شخابيط ...؟!

السلام عليكم ورحمة الله وبركاته

مجرد فضفضه .. مب لازم تردون علي لو ماتبون .. لانها مجرد فضفضه..

دايما كنت احس اني غلط في المدرسه .. كنت احس عمري غييييييير .. غييير عن كل البنات .. انا عندي طموحات احلااام اشيا ابا احققها في حياتي .. اما هم؟؟ ماعرف شو اقول..
يوم كنت صغيره .. دايما كنت اقول .. بسوق سياره وبتكون سيارتي بييتل ورديه.. بستوي مديرة شركه عوووووده .. بكون وحده مشهووره وايد .. بساعد الناس .. بدرس برع .. يوم اكبر بسير اشترلي بيت صغير *تعرفون هالبيوت الورديه الى عدال صيدلية life عند بنك الأمارات عشارع الوصل؟؟* كنت اوني بشتري بيت من هالبيوت وبعيش فيهم انا وجلبتي.. وبتبنا بنت ومووووول مابعرس .. ويوم ابويه بيستوي شيبه باخذه من امي وبعيشه عندي واخلي امي تعيش عند اختي الصغيره < طاعو التفكير ههههه حليلي كنت ياهل وكنت اتخبل على ابويه وايد

كنت احلم واحلم .. والحمدالله انا اهلي من النوعيه الى يشجعون نحلم وجي .. مب يعيشونا في جو كئيب وين كل شي لاااااا .. طبعا نحلم .. بس مب كل شي بيتحقق ..

دخلت هالمدرسه .. وانا على نياتي .. ارمس عن احلامي وكيف ماروم اصبر اكون 18 عشان احصل الليسن .. حشااا .. حطمونيييييييييي .. الى قالتلي عيب .. والى قالتلي حراام .. والى قالتلي منقــود عند العرب يا بنت الناس .. والخ من كلام يحطم

والعام يا الوقت نختار فيه الجامعه الى بنسيرلها .. انا طبعا بدون تفكير قلت جامعه خاصه .. وطبعااا من عقبه حصلت كلام وكلام .. بس هم كيف جي يقولون عن الجامعات الخاصه لو هم مب فيها؟؟؟ كيف جيييي!!! تخلف بصراحه,, بس في هالفتره .. ماهتميت لرايهم بصراحه .. اهم شي انا مرتاحه بقراري وأبويه راضي .. والحمدالله أبويه شجعني عالجامعه الى سرتلها لانها معروفه ودراستها زينه!


هالبنات حطموني .. يعني الحمدالله كلنا عايشين في عز بس مافيها شي لو حلمنا في شيي غير *بعرس وبيب عيال وبس* .. من كان عمري 13 سنه وربيعاتي مايفكرون الا فالعرس!!! شو هالتفكير؟! عيشو حياتكم يا ناس!
وبعدين .. شو عرفهم انهم بيعرسون؟؟ احس انه صدق بينهاروون لو في الاخير يعنسون ومحد ياخذهم.. استغفرالله

انا انسانه وايد واثقه من عمري .. وماأتخذ قرار الا وانا متأكده منه 100% .. وأهم شي .. دايماً اكون صريحه .. ف عشان جي .. البنات دايما يخبروني كل شي .. دايما يكون عندي الأخبار لول.. بس الشي الغريب .. نص بنات كلاسي الى في جامعة زايد مب مرتاحين .. يون عندي ويشتكون عن الجامعه .. بس يسيرون عند ربيعتي الثانيه الى بعد في جامعه خاصه ويقصون عليها .. يخبرونها كيف الجامعه روعه والخ من اشيا .. ويلسون يحطون عليها لانها في جامعة مكس .. اما انا .. سكتو عني .. لاني دايما كنت ارد عليهم بطريقه باارده وأقوللهم "دام انه أبويه راضي هالمهم .. ورايكم في جامعتي ماتهمني لاني اعرف اني اتخذت القرار الصح".. حليلها .. مادري كم بتتحمل منهم ..
انزين شو فيها لو يخبرونها انهم مب مرتاحين؟؟ مفتشلين من قرارهم الغلط؟؟ .. حسيت حركتهم حركة يهال .. صدق السالفه ماتسوى

