وجهات نظر حول ظاهرة الاختلاط ( شباب مع بنات )

السلام عليكم ورحمة الله وبركاته ...

حبيت اطرح هذا الموضوع لأهميتة وتعارض غالبية الآراء حوله

فئة من الناس تؤيد الاختلاط وتشيد بأنها ظاهرة تحفز الطالب او الطالبة على
المضي قدما لمستقبل واعد.

وأيضا .. وجود الجنس اللطيف بجانب الشاب في الصف الدراسي
يحمسه ويحفزه على الدراسة والمذاكرة

كي لا يسأل من قبل المدرس و ينحرج بعدم معرفته والعكس صحيح. ( يتفشل :fa55: )

ومن الجوانب الايجابية ايضا .. عدم الشعور بالحياء إزاء التكلم والتحدث مع
الآخرين (يعني يكون اجتماعي اكثر)


وهناك فئة من الناس تعارض هذه الظاهرة لأسباب منها الخوف على الابناء من الوقوع في أخطاء اثر

اتصالهم ببعض يوميا .. وهم في سن المراهقة ..

وكذلك وجود العادات والتقاليد التي تشكل حاجزا قويا أمام الاختلاط ..


إذا .. هل تؤيد هذه الظاهرة ام تعارضها ولماذا؟

وهل هي من مظاهر التطور وخلافها تخلف ؟

و عليكم السلام و رحمة الله و بركاته

إنسان عادي

بصراحة.. أنا من المعارضين لهذه الظاهرة

فقد قلت بأنه من الجوانب الإيجابية عدم الشعور بالحياء إزاء التكلم والتحدث مع الآخرين

و هذا لا ينطبق على الجميع فقد يكون عكس ذلك لدى الكثيرين

أما عن سؤالك حول كون هذه الظاهرة من مظاهر التطور أم التخلف

فلا أعتقد بأنها من مظاهر التطور فإن كان ديننا قد نهانا عن ذلك

فلا بد أن يكون من الأفضل لنا تجنب الإختلاط

..

أشكرك أخي على هذا الموضوع

..
تحياتي
وحي القلم

عليكم السلام والرحمه

بصراحه اخوي ضحكتني يوم قلت ان واحد من الاسباب الي تجعل بعض المدارس والجامعات تخلط هو ( تحفيز الطالب على المداومه والدراسه )

شو يعني البنت بتسوي .. بتقوي عامل التركيز عند الولد !!

الموهيم

انا مع الاختلاط في حال انه ما يضر للبنت
وضده اذا يضر البنت

ذكرتني بـ سالفة اختياري للجامعات

كنت ناويه ادخل الامريكيه .. بس دخلت جامعة زايد ..
لأن ماما قالت لي بصريح العباره .. انتي مب بسن تسمح بان تختلطين بالشباب ..
مب لأنها مش واثقه فيني . . لأنها مب واثقه من عيال الناس .... وسبب ثاني بس مب مرتبط بعامل الgender وهو ان شهادة امريكية دبي بعدها مب معترف فيها بغض النظر عن ان مكتب الشيخ محمد يتابع الطلبه اثناء دراستهم وبعد تخرجهم ويضمن لهم وضايفهم

مشكور اخوي "وحي القلم" على الرد ..

بس حبيت انوه اني لين الحين ما أبديت رايي بالموضوع ..

انا طرحته واحب من خلاله اشوف الآراء من البنات ومن الشباب ...


مم .. وبخصوص " بأنه من الجوانب الإيجابية عدم الشعور بالحياء إزاء التكلم والتحدث مع الآخرين "
اللي اقصده ان اكثرية الشباب يستحون يتكلمون مع البنات حتى ولو من اهاليهم والبنات نفس الشيء .. فالاختلاط يكسر هذا الحاجر ويعودهم على التكلم مع مختلف الجنسيات ..

وارجع مرة ثانيه واقول .. انا طرحت الموضوع وأحب اسمع الآراء .. لم اعرض رائي ..

وشكرا

مشكورة اختي " ام خدود على الرد "

وحبيت اوضحلج جملة " تحفيز الطالب على المداومه والدراسه " ..

في المحاضرة .. لابد من المحاضر او الدكتور من سؤال الطالب او الطالبة ..

