مواقع الزواج .. الى ماذا تهدف ؟

السلام عليكم ورحمة الله وبركاته ..

هذا اول موضوع لي في هالواحه .. وان شاء الله اطرحه بالطريقه الصحيحه :fa51:

مواقع الزواج .. الكل سمع عنها .. والكثير يشارك فيها ..

ولكن

باي هدف ؟ :rock:

القليل منهم الجادين بالزواج .. ولكن للاسف الشديد .. اصبحت هذي المواقع للتعارف .. :fa44:

اغلبيه اللي يشاركون بهالنوع من المواقع .. هدفهم التعارف والتسليه .. وخراب بيوت ..:fa39:

نادرا ما انحصل اثنين تزوجوا عن طريق موقع للزواج ..

لكن رايي انا .. اشوف ان هالمواقع مالها اهميه .. اضرارها اكثر من منافعها ..

هذا هو موضوعي .. واتمنى اشوف راي الاعضاء :rolleyes:

والسموحه

نجـــــ دبي ــــــمة

مــواقع الزواج أصبحت وسيلة وللأسف لنشر الرذيلة معه احترامي الشديد للأصحاب هذه المواقع
ولكنه واقع نشاهده نحن رواد هذه الشبكة العنكبوتية يستحيل على أي شخص ان يقترن بقتاة دخلت
هذه المواقع لتعرض نفسها للزواج او للإرتباط بشخص وكأنها رخيصة أو سلعة تعرض للشراء
هذه المواقع لا تجمع رأسين في الحلال بل العكس تجمعهما في الحرام
المواقع أصبحت قديمة الان لان هناك قنوات جديدة ستبث قريبا باسم قنوات زواج

ولكم التحية

صح كلامك اخوي ..

اذا الواحد بيدخل هالمواقع بنيه صافيه .. عقب فتره بيغير رايه .. وبيغير نيته ..
اغلبيه المواقع .. التسجيل بفلوس .. والانسان طبيعي بيصرف نص راتبه على هالمواقع .. خصوصا ان اللي فيه يستاهل راتبه كله ..

كلامي هذا ينطبق على البنات بعد ..

والسموحه



نجــــ دبي ـــــمة

الصراحة اللي يدخل هالمواقع انسان فاضي وما عنده كرامة
يعني بالظبط شرات ماقالت نجمة دبي ... اذا الواحد بيدخل هالمواقع بنيه صافيه .. عقب فتره بيغير رايه .. وبيغير نيته ..

والسمووحة .. اختكم المتفيجة

تسلمين اختي ..

هالكلام ما ينطبق على الكل .. اصابع ايدنا مب قد بعض .. في ناس هدفهم الزواج ..

بس انا قصدي .. مب بهالطريقه .. مب عن طريق النت ..

اغلبيه اللي امسجلين في مواقع الزواج ... بياناتهم مزيفه .. وكل واحد يبين انه هو احسن من غيره ..


والسموحه


نجـــــ دبي ـــــمة

اذا صــاحب الموقع نفسه عيونه زايغة ويدور على هذه الاشياء فما بالج بالزوار من المراهقين الشباب
المفروض وزارة الاعلام تحظر هذه المواقع:fa55:

السلام عليكم ..

بالنسبة لي ما أؤيد فكرة الزواج بالنت ..
وبالتالي لا احبذ هذه المواقع ..

اصلا امنو هاي امنو هو عسب يرضى على عمرة انه ياخذ وحدة من النت وخاصة من مواقع زواج
يعني هو شو دراه فيها وهي شودراها فيه هو او اهي اكيد مابيحطون بياناتهم الصدقية يعني دام من اول شي جذب في جذب متى بيبدئون فالصدق واصلا هيا المواقع كلها مواقع سخيفة ( السموحة يعني ) ومالها اي هدف محدد

صح كلامك اخوي .. زامبروتا .. لازم يحظرون هالنوع من المواقع ..


الله يهدي اللي يسوي هالمواقع .. ويهدي اللي يسجل فيهم ويصرف فلوسه على شي ( تافه ) ..

