جنـــة جنـــة جنـــة .. الإمـــارات يا نـــاس جنــــة ؛؛

الســـــلاام عليـــــكم ورحمـــــة الله وبركــــــاتــه

ليــس كبــاقي الأعيــــاااد .. البيــت شبـــه مهجـــور .. والعيـــد ليــس كأي عيــــد ,,

عيد بأي حال عدت يا عيدُ .. بما مضى أم لأمـرٍ فيك تجديد

ولــكــن لا بـــد أن نكمــل العيــــد ,,

عبــارات :: عيــدك مبــارك .. عســـاك من عوادة .. كل عام وانت بخيــر .. يبــارك في حيــاتــك .. :: وبالتأكيـــد نـــداء (( الله أكبر الله أكبر الله أكبــر .. لا إله إلا الله .. الله أكبر الله أكبر .. ولله الحمـــد )) تمــــلأ أفوه النــــاس والكل يحتفــل بهذه المناسبــة الدينيــة العظيمــة على قلوبنــــــا ’’

العيــد لمـــه مع النـــاس واحتفـــال من نوع خاصـــة .. اتعايـــد على أهلــــك واتحاول قــد المستطاع معايــــدة الحجــــاج ,, ولكــن كالعـــادة اتصـــالات تأبى بكــل الطرق بسبب زحمــة الإتصـــااالات (( يالله يا دو شدي حيلــــج .. كلنــا نرقب نشــاطج :vampire: )) ,, ومع هذا عيدنـــا على الحجاج على وقت صلاة العصـــــر :fa36: ,, الحمد لله إنه بخيــر وبصحــة وما تبعـــوا ,, طبــعــاً خلصــت الزيــارات قبــل صلاة الظهــر على بيــت العمــــام (( هب أهل العمايم السود :argue: )) ,,

استــغـــراااااب من شلـــة الشبـــاااب اللي عندنـــا في الجامعــــة ,,

لي عودة بعد الفاصل :biggrin:

الســاعة الـ 9:20 مســاءاً

اليوم : السبــت 6 ينـايـر 2007


..

السلام عليكم ورحمة الله وبركاته

اولا يسعدني اكون اول شخص يرد عليك ياخويه

وبصراحه للحينه .. الحجاااج ييون ويسلمون ع الوالد ..

وتسلــم ع الفضفضــه البيسطه ..

والسموحه

خويتك
صمت

دودودودودودو هاااااا بــشـر p=,,

أمحق فااصـل لول

يا الله يارب ترزقنا بمكاانهم نكون حجيجك وتتقبل طاعتهم وطاعة الجميع
منصوري حلوه فضفضتك
ننتظر لين ماتخلص الدعايه
لاهنت شيخي

عدنـــا ,,

الإستــغــراب اللي كلنــا نتكلم عنـــه من الشبــاب اللي ويــايــه في الجامعــة خلاني اشــك بعاداتنــا وتقــاليدنـــا ,, لأن الإستــغراب كان من شبــاب بحيرينيين في البدايــة وخلاف يــا من شبـــاب اماراتيـيين ,, قلــت لهـــم :: نحــن نبــدي عيـــدنــــا من صبـــاح الله خيــر (( اكيد العيــد من صبــاح الله خيــر .. عيل من آخر الليل :argue: )) وأول ما نبــدى ناكل عيــش ولــحـــم " يالله حيــّـــه سنــام الحوار ماشي أخيــر عن لحمه كأنك تاكل ماي (( هل كيف تاكل ماي الله اعلم )) " ,, قالوا شو ها انتوا متوحشيـــن .. قلت لهم انتوا المتخلفين :k_mad_argue: ,, بس ما عليــه تختلف العادات والتقاليـــد بيــن الشعـــوب ومن كثر ما شكيــت بعاداتنــا قمت انشــد (( الغفلي وبن حميـدان )) ووافقوني بأن العيــش واللحــم هو الإفتتاحيـــة :a036: ’’

وخلاف يــحــلــى أكل الحلاويــــات (( طبعــاً أهل الواحات كلهم حلويــات :vampire: )) ,, واتمر على البيـــوت واحــد واحــــد ’’

وفجـــأة تقرر الآتي ،،

الســفــر لدولة قطــر الشقيقـــة :4:


لي عودة ما اروم اكمل اصابعي اتعورني لأنيه من زمان هب كاتبـــ:14:

الساعه 9:28 مساءاً

..

