالفه ولا اشوف خالي الله يرحمه شال اخوي ومودنه المستشفى ..

انزييييييين امي امي شو السالفه قالت لي ماشيء بارك الله فيك واحد عاق عليه احطبه من فوق البيت :Oo: ..

يلا بسني فضايح ..

شكرآ ع الطرح ..

شو الموضوع ما عيبكم ؟؟ !!!!

خياال الحب.. طلع فضايحك بلى هالخش والدس P:

قصاايد .. هييه عيبي علي الحين وبيي دورج ان شاء الله وبعيب علييج P:
أتريا فضايحج يا حلوه ..

طير الغراام .. تسلمين حبوبه ع المرور .. عااد انتي مسكته الكل.. للشرطه مره وحده P:

ألم ترى .. أسمسني فطست من الضحك ع شطانتك .. قويه هاي حطب بللل .. انزين انت ما تشوف ع طوول جي تفر الحطب .. تأكد بالأول بعدين فر الحطب لووووووووول

يالله نتريا فضاايح البقيه .. اللي شافوا الموضوع وما ردوا P:

http://oasis.bindubai.com/bin/upload...1181768909.gif

بخبركـم سالفه من سوالفيه الشيطانيه :k_harhar1:

اممممم احيــد كنــت صف أول ومستويه البوس ع بنات خالي الثنتين >> هن أصغر عنيه
وقلتلهن تعالن بننخش فـ البيك أب قالن انزين >> حشرن مع الناس عيد :a068:

وعاده هب بس إلا بننخش الحبيبه انا ورايه خطه جهنميه من هالحركه
قلتلهن يوم بتتحرك السياره >> بمعنى أصح بتريوس لنها كانت داخل فـ الكراج
المهم يوم بتريوس اعفدن هههههه :hysterical: >> مادري شو من العقول كان فيني

وهن طبعن وغصبن عنهن بيقولن أوكي

المهم يا خالي واعيه عليه حتى ما كان عنده ليسن توه هههه
وريوس وانا نفذت الخطه >> ورحت فـ عااااااااااالم ثاني ( اغمى عليه :k_shock_1: )

وعقب خبرووني تكملة القصه العجيبه :14:
بنات خالي الحمدالله فكرن بعقلهن هب انا خبله وتمن يزاعجن وقف وقف لين ما وقف
ويا يشلني وكندورته البيضا استوت حمرا من الدمان >> لني طحت ع راسي طيحة قويه حسبي الله ابليسي :Oo:
ويوم حدرني داخل البيت كلهم كانوا يزاعجون وحالتهم لله ويقولون البنت ماتت ! >> قطوة بسبعة أرواح :fa45:

أذكر كنـا فـ العين ،، كنا كل اسبوع انروح واليوم اللي استوا فيه هالشي كان يوم اليمعه لازم انرد بوظبي عشان الدوامات بس رقدوني فـ المستشفى وسويلي عمليه وخاطوا راسي :k_shock_1:

لا وازيدكم من الشعر بيت يوم رديت البيت ورديت أداوم بنت الله يذكرها بالخير طيحتني وما عقتني إلا ع
الضربه ومكان الخياطه جان أروح عند بنت يرانا أصيح ههه بعد ما رحت عند ختيه أدريبها ما بتسويليه سالفه هههه

أدري أدري أنا خبله بس والله الحينه عقلت ههههه
وبس هاي سالفه قصدي مغامره من مغامرات :a068:

:

ألم ترى

هب هيّن ظهرت
ذكرتني بسالفه أنا وخواتي سويناها من السطح
كنــا انفرفر شلق ع الهنوود ههههه وننخش :fa46: >> أظني كانت فكرتيه بعد هههه

http://oasis.bindubai.com/bin/upload...1181768909.gif

مرحبا

نايس والله الموضوع ع الاقل نعرفكم على حقيقتكم
انا الله يسلمج يا شهودتي
مالي فضااايح انا كنت وايد مؤديه وما اسوي شي طووووول
.
.
.
.

