مبروك .. إرتفاع كل الأسعار

السلام عليكم ..

قبل كم شهر سمعنا عن إحتمال إرتفاع أسعار البترول خلال الأشهر
الأخيرة من هالسنة ولكن مصادر ثانية نفت هالخبر وأدنوك
رفضت إنها ترفع مره ثانيه ولكن اليوم أشوف
محطات دبي وقفت السبشل
وعندهم بس سوبر لأن عقب كم يوم وأتوقع يوم الجمعة على بداية
شهر 9 بترتفع أسعار البترول وحسب اللي سمعته من
اللي يشتغلون هناك قالوا الأسعار بترتفع
حوالي 6 دراهم يعني فوق
الـ 12 بيكون القالون وأكيد بيصاحبه إرتفاع أسعار باقي السلع وبتصير
منافسه منو يرفع السعر أكثر ودام الحكومة راضيه وتشجع
هالتطور اللي نعيشه من إرتفاع في الأسعار
وزيادة في الربح على حساب
الشعب أكيد خلال سنتين بيوصل القالون 50 درهم وبيصير المواطن
يتمشى على ريله وإذا كانت حالته زينه بيسوق سيكل
وبنركب ويه الآسيويين الباصات في
أحسن الحالات وشكرا
للحكومة وعقبال مايباشرون نظام الضرايب وياكلون دخل المواطن
من كل صوب وتصير الدولة من أغنى الدول والشعب
من أفقر الشعوب هنيئا لكم ولنا
على هالتقدم
:waa:

للعلم سمعت عن زيادة رواتب الدوائر الحكومية بنسبة 100% من
الراتب الأساسي بس وحتى لو كان هالخبر صحيح
،، كيف بيكون حال موظفين
القطاع الخاص ؟
:fa36:

كلام فخاطري وقال بطلع على قولة
أخونا الله يذكره بالخير
خنفروش

الاســـطـــوري
أخوكم

نحن جيه ومب مترقعين ،، بعد يرفعون الأسعار ,,

الله يستر بس ..

تسلم أخوي على الخبر ولو أنه مب مفرح..

أختك
ا ل غ ل ا

بسم الله الرحمن الرحيم ..

ادخل واحة الاجداد والتراث او بالأحرى واحة الشيخ زايد رحمه الله ..

لجل تترحم عليه واكتب رد تطلب من الله المغفره لعلى وعسى ف ساعة استجابه ! ..

اتعقد بأن المعنى وصل وربما لي عوده اذا تم تأكيد الخبر :sleepy: ..

بحفظ الله شيخي ..

الســلام عليـــكم...

دام بــلادنا مفتـــوحه.. أتوقع يستوي فيها أي شي.. لدرجه ما بتميز عمرك.. انت في نيويورك ولا في دبي..! :kkk:

..

لكن مسألة انهم يرفعون الرواتب 100 % ..!! ما اتوقع :nono:

تتخيل حجم الميزانيه اللي يحتاجها هالقرار.. :doh:

..


تسلم يالاسطــوري على هالموضوع.. بس صدق أحس الواحد عايش حاط ايده ع قلبه .. مايدري شو بيستوي باجر.. :no0:

تسلم أخوي على الخبر ..

بس يمكن ليش لأ ..

كل شي جايز هالزمن ... ^_^

و عليكم السلام و رحمه الله و بركاته
الله يعين الناس على مثل هذه الارتفعات
لما ارتفع بترول اول مرة زادت معاه كل شي
و الحين يرجع للارتفاع من جديد
وش نسوي و الدنيا كل يوم نار على نار
و الأسعار ضاربة فوق
حتى لو رفعوا الرواتب فالارتفاع اكثر و اكثر

ما أزيد على كلام أخوي محب الشيخين
الله يرحمك يا أبونا زايد
الله يعينا على مثل هذه الارتفاعات

السلام عليكم

والله يا الأسطوري ...الله يبارك فيك ...دام السالفه جيه :boxed:

يعني الحين الشعب ناقص .... لي عوده أكيد ..