بديت جامعه .. وماروم كيف اشرحلكم بالفرح الى احس فيه!! .. كل يوم ..يوم اسير الجامعه .. احس بفرحه عجيبه .. ماروم اشرحلكم كيف .. انا جاااااااااامعيييييييه خلااااااص مب في المدرسه .. ووايد مرتاحه في الجامعه الى فيها .. كل البنات كانو يخبروني كيف حركات تستوي في الجامعات الخاصه .. بس انا بصراحه ماشفت شي .. يعني اخسسسسسس شي شفته .. وحده هنديه لابسه كت .. ومجموعة بنات لوووث الفاظهم وايد بايخه .. هالشي الوحيييييييد.. الحمدالله
الجامعه حلوه والدراسه فيها حلوه .. وتدرون شو الأحلى .. انه اي حد ايي يسلم عليكم .. مثلا .. في وحده متنقبه داااايما يوم تجوفني تقولي "السلام عليكم ورحمة الله وبركاته" ارد عليها السلام بعدين تنزل راسها وتختفي ههههه .. ماعرفها بصراحه ولا اعرف اسمها ولا اعرف شي عنها .. وربيعاتي دايما يسألوني هاي منوو؟ اقوللهم ماعرف والله هاي ربيعتي مال "السلام عليكم ورحمة الله وبركاته" بس شو اسمها وشو تخصصها .. ماعرف؟
ومن كم يوم .. كنت بس جي واقفه جان تي وحده مواطنه وتسولف وياي لربع ساعه .. هيي منوو شو اسمها وشو تخصصها .. ماعرف؟

في جامعتنا .. تعرفون شو عيبني .. في اول كلاس قالولنا .. هذا واجبكم *what are your goals for this course and for life* وايد حبيت هالسؤال .. ذكرني في كل احلامي .. طبعا احلامي تغيروو لووول مب نفس احلامي يوم كنت صغيره
بس هالأشيا الى يت على بالي
I want to be a leader
I want to make a difference
I want to be successful
I want to achieve high grades
I want to learn 3 more languages
I want to travel the world
I want to help my country
I want to be me .. I want to be the best I can be

كل يوم .. افكر في طموحاتي .. وأحلامي .. ودايما دايما ارمس ابويه عن هالأشيا .. احس انه يستانس .. بس ولاشي من الأشيا الى أباها بتتحقق لو انا ما أجتهد ^_^ .. حياتي استوت جد في جد .. من ناحية الدراسه طبعا .. صدق استويتgeek ولا على قولتكم مصريه ... كله ادرسسسس وادرسسسس ولا يوم بسلم واجب ارد اقرااه واحاول ازيد فيه واتأكد اني مانقصت شيي .. وطبعا لازم اراوي ابويه كل شي اسويه .. احس بهالطريقه اقوله .. ابا استوي مثلك يوم اكبر .. لاني صدق اتمنى هالشي!

البارحه
سرنا فندق باب الشمس ك*عايله* واتسحرنا هناك .. في الرده .. كنا حاطين نور دبي *نوووورُ حياااتيييييي نووور دبييي =p * ومسوين مقابله ويا معالي الوزيره مريم الرومي... من احلى المقابلات الى سمعتها في حياااااتييييييي .. صدق المقابله وياها كانت رووووووووووعه بمعنى الكلمه .. انا من قبل موول ماكنت اعرفها بس بعد ماسمعت هالمقابله .. حسيت انها انسانه صدق روعه وتستاهل تكون وزيره .. صدق انها روعه وماعليها كلام .. الله يحفظها .. صدق اني احترمها وااااايد

حبيت حياتهاا .. حسيت حياتها حلوه .. انسانه وايد تحب تقرا .. ماتحب التلفزيون .. يوم تشتري كتاب تكتب اليوم الى اشترته فيه ومتى اشتريته ومتى بدت تقراه ومتى خلصت تقراه .. وكانت ترمس كيف الكتاب غالي بالنسبالها ... جنه حد من عيالها .. ماتحب تعطي حد كتاب من كتبها .. تفضل تشتريلهم كتاب يديد وتهديلهم اياه ..

بالمختصر.. حبيتها وحبيت شخصيتها .. صدق انها انسانه روعه .. ماشاءالله عليها ..