اوكي اوكي اممممممم انا اذكر مره اربعه انا واخواني اصغر عني 2 وولد الجيران
هذا قبل كان طبجتي على قولتهم
المهم ..شفنها عنزه ما ادري شاه المهم هذي اللي تنحلب
وكانت خاطفه من الشارع اللي جدام بيتنا وبيتهم عاد شو هنيه قال ولد الجيران الكريم انا مشتهي حليب
قلنا فوقه وما نعفد على العنزه الفقيره ونحلبها خخخخخخخخخخخ وشرب الجليب الا جيه ونحن مستانسين... وكنهاية كل مغامراتنا انضربناا لين ما قلنا بس..

وجذا....

يوم كنت صغيره كان عندي imaginary friends وبط معفن سميته *ذكر مب انثى* stinky :biggrin: .. كنت أكرهه كلحد الا عـشر أشخاص .. وكنت أمرض لو مـاشوف أمي وأبويه .. ومن كثر ماكنت اكره شي اسمه بـشر يوم يونا ضيووف اوايج من الدريشه واقوللهم يطلعون من بيتنا ولو مايسمعون كلامي انسدح على الأرض واغمض عيوني وأطلع لساني أوني ميته:biggrin:
أيام الحضانه كنت اكرهه شي اسمه حضانه لانه ماكنت احب ارمس حد او اجوف حد لاني ماحبهم ف يوم خلاص اونه بنركب السياره انسدح على الأرض جدام السياره اونه جتلوني انا مابسير الحضانه:biggrin: ,, حتى مرات وايد كنت ألعوزهم وماخليهم يلبسوني ف يودوني الحضانه ببجامتي وبطتي وكل اليهال لابسين يونيفورم:biggrin:
يوم كبرت شويه ابويه اشترى لأختي بيت صغيـر وانا بيت جي تركبون دري وفوقه بيت صغير بعدين سلاييد .. ف كل يوم كنت أركب هالدري وأغني عيشي بلادي وأسمّع الفريج كله صوتي:1: ويوم كنت أخلص كنت أنزل وأسير ألعب ويا بيت اختي لانه بيتها كان اكبر عن بيتي :4:

شكرا شهووده على الموضوع =)

^ هههههههه تنسدح عالارض اونه

حلوه سوالفكم

احيد يوم كنا صغار
كانو يبنون الميلس في بيتنا
فدايما انا وبنت خالي نسير جدام البيت ونمشي على كومة الرمل والكنكري
اي سياره حلوه اطوف اسويلها باي
واي سياره كريهه وما ادّش مزاجي اعيب عليها لول


سالفه ثانيه
يوم كنت صف خامس اوني بديت اتحجب لان اشوف بنات خالي الكبار متحجبات وعيبتني السالفه
يوم ايي ولد خالي "مايحب بنات مب متحجبات" اتحجب جدامه
ويوم اسير برع افصخه ! لو شي رياااييل ولا هنوود عاااادي تراهم مب "ولد خالي"
مسوتلي دين خاص فيني "استغفرالله"


سالفه نمبر 3
من صغري متعوده اي حد يرد من السفر لاااااازم اييب لي شي حلوو
فمره اخوي كان راد من السفر ويايبلي ميني ماوس وميكي ماوس
بس صدق صدق كبااااااار
حتى يوم كنت اوقفهم عدااالي كانوا اطول عني لول
لسبب ما
اخوي شل الميني ماوس عني
وشووووو مافضحته عند ابووووي
واقوله شل الميني ماوس مالي واتحرطم ، وهو مايستحي اييب لي شي وبعدين يشله لول
لين ما اخر شي بروحه قااالي دخيلج تعالي شليها p=


اكمل ولا بس ؟
لول عيبتني السالفه


انزين اخر سالفه الي هيه نمبر 4
احم
يوم كنت صغيره ماداني شي اسسسسسسمه مــــــشــــــط
مااااحب حد يسحي شعري
مع ان شعري وايد كان سهل للتمشيط واحلى عن شعور خواتي
بس ماكنت اخلي حد يمسكه
لوول احيد مره كنت بسير المدرسه ومب راضيه ماما تسحيني
شردت عنها وهيه وراااي في البيت
ههههههه عالصبح اداابج
لين ما اخرر شي زختني وهزبتني ذيييج الهزبه المحترمه ومشطت شعري غصب

بس !