ولكم مرة ثانيه اخويه

فضفضه غاوية

وحلات العيد بالعيش واللحم .. ^_^ يوعتني

وفي انتظار عودتك مرة ثانيه

يالله مايسوى عليك ياخويه

تكتب كمن جمله وتتعب ..بسك دلع خخ سوالف

خويتك
صمت

بـانـتظاركــ !!

في الانتظار مع المنتظريـن ؛؛؛

أصلا بعد الذبح لابد نااكل منها طبعا بعد الطبخ

ننتظر لوول هل كيف تصير هالدعاااياات هالكثر

قررنــا السفــر لقــطــــر

http://img.rian.ru/images/670/47/6704755.jpg

أنا ونسيــبــي ( ولد عمتيــه ) وولد عمتيــه الثانـــي ,, قلــت لهــم ( تــم ) :vampire: ,, وبعــد صــلاة العصــر رحــت أعــايــد على عمتيــه وخالــــي ويدتيـــه .. يلســت عندهم ليــن قبــل المغـــرب ورجعــت مرة ثانيــة للبيـــت ,, صليــت المغرب وزهــب الشنطــة ( اقص عليك اي شنطــة اي خرابيــط ,, كيس باريس غاليري :4: ) .,.

طبعــاً عنديه عهده ولازم اسلمهــا لأي حــد .. اخويه الصغير والرضيعــة ,, حطيتهم بيت عميه وارتحــت من العهــــده :vampire: ,,

قبل صلاة العشـــا انطلقــنــا بســيــارة ولد عمتيــــــه ,, ويالله انت حيـــــّــــه ــ سوالف وسوالف ’,،,

مرة عن صدام ومرة عن السودان ومرة عن افغانسـتـــان ,, حتى في الديـــن سولفنـــا :a036:
والمنتخب الأبيــض كان لــه نصيــــب من الحديـــث ’’

وصلنــا حدود الإمــارات (( الغويفــــات )) ومن بعدها حدود السعوديــة (( البطـحــاء )) وبعدها حدود السعودية بعد (( سلوي )) || البطحـاء دخول للسعودية وسلوى خروج من السعودية || وخلاف يتنــا حدود قطــر (( أبو سمــرة )) او بالعامي بو سمــره :vampire: ,, وسولفنـــا عن الجســر اللي لغوووه واللي كان بيربط بين الإمــارات وقطــر

ياخي السيــاســة بهدلتنــا .. لمصالح السعودية الخاصــة تم الغاء هالجســر اللي كان بيقرب المســافــات بين الإمارات وقطــر ,, يقول لكم استثمــارات السعودية ودخلهم في الإمارات يقارب الـ 10 أضعــاف استثمــار الإمارات في السعوديــة ’’ يعني السعودية تبــى تاكل وتاكل ما عليــهــا من حـــد ,,

بعد حدود بو سمـرة ,, طويل العمر (( انا )) رقـــد ,, وما وعيــت إلا في بيــت الشـبــاب اللي بنروووح لــــهـــم :yes: ’’ الحبــيــب (( بعد أنــا )) يوعــــان ’’

بس يا جماعــة الجو بــااارد في قطــر ,, يعني من بدع زايــد ليــن قــطــر درجــة الحرارة في تنازل مستمر .. وصلــت للــ سبــع درجــــاااااات سليزيــة :m_ma9dom:

المهــم ,, نسيبي قال ما يــبــى أكل وأنــا ما اروم ارقــد من دون أكـــل ,, ظهرت انا وولد عمتيه وسرنا اندور لنــا مطعم واذكر شي مطعم ورى البيت تقريبا سرنــا لــــه وإذ بــه فاتـــح :2:

قلت له عندك زنجر .. لا ما فيــه اربـــاب ,, والجووو البارد يذبـــــح :fa36:

ولد عمتيه طلب له برجر دياي وقال له حط بيــض بــه ,, انا قلت له سو ليه شراته وحد كل شي .. قال ليــه (( كله كله )) قلت له كله كله وطلبت ليه بعد سندويكتيــن ( باليمني ) وسندويجتيــن بالعامي :icon_rr:

وكلنـــا ويا وقــت النوووووم

المشكلة البيت شبه مهجوور ,, بعد وفاة أمهم ابوهم راح عند حرمته الثانية في البيت الثاني ومحد بقى في البيــت غير الشبــاب ,, يعني بيت شبابي :biggrin:
دورنا لنـــا برانيــص ودواشك ( على قولت السعوديين طراحـاات ) وما لقيــنــا ,, انسيبي وولد عمتيه رقدوا على السرير وفرشت ليه شرشف خفيف على السراميــك ورقدت وانا متحلف في بو النــمــر

وللحديــث بقيـــه

..


