غريبه في بلادي

السلام عليكم ورحمة الله وبركاته ...



أمس الله يسلمكم سرنا سوق الظلام اللي في الراس ناخذ سوالفحق الليله مثل ما تعرفون باجر يعني لازم نعد العده وبالغلط بالغلط الله يسامح الليكان السبب دخلنا منطقه مستحيل تكون جزء من بلادي,,,

فوق المليون هندي ... الأرض ما تنشاف من كثرهم الصراحه زياغه عنبو هاييل لو يتحاوطو على حد و يجتلونه والله لو الموت ما يندرى عنه ..

شي مش معقول ابد من فتره سمعنا عن قرار الهجره الي كان عباره عن ترحيل اللي إقاماتهم منتهيه برغم الآف المؤلفه اللي تم ترحيلها الا أنه نظره خاطفه لواحد من الأسواق يوم الجمعه تخلي الرعب يدب في القلوب

نحنا بحاجه لحلول جذريه تقتلع المشكله من جذورها مش تهديدات تطبق لفتره محدوده وبعد ما تلقى صدى بسيط ترجع حليمه لعادتها القديمه ...

الله يستر من باجر يا خوفي أندور على المواطنين بالعدسه المكبره ويا دوب نلقى واحد بين مليون وافد...



أختكم الجنيه أتسلم عليكم

وعليكم السلام ورحمة الله وبركاته

مشكلة كبيرة عندما يوجد في البلاد الغربين اكثر من القريبين ..
اصبح الان الوافدين اكثر من المواطنين .. اصبح من بين الف وافد مواطن واحد و مواطنين ..
لا يمكن هذا .. قرار الهجرة رائعة ولكن أين التطبيق ؟؟؟

صحيح اننا لا نستطيع ان نستغنى عنهم ولكن على الاقل علينا التقليل منهم ..
اتمنى ان يعاد القرار ويطبق فعليا ..

أشكركِ اختي على الموضوع ..
وجزيتِ خيرا ..

صدقج والله ياختي الحين الوافديييين اكثر من المواااطنين .. وين ماتسيرين تلقييين قرووبات من الوافدييين يعني طبيعي بتزيغيين بلادنا جيه استوت ..
بس اقوولج ياختي هالهنووود هم اللي قاايمين بمعظم الاشغااال
يعني مابتلقيين مواااطن يشتغل نجار ولا ميكانيكي و ....
فطبيعي تلقييييينهم لانه شغلهم هنييه عدنا


لاحول ولا قوه إلا بالله


ومشكوووره اختي
وسلامج وصل :)

الملهم ،،،

بالفعل قرار الهجره تطبق بس لفتره محدوده وفعلاً رحلو أعداد كبيره من المقيمين بالطرق الغير قانونيه ...
عقبال ما يصحون مره ثانيه ويرحلون البقيه المتبقيه ,,,


المتفيزره عالعرقووب

حبوبه أنا وياج باللي قلتيه أنا ما قصدت العمال قصدت الي مقيمين إقامه غير قانونيه ويا مكثرهم
أكيد نحن بحاجه لعماله وافده ومعتمدين عليهم بشكل كبير بس الشي اللي يزيد عن حده ينقلب ضده.

شاكره لج مرورج عزيزتي ...

يعني عن نفسي استانس يوم اشوف المهنده واقلب الدنيا لو شفت الأوروبين وغيرهم من الأمريكان والإستراليين
لكن الواحد يخااف منهم بعد
عندنا منااطق كثيره المصيبه نحن نهجرهم وهم يلقون من يردهم باي طريجه
ومانقول غير الله يحفظ بلادنا ويحفظنا معاها
وعلى الدنيا السلام

اقتباس:

---

المشاركة الأصلية كتبت بواسطة الجنيه

نظره خاطفه لواحد من الأسواق يوم الجمعه تخلي الرعب يدب في القلوب

---

ليش تخافين ؟

مم وصدقج غدت السالفة عفسة اللي له حاجة واللّي ماله حاجة موجود في البلاد

الجرايم والسرقات اللي حاصلة من فترة بواسطة الهنود والباكستانيين من شو غير البطالة ( نحن ناقصين روحنا مبتلشين ) :fa44:

اعرف واحد من هلنا الله يهديه كفل هنود فوق الـ مادري كم وايد ( لو قلت العدد يمكن تقولون جذابة بس ها هب هالفترة من فترة الثمانينات ) تخيّلي هالهنود سوولهم شركة خاصة للبناء وكانوا معروفين في منطقتنا بعد . ولااا كنّا نييبهم يبنون لنا حجرة أو يهدون حيطة ابيزات يعني هب ابلاش ولاّ ديسكاونت ( خلاص Independent ) :tounge:
.
.