طرح طريف ما شاء الله ..
خاصه انه يتكلم عن ذكريات الطفوله .. والله أيام .. :rolleyes:

اممم عني آنا ليما الحين مب متذكره شغله سنعه أذكرها ..
بس بشكل عام أعتبر أقل وحده انطقيت بالبيت .. :fa38:
يعني مصطلبه ولله الحمد + مشاكسات بسيطه لا بد منها .. ^_^ ..

من بينها لمن كنت أظني 7 سنوات .. اختي الشريرة خلتني أصعد السلم المتحرك لكن من بره ..
(( مادري شلون يشرحونها هاي فسوو عماركم فهمتوا :m_afaker: ))
ولمن وصلت للطابق الثاني ريولي زلقت و طحت ليـ ـ ـ ـ ـ الطابق الأرضي عظهري ..
(( للتوضيح .. مالدحرجت عالدري لكن طحت من بره يعني شرات ما يطيحون من الدريشة سيدا صوب الأرض لول ))
احليلي تكسرت .. أذكر اليوم عدل .. شلون الناس تلمو عليه .. وشلني واحد من الرياييل ..
طبعا اختي الشريره جكوها وناجروها والثانيه رايحه الدور عالوالده ويمه (( يدوه )) الله يرحمها كانت معانا ..
بس صدق احليله الريال شلون محاتي .. شلني وقاعد يبي يهديني بأي طريقة وانا بعد هالطيحه مادري شو استوابي
من الضربه وماعدت أقدر اتكلم (( يعني صرت بكماء ليوم ونصف لول صدق كل اللي كنت أقوله إإإإإ أأأ اممم !! ))
+ أصيح وأتنفس بصعوبة يعني شوي وبختنق .. !!
احليله .. يقولي الريال شو تبين حبيبي .. أييب لج اسكريم تبين حلاوه تبين اوديج فوق تبين هاللعبه لول ..
وانا قاعده احاول أقوله أبي ماما أبي بابا لأن اللي كان يظهر مني مجرد أأأأ واهو ولا فاهم .. :fa39:
ليمن يو أهلي وشلوني عنه للمستشفى ..
وكل هاللوية اللي صارت عقب بسبة اختي الشريرة .. :sad:
ما بذكر المكان لكن من بعد الحادثه وقفو السلم المتحرك اللي طحت منه ..
وماعدت أسير له مره ثانيه لأني كرهته وقمت أزيغ منه مادري ليش عقده >_< ..

وبس ..
للحين مستغربة شلون ماستوى بي شي .. لكن الحمدلله ربي حفظني .. ^_^ ..

نتمنى نشوف ذكريات الطفولة لكل عضو وعضوه بهالساحه الصافية ..
لأن الموضوع فعلا غاوي ..

:

كل الشكر لطارحة الموضوع ..
ووفقج ربي بدنياج لدينج ..

احترامي وودي ..
إختج أنامل قلب ..

شكراا ع الموضوع الحلووو .. انا مااذكر شو سويت يوم كنت صغير :icecream:

http://qatar2.com/upload/uploads/0f45b0c798.jpg
:a032:

تحياتي للجميع

مـوقف عـمري ماراح انساه . .

ماراح اذكر تـفاصيله ، عن تضحكون عليـَه :fa56:. .

بس اللي بـقوله: كنـت منخشه فـ كرتـون طماط عند الشـارع فـ بيـتنا الجديم ، وكنت على أيـامها أحبي . .

وعمي كان ظاهر من المسيد ، ويجـوف الكرتـون يـتحرك

طلـعت أنـا فيه :k_harhar1:


كانـت شطانتي غـير :4:

بصراحه سوالفكم وايد حلوه وحتى انا طفولتي كانت وايد نايس.... عقب بخبركم

لول شدخل صورة حمدان عرض XP

المهم

انا ماكنت اطلع ألعب برع ومادري شو .. ما كانو يخلوني لاني ( البنت الوحيده ) فـ صدق كانو يخافون علي من كل شي ..

