مشكلة، وكيف التصرف مع أب مثله ؟

أرجو التفاعل


هاذي قصة واقعية ومش من الخيال

إن كانت الأم تسمع كلام زوجها من أول يوم زواجها .. وصابره على تصرفاته الفرعونية ...
يعني مافي شي اسمه طلاق في قاموس أمها ...
صبرت عليه ويابت العيال ماشاء الله .. لكن هو كل يوم يخلق مشكلة من لاشي ... :Oo:

وبعد مايابت 6 عيال ماشاء الله وعيالها تزوجوا ... مازال الزوج يعاملها كأنها ( عبده ) عنده
صح وأنا أقولكم من حقه إنه تسمع الكلام وتخدمه ، لكن كل شي له حد ..

فهو يذلها، وعياله متضايجين من تصرف أبوهم ... وهو يحب ينقل كل أمور بيتهم لبرع البيت
وخاصة لشقيقته، وكذلك يضيف بهارات ( يعني يقول شي ماصار ) يحب يسوي حزازيه من بين زوجته وشقيقته ...

والمشاكل الآن كبرت ... :oh:

كيف العيال يتصرفون مع أبوهم اللي مش حاسين إنه أبوهم ... كيف نتعامل مع واحد جاسي ..
الواحد يتراجع عن تصرفات بس لأنه أبوهم ومايقدرون يردون عليه .. ولو يطلبون له الهداية ..
عنيد مايسمع لأي حد وتصرفه هو الصح دايما ...

يمكن ماذكرت لكم تفاصيل الحياة اللي عايشينها .. لكن باختصار كيف يتصرفون الأبناء مع أب
مايحسون به أب ؟؟ :nerd:

صدق شي فضيع

و الله يعين الام و عيالها

بس خلنا نفكر شويه

اذا كان الاب يحب يكلم اخته .. و اخته كانت عاقله شويه .. كانت بتوقفه عن حده و بتقوله اللي يصير غلط ..

لو انه العمه كانت تسمع لعيال اخوها .. ممكن يطلبون منها المساعده انها تبدا توعيه بس من غير ما يحس .. او حد من عمومهم مب شرط العمه

العيال ممكن يحكون له قصص صارت .. و يألفون شويه شويه .. عشان يحسون الاب بمعاناتهم ..

صراحه مشكله صعبه .. :fa36:

انزين اذا كان ما يعطيهم وجه و ما يعطيهم الفرصه انهم ينصحونه .. ليش ما يرسلون له رسايل بالبريد .. تكون بأسلوب جداً راقي .. تخليه يكمل الرساله و يتأثر ..

و تكون من احب عياله لقلبه او اصغرهم ..

و لا يعاندونه ابدا .. بالعكس .. اذا عاندوه .. بيعاند .. و بيبس راسه زود

##

انا عندي قصه مشابهه

لوحده كانت تعاني من زوجها الامرين ..

لين يوم من الايام رجع تالي الليل لقى زوجته على سجادتها تدعيله بصوت عالي و تصيح

وقف محتار و الدمع في عيونه يقول في خاطرة ..

"الحين هاذي انا سويت بها كذا و كذا و كذا .. و قاعده تدعيلي !! "

و اعتدل حاله !

##

مافي شي مستحيل ..

و الله يكون في العون

افكاري شويه يعني على قدي .. :blush:

بس حاولت .. لاني فكرت بكذا طريقه لكن تصرفاته منعتني ؟؟


::

::

اختك

ام قرنين

:blush:

جودي ام قرنين
الكلام اللي قلتيه ( إنه العمه المفروض إنه تحكم عقلها ) وماتسمع كلام ينقال من وراء الزوجة
وهي تصدق، حتى لو كان أخوها ..
لأنه بهاي الطريقة حتى هي ظلمت زوجة أخوها ( بالسب والقذف )
ويوم الزوجة دافعت عن عمرها وقالت لها عطيني أدلة تثبت كلامج اللي تقولينه قالت هو أخويه اللي قال لي
( اللي هو الزوج ) وكان الرد : إنه هو طبعه ينقل كلام وياليت يكون موجود ..
فكان رد العمه حشى لله أخويه مايعرف الكذب في حياته ..