الهنود طالبوا بالجواز شو تبين نقول بعد < كبر راسهم! > ويحق لهم ع كثرتهم

والضرب فالميت حرام

الجنية ... وين بوكشة عنج :fa56:

اصدقين انا ماااااحس بالغربة الا في جميرا ................... اعوذ بالله من هالاجانب احس اني في اوروبا .. والمصيبه انهم يطالعون المواطنين باحتقار ودونيه وجني انا في بلادهم .... مصيبه فيهم وفي جلابهم ولبسهم.... :shutup:

اما الهنود .. فهذيل حبايبنا واهلنا ومالنا غنا عنهم .. ناكل من اكلهم ونلبس من صنع ايدهم :laugh:

هزايم ،،،

......... ما اقولج لا بس انا قصدي الجماعه اللي ما لهم لزمه وبعدين اي حد أيي البلاد يجابلهم أكثر من هل البلاد وطبعا الانطباع الأولي وايد مهم لا تنسين انه أغلبهم يلبسون كنادير مايدل أنهم من هل البلاد...

لا بأس بوجودهم لكن بنسبة معقوله


ورديه ...

وايدين من أمثال الي تكلمتي عنه للأسف نحن روحنا ما نحافظ عالبلاد فكيف انلوم غيرنا على الي نحن فيه ...الله يهديه وأمثاله ,,,


لبن مثلج
اذا بتين على المقارنه بين الهنود والأجانب فانا وياج اقدر اتقبل الهنود اكثر من الاجانب يعني ما أدري وين يتحرون عمارهم ياكلون من خيرنا ويكبرون راسهم ....
الله يعينا صدق جميرا بلادهم حشا

بلاهم الهنود فقرا ؟؟؟

يعني امنو اللي يسويلكم بيوتكم

وامنو اللي يسويلكم جاي كرك

وامنو اللي يسويلكم براتا

ما تدرين ...

يمكن نحن نستوي جي يوم افبمبي

كوليه :shutup:

واشوفكم اهناك حبايبي يوم الجمعه

وعقب الهنود يدخلون الواحات يتشكون منا

صح يا لسي برف " لبن مثلج "

يا مستر كوكو الفريج


الهنود ما فيهم شي طال عمرك
ومالنا غنى عنهم
بس القصد هالعماله الوافده بكمياتها الهائله قد تسبب الكثير والكثير
من المشاكل خصوصاً العاطلين عن العمل او الداخلين للدوله
بطريقه غير قانونيه ,,,
والكرك طال عمرك نقدر أنسويه رواحنا ما يباله شي

مشكوره اختي الكريمه الجنيه
فعلا هذه مشكله كبيره وهي موجوده في كل دول الخليج ولكن انا بحسب خبرتي في التعامل مع الاجانب لم ارى اسواء واعفن من الجنسيه البنقاليه وهم اكثر الجاليات مشاكل وجرائم ويستشف من يتعامل معهم حقد في صدورهم على اهل البلد ولاينجزون عملهم الا بالطقاق والمشاكل ويكون عمل غير مرضي لصاحب المصلحه واما الهنود فهم اقل مشاكل بكثير من البنقاليه واحسن منهم اخلاق واحسن عمل ومعامله والله اعلم واكيد كل واحد له تجربه خاصه
وعلى ذكر الاجانب
اذكر قصيده لبعض الشعراء نسيت اسمه يقول
متى بعون الله من بلدنا يروحون
ناس بعد مامنهم الا المضره
ناس يبيعون بكرمنا ويشرون
كثيرهم ماتأمن الناس شره
وحنا عددنا زاد كم مليون
واهل البلد يستاهلون المبره

مع كل الاحترام والتقدير لجميع الاخوه والاخوات

شخطبوط

صدقت يا خوي ،،

كل الشكر لشخصك الكريم

ويسلم من عد القصيد ,,,

هيه والله .. انا يوم اشوف هالشي والله قلبي يعورني على البلاد ..

شوفوا الروولة في الشارجه يوم الجمعه والله تحس عمرك في بومباي !!!

هييلا لو ايسوون انقلاب والله بنرووح فييها !!

نسبتنا نحن المواطنين بنسبه لعدد هالهنوود ولا شي والله !