اتوقع كل شي من عقب وفاة الشيخ زايد الله يرحمه

ترا الامارات وبالاخص دبي تبا اتنافس الدول المتصدره في قائمة اغلى المدن عالميا :daleel:

واتحملوا نتيجة هالتنافس خلال الفترة اليايه 2007

والله المستعان :ice:

غــرييبه !! ,,

أمـس في أخــبـار الإمـارات اذا جـفتووه أمـس ,, قالـوا خـبر أنـه الشيخ خليفه الله يحفظه ,, أمـر بالـحـد من زياادة الأسـعار في الأسوواق كـل مره ,, والتلاعـب أللي يصير ويـضر المستهلك في الآخـر ,, أمـا عـن زيادة سـعر البترول ما سـمعت عـنه ,, ولـكن لو زادووه سـعر البترول ,, ما راح يقدرون يتلاعبون أو يزيدون في أسعار الأشيا الأستهلاكيـه في الأسوااق ,, لأنـه شي قـانون صـدر من الشيخ خليفه ووضـعت لجنه وكل شي للحـد من هالشي والأرتفاع اللي نـشهده من فتره لأخـرى ,,

o_O

شي طبيعـي !!
بلادنــا مـفتوحـه لكـل دول العالـم وما عندنــا تاكـسز فشي أكـيد يعـوضـون بشي ثانـي !

الله يرحـمك يا بويـه زايـد =<

عليكم السلام والرحمه ...

الله يرحمنا برحمته

شوفو الفرق هذا كان بتاريخ

2 فبراير 2006
أوسلو أغلى مدينة في العالم .. وعمان الأولى عربياً
عمان أغلى مدينة عربية (70 عالميا)، في حين جاءت دبي ثاني اغلى مدينة عربية (71 عالميا)


28 يونيو 2006
دبي الأغلى عربيا وموسكو عالميا
أظهرت دراسة لمؤسسة ميرسر لاستشارات الموارد البشرية أن امارة دبي أغلى مدن العالم العربي وتحتل المركز الخامس والعشرين على مستوى العالم، وغطى مسح ميرسر 144 دولة في ست قارات ويقيس التكلفة المقارنة لاكثر من 200 سلعة وخدمة في كل مدينة وتشمل الاسكان والنقل والغذاء والملابس والسلع المنزلية والترفيه، ويهدد ارتفاع تكلفة المعيشة بتقليص قدرة دبي على المنافسة وهي مركز تجاري اقليمي يشهد نمواً سريعاً في عدد السكان ومعظمهم من الاجانب.وقفزت دبي حوالي 50 مركزاً من العام الماضي.

عقب 3 شهور وين بتوصل :boxed: صدق شي يخوف

شكراً على الطرح اخي الكريم

زيادة الرواتب بترجع لهم لانهم رفعوا البترول نفس اليابان معاشاتهم فوق وأسعارهم نار .... شو الفايدة

هــــــــــلا ..

"ا ل غ ل ا"

تراني أنا منصدم مثلج بس الحمدلله يوم إنه
البعض انفوا هالشي ومشكوره
على المرور

"محب الشيخين"

الله يرحمه أبونا زايد موجود في القلوب مايحتاي ندخل الواحه عشان
نذكره ونترحم عليـــه وعن الخبر تراني بديت أشــك في
مصداقيته لأن كل ماأسأل حد مايعرف
عنه واحتمال يكون في
دبي بس
:fa36:

"شوق القلوب"

راضين بالزيادات في حدود المعقـول ومب كل يوم يعني ،، المواطنين مب
فاتحين بنوك عشان جيه يعاملونهم والمفروض يراعون كل الفئات
والطبقات من المجتمع وعن الزيادة في الرواتب
المقصود الراتب الأساسي مب
الراتب كامـــل

"أمرين"

صح وعادي باجر نلقى المواطن يدفع ضريبه
والأجنبــي مرفوع عنه القلــم
سفارته تدفع عنه
:no0:

"الجديدة"

صدقج يزيدون الراتب شويه ومن هناك الأسعار مرتفعه
قد هالزياده وأكثر وإن شاء الله يكون
الخبر مب صحيح

الاســـطـــوري
أخوكم

السلام عليكم ..

اخويه الاسطوري كنت اتمنى لو انك ذكرت المصدر عشان انعرف ..

عموماً .. انا شخصياً اتوقع انهم مابيرفعون اسعار البترول و لأسباب كثيره ..