والله يقهرني ان اللي يسجلون في هالمواقع يشتكون من معاشهم اللي يخلص في اول اسبوع من راس الشهر .. دامكم تصرفون معاشكم على هالمواقع .. ومواقع ثانيه اخس منه .. ليش ترمسون ؟


والسموحه


نجــــ دبي ـــــمة

صراحه انا ماني عارف عنها اي شيء وشكرك اختى نجمة دبي موضوع حيوي

هـب لـ مجتمعـاتنا

كيف يعني مب لمجتمعاتنا ؟؟

أقصد غناتي ’’ما تناسب عادات و تفكير مجتمعاتنا الخليجية‘‘ مجتمعنا :fa38:

حيث أصولنا الشرقية تحبذ *رغم أي تطوّر* إتباع طرقنا الشرقية الأصيلة مثل : خل نخطب من بيت فلان الفلاني - مَعْرِفة والنّعم فيهم .. أو شرايك فبنت الجيران نخطبها لك .. وهكذا
ها غير الزواج بعد علاقة حب أو تكليف خطابة للبحث وغيره

هب : والله شفنا بنتكم في موقع زواج وعيبتنا! :nerd: . . ولو بغوا يرقعونها زيادة يقولون : والله ولدنا راسل بنتكم على النت وأُعجب فيها :shutup: ها غييير لو ما عرفوا اسامي بعض اللّهم # التسلسلي الخاص بكل مشترك فالموقع :love: !

مهما كان نحن لنا عاداتنا وطريقتنا مهما تعلمنا واتطورنا وسافرنا .. إنتم صكّة لول قصدي عيال عـرب والنّعم لنا مذهبنا و تقاليدنا وأسلوبنا الخاص ابيئتنا

مواقع الزواج يمكن تناسب الجنسيات العربية من دول الشام ولبنان + المغرب العربي أكثر , وغالباً تكون واقع حاصل في مجتمعاتهم . وتحصل عندهم وايد وتنجح

وصلت انشالله ^_^
والسموحه ع الاختصار قبل والإطالة احين :fa46:

السلام عليكم

صح اللي انقال المواقع هذي بس اسم اما غرضها تدمير الشباب
ما اعتقد حد يرضى ياخذ وحده او وحده تاخذ واحد بهالطريقة..
المواقع مصخرة وماحد ينصح فيها.
مشكووووورة نجمـــــــــــة دبي تسلمين
والسمـــــــــــــوحه

تسلمون والله عالمشاركات والراي الصائب ..


اختي ورديه : صح كلامج والله .. وما اتناسب مجتمعاتنا ..


يعطيكم العافيه والله ..

وربي يهدي الجميع



نجــــ دبي ـــــمة

أنا أظن أن السؤال لازم يكون
1- شو سبب ظهور هذه المواقع ؟؟
و هناك أسئلة ثانيه تتبع هذا السؤال

يمكن السؤال الأهم خنفروش : شو النتيجة؟

اخوي خنفروش .. في اساله كثيره

1- شو سبب ظهور هذه المواقع ؟؟
2- شو النتيجه ؟ ( سؤال الاخت ورديه )
3 - شو الهدف الحقيقي ؟
4- شو اللي خله الناس يسجلون فيها ؟
5- ليش ما يحظورن هالمواقع ؟

وووووووو ..

بس وين الجواب ؟


والسموحه


نجـــــ دبي ــــــمة

نجمة ترى يقولون إذا عُـرف السبب بطل العجب لذلك أنا مسكت السؤال الي يبحث عن سبب نشأة هذه المواقع حتى ينصب الحوار في ليش بعدها نشوف سؤال ورديه عن النتيجه و ما انسى اقول ان الهدف الحقيقي هو سؤال عن النشأة الحقيقية و ترى ردي مبني كذلك عالاجابات الي بنلقاها (( وردية السؤال يقول )) هل لهذه المواقع ايجابيات ؟؟(( ترى كلامي كله ما يندرج تحت رأي مع أو ضد لالالا هو مجرد تفكير بصوت مسموع )) و السموحه