شكلي وايد رمست ..
احسن لي اوقف الحينه

وآسفيـــــن

شمعة أمل

جـااااااااااااااااااااااااااااااااااااااان كملتـي يا شمـعه أمـل ..
أحـب أقرا هـ الاشيــااء ..
ما تدريين انا شقد مـحتـاااجـه لهـ النووع مـن التشجـيييييع ..
لانـي تقرييبـا مرييت بنفس ظرووفـج هاااااااي ..

متـاابعــه لـج لو بتنزليين شي ثاانيييي

الشي البايخ في جامعتنا انه اتي ايام موووووول مافيها دراسه .. وايام كلحد يبي شغله وعاد تعالي انتي ماترقدين ( تحسين ماشي تنظيم من صوب الاساتذه )
أما حلاتها وبايختها يعتمد اعتماد كبير على البنات الي تتمشين وياهم . .

وحلو الواحد يكون متفرد في قراراته .. وان شاء الله توصلين وتحققين احلامج يا شمعة امل

شوفي انتي من ابسط شي ( نك نيمج في منتدى ) اخترتي يكون فيه أمل .. فما بالج فشغلج ؟

شدي حيلج

ويمكن ربعج يوم يحطون جامعة زايد بالمقارنه وياج يحسونها اتعس جامعه ويوم يقارنونها وي الامريكيه مثلا .. تكون اريح واحلى ..

مرحبا شمعة أمل ..
حبيت اكون أول من يرد على فضفضتج .. :thumbup1:

احب اقولج شي اتعلمته .. لا تقولين احلامج لأي حد ..لأنهم اذا هم من الناس اللي مايقدرون يحققونهن .. فبيحبطونج اكيد .. :fa44:

الشي الثاني .. كون انج انتي في جامعة مختلطة .. هاي شيء عادي وانا كان في خاطري ادخل اختي الصغيرة الجامعه الأمريكيه اللي عدالنا .. بس ما استوى لأنه سافرنا ومالحقنا انقدملها.. وانا وايد متندم اني ما تريت ودخلتها ..هاي الجامعة لأني ما أباها تضيع حياتها وهي تدرس في التقنيه وتطلع بدبلوم ونحنا كلنا عندنا بكالوريوس..فما اباها اتكون اقل عنا :k_smartass: .. الشي اللي ابا اقوله انه دام انج انسانه محترمه .. ما يهمج كلامهم .. لأن المحترم يفرض احترامه على الباقين وبعد فتره من الإحتكاك ابهم بيعرفونج .. وبيحسبولج ألف احساب ..
انا ويايه بنات في الدوام .. ماشا الله عليهم محترمات .. محد يقولهم شي ولا حد يقدر ايعق عليهم كلام .. :thumbup1:
فما يهمج منهم .. :fa44: :fa44:


الشي الثالث ..لا تمشين ويا ناس اقل منج في المستوى المادي والفكري .. لأنهم إذا كانوا اقل .. بيييبون لج الإحباط .. وإذا كانوا .. اعلى.. بيخبلوبج :fa44:

واسمحيلي على الرد .. لأني مستعيل .. بس حبيت اوضحلج بعض النقاط.. واعطيج اشويه من الخبره في الحياه .. اللي انا اتعلمتها خلال هالسنين :9:

و عليكم السلام و رحمة الملك العلام

ابتسمت كثير و انا اقرا فضفضتك
أو يومياتك ..

من القلب أتمنى ان شمعة
آمالك تدوم مضوية دوم يا رب :)

كل يوم راح تشوفين اشياء جديده
يمكن مو كلها تفرحك
بس أهم شي انها كلها بتعلمك و بتقويك .. :smile:

كل التوفيق عزيزتي

السلام عـليكم والرحـمه ,,

حـلوو الواحـد يكون طـموح والأحـلى أكـيد تحقيق هالـطموح :thumbup1:

عيبتني أهـدافـج :k_smartass: وبالعـزيمه والإراده راح تـقدرين اتحققينـهم أكـيد :fa42:

وبالنـسبه للجامـعه مـا علـيج مـن رمسـة حـد أهـم شي دراسـتج وشرات ما يقولون واثق الخـطى يمشي مـلكاً :k_smartass:


ربي يوفقج دووم حبووبه :fa42:

عيبتني فضفضتج وطموحاتج .. صدق ترفع المعنويات =d

حلوه فضفضتج

وحلو انه الواحد يكون طموح

انا ماقول حق حد عن احلامي مابا اقولها إلا يوم احقق اقل شي اقدر اسويه
انا مرات يوم نيلس ويا الاهل وجي يعرفون اني احب الدراسة واني اذا اصريت على شي اتم عليه
بس يوم اقولهم شو ابا استوي يوم بخلص من الجامعة يقولون لي شو تبينه مادري شو يعني انا كنت ابا اتخصص نظم معلومات او بزنس بس يوم اقولهم يحبطوني بس انا ماعليه منهم يوم ايلس اقول حق اخويه يقولي انتي شدي حيلج واكيد بتوصلين للي تبيه ودوم انا محطتنه هو قدوتي فالدراسة لنه هو اختار مكان مناسب وهو اللي احسه تقريبا مرتاح الحينه فشغلة عكس ربعة وانا ابا اكون شراته
ودوم يقولي اباج اتيبين علامات كامله هب تنزلين وان شاءالله اوصل للهد ف اللي انا اباه اوصله

واحلى شي يوم السير يعطينا هوم ورك انا احب احل يوم يعطينا هوم ورك بس في بنات فالكلاس يقولون مايبون فدوم يقولنا انه انتو يايان هني عسب توصلون حق هدفكم وانه لازم تحلون وتدرسون عسب توصولون حق هدفكم يعيبني يوم يقولنا جي اجس بتشجيع ^_^

انزين انا شكلي خذت راحتيه واااااايد

اسمحيلي شمعة

كتبت رد شو طوووووووله
ويوم دقيت اضافة رد
جان يقطع النت عندي
وينمسح الرد =(

حراااااااااام

هالمره بكتب عالوورد وبسيفه بعدين بحطه هني

برب

السلام عليــــكم..


ماشــــاء الله..

انا يعــيبني الانسان الطمووووووووووح.. والي راسم له هدف بالحياه..

الناااس رمستهااا ما تخلـــص فما عليـــج من حـــد.. دامج الي تسوينه صح واهلج راضين منه

الله يوفقج :)

قرمووشه
ماكملت لاني حسيت اني وايد تفلسفت ومحد بيهتم =)
قرمووشه .. لاتتريين حد يشجعج .. لازم تشجعين نفسج .. ولا ادورين شي يقدر يشجعج .. انا اجوف انه يوم احد اهداف .. اتم متشجعه .. ولا يوم اقرا quotes .. ولا يوم اجوف شخصيات مهمه نفس الشيخ محمد بن راشد ولا مثل ما قلت معالي الوزيره مريم الرومي.. اتم متشجعه .. وحتى يوم اجوف ابويه اتم متشجعه ..
مب شرط شخص ايي عندي ويشجعني .. بس بعد هالشي يساعد =)
مشكوووره عالرد:fa41: .. ماقصرتي ^_^


بوظبي
" الشي البايخ في جامعتنا انه اتي ايام موووووول مافيها دراسه .. وايام كلحد يبي شغله وعاد تعالي انتي ماترقدين"
صدقتي في هالشي!!! ضحكوني ربيعاتي يوم كانو يتحرطمون عن أول بروجكت عطووهم والى كان الاسبوع الى طاف .. تمو يتحرطمون لانه ماسوو البروجكت لين اخر لحظه ف سهروو عشان يخلصونه .. خاطري اقوللهم تعالو جامعنا يوم كل يوم شي واجب وكل اسبوع بروجكت ولا امتحان >_<

وعن نكي .. ماظني في انسان يقدر يعيش او يحقق شي بدون أمل .. لانه لو انهدم هال *أمل* الى ترد تخليه يوقف على ريوله .. =)