الله يستر علينا

بنت الشارجه


الله لا يراويج والله ما تلقين مواطن بينهم ..

الصيف الي طاف سرنا الشارجه أندور مصمم طايح حظه وطبعا ما تمت بقعه الا ودخلناها ونحن اندور عليه

وفي الأخير وصلنا لشارع الروله دخلنا مثل السكه بس في الأخير أكتشفنا انها دورا بشري يتكون من الهنود والله زغنا والدريول الله ينطبه يتخشش بينهم أشوي وبيدعمهم ...

صدق ذاك اليوم تراوالي أني في مومباي ...

صدقج يا "الجنية" بصراحة أذيغ اسير الاماكن اللي فيها هنود :(
وجود العمالة الاجنبية ببلادنا مشكلة تتفاقم يوم بعد يوم ..
والأدهى أني في مناطق في مدن الدولة بس للهنود .. يعني مساكنهم دكاكينهم ومحلاتهم ( وحتى مراكزهم )
يعني تقدرين تسمينها شعبية الهنوود.. وتحسين انج الغريبة بينهم وهم أهل البلد ..

عليكم السلام ورحمه الله

يوم الجمعه للهنود و يوم الاربعاء الخميس للعامه و اسيام الاسبوع للجانب ..

اهل البلاد يحليلهم ما يبينون كأنهم سياح يايين البلاد ..

للاسف اصبحت الامور مغلوبه رأسا على عقب و وكذلك الامور صارت مب بيدينا
توافدوا الينا و بالاصح نحن من جلبناهم و الان نتحمل عواقبهم ..

الاسواق الضيقه و القديمه منها سوق مرشد و نايف و السبخه و سكه الخيل و سوق
السطوه و الكرامه لا مجال انك اتروحله ايام الخميس و الجمعه لانه ما يسر لانه الحبايب
متفيزرين ..
على قوله دكتور عندنا في الكليه الله يذكره بالخير ، اتسير سوق السبخه يوم الجمعه اتشوف
الهنود وافقين جدام بعض و كل واحد يشوف الثاني و ما يرمسون بس يهزون روسهم خخخخخ
للاسف مره سرت سوق السبخه طبعا مب قاصد السوق و انما اريد اروح مركز شرطه نايف
و يوم شفت اللي شفته ما اعرف كيف اعبر عنه ، اعجر عن التعبير هل هو احتفال رسمي للهنود
في المكان ومش الهنود رواحهم هم والبتان والجاليات اللي مثلها ..

الاجانب في جميرا و الممزر غلبهم الطابع العام و ما عاد يعبر اي شخص سواء من العامه او
الموظفين الحكوميين لدرجه احيانا بعض الاجانب لا يعير اي اهتمام لرجال الشرطه ، ليش و شو
السبب فأنا اجنبي ، واتحمل اتقولي شيء ..

و طبعا ها الشيء ما يرضينا ما شيء غير العين الحمره مرات ، بس لين متى ما بنقدر و حتى لو
عاندناهم و ضاربناهم و سوينا اللي سويناه بيردون اللوم علينا ..

صارت مواقف وايده و شفنا منها الكثير ..

الله يستر و يعينا ..

تسلمين يالجنيه ع الموضوع خليتينا نتحرطم شويه ..

قلوب دبي

صدى جوفي

والله صدقتي شعبية الهنودمنتشره في كل مكان

ياأختي استوت مناطق بكبرها ملك لهم ليس رسمياً ولكن شكلاً وعدداً

الله يستر هذا غير المشاكل المصاحبه لهالوجود الطاغي ..


قلوب دبي

الأجانب ... أففف عاد ماأدري وين يتحرون عمارهم

بخبركم سالفه كل يوم وأنا سايره الدوام أتلاقى ويا وحده كنديه فنفس المنطقه بالظبط عندها باجيرو أحمر اتسوق على الخط السريع 60 وأنا مستعيله اديم لها اتطنشني ومستانسه على عمرها حاطه علم كندنا على السياره ...
تجاوزتها ولقتنها درس عجيب في الحياه تجدمتها وتميت اسوق على 20 وهي بغت اتموت ويوم اتديم اسويلها طاف ويوم اتحاول اتغير الشارع اسرع ويوم اشوفها استانست ومسرعه ارد على السرعه الأوليه 20 هههههه من ذاك اليوم من اتشوف ألتيمتي من بعيد على طول اتغير شارعها...