لكن انا كنت Devil حتى لو داخل البيت

كنت أحب أقص شعر بنت عمي .. واسير أعلقه فب قبضة الباب وأقولها قوليلهم أنج كنتي تركضين وعلق شعرج في الباب وأنقص لووول
بس عقب زخوني XD

وهيييييه تعرفون شو كنت اسوي في ( بنت الهوامير ) كان عنا ورا البيت جي صندوق وايد عووود داخله فحم
كنت اقولها تحت هالفحم شي باب سري يدخلج مكان ثاني نفس مال الرسوم ..
وكنت أخليها تدخل داخل وتيلس تحفر فالفحم وبعدين تطلع سوووووووووودددددددددددددد ددددااااااااااااااااااا هههههههههههههههههههه
بعدين تقول ما حلصت .. أقولها أنتي ما قلتي الكلمه السريه XD

وايد سوالف ماتخطر علبال اخاف اقولها ويحسدوني الناس عليها XD

بس كنت وايد امرض ثلاثترباع طفولتي قضيتها بين المستشفيات

اللااااااااااااي شي مشاركات يديده .. الحمد الله انه الموضوع عيبكم ^_^:


يقولكم شهوود يوم كانت صغيره .. كانت دهقه ( فجعانه ):fa37:.. عفانا الله :birgits_giggle:

يوم اييون عدنا بنات خالتي وبنات خالي.. نروح الدكان نتشرى شبس وعصير .... الخ :fa37:

عااد انا الفجعانه بسرررعه أخلص اكلي .. وما اشبع بعد خخخخ .. وبيزاتي خلصت ..

شو تسوي شهووود :a100:..

شوي شوي تروح لبنت خالتها وتوديها ورى الباب ( اونه محد يشووف خخخخ ) واقوله هذا مب حلو لاا تاكلينه .. بطنج بعورج هيهيهي .. آخذه عنها آكله هع هع :biggrin: وقبل هذا أوصيها طبعا لاا تقولين لأمج حرام بتحرج علي :bash::a100: ..

ويحليلي والله .. تخون فيني وتروح تقول لأمها ( لخالتي ) :k_sadwalk:

...........

على طاري الأكل لول..

بخبركم سالفه بس مابتصدقونها:k_special2:


في أول بيت عندنا .. جيي شي مدخل للسياير واحد جيي سيييده ويودي عند المطبخ الى برع .. ومدخل على اليمين يوديي للبيت..

ف كان فليل.. وابويه مادري من وين كان ياي بس وقف عند الباركينغ الى يودي عند المطبخ الى برع *يعني أخر هالشارع الى داخل البيت* .. وعلى اليسار كله شـير وعلى اليمين شي شير بس مب وايد .. وحصااا لكن صغاار .. جي مال زينه

المهم

أبويه يااب كستنا وشكله بيودييه المطبخ الى برع .. لكن كمن واحد طاح في هالشي *هالنزله الى فييه حصا وكم من شيره مادري ورده*

المهم

ف هو سار ولقط هالكم من كستناا الى طاحوو ..

وسار المطبخ الى برع ... وعااد انا كنت صغيييره ياااهل .. يمكن عمري 4 .. *ترا كان فليل* .. أشوف أبويه يلقط حصاا ويوديه المطبخ .. وانا في خاطري .. أبويه ليش يالس يودي حصا المطبخ؟

وجان أجوف أبويه يطبخ هالحصا .. وانا مستغربه بس ساكته ..

عقب يأكلني من هالحصاا .. وطعمه حلووووو:crosseyed:

وعاااد انا مستانسه على هالشييي ... انه عندنا حصااا عجيب في بيتنا يستوي تااكلوونه:a049: .. وماخبرت حد ..

ف مرات يوم أيوع ومايسولي سالفه .. أسير برع وألقط حصاا وأيلس أكله:k_harhar1: وقم امي كشفوونيي .. تحروني مينونه ..

لكن المشكله

انا شفت أبويه يطبخلي من هالحصا .. وطعمه شووو لذييييذ .. ف يوم مايشوفوني أسير أكل حصا .. بس المشكله طعم الحصاا مب حلوو .. ف قلت أكيييد شي كمن حصا هني الى بس سبشششل .. مب كل الحصا الى هني سبشل .. ف اتم أعض الحصا اشوف اي واحد بيكون طعمه حلوو:k_harhar1:


بس تدرووون ..