أنا الصراحة تعلمت ما أصدق أي حد .. حتى لو ربيعي وايد ويايه وياني وقال هذا اللي يكرهك قال عنك كذا وكذا
مابصدق ...

لكن السالفة ومافيها بدا طمع العمه في أموال أخوها وغامضنها إنهم يذوقون درهم ( مع إنه أخوها مب غني )
لكن الحمدلله .. يوم عرفت عنده ملك معين تخبلت ... وقامت تألف قصص ...

لا حول و لا قوة الا بالله

:fa36:

الحل؟ على حسب المشاكل وأسبابها الخ , مادري لو تسأل حد متخصص وبالتفاصيل انشالله يساعد

بس يفضل يراسله حد من أفراد البيت أكيد

ورديّـه

الأب في شبابه مايسمع الرمسه، وأظن معظمكم يعرف عناد كبار السن ... !
والمشكلة إنه أخته تصدقه وتبدي تسب زوجته بعدم الاهتمام فيه حتى لو هي مب عايشه وياهم،
وهم مب مقصرين وياه ...

الله يعين هذه الحرمة و عيالها
لي سؤال هل لهذه الزوجة إخوة ، أب أو أي قريب؟
لماذا لاتشتكي من الزوج لهؤلاء الناس و تخبرهم
ليش ما تجعل واحد من الأعيان أو لفاهمين الكبيرين في السن في سن زوجها يتفاهم معه
إذا هذه الأمور ما تنفع تترك أمرها لربها، اصبرت كل هذه السنين فتصبر شوي و لكل شخص أجر
و الله يسامح العمة اللي تسمع كلام الأخ من دون ما تتبين صدقه و تحاول تنصحه عشان بيته و عياله

و السموحه

اعتقد احسن حل هو

الدعاء للأب بالهداية في كل صلاة وخصوصا في الاوقات اللي يستجاب فيه الدعاء وخصوصا الحين شهر رمضان عالابواب

السلام عليكم

ها الشيء موجود في مجتمعنا ..
واعرف ناس عانوا من ها الشيء ..
اب لا يعرف معنى الابوه والرحمة والطيبة ..
الزوجة عبده .. الابناء عبيد ..

مثل هذا الاب على الابناء ان يضعوا حدا لتصرفاته ..
فالرجل اذا لم يجد من يوقفه سيشعر انه الـ "زعيم " فيفرض
ارائه على زوجته واولاده ويقسو عليهم متى شاء ..

عليهم ان ينصحوه او ان ينصحه من يوقره الاب ..
كما ان الزوجة تستطيع ان تشتكي عليه ..

أشكرك اخي على الموضوع
وجزيت خيرا ..

الجديدة، الزوجة اشتكت لخالها ( اللي زوجته تصير شقيقة زوجها ) قال أنا مايخصني بالموضوع
مع إنه هو له دخل في المشاكل ... يعني أي شي يصير ينقل الكلام .. ويحب يفتن ..
أما أخوانها مالهم علاقة بالموضوع، وهم حذرين من زوج أختهم، لأنه مايعاملهم بالطيب من صغرهم ..
أبوها متوفي ( الله يرحمه ) أم أمها الله يطول بعمرها ... تسمع بنتها ... لكن ماتقدر حيله ..
والحينه وكلت ربها عليهم .. أما العمه تنكر إنها تسب ...

الوردة الحمرة كم دعوا له بالهداية ولازم ماييأسون من رحمة الله !!
لكن كل شي له حد ... والزوجة تصيح من شدة المعاناة ...

الملهم ... الواحد يرحم هله .. وهو يعامل زوجتة بقسوة وهي تحاول ترضيه بكل الطرق ...
مع إنه يغلط عليها ( حجتها العيال ) وتخاف ربها ...
الأبناء متمللين من تصرفه، لكن لو الخوف من الله .. مادري كيف بيترفون وياه !
أما آخر حل توصلوا له ( يتوجهون للمحكمة ) وهم مترددين تقريبا

ان الله حرم الظلم على نفسه وحرمه على الناس
ومثل هذا الاب حرام عليه ان يظلم اهله .. وفي حديث : " من رأى منكم منكرا فليغيره بيده "
والسكوت على الظلم ظلم .. فــ لماذا التردد ؟؟

مجرد رأي

الملهم !

إذا الأم ( زوجته ) من بداية حياتها وهي صابرة عليه
وهم بعد العيال يعرفون انه أبوهم جيه
يعني خلااااص تعودو عليه
المفروض من البداية يتصرفووووون وياه مب ساكتين وراضيين بكل شي
وعلى إخر عمره شو يعني بيجتلووونه ...

انت قلت انه العيال كلهم معرسين يعني ليش أمهم ما تسكن ويا واحد من عيالها

مثل ما تحملوووه قبل يتحملوه ألحين



والسمـــــــــــوحة




كل الود :

أمـــــــــــــريــــــــ ـــن

أبكيتني والله ,,,

لكم تمنيت أن لا أحرم من طلة والدي ولكم تخيلتني أجلس في حضنه يلاعبني ولكم ...

لكني وفي قرارة نفسي شكرت ربي على ذكرياتي الجميله معه على كل لحظه نمت في أحضانه وكل قبله طبعها على جبيني ...

الله يصبر الزوجه والأبناء وليحتسبوا أجرهم ... ويهدي الوالد ,,
الحل برأيي الدعاء له بالهدايه وان امكن توسيط من ينصاع له عله يهتدي...

تروح بيت امها وتييلس هناك عسب يحس بقيمتها اذا السالفة فيها ظلم وصياح

الله يهديه

3 من عيالها معرسين والبقية بعدهم بس كبار مش صغار ... وإذا قضية متعودين مايقدرون يعالمون أبوهم بقسوة مثل ماهو يعاملهم .. أما إنها تسكن مع حد مايصير نظر لظروف المتزوجين ماعندهم مكان .. كل واحد ساكن في غرفة وين عندهم مكان ...

الجنيه مشكورة ... الله يهديه

ورديّه .. ماشي فايجه من طلعتها في عز ماهو محتاج من يحاضيه حتى لو هو قسى عليها .. بس المطلوب
إنه العمه تبعد من حياتهم ، مدخاه نفسها في شي مايخصها ..

لو ينتقلوون مدينه ثانيه يعني حجه أنه يغير شغله
كذى بيكون بعيد عن تسلط العمه
الله يهديه وربي يجزي زوجته الخير ويصبرها

:: المزوحي ::

أنها توّدر بيتها أو تتشكى منه أو غيره < هالحلول برايي تكبـّر المسائل :rock:

و مهما كان ترا بينهم عشره عمر وعيال كبار ماشاء الله ومهما صار يتم *ابو عيالها* ..

دامه ها طبعه , تجاهله أحسن بس - بدون ماتغلط عليه - لايستاثمون من وراه

( ربك كبير ) وهو اللي بيوقفه عند حده مش حد ثاني ! وهو كفيل بأنه يخلّي الأيام تجازيه

:sleepy: إذا مب فالدنيا فـ الآخـره ..

ماشي غير الدعاء < الله يهديه >

ومحد يدري مهما كان قاسي يمكن فـ داخله شخص ثاني بيظهر فـ يوم :look:

بس مش إنّـا نبهدله رغم تسلطه . لانه ماشاء الله مبين ريال عود وعياله رياييل

والوالدين لهم *حق* مهما صار

والسموحه

.

.

.

الله المستعان

عليها بصلاة الحاجه وإن شاءالله رب العاليمين ما بيخذلها هيه وعيالها

هزاايم .. الأب متقاعد، مريض ومابقول كلام من عندي يمكن تعرفون إنه كبار السن يبالغون في الكلام، أو عفوا " يكذبون " مادري شو يقولون عنه هذا !
مثل يوم انت تأكل أبوك ويقول والله ماكلت ...
فالعمه تبتدي تقول كلام لشقيقها إنه عيالك فيهم وفيهم ( طبعا كلام تظلمهم فيه ) وإنهم مايحبونك .. الخ
وأنا في نظري مهما شكى لها، مايصير تحكم من كلام مش متأكده منه،

الياه، شكوة الأم دايما لله سبحانه .. لكن تسلط العمه وتدخلها في شؤونهم، خلت الأم ترد عليها بأني تحملت زوجي
( أخوج ) السنين اللي مضت .. وطبعا العمه بدت تسب وتقول كلام مايليق بها كحرمه في هالسن !!
وإلا الأم ترعى زوجها ..

مملوح الوصايف .. الله يعينها