السـلام عليكم

أدري سؤال ( سبب المنشأ ) يساعدنا على فهم ظاهرة / مشكلة / مشروع بشكل أفضل من ناحية الإدراك . كذلك يساعد السؤال على حل المشكلة من خلال المسبّب ( إلغاء السبب أو إعادة بناء أساس المنشأ وأهدافه ) بس ( سبب المنشأ الحقيقي ) تسوي مشاكل , خصوصا في مجتمعاتنا استاذ خنفروش كثير من الأشياء مبهمة أو مفاهيمها مغلوطة من الأساس

مثلا اللي ما يصممون موقع أو منتدى , أي منتدى ( في بالي منتدى أول كنت فيه :shutup: ) شو أهدافهم ؟ ( هم يقولون تبادل الفايدة ) في الظاهر , في الأخير نكتشف ان هالموقع ( في الباطن يعني من تحت لتحت ) موقع تعارف وهو روحه صاحب المنتدى مغازلجي عود

ها من ناحية , من ناحية ثانية *واقرب مثال مواقع الشات* هدفها الاساسي هو الدردشة ( وهو هدف متعارف عليه عالميا محد معترض عليه ) وكل عضو أو chatter له اسلوبه واهدافه اللي يصبو اليها من خلاله . بس للأسف هي مواقع تستحق الحظر لأنها مواقع نشر رذيلة بسم الله:crazy: ومفاسد للشباب والبنات, لـكـن اسمه أولا وأخيرا شات وهدفه الدردشة :glare:

كذلك هي مواقع الزواج فيها من كل نوع شي واسلوب وتكنيك , بس من خلال آراء الناس : هي مواقع غير معترف فيها , أهدافها غير مؤكدة بسبب عدم وجود جهة تنظيم راعية لها و لأسلوب عملها *يعني جهة معروفة* . اللهم لها صاحب ( صاحب الموقع ) يديرها بشكل أو بآخر والفنيين , والمشتركين طبعا الخ

يعني مشروع زواج بيـدهم *وهي أهم المشاريع الاجتماعية والاسرية* , فشو بيطلع منهم يا ترى ومن هالمشتركين في ظل هالتنظيم الضعيف الأقرب لصفة الرديء و الفاشل ؟

أظن جاوبت على بعض الاسئلة *أظن* . وايد رمست كلام فوق بعضه (بس البركة فيكم تفهمون قصدي) آمين , والسموحه منهم يا هلي وناسي الثانييـن

اخوي خنفروش ..

ترى اصحاب هاي المواقع .. هدفهم التعارف وهالسوالف .. فقاموا يسوون مواقع زواج على اساس محد يقولهم شي او يعترضون .. يعني مواقع تعارف باسم الزواج او الشات مثل ما قالت اختي ورديه ..

وشكرا على تفكيرك المسموع والسؤال المهم ..


نجـــــ دبي ـــــمة

الاخت العزيزه ... ورديه

الصراحه ماعندي تعليق على ردج .. كلامج صحيح 100 %

( هم يقولون تبادل الفايدة ) في الظاهر , في الأخير نكتشف ان هالموقع ( في الباطن يعني من تحت لتحت ) موقع تعارف وهو روحه صاحب المنتدى مغازلجي عود

*واقرب مثال مواقع الشات* هدفها الاساسي هو الدردشة ( وهو هدف متعارف عليه عالميا محد معترض عليه ) وكل عضو أو chatter له اسلوبه واهدافه اللي يصبو اليها من خلاله . بس للأسف هي مواقع تستحق الحظر لأنها مواقع نشر رذيلة بسم الله ومفاسد للشباب والبنات, لـكـن اسمه أولا وأخيرا شات وهدفه الدردشة .


وسؤالي انا الحين ..

شو الحل ؟



نجــــ دبي ـــــمة

الي يبا يعرس يعرف طريق الزواج واصلا الواحد لو دار اخر شي يبا وحده تحفظه وتحفظ بيته الا لو واحد خبيل ما يفطن

ههههههه :) عيبني ردك اخوي ..
طريق الزواج واضح وعروف .. فماله داعي لهالمواقع او اي شي ثاني ..

تسلم اخوي عالرد الطيب ..




نجـــــــــ دبي ــــــــــمة