فإذا عاش الطالب الكسول في جو محاورة واسئلة واجوبة وتوجه المحاضر بسؤال له ولم يعرف اجابته فهذا يسبب له احراج امام الفتيات والشبان .. وبتالي يحاول ان يجتهد ويبدأ بالمذاكرة لكي لا يوضع في نفس الموقف المحرج

وهذا من نسيج الواقع يا اختي "ام خدود" والله يوفقج في دراستج وين ما كانت

وبعدين انا ما كتبت " تحفيز الطالب على المداومه والدراسه " :(
انا كتبت " تحفيز الطالب على الدراسه و المذاكرة "

والسموحه

السلام عليكم و رحمه الله و بركاااته
مشكووور اخوي على طرحك هالموضوووع الرائع

انا ضد الاختلاااط
الصرااااحه نحن عاداتنا و تقاليدنا ما تسمحلنا بالاختلااااط
يعني انا بتكلم عن نفسي .. نحن ويا شباب عايلتنا ما نختلط ويااااهم والأحق ان نختلط وياااهم من ان نسير و نختلط ويا الغرب و بعديييين الدنيا الحين مافيها امان و مابقووول البنيه حليلها ماتسوي شي..... انا احط اللوم على الشباب و البنات


و علشااان جيه ارفض رفضا باتا الاختلاااااااط




و السمووووحه

والله ياااخوي من ناحيتي انا معاارض..يعني الحين اختلاط ف المولات و شوف كيف:fa56: كيف لو بالمدارس:fa55:

بس مثل ما قلت الشي الايجابي الوحيد بيكون:

اقتباس:

---

المشاركة الأصلية كتبت بواسطة انسان عادي

وأيضا .. وجود الجنس اللطيف بجانب الشاب في الصف الدراسي

يحمسه ويحفزه على الدراسة والمذاكرة

كي لا يسأل من قبل المدرس و ينحرج بعدم معرفته والعكس صحيح. ( يتفشل :fa55: )

---

هذا الشي صحيح..ويعطي الطالب داافع أكبر..حركاااات شبابنا بعد:fa56:

و مشكووووووور أخوي عالموضوووع و عساااااك دووم عالقوه

:shocked: الصراحه ، انا معارض بشدة موضوع الاختلاط ، السبب العادات والتقاليد.

هذا كلامي بختصار والسموووحه.

تسلم اخوي عالموضوع :blush:

من جانبي معارضة لفكرة الاختلاط ..

لانها اولا ضد قيمنا الاسلامية وثقافة عاداتنا وتقاليدنا .. ولو فتح باب الاختلاط

بتتنطمس ثقافتنا وعاداتنا وتقاليدنا في المجتمع و بتتغير وبتاخذ لها منحى آخر ,,

وشي ثاني انت قلت انه الحياء بيقل في التحدث مع الناس .. اعتبرتها انت ايجابية

واعتبرها انا سلبية ( في فرق بين الثقة والحياء),,, لان لو حدث الاختلاط البنت بيقل حياءها وايد

اذا في حالة الدكاتره اللي يدرسونا نسبة كبيرة من البنات يتحرونهم محارم ! عادي الشعر يظهر عادي

كل شي يظهر بس لانه دكتور .. ونفس الشي اللي يشتغلون في الحرم الجامعي .. كلهم محارم بالنسبة للبنات ..


تخيل عاد لو ويانا في الكلاسات!
البنت بترابع الشباب

وبتدرس وياهم وبتاكل وياهم .. وبتحل وياهم البروجكتات .. ومابيكون عندها تحفظ في المعامله

بينها وبين جنس الذكور.. هذا غير البلاوي اللي بتستوي ,, وهالشي مب من عاداتنا ولا تقاليدنا ولا دينا ,, والحياء في البنت ميزة

والاختلاط بيولد عندها جرأة غير محببة بالنسبة للفتاة ..

وعلى سالفة ان الشباب والبنات بيجتهدون في الدراسه .. يمكن ايكون هالشي صح من جانب

ومن جانب ثاني تقل نسبة تركيزهم واجتهادهم .. لان كلا الطرفين بينشغلون ببعض وبتكون عندهم

سوالف الحب وهالاشياء .. اللي بتقلل من نسبة تركيزهم في الدراسه .. وهالشي اثبتته احدى الدراسات الامريكيه ..

واحسن شي ايبوون للشباب مدرسات بدل الاساتذه ايدرسوونهم عسب يجتهدوون ,, لانهم عشان خاطر

عيون المس يمكن يدرسوون واييبون نتايج حلوة ..

والسموحه عالاطاله .. :)

السلام عليكم

اعارض

حمدالله اني بمدرسة بنات بقسم واولاد بقسم
مرة بس حضرت اجتماع بنات واولاد مع الادارة عن حفلة التخرج
كان مصخرة x مصخرة
حتى ان ما قدرنا نكمل الاجتماع طلعنا

1- حركات الاولاد كان overlimit بس همهم كيف يخلون هاي تجوفوهم و لانها هاي تعييبهم
يوقفون وياها واذا هاي لا تطنزوا عليها
حتى الاولاد بين بعض زين ما تكافخوا :wacko:
واذا تكلم المدير ردوا عليه و اتمصخروا عليه عشان يبينون عمارهم رياييل :fa55:

عيل كيف لو حصة :fa55:

2- بصراحة ما نرتاح جي ما نعرف وين نطالع السقف ولا الارض :fa54:

واهم شي الدين منع هالشي

انزين بتقولون انتي رايحة تدرسين مب تلعبين
هيه اوكي انا رايحة ادرس بس مب الكل رايح يدرس :look:

وبعدين بالنسبة لي اتم استحي .. واييد احسن عن انه يتم عندي هالشي عادي

ها رايي :look:

تسلم اخويه على الموضوع

انا بنسبة لي اعارض هاي الفكرة
اولا لنه ها الشي يعارض دينا وعاداتنا وتقاليدنا
وثاني شي اوكي في شباب بيستحون من البنات يوم الاستاذ بيحرجة
لاكن هب كل الشباب جي في شباب عادي عدهم وبعدين مابيهتمون في دراستهم
كثر مابيهتمون في السوالف الثانية ولاتنسى انه اكيد بيشل رقم بيتهم عسب اونه يسال البنت عن واجب
او درس وهذا بيعتبر خلوه مبين الاثنين وعاد شوف بعدين شو بيستوي

واذا الولد يبا يجتهد بيجتهد مايهمة اذا كان في الصف بنات واولاد ولا اولاد برحهم

هذا راي
والسموحة

بسم الله الرحمن الرحيم ..

في البداية اشكر الجميع على الردود وأحيي فيكم خوفكم وغيرتكم على أهاليكم وأعراضكم

انا طرحت هذا الموضوع عشان اأكد وجهة نظري .. لأني سبق و طرحته مع الشباب وللأسف أيدوا هذه الفكرة "لغاية في نفس يعقوب" مثل ما يقولون

فحبيت اقيس النبض في الواحات واشوف ردود البنات بالذات .. والحمدلله اتضحلي ان الدنيا بعدها بخير ..

بالنسبة لي أنا .. قارنت الرأييتن فشفت ان مساوئ الاختلاط اكثر من فوايدة .. فليش نفتح لنا باب آخر للمشاكل وويع الراس .. الأضرار الناتجه عن الاختلاط العن من الفوايد ...

المتفيزرة عالعرقوب : والنعم براييج ... وأحلى شيء فيج انج ما درتي مع بنات جنسج

روح خور فكان: العفو والله يقويك الغالي

ولد الحكومه : الله يسلمك وويوفقك

الغالية : احترم راييج وأنتي لمستي الواقع بس بعد مب كل الشباب نفس الطبايع والبنات بعد

عفارييتتوو : شكرا على ردك بس حبيت اقلك شيء " اللي يستحي ما يعيش "

الدلوعة : الله يسلمج الشيخه ومشكورة على الرد

وسامحونا على القصور

تسلم اخوي ع الموضوع...وأنا ما أعارض هالفكرة لأن الجامعات المختلطة( الأمريكية) اهون من كلية البنات...واحنا سمعنا بلاوي عن هالكلية....إذا البنية كانت محترمة خلاص بتم محترمة في اي مكان سواء مختلط ولا لا...بس اذا كانت مب محترمة خلاص بتم جي في أي مكان سواء مختلط ولا لا... ولا تتحرون إن الخرابيط اللي تستوي في المولات تستوي في الجامعات المختلطة ... هذي وجهة نظري والسموووحة...


اختكم:دلوعة دبي

بااك

صح كلامك اخوي اللي يستحي ما يعيش
بس ع الاقل يتم بالsafe side

و بعدين لا تنسون البلاوي اللي تصير بره في حرم الجامعة :wacko:
من مخدرات و غيرها
AUD اكبر دليل

السلام عليكم

أعتقـد انه دام الاسـلام حـرم هالشـي ، حـرام نحـن نقـول عادي يستوي ونحن مع هالشي
خلاص دامنا مسلمين فدينا بين لنا حكم هالشي ليش نصحح الخطأ غصب ونمشي في دربه > جي بنكون حللناه

وشكرا

السلام عليكم ,,
اخي انسان عادي , اشكرك على هذا الموضوع القيم الذي نسيه الحقيقة الكثير من الناس وبات من المحللات تقريبا .. كما ان بعض المدارس والجامعات قد سمحت بالاختلاط .. وهذا في الحقيقة من اكبر الاخطاء , لان في ذلك العديد من المخاطر , منها انشغال التفكير بالجنس الآخر, وقد تتطوّر الامور الى علاقات تكون الفتاة اول الخاسرين فيها .. واخرياً فلنتذكر بأن الدين قد حرّم علينا الاختلاط .. فلذلك يجب علينا اتباعه وعدم تقليد الغرب ..

اختي أم خدود,
لم افهم في الحقيقة ما معنى قولج بأنكِ مع الاختلاط اذا لم يكن على البنات ضرر فيه .. كيف لن يكون فيه ضرر ؟
انا ارى ان الضرر من كل النواحي .. اولها الاخلاقية ,فإذا البنت كانت حاشمة عمرها , فاللي حواليها من الشباب ليسوا كلّهم ذو حشيمة .. واصلا الدين حرّم علينا هذا الشي , فلماذا نخترع طرق نخدع انفسنا بها بأنها جيّدة كما قلتي (اذا ماكان فيه ضرر على البنت) وتوصلنا الى الحرام ؟...

وشكرا,
عليوي