طول حياتي وانا مصدقه هالشي .. انه بيتنا الجديم فييه حصا سبشل يستوي تطبخونه ... الا من يمكن أربع سنيـن .. عرفت انه هالشي غلط .. لانه يابو كستنا بيتنا ويوم جربته تذكرت الحصا العجييب .. ف سألت أختي *وانا على نياتي* .. " هاه حصاا صح؟ بس يوم تطبخونه جيي يستوي اوكيه" .. وهيي تتحراني أستعببببط وتمت تضحك .. ومن هاليوم عرفت اني انا انسانه صدق مينونه:k_harhar1: حليلي كنت أتحرى كستنا حصااا سبشل:k_special2:



صدق كنت ياهل كيوت:fa41:

^^ hhhhhhhhhhhhhhh

شكلج كنتي مظلومه وعلى نياااتج !!!



,,,,,,,,,,,,,,,



انا كنت غبي غباااء مب طبيعي ,, تخيلوا يدتي كانت تسوي خبز رقاق وفي نفس اليوم كان عيد ميلادي ومكمل السنه ,, المهم يدتي قالت لوحده من ربيعاتهاااا تمسكني لان هي بتدخل داخل ,, كانوا يفكروني الييف ,, المهم
انا مادري كيف نزل الغباء عندي هذا الوقت وبصمت بالعشره على التااااوه
خخخخخخ
احلى شي في صور عيدميلادي وايدي ملفوووفه خخخخخخ ..


ويقولكم خمووود كان خريييش( لين الحين مو بس قبل) كانت أمي تمتحن ثانوية عامه سنة 89 كان عمري حزتهاا 3 سنين ,,
الموهيييم
ابوي كان يوديني عند يدتي الله يرحمها
وهناك كانت بنتي عمتي اكبر عني بسنه وواحد ماعرفه منو يستوي ولد ربيعة يدتي بعد اكبر عني ..
الموهم
كنت اخذهم واوديهم ورا البيييت ابطل الهووز عليييهم واسبحهم عقب انخش نحت الشبرية ..

بس كنت اكسر خااطرهم لان كان فيني ربوو .. عسب جذي محد كان يكلمني ..

بس تعرفون ( انا يوم عمري 3 سنين كانوا حاطين صورتي في الجريده الصفحه الأولى ×)

عمرك ثلاث سنين ومحطين صورتك ف الجريده !
:k_icon9:
ليكون متكلم ف السياسه لووول
عن جد ليش محطين صورتك
لئن اللي يحطون صورهم ف المجلات واخر صفحه بعد !
عاد انت بتخبرني وبتبصم بالعشره بعد لووول
:tounge:

اللحين دوري صح ؟
احيد لما كنت صغير دوم مطيح ع حضن امي وارضع !
لكن الأخ اللي اكبر عني ما ادري ليش محطي دوبه من دوبي
:k_special2:
كل مايشوفني ارضع سار وخوزني ودز بويهه
حشى ماشيء اخلاق ولا احترام شو ؟
انزين اخوك الصغير يالس يتمزمز وانت مول ماعندك وقت
يعني ماكل الخضر واليابس !
بس تدرون اني استاهل !
ماشيء حليب لكني يالس ادلع والأخ يبا يصلبني وييلس مكاني
:k_devil2:

عااااااااد الحين تبي تعرف ..
خلاص بخبرك

الله يسلمك ..
كان المانشيت في الجريده
(أم لأربعة أبناء السادسة على الدولة أدبي)

انت خبله تخبرني شي !
ترى عيني زو ههههه
:birgits_giggle:
الله يبلغكم اعلى المراتب ف الدارين

ياسلام على ايام الكشش والريول الحافيه *_*

الله يسلمكم انا كنت شيطانه نمبر ون آند اونلي للحين يقولون لي عليج شطانه شباب خخخ

مره قوم خالتي مقيلين عندنا عاد الظهر خلق الله كلهم رقود وفهود ولد خالتي الي كان اكبرمني بـ 3 سنين وقتها انا بنت 8 سنين خخخ قصيت عليه قلت له بنروح ناخذ لوز من بيت يرانا عاد هاييل عندهم جلب من هالكبار السود اميييييييه روعه هو ما جذب خبر وديته وياي قلت له انت اركب ع اليدار وقطع اللوز وانا بلقطهن عنك عاد اخينا مشتط ومشمر عن سواعده اول ما وصل فوق قطع اربع لوزات من الي يحبهن قلبي وفرهن ع الارض وانا شليتنهن وهههه رجعت البيت ...