صمت الدموع ( المشاركة الأولى )

الله يحفظ الوالد لكم ’’
واسعدني تواجدج في الصفوف الأولى :a036:
ربي لا هااااانج

..

السلام عليكم ورحمة الله وبركاااااته ،،،

ذكريتني بعضو اسمه (( أحلى منصوري )) كان دوووم يكتب مواضيع حلوة ومميزة :yes: .

اسمحلي شيخي ظهرت عن طور الموضوع.

تسلم عالفضفضات الرائعة ويعطيك ألف عافيه.

والسموووحه من اخوك/ قايد الريم :4:

سلالالالالالالالامي عليك يالمنصوري,,

عيل كنت في قطر :fa41:

ياخي هذي البلالالاد تغيرت نظرتي عنها من سرت لها أنا :fa35:


بانتظار التكمله عزيزي :icecream:

قطر
الطووووووووووووط لايسمح لنا بدخوولها لوول تخلف هالعايله خخخخخخخخ

حلوه المغامرات وحنا متابعين معاك منصوري

انزين كمل ياخي كم بنتريا نحن (( نفد صبرنا ))

عدنــــا ,,

اليـــوم : الأحـــد 7 ينـايــر 2007

..

بو نمــر طلـــع بو نمــــل :k_no: .. ما منـــه فايــــدة ,, طلــع النمــر تقليـــد وارد بانكوك ( شرات أغلب لبس أهل الإمــارات اللي وارد بانكوك لزووووم الخقــــه:3: ) .. بو نمــر ظهــر نايلووون ويجمـّــع البروووودة ما يعزل البروووودة .. وعيــت الصبـــح وحســيـــت كأنيـــه ماكل طـــن ثـــلــــج .. بلاعيـــمــي يا نــــااااس :fa36: ,, طبعــــاً أحلى شي في الرحلـــة بإنـــا دوووم نجمـــــع الصلواااات :4: ,, صلينـــا الظهـــر والعصـــر رباعــــه ( طبعاً وعينا الفيــر وصلينـــا :14: ) ,, وخلاف يانا ابو الأولاد ( كان عندنا وكيل يوم كنت في الإعداديـــة اسمه " بو البنــــــــااات " :vampire: ) وقال لنـــا تعالوا اتغدوا عنديه في البيــت الثانــــي ,, اول ما حدرت الميلس بغيــــت أشل المخدات اللي طايحـــه على الأرض ولــكــــن

وبخني ( حلوة هالكلمة ) (( يعني هزبني )) ولد عمتيه وقال ليه اييييييلس ,, هالمخدات اللي طايحــه على الأرض ديزاين ( اونه يعني موضه وحركة اتنزين ابها البيــــت :wacko: ) .. تغدينـــا ويا سلااام على طباختــهـــم .. كأنـّــا ناكل فلفل هب عيـــش

على وقــت صلاة العصــر ظهــر الأبووو وراح يصلي ونحن تبخرنـــا واتذكرنــا ( ما بعد العود قعووود .. يعني خل نلبس البـــاب " حد منكم لبسه الباب قبل " :4: ) وترخصــنــا منه مع ولــــد الملقـــب بــ ( طراد ) او ( بو تركـــي ) يالله حيـــه بو تركي :biggrin: ,,

ركبــت معاااه في السيــــارة وعيال عمتيــه ركبوا سيــارتهـــــم ـ،،:

وقال لنــا بوديـــكم مكاااان ما بتحصلووون شراته بالإمــااارااات

إحدى دعايـــاتــــه //
ملك البحرين يا من البحرين ( عيل من وين بيي صدق انيه غبي :k_mad_argue: ) وزار هالمكان مع شيخ قطــر وعوّد على طوووول للبحرين


لي عودة


..

تنيــنـــــه ؛؛

تنفعيــــن اتسوين دعايــة لشركـــة دووووو :a036:
تشكرات افندم وحالة شتووورة :4:


..

الساعه 5 ونص بتوقيت بوظبي :heart:

..