عندك مثلا نحن اسعارنا وايد غالية مقارنة بباجي الدول المصدرة للنفط على سبيل المثال السعودية تبيع البترول ب 3 و نحن نبيعه ب 6 و ربع !!

اسباب ثانية .. ارتفاع الاسعار و التضخم دائما يفقد المدينة بريقها و اكبر مثال مثلا بعض الاماكن السياحية في اوروبا يوم ارتفعت الاسعار فيها محد قام يسيرلها و حولو السياح وجهاتهم لأماكن ثانية و هالشي اذا صار بيفقد دبي بريقها خصوصاً و انها المدينة الحيوية عندنا ..

و انا شخصياً سمعت ان هناك امر بعدم رفع البترول و يمكن تنزل قرارات في صالحنا لكن ماقدر اكتب لأني مش متأكد من صحة الخبر ..

و اسباب ثانية مثل ماقريت في الجريدة بأنهم بيبنون مصفاة نفط يديده في الفجيره و هذا بروحه كافي بأنه ينزل اسعار البترول عندنا و السبب هو ان المصفاة الوحيدة الي عندنا عندها عقود للتصدير و شوية من الي تصفيه للدولة و هالكمية ماتكفي دولتنا ف عشان جيه يشترون من برع اما اذا فتحو المصفاة اليديده ف اتوقع بيشترون منها و بتنزل الاسعار ..
ولو تقرا الجرايد بشكل يومي على سبيل المثال اليوم مكتوب في جريدة البيان ان اسعار النفط العالمية في أدنى مستوياتها من 10 اسابيع ..
ولاتنسى ايضا بأن دولة الامارات تبغي ترفع انتاج النفط الى 3 ملايين برميل .. و ايران تبغي ترفع انتاجها الى 5 ملايين !!
و هذا كافي بأنه يسبب فائض في العرض و البراميل هاذي تفوق الطلب فبالتالي بينزل سعر البترول ..

و بخصوص اسعار السلع ياخويه اقرا الجرايد بعد و بتشوف انهم كنسلو الوكالات للمواد الاساسية و فتحو السوق و هذا بيأدي الى انهم ينزلون اسعارهم لأن المنافسة بتكبر و مابيكون الوكيل هو المحتكر الوحيد للمواد هاذي ..

عموماً انا هاذي اسبابي الي تخليني اقتنع بأنهم مابيرفعون اسعار البترول و طبعا اذا فكرو يرفعونه مستحيل يرفعونه منه و الدرب، لازم ينزلون الخبر في الجريدة مثل ماسوو آخر مرة .. :yes:

زين ماشاء الله

يعني نحن بترتفع اسعارنا و اسعار المهور والزواج و يعني بتزيد العنوسه في الدوله

:hist:

السلام عليكم

ماعتقد يرفعون البترول خصوصا ً لمستوى 12 درهم يعني زياده 100 % شبه مستحيلة في الوضع الحالي.
باجر اول 9 ..

ويقولون لازم تيبون وايد عيال وحاله قايمه !! ,,

وين وحليله المواطن .. زين منه بيتزوج بعد يتحمل مسؤولية يّهال!!
شو هو خذوه وغلوه ؟

السلام عليكم ورحمة الله وبركاته

يبون يكسرون ظهورنا بأسعار البترول
:fa38:
قريت الموضوع قبل بارحه وقلت لا
أكيد مجرد شائعات
بس انصدمت حتى الوالده البارحه تقول راح
يرفعون الجالون راح يكون على 10 ظني

على قول بنت ناس وعرب بتزيد العنوسه

ياخي الحين ترووح الخياط تخيط كندوره ب 200 وخام عادي

خليها ع الله

أللــــــه يبااااارج فييييييييييك ,,

ويرزقك من خيرها ويبعدك من شرهاااااااااا


أحين خمسميه ما تسوي شي .. بس تسد نشتري روجين ونص أو نعالين ونص أو ربع بدله أو ربع نظاره :ice:



ما اقول غير .. سترك يا رببب

بعد تفكير ..


حتا شيله ما إتييب :$

قبل اسبوع رئيس الدولة اصدر قرار بخصوص زيادة الاسعار :shock:

تسلم اخوي عالموضوع