بعد فتره من الزمان اشوف ولد يرانا العود ياي بيتنا ويقولي وين امج ؟؟ قلت له ليش .جان يقول ولدك خالتكم طاح في بيتنا والجلب عضه والحين هو في المستشفى ههههههههههه

اقتباس:

---

المشاركة الأصلية كتبت بواسطة الـيـاه

لول شدخل صورة حمدان عرض XP

المهم

انا ماكنت اطلع ألعب برع ومادري شو .. ما كانو يخلوني لاني ( البنت الوحيده ) فـ صدق كانو يخافون علي من كل شي ..

لكن انا كنت Devil حتى لو داخل البيت

كنت أحب أقص شعر بنت عمي .. واسير أعلقه فب قبضة الباب وأقولها قوليلهم أنج كنتي تركضين وعلق شعرج في الباب وأنقص لووول
بس عقب زخوني XD

وهيييييه تعرفون شو كنت اسوي في ( بنت الهوامير ) كان عنا ورا البيت جي صندوق وايد عووود داخله فحم
كنت اقولها تحت هالفحم شي باب سري يدخلج مكان ثاني نفس مال الرسوم ..
وكنت أخليها تدخل داخل وتيلس تحفر فالفحم وبعدين تطلع سوووووووووودددددددددددددد ددددااااااااااااااااااا هههههههههههههههههههه
بعدين تقول ما حلصت .. أقولها أنتي ما قلتي الكلمه السريه XD

---

ما تتخيلين اشكثر ضحكت ..

:hysterical:

انا ماعشت طفولتي

وحداني في البيت

ممنوع من اللعب و من الربع و من الطلعات

حياتي بدت من الاول ثانوي

كنت على نياتي . . . لين ماكان عمري الـ16

ويمكن ها سبب قسوتي الحين

والسموحه

مررررررررررره ..

كان ابوي نايم .. و اخوي بعد ما عنده ليسن ,, قال لي تبين تروحين الحديقة ؟ جان اقوله لا >>اهتماماتي اكبر عن جي ههههههه<<
قال لي خلاص بوديج الدكان ,, قلت له اوكي .. جان يقول بس اانتي عليج تاخذين مفتاح السيارة من جيب ابوي .. طبعا انا سرت لانه ابوي كان نايم .. ههههه .. المهم الحبيب شغل السيارة اونه بيرجع ريوس و شوي يعطيه ريس و دعمنا باب البيت !!!!!

انا راسي دق السده اللي يحطون فيها الاوراق و الملكيه و هالسوالف
جان اخوي يقولي لا تصيحين بوديج الدكان >> بعده يبا يوديني الدكان .. و انا ماااااابى ..

عقب انكشفنا طبعااااااااااا

اقتباس:

---

المشاركة الأصلية كتبت بواسطة الماتادور

انا ماعشت طفولتي

وحداني في البيت

ممنوع من اللعب و من الربع و من الطلعات

حياتي بدت من الاول ثانوي

كنت على نياتي . . . لين ماكان عمري الـ16

ويمكن ها سبب قسوتي الحين

والسموحه

---

:smile2: .. !!

القسوة مايكون لها سبب بحياتنا إلا لو بغيناها نحن
وسمحنا لها ان تملك حيز ما يستهان به بحياتنا ..
نفسنا .. !!

واهتمام هلك لك فهي ان كانت بنظر البعض قسوة منهم ..
فآنا أشوفه حب واصل ابهم لأبعد الحدود ..
يعني يابختك .. ^_^ ..

ولو انهم ماقدرو يبدونه بالاسلوب والشكل والطريقة الصحيحه ..
يبقى اللي بالقلب طيب وبيظل طيب ..

:

فشوف اللي بالقلب ..
وغض النظر عن غيره .. !!

:

وبعدين ماشفنا منك نحن غير الطيبه أخوي
فلا تقعد تتبلا على روحك .. ^_^ ..

:

وجل المعذره ان كان بتعقيبي ما يضايق ..
بس مادري ماقدرت أشوف حجيك وأنطم ..

فعل لا ارادي بدر مني ..
والمعذرة من الأعامق أخي ..

:

لا قرب الرحمن لقلبك مايوحشه ..
وزان قلبك بطيب الأنس لقربه ..
جل شانه ..

احترامي ..
إختك أنامل قلب ..