الـسلام عليكم والرحـمـه ,,


(1) الـعيـد ؛؛

عيد بأي حال عدت يا عيد بما مضى أم لأمـر فيك تجديد


أما الأحبة فالبيـداء دونهم فليت دونـك بيد دونهـا بيد


أنـا أجـاوب عـلى سؤال الـشاعـر بـشـطره الـثانـي عـدت يا عيـد لأمر فيه تـجـديـد وعساكم دائـما من عوادة الـعيـد :fa35: فـ أنـا أثق وأؤمـن بأن كـل عـيد يـحمـل لـنا شيئاً جـميل يـفرحـنا وإن قـلنا لـم نشعر بالـعيد أو انـه مـر مرور الـكرام ولـكـن لابـد من فـرحة ممـيزه خالجـتنا وشـعور مـختلف ولـو لـوهـله أو بـرهـه شو الفرق :biggrin: ,, بالـرغـم مـن عـدم حـصولي على عـيديـتي هذا الـعيد كـاملـه:h_daleel: بسبب عدم تـواجد الوالـد ,, افتـقدتـه حـقاً وهل كيف يـمر صباح العـيد مـن دون أن أقبل رأسـه وأهنـيه بالعـيد وآخـذ العـيديـه :vampire: لـكـن الحـمد الله سـمـعت صـوتـه وشـبك الخـط مـعـنا قـبل آذان الـظـهر الله يـخـلي الإتـصالات وخدمـاتـهم أللي من سنين وبـنين :m_m7tar: الحمد الله عـايدت عـليه بالرغـم مـن تغير صـوته بـسبب الزجام ,, ولـكـن الحمد الله الأمـور كـما قال أغـلبهم تـيسرت لــهـم وكانت طـيبه :k_blush-anim-cl: ,, وشربنا ماي زمزم :14:


(2) صـبـاح الـعـيـد ؛؛

في كـل ليلة عـيد مـن صـغري مـا أييني رقـاد ,, انتم واعيين وأنـسو الحلويات وربشـه ألـين الساعه 3 أو 4 وعـقب أي شي أحـاول أرقـد ماشي فايده :wacko: ألـين ما أفـز على آذان الفـير ,, صـدق الصباح في الـعيد يـكون غييييييير عـن كل صـبـاح ونسماتـه وشـمسـه وشروقـها اتـكـون غيير :k_blush-anim-cl: ,, أتـعجـب مـن بعض الـناس أللي في يوم العيد يـنشون الظـهر أو الـعصر :3: حلااتـه العيد ع الصـبح وصلاة الـعيد والحلويات ع الصـبح :biggrin: ريـحة البخور والدهـن عـود و الفـاله والأنـواط :4: ,,

أغـلب ربيعاتي يقولون لـي الـعيد بس ألـين العـصر ويـخلص أو حتى الظـهر وخلاص :huh: قـبل عـلى أياام المـدرسـه كان العيد عـندي عـشرة أياام ,, ألـين عاشر يوم وانا أحس بالعيد وفرحتـه بس من جمـن سـنه بس أليـن ثالث أو رابـع يوم الـعيد :k_blush-anim-cl: ,,




(3) قـطـر وبيت شـبابـي ؛؛


بـالرغـم مـن أني مـا جت زرتـها قـطـر بـس أحـبـها وشـعبها صدق ناس غيير :fa35: ,, أتـحسهم جريبيـن جداً من عاداتـنا وتقالـيدنـا :m_m7tar:

فـي بـيت شبـابي شي طبيعـي بترقد ع السيراميـك وزيـن يوم حصلت شرشفــ هههه,, غـمضتني يوم رقـدت ع السيرامـيك :4: بـس اتذكـرت فوق انـك شبعان رقـاد طول الوقت في السـياره :biggrin: زين يوم إنـك رقدت في السياره ^^".


(4) بـو نـمـر وبـو تـركـي ؛؛

حـاولـت أتـوصل لمعنـى بو نمر شرات ما حـاولت مع حالة شتوره بس للأسف ما وصـلت لـ شي :rock:

بـو تـركـي طـراد ؛ لاحـظت ان الشباب علـيهم ألـقاب عجــيبه حليلـهم :m_ma9dom: مسـميات غريبه عـجيبه ونـصها ألـغاز وتشـفيرات :h_daleel: بـ عـكس البنات أللي ألقابـهـن نـادره وإن أنـوجدت أتـكون مفهومـه وعـاديـه هب شرات الشباب :14: ,, شـو الـسر يا تـرى ؟! :icon_rr:


لـي عـوده مع رقم (5) :h_6abakhah: والسمووحـه جـان طـولنا :4:

اقتباس:

---

اول ما حدرت الميلس بغيــــت أشل المخدات اللي طايحـــه على الأرض ولــكــــن

وبخني ( حلوة هالكلمة ) (( يعني هزبني )) ولد عمتيه وقال ليه اييييييلس ,, هالمخدات اللي طايحــه على الأرض ديزاين ( اونه يعني موضه وحركة اتنزين ابها البيــــت :wacko: )

---

:4:

مشكور المنصوري

استمتعت بالموضوع

.,.