مايهزك ريح
وايد استانست على ردك :fa42: .. انته اول ريال جفته يشجع دراسة البنت في جامعة مختلطه وتوافقني في الراي انهم احسن من الحكوميه!! :D صدق استانست
استويت ماخبر كلحد عن احلامي .. مب نفس قبل .. استويت كتومه اشوي .. لكن .. بديت اكتبهم على أوراق وأعلقهم في حجرتي .. خصوصا عند الباب والدرسينغ روم .. متروووس اوراق فيهم bullet points عن اهدافي وأحلامي .. شي حلوو!:10:
انا وربيعتي تقريبا كلنا من نفس المستوى المادي .. الا كمن وحده .. بس ماحس انه يخصه .. احس التربيه والتفكير هو الى يخصه .. مثلا .. نحن ابويه مربنا انه ابدا مانتخقق على اي حد .. حالنا حالهم .. صح عنا اشيا حلووه .. بس مانسير نتخقق فيهم ولا نلبسهم جدام ناس مايلبسون هالأشيا .. حتى غصبن عنا نعرف نطبخ وانظف ونكوي .. مب على كيفناا .. اما ربيعتي غير .. تحس انه مب لازم تسوي اي شي .. ماتعرف تطبخ .. ولا مره في حياتي كووت شي .. ومستحيل تسوق لانه شي دريول .. ومستحيل تشتغل لانه ابوها عنده فلوس . . وبعدين شو الفايده .. لو في الاخير هي بتعرس! < جيييييييي تفكيييرهم .. مادري كيف >_< انقهـــــر .. انزين ولو عندج فلوس .. مافيها شي لو تسوي اشيا عاديه .. يعني مره .. وحده من ربيعاتي كانت واايد مستانسه لانه كان شي قوطي كلينكس عدالها بس ماتفيجت تشله ف زقرت البشكاره تيي من مادري وين بس عشان تعطيها قوطي كلينكس!!!!!! >_<

مشكور عالرد .. ماقصرت .. صدق استانست:k_smile2:


أتمنى
"
كل يوم راح تشوفين اشياء جديده
يمكن مو كلها تفرحك
بس أهم شي انها كلها بتعلمك و بتقويك
"
وهاللي لاحظته .. كل يوم يالسه اتعلم شي يديد ^_^ .. الحمدالله!
تسلمين ..:fa41:


تنينه
الحمدالله .. يالسه احققهم شوي شوييييييييي .. بس بعد .. يباله وقت ^_^


أوتار القلب
لوووووووووووووووووووووووو وووووول :tongue:
مشكوور!


الدلوووعه
حلوو انه يكون عندج قطووه ومدرس يشجعج توصلين لهدفج =)
" اذا اصريت على شي اتم عليه" لاحظت هالشي فيييج يوم نرمس عن الجامعه:k_smile2: .. تدرين .. الحلو فيج .. انج مول ماتستلميين .. اتمين اتحاولين ^_^
بالتوفييييييق:thumbup1:


خيال الحب
وعليكم السلام
مشكووووووووووووووور
ماقصرت
:thumbup1:

الحياة تجارب أحلام نحلم بها شي يتحقق منها وشي يتغير
كل فرد منا له تفكيره ويعتمد هالشي على السن وعلى البيئة اللي تعيشينها
والحمدلله علو أبوج متفهم وماشاء الله عليه والله يحفظج ..
إنه لج طموح ودام إنه تقولين واثقة من عمرج هذا نص النجاح ...

الواحد يخوض تجارب ومنها تتعلمين .. ومب كل شي ممنوع يعني بتظهرين شخصية
وشي كبير ... يمكن جيه يدفنون الطموح اللي فيج .. يعني خير الأمور أوسطها ..
وعلى طاري الوزيرة وكتبها
يمكن بعض الناس تقول " كيف تحب تقرأ " وأنا أكره شي اسمه قرايه
لكن بالقرايه الواحد شخصيته تتغير ويقدر يحاور الناس وتفكيره ينضج
وشخصيته تنصقل ..

مرات بالاحلام تتحق هالأشياء وخلي ربعج على صوب ..

المزوحي
بس تدري
يالييت كنت ويا ناس طموحيين ويبون يسون شي بحياتهم .. هالشي الى حطمني.. وصدق خالاني اكون فضووليه .. يعني كيف عايشين حياتهم؟

وعن الوزيره
ماعرف كيف اشرحلك
صدق يوم ترمس تحس انها انسانه مثقفه .. وكانت كله ترمس بالفصحى .. وبكل ثقه ماشاءالله عليها .. يالتني اقدر ارمس مثلها!!
احس shes the person she is من الكتب الى تقراها .. وصدقت يوم قلت "بالقرايه الواحد شخصيته تتغير ويقدر يحاور الناس وتفيكره ينضج وشخصيته تنصقل"

بصراحة أنا من النوع اللي أحب حد يشجعني لأنه مب من نفسي أسوي الشي

لكن في نفس الوقت لو حد من ربعي يبغي يدرس أنا أشجعه وفعلا صار هالشي بإنه ربيعي كمل دراسته

زين وأنا ليش ما اشجع نفسي عيل !

لا

لوول
انزين
وليش يعني انته ماتكمل دراستك بس تشجع ربيعك يكمل دراسته؟؟ =s
كمل دراستك وايد بتستانس وشي وايد جامعات يسوون part-time

شكلي بطلب منج تشجعيني على الدراسة
بس دخيلج ماتتمللين مني !

لووووووول
سير كمل دراستك
والله احسن لك ^_^
بعدين
بتروم تغير شغلتك هاي الى دوم تشتكي منها
وبتحصل راتب دبل الى تحصله الحينه
وكل ها
لانه عند باكلوريوس

وعليكم السلام ..

كلامج اختي يدل على وعيج في سن مبكره وأهم شي انج ماتخلين
الطموحات تطغى على أولويات ثانية فحاولي توازنين
بين كل المعطيـات وأتمنى لج
التوفيق دايما
:thumbup1:

الاســـطـــوري
أخوكم

:fa34: :fa34: :fa34:

وحده وحده وحده الميم أحلى وحده

:m_9afgah: :m_9afgah: :m_9afgah:


خخخخخخخخخخخخ يوم قريت سالفة بناات zu ضحكت من الخااطر لووول صدق الناس اجنااس

سمعي من ألحين اقولج ترىzu مش تامه فيها مش تامه فيها
وبااخذ هندسه وبتترجيني اهندس بيتج هذا ويهي يا الرشيقه لو اشتغلت عليه خله الهندي ينفعج لوول حبيبتي
والله فرحت يوم قريت فضفضتج
ربي يوفقج ولايكدر مزاجج بهذوول الناااس
وصدقيني إنتي إنسانه قويه وشخصيتج بعد اتوقع بااجر اشووفج مسؤووله عووده آد الدنيا=q
ودام حاطه خط لحياتج فربي يوفقج لما يرضااه
ومستحيل نلقى شي بالساااهل لابد نكرف عسب نلقااه ونحس بحلاوته
واايد هثربت
المهم
ربي يوفقج يااارب ويسر عليج كل صعب

الأسطوري
مشكور عالنصيحه:k_smile2:

هزايم
يا صديقتيي انتييي قلتلج مابخليج تسوين بيتيي الا لو تسويليي خصم 30% xD .. اونج تبين تسويلي دبل السعر:d014: .. بسير عند الهندي احسن لي:fa44:
يحليلج يا هزوووم ..:doh:
miss ya:fa46:

شمعة أمل

ما شا الله عليج :thumbup1:

حلو انه يكون للواحد طموح و أهداف واضحه فحياته

لاني أتصور أنه هالأهداف هي الى تخليه يتحمل كل الصعوبات الى تواجهه مهما كانت

شمعة أمل.. عيبتيني :tongue: ان شا الله أكون شراتج

:k_smartass:

لانه صدق بديت أتملل من الجو الى أنا فيه

تقريبا شرات جو المدرسه الى كنتي فيها

و هالشي وايد امأثر عليّه :frown:

..

السموحه

وحي القلم
وجان استانس p=
همممم
نصيحتي لج
حطي اهداف .. وامشي عليهم .. وسوي طاف للجو التعيس قد ماتقدرين .. ولاتخلينه يأثر فيج >_<

مشكوره عالرد وماقصرتييي

الـسـلام عليكم ،،

شمعـة أمـل ..

أحيي فيج الـطمـوح...:thumbup1:

هذي مب أحـلام .. هذي أهـداف تسعين لـتحقيقهـا

ودام أنـج مقتنعـة باللي تسويـه فمـا عليج من حد

قنـاعتج بتحقيقج لـ هدفج وثقتج بقدراتج تكفيج للـوصول لمبتغـاج :k_smartass:

والحـمدلله عندج التشجيع من الأهل واللـه يوفقج ان شاء الله

كل الود .. صدى

صدى جوفي
مشكوره اختي عالرد
ماقصرتي ^_^