فــي انتظــار المــزيــد

:icecream:

المنصووري
كملها شيخي لاهنت

ما شـــاء الله الكـــل يرقبــــــــ ... البارحــه يـــا من الفايــــه وتعبــــــان لأنـّــا خيـمنـــا هنـــــااك

واليـــوم امودي اهليـــه دبـــــــي .. ويالس احضـــّــر موضوع (( حركــــات )) في الواحــة المفتــوحــة

ويبـــالي احمـّـل الصــور حق هــذا الموضوع

والله راد لكم الا اذا خذ الله أمانتـــه :yes:

شكراً أحبــاب قلبي على التشجيـــع ’’

لا عدمنـــاكم فرداً فرداً

انتم هنيـــه :heart:
..

متواصلين خلف الكواليس^_^

ونحن في الدرب لذاك المكان ( اللي صار ليه كذا يوم ذالنكم عشان اتعرفونه :a034: ) شفت مليوووون فيتنامي ( وهل كيف عرفت بانهم فيتناميين الجنسية .. تخمين يا جماعــة ) ( والمليون هب اللي بيحصلها شاعر المليوووون .. لا يعني مبالغة لكثرتهم ) قلت للقطري اللي انا معاااه // يمكن هذيله مجنسين بعد :fa34: ,, المهم وصلنـــا المكــــــان ’’

وبدت سالفـــة العكــــس ( يُقـــال وفي ذمــة المصدر كان شي برنامج يقدمه سعود الكعبي اسمه كعس ) والمقصووود بالعكس يعني (( تصوير شرات ما يسوي صريحوه ولماحوه (( تك تك تك لين ما تكتك مخهم )) )) ,,

هيييه تعالوا ما خبرتكم المكـــــااان .. الصراحــة الجو في قطــر لا يقـــارن برد شديـــد وقارص ,, اوووه نسيت اقول لكم المكــــان

المكـــان هو سوووق واقــــــف

طبعــاً هذا السوووق قديم في قطـــــر .. تم ترميمه وتعديله ولكـــن بزي قديم ( حتى السوق بدى يلبس كنادير خخخ ) .. يعني تم الحفاظ على الطابــع القديــــم ,, حتى العسكر ( الشرطة ) اللي هناك لابسين لبس الشرطة القديم ( غترة وعقال :a033: )

يقال بإنه شي بدبي دار الحي اموت اموت واحيـــى اشوي فيه شرات هالسوق بس وايد صغير صوب المرسى وهذا والله اعلم ( افيدونا يا أهل دار الحــي )

اتركم مع بعض الصور وبعض التعليقـــات الخاصـــــــة ,,

قبل لا اتركم وتتركوني .. كل شي في هالسوووق قديم واسعار الدكاكين رمزية بس بشرط اللي يستأجرهن قطـــري ولازم يكون متواجد في المحل بشكل شبه يومي ( يعني يخدم المتقاعدين بشكل رئيسي )

لي عودة مع الصـــور بعد التحميــل :2:


..

هزايــــم

ان شاء الله اتكون كل حروبج نصــر هب هزايـــم
شكراً عزيزتي على المرور الأول الكريم
لا هنتي

والسموحه

..

صمت الدموع

صدقج حلاة العيــد بالعيـــش واللحم
ويقول لج عبدالمجيد // اتدلع يا كايدهم (( خخخ مصدق عمره ))
شكراً اختي الفاضلة على المرور الكريم

..

المنصوري يحييكم

أنـا عـدت :h_6abakhah:

(5) مـتـابعـه بـشغف :icecream:

يقولون تنون مـتابـعه ليوميات منصوري الواحـات ومستمتعين معاك :yes: في انتـظار كل جديـد ومشـوّق :m_m7tar:



:14:

جان انا متابع بعد..

بانتظار التكمله حبوووب ^___^

عليك حرجاات إنما إيه يا الشيخ

خخخخخخخخخخخخخخخ اقرى اوني بندمج إلا اشوي اضحك:a068: على سالفة تك تك لين ماتكتك مخوخهم
عاد تعالوا ولقطووني يوم اقرى هالجمله يقال بإنه شي بدبي دار الحي اموت اموت واحيـــى اشوي فيه شرات هالسوق بس وايد صغير صوب المرسى وهذا والله اعلم ( افيدونا يا أهل دار الحــي ) :hysterical:
خخخخخخخخخخ كملها الشله لاهنت :tounge:

ننتظر الصور والتعليقات ,,واظني سوق جميرا هو الشبيه لسوق واقف"متى يقعد؟:tounge: "

متابعين